ᒪᓕᒐᓕᐅᕐᕕᒻᒥ ᑲᑎᒪᔾᔪᑎᒥᓃᑦ ᐋᖅᑭᒋᐊᖅᓯᒪᓐᖏᑦᑐᑦ ᓇᕿᑦᑕᖅᑕᐅᓯᒪᔪᑦ ᐊᐃᑉᐹ, ᒪᐃ 26, 2026 ᐃᖃᓗᐃᑦ, ᓄᓇᕗᑦ ᐋᖅᑭᒋᐊᕈᑎᑦ: ᐊᑏ ᐅᑎᖅᑎᓯᐅᒃ ᐋᖅᑭᒋᐊᖅᑕᐅᔪᐃᑦ ᑎᑎᕋᖅᑎᒧᑦ ᐅᕝᕙᓘᓐᓃᑦ ᑐᖏᓕᐊᓄᑦ ᒪᓕᒐᓕᐅᕐᕕᒻᒥ ᑲᑎᒪᔾᔪᑎᒥᓃᑦ ᓇᕿᔾᔪᑕᐅᓐᖏᓚᑦ ᑐᑭᓕᐊᖅᑕᐃᓐᓇᕆᓗᒋᑦ ᒪᓕᒐᓕᐅᖅᑏᑦ ᐊᐃᕙᓂᖏᑦ. ᓇᕿᑕᐅᓯᒪᑐᐃᓐᓇᖅᑐᐃᑦ ᐅᖃᐅᓯᐅᓪᓗᐊᑕᖅᑐᑦ. ᐅᖃᖅᑕᐅᒃᑲᓂᖅᑐᒥᒃ ᐊᓯᐊᑎᒍᓪᓘᓐᓃᑦ ᓲᕐᓗ ᓇᓗᓇᐃᖅᑕᐅᔪᖃᒃᑲᓐᓂᕆᐊᖃᖅᐸᑦ ᐋᖅᑭᒋᐊᖅᑕᐅᔪᓐᓇᖅᑐᑦ ᑭᓇᑐᐃᓐᓇᖅ ᒪᓕᒐᓕᐅᕐᕕᒻᒥ ᑲᑎᒪᔾᔪᑎᓂᑦ ᐅᖃᓕᒫᖅᑐᑦ ᓱᖅᑯᐃᒪᓂᐊᕐᒪᑦ ᐅᖃᖅᑕᒥᓂᕐᒥᒃ. ᑲᑎᒪᐅᑎᒥᓂᓕᕆᔪᑦ ᐅᖃᓕᒫᕋᓐᓂᑦᑎᑦᓯᔭᕆᐊᓖᑦ ᐊᔾᔨᒌᑉᐸᓐᖏᒻᒪᑎᒃ ᐅᖃᖅ ᑕᐅᔪᖅ ᑎᑎᕋᖅᓯᒪᔪᕐᓗ. ᐊᐃᕙᔾᔪᑎᒥᓃᑦ, ᓯᑎᐱᕆ 20, 1983, ᒪᑉᐱᑐᒐᖓ 27299. ᐴᓯᔅᓂᐅᑉ 6-ᖓᓐᓂᒃ ᓇᕿᑕᐅᔾᔪᑎᖓ, ᑎᓕᓯᔾᔪᑎᒃ 55

ᓄᓇᕗᑦ ᒪᓕᒐᓕᐅᕐᕕᖓ ᐅᖃᖅᑎ ᐊᖓᔪᖅᑳᖅ ᑕᐃᕕᑎ ᔪᐊᓇᓯ (ᕿᑭᖅᑖᓘᑉ ᓂᒋᐊ) ᐊᐅᓚᑦᑎᔩᑦ ᐊᓪᓚᑦᑎᐅᑲᐃᓐᓇᖅᑐᖅ ᐊᓪᓚᑦᑎᐅᑉ ᑐᓪᓕᐊ ᓯᑏᕙᓐ ᐃᓄᒃᓱᒃ ᕙᓐᑎ ᐱᐊᓐᔅ ᐊᓪᓚᑦᑎᐅᑉ ᐃᑲᔪᖅᑎᖓ ᖂᔪ ᓄᓱᑦᑕᖅ ᒪᓕᒐᓕᕆᔨ ᒪᐃᑯᓪ ᓵᓐᑐᓗ ᐃᖅᓱᖅᑎ ᒪᓕᒃᑐ ᓄᓱᑦᑕᖅ ᑲᑎᒪᐅᑎᓂᒃ ᐋᖅᑭᒃᓱᐃᔩᑦ ᐅᖃᐅᓯᕐᒥᒃ ᐅᖃᐅᓯᕐᒧᑦ ᑎᒥᖓᑦ ᑎᑎᖅᑲᒃᑯᕕᒃ 1200 ᐃᖃᓗᐃᑦ, ᓄᓇᕗᑦ X0A 0H0 ᐅᖄᓚᐅᑖ (867) 975-5000 ᓱᒃᑲᕈᑖ (867) 975-5190 ᐊᑭᖃᓐᖏᑦᑐᖅ (877) 334-7266 ᐊᖓᔪᖅᑳᖅ ᒍᐊᐃᓐ Hᐄᓕ ᐊᕿᐊᕈᖅ (ᐃᖃᓗᐃᑦ−ᒪᓂᕋᔭᒃ) ᒥᓂᔅᑕ ᐃᓄᓕᕆᔨᒃᑯᓐᓄᑦ;ᒥᓂᔅᑕ ᑲᒪᒋᔭᖃᖅᑐᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂᑦ; ᒥᓂᔅᑕ ᑲᒪᒋᔭᖃᖅᑐᖅ ᐊᖏᕐᕋᖃᖏᓐᓂᕐᒥᒃ; ᒥᓂᔅᑕ ᑲᒪᒋᔭᖃᖅᑐᖅ ᐊᒃᖢᓂᕐᒥᒃ ᒥᒃᖠᒋᐊᖅᑎᑦᑎᓂᕐᒧᑦ; ᒥᓂᔅᑕ ᑲᒪᒋᔭᖃᖅᑐᖅ ᐊᕐᓇᐃᑦ ᑲᑎᒪᔨᖏᓐᓂᒃ; ᐊᖓᔪᖅᑳᖅ ᑕᐃᕕᑎ ᐊᕿᐊᕈᖅ (ᐃᖃᓗᐃᑦ-ᓂᐊᖁᙴ) ᒐᕙᒪᒃᑯᑦ ᓯᕗᒃᑲᖅᑕᖅᑎᖓ; ᒥᓂᔅᑕ ᐃᓕᓐᓂᐊᖅᑐᓕᕆᓂᕐᒧᑦ; ᒥᓂᔅᑕ ᑲᒪᒋᔭᖃᖅᑐᖅ ᓄᓇᕗᒻᒥ ᓯᓚᑦᑐᖅᓴᕐᕕᖕᒥᒃ ᕼᐋᓇ ᐊᖑᑎᐊᓗᒃ (ᐊᐃᕕᓕᒃ) ᐃᐊᑦᕗᑦ ᐊᑕᒍᑦᑖᓗᒃ (ᐊᒡᒍ) ᐊᖓᔪᖅᑳᖅ ᔮᓂᑦ ᐳᕉᔅᑐ (ᐃᖃᓗᐃᑦ-ᓯᓈ) ᒥᓂᔅᑕ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ; ᒥᓂᔅᑕ ᑲᒪᒋᔭᖃᖅᑐᖅ ᐃᒻᒥᓃᖅᑕᐃᓕᒪᑎᑦᑎᓂᕐᒧᑦ ᐊᖓᔪᖅᑳᖅ ᔪᐊᔾ Hᐃᒃᔅ (ᐃᖃᓗᐃᑦ-ᑕᓯᓗᒃ) ᓄᓇᕗᒻᒧᑦ ᓯᕗᓕᖅᑎᐅᑦ ᑐᖓᓕᖓ; ᒥᓂᔅᑕ ᒪᓕᒐᓕᕆᓂᕐᒧᑦ; ᒥᓂᔅᑕ ᐃᖏᕐᕋᔪᓕᕆᓂᕐᒧᑦ ᒪᑭᒪᐅᑎᓄᓪᓗ; ᒥᓂᔅᑕ ᑲᒪᒋᔭᖃᖅᑐᖅ ᐃᖅᑲᓇᐃᔭᖅᑐᓕᕆᓂᕐᒧᑦ ᑲᑎᒪᔨᓂᒃ; ᒥᓂᔅᑕ ᑲᒪᒋᔭᖃᖅᑐᖅ ᐃᓄᐃᑦ ᐱᔪᓐᓇᐅᑎᖏᓐᓄᑦ ᑲᑎᒪᔨᓂᒃ ᔭᐃᒥ ᖃᑉᓗᑦᓯᐊᖅ (ᐊᕐᕕᐊᑉ ᓂᒋᐊ) ᕗᕆᐊᑦ ᐲᑕᓴᓐ (ᐃᖃᓗᒃᑑᑦᑎᐊᖅ) ᒍᐊᑕᓐ ᑲᐅᑕᒃ (ᐅᖅᑯᒻᒥᐅᑦ) ᐊᖓᔪᖅᑳᖅ ᐳᕋᐃᔭᓐ ᑯᓄ (ᑐᓄᓂᖅ) ᒥᓂᔅᑕ ᐃᓕᖅᑯᓯᓕᕆᔨᒃᑯᑦ; ᒥᓂᔅᑕ ᐅᖃᐅᓯᓕᕆᓂᕐᒧᑦ; ᒥᓂᔅᑕ ᐊᕙᑎᓕᕆᓂᕐᒧᑦ; ᒥᓂᔅᑕ ᐆᒻᒪᖅᑯᑎᓕᕆᓂᕐᒧᑦ ᓴᐃᒪᓐ ᖁᓕᒃᑖᓇ (ᖁᕐᓗᖅᑑᖅ) ᐊᖓᔪᖅᑳᖅ ᓯᓯᐅᓪ ᓂᐅᓪᕙᓇ ᓚᐃᔪᓪ (ᓇᑦᓯᓕᒃ) ᒥᓂᔅᑐ ᑲᒪᒋᔭᖃᖅᑐᖅ ᓄᓇᕘᑉ ᐃᒡᓗᓕᕆᔨᕐᔪᐋᒃᑯᖏᓂ ᐊᖓᔪᖅᑳᖅ ᐋᕐᓗᒃ ᒪᐃᓐ (ᐊᕐᕕᐊᑉ ᐅᐊᓐᓇᖓ-ᑎᑭᕌᕐᔪᐊᖅ) ᓯᕗᓕᖅᑎ ᓄᓇᕗᒻᒥ; ᒥᓂᔅᑕ ᓯᕗᓕᖅᑎᓄᑦ ᒐᕙᒪᐅᖃᑎᒌᒃᑐᓕᕆᔨᒃᑯᓐᓄᓪᓗ; ᒥᓂᔅᑕ ᑮᓇᐅᔭᓕᕆᓂᕐᒧᑦ; ᒥᓂᔅᑕ ᑲᒪᒋᔭᖃᖅᑐᖅ ᓄᓇᖃᖅᑳᖅᓯᒪᔪᓕᕆᓂᕐᒥᒃ; ᒥᓂᔅᑕ ᑲᒪᒋᔭᖃᖅᑐᖅ ᑲᓇᑕᐅᑦ ᓯᓚᑖᓃᖖᒑᖅᑐᓄᑦ; ᒥᓂᔅᑕ ᑲᒪᒋᔭᖃᖅᑐᖅ ᐆᒻᒪᖅᑯᑎᑦ ᐊᑭᖏᓐᓂᒃ ᕿᒥᕐᕈᔩᑦ ᑲᑎᒪᔨᖏᑦ; ᒥᓂᔅᑕ ᑲᒪᒋᔭᖃᖅᑐᖅ ᐃᓐᓇᕐᓂᒃ; ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥ ᐃᒥᐊᓗᓕᕆᓂᕐᒧᑦ ᓱᕐᕋᓐᓇᖅᑐᓕᕆᓂᕐᒧᓪᓗ ᑲᒥᓴᓐ; ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥ ᐃᒥᐊᓗᓕᕆᓂᕐᒧᑦ ᓱᕐᕋᓐᓇᖅᑐᓕᕆᓂᕐᒧᓪᓗ ᑲᑎᒪᔨᖏᓐᓄᑦ; ᔮᓂ ᒪᐃᒃ (ᐸᓐᓂᖅᑑᖅ) ᑕᐃᕕᑦ ᐳᐊᑐ (ᐅᖅᓱᖅᑑᖅ) ᐊᐃᕝᕙᓚᕼᐋ ᖃᒪᓂᖅ (ᐊᒥᑦᑐᖅ) ᑖᓂᐅᓪ ᖃᕝᕕᒃ (ᑕᓯᐅᔭᕐᔪᐊᖅ) ᐋᓕᒃᓵᓐᑐ ᓴᒻᒧᖅᑐᖅ (ᑲᖏᖅᖠᓂᐅᑉ ᐅᐊᓐᓇᖓ-ᐃᒡᓗᓕᒑᕐᔪᒃ) ᐃᓐᓇᖓᔪᖅ ᖂᑭᐊᖅ (ᓇᑦᓯᓕᒃ) ᐋᓕᒃᓵᓐᑐ ᓴᒻᒧᖅᑐᖅ (ᑲᖏᖅᖠᓂᐅᑉ ᐅᐊᓐᓇᖓ-ᐃᒡᓗᓕᒑᕐᔪᒃ) ᐊᖓᔪᖅᑳᖅ ᑯᕋᐃᒃ ᓯᒪᐃᓚᒃ (ᖃᒪᓂᑦᑐᐊᖅ) ᒥᓂᔅᑕ ᓄᓇᓕᖕᓂ ᒐᕙᒪᒃᑯᓂᓪᓗ ᐱᔨᑦᑎᖅᑎᒃᑯᑦ; ᒥᓂᔅᑕ ᑲᒪᒋᔭᖃᖅᑐᖅ ᓄᓇᕗᒻᒥ ᓇᖕᒥᓂᖃᖅᑐᓄᑦ ᐊᑐᖅᑐᐊᕐᕕᒃ; ᒥᓂᔅᑕ ᑲᒪᒋᔭᖃᖅᑐᖅ ᐅᔭᕋᖕᓂᐊᕐᓂᕐᒧᑦ; ᒥᓂᔅᑕ ᑕᐅᖅᓯᕋᕐᓂᕐᒥᒃ ᐱᓕᕆᐊᒃᓴᓕᒃ; ᐊᖓᔪᖅᑳᖅ ᐋᓂ ᑕᑦᑐᐃᓂ (ᑲᖏᖅᖠᓂᐅᑉ ᓂᒋᐊ) ᒥᓂᔅᑕ ᑲᒪᒋᔭᖃᖅᑐᖅ ᐃᖅᑲᓇᐃᔭᖅᑐᓕᕆᓂᕐᒧᑦ; ᒥᓂᔅᑕ ᑲᒪᒋᔭᖃᖅᑐᖅ ᐃᖅᑲᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᐊᒻᒪ ᓇᓪᓕᐊᒃᑯᒫᓂᒃ ᖃᐅᔨᓴᖅᑏᑦ ᓯᑏᕙᓐ ᑕᖅᑐ (ᖁᑦᑎᒃᑐᕐᒃ)

ᖃᕋᓴᐅᔭᑎᒍᑦ ᑐᕌᕈᑎᖓᑦ: www.assembly.nu.ca

ᐃᓗᓕᖏᑕ ᓇᓕᖅᑲᖏᑦ 1: ᑐᒃᓯᐊᕐᓂᕐᒧᑦ ᒪᑐᐃᖅᑕᐅᓂᖓ ......................................................................................................................................... 1 2: ᒥᓂᔅᑕᐃᑦ ᐅᖃᐅᓯᒃᓴᖏᑦ .................................................................................................................................................. 1 3: ᒪᓕᒐᓕᐅᖅᑏ ᐅᖃᐅᓯᒃᓴᖏᑦ ........................................................................................................................................... 7 5: ᐃᓕᓴᖅᓯᓂᖅ ᐳᓛᕆᐊᖅᓯᒪᔪᓂᑦ ᒪᓕᒐᓕᐅᕐᕕᖕᒧᑦ ...................................................................................................... 9 6: ᐅᖃᐅᓯᒃᑯᑦ ᐊᐱᖅᑯᑏᑦ ................................................................................................................................................... 10 19: ᑐᒡᓕᐊᓂ ᐅᖃᓕᒫᖅᑕᐅᓂᖏᑦ ᒪᓕᒐᒃᓴᑦ .................................................................................................................. 23 20: ᑲᑎᒪᔨᕋᓛᑦ ᑕᒪᐃᓐᓄᑦ ᒪᓕᒐᒃᓴᓄᑦ ᐊᓯᖏᓐᓂᓪᓗ ᐃᓱᒪᖅᓴᖅᓯᐅᕐᓂᖏᑦ........................................................... 24 21: ᑲᑎᒪᑐᐃᓐᓇᓚᐅᖅᑎᓪᓗᒋᑦ ᐅᓂᒃᑳᑦ ........................................................................................................................... 50 22: ᑲᑎᒪᔾᔪᑎᒃᓴᐃᑦ ............................................................................................................................................................... 50

ᐃ. ᖃᐅᑕᒫᒧᑦ ᖃᐅᔨᒋᐊᕈᑎᑦ ᐊᐃᑉᐹ, ᒪᐃ 26, 2026.......................................................................................................................................................... 1 ᐅ. ᐊᖓᔪᖅᑳᑦ ᐅᓂᒃᑳᖏᑦ 14 – 7(2): ᒥᓂᔅᑕ ᐃᒡᓗᒥᑦ ᐅᐸᒍᑎᓯᒪᙱᑦᑐᖅ (ᓯᒪᐃᓚᒃ) ........................................................................................... 1 15 – 7(2): ᑲᓇᑕᒥ ᐋᓐᓂᐊᓯᐅᑎᓄᑦ ᐱᓇᓱᐊᕈᓯᖓ ᑖᓐᓇᓗ ᐃᓕᖅᑯᓯᕐᑯᑦ ᖁᔮᖃᕈᑎᒧᑦ ᓴᖅᑭᔮᑎᑕᖅ (ᐳᕉᔅᑐ) 1 16 – 7(2): ᐃᖅᑲᓇᐃᔭᑐᑐᖃᓄᑦ ᐱᔨᑦᑎᖅᑎᓄᑦ ᐃᓚᓴᖅᓯᐅᑎᖏᑦ ᑭᕙᓪᓕᕐᒥ (ᑕᑐᐃᓂ) ........................................ 2 17 – 7(2): ᓗᐊᕋ ᐅᓪᓗᕆᐊᖅ ᒐᐅᑎᔭᐃ ᐊᒻᒪ ᓄᐊ ᐸᓂᔪᒃ ᐃᓕᓐᓂᐋᖅᑐᓄᑦ ᐃᑲᔫᓯᐊᑦ (ᕼᐄᓕ-ᐊᕿᐊᕈᖅ) ...... 3 18 – 7(2): ᐸᐃᑉᐹᓕᑉᓄᑦ ᖃᐅᔨᔭᒃᓴᑦ, ᐊᔪᙱᓐᓃᑦ, ᖃᐅᔨᒪᔭᓄᓪᓗ ᐱᓇᓱᐋᕈᓯᖓ (ᒪᐃᓐ) .................................... 4 19 – 7(2): NHC ᑲᑐᔾᔨᖃᑎᖓ ᐊᒡᓃᑯ ᐄᒍᒥᒃ (ᓚᐃᔪᓪ) ............................................................................................... 5 20 – 7(2): ᑲᐱᔭᓕᖅᑑᑉ ᐃᒃᐱᐊᕐᔫᖓᓂ ᐅᔭᕋᖕᓂᐊᕝᕕᒃ ᑕᑯᓇᒃᑎᑕᓄᑦ (ᓯᒪᐃᓚᒃ) ................................................... 6 ᐊ. ᒪᓕᒐᓕᐅᖅᑏᑦ ᐅᓂᒃᑳᖏᑦ 35 – 7(2): ᐋᓐᓂᐊᖅᑐᓕᕆᓂᕐᒧᑦ ᐱᔨᑦᑎᐅᑎᖏᑦ ᐃᖃᓗᒃᑑᑦᑎᐊᕐᒥ (ᐲᑕᓴᓐ) ........................................................... 7 36 – 7(2): ᐊᕐᕕᐊᓂ ᐊᓂᒍᐃᔪᓄᑦ (ᖃᑉᓗᑦᓯᐊᖅ) ........................................................................................................... 8 37 – 7(2): ᐃᓕᓴᖅᓯᓂᖅ ᐅᓗᐅᑦ (ᓯᒪᐃᓚᒃ) .................................................................................................................... 9 ᐱ. ᐅᖃᐅᓯᒃᑯᑦ ᐊᐱᖅᑯᑎᑦ 33 – 7(2): ᓯᕿᙳᔭᐅᑉ ᐊᓯᔾᔨᖅᑕᐅᕙᖕᓂᖓ ᓄᓇᕘᒥᑦ (ᖁᓕᒃᑖᓇ) ......................................................................... 10 34 – 7(2): ᐱᓕᕆᐋᖏᓄᑦ ᓄᓇᕘᑉ ᐃᒡᓗᓕᕆᔨᕐᔪᐊᒃᑯᑦ ᑎᒥᖓ (ᑲᐅᑐᒃ) ................................................................ 11 35 – 7(2): ᐋᓐᓂᐊᖅᑐᓕᕆᓂᕐᒧᑦ ᐱᔨᑦᑎᐅᑎᖏᑦ ᐃᖃᓗᒃᑑᑦᑎᐊᕐᒥ (ᐲᑕᓴᓐ) ......................................................... 13 36 – 7(2): ᐃᒥᖅᑕᐅᑎᓄᑦ ᐱᖁᑎᔾᔪᐊᓄᑦ (ᑕᖅᑐ) ........................................................................................................ 15 37 – 7(2): ᑮᓇᐅᔭᓕᕆᔨᑦ ᐱᔨᑦᑎᐅᑎᖏᓄᑦ (ᖃᑉᓗᑦᓯᐊᖅ) ........................................................................................ 16

38 – 7(2): ᐃᐱᖅᓯᒪᕝᕕᐊ ᑰᒡᔪᐋᑉ ᐃᓚᖏᓄᓪᓗ ᐱᔭᒃᓴᒧᑦ (ᖃᕝᕕᒃ) ......................................................................... 18 39 – 7(2): ᐋᓐᓂᐊᕕᓕᐊᖅᑐᑦ ᖃᖓᑦᑕᐅᑎᖏᓄᑦ (ᒪᐃᒃ) ............................................................................................ 19 40 – 7(2): ᒥᑦᑕᕝᕕᑦᑕ ᐱᖁᑎᕐᔪᐊᖏᓄᑦ (ᐊᖑᑎᐋᓗᒃ) ............................................................................................... 22 ᐳ. ᒪᓕᒐᒃᓴᐃᑦ ᒪᓕᒐᒃᓴᖅ 1 – 7(2): ᑮᓇᐅᔭᖅᑐᕈᑏᑦ ᐅᑯᓐᓂᖅᓱᖅᑐᑦ (ᐊᐅᓚᔾᔪᑏᑦ ᒪᑭᒪᐅᑏᓪᓗ) ᐱᖁᔭᖅ, 2026 – 2027 - ᑲᑎᒪᔨᕋᓛᑦ ᐃᓱᒪᒃᒪᖅᓯᐅᕐᓂᖏᑦ ................................................................................................................................ 24 ᒪᓕᒐᒃᓴᖅ 2 – 7(2): ᑮᓇᐅᔭᖅᑐᕈᑎᑦᓴᐃᑦ (ᐊᑭᑐᔫᑎᓄᑦ) ᐱᖁᔭᖅ, 2026 – 2027 - ᑐᒡᓕᐊᓂ ᐅᖃᓕᒫᖅᑕᐅᓂᖏᑦ .................................................................................................................................................... 23 ᒪᓕᒐᒃᓴᖅ 3 – 7(2): ᑮᓇᐅᔭᖅᑐᕈᑏᑦ ᐃᓚᒋᐊᕈᑏᑦ (ᐊᐅᓚᔾᔪᑏᑦ ᒪᑭᒪᐅᑏᓪᓗ) ᐱᖁᔭᕐᔪᐊᖓ 2, 2025- 2026 - ᑐᒡᓕᐊᓂ ᐅᖃᓕᒫᖅᑕᐅᓂᖏᑦ .............................................................................................................................. 23 ᒪᓕᒐᒃᓴᖅ 4 – 7(2): ᑮᓇᐅᔭᖅᑐᕈᑏᑦ ᐃᓚᒋᐊᕈᑏᑦ (ᐊᑭᑐᔫᑎᓄᑦ) ᐱᖁᔭᕐᔪᖓ 4, 2025-2026 - ᑐᒡᓕᐊᓂ ᐅᖃᓕᒫᖅᑕᐅᓂᖏᑦ .................................................................................................................................................... 23

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 1 ᐃᖃᓗᐃᑦ, ᓄᓇᕗᑦ ᐊᐃᑉᐹ, ᒪᐃ 26, 2026 ᒪᓕᒐᓕᐅᖅᑏᑦ ᐅᐸᒃᑐᑦ: ᐊᖓᔪᖅᑳᖅ ᒍᐃᐊᓐ ᕼᐄᓕ−ᐊᕿᐊᕈᖅ, ᒥᔅ ᕼᐋᓇ ᐊᖑᑎᐊᓗᒃ, ᒥᔅᑕ ᐃᐊᑦᕗᑦ ᐊᑕᒍᑦᑖᓗᒃ, ᐊᖓᔪᖅᑳᖅ ᔮᓂᑦ ᐱᑦᓯᐅᓛᖅ, ᐊᖓᔪᖅᑳᖅ ᔪᐊᔾ ᕼᐃᒃᔅ, ᐊᖓᔪᖅᑳᖅ ᑕᐃᕕᑎ ᔪᐊᓇᓯ, ᐊᖓᔪᖅᑳᖅ ᒍᐊᑕᓐ ᑲᐅᑐᒃ, ᐊᖓᔪᖅᑳᖅ ᐳᕋᐃᔭᓐ ᑯᓄᒃ; ᒥᔅᑕ ᓴᐃᒻᒪ ᑯᓕᒃᑖᓇ, ᐊᖓᔪᖅᑳᖅ ᓯᓯᐅᓪ ᓂᐅᓪᕚᓇ ᓚᐃᔪᓪ, ᐊᖓᔪᖅᑳᖅ ᐋᕐᓗᒃ ᒪᐃᓐ, ᒥᔅᑕ ᔮᓂ ᒪᐃᒃ, ᒥᔅᑕ ᕗᕆᐊᑦ ᐲᑕᓴᓐ, ᒥᔅᑕ ᑕᐃᕕᑦ ᐳᐊᑐ, ᒥᔅᑕ ᐊᐃᕙᓚᕼᐋᒻ ᖃᒪᓂᖅ, ᒥᔅᑕ ᑖᓂᐅᓪ ᖃᕝᕕᒃ, ᒥᔅᑕ ᐋᓕᒃᓵᓐᑐ ᓴᒻᒧᖅᑐᖅ, ᒥᔅᑕ ᓯᑏᕙᓐ ᑕᖅᑐ, ᐊᖓᔪᖅᑳᖅ ᐋᓂ ᑕᑦᑐᐃᓂ. >>ᑲᑎᒪᓯᒋᐊᖅᑐᑦ 013:30ᒧᐊᖅᑎᓪᓗᒍ ᑲᑎᒪᔾᔪᑎᒃᓴᖅ 1: ᑐᒃᓯᐊᕐᓂᕐᒧᑦ ᒪᑐᐃᖅᑕᐅᓂᖓ ᐅᖃᖅᑎ: ᐅᓪᓗᒃᑯᑦ. ᐱᒋᐅᕈᑎᒋᓗᒍ ᒥᔅᑕ ᓯᒪᐃᓚᒃ, ᒪᒃᑐᐃᖅᓯᔫᓪᓗᐊᖅᐱᑦ? >>ᑐᒃᓯᐊᖅᑐᑦ ᐅᖃᖅᑎ: ᖁᔭᓐᓇᒦᒃ, ᒥᓂᔅᑕ ᓯᒪᐃᓚᒃ. ᐊᒻᒪᓗ ᐅᓪᓗᒃᑯᑦ ᒪᓕᒐᓕᐅᖅᑏᑦ, ᓄᓇᕗᒻᒥᐅᓪᓗ. ᓯᓚᑦᓯᐊᕚᓘᑎᓪᓗᒍ ᑕᒫᓂ ᐃᖃᓗᓐᓂ ᑐᙵᓱᑦᓯᐊᕆᑦᓯ. ᑲᑎᒪᔾᔪᑎᑦᑕ ᓈᓴᐅᑎᖓ 2, ᒥᓂᔅᑕᐃᑦ ᐅᖃᐅᓯᖏᑦ. (ᑐᓵᔨᑎᒍᑦ) ᒐᕙᒪᒃᑯᓐᓄᑦ ᓯᕗᒃᑲᖅᑕᖅᑎᐅᑲᐃᓐᓇᖅᑐᖅ, ᒥᔅᑕ ᓯᒪᐃᓚᒃ. ᑲᑎᒪᔾᔪᑎᒃᓴᖅ 2: ᒥᓂᔅᑕᐃᑦ ᐅᖃᐅᓯᒃᓴᖏᑦ ᒥᓂᔅᑕᑉ ᐅᖃᐅᓯᖓ 14 – 7(2): ᒥᓂᔅᑕ ᐃᒡᓗᒥᑦ ᐅᐸᒍᑎᓯᒪᙱᑦᑐᖅ (ᓯᒪᐃᓚᒃ) ᓯᒪᐃᓚᒃ: ᒪ’ᓇ, ᐅᖃᖅᑎᑦᓯᔩ. (ᑐᓵᔨᑎᒍᑦ) ᐅᖃᖅᑎᑦᓯᔩ, ᑐᓴᖅᑎᑦᓯᔪᒪᓪᓗᖓ ᒪᓕᒐᓕᐅᖅᑎᓂᒃ ᑖᓐᓇ ᓯᕗᓕᖅᑎᐅᖃᑕᐅᔪᖅ ᑕᐃᕕᑎ ᐊᕿᐊᕈᖅ, ᐅᐸᑦᓯᒪᔾᔮᙱᒻᒪᑦ ᐃᓪᓗᒧᑦ ᓇᓗᓇᐃᖅᓯᒃᑲᓐᓂᓚᐅᖏᓐᓂᐊᓂ. ᑐᓴᖅᑎᑦᓯᒃᑲᓐᓂᓚᐅᙱᓐᓂᖓᓂ, ᑕᕝᕙᓃᙱᓐᓂᖓᓂ ᐅᑯᐊ ᒥᓂᔅᑕᐅᔪᑦ ᑭᖑᕝᕖᓯᒪᓂᐊᖅᑐᑦ ᐃᓂᖏᓄᑦ: ᓯᕗᓕᖅᑎᐅᑲᐃᓐᓇᕐᓂᐊᖅᑐᖓ ᐃᓪᓗᒥᒃ; ᓯᕗᓕᖅᑎ ᒪᐃᓐ ᐃᓕᓐᓂᐊᖅᑐᓕᕆᓂᕐᒧᑦ ᒥᓂᔅᑕᐅᑲᐃᓐᓂᐊᖅᖢᓂ; ᐊᒻᒪ ᕼᐄᓕ ᐊᕿᐊᕈᖅ ᒥᓂᔅᑕᐅᑲᐃᓐᓇᕐᓗᓂ ᓯᓚᑦᑐᓴᕐᕕᒻᒧᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᖁᔭᓐᓇᒦᒃ. ᒥᓂᔅᑕᐃᑦ ᐅᖃᐅᓯᖏᑦ. ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ, ᒥᔅ ᐳᕉᔅᑐ. ᒥᓂᔅᑕᑉ ᐅᖃᐅᓯᖓ 15 – 7(2): ᑲᓇᑕᒥ ᐋᓐᓂᐊᓯᐅᑎᓄᑦ ᐱᓇᓱᐊᕈᓯᖓ ᑖᓐᓇᓗ ᐃᓕᖅᑯᓯᕐᑯᑦ ᖁᔮᖃᕈᑎᒧᑦ ᓴᖅᑭᔮᑎᑕᖅ (ᐳᕉᔅᑐ) ᐊᖓᔪᖅᑳᖅ ᔮᓇᑦ ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑎ. ᐅᖃᖅᑎᑦᓯᔩ, ᑕᖅᑭᖅ ᐱᒋᐊᓕᕋᑖᖅᑎᓪᓗᒍ ᓄᓇᕗᑦ ᐃᓕᑕᖅᓯᓚᐅᕐᒪᑦ ᑲᓇᑕᒥ ᐋᓐᓂᐊᓯᐅᖅᑏᑦ ᐱᓇᓱᐊᕈᓯᖓᓂᒃ, ᐱᒻᒪᕆᐅᓪᓗᓂᓗ ᐃᑲᔪᕐᓂᕆᖃᑦᑕᖅᑕᖏᑦ ᐋᓐᓂᐊᓯᐅᖅᑏᑦ ᐋᓐᓂᐊᖅᑐᓕᕆᓂᕐᒧᑦ ᑲᔪᓯᑎᑦᓯᓂᕐᒧᑦ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 2 ᐋᓐᓂᐊᓯᐅᖅᑏᑦ ᐊᑐᐃᓐᓇᐅᑎᑦᓯᓂᕐᒧᑦ ᐅᐸᒃᑕᐅᖅᑳᖅᐸᑦᑐᓂᒃ ᑲᒪᒋᔭᖃᖅᐸᓐᓂᕐᒥᒃ, ᑐᐊᕕᕐᓇᖅᑐᖃᖅᑎᓪᓗᒍ ᖃᓄᐃᑦᑕᕆᐊᖃᕐᓂᕐᒧᑦ, ᑲᒪᒋᔭᐅᓪᓗᐊᑕᕐᓂᖅ, ᐋᓐᓂᐊᖃᕐᓇᙱᑦᑐᓕᕆᓂᖅ ᑭᒃᑯᑐᐃᓐᓇᕐᓄᑦ ᐱᔨᑦᓯᕋᕐᓂᕐᒧᑦ, ᐃᑲᔪᖅᑐᐃᖏᓐᓇᕐᓂᕐᒧᓪᓗ ᐋᓐᓂᐊᕕᓕᐊᖅᑐᓂᒃ ᐃᓚᒌᓂᓪᓗ. ᐱᓕᕆᐊᖏᑦ ᐱᒻᒪᕆᐅᕗᑦ ᓄᓇᓕᓐᓄᑦ ᐊᐅᓚᓂᖓᓄᓪᓗ ᐋᓐᓂᐊᖅᑐᓕᕆᔾᔪᑎᑦᑕ. ᐅᖃᖅᑎᑦᓯᔩ, ᓴᙱᓕᖅᑎᑦᓯᓂᖅ ᒪᑭᑕᑦᓯᐊᕐᓂᕐᓗ ᐋᓐᓂᐊᓯᐅᖅᑎᓂᒃ ᐃᖅᑲᓇᐃᔭᕐᕕᖏᑦ ᓱᓕ ᓯᕗᓪᓕᐅᔾᔭᐅᓯᒪᕗᖅ ᓄᓇᕘᒥ. ᐱᓕᕆᕙᓪᓕᐊᖏᓐᓇᖅᐳᒍᑦ ᐃᖅᑲᓇᐃᔭᖅᑎᒃᓴᖅᓯᐅᕐᓂᕐᒥᒃ ᐱᓯᒪᐃᓐᓇᕈᒪᓂᕐᒥᓪᓗ ᐊᑕᐃᓐᓇᕐᓂᐊᖅᑐᓂᒃ ᐋᓐᓂᐊᓯᐅᖅᑎᓂᒃ, ᓴᙱᓕᖅᑎᕆᒋᐊᕈᒪᑦᓱᑕᓗ ᑲᔪᓰᓐᓇᖅᑐᒥᒃ ᑲᒪᒋᔭᖃᕐᓂᕐᒧᑦ, ᐃᑲᔪᖅᑐᐃᔪᒪᓪᓗᑕᓗ ᑕᑎᒋᔭᐅᔪᓐᓇᖅᑐᓂᒃ ᐱᔨᑦᓯᕋᕐᓂᕐᒧᑦ ᓄᓇᓕᓐᓂᑦ. ᓴᙱᓕᑎᑦᓯᓂᕐᒧᑦ ᐃᓄᐃᑦ ᐋᓐᓂᐊᓯᐅᖅᑎᖏᓐᓂᒃ ᐃᖅᑲᓇᐃᔭᕐᕕᖏᑦ ᓯᕗᓪᓕᐅᔾᔭᐅᔭᕆᐊᖃᕐᒥᔪᖅ. ᐃᓄᐃᑦ ᐋᓐᓂᐊᓯᐅᖅᑏᑦ ᖃᐅᔨᒪᓂᖃᖅᐳᑦ ᐅᖃᐅᓯᕐᒥᓂᒃ, ᐃᓕᖅᑯᓯᒥᓂᒃ, ᓄᓇᓕᓐᓂᓗ ᓴᙱᓕᖅᑎᑦᓯᖃᑦᑕᖅᑐᑦ ᐋᓐᓂᐊᕐᕕᓕᐊᖅᑐᓄᑦ ᑲᒪᒋᔭᖃᕐᓂᕐᒧᑦ ᐃᑲᔪᖃᑦᑕᖅᓱᑎᓪᓗ ᓇᓗᓇᐃᖅᓯᓂᕐᒧᑦ ᐱᔨᑦᓯᕋᓐᓂᕐᒧᑦ ᐊᑦᑐᐊᓂᖃᑦᓯᐊᕐᓂᖅᓴᐅᒐᓗᐊᕐᒪᖔᑕ ᐱᔭᐅᔭᕆᐊᓕᓐᓄᑦ ᐱᓪᓚᕆᐅᔪᓄᓪᓗ ᓄᓇᕗᒻᒥᐅᓄᑦ. ᐱᓕᕆᖃᑎᖃᐃᓐᓇᖅᐳᒍᑦ ᐃᓕᓐᓂᐊᕐᓂᓕᕆᔨᒃᑯᓐᓂ ᐱᓕᒻᒪᑦᓴᖅᑎᑦᓯᓂᕐᒧᓪᓗ ᐱᓕᕆᖃᑎᒌᓐᓂ ᑎᓕᐅᕈᒪᓪᓗᒋᑦ ᐃᑲᔪᖅᑐᐃᔪᓂᕐᒧᓪᓗ ᐃᓄᐃᑦ ᐃᖅᑲᓇᐃᔮᖅᑖᕈᒪᔪᑦ ᐋᓐᓂᐊᓯᐅᖅᑎᐅᓂᕐᒧᑦ ᐊᓯᖏᓐᓂᓪᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓪᓚᕆᐅᕙᑦᑐᓂᒃ. ᐃᓚᒋᔭᐅᓪᓗᓂ ᑕᒪᑐᒧᖓ ᐱᓕᕆᐊᖑᔪᒧᑦ, ᐱᒋᐊᖅᑎᑦᓯᓚᐅᖅᑐᒍᑦ ᐱᕚᓪᓕᕐᓇᕐᓂᖓᓄᑦ ᐃᖅᑲᓇᐃᔭᖅᑎᒃᓴᖅᓯᐅᕐᓂᕐᒧᑦ ᑐᕌᒐᕆᔭᖅ 2025−ᒥ ᐃᑲᔪᖅᑐᖅᑕᐅᓪᓗᓂ ᐅᑯᑎᒎᓇᖅ ᐱᓕᕆᖃᑎᒌᓐᓂᒃᑯᑦ ᐊᖏᖃᑎᒌᒍᑎᒃᑯᑦ. ᑐᕌᒐᕆᔭᖅ ᐅᔾᔨᕐᓇᖅᓯᑎᑦᓯᕗᖅ ᐋᓐᓂᐊᓯᐅᖅᑎᓂᒃ ᐊᓯᖏᓐᓂᓪᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔮᕆᔭᐅᕙᑦᑐᓂᒃ, ᓇᓗᓇᐃᔭᐃᓂᕐᒧᓪᓗ ᐱᕕᑦᓴᖃᕐᓂᐅᔪᓂᒃ ᐱᓪᓚᕆᐅᔪᓂᓪᓗ ᐃᖅᑲᓇᐃᔭᕐᓗᓂ ᐅᑭᐅᖅᑕᖅᑐᒥ ᐅᖓᓯᒃᑐᒦᑦᑐᓂᓪᓗ ᓄᓇᓕᓐᓂᑦ. ᐃᖅᑲᓇᐃᔭᖅᑎᒃᓴᖅᓯᐅᓂᕐᒧᑦ ᐱᓇᓱᐊᖅᑕᐅᔪᑦ ᑕᑯᑦᓴᐅᑎᑦᓯᕗᑦ ᐱᕙᓪᓕᐊᓂᕆᔭᐅᔪᒥᒃ. ᔭᓐᓄᐊᓕ ᐊᒻᒪᓗ ᒫᑦᓯᐅᑉ ᐊᑯᓐᓂᖓᓂ ᑕᒫᓂ ᐊᕐᕌᒍᒥ, 8-ᖑᔪᑦ ᐃᖅᑲᓇᐃᔭᐃᓐᓇᖅᑐᑦ ᐋᓐᓂᐊᓯᐅᖅᑏᑦ ᐊᒻᒪᓗ 17 ᐋᓐᓂᐊᓯᐅᖅᑏᑦ ᐃᖅᑲᓇᐃᔮᖏᑦ ᑲᑐᔾᔭᐅᓪᓗᑎᒃ ᐃᓐᓄᑦᑕᐅᓚᐅᖅᐳᑦ. ᖄᒃᑲᓐᓂᐊᒍᑦ, 45-ᖑᔪᑦ ᐃᖅᑲᓇᐃᔮᖅᑖᕋᓱᐊᖅᑐᑦ ᐊᐱᖅᓱᖅᑕᐅᑦᓯᐊᓚᐅᖅᑐᑦ ᐃᓚᔭᐅᓪᓗᑎᓪᓗ ᐃᖅᑲᓇᐃᔭᑲᐃᓐᓇᖃᑦᑕᖅᑐᓄᑦ ᐱᕈᖅᐸᓪᓕᐊᑎᑦᓯᔪᖅ ᐱᑕᖃᕇᖅᑐᓂᑦ ᐃᓂᒋᔭᐅᔪᓇᖅᑎᖁᑎᑦᑎᓐᓂᑦ. ᐃᑲᔪᖅᑐᐃᖏᓐᓇᕆᕗᒍᑦ ᐱᓕᕆᔨᒻᒪᕆᓐᓂᒃ ᐱᕙᓪᓕᐊᑎᑦᓯᓂᕐᒧᑦ ᐊᑯᓂᐅᔪᒧᓪᓗ ᐃᖅᑲᓇᐃᔭᖅᑎᒋᔭᐅᔪᓂᒃ ᐸᕐᓇᐃᓂᕐᒧᑦ ᐃᑲᔪᕈᒪᓂᕐᒧᑦ ᓴᙱᓕᖅᑎᑦᓯᓂᕐᒧᑦ ᐋᓐᓂᐊᓯᐅᖅᑏᑦ ᐱᔨᑦᓯᕋᕐᓂᐅᕙᑦᑐᓂ. ᐅᖃᖅᑎᑦᓯᔩ, ᐋᓐᓂᐊᓯᐅᖅᑏᑦ ᖃᐅᔨᒪᖁᕙᒃᑲ ᐱᓕᕆᐊᖏᑦ ᐱᒻᒪᕆᐅᒻᒪᑕ ᖁᔭᒋᔭᐅᓪᓗᑎᓪᓗ. ᖃᐅᑕᒫᑦᓯᐊᖅ, ᑲᒪᒋᔭᖃᖅᐸᑉᐳᑦ ᐃᑲᔪᖅᑐᐃᕙᑦᓱᑎᓪᓗ ᓄᓇᕗᒻᒥᐅᓂᒃ ᐊᑦᓱᕈᕐᓇᖅᑐᒃᑰᖅᑎᓪᓗᒋᑦ ᓄᓇᓕᓐᓂᓪᓗ ᓄᓇᕗᓕᒫᒥ. ᖁᔭᓐᓇᒦᒃ, ᐅᖃᖅᑎᑦᓯᔩ. ᐅᖃᖅᑎ: ᒥᓂᔅᑕᐃᑦ ᐅᖃᐅᓯᖏᑦ. ᐃᖅᑲᓇᐃᔭᖅᑐᓕᕆᓂᕐᒧᑦ ᒥᓂᔅᑕ, ᒥᔅ ᑕᑦᑐᐃᓂ. ᒥᓂᔅᑕᑉ ᐅᖃᐅᓯᖓ 16 – 7(2): ᐃᖅᑲᓇᐃᔭᑐᑐᖃᓄᑦ ᐱᔨᑦᑎᖅᑎᓄᑦ ᐃᓚᓴᖅᓯᐅᑎᖏᑦ ᑭᕙᓪᓕᕐᒥ (ᑕᑐᐃᓂ) ᐊᖓᔪᖅᑳᖅ ᐋᓂ ᑕᑦᑐᐃᓂ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 3 ᑕᒪᑐᒪᓂ ᐊᕐᕌᒍᒥ ᐃᖅᑲᓇᐃᔭᖅᑐᓕᕆᔨᒃᑯᑦ ᐅᐱᒍᓱᓚᐅᖅᐳᑦ ᑐᙵᓱᒃᑎᑦᑎᔪᓐᓇᖅᖢᑎᒃ ᒪᕐᕉᖕᓂᒃ ᐊᑯᓂᐊᓗᒃ ᐃᖅᑲᓇᐃᔭᖅᓯᒪᓕᖅᑐᓄᑦ ᑐᓐᓂᖅᑯᓯᐊᓂᒃ ᖁᕕᐊᓲᑕᐅᓪᓗᑎᒃ ᐃᓕᑕᕆᔭᐅᖁᓪᓗᒋᑦ ᐃᖅᑲᓇᐃᔭᖅᑎᑦ ᐅᑭᐅᑦ ᐊᕙᑎᑦ ᐅᖓᑖᓄᑦ ᐱᔨᑦᑎᕋᖅᓯᒪᓕᖅᑐᑦ ᓄᓇᕗᑦ ᒐᕙᒪᒃᑯᓐᓄᑦ. ᑖᓐᓇ ᓯᕗᓪᓕᖅᐹᖑᓚᐅᖅᑐᖅ ᐅᖃᐅᓯᕆᓚᐅᖅᑕᕋ ᐅᑭᐅᒃᑯᑦ ᑲᑎᒪᑎᓪᓗᑕ ᑕᒫᓂ ᐃᖃᓗᓐᓂ ᕖᕝᕗᐊᕆ 12-ᖑᑎᓪᓗᒍ ᕿᑭᖅᑖᓗᒻᒧᑦ. ᐊᐃᑉᐸᖓ ᓇᓪᓕᐅᓂᖅᓯᐅᕐᓂᐅᓚᐅᖅᑐᖅ ᓄᓇᑦᑎᓐᓂ ᑲᖏᖅᖠᓂᕐᒥ ᑭᕙᓪᓕᕐᒥᐅᓄᑦ ᑐᓂᔭᐅᔪᓄᑦ ᒪᐃ 12- ᖑᑎᓪᓗᒍ. ᐊᐃᑦᑖᖑᒐᓗᐊᖅ, ᑐᓂᕐᕈᓯᐊᓚᐅᖅᑐᑦ ᐃᓚᐅᔪᓐᓇᓚᐅᙱᒻᒪᑕ ᓯᓚ ᐱᔾᔪᑕᐅᓪᓗᓂ, ᑭᓯᐊᓂ ᑖᒃᑯᐊ ᐃᖅᑲᓇᐃᔭᖅᑎᑦ ᑐᓐᓂᖅᑯᓯᐊᖅᑖᖅᑎᑕᐅᓛᖅᐳᑦ ᒫᓐᓇᒫᒃᑯ. ᐅᖃᖅᑏ, ᑖᒃᑯᐊ ᑐᓐᓂᖅᑯᓯᐊᑦ ᐱᒻᒪᕆᐅᒻᒪᑕ ᖁᔭᓕᓂᑦᑎᓐᓂᒃ ᓇᓗᓇᐃᖅᓯᔾᔪᑕᐅᓪᓗᑎᒃ ᖃᐅᔨᒪᓂᕆᔭᖏᓐᓂᒃ ᐊᑐᖅᓯᒪᔭᖏᓐᓂᓪᓗ ᐊᒻᒪᓗ ᑲᔪᓰᓐᓇᕐᓂᖏᓐᓂᒃ ᐊᑯᓂᐊᓗᒃ ᐃᖅᑲᓇᐃᔭᖅᓯᒪᓕᖅᑐᑦ ᐃᖅᑲᓇᐃᔮᒥᓄᑦ. ᑕᒪᒃᑯᐊ ᐱᐅᓂᕆᔭᐅᔪᑦ ᐱᒻᒪᕆᐊᓘᕗᑦ ᓴᙱᔪᒥᒃ ᑐᙵᕕᖃᑦᑎᐊᖅᑐᒥᒡᓗ ᑭᒃᑯᑐᐃᓐᓇᓄᑦ ᐱᔨᑦᑎᕋᕐᕕᖃᕐᓂᐊᕐᓗᓂ. ᐃᑲᔪᖅᐸᒃᐳᑦ ᓇᓗᙱᑦᑎᐊᕈᒪᓂᕐᒧᑦ ᑕᒪᒃᑯᐊ ᐱᓕᕆᐊᒃᓴᐃᑦ ᐱᔨᑦᑎᕋᕐᓂᕆᔭᐅᕙᒃᑐᓪᓗ ᑲᔪᓯᑎᑕᐅᕙᒃᑲᓗᐊᕐᒪᖔᑕ ᑲᔪᓯᓂᖃᑦᑎᐊᖅᑐᒃᑯᑦ ᒐᕙᒪᕗᓪᓗ ᑭᐅᓯᔪᓐᓇᑦᑎᐊᖏᓐᓇᕋᓗᐊᕐᒪᖔᑕ ᐊᑐᖅᑕᐅᑦᑎᐊᕈᓐᓇᖅᐸᒃᖢᑎᒡᓗ ᓄᓇᕗᒻᒥᐅᓄᑦ. ᐊᑐᓂ ᐃᓕᑕᕆᔭᐅᔾᔪᑎᑖᖅᑐᑦ ᐃᑲᔪᖅᓯᒪᕗᑦ ᐊᕐᕌᒍᒐᓴᖕᓄᑦ ᑐᑭᖃᑦᑎᐊᖅᑐᓂᒃ ᐱᓕᕆᖃᑦᑕᖅᓯᒪᓪᓗᑎᒃ ᐋᖅᑭᒃᓱᐃᓯᒪᓪᓗᑎᒃ ᓄᓇᕘᒥ ᐃᑲᔪᖅᑐᐃᓪᓗᑎᒡᓗ ᐊᑐᖅᑕᐅᔭᕆᐊᖃᓪᓚᕆᒃᑐᓂᒃ ᐱᔨᑦᑎᕋᐅᑎᓂᒃ ᓇᐅᒃᑯᓕᒫᖅ. ᐱᓕᕆᔨᒻᒪᕆᐅᓂᖏᑦ, ᓴᐱᓕᖅᓴᕋᐃᙱᓐᓂᖏᑦ, ᐊᒻᒪ ᑲᒪᒋᔭᖃᑦᑎᐊᕐᓂᖏᑦ ᓄᓇᓕᖏᓐᓄᑦ ᐆᒃᑑᑎᑦᑎᐊᕙᐅᕗᑦ ᒫᓐᓇ ᐃᖅᑲᓇᐃᔭᖅᑎᓄᑦ ᐊᒻᒪ ᑲᔪᖏᖅᓴᐃᓪᓗᑎᒃ ᑭᖑᕚᒃᓴᑦᑎᓐᓄᑦ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᓄᑦ. ᐱᕕᖃᕐᓂᓐᓂ ᓇᓗᓇᐃᖅᓯᒍᒪᔪᖓ ᐱᖓᓱᓂᒃ ᑐᓂᔭᐅᓚᐅᖅᑐᓂᒃ ᐱᓗᐊᖅᑐᒥᒃ ᐃᑲᔪᖅᓯᒪᓂᖏᓐᓄᑦ: ᓇᓕ ᐃᐅᓪ ᓴᓪᓕᕐᒥᐅᑕᖅ, ᐃᓕᓴᕆᔭᐅᔪᖅ ᐊᕐᕌᒍᓄᑦ 40-ᓄᑦ ᐃᑲᔪᐃᓐᓇᖅᓯᒪᓂᖓᓄᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐃᓕᓐᓂᐊᕐᓂᓕᕆᔨᒃᑯᓐᓂ; ᑎᒪᕆᔅ ᓴᐃᒪᐅᑦ ᓴᓪᓕᕐᒥᐅᑕᖅ, ᐃᓕᓴᕆᔭᐅᔪᖅ ᐊᕐᕌᒍᓄᑦ 40-ᓄᑦ ᐃᑲᔪᐃᓐᓇᖅᓯᒪᓂᖓᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ; ᐊᒻᒪᓗ ᐅᓕᐅᑦ ᐃᒃᓯᒃᑖᕐᔪᒃ ᖃᒪᓂᖅᑐᐊᕐᒥᐅᖅ, ᐃᓕᑕᕆᔭᐅᔪᖅ ᐊᕐᕌᒍᓄᑦ 50-ᓄᑦ ᐃᑲᔪᐃᓐᓇᖅᓯᒪᓂᖓᓄᑦ ᐃᓕᓐᓂᐊᖅᑐᓕᕆᓂᕐᒧᑦ. ᐅᖃᖅᑏ, ᖁᕕᐊᓱᒃᐳᖓ ᑖᒃᑯᐊ ᐃᓕᓴᕆᔪᓐᓇᕋᒃᑭᑦ ᐃᓕᓴᕆᔪᒪᓪᓗᒋᓪᓗ ᐊᑯᓂᐊᓗᒃ ᐊᒃᑐᐃᓯᒪᓂᖏᑦ ᐱᔨᑦᑎᕋᕐᓂᕆᓚᐅᖅᑕᖏᑦ. ᐊᖏᖅᓯᒪᓂᖏᑦ ᓴᙱᓕᖅᐹᓪᓕᖅᑎᑦᑎᕙᓪᓕᐊᖏᓐᓇᖅᐳᑦ ᒐᕙᒪᑦᑎᓐᓂᒃ ᐊᒻᒪᓗ ᐊᓯᔾᔩᓪᓚᕆᑉᐸᑦᑐᑎᒃ ᐃᓅᓯᖏᓐᓄᑦ ᓄᓇᕗᒻᒥᐅᑦ. ᖁᔭᓐᓇᒦᒃ, ᐅᖃᖅᑎᑦᑎᔩ. ᐅᖃᖅᑎ: ᖁᔭᓐᓇᒦᖅᐸᕗᑦ, ᐱᒃᑯᒋᓪᓗᑎᒍᑦ, ᐅᐱᒋᓪᓗᑎᒍᑦ, ᓴᕆᒪᒋᕙᕗᑦ ᐃᖅᑲᓇᐃᔭᑯᑖᖅᓯᒪᔪᐃᑦ. ᒥᓂᔅᑕᐃᑦ ᐅᖃᐅᓯᒃᓴᖏᑦ, ᕿᓪᓗᖅ ᐆᒻᒪᖅᑯᑎᓕᕆᔨᒃᑯᓐᓄᑦ, ᒥᓂᔅᑕ ᕼᐄᓕ ᐊᕿᐊᕈᖅ. ᒥᓂᔅᑕᑉ ᐅᖃᐅᓯᖓ 17 – 7(2): ᓗᐊᕋ ᐅᓪᓗᕆᐊᖅ ᒐᐅᑎᔭᐃ ᐊᒻᒪ ᓄᐊ ᐸᓂᔪᒃ ᐃᓕᓐᓂᐋᖅᑐᓄᑦ ᐃᑲᔫᓯᐊᑦ (ᕼᐄᓕ-ᐊᕿᐊᕈᖅ) ᐊᖓᔪᖅᑳᖅ ᒍᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐅᖃᖅᑎᑦᑎᔩ. (ᑐᓵᔨᑎᒍᑦ) ᐅᖃᖅᑎᑦᑎᔩ, ᒪᒃᑯᒃᑐᖁᑎᕗᑦ ᐱᕕᒃᓴᖃᖅᑎᑕᐅᑦᑎᐊᕆᐊᖃᖅᐳᑦ ᐃᓕᓐᓂᐊᕈᒪᒍᑎᒃ, ᐊᒻᒪ ᑕᐃᒃᑯᐊ ᐃᖅᑲᓇᐃᔮᖅᑖᕈᒪᔪᑦ ᓴᓇᔨᓪᓚᕆᙳᕆᐅᖅᓴᓂᕐᒧᑦ ᐊᒻᒪ ᓴᓇᔨᒻᒪᕆᐅᓂᕐᒧᑦ ᐃᑲᔫᑎᖃᑦᑎᐊᕐᒪᑕ ᓄᓇᕗᒻᒥ ᐊᔪᙱᑦᑐᓂᒃ ᐃᖅᑲᓇᐃᔭᖅᑎᖃᕆᐊᖃᖅᑎᓪᓗᒋᑦ. ᐅᓪᓗᒥ, ᖁᕕᐊᓱᒃᐳᖓ ᑐᓴᖅᑎᑦᑎᔪᓐᓇᕋᒪ ᐱᓇᔫᑎᑦ ᒫᓐᓇ ᐅᒃᑯᐃᖓᓕᕐᓂᖏᓐᓂᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᒪᕐᕉᖕᓄᑦ ᐃᓕᓐᓂᐊᕈᑎᒃᓴᓄᑦ ᐃᑲᔫᑎᓄᑦ: ᓘᕋ ᐅᓪᓗᕆᐊᖅ ᒎᑦᑎᐊᐃ ᐃᓕᓐᓂᐊᕈᑎᒃᓴᓄᑦ ᐃᑲᔫᓯᐊᑦ ᐊᒻᒪ ᓄᐊ ᐸᓂᔪᖅ ᐃᓕᓐᓂᐊᕈᓯᐊᖅ ᐊᔪᙱᑦᑎᐊᕐᓂᕐᒧᑦ ᓴᓇᔪᓕᕆᓂᕐᒧᑦ. ᑖᒃᑯᐊ ᑐᓂᕐᕈᓯᐊᑦ ᐃᑲᔪᖅᐸᖕᒪᑕ

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 4 ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᓕᓐᓂᐊᕋᓱᐊᖅᑎᓪᓗᒋᑦ ᐊᒻᒪᓗ ᐃᖅᑲᓇᐃᔮᕆᔪᒪᔭᖏᓐᓂᑦ ᐱᑕᖃᕆᐊᖃᓪᓚᕆᒃᑐᓂᑦ ᑕᒫᓂ ᓄᓇᑦᑎᓐᓂ. ᐅᑭᐅᓄᑦ 20−ᑲᓴᖕᓄᑦ, ᓘᕋ ᒎᑎᐊᐃ ᐃᓕᓐᓂᐊᕈᑎᒃᓴᓄᑦ ᐃᑲᔫᑎᑦ ᐊᑎᖃᖃᑦᑕᖅᓯᒪᕗᖅ ᓘᕋ ᐅᓪᓗᕆᐊᖅ ᒎᑎᐊᐃᒥᑦ, ᓄᓇᓕᖕᓂ ᓯᕗᓕᖅᑎᐅᔪᖅ ᐊᒃᓱᕈᖅᖢᓂ ᐱᓕᕆᖃᑦᑕᖅᓯᒪᔪᖅ ᓄᓇᕗᑦ ᓇᖕᒥᓂᖅ ᐆᒻᒪᖅᑯᑎᖃᖁᓪᓗᒍ. ᑕᒪᑐᒪᓂ ᐊᕐᕌᒍᒥ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑐᓂᓯᓂᐊᕐᒥᔪᑦ $5,000-ᓂᒃ ᒪᕐᕉᖕᓄᑦ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖅᑐᓄᑦ ᓯᕗᓕᖅᑎᐅᑦᑎᐊᕐᓂᖏᓐᓄᑦ ᐊᖏᖅᓯᒪᑦᑎᐊᕐᓂᖏᓐᓄᓪᓗ ᓄᓇᓕᖕᒥᓄᑦ. ᐃᓚᖓᑦ ᑖᒃᑯᐊ ᑐᓐᓂᖅᑯᓯᐊᑦ ᑐᓂᔭᐅᕙᒃᐳᑦ ᐃᓕᓐᓂᐊᖅᑎᒧᑦ ᑲᓇᑕᒥ−ᐃᓕᓴᕆᔭᐅᓯᒪᔪᒥᑦ ᐊᐅᓚᐅᓯᕆᔨᐅᓂᕐᒧᑦ ᐱᓕᕆᐊᖑᕙᒃᑐᒥᑦ. ᐊᐃᑉᐸᖓ ᒪᑐᐃᖓᔪᖅ ᐃᓕᓐᓂᐊᖅᑎᓄᑦ ᖃᓄᐃᑦᑐᑐᐃᓐᓇᕐᓄᑦ ᐃᓕᓐᓂᐊᖅᑕᒥᓄᑦ − ᓄᓇᕗᑦ ᐱᑕᖃᕆᐊᖃᕐᒪᑦ ᐃᓄᓐᓂᒃ ᐃᖅᑲᓇᐃᔭᖅᑐᓂᒃ ᖃᓄᐃᑦᑐᑐᐃᓐᓇᕐᓂᒃ. ᖄᒃᑲᓐᓂᐊᒍᑦ, ᓄᐊ ᐸᓂᔪᖅ ᐃᓕᓐᓂᐊᑲᓐᓂᕐᓂᕐᒧᑦ ᐃᑲᔫᑎᑦ ᑲᔪᓯᓂᐊᖅᑐᑦ ᐊᐃᑉᐸᕆᓕᖅᑕᖓᓄᑦ ᐊᕐᕌᒍᒧᑦ. ᑖᓐᓇ ᑐᓐᓂᖅᑯᓯᐊᖅ ᓴᖅᑭᑕᐅᓚᐅᖅᑐᖅ ᐃᖅᑲᐅᒪᔭᐅᓪᓗᓂ ᓄᐊ ᐸᓂᔭᖅ, ᓴᓇᔨᒻᒪᕆᐅᓚᐅᖅᑐᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂ ᑖᓐᓇ ᕿᒪᒃᑕᐅᓯᒪᔪᖅ ᐆᒪᐃᓐᓇᖅᑐᖅ ᑕᕝᕘᓇ ᐃᓕᓐᓂᐊᖅᑎᓄᑦ ᐃᑲᔫᑎᑎᒍᑦ ᐊᒻᒪᓗ ᐃᑲᔪᖅᑐᐃᓂᖓᓄᑦ ᑭᖑᕚᒃᓴᑦᑎᓐᓄᑦ ᓄᓇᕗᒻᒥᐅᓄᑦ ᓴᓇᔨᕈᕆᐅᖅᓴᓂᕐᒧᑦ. ᒪᕐᕉᒃ ᑐᓐᓂᖅᑯᓯᐊᒃ $5,000-ᓂᒃ ᐊᑐᓂ ᐊᑐᐃᓐᓇᐅᔫᒃ ᓄᓇᕗᒻᒥᐅᓄᑦ ᐃᓕᓴᕆᔭᐅᓯᒪᔪᓄᑦ ᓴᓇᔨᕈᕆᐅᖅᓴᓂᕐᒧᑦ ᐃᓕᓐᓂᐊᒐᒃᓴᓄᑦ ᑲᓇᑕᒥ − ᑮᓇᐅᔭᓕᐅᕈᑕᐅᓇᓱᒃᑐᖅ ᓯᕗᓂᒃᓴᒥ ᓴᓇᔨᕈᕆᐅᖅᓴᔪᓄᑦ ᐃᑲᔪᕐᓂᐊᖅᑐᓂᒃ ᓄᓇᓕᑦᑎᓐᓂ ᐃᖏᕐᕋᐃᓐᓇᖅᑎᑦᑎᓂᕐᒥᒃ. ᓯᕗᓂᔅᓴᑎᓐᓂ ᐅᐊᔭᓕᕆᔨᕗᑦ, ᐊᐅᓚᐅᓯᕆᔩᑦ, ᖃᕆᑕᐅᔭᓕᕆᔩᓪᓗ ᐃᑲᔪᖅᓱᕆᐊᖃᖅᐸᕗᑦ. ᑎᓕᐅᖅᐸᕗᑦ ᑕᒪᕐᒥᑦᑎᐊᖅ ᐊᔪᖅᑎᑕᐅᙱᑦᑐᑦ ᐃᓕᓐᓂᐊᖅᑏᑦ ᐱᓇᔪᖁᓪᓗᒋᑦ ᔫᓂ 30, 2026−ᖑᓚᐅᙱᓐᓂᖓᓂ, ᐃᓚᒋᔭᐅᓗᑎᒃ ᐃᓕᓐᓂᐊᖅᑏᑦ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ ᐊᓂᒍᐃᓵᖅᑐᑦ ᑕᐃᒃᑯᐊᓗ ᐃᓕᓐᓂᐊᕐᕕᖕᒧᑦ ᐅᑎᖅᐸᓪᓕᐊᓕᕐᓗᑎᒃ ᖃᖓᙳᒃᑲᓐᓂᖅᐸᑦ. ᐱᓇᔫᑎᑦ ᐱᔭᒃᓴᐅᔪᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᐃᑭᐊᖅᑭᕕᐊᓂ. ᖁᔭᓐᓇᒦᒃ, ᐅᖃᖅᑎᑦᑎᔩ. >>ᐸᒃᑕᑐᖅᑐᑦ ᐅᖃᖅᑎ: ᒥᓂᔅᑕᐃᑦ ᐅᖃᐅᓯᒃᓴᖏᑦ. ᐃᓕᓐᓂᐊᖅᑐᓕᕆᓂᕐᒧᑦ ᒥᓂᔅᑕᐅᑲᐃᓐᓇᖅᑐᖅ, ᒥᓂᔅᑕ ᒪᐃᓐ. ᒥᓂᔅᑕᑉ ᐅᖃᐅᓯᖓ 18 – 7(2): ᐸᐃᑉᐹᓕᑉᓄᑦ ᖃᐅᔨᔭᒃᓴᑦ, ᐊᔪᙱᓐᓃᑦ, ᖃᐅᔨᒪᔭᓄᓪᓗ ᐱᓇᓱᐋᕈᓯᖓ (ᒪᐃᓐ) ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐅᖃᖅᑎᑦᓯᔩ. ᐅᑉᓗᑦᓯᐊᖅ ᑲᑎᒪᔨᐅᖃᑎᒃᑲ ᐊᒻᒪ ᓄᓇᕗᒻᒥᐅᑦ. (ᑐᓵᔨᑎᒍᑦ) ᐅᖃᖅᑎᑦᑎᔩ, ᐅᓪᓗᒥ ᓇᖏᖅᓯᕗᖓ ᓇᓗᓇᐃᖅᓯᔪᒪᓪᓗᖓ ᐱᒻᒪᕆᐊᓗᖕᒥᒃ ᐱᔪᒥᓇᑦᑎᐊᖅᑐᒥᒡᓗ ᐱᓕᕆᐊᖑᕙᓪᓕᐊᔪᒪᔪᒥᒃ ᐱᓕᕆᐊᖑᖃᑦᑕᖅᓯᒪᔪᒥᒃ ᑭᕙᓪᓕᕐᒥ ᐃᓕᓐᓂᐊᕐᕕᖏᓐᓂ. ᓴᓇᔨᕈᕆᐅᖅᓴᓂᕐᒧᑦ ᐅᔾᔨᕈᓱᖕᓂᖅ, ᐊᔪᙱᓐᓂᖅ, ᖃᐅᔨᒪᓂᕐᓗ ᐱᓇᓱᐊᕈᓯᖅ − ᐱᓕᕆᐊᖑᕗᖅ ᓴᙱᒃᑎᒋᐊᖅᑎᑦᑎᕙᓪᓕᐊᖏᓐᓇᖅᖢᓂ ᐱᕕᒃᓴᓂᒃ ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔪᖅᑐᐃᓪᓗᓂᓗ ᐱᕈᖅᐸᓪᓕᐊᓂᖏᓐᓂᒃ ᓯᕗᓂᒃᓴᒥ ᐃᖅᑲᓇᐃᔭᖅᑎᖁᑎᕗᑦ. ᑖᓐᓇ ᖃᒪᓂᑦᑐᐊᕐᒥ ᐱᒋᐊᓚᐅᖅᓯᒪᓪᓗᓂ ᒫᓐᓇ ᑲᖏᖅᖠᓂᕐᒥ ᐱᒋᐊᖅᑎᑕᐅᓯᒪᓕᖅᑐᖅ. ᐅᖃᖅᑏ, ᓴᓇᔨᕈᕆᐅᖅᓴᓂᕐᒧᑦ ᐱᓕᒻᒪᔅᓴᐃᓂᖅ ᖃᐅᔨᒪᓂᕐᓗ ᐱᓇᓱᐊᕈᓯᐅᒻᒪᑦ ᑕᒫᓂ ᐊᕐᕌᒍᒥ ᑲᑎᑎᑦᑎᓚᐅᕐᒪᑦ ᐃᓕᓴᐃᔨᓂᒃ ᐊᒻᒪᓗ ᐅᓄᖅᑐᓂᒃ ᑲᑐᔾᔨᖃᑎᖃᖅᑐᑎᒃ ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᖅᑎᓂᒃ ᐊᔾᔨᒌᙱᑦᑐᓂᒃ

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 5 ᓴᓇᔭᕆᐅᔅᓴᓂᕐᒧᑦ ᐊᒻᒪᓗ ᐱᔭᕐᓂᖏᑦᑐᓕᕆᓂᕐᒧᑦ ᐃᖅᑲᓇᐃᔮᖑᒍᓐᓇᖅᑐᓂᒃ. ᐱᓕᕆᖃᑎᒌᑦ ᐱᓕᕆᐊᒃᓴᒧᑦ ᐱᓇᓱᐊᕈᓯᕐᒥ ᐅᑯᐊᖑᓚᐅᖅᐳᑦ: ᐋᒡᓃᑯ ᐄᒍ ᐅᔭᕋᓐᓂᐊᕐᕕᒃ (Agnico Eagle Mines), ᐲᑕᐅᑉ ᐅᓯᑲᑦᑕᖅᑎᖏᑦ ᓕᒥᑕ (Peter's Expediting Ltd.), ᐅᑭᐅᖅᑕᖅᑐᒥ ᐅᖅᓴᐃᔩᑦ (Arctic Fuel), ᐊᕐᕕᐊᓂ ᕿᔪᑦᑖᕐᕕᒃ (Eskimo Point Lumber Supply), ᓄᓇᕗᒻᒥ ᓯᓚᑦᑐᖅᓴᕐᕕᒃ ᐊᒻᒪ ᓄᓇᕗᒻᒥ ᐊᔪᙱᓐᓂᓕᕆᔨᒃᑯᑦ ᑲᓇᑕᒥ. ᑕᒪᑐᒪᓂ ᐊᕐᕌᒍᒥ ᐱᓕᕆᐊᖑᓚᐅᖅᑐᖅ ᖃᒪᓂ'ᑐᐊᕐᒥ ᐊᒻᒪ ᑲᖏᖅᖠᓂᕐᒥ ᑲᔪᓯᑦᑎᐊᓚᐅᖅᐳᑦ, ᐱᓕᕆᓪᓚᑦᑖᖅᖢᑎᒃ ᐃᓕᓐᓂᐊᖅᑎᑕᐅᓪᓗᑎᒃ ᓲᕐᓗ ᕿᔪᓕᕆᓂᕐᒥᒃ, ᐅᐊᔭᓕᕆᓂᕐᒥᒃ, ᐊᐅᓚᐅᓯᕆᓂᕐᒥᒃ, ᓂᖅᖠᐅᕆᐅᖅᓴᓂᕐᒥᒃ, ᖃᕆᑕᐅᔭᓕᕆᓂᕐᒥᒃ, ᓂᐱᐅᓯᖅᓱᐃᓂᕐᒥᒃ, ᒥᖅᓱᕐᓂᕐᒥᒃ, ᐱᐅᓴᐃᓂᕐᒥᒃ ᐊᒻᒪ ᐋᓐᓂᖅᑐᓕᕆᓂᕐᒥᒃ. ᑖᒃᑯᐊ ᐱᓕᕆᐊᖑᖃᑦᑕᖅᓯᒪᔪᑦ ᐃᑲᔪᖃᑦᑕᖅᐳᑦ ᒪᒃᑯᒃᑐᖁᑎᑦᑎᓐᓂᒃ ᓇᓗᖅᑯᑎᙱᓐᓂᖅᓴᐅᓕᕐᓗᑎᒃ, ᖃᐅᔨᓇᓱᒡᓗᑎᒃ ᐃᖅᑲᓇᐃᔮᕆᓛᕈᒪᔭᒥᓂᒃ, ᐃᒻᒥᓂᒡᓗ ᑕᑯᔪᓐᓇᖅᖢᑎᒃ ᐱᓕᕆᐊᒃᓴᓂᒃ ᐃᑲᔪᕐᓂᖃᓪᓚᕆᒃᑐᓂᒃ ᓄᓇᕘᑉ ᐱᕙᓪᓕᐊᓂᖓᓄᑦ. ᐅᖃᖅᑏ, ᑕᒪᓐᓇ ᑲᔪᓯᑦᑎᐊᖅᓯᒪᓂᖓ ᓴᓇᔨᕈᕆᐅᖅᓴᓂᕐᒧᑦ ᖃᐅᔨᒪᓂᕐᒧᑦ ᐱᓇᓱᐊᕈᓯᖅ ᑐᙵᕕᖃᕐᒪᑦ ᑲᑐᔾᔨᖃᑎᒌᓐᓂᒃᑯᑦ. ᐃᓕᓴᕆᔪᒪᔭᒃᑲ ᐅᓄᖅᑐᑦ ᐱᓕᕆᖃᑎᒌᒃᑐᑦ, ᐃᓄᑐᐃᓐᓇᐃᑦ, ᑲᑐᔾᔨᖃᑎᒌᓪᓗ ᖃᐅᔨᒪᔭᒥᓂᒃ ᖃᐅᔨᑎᑦᑎᖃᑦᑕᓚᐅᖅᑐᑦ. ᑲᑐᔾᔨᖃᑎᒌᖕᓂᕗᑦ ᓴᓇᕝᕕᖕᓂ ᐱᓕᕆᖃᑎᒌᓂᒃ, ᐅᑯᓂᖓᓗ ᓴᓇᔪᓕᕆᓂᕐᒧᑦ ᐱᓕᕆᔨᒻᒪᕇᑦ, ᐅᔭᕋᖕᓂᐊᕐᓂᕐᒧᑦ ᑭᒡᒐᖅᑐᐃᔨᑦ, ᐊᒻᒪ ᓄᓇᓕᖕᓂ ᑲᔪᖏᖅᓴᐃᔨᑦ−ᖃᐅᔨᒪᔾᔪᑕᐅᕗᖅ ᐃᓕᓐᓂᐊᖅᑎᑦ ᑕᑯᓪᓚᑦᑖᖃᑦᑕᕐᓂᖏᓐᓂᒃ ᐱᕕᒃᓴᓂᒃ ᐊᑐᐃᓐᓇᐅᔪᓂᒃ ᐊᖏᕐᕋᕆᔭᒥᓄᑦ. ᑖᒃᑯᐊ ᐃᑲᔪᕐᓂᕆᓚᐅᖅᑕᖏᑦ ᑕᑯᒃᓴᐅᑎᑦᑎᕗᑦ ᑲᑐᔾᔨᓪᓗᑎᒃ ᐊᖏᖅᓯᒪᓂᕐᒥᓂᒃ ᐊᔪᕈᓐᓃᖅᐸᓪᓕᐊᓗᑎᒃ, ᓇᓗᖅᑯᑎᙱᓪᓗᑎᒃ ᐊᒻᒪᓗ ᓴᐱᓕᖅᓴᕋᐃᖏᓪᓗᑎᒃ ᐊᕐᕌᒍᖃᑎᒌᙱᑦᑐᑦ ᓄᓇᕗᒻᒥᐅᑦ. ᐅᖃᖅᑎᑦᑎᔩ, ᐱᓕᕆᐊᖑᕙᓪᓕᐊᔪᒪᔪᑦ ᓲᕐᓗ TASK ᐱᓇᓱᐊᕈᓯᖅ ᑕᑯᒃᓴᐅᑎᑦᑎᕗᖅ ᐊᔪᕐᓇᙱᓐᓂᖓᓂᑦ ᐱᓕᕆᖃᑎᒌᒃᑳᖓᑦᑕ ᐃᑲᔪᖅᑐᐃᔪᒪᓪᓗᑕ ᐃᓕᓐᓂᐊᖅᑎᓂᒃ ᐱᓕᕆᐊᒃᓴᑎᒍᑦ ᑕᑯᒃᓴᐅᑎᑦᑎᔪᓂᒃ ᐃᓄᐃᑦ ᐱᒻᒪᕆᐅᒋᔭᖏᓐᓂᒃ, ᓄᓇᓕᖕᓂ ᓯᕗᓪᓕᐅᔾᔭᐅᔪᒪᔪᓂᒃ, ᐊᑯᓂᐅᔪᕐᓗ ᐱᔭᐅᔭᕆᐊᓕᖕᓂᒃ ᑕᒫᓂ ᐊᕕᒃᑐᖅᓯᒪᔪᓂ. ᒥᓂᔅᑕᐅᑲᐃᓐᓇᖅᖢᖓ ᐃᓕᓐᓂᐊᕐᓂᓕᕆᔨᒃᑯᓐᓄᑦ, ᐊᖏᖅᓯᒪᐃᓐᓇᖅᐳᖓ ᐱᓕᕆᖃᑎᒌᒃᐸᓪᓕᐊᒃᑲᓐᓂᖁᓪᓗᒋᑦ ᐊᖏᒡᓕᒋᐊᖅᑎᑦᑎᔪᓂᒃ ᐃᓕᓐᓂᐊᕐᓂᕐᒧᑦ ᐊᖅᑯᑎᖏᓐᓂᒃ, ᓴᖅᑭᔮᖅᑎᑦᑎᔪᓂᒃ ᐃᓄᖕᓂᒃ ᐃᖅᑲᓇᐃᔭᖅᑎᓂᒃ, ᐱᕙᒌᔭᕐᓗᒋᓪᓗ ᒪᒃᑯᒃᑐᖁᑎᕗᑦ ᐱᕕᒃᓴᐅᔪᓐᓇᖅᑐᓄᑦ ᓯᕗᓂᒃᓴᒧᑦ. ᖁᔭᓐᓇᒦᖅᑕᐃᓐᓇᕆᕙᒃᑲ ᑕᐃᒃᑯᐊ ᐃᑲᔪᓚᐅᖅᑐᑦ ᖃᐅᔨᒪᓂᕐᒥᓂᒃ ᐊᒻᒪᓗ ᐱᔪᒃᓯᑦᑎᐊᖅᖢᑎᒃ ᑖᓐᓇ ᓴᓇᔪᓕᕆᓂᕐᒧᑦ ᐅᔾᔨᕈᓱᖕᓂᖅ, ᐊᔪᙱᓐᓂᖅ, ᐊᒻᒪᓗ ᖃᐅᔨᒪᓂᖅ ᐱᓇᓱᐊᕈᓯᖅ ᖃᒪᓂᑦᑐᐊᕐᒥ ᑲᖏᖅᖠᓂᕐᒥᓗ ᑐᑭᖃᑦᑎᐊᖅᖢᓂ ᐊᒻᒪᓗ ᐃᖅᑲᐅᒪᓇᑦᑎᐊᖅᖢᓂ ᐊᑐᖅᑕᐅᓚᐅᖅᑐᖅ ᐃᓕᓐᓂᐊᖅᑎᖁᑎᑦᑎᓐᓄᑦ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐅᖃᖅᑎᑦᑎᔩ. >>ᐸᒃᑕᑐᖅᑐᑦ ᐅᖃᖅᑎ: ᒪ’ᓈᖅᐸᐱᑦᑕᐅᖅ. ᒥᓂᔅᑕᐃᑦ ᐅᖃᐅᓯᖏᑦ. ᐃᓪᓗᓕᕆᔨᕐᔪᐊᒃᑯᓐᓄᑦ, ᒥᓂᔅᑕ ᓚᐃᔪᓪ. ᒥᓂᔅᑕᑉ ᐅᖃᐅᓯᖓ 19 – 7(2): NHC ᑲᑐᔾᔨᖃᑎᖓ ᐊᒡᓃᑯ ᐄᒍᒥᒃ (ᓚᐃᔪᓪ) ᐊᖓᔪᖅᑳᖅ ᓯᓯᐅᓪ ᓂᐅᓪᕙᓇ ᓚᐃᔪᓪ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐃᓪᓗᓕᕆᓂᖅ ᓱᓕ ᐊᑦᓱᕉᑕᐅᓂᖅᐹᖑᖃᑕᐅᕗᖅ ᓄᓇᕘᒥ ᓄᓇᓕᐅᔪᓂᑦ. ᑕᒪᓐᓇ ᐊᑦᓱᕉᑎᒋᔭᕆᐊᖃᖅᑕᕗᑦ ᐱᓕᕆᖃᑎᒌᒋᐊᖃᖅᐳᑦ, ᑲᑐᔾᔨᓗᑕ ᑲᒪᒋᔭᑦᓴᕆᔭᐅᔪᓂᒃ, ᐊᖏᖅᓯᒪᑦᓯᐊᕐᓗᑕᓗ ᓴᖅᑭᑉᐸᓪᓕᐊᔪᓄᑦ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 6 ᐅᓪᓗᒥ, ᓇᖏᖅᓯᕗᖓ ᐃᓕᑕᖅᓯᔪᒪᓪᓗᖓ ᐱᓕᕆᖃᑎᒌᖏᓐᓇᕐᓂᖏᓐᓂᒃ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᑦ ᐊᒻᒪᓗ ᐊᒡᓃᑯ ᐄᒍᓪ ᐅᔭᕋᓐᓂᐊᖅᑎᒃᑯᑦ ᐃᑲᔪᖅᑐᐃᓪᓗᑎᒃ ᐃᓪᓗᓕᕆᓂᕐᒥᒃ ᑲᔪᓯᑎᑦᓯᓂᕐᒧᑦ ᓄᓇᕗᒻᒥ. ᑖᓐᓇ ᐱᓕᕆᓂᐅᔪᖅ ᓴᖅᑭᔮᖅᑎᑦᓯᔪᖅ ᐃᑲᔪᖃᑎᒌᒃᑕ, ᒐᕙᒪᑦᑕ ᓄᑖᖅ ᐱᓕᕆᐊᑦᓴᖓ, ᑐᑭᖃᖅᑐᖅ "ᐃᑲᔪᖃᑦᑕᐅᑎᓚᐅᖅᑕ." ᐆᑦᑑᑎᑦᓯᐊᕙᐅᕗᖅ ᒐᕙᒪᒃᑯᑦ ᓴᓇᕖᓪᓗ ᐱᓕᕆᖃᑎᒌᓐᓂᖏᓐᓂᑦ ᐊᑐᑦᓯᐊᕐᓂᖅᓴᐅᖁᓪᓗᒋᑦ ᐃᑲᔫᑎᑦᓴᓂᑦ, ᐱᐅᓯᕚᓪᓕᑎᑦᓯᓂᕐᒧᑦ ᑲᔪᓯᑎᑦᓯᓂᕐᒧᑦ, ᐃᑲᔪᖅᑐᐃᓂᕐᒥᓪᓗ ᓴᙱᓂᖅᓴᓂᑦ ᓄᓇᓕᓐᓂᑦ. ᐅᖃᖅᑎᑦᓯᔩ, 2025−ᒥ, ᐊᒡᓃᑯ ᐄᒍᒃᑯᑦ ᐊᑐᐃᓐᓇᐅᑎᑦᓯᕗᑦ ᐱᒻᒪᕆᐊᓗᒻᒥᒃ ᑐᓂᓯᓚᐅᖅᐳᑦ ᐊᑭᓖᓪᓗᑎᒃ ᐅᒥᐊᕐᔪᐊᒃᑯᑦ ᐅᓯᔭᐅᔾᔪᑎᓄᑦ 20−ᓄ ᐋᖅᑭᑦᓱᒐᕐᓂᑦ ᒪᑭᑐᐃᓐᓇᕆᐊᓕᓐᓂᒃ ᐃᓪᓗᓂᒃ ᑲᖏᖅᖠᓂᕐᒧᑦ ᖃᒪᓂ'ᑐᐊᕐᒧᓪᓗ. ᑕᒪᓐᓇ ᐃᑲᔪᖅᑐᐃᓂᖅ ᐊᑐᙱᓐᓂᖅᓴᐅᑎᑦᓯᓚᐅᖅᐳᖅ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᓐᓄᑦ $2- ᒥᓕᐊᑲᓴᓐᓂᒃ, ᐱᕕᒃᓴᖃᖅᑎᑦᓯᓪᓗᓂ ᑖᒃᑯᓂᖓ ᐃᖃᔫᑎᑦᓴᓂᒃ ᑐᕌᑎᑦᓯᑲᓐᓂᕐᓂᕐᒧᑦ ᐃᓪᓗᓕᕆᓂᕐᒧᑦ ᓯᕗᓪᓕᖅᐸᐅᔾᔭᐅᓯᒪᔪᓄᑦ. ᐱᓕᕆᐊᖑᔪᖅ ᑲᔪᓯᓂᖃᑦᓯᐊᓚᐅᖅᑎᓪᓗᒍ, ᐊᒡᓃᑯ ᐄᒍᓪᑯᑦ ᓄᓇᕗᒻᒥᓗ ᐃᓪᓗᓕᕆᔨᕐᔪᐊᒃᑯᑦ ᐱᓕᕆᐊᖃᖅᑐᑦ ᑭᖑᓪᓕᖅᐹᖅᓯᐅᑎᒥᒃ ᐊᖏᖃᑎᒌᒍᑕᐅᔪᒥᒃ ᑲᔪᓯᑎᑦᓯᓇᔭᖅᑐᒥᒃ ᑕᒪᑐᒥᖓ ᐱᓕᕆᖃᑎᒌᓐᓂᕐᒥᒃ ᓯᕗᒻᒧᐊᒃᑎᑦᓯᓇᔭᖅᑐᒥᒃ. ᑭᖑᓪᓕᕐᒥ ᐱᓕᕆᐊᖑᔪᑦᓴᖅ ᐃᑲᔪᖅᑐᐃᓇᔭᖅᑐᖅ ᐃᖏᕐᕋᔾᔪᑎᓄᒃ 20-25−ᐸᓗᓐᓂᒃ ᐋᖅᑭᑦᓱᒐᕐᓂᒃ ᐃᓪᓗᓂᒃ ᓄᓇᓕᓐᓄᑦ ᑭᕙᓪᓕᕐᒥ ᕿᑎᕐᒥᐅᓂᓗ ᐊᕐᕌᒍᑕᒫᑦ ᐊᕐᕌᒍᓄᑦ ᑕᓪᓕᒪᓄᑦ (5), ᐱᒋᐊᕐᓗᓂ 2026−ᒥ. ᐅᖃᖅᑎᑦᓯᔩ, ᑕᒪᓐᓇ ᐱᓕᕆᖃᑎᒌᓐᓂᖅ ᐃᑲᔪᖅᑐᐃᕗᖅ ᐃᓪᓗᓕᐅᖃᑎᒌᓐᓂᕐᒥᒃ, ᓄᓇᕗᑦ 3000−ᒥ, ᐃᑲᔪᕐᓂᒃᑯᑦ ᐃᓪᓗᓕᕆᓂᕐᒧᑦ ᐱᖁᑎᖃᖅᑎᑦᓯᓂᖅᓴᐅᓂᕐᒧᑦ ᐊᐅᓚᑦᓯᖃᑎᒌᓐᓂᒃᑯᑦ, ᐱᓕᕆᖃᑎᒌᓐᓂᒃᑯᑦ ᖃᓄᐃᓕᐅᕐᓂᕐᒧᑦ. ᑕᑯᑦᓴᐅᑎᑦᓯᒻᒥᔪᖅ ᐱᒻᒪᕆᐅᓂᖓᓂᒃ ᓴᓇᕕᒃ ᐃᑲᔪᖅᑐᐃᓂᐊᕐᓗᓂ ᐊᑯᓂᐅᔪᒧᑦ ᓄᓇᓕᓐᓂ ᐱᕙᓪᓕᐊᓂᕆᔭᐅᔪᒥᒃ ᓄᓇᕗᒻᒥ. ᐃᑲᔫᑕᐅᔪᓐᓇᖅᑐᓄᑦ ᐱᕙᓪᓕᐊᑎᑦᓯᓂᖅᑕᖃᖅᑎᓪᓗᒍ ᐊᑦᑐᐊᓂᖃᖅᑎᓪᓗᒍ ᓄᓇᓕᓐᓂ ᐱᔭᐅᔭᕆᐊᓕᓐᓄᑦ, ᐃᑲᔫᑕᐅᔪᓐᓇᖅᐳᖅ ᑲᔪᓯᑎᑦᓯᓂᕐᒧᑦ ᐊᑑᑎᖃᑦᓯᐊᖅᑐᓂᒃ ᐊᑯᓂᐅᔪᒃᑯᓪᓗ ᐃᑲᔫᑎᑦᓴᓂᒃ ᓄᓇᕗᒻᒥᐅᓄᑦ. ᓇᑯᕐᒦᕈᒪᔭᒃᑲ ᐊᒡᓃᑯ ᐄᒍᓪ ᐅᔭᕋᓐᓂᐊᖅᑎᒃᑯᑦ ᐱᓕᕆᖃᑎᖃᐃᓐᓇᕐᓂᖏᓐᓄᑦ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᓐᓂ ᐃᑲᔪᖅᑐᐃᔪᒪᓪᓗᑎᒃ ᐃᓪᓗᓕᕆᓂᕐᒥᒃ ᑲᔪᓯᑎᑦᓯᓂᕐᒧᑦ ᓴᙱᓂᖅᓴᓂᓪᓗ ᓄᓇᓕᓐᓂᑦ ᓄᓇᕗᓕᒫᒥ. ᖁᐊᓇ, ᐅᖃᖅᑎᑦᓯᔩ. >>ᐸᒃᑕᑐᖅᑐᑦ ᐅᖃᖅᑎ: ᒥᓂᔅᑕᐃᑦ ᐅᖃᐅᓯᖏᑦ. ᓄᓇᓕᓐᓂ ᐱᔨᑦᓯᖅᑎᒃᑯᑦ, ᒥᓂᔅᑕᖓ ᐊᒻᒪᓗ ᑲᒪᒋᔭᖃᖅᑐᖅ ᐅᔭᕋᓐᓂᐊᕐᓂᕐᒧᑦ, ᒥᔅᑕ ᓯᒪᐃᓚᒃ. ᒥᓂᔅᑕᑉ ᐅᖃᐅᓯᖓ 20 – 7(2): ᑲᐱᔭᓕᖅᑑᑉ ᐃᒃᐱᐊᕐᔫᖓᓂ ᐅᔭᕋᖕᓂᐊᕝᕕᒃ ᑕᑯᓇᒃᑎᑕᓄᑦ (ᓯᒪᐃᓚᒃ) ᐊᖓᔪᖅᑳᖅ ᑯᕋᐃᒡ ᓯᒪᐃᒃᓚ: ᒪ’ᓇ ᐅᖃᖅᑎᑦᓯᔩ. ᒪᓕᒐᓕᐅᖅᑎᐅᖃᑎᒃᑲ, ᐅᑉᓗᒃᑯᑦᓯᐊᖅ. ᐅᖃᖅᑎᑦᓯᔩ, ᖁᕕᐊᓱᒃᖢᖓ ᑐᓴᖅᑎᑦᓯᔪᒪᕗᖓ ᑖᕙᓂ ᐱᓕᕆᐊᕆᔭᐅᕙᓪᓕᐊᔪᖅ ᓱᓕ ᑲᐱᔪᓕᒃᑑᕐᒥ ᕿᑎᕐᒥᐅᑦ ᓄᓇᖓᓐᓂ. (ᑐᓵᔨᑎᒎᓕᖅᑐᖅ) ᐅᖃᖅᑏ, ᒫᓐᓇᕈᓘᓚᐅᖅᑐᖅ ᒥᓂᔅᑕᐅᖃᑎᒃᑲᓗ ᐳᓛᕆᐊᕈᓐᓇᔪᒐᑦᑕ ᐅᔭᕋᓐᓂᐊᕕᔅᓴᖃᕐᕕᐅᓛᖅᑐᒧᑦ ᑕᑯᓪᓚᕆᒍᓐᓇᖅᑐᑕᓗ ᐊᒡᓂᑯ ᐄᒍᒃᑯ ᐊᐅᓚᑦᑎᓂᕆᕙᑦᑕᖏᓐᓂᒃ

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 7 ᓯᕗᓂᑐᖃᑦᑎᓐᓄᓪᓗ ᐸᕐᓈᕆᓯᒪᔭᖏᓐᓂᒃ. ᑕᐃᒪ ᐳᓛᕆᐊᖅᑐᑕ ᐱᕕᖃᖅᑎᑕᐅᓚᐅᖅᑐᒍᑦ ᐅᖃᐅᓯᖃᕈᓐᓇᕐᓗᑕ ᐃᓄᐃᑦ ᐱᓕᒻᒪᓴᖅᑕᐅᓂᖏᓐᓂᒃ, ᐃᖅᑲᓇᐃᔭᖅᑎᑕᐅᓂᖏᓐᓂᒃ, ᐃᖅᑲᓇᐃᔭᕐᕕᒻᒥ ᐊᑦᑕᓇᖅᑐᒦᑦᑕᐃᓕᓂᕐᒥᒃ, ᑐᑦᑐᓂᒃ ᐊᐅᓚᑦᑎᓂᕐᒧᑦ ᐸᕐᓇᐅᑎᓂᓪᓗ ᐊᒻᒪᓗ ᐊᓯᖏᓐᓂᒃ ᐱᓕᕆᐊᖓᓄᑦ ᐊᑦᑐᐊᓂᖃᖅᑐᓂ. ᐊᒡᓂᑯ ᐄᒍᒃᑯᑦ ᐃᖅᑲᓇᐃᔭᖅᑎᖏᑦ ᖁᔭᓕᒍᒪᔭᒃᑲ ᑐᙵᓇᓚᐅᕐᖓᑕ ᐊᒻᒪᓗᑦᑕᐅᖅ ᐃᓕᑉᐹᓪᓕᖅᑎᑦᑎᓚᐅᕐᖓᑕ ᖃᓄᖅ ᐱᓕᕆᔪᖃᕐᒪᖔᑦ ᑕᐃᑲᓂ. ᐅᖃᖅᑏ, ᐅᔭᕋᓐᓂᐊᕐᓂᖅ ᓱᓕ ᐊᔅᓱᐊᓗᒃ ᐱᑕᖃᖃᑕᐅᒻᒪᑦ ᓄᓇᕗᒻᒥ ᑮᓇᐅᓕᐅᕈᑕᐅᔪᓄᑦ ᐊᖏᓂᖅᐹᖑᖃᑕᐅᓪᓗᓂ, ᐊᒥᓲᓛᓂᓪᓗ ᐃᖅᑲᓇᐃᔭᖅᑎᑦᑎᔨᐅᓕᖅᑐᑎᒃ. ᑖᓐᓇ ᕼᐆᑉ ᐸᐃᒥ ᐱᓕᕆᓂᐅᔪᖅ ᓴᖅᑭᖅᓯᓂᐊᖅᑐᖅ ᐊᑯᓂᑲᓪᓛᓗᒃ ᐃᑲᔫᓯᐊᕐᕕᐅᒍᓐᓇᖅᑐᓂ ᓄᓇᕗᒻᒥᐅᓄᑦ ᐃᖅᑲᓇᐃᔭᕐᓂᒃᑯᑦ ᐱᓕᒻᒪᔅᓴᖅᑕᐅᓂᒃᑯᑦ ᓇᒻᒥᓂᖃᐅᑎᓂᑦ ᑎᒍᔭᒃᓴᐅᔪᓂᒃ ᐊᒻᒪᓗ ᐊᕕᑦᑐᖅᓯᒪᓂᖓᓂᒃ ᐱᕙᓪᓕᐊᓂᕐᒥ. ᐱᔪᓐᓇᐅᑏᑦ ᐋᖅᑭᔅᓯᒪᓕᖅᑐᑦ ᑑᕆᔅ, ᒪᑐᕆᑦ ᐊᒻᒪ ᐹᔅᑕᓐ ᐅᔭᕋᑦᑕᓕᓐᓄᑦ ᐊᒻᒪᓗᑦᑕᐅᖅ ᑖᓐᓇ ᒎᓗᓐᓂᐊᕐᕕᐅᔪᓂ ᐊᖏᓂᖅᐹᖑᓕᕈᖅᑐᓂ ᓄᓇᕗᒻᒥ. ᐅᖃᖅᑏ, 2024 ᐱᒋᐊᓕᕋᑖᖅᑎᓪᓗᒍ ᓄᓇᕗᑦ ᒐᕙᒪᖓ ᐊᒡᓂᑯ ᐄᒍᒃᑯᑦ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓪᓗ ᑐᑭᓯᐅᒪᖃᑐᒌᓐᓂᕐᒧᑦ ᐊᖏᖃᑎᒌᒍᑎᓕᐅᔪᔪᐃᑦ ᓴᙱᓕᕐᔫᒥᑎᑦᑎᒋᐊᖅᑐᑎᒃ ᑲᑐᔾᔨᖃᑎᒌᒐᓱᓐᓂᕆᔭᖏᓐᓂᒃ ᐊᒻᒪ ᓯᕗᓪᓕᐅᑎᑕᐅᖁᔭᖏᓐᓂᒃ. ᑖᒃᑯᐊ ᑲᑐᔾᔨᖃᑎᒌᓐᓂᐅᔪᐃᑦ ᐃᑲᔪᖅᓰᓂᐊᖅᑐᐃᑦ ᐱᓕᕆᐊᖏᓐᓂᒃ ᐃᓕᓐᓂᐊᑎᑦᑎᓂᕐᒥ, ᐱᓕᒻᒪᔅᓴᐃᓂᕐᒥ ᐃᖅᑲᓇᐃᔮᒧᑦ, ᐃᖅᑲᓇᐃᔭᖅᑎᑦᑎᓂᕐᒧᑦ, ᐱᖁᑎᕐᔪᐊᓄᑦ, ᓄᓇᓖᑦ ᖃᓄᐃᙱᑦᑎᐊᖅᑎᑕᐅᒐᓱᓐᓂᖏᓐᓂᑦ ᐊᒻᒪ ᐃᓅᓯᖓ ᐊᑦᑐᑕᐅᒻᒪᖔᑕ ᖃᐅᔨᓴᖅᑕᐅᓂᕐᒥ. ᑕᒪᒃᑯᐊ ᒪᓕᑦᑎᐊᖅᑐᐃᑦ ᒐᕙᒪᒃᑯᑦ ᑐᕌᖅᑕᕆᔭᖏᓐᓂᒃ ᐸᕐᓇᐅᑎᓂ. ᐃᑲᔪᕐᓂᐊᖅᑐᑎᓪᓗ ᐃᑲᔪᕐᓂᖃᕐᓂᐊᖅᑐᑎᒃ ᐊᑯᓂ ᐱᕕᐅᖃᑦᑕᕈᓐᓇᓂᐊᕐᖓᑕᓗ ᓄᓇᕗᒻᒥᐅᓄᑦ. ᐅᖃᖅᑏ, ᑖᓐᓇ ᐅᔭᕋᓐᓂᐊᕐᕕᐅᑉ ᑲᔪᓯᑎᑕᐅᓂᖓ ᐱᒻᒪᕆᐊᓗᒻᒥᒃ ᓴᖅᑭᖅᓯᒍᑕᐅᔪᖅ ᓄᓇᕗᒻᒥ ᐅᔭᕋᓐᓂᐊᕋᔅᓴᖁᑎᖏᓐᓂᑦ, ᐊᒻᒪᓗᑦᑕᐅᖅ ᐊᑑᑎᖃᕈᓐᓇᕐᓂᖏᓐᓂᑦ ᓴᙱᔪᒥᒃ ᑲᑐᔾᔨᖃᑎᒌᑉᐸᑕ ᒐᕙᒪᐃᑦ, ᐃᓄᐃᑦ ᑲᑐᔾᔨᖃᑎᒌᖏᓪᓗ, ᓇᒻᒥᓂᖃᐅᑎᓖᓪᓗ. ᑲᑐᔾᔨᖃᑎᒌᖏᓐᓇᕐᓗᑕ ᐊᖏᖅᓯᒪᓂᖃᐃᓐᓇᓂᐊᖅᑐᒍᑦ ᐊᖏᓂᖅᐹᒥᒃ ᑎᒍᓯᕕᐅᒍᓐᓇᖁᓪᓗᒋᑦ ᐅᔭᕋᓐᓂᐊᕐᓂᐅᔪᐃᑦ ᓄᓇᕗᒻᒥ. ᖁᔭᓐᓇᒦᒃ, ᐅᖃᖅᑏ. >>ᐸᒃᑕᑐᖅᑐᑦ ᐅᖃᖅᑎ: ᑲᑎᒪᔾᔪᑎᑦᑕ ᓈᓴᐅᑎᖓ 3, ᒪᓕᒐᓕᐅᖅᑏᑦ ᐅᖃᐅᓯᖏᑦ. ᒪᓕᒐᓕᐅᖅᑏᑦ ᐅᖃᐅᓯᖏᑦ. ᐃᖃᓗᑦᑑᑦᓯᐊᕐᒧᑦ ᒪᓕᒐᓕᐅᖅᑎ, ᐲᑕᓴᓐ. ᑲᑎᒪᔾᔪᑎᒃᓴᖅ 3: ᒪᓕᒐᓕᐅᖅᑏ ᐅᖃᐅᓯᒃᓴᖏᑦ ᒪᓕᒐᓕᐅᖅᑎᑉ ᐅᖃᐅᓯᖓ 35 – 7(2): ᐋᓐᓂᐊᖅᑐᓕᕆᓂᕐᒧᑦ ᐱᔨᑦᑎᐅᑎᖏᑦ ᐃᖃᓗᒃᑑᑦᑎᐊᕐᒥ (ᐲᑐᓴᓐ) ᐲᑕᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐅᓐᓄᓴᒃᑯᑦ ᐃᓘᓐᓇᓯ, ᓂᕈᐊᖅᑎᒋᓯᒪᔭᒃᑲᓗ ᑕᑯᕋᓐᓈᖅᑐᐃᑦ ᐃᖃᓗᒃᑑᑦᑎᐊᓂ. ᐅᓪᓗᒥ ᐅᖃᐅᓯᔅᓴᕋ ᐋᓐᓂᐊᖅᑕᐃᓕᓕᕆᔨᒃᑯᑦ ᒥᓂᔅᑕᖓ ᖃᐅᔨᒃᑲᖅᑲᕋ ᐊᐱᖅᓱᕐᓇᐅᓕᖅᑲᑦ ᐊᐱᖅᑯᑎᖃᕐᓂᐊᕋᒪ ᐃᖃᓗᑦᑑᑦᑎᐊᕐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᓂᐅᕙᑦᑐᓂᒃ ᒥᓂᔅᑕᐅᓪᓗ ᐅᖃᐅᓯᕆᖅᑲᐅᒻᒪᒍ. ᐅᖃᖅᑏ, ᐅᐊᑦᑎᐊᕈᒻᒪᕆᐅᙱᑦᑐᖏᐃᓐᓇ ᐋᓐᓂᐊᕕᓐᓂ ᐊᑐᐃᓐᓇᖃᖃᑦᑕᔪᒻᒪᑕ ᐃᓯᑐᐃᓐᓇᖅᑐᓪᓗ ᑕᑯᔭᖃᑦᑕᕈᓐᓇᖅᑐᑎᒃ. ᑕᐃᒪᐃᒍᓐᓃᕐᖓᑦ ᐅᓪᓗᒥ. ᑐᐊᕕᕐᓇᖅᑐᐃᑦ ᑭᓯᐊᓂ ᑕᑯᔭᐅᒍᒫᔫᔮᖃᑦᑕᓕᕐᖓᑕ. ᐅᖄᓚᓪᓗᓂ ᐃᓂᔅᓴᓕᐅᕋᓱᑦᑐᓂ, ᐊᑎᖓᓂᒃ ᑐᓂᓯᖅᑳᕆᐊᖃᓲᖅ ᑭᐅᔨᖓᓄᑦ. ᑕᐃᒪᓕ ᑭᐅᔨᖓ ᐋᓐᓂᐊᓯᐅᖅᑎᒧᑦ ᐃᖅᑲᓇᐃᔭᖅᑎᒧᑦ ᐅᖄᓚᑦᑕᖅᑯᖅ ᐊᒻᒪ ᖃᓄᐃᒻᒪᖔᑦ ᐊᐱᖅᓱᑕᐅᑦᑕᓕᖅᑯᖅ ᐋᓐᓂᐊᔪᖅ. 24 ᐃᑲᕐᕋᐃᑦ ᐊᓂᒍᕈᓐᓇᖅᑐᑦ ᐅᖄᓚᕕᐅᒃᑲᓐᓂᓚᐅᖅᑎᓐᓇᒍ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 8 ᐋᓐᓂᐊᓯᐅᖅᑎ ᐃᖅᑲᓇᐃᔭᖅᑐᖅ 24−ᓂᒃ ᐃᑲᕐᕋᓂᒃ ᑭᓯᐊᓂ ᐊᓂᒍᕋᐃᒻᒪᑕ ᐅᖄᓚᖃᑦᑕᓲᖑᒻᒪᑕ. ᑕᐃᒫᒃ ᐱᔨᑦᑎᕋᖅᑕᐅᒋᐊᖃᙱᒃᑲᓗᐊᕐᖓᑕ ᐋᓐᓂᐊᔪᐃᑦ. ᑖᒃᑯᐊ ᓂᕈᐊᖅᑎᓯᒋᓯᒪᔭᓐᓂᒃ ᐅᖃᐅᔾᔭᐅᖃᑦᑕᕋᒪ ᐊᒻᒪᓗ ᓇᒻᒥᓂᖅ ᐊᑐᖅᓯᒪᓪᓗᒍ. ᐅᖃᖅᑏ, ᐊᕐᕌᒍᑦ ᖃᑦᑎᒃᑭᐊᖅ ᐊᓂᒍᓕᖅᑐᐃᑦ ᒐᕙᒪᒃᑯᑦ ᐊᖏᕐᕋᒧᑦ ᖃᓂᔅᓴᓂᖅᓴᐅᔪᓂᒃ ᐃᑲᔪᖃᑦᑕᓂᐊᕐᓂᕋᖅᓯᒪᒻᒪᑕ. ᑕᐃᒪᐃᙱᒻᒪᑕ ᓱᓕ. ᓇᓗᓇᙱᓪᓚᕆᑦᑐᖅ. ᐋᓐᓂᐊᖅᑕᐃᓕᓕᕆᔨᒃᑯᑦ ᓇᓂᓯᒋᐊᓖᑦ ᖃᓄᖅ ᐋᓐᓂᐊᓯᐅᖅᑎᑖᕈᓐᓇᓂᐊᕐᒪᖔᑕ ᐅᓪᓗᓕᒫᖅ ᐃᖅᑲᓇᐃᔭᖃᑦᑕᕈᓐᓇᖅᑐᓂᒃ. ᐊᒻᒪ ᐅᑕᖅᑭᖃᑦᑕᖅᑎᑕᐅᔪᐃᑦ ᖃᑦᑏᓐᓇᕈᕐᔫᒥᑎᑕᐅᒋᐊᓕᐅᒐᓗᐊᑦ. ᐃᓚᖏᑦ ᑕᑯᔭᐅᙲᓐᓇᑦᑎᐊᒻᒪᕆᑉᐸᑦᑐᐃᑦ ᐋᓐᓂᐊᓕᖅᐸᓪᓕᐊᖏᓐᓇᖅᑐᐃᑦ ᑕᑯᔭᐅᔅᓯᖅᑐᑎᒃ. ᐊᓪᓛᑦ ᒪᓕᒐᓕᐅᖅᑎᐅᖃᑎᒃᑲ ᐅᖃᖃᑦᑕᖅᓯᒪᔪᐃᑦ ᐅᐸᓗᑦᑐᑎᒃ ᑭᓯᐊᓂ ᖃᐅᔨᔭᐅᖃᑦᑕᕐᖓᑕ ᑳᓐᓱᖃᖅᑐᐃᑦ ᐋᓐᓂᐊᖃᓪᓚᕆᑦᑐᐃᑦ. ᐊᐱᖅᓱᕐᓇᐅᓕᖅᑲᑦ ᑕᒪᓐᓇ ᐊᐱᖅᑯᑎᒋᓂᐊᕋᑦᑎᒍᑦ ᑎᑭᒃᑯᑦᑎᒍᑦ ᑲᑎᒪᔾᔪᑎᔅᓴᓂ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᒥᓂᔅᑕᐃᑦ ᐅᖃᐅᓯᖏᑦ. ᐊᕐᕕᐊᑦ ᓂᒋᐊᓄᑦ, ᒥᔅᑕ ᖃᑉᓗᑦᓯᐊᖅ. ᒪᓕᒐᓕᐅᖅᑎᑉ ᐅᖃᐅᓯᖓ 36 – 7(2): ᐊᕐᕕᐊᓂ ᐊᓂᒍᐃᔪᓄᑦ (ᖃᑉᓗᑦᓯᐊᖅ) ᖃᑉᓗᑦᓯᐊᖅ: ᒪ’ᓇ ᐅᖃᖅᑎᑦᓯᔩ. ᐅᑯᐊ ᐃᓕᑕᕆᒍᐊᖅᖢᒋᑦ ᒪᑭᑉᐳᖓ. ᑕᕝᕙᓂ ᐅᑭᐅᕐᒥ ᐃᓕᓐᓂᐊᒐᓂᙶᖅᑐᑦ ᑕᐃᑲᓂ ᐊᕐᕕᐊᑦ ᔮᓐ ᐊᓛᓗᒡᔪᐊᖅ ᐃᓕᓐᓂᐊᕐᕕᐊᓘᓂᕋᖅᑕᐅᔪᒥᑦ. ᑖᒃᑯᐊ ᐊᑏᑦ ᐅᖃᓕᒫᕐᓂᐊᖅᐸᒃᑲ. • ᕋᐃᔭᓐ ᔮᓐ ᐋᒻᒪᒃ • ᓕᓕᐊᓐ ᐊᖄᑦᓯᐊᖅ • ᐊᐃᑦᑐᕆᐊᓐ ᐊᓕᖅᑎᓗᒃ • ᐊᐃᕗᕆ ᐊᕐᓈᓛᖅ • ᐋᔅᓕ ᔪᐃ ᑰᓕ • ᔭᐃᓴᓐ ᑰᓕ • ᓴᒫᓐᑕ ᐅᓅᔭᖅ • ᑕᓪᕖᓐ ᒪᐃ ᒋᕙᓐᔅ • ᒪᐃᒐᓐ ᐄᓴᓗᒃ • ᐸᑎ ᐃᓱᒪᑕᕐᔪᐊᖅ • ᕋᐴᑕ ᐃᕗᓂᕐᔪᒃ • ᑐᕆᓴ ᖃᑉᓗᑦᓯᐊᖅ • ᑳᒻ ᖃᓗᔾᔭᖅ • ᑕᒃᔅᑐ ᑲᓗᐊᖅ • ᕉᑦ ᑭᒍᓯᐅ’ᓈᖅ • ᕙᓇᓴ ᑭᒍᓯᐅ’ᓈᖅ • ᔭᓇ ᑰᒻᒪᒃ • ᒫᑦ ᕿᑎᖅᖠᓗᒃ • ᒦᐊ ᕿᑎᖅᖠᓗᒃ • ᓘᒐᓐ ᒪᓂᖅ • ᓃᕕ ᒥᑭᔪᖏᐊᖅ • ᕇᐸ ᒪᒃᐸ • ᒫᒍ ᒧᕐᔪᖕᓂᖅ • ᑐᕆᓂᑎ ᒧᕐᔪᖕᓂᖅ • ᐊᓚᐃᓐ ᒧᕐᔪᖕᓂᖅ • ᒥᐅᕈᐅ ᓂᑉᒍᐊᖅᓯ

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 9 • ᕕᓐᓴᓐᑦ ᓂᑉᒍᐊᖅᓯ • ᕼᐊᐃᑎ ᐊᑉᓴᐅᔅᑭ • ᓵᓕ ᐅᖃᑦᓯᐊᖅ • ᒪᓕᓴ ᐊᐅᓚᔾᔪᑦ • ᒪᑐ ᔅᐸᓐᔅ • ᒧᐊᒐᓐ ᑐᑯᕐᒥ • ᒥᐊᕆ ᕉᑦ ᐅᓗᐊᓪᓗᐊᖅ−ᒋᕙᓐᔅ • ᔪᐊᑕᓐ ᐅᐃᓕᐊᒻᔅ • ᒫᒋ ᐅᐃᓕᐊᒻᔅ (ᑐᓵᔨᑎᒍᑦ) ᐅᖃᖅᑏ, ᑲᔪᖏᖅᓴᖃᒃᑲ ᑖᒃᑯᐊ ᐱᔭᕇᓚᐅᖅᑐᐃᑦ 2026−ᒥ ᐊᕐᕕᐊᓂ ᔮᓐ ᐊᕐᓈᓗᔾᔪᐊᖅ ᐃᓕᓴᕕᖓᓂ. ᐃᓕᓐᓂᐊᖅᑏᓪᓗ ᓄᓇᕗᓕᒫᒥ ᐃᓱᒪᒃᓴᖅᓯᐅᕈᑎᖃᖁᓪᓗᒋᑦ ᐃᓕᓐᓂᐊᒃᑲᓐᓂᓂᕐᒥᒃ. ᐃᓕᓐᓂᐊᖅ ᐊᑎᓕᐅᕐᓗᑎᒃ ᓯᓚᑦᑐᔅᓴᕐᕕᔪᐊᕈᓘᔭᕐᓄᑦ ᓯᓚᑦᑐᖅᓴᕐᕕᓐᓄᓪᓗ ᓇᒥᕈᓘᔮᓗᒃ ᑲᓇᑕᒥ. ᐊᒻᒪᓗᑦᑕᐅᖅ ᓄᓇᕗᑦ ᓯᓚᑦᑐᓴᕐᕕᑯᓐᓄᑦ ᐊᑎᓕᐅᖃᑕᐅᒋᐊᔅᓴᖅ ᐃᓱᒪᒋᐊᖁᓪᓗᒋᑦ. ᐊᒥᓱᐊᓗᐃᑦ ᓄᓇᕗᒻᒥ ᐃᓕᓐᓂᐊᖅᑏᑦ ᓄᓇᕗᑦ ᒐᕙᒪᖓᓂ ᐃᖅᑲᓇᐃᔭᕈᓐᓇᓪᓚᕆᒻᒪᑕ. ᒪᓕᓪᓗᑎᒃ ᓈᓴᐅᑎᓕᒻᒥᒃ 23−ᒥ ᓄᓇᒥ ᓄᓇᑖᕈᑕᐅᓯᒪᔪᓂ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐊᓕᐊᓇᐃᒍᓱᖃᑎᒋᕙᕗᑦ. ᒪᓕᒐᓕᐅᖅᑏᑦ ᐅᖃᐅᓯᖏᑦ, ᑕᓯᐅᔭᕐᔪᐊᕐᒨᙱᑦᑐᖅ ᑭᓯᐊᓂ ᖃᒪᓂᑦᑐᐊᕐᒧᑦ ᒪᓕᒐᓕᐅᖅᑎ, ᓯᒪᐃᓚᒃ. ᒪᓕᒐᓕᐅᖅᑎᑉ ᐅᖃᐅᓯᖓ 37 – 7(2): ᐃᓕᓴᖅᓯᓂᖅ ᐅᓗᐅᑦ (ᓯᒪᐃᓚᒃ) ᐊᖓᔪᖅᑳᖅ ᑯᕋᐃᒃ ᓯᒪᐃᓚᒃ: ᒪ’ᓇ, ᐅᖃᖅᑎᑦᓯᔩ. ᐄ, ᖃᒪᓂᑦᑐᐊᕐᒥᐅᑕᐅᔪᖓ. ᐅᕙᑦᓯᐊᖅ ᐅᖃᐅᓯᕆᔭᐅᓚᐅᖅᑐᖅ ᐅᓕᐅᑦ ᐅᖃᐅᓯᕆᐊᓪᓚᒍᐊᖅᐸᕋ. ᖁᕕᐊᓇᑯᓂ ᐃᓕᑕᕆᔭᐅᖕᒪᑦ. 50−ᓂᒃ ᐊᓪᕌᒍᓂᒃ ᐱᓕᕆᓕᕐᒪᑦ ᑕᐃᑲᓂ ᐃᓕᓐᓂᐊᖅᑐᓕᕆᔨᓂᑦ. ᑕᐃᒪ ᐊᒡᓛ ᖃᖓᒥᐊᑦᑐᐊᖅ ᐱᓕᕆᓕᕐᒪᑦ ᐱᓕᕆᓕᕋᕕᑦ ᐅᓕᐅᑦ ᖁᕕᐊᓇᑯᓂ. ᐃᖅᑲᐅᒪᒻᒫᖅᑐᖓ ᐃᓕᓐᓂᐊᖅᑎᑦᓯᐅᓚᐅᕋᕕᑦ ᐅᕙᒻᓄᑦ. (ᑐᓵᔨᑎᒎᓕᖅᑐᖅ) ᐃᓕᓴᐃᓕᒋᕕᒋᔭᓐᓄᑦ ᐃᓚᒋᔭᐅᔪᒐᕕᑦ ᐊᒻᒪ ᖁᕕᐊᒋᔭᐅᓪᓚᕆᑉᐳᑎᑦ ᐃᓕᓴᕆᔭᐅᒐᕕᑦ ᐊᒻᒪ ᕿᓚᐅᑎᒥᐅᓪᓗ ᐃᓐᓇᐃᑦ ᑲᑐᔾᔨᖃᒌᖏᓐᓄᑦ ᐃᓚᒋᔭᐅᓯᒪᒻᒥᒻᒪᑦ. ᐃᓕᓐᓂᐊᖅᑐᓕᕆᓂᕐᒧᑐᐊᖅ ᐃᑲᔪᖃᑦᑕᖅᓯᒪᙱᒻᒪᑦ, ᐃᓐᓇᒻᒪᕆᓐᓂᓗᑦᑕᐅᖅ ᖃᒪᓂᑦᑐᐊᕐᒥ ᐃᑲᔪᖃᑦᑕᕐᖓᑦ. ᖁᔭᓐᓇᒦᒃ, ᐅᓕᐅᑦ. (ᑐᓵᔨᑎᒎᕈᓐᓃᖅᑐᖅ). ᒪ’ᓇ, ᐅᖃᖅᑎᑦᓯᔩ. >>ᐸᒃᑕᑐᖅᑐᑦ ᐅᖃᖅᑎ: ᖁᔭᓐᓇᒦᒃ. ᒪᓕᒐᓕᐅᖅᑏᑦ ᐅᖃᐅᓯᖏᑦ. ᑲᔪᓯᓗᑕ ᑲᑎᒪᔾᔪᑎᑦᑎᓐᓄᑦ ᓈᓴᐅᑎᖓ 4, ᐅᖃᐅᓯᒃᑯᑦ ᐊᐱᖅᑯᑎᕕᓂᕐᓄᑦ ᑭᐅᔾᔪᑏᑦ. 5, ᐳᓛᕆᐊᖅᓯᒪᔪᓂᒃ ᐃᓕᓴᖅᓯᓂᖅ. ᑐᙵᓱᑦᓯᐊᕐᓕᑦ ᐳᓛᕆᐊᖅᓯᒪᔪᐃᑦ. ᐃᖃᓗᐃᑦ ᒪᓂᕋᔭᖕᒧᑦ ᒪᓕᒐᓕᐅᖅᑎ, ᕼᐄᓕ−ᐊᕿᐊᕈᖅ. ᑲᑎᒪᔾᔪᑎᒃᓴᖅ 5: ᐃᓕᓴᖅᓯᓂᖅ ᐳᓛᕆᐊᖅᓯᒪᔪᓂᑦ ᒪᓕᒐᓕᐅᕐᕕᖕᒧᑦ ᐊᖓᔪᖅᑳᖅ ᒍᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐅᖃᖅᑎᑦᑎᔩ. (ᑐᓵᔨᑎᒎᓕᖅᑐᖅ) ᖁᔭᓐᓇᒦᒃ, ᐅᖃᖅᑏ. ᒫᓐᓇ ᐃᓕᓴᖅᓯᒍᒪᒐᒪ ᓅᐊᓪ ᒪᒃᑑᒪᑦᒥᒃ ᐳᓛᕆᐊᕐᕕᑦᑎᓐᓄᑦ. ᑖᓐᓇ ᐊᑯᓂᐊᓗᒃ ᐃᓕᓐᓂᐊᑎᑦᑎᔨᐅᓚᐅᖅᑐᖅ ᓄᓇᕗᒻᒥ, ᐃᓐᓇᐅᓂᕐᒥᓄᑦ ᓄᖅᑲᖓᓕᕐᖓᑦ. ᒥᑭᔫᑕᐅᓂᖅᐹᖑᓪᓗᖓ ᓇᑲᓱᒻᒥ ᐃᓕᓴᐃᔨᐅᓚᐅᖅᓯᒪᔪᖅ. ᑐᙵᓱᑦᑎᑦᑐᒪᒐᒃᑭᑦ ᑖᒃᑯᐊ. ᖁᔭᓐᓇᒦᒃ, ᐅᖃᖅᑏ. >>ᐸᒃᑕᑐᖅᑐᑦ

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 10 ᐅᖃᖅᑎ: ᑐᙵᓱᒋᑦᑎ ᒪᓕᒐᓕᐅᕐᕕᒻᒧᑦ. ᑲᑎᒪᔾᔪᑎᑦᑕ ᓈᓴᐅᑎᖓ 6, ᐅᖃᐅᓯᒃᑯᑦ ᐊᐱᖅᑯᑏᑦ. ᑭᓇ ᐱᒋᐊᕈᒪᕙ? ᖁᕐᓗᖅᑑᕐᒧᑦ ᒪᓕᒐᓕᐅᖅᑎ, ᖁᓕᒃᑖᓇ. ᑲᑎᒪᔾᔪᑎᒃᓴᖅ 6: ᐅᖃᐅᓯᒃᑯᑦ ᐊᐱᖅᑯᑏᑦ ᐊᐱᖅᑯᑦ 33 – 7(2): ᓯᕿᙳᔭᐅᑉ ᐊᓯᔾᔨᖅᑕᐅᕙᖕᓂᖓ ᓄᓇᕘᒥᑦ (ᖁᓕᒃᑖᓇ) ᖁᓕᒃᑖᓇ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖁᕐᓗᖅᑑᕐᒥᐅᑦ ᕼᐊᐃᕈᒪᕙᒃᑲ. ᐅᖃᖅᑏ, ᐊᐱᖅᑯᑎᒃᑲ ᑐᕌᖓᙳᓱᑦᑐᐃᑦ ᒪᓕᒐᓕᕆᔨᒃᑯᑦ ᒥᓂᔅᑕᖓᓄᑦ. ᐱᔾᔪᑎᖃᖅᑐᑎᓪᓗ ᓯᕿᕐᖑᔭᐅᑉ ᐊᓯᔾᔨᕐᓂᖓᓂᒃ ᓄᓇᕗᒻᒥ. ᐅᖃᖅᑏ, ᒥᓂᔅᑕ ᑕᐃᒪ ᖃᐅᔨᒪᒻᒪᑦ ᒪᓕᒐᓕᕆᔨᒃᑯᑦ ᐱᓕᕆᕕᖓᑦ ᑲᒪᔨᐅᒻᒪᑕ ᓄᓇᕗᒻᒥ ᓯᕿᕐᖑᔭᐅᑉ ᐊᓯᔾᔨᖅᑕᐅᖃᑦᑕᕆᐊᖃᕐᓂᖏᑕ ᒪᓕᒐᖏᓐᓂᒃ ᐱᖁᔭᕐᔪᐊᖅᑎᒍᑦ. ᑕᒪᓐᓇ ᓯᕿᕐᖑᔭᐅᑉ ᐊᓯᔾᔨᖅᑕᐅᖃᑦᑕᕐᓂᖓ ᐃᓱᒫᓗᒋᔭᐅᖃᑦᑕᓕᕐᖓᑦ ᖃᑦᑎᒻᒪᕆᓐᓄᑭᐊᖅ ᒪᓕᒐᓕᐅᖅᑎᐅᖃᑎᓐᓄᑦ ᐊᒻᒪᑦᑕᐅᖅ ᒪᓕᒐᓕᐅᖅᑎᐅᕙᓚᐅᖅᑐᓄᑦ ᓯᕗᓂᑦᑎᓐᓂ. ᓯᕿᕐᖑᔭᖅ ᐊᓯᔾᔨᕙᓪᓚᐃᓯᒪᙱᒻᒪᑦ ᓱᓕ. ᐅᖃᖅᑏ, ᐊᒥᓱᐊᓗᐃᑦ ᑲᓇᑕᒥ ᒐᕙᒪᖃᕐᕕᐅᔪᐃᑦ ᐃᓱᒪᔅᓴᖅᓯᐅᕈᑎᖃᕐᖓᑕ ᐊᒻᒪᓗ ᐃᓚᖏᑦ ᐲᖅᓯᒐᓱᑦᑐᑎᒃ ᓯᕿᕐᖑᔭᒥᒃ ᐊᓯᔾᔩᖃᑦᑕᖅᑎᑕᐅᓂᕐᒥᒃ. ᒥᓂᔅᑕ ᓇᓗᓇᐃᖅᓯᒍᓐᓇᖅᑳ ᐃᓱᒪᔅᓴᖅᓯᐅᕈᑎᖃᕐᒪᖔᑕ ᑖᔅᓱᒥᖓ ᓯᕿᕐᖑᔭᐅᑉ ᐊᓯᔾᔨᖅᑕᐅᓂᕆᖃᑦᑕᖅᑕᖏᓐᓄᑦ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐃᖅᑲᖅᑐᐃᔪᓕᕆᔨᒃᑯᓐᓄᑦ ᒥᓂᔅᑕ ᕼᐃᒃᔅ. ᐊᖓᔪᖅᖄᖅ ᔪᐊᔾ ᕼᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖁᔭᓐᓇᒦᖅᑕᕋ ᑖᓐᓇ ᒪᓕᒐᓕᐅᖅᑎ ᓴᖅᑭᑦᑎᖕᒪᑦ. ᐅᓄᖅᑐᐃᑦ ᒐᕙᒪᖃᕐᕕᐅᔪᑦ ᑲᓇᑕᒥ ᕿᒥᕐᕈᓇᓕᕐᒪᑕ ᓯᕿᕐᖑᔭᖏᓐᓂᒃ ᐊᓯᔾᔩᔪᒪᓪᓗᑎᒃ. ᐱᖓᓲᓕᖅᑲᖓᑎᓪᓗᒋᑦ ᐃᑲᕐᕋᐃᑦ ᐊᔾᔨᒌᙱᑦᑐᑦ ᐱᔭᕐᓂᕈᓐᓃᖃᑦᑕᕐᒪᑦ ᓄᓇᕗᒻᒥ. ᑕᐃᒪᓐᓇᐃᑦᑐᖅ ᐱᖁᔭᕐᓂᒃ ᐊᓯᔾᔩᔭᕆᐊᖃᕋᑦᑕ ᑕᐃᒪᓐᓇ ᑕᐃᒃᑯᐊ ᐅᐊᓕᓂᕐᒥᐅᑦ ᓲᕐᓗ ᓄᓇᑦᓯᐊᕐᒥᐅᑦ. ᐅᖃᖅᑏ, ᑕᐃᒪ ᑖᒃᑯᓂᖓ ᐱᖁᔭᕐᒥᖕᓂᒃ ᐊᓯᔾᔩᓚᐅᕐᒪᑕ ᐊᕐᕌᒍᑦ ᑕᓪᓕᒪᑦ ᐊᓂᒍᖅᑐᑦ ᑕᐃᒪᓐᓇ ᐋᖅᑭᒍᓐᓇᖁᓪᓗᒋᑦ ᓯᕿᕐᖑᔭᖏᑦ ᐊᓯᔾᔨᖃᑦᑕᖁᓇᒋᑦ ᒪᓕᒐᓕᕆᓂᕐᒧᑦ ᐃᖅᑲᓇᐃᔭᖅᑎᐅᔪᑦ. ᑕᐃᑲᓂ ᓄᓇᑦᓯᐊᕐᒥᐅᓂᑦ ᐅᖃᖃᑎᖃᖅᑐᑦ ᑕᒪᓐᓇ ᐅᖃᐅᓯᐅᓂᐊᕐᒪᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᓯᕗᓪᓕᖅᐹᕐᒥ ᐃᓚᒋᐊᕈᑏᑦ ᐊᐱᕆᒍᒃ, ᒥᔅᑕ ᖁᓕᒃᑖᓇ. ᖁᓕᒃᑖᓇ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖁᔭᓐᓇᒦᑦᑕᐅᖅ ᑭᐅᖕᒪᑦ. ᐅᖃᖅᑏ, ᒪᐃ 14, 2026−ᖑᑎᓪᓗᒍ ᐊᓪᐴᑕᒥ ᒐᕙᒪᒃᑯᖏᑦ ᑖᒃᑯᐊ ᑲᓇᑕᒥ ᒐᕙᒪᖃᕐᕕᐅᔪᑦ ᐊᓯᔾᔩᓚᐅᕐᒥᖕᒪᑕ ᓯᕿᕐᖑᔭᕐᒥᓂᒃ ᐊᓯᔾᔩᖃᑦᑕᔾᔮᕈᓐᓃᕐᓂᕋᖅᖢᑎᒃ. ᐅᖃᖅᑏ, ᑭᐅᑎᓪᓗᒋᑦ ᐊᓪᐴᑕᒥᐅᑦ ᐃᓱᒪᓕᐅᕈᑎᖓᑦ ᓄᖅᑲᖅᑎᑕᐅᖁᓪᓗᒍ ᐃᑲᕐᕋᓂᒃ ᐊᓯᔾᔨᖃᑦᑕᕐᓂᖅ ᓄᓇᑦᓯᐊᕐᒥᐅᓪᓗ ᑐᓴᖅᑎᑦᑎᓚᐅᕐᒪᑕ ᑕᐃᒪᓐᓇ ᐊᑐᔾᔮᕈᓐᓃᕐᒥᖕᒪᑕ ᓯᕿᕐᖑᔭᕐᒥᒃ ᐊᓯᔾᔩᖃᑦᑕᕐᓂᕐᒥᒃ. ᒥᓂᔅᑕ ᓇᓗᓇᐃᖅᓯᔪᓐᓇᖅᐹ ᐃᓱᒪᒃᓴᖅᓯᐅᕈᑎᖃᕐᒪᖔᑕ ᑕᒪᑐᒥᐊ ᐊᑐᕈᓐᓃᖁᓪᓗᒍ ᑕᐃᒃᑯᐊ ᐃᑲᕐᕋᓂᒃ ᐊᓯᔾᔩᖃᑦᑕᕐᓂᖅ ᐅᐱᕐᖔᒃᑯᑦ ᐅᑭᐊᒃᓵᒃᑯᓪᓗ ᐱᖃᓯᐅᑎᓪᓗᒍ ᓄᓇᑦᓯᐊᕐᒥᐅᓄᑦ ᐅᖃᖃᑎᖃᖅᐸᑦ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᒥᓂᔅᑕ ᒪᓕᒐᓕᕆᓂᕐᒧᑦ, ᒥᓂᔅᑕ ᕼᐃᒃᔅ. ᐊᖓᔪᖅᖄᖅ ᔪᐊᔾ ᕼᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᑖᒃᑯᐊ ᐅᓄᖅᑐᑦ ᑲᓇᑕᒥ ᑕᐃᒪᓐᓇ ᒐᕙᒪᖃᕐᕕᐅᔪᑦ ᓯᕿᕐᖑᔭᕐᒥᖕᓂᒃ ᐊᓯᔾᔩᖃᑦᑕᕈᒪᔪᓐᓃᖅᖢᑎᒃ ᐅᓄᖅᓯᕙᓪᓕᐊᑐᐃᓐᓇᕐᒪᑦ. ᐊᑑᑎᕐᒪᑦ ᑖᒃᑯᐊ

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 11 ᕿᒥᕐᕈᓇᒋᐊᒃᓴᖅ ᐊᑑᑎᖃᕐᒪᑕ ᖃᓄᖅ ᑕᐃᒃᑯᐊ ᐱᓕᕆᓐᓂᕐᒪᖔᑕ ᑕᐃᒃᑯᐊ ᐱᔭᕐᓂᙱᒻᒪᑕᒎᖅ ᑕᐃᒃᑯᐊ ᑭᓯᐊᓂ ᓲᕐᓗ ᓯᕐᖏᕐᖑᔭᖅ ᑖᓐᓇ ᐅᖄᓚᐅᑎᕋᓛᒦᑦᑐᖅ ᐊᓯᔾᔨᖃᑦᑕᕈᓐᓃᖅᑎᑦᑎᓐᓇᓱᒋᐊᖃᕐᒥᖕᒪᑦ. ᑕᐃᒪᓐᓇ ᐃᓕᓴᖅᓯᔪᓐᓇᕐᓂᐊᕐᒪᑕ ᖃᕆᓴᐅᔭᐃᑦ ᐃᑲᕐᕋᖏᓐᓂᒃ ᐊᒡᒍᖅᑐᖅᓯᒪᔪᑦ, ᓄᓇᕗᒻᒥᐅᑦ ᑖᒃᑯᐊ ᐱᖓᓲᓕᖅᑲᖓᖕᒪᑦ ᐱᔭᕐᓂᕈᓐᓃᕈᑎᒋᔪᑦ. ᐊᔾᔨᒌᙱᑦᑐᓂᒃ ᕿᒥᕐᕈᓇᒃᑐᒍᑦ ᖃᓄᖅ ᐊᑐᕈᓐᓃᖅᐸᓪᓕᐊᔪᓐᓇᕐᒪᖔᑕ ᑖᒃᑯᓂᖓ ᑕᐃᒪᓐᓇ ᐊᑐᕐᓂᖅᓴᐅᖁᓪᓗᒋᑦ ᓂᒋᖅᐸᓯᑦᑎᓐᓃᑦᑐᓂᒃ ᑕᐃᒃᑯᐊᓕ ᐱᖓᓱᓂᑦᑕᐅᖅ ᐊᐅᓪᓚᑲᑕᒋᐊᖃᖃᑦᑕᕐᒪᑕ ᐃᑲᕐᕋᖏᑦ ᐊᔾᔨᒌᙱᑦᑐᑦ ᓲᕐᓗ ᐋᓐᓂᐊᕆᐊᖅᑐᕐᓗᑎᒃ ᐊᐅᓪᓚᖃᑦᑕᖅᑐᑦ ᑖᒃᑯᐊ ᐅᖃᖃᑎᒌᖕᓂᖅ ᑕᒪᓐᓇ ᐱᒻᒪᕆᐅᕗᖅ. ᖃᓄᖅ ᐊᑐᓕᖅᑎᑦᑎᔪᓐᓇᕐᒪᖔᑕ ᑖᒃᑯᓂᖓ ᐊᒻᒪᓗᑦᑕᐅᖅ ᓂᕆᐅᑦᑎᐊᖅᐳᖓ ᐅᖃᖃᑎᖃᕆᐊᒃᓴᖅ ᑖᒃᑯᓂᖓ. ᒪᕐᕈᐊᖅᑎ ᑲᑎᒪᖃᑦᑕᖅᓯᒪᓕᕋᒪ ᑕᐃᒃᑯᐊᓗ ᖃᓂᒋᔭᑦᑎᓐᓂ ᓄᓇᖃᖅᑐᑦ ᑕᐃᒪᓐᓇ ᐊᑐᖅᐸᓪᓕᐊᓕᖅᑎᓪᓗᒋᑦ ᐱᒻᒪᕆᐅᔪᒃᑯᑦ ᐃᓱᒪᒃᓴᖅᓯᐅᕈᑎᒋᔭᕆᐊᖅᑰᖅᑕᕗᑦ ᑕᒪᓐᓇ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ (ᑐᓵᔨᑎᒍᑦ): ᑭᖑᓪᓕᖅᐹᖅ ᐊᐱᖅᑯᑏᑦ, ᒥᔅᑕ ᖁᓕᒃᑖᓇ. ᖁᓕᒃᑖᓇ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖁᔭᓐᓇᒦᑦᑕᐅᖅ ᒥᓂᔅᑕ ᑭᐅᖕᒪᑦ. ᐅᖃᖅᑏ, ᖃᐅᔨᒪᔪᐃᓐᓇᐅᒐᑦᑕ ᓄᓇᕗᒻᒥ ᐊᖏᓂᖅᐹᖑᖕᒪᑦ ᑲᓇᑕᒥ ᐊᒡᒍᖅᑐᖅᓯᒪᓂᖏᓐᓂ 1/5−ᒋᓪᓗᓂᐅᒡᓗ ᑲᓇᑕᐅᑉ ᓄᓇᖓᑕ. ᐱᖓᓱᓂᒃ ᐊᔾᔨᒌᙱᑦᑐᓂᒃ ᐃᑲᕐᕋᖃᐅᕐᒪᑕ. ᐅᖃᖅᑏ, ᐊᓯᔾᔨᖅᑕᐅᒃᐸᑕ ᑖᒃᑯᐊ ᐊᒃᑐᐃᓂᖃᕐᒪᑕ ᓯᕿᕐᖑᔭᖅ ᐊᓯᔾᔨᕆᐊᖃᖅᑎᓪᓗᒍ ᓄᓇᕗᒻᒥᐅᓂᒃ ᐃᓅᓯᖏᓐᓂᒡᓗ ᐊᖑᓇᓱᒃᑏᑦ, ᐃᖃᓪᓕᐊᖅᑏᓪᓗ ᓯᕿᓂᕐᒥᒃ ᒪᓕᖃᑦᑕᕐᒪᑕ ᐊᒻᒪ ᐃᒪᐅᑉ ᐅᓕᑉᐸᓪᓕᐊᓂᖏᓐᓂᒃ ᓯᕿᕐᖑᔭᕐᒥᒃ ᐊᑐᙱᖔᖅᖢᑎᒃ. ᐅᖃᖅᑏ, ᓄᓇᕕᒡᓗ, ᓄᓇᑦᓯᐊᕐᒥᐅᓪᓗ ᑖᒃᑯᓂᖓ ᖃᐅᔨᓴᐃᓚᐅᕐᒪᑕ ᐊᑐᕈᓐᓃᖁᓪᓗᒋᑦ ᐃᑲᕐᕋᕐᒥᒃ ᐊᓯᔾᔩᖃᑦᑕᕐᓂᕐᒥᒃ. ᒥᓂᔅᑕ ᐱᓕᕆᕕᖓ ᑖᒃᑯᓂᖓ ᖃᐅᔨᓴᕈᓐᓇᕐᓂᐊᖅᐸ ᑐᓴᒃᑲᓐᓂᕋᓱᒡᓗᓂ ᓄᓇᕗᒻᒥᐅᑦ ᖃᓄᖅ ᐃᓱᒪᖕᒪᖔᑕ ᐊᑐᕈᓐᓃᖁᓪᓗᒋᑦ ᓯᕿᕐᖑᔭᕐᒥᒃ ᐊᓯᔾᔩᖃᑦᑕᕐᓂᐅᔪᖅ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᒥᓂᔅᑕ ᒪᓕᒐᓕᕆᓂᕐᒧᑦ, ᒥᓂᔅᑕ ᕼᐃᒃᔅ. ᐊᖓᔪᖅᖄᖅ ᔪᐊᔾ ᕼᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐃᓛᒃ, ᑕᐃᒪᓐᓇ ᐅᓄᑲᓪᒪᒃᑐᖅᑲᐃ ᐅᖃᖃᑦᑕᖅᓯᒪᖕᒪᑕ ᐅᕙᓐᓄᑦ ᑕᒪᓐᓇ ᐱᔾᔪᑎᒋᓪᓗᒍ. ᐊᓯᔾᔩᖃᑦᑕᕋᑦᑕ ᓯᕿᕐᖑᔭᑦᑎᓐᓂᒃ ᐃᑲᕐᕋᕐᒧᑦ ᐊᕐᕌᒍ ᒪᕐᕈᐊᖅᑎᖅ ᐊᒻᒪᑦᑕᐅᖅ ᑐᓴᕋᓱᐊᕐᓂᖅ ᑖᓐᓇ ᐃᓚᒋᒐᔭᖅᑕᖓ ᑕᒪᑐᒥᖓ ᐊᓯᔾᔩᓂᐊᖅᑎᓪᓗᑕ ᑐᓴᕋᓱᐊᕐᓂᖃᕆᐊᖃᕋᑦᑕ ᐸᕐᓇᐅᑎᓕᐅᕆᐊᖃᕋᑦᑕ ᖃᓄᖅ ᓯᕗᒧᐊᒍᓐᓇᕐᒪᖔᑦᑕ ᖃᓄᕐᓗ ᐊᑐᓕᖅᑎᑕᐅᔪᓐᓇᕋᔭᕐᒪᖔᑦ ᑕᒪᓐᓇ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ (ᑐᓵᔨᑎᒍᑦ): ᒥᔅᑕ ᖁᓕᒃᑖᓇ, ᐱᕖᕋᕕᑦ ᒫᓐᓇ ᐊᐱᖅᓱᕐᓂᖅ ᐊᓯᐊᓄᑦ ᐊᐱᖅᓱᖅᑎᑦᑎᓂᐊᓕᖅᐳᖓ. ᐅᖅᑯᕐᒥᐅᓄᑦ ᒪᓕᒐᓕᐅᖅᑎ, ᒥᔅᑕ ᑲᐅᑐᒃ. ᐊᐱᖅᑯᑦ 34 – 7(2): ᐱᓕᕆᐋᖏᓄᑦ ᓄᓇᕘᑉ ᐃᒡᓗᓕᕆᔨᕐᔪᐊᒃᑯᑦ ᑎᒥᖓ (ᑲᐅᑐᒃ) ᑲᐅᑐᒃ: ᐅᓐᓄᓴᒃᑯᑦ ᓄᓇᖅᑲᑎᒃᑲ ᐊᒻᒪᓗ ᕿᑭᖅᑕᕐᔪᐊᕐᒥᐅᑦ. ᖁᔭᓐᓇᒦᒃ, ᐅᖃᖅᑎᑦᑎᔩ. (ᑐᓵᔨᑎᒎᓕᖅᑐᖅ) ᐊᐱᖅᑯᑎᒃᑲ ᐅᓪᓗᒥ ᒥᓂᔅᑕᒧᑦ ᑲᒪᔪᖅ ᑖᒃᑯᓄᖓ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ. ᐅᖃᖅᑏ, ᐊᐱᖅᓲᑎᒋᓂᐊᖅᑕᓐᓂᒃ ᐊᐱᖅᑯᑎᖃᒃᑲᓐᓂᕈᒪᔪᖓ ᒥᓂᔅᑕᒥᒃ ᐃᑉᐸᒃᓴᖅ ᑲᑎᒪᕐᔪᐊᖅᑎᓪᓗᑕ. ᒥᓂᔅᑕ ᐃᖅᑲᐅᒪᔪᒃᓴᐅᖕᒪᑦ ᐊᐱᖅᑯᑎᖃᓚᐅᕋᒪ ᖃᖓ ᐊᖏᖃᑎᒌᒍᑎ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ ᐊᑎᓕᐅᖅᑕᐅᓐᓂᕐᒪᖔᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᑮᓇᐅᔭᖃᖅᑎᑕᐅᓂᖅ ᓄᓇᕗᑦ ᑐᙵᕕᒃᑯᓐᓄᓪᓗ ᑖᒃᑯᐊ ᐊᑖᒍᑦ ᑲᓇᑕᒥ ᐱᕈᖅᓴᐃᓂᕐᒧᑦ ᐊᖏᕐᕋᓕᐅᕐᓂᐅᒧᑦ ᐱᓕᕆᔭᐅᔪᖅ ᒪᓕᒐᓕᐅᕐᕕᖕᒥ ᓴᖅᑭᑕᐅᖁᓪᓗᒍ ᐃᓕᔭᐅᓂᐊᕐᒪᑦ ᐃᒡᓗᓕᕆᔨᕐᔪᐊᒃᑯᑦ ᓄᓇᕗᒻᒥ ᖃᕆᓴᐅᔭᒃᑯᑦ ᐃᑭᐊᖅᑭᕕᐊᓂ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 12 ᒥᓂᔅᑕᒧᑦ ᑭᒡᒍᓯᖃᓚᐅᕐᒪᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᒡᒎᖅ ᐊᖏᖅᑕᐅᖅᑳᕆᐊᖃᕐᒪᑕ ᐊᑎᓕᐅᖃᑕᐅᓯᒪᔪᓂᒃ ᑐᓴᒐᒃᓴᐃᑦ ᑖᒃᑯᐊ ᐊᑐᐃᓐᓇᕈᖅᑕᐅᖁᓪᓗᒋᑦ. ᐅᖃᖅᑏ, ᖃᓄᐃᒻᒪᑭᐊᖅ ᐃᓗᓕᕆᔭᖏᑦ ᑕᒪᒃᑯᐊ ᐱᒻᒪᕆᐅᔪᑦ ᑮᓇᐅᔭᖃᖅᑎᑦᑎᓂᕐᒧᑦ ᐊᖏᕈᑎᓂ ᖃᓄᐃᒻᒪᑦ ᑲᙳᓇᖅᑑᕙᑦ? ᒥᓂᔅᑕ ᐊᐱᕆᔪᓐᓇᖅᐸ ᒐᕙᒪᑐᖃᒃᑯᑦ ᒥᓂᔅᑕᖓᓐᓂᒃ ᑐᙵᕕᒃᑯᓐᓂᒡᓗ ᐊᖏᖃᑎᒌᒍᑎ ᑖᓐᓇ ᓴᖅᑭᑕᐅᖁᓪᓗᒍ ᑮᓇᐅᖃᖅᑎᑦᑎᓂᕐᒧᑦ ᑐᕌᒐᖓᔪᖅ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐃᓪᓗᓕᕆᔨᕐᔪᐊᒃᑯᓐᓄᑦ ᒥᓂᔅᑕ ᓚᐃᔪᓪ. ᐊᖓᔪᖅᑳᖅ ᓯᓯᐅᓪ ᓚᐃᔪᓪ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖁᔭᓐᓇᒦᖅᐸᕋᑦᑕᐅᖅ ᐊᐱᕆᖕᒪᑦ ᑲᑎᒪᔨ. ᑖᒃᑯᐊ ᑕᐃᒪᓐᓇᐃᑦᑐᑦ ᐊᖏᖃᑎᒌᒍᑏᑦ ᑕᖅᑲᒃᑯᓄᖓ ᓴᖅᑭᑕᐅᒐᔪᐃᑦᑑᖕᒪᑕ. ᓴᖅᑭᑕᐅᕙᙱᑦᑐᓪᓗ ᒪᓕᒐᓕᐅᕐᕕᖕᒥ. ᑖᓐᓇ ᐊᖏᖃᑎᒌᖑᖕᒪᑦ ᐊᑕᐅᑦᑎᒃᑯᑦ ᑭᓯᐊᓂ ᐃᓄᑑᓗᑕ ᐊᖏᖃᑎᒌᒍᑎᒋᙱᓐᓇᑦᑎᒍ ᑕᐃᒃᑯᐊ ᐊᖏᖅᑳᕆᐊᖃᕐᒪᑕ ᑲᓇᑕᒥ ᒐᕙᒪᒃᑯᖏᑦ. ᐃᓚᖏᓐᓂᒃ ᓴᖅᑭᑦᑎᔪᓐᓇᕋᓗᐊᖅᑐᒍᑦ ᐊᖏᕈᑎᓂᒃ ᑭᓯᐊᓂ ᑕᐃᒃᑯᐊ ᖃᔅᓯᐅᖕᒪᖔᑕ ᑮᓇᐅᔭᐃᑦ ᐱᔭᐅᓂᐊᖅᑐᑦ ᓴᖅᑭᑦᑐᓐᓇᙱᓐᓇᑦᑎᒍᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐃᓚᒋᐊᕈᑏᑦ ᐊᐱᕆᒍᑦ, ᒥᔅᑕ ᑲᐅᑐᒃ. ᑲᐅᑐᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᒥᓂᔅᑕ ᐃᖅᑲᐅᒪᔪᒃᓴᐅᖕᒥᖕᒪᑦ ᒪᓕᒐᓕᐅᕐᕕᖕᒥ ᐊᖏᖅᓯᓚᐅᕐᒪᑕ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᑐᕈᒫᖅᑕᖏᑦ 2026-2027 ᐊᑭᑐᔪᓄᑦ. ᐊᑎᖅᑕᐅᕋᑖᓚᐅᕐᒪᑦ ᐅᑭᐅᒃᑯᑦ ᑲᑎᒪᕐᔪᐊᖅᑎᓪᓗᑕ. ᑕᐃᔅᓱᒪᓂ ᒥᓂᔅᑕ ᐅᖃᓚᐅᖅᓯᒪᖕᒪᑦ ᐃᒡᓗᓕᕆᔨᕐᔪᐊᒃᑯᒡᒎᖅ ᐸᕐᓇᒃᓯᒪᖕᒪᑕ ᓇᑉᐸᖅᑎᕆᓂᕐᒧᑦ ᑳᓐᑐᕌᒃᒧᑦ 180−ᓄᑦ ᐃᒡᓗᒃᓴᐅᓂᐊᖅᑐᓄᑦ ᐊᒻᒪ ᐃᖅᑲᓇᐃᔭᖅᑎᓄᑦ ᐃᒡᓗᒃᓴᐅᓂᐊᖅᑐᓄᑦ 2026−ᒥ. ᑕᐃᔅᓱᒪᓂ ᐅᖃᓚᐅᕐᒪᑦ ᑕᐃᒪᓐᓇ ᐃᑉᐸᒃᓴᖅ ᒪᓕᒐᓕᐅᖅᑏᑦ ᑲᑎᒪᑎᓪᓗᒋᑦ ᒥᓂᔅᑕ ᐅᖃᓚᐅᕐᒪᑦ ᐅᑎᕐᕕᒋᓂᐊᖅᑕᖓ ᑐᓴᒐᒃᓴᐃᑦ ᓄᓇᓖᑦ ᖃᔅᓯᓂᒃ ᐃᒡᓗᑖᖅᑎᑕᐅᓂᐊᕐᒪᖔᑕ. ᐅᖃᖅᑏ, ᐅᑉᐱᕈᓱᒃᑐᖓ ᐃᓘᓐᓇᖏᑦ ᒪᓕᒐᓕᐅᖅᑎᐅᖃᑕᐅᔪᑦ ᖃᐅᔨᒪᕆᐊᖃᕋᓗᐊᕐᒪᖔᑕ ᐊᑐᓂ ᖃᔅᓰᑦ ᐊᑐᓂ ᐃᒡᓗᑖᖅᑎᑕᐅᓂᐊᕐᒪᖔᑕ ᓄᓇᓕᖕᓂ ᐊᒻᒪ ᑭᓇᒃᑯᓐᓄᑦ ᓇᑉᐸᖅᑎᑕᐅᓂᐊᕐᒪᖔᑕ. ᒥᓂᔅᑕ ᐊᖏᕈᓐᓇᖅᐸ ᒪᓕᒐᓕᐅᕐᕕᖕᒥ ᓴᖅᑭᑦᑎᔪᓐᓇᕐᒪᖔᑦ ᐅᐱᕐᖔᒃᑯᑦ ᑲᑎᒪᕐᔪᐊᕐᓂᖅ ᐊᓂᒍᓚᐅᖅᑳᖅᑎᓐᓇᒍ? ᖁᔭᓐᓇᒦᒃ. ᐅᖃᖅᑎ: ᐃᒡᓗᓕᕆᔨᕐᔪᐊᒃᑯᓐᓄᑦ ᒥᓂᔅᑕ ᓚᐃᔪᓪ. ᐊᖓᔪᖅᑳᖅ ᓯᓯᐅᓪ ᓚᐃᔪᓪ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖁᔭᓐᓇᒦᖅᐸᕋᓗ ᑲᑎᒪᔨ ᑖᔅᓱᒧᖓ ᐊᐱᖅᑯᑎᖃᕐᒪᑦ. ᐃᒡᓗᑖᕈᑕᐃᑦ ᑐᓂᔭᐅᓂᐊᖅᑐᑦ ᐃᒡᓗᒃᓴᐃᑦ ᓱᓕ ᒫᓐᓇᐅᔪᖅ ᑐᓂᔭᐅᓇᓱᖕᒪᑕ ᓱᓕ ᑳᓐᑐᕌᒃ. ᐊᕐᕌᒍᒋᔭᑦᑎᓐᓄᑦ ᐊᑐᖅᑕᐅᓂᐊᖅᑐᖅ ᑳᓐᑐᕌᒃᑕᐅᓯᒪᔪᓪᓗ ᑕᒪᒃᑯᐊ ᓴᖅᑭᑕᐅᓂᐊᕐᒪᑕ ᑳᓐᑐᕌᒃ ᐊᕐᕌᒍᑕᒫᖅᓯᐅᑏᑦ ᓴᖅᑭᑦᑎᖃᑦᑕᕐᓂᕐᒧᑦ ᑳᓐᑐᕌᒃᑕᐅᓯᒪᔪᓂᒃ ᑕᐃᑰᓇ ᓴᖅᑭᑕᐅᓛᖅᑐᑦ. ᓴᖅᑭᑦᑎᓇᓱᓕᕈᑦᑕ ᒪᓕᒐᓕᐅᕐᕕᑦ ᑖᓐᓇ ᐅᐱᕐᖔᒃᑯᑦ ᑲᑎᒪᓂᖓᑕ ᐊᓯᐊᒍᑦ ᑭᓯᐊᓂ ᑖᒃᑯᐊ ᑳᓐᑐᕌᒃ ᐃᓚᖏᓪᓗ ᑐᓂᔭᐅᓯᒪᙱᒻᒪᑕ. ᒫᓐᓇ ᑐᓴᒐᒃᓴᐃᑦ ᐱᓯᒪᔭᐃᓐᓇᕆᙱᔾᔪᑎᒋᔭᒃᑲ. ᑐᕌᒐᒃᓴᖃᖅᑐᒍᑦ ᐃᒡᓗᓕᕆᔨᒃᑯᑦ ᐃᒡᓗᖁᑎᒃᓴᖏᓐᓂᒃ ᕿᑭᖅᑖᓗᖕᒥ ᓴᓇᔭᐅᓂᐊᖅᑐᑦ ᑐᕌᒐᒃᓴᖃᖅᑐᒍᑦ 96−ᓂᒃ ᐃᒡᓗᓕᐅᕈᒪᓪᓗᑕ. ᑭᕙᓪᓕᕐᒥ 23−ᓂᒃ, ᕿᑎᕐᒥᐅᓂᓗ 40−ᓂᒃ. ᑲᑎᒃᖢᒋᑦ ᐃᒡᓗᓕᕆᔨᒃᑯᑦ ᐃᒡᓗᒃᓴᖏᑦ 159−ᖑᓂᐊᖅᑐᑦ. ᑕᐃᒪᓕ ᑐᓴᒐᒃᓴᐃᑦ ᐅᓄᖅᓯᒃᑲᓐᓂᖅᐸᑕ ᐊᑎᓕᐅᖅᑕᐅᒃᐸᑕᓗ ᑳᓐᑐᕌᒃ ᑐᓂᔪᓐᓇᕐᓂᐊᖅᑕᒃᑲ ᒪᓕᒐᓕᐅᖅᑎᓄᑦ ᑭᓯᐊᓂ ᐋᔩᖃᑎᒋᒐᑦᑎᒍᑦ ᓱᓕ ᑳᓐᑐᕌᓂᒃ ᐱᓇᓱᒐᓱᒍᑎᐅᔪᑦ ᑕᐃᒪᓐᓇ ᑐᓴᒐᒃᓴᓂᒃ ᐱᓯᒪᙱᓚᒃᑲ ᑳᓐᑐᕌᒃᑕᐅᓯᒪᖕᒪᖔᑕ ᑭᓇᒃᑯᑦ. ᖁᔭᓐᓇᒥᒃ, ᐅᖃᖅᑏ. ᐅᖃᖅᑎ: ᓯᕗᓪᓕᖅᐹᖅ ᐊᐱᖅᑯᑎᒋᔭᐃᑦ, ᒥᔅᑕ ᑲᐅᑐᒃ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 13 ᑲᐅᑐᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖁᔭᓐᓇᒦᑦᑕᐅᖅ, ᒥᓂᔅᑕ ᑭᐅᒐᕕᑦ. ᐃᑉᐸᒃᓴᖅ ᑲᑎᒪᕐᔪᐊᖅᑎᓪᓗᑕ ᒥᓂᔅᑕ ᐅᖃᓚᐅᕐᒪᑦ ᐅᓄᑲᓪᓚᒃᑐᓂᒎᖅ ᓄᑖᓂᒃ ᐃᒡᓗᓕᐅᕐᓂᐊᕐᒪᑕ ᑕᐃᒃᑯᐊ ᐃᕕᖅᑎᑐᐃᓐᓇᕆᐊᓖᑦ ᐃᒡᓗᐃᑦ. ᖃᓄᐃᒻᒪᑭᐊᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑕᐃᒪᓐᓇᐃᑦᑐᓂᒃ ᓴᓇᓇᓱᒃᐸᑦ ᓂᐅᕕᖅᖢᑎᒃ ᐃᕕᖅᑎᑐᐃᓐᓇᕆᐊᓕᖕᓂᒃ ᐊᒻᒪᓗᑦᑕᐅᖅ ᓇᓗᓇᐃᖅᓯᓗᑎᒃ ᖃᓄᖅ ᐊᔾᔨᖃᙱᑎᒋᖕᒪᖔᑦ ᐃᒡᓗᓕᐅᕈᓯᕆᕙᓚᐅᖅᑐᑦ ᐊᒻᒪ ᐊᑭᖏᓐᓂᒃ ᐊᒻᒪ ᐃᓄᖕᓂᒃ ᐃᖅᑲᓇᐃᔭᖅᑎᖃᕐᓂᕐᒧᑦ? ᖃᓄᖅ ᐊᔾᔨᒋᙱᑎᒋᕙ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᒥᓂᔅᑕ ᐃᒡᓗᓕᕆᔨᕐᔪᐊᒃᑯᓐᓄᑦ, ᒥᔅ ᓚᐃᔪᓪ ᐊᖓᔪᖅᑳᖅ ᓯᓯᐅᓪ ᓚᐃᔪᓪ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖁᔭᓐᓇᒦᖅᐸᕋᑦᑕᐅᖅ ᑖᓐᓇ ᐊᐱᕆᖕᒪᑦ ᑲᑎᒪᔨ. ᑭᖑᓂᑦᑎᓐᓂ ᐊᑐᖅᑕᐅᕙᓚᐅᖅᑐᑦ ᑕᐃᒃᑯᐊ ᐃᒡᓗᐃᑦ ᐃᕕᖅᑎᑐᐃᓐᓇᕆᐊᓖᑦ ᓇᑉᐸᖅᑎᑐᐃᓐᓇᕆᐊᓖᑦ ᐊᑐᖅᑕᐅᕙᓚᐅᙱᒻᒪᑕ ᓄᓇᕗᒻᒥ ᐃᒡᓗᓕᕆᔨᒃᑯᑦ ᐃᒡᓗᖁᑎᒃᓴᖏᓐᓄᑦ. ᑖᓐᓇ ᑲᑎᒪᔨᐅᑉ ᐅᖃᐅᓯᕆᕋᑖᖅᑕᖓ ᒪᓕᒡᓗᒍ. ᓄᓇᓕᖕᓂᙶᖅᑐᓂᒃ ᐃᖅᑲᓇᐃᔭᖅᑎᑖᕐᓂᖅ ᓴᓇᔭᐅᓂᐊᕐᒪᑕ ᐃᒡᓗᐃᑦ ᓄᓇᕗᑦ ᓯᓚᑖᓂ ᓇᑉᐸᖅᑎᖅᑕᐅᕙᒌᖅᓯᒪᓗᑎᒃ, ᓇᑉᐸᖅᑎᖅᑕᐅᓚᐅᕐᓗᑎᒃ. ᑲᓇᑕᒥ ᐊᖏᕐᕋᓕᕆᔨᒃᑯᑦ ᐃᓚᖏᓐᓂᒃ ᑲᓇᑕᒥ ᐃᒡᓗᓕᕆᔨᕐᔪᐊᒃᑯᑦ ᐃᒡᓗᓕᐅᕆᓐᓂᕐᒪᑕ ᓇᑉᐸᖅᑎᑐᐃᓐᓇᕆᐊᓕᖕᓂᒃ. ᑖᒃᑯᐊ ᓇᑉᐸᖅᑎᑐᐃᓐᓇᕆᐊᓖᑦ ᐃᒡᓗᐃᑦ ᐊᑭᑭᓐᓂᖅᓴᐅᖕᒪᑕ ᑕᐃᒃᑯᓇᙵᑦ ᓴᓇᔭᕆᐊᑐᙱᓐᓂᖅᓴᐅᓪᓗᑎᒡᓗ ᐃᒡᓗᓕᐅᕈᑕᐅᕙᓚᐅᖅᑐᓂᒃ. ᑕᐃᒪᓐᓇ ᐃᖅᑲᓇᐃᔭᖅᑎᓂᒃ ᐊᑐᙱᓐᓂᖅᓴᐅᕗᑦ ᓄᓇᕗᒻᒥᙶᖅᑐᓂᒃ. ᑖᒃᑯᐊ ᐃᒡᓗᒌᖕᓂᖏᑦ ᖃᓄᖅ ᖃᐅᓴᖅᖢᑎᒍᑦ ᓄᓇᕗᒻᒥ ᐊᑑᑎᖃᕐᒪᖔᑦ. ᒫᓐᓇ ᕿᒥᕐᕈᓇᒃᑐᒍᑦ ᑳᓐᑐᕌᒃᑕᐅᔪᑦ ᑕᐃᒪᓐᓇᐃᑦᑐᓂᒃ ᐃᒡᓗᓕᐅᖅᑐᑦ. ᐊᔾᔨᒌᙱᑦᑐᓂᒃ ᐃᕕᖅᑎᑐᐃᓐᓇᕆᐊᓕᖕᓂᒃ ᓇᑉᐸᖅᑎᑐᐃᓐᓇᕆᐊᓕᖕᓂᒃ ᐃᒡᓗᓕᐅᖅᑎᓪᓗᒋᑦ ᓴᓇᔭᐅᓂᐊᖅᑎᓪᓗᒋᑦ ᓇᑉᐸᖅᑎᖅᑕᐅᓗᑎᒃ ᓄᓇᕗᒻᒥ ᐊᑐᐃᓐᓇᕈᖅᑕᐅᒃᐸᑕ ᓴᓇᔭᐅᖃᑦᑕᓕᖅᐸᑕ ᓄᓇᕗᒻᒥ ᐊᑐᓕᕈᑦᑎᒍᑦ ᐃᒡᓗᓕᕆᔨᕐᔪᐊᒃᑯᓪᓗ ᑕᒪᑐᒥᖓ ᕿᒥᕐᕈᓇᒃᑐᒍᑦ. ᕿᒥᕐᕈᓇᒃᑐᒍᑦ ᐊᑐᕐᓂᖅᓴᐅᔪᒪᓪᓗᑕ ᓇᑉᐸᖅᑎᑐᐃᓐᓇᕆᐊᓕᖕᓂᒃ ᓴᓇᕙᒌᖅᓯᒪᔪᓂᒃ ᐃᒡᓗᓂᒃ ᓄᓇᕗᒻᒥ ᓇᑉᐸᖅᑎᕆᖃᑦᑕᖁᓪᓗᒋᑦ ᐃᒡᓗᓕᕆᔨᒃᑯᑦ ᐃᒡᓗᖏᓐᓄᑦ ᐃᖅᑲᓇᐃᔭᖅᑏᓪᓗ ᐃᒡᓗᒋᔭᖏᑦ, ᐃᒡᓗᖁᑎᒋᔭᖏᓐᓄᑦ. ᑕᒪᓐᓇ ᕿᒥᕐᕈᓇᒃᑕᕗᑦ. ᖁᔭᓇᒦᒃ, ᐅᖃᖅᑏ. ᐅᖃᖅᑎ: ᐅᖃᐅᓯᒃᑯᑦ ᐊᐱᖅᑯᑏᑦ. ᐃᖃᓗᒃᑑᑦᓯᐊᕐᒧᑦ ᒪᓕᒐᓕᐅᖅᑎ, ᐲᑕᓴᓐ. ᐊᐱᖅᑯᑦ 35 – 7(2): ᐋᓐᓂᐊᖅᑐᓕᕆᓂᕐᒧᑦ ᐱᔨᑦᑎᐅᑎᖏᑦ ᐃᖃᓗᒃᑑᑦᑎᐊᕐᒥ (ᐲᑕᓴᓐ) ᐲᑕᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐅᐊᑦᑎᐊᖅ ᐅᖃᐅᓯᖃᖅᑲᐅᒐᒪ ᒥᓂᔅᑕᖓᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᐱᖅᓱᕈᒪᓪᓗᖓ ᐃᑉᐸᒃᓴᖅ ᕿᒥᕐᕈᓐᓇᓚᐅᕋᑦᑕ ᐱᓕᕆᕝᕕᐅᑉ 2026−2027−ᒧᑦ ᐊᑐᕈᒫᖅᑕᖏᓐᓂᒃ. ᑲᑎᒪᔾᔪᑎᖃᓚᐅᕋᑦᑕ ᐊᖏᓂᖅᐹᓂᒃ ᐅᓄᕐᓂᖅᐹᓂᒃ ᑮᓇᐅᔭᖅᑖᕐᓂᐊᖅᖢᑎᒃ ᐱᓕᕆᕕᐅᔪᓂᑦ. ᑖᒃᑯᐊ ᐋᖅᑭᒃᓱᐃᖁᓪᓗᒍ ᐃᓅᓕᓴᐃᓂᕐᒧᑦ ᐋᓐᓂᐊᖅᑐᓕᕆᓂᕐᒧᑦ. ᑕᐃᒃᑯᐊᓗ ᑎᑭᑎᑕᐅᖃᑦᑕᖅᑐᑦ ᐋᓐᓂᐊᓯᐅᖅᑏᑦ ᓘᒃᑖᓪᓗ ᐊᑐᖅᑕᐅᖃᑦᑕᕐᒪᑕ ᐃᓅᓕᓴᐃᓂᐊᕐᓗᑎᒃ. ᓄᓇᑦᑎᓐᓃᖃᑦᑕᕐᒪᑕ ᕿᓚᒥᕈᓗᒃ ᖃᐅᔨᒪᑦᑎᐊᙱᔾᔪᑎᒋᔭᖓ ᐋᓐᓂᐊᖅᑐᑦ ᖃᓄᖅ ᐋᓐᓂᐊᖃᑦᑕᕐᒪᖔᑦ. ᐅᖃᖅᑏ, ᐃᓕᓴᖅᓯᕗᖓ ᑐᑭᓯᓪᓗᖓ ᐱᔭᕐᓂᖅᑐᒥᒃ ᐋᖅᑭᒋᐊᕈᑎᖃᕐᒪᑦ. ᐱᑕᖃᕐᓂᖅᐸᑦ ᐊᑐᖅᑕᐅᓕᕇᕋᔭᖅᑐᖅ. ᐊᐱᖅᑯᑎᒐ ᓯᕗᓪᓕᖅᐹᖅ, ᖃᓄᕐᓕ ᐱᓕᕆᕕᓯ ᐃᖅᑲᓇᐃᔭᖃᑦᑕᖅᐸ ᓄᓇᕗᒻᒥ ᓯᓚᑦᑐᖅᓴᕐᕕᖕᒥ ᖃᓪᓗᓈᑦ

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 14 ᓄᓇᖓᓂᓗ ᐃᓕᓐᓂᐊᕐᕕᖕᓂ ᐅᓄᖅᓯᒋᐊᖁᓪᓗᒋᑦ ᐃᓄᐃᑦ ᐋᓐᓂᐊᓯᐅᑏᑦ ᖃᓄᐃᓕᐅᕈᑕᐅᖕᒪᖔᑕ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᒥᓂᔅᑕ ᐳᕉᔅᑐ. ᐊᖓᔪᖅᑳᖅ ᔮᓇᑦ ᐱᑦᓯᐅᓛᖅ ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖁᔭᓐᓇᒦᖅᐸᕋᓗ ᑲᑎᒪᔨ ᑖᔅᓱᒥᖓ ᐊᐱᖅᑯᑎᖃᕐᒪᑦ. ᖃᐅᔨᒪᔪᐃᓐᓇᐅᒐᔅᓯ ᐋᓐᓂᐊᓯᐅᖅᑎᕈᕆᐅᖅᓴᕐᓂᕐᒧᑦ ᐃᓕᓐᓂᐊᖅᑎᑦᑎᖕᒪᑕ ᓯᓚᑦᑐᖅᓴᕐᕕᖕᒥ. ᑖᓐᓇ ᐱᒻᒪᕆᐅᓂᖅᐹᖑᔪᖅ ᐱᔾᔪᑎᐅᔪᓂ. ᐃᓕᓐᓂᐊᖅᑎᑦᑎᓂᕐᒧᑦ ᐃᖅᑲᓇᐃᔭᖅᑎᑖᕋᓱᖕᓂᕐᒧᓪᓗ ᐋᓐᓂᐊᓯᐅᑎᓂᒃ ᓄᓇᕗᒻᒥ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ (ᑐᓵᔨᑎᒍᑦ): ᓯᕗᓪᓕᖅᐹᒥ ᐊᐱᖅᑯᑏᑦ, ᒥᔅᑕ ᐲᑕᓴᓐ. ᐲᑕᓴᓐ (ᑐᓵᔨᑎᒍᑦ): ᖁᔭᓐᓇᒦᒃ. ᑖᒃᑯᓇᓂ ᐅᓂᒃᑳᓂ ᑐᓴᖃᑦᑕᖅᓯᒪᔪᒍᑦ ᐃᖅᑲᓇᐃᔭᖅᑎᐅᖏᓐᓇᕐᓂᐊᖅᑐᓂᒃ ᐱᓇᓱᖕᓂᖅ ᐊᔪᕐᓇᖃᑦᑕᕐᒪᑦ ᑮᓇᐅᔾᔭᒃᓵᖏᑦ, ᐃᒡᓗᖃᖅᑎᑕᐅᓂᖅ ᑕᒪᒃᑯᐊ ᐱᔾᔪᑎᒋᓪᓗᒋᑦ ᐊᒻᒪᓗ ᐊᐳᖅᑕᐅᑎᒋᔭᐅᓪᓗᑎᒃ ᑖᒃᑯᐊ ᐋᓐᓂᐊᕕᖕᓂ, ᓄᓇᓕᖕᓂ ᐃᖅᑲᓇᐃᔭᖃᑦᑕᕐᓂᐊᖅᑐᑦ ᖃᓄᐃᓕᖓᕙᑦ? ᐅᖃᖅᑎ: ᒥᓂᔅ ᐳᕉᔅᑐ. ᐊᖓᔪᖅᑳᖅ ᔮᓇᑦ ᐱᑦᓯᐅᓛᖅ ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐅᑯᐊ ᑎᑎᕋᐅᓯᕆᓵᖅᓯᒪᒐᒃᑭᑦ ᐊᒻᒪᓗ ᓲᖃᐃᒻᒪ ᐱᔾᔪᑎᖃᕐᒥᔪᒍᑦ ᑲᓇᑕᓕᒫᒥ ᐋᓐᓂᐊᓯᐅᖅᑏᑦ ᐊᒥᒐᐃᓐᓇᕐᒪᑕ ᐊᒻᒪᓗ ᑮᓇᐅᔾᔭᒃᓵᖏᑦ ᐊᑭᑦᑐᕋᐅᑎᔾᔪᑎᒋᔭᐅᓪᓗᑎᒃ ᒪᑯᐊ ᓘᒃᑖᒐᓚᑦ ᐋᓐᓂᐊᓯᐅᖅᑎᐅᒐᓗᐊᑦ ᓘᒃᑖᒐᓛᑎᑐᑦ ᐱᔪᓐᓇᕐᓂᖅᑖᖅᑎᑕᐅᓯᒪᔪᑦ ᐊᒻᒪᓗ ᐊᓯᖏᑦ ᒪᑯᐊ ᐸᐃᕆᕕᖃᙱᓐᓂᖅ ᐋᓐᓂᐊᓯᐅᖅᑏᑦ ᕿᑐᕐᖓᖃᕈᑎᑦ ᐸᐃᕆᕕᖕᓂᑦ ᐃᓂᒃᓴᖃᖃᑦᑕᙱᒻᒪᑕ ᐊᒻᒪᓗ ᒪᓕᒐᓕᐅᖅᑎ ᖃᐅᔨᒪᔪᒃᓴᐅᓪᓗᓂ ᑮᓇᐅᔭᑦ ᐊᑐᕈᒫᕐᓂᐊᖅᑐᓕᕆᑎᓪᓗᑕ ᐃᑉᐸᒃᓴᖅ. ᐊᒃᓱᕉᑎᖃᒃᑲᓐᓂᕐᓂᐊᕐᓂᕋᓚᐅᖅᑐᒍᑦ ᐸᐃᕆᕖᑦ ᐱᓪᓗᒋᑦ ᐊᒻᒪ ᐊᑕᐅᓯᖅ ᑖᓐᓇ ᐊᕐᕌᒍᒐᓴᖕᓄᑦ ᓴᖅᑭᑉᐸᓪᓕᐊᓯᒪᔪᖅ ᑮᓇᐅᔾᔭᒃᓵᖏᑦ ᐊᑭᑦᑐᕆᐊᒃᑲᓐᓂᕐᓗᒋᑦ ᐊᑦᑕᓇᖅᑐᒦᙱᓐᓂᖅᓴᐅᖁᓪᓗᒋᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᑐᒡᓕᐊᓂ ᐊᒻᒪᓗ ᑭᖑᓪᓕᖅᐹᖅ ᐃᓚᒋᐊᕈᑏᑦ ᐊᐱᕆᒍᒃ, ᒥᔅᑕ ᐲᑕᓴᓐ. ᐲᑕᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐅᓇ ᑭᖑᓪᓕᖅᐹᕆᓗᒍ ᐊᐱᖅᑯᑎᒋᓂᐊᖅᑕᕋ ᒪᓕᒐᓕᐅᖅᑏᑦ ᐅᖃᐅᓯᖏᑦᑎᒍᑦ ᑕᐃᖅᑲᐅᔭᕋ. ᐊᓪᓚᕕᖕᒥ ᐃᖅᑲᓇᐃᔭᖅᑏᑦ ᐊᓪᓚᕕᓕᕆᓂᕐᒥᒃ ᑲᒪᔭᕆᐊᓖᑦ ᐋᓐᓂᐊᓯᐅᖅᑏᑦ, ᐋᓐᓂᐊᓯᐅᖅᑏᑦ ᐱᔭᒃᓴᖏᓐᓂᒃ ᐱᓕᕆᐊᖃᕐᓗᑎᒃ, ᒪᑯᐊᓗ ᐃᓂᒃᓴᓕᐅᖅᐸᓪᓕᐊᓃᑦ ᑕᒪᒃᑯᐊ ᑲᒪᒋᓗᒋᑦ, ᐋᓐᓂᐊᓯᐅᖅᑎᓄᑦ ᐱᓕᕆᐊᖑᙱᓪᓗᑎᒃ, ᐊᓪᓚᒡᕕᖕᒥ ᑲᒪᔨᐅᔪᓄᑦ ᐋᖅᑭᒃᓱᖅᑕᐅᓗᑎᒃ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒥᓂᔅᑕᖓ, ᒥᓂᔅ ᐳᕉᔅᑐ. ᐊᖓᔪᖅᑳᖅ ᔮᓇᑦ ᐱᑦᓯᐅᓛᖅ ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᑕᐃᒃᑯᐊ ᐅᖄᓚᐅᑎᖏᑦ ᑭᐅᔩᑦ ᒪᑯᐊ ᑎᑎᕋᖅᑕᐅᔭᕆᐊᓖᑦ ᑕᒪᒃᑯᓄᖓ ᑲᒪᔨᐅᖃᑦᑕᕐᒪᑕ ᐊᒻᒪᓗ ᐋᓐᓂᐊᓯᐅᖅᑏᑦ ᐅᖄᓚᖃᑦᑕᖅᖢᑎᒃ ᑭᒃᑯᑦ ᖃᐃᔭᕆᐊᖃᓕᕐᒪᖔᑦ ᐃᓂᒃᓴᓕᐅᖅᑕᐅᓯᒪᓕᕐᒪᖔᖏᓪᓗ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 15 ᐊᒻᒪᓗ ᑕᒪᒃᑯᐊ ᐃᓅᓕᓴᖅᑕᐅᔭᕆᐊᓖᑦ ᖃᓄᐃᓐᓂᖏᑦ ᒪᓕᒃᑕᐅᓪᓗᑎᒃ ᑕᑯᔭᐅᖃᑦᑕᕐᒪᑕ. ᑐᐊᕕᕐᓇᖅᑑᒃᐸᑦ ᑕᐃᒃᑯᐊ ᐅᖄᓚᐅᓯᕆᔩᑦ ᖃᐃᖁᔨᑲᐅᑎᒋᓲᖑᔪᑦ ᑕᐃᔅᓱᒥᖓ ᐃᓅᓕᓴᖅᑕᐅᔭᕆᐊᖃᖅᑐᒥᒃ. ᓇᐅᒃᑯᑦ ᐱᐅᓯᕚᓪᓕᐅᑎᓂᒃ ᐃᓱᒪᒃᓴᖅᓯᐅᕈᑎᖃᐅᓐᓇᐅᔭᖅᑐᒍᑦ. ᐃᒪᐃᓕᔪᓐᓇᖅᑐᖓ, ᑕᐃᓐᓇ ᐅᖃᐱᓗᒡᕕᐅᖃᑦᑕᕈᓐᓇᖅᑐᖅ ᑎᑎᕋᕐᕕᒃ ᑕᒪᒃᑯᓂᖓ ᐊᑐᐃᓐᓇᖃᕐᓂᖅ ᐊᓯᖏᓐᓂᒡᓗ ᑕᒪᒃᑯᓂᖓ ᑲᒪᒋᔭᖃᖃᑦᑕᕐᒪᑕ ᓄᐊᑦᑎᖃᑦᑕᕐᒪᑕᓗ. ᑕᐃᒪᙵᓕᒫᖅ ᐱᐅᓯᕚᓪᓕᐅᑎᒋᕙᓪᓕᐊᓇᓱᖃᑦᑕᖅᑕᕗᑦ ᑐᑭᓯᒃᑲᓐᓂᕈᒪᒐᑦᑕ ᒪᑯᐊ ᐊᑐᖅᑕᐅᓯᒪᔪᕕᓃᑦ ᐃᓅᓕᓴᖅᑕᐅᔭᖅᑐᖅᑐᓄᑦ ᑕᒪᓐᓇ ᑐᑭᓯᒃᑲᓐᓂᕈᓐᓇᕋᑦᑎᒃᑯᑦ ᖃᓄᖅᑑᕆᑎᒋᓗᑎᒃᑯᓪᓗ ᐱᔨᑦᑎᕈᑏᑦ ᑕᒪᒃᑯᐊ ᐱᐅᓯᒋᐊᒃᑲᓐᓂᖁᓪᓗᒋᑦ. ᐄ’, ᖁᔭᓐᓇᒦᒃ ᑕᒪᓐᓇ ᐊᒃᓯᕉᑎᒋᒐᖕᓂ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐅᖃᐅᓯᒃᑯᑦ ᐊᐱᖅᑯᑏᑦ. ᖁᑦᑎᒃᑯᒧᑦ ᒪᓕᒐᓕᐅᖅᑎ, ᒥᔅᑕ ᑕᖅᑐ. ᐊᐱᖅᑯᑦ 36 – 7(2): ᐃᒥᖅᑕᐅᑎᓄᑦ ᐱᖁᑎᔾᔪᐊᓄᑦ (ᑕᖅᑐ) ᑕᖅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐅᓪᓗᒥ ᐅᓇ ᐊᐱᖅᑯᑎᒋᔪᒪᔭᕋ ᓄᓇᓕᖕᓂ ᐱᔨᑦᑎᖅᑏᑦ ᒥᓂᔅᑕᖓᓐᓄᑦ. ᑖᓐᓇ ᒥᓂᔅᑕ ᖃᐅᔨᒪᓂᐊᕐᒪᑦ ᒐᕙᒪᒃᑯᑦ ᐃᑉᐸᒃᓴᖅ ᓇᓗᓇᐃᖅᓯᓚᐅᕐᒪᑕ ᐃᒥᖅ ᐱᐅᙱᓐᓂᕋᖅᑕᐅᓪᓗᓂ ᓄᓇᓕᖕᓂ ᐊᑕᐅᓯᐅᙱᑦᑐᓂ. ᖃᓛᖅᑎᑦᑎᖁᔭᐅᓯᒪᖕᒪᑦ ᐃᒃᐱᐊᔪᒃ ᐋᒡᒋᓯ 2024−ᒥ ᐊᕐᕌᒍ ᒪᕐᕈᓪᓗᐊᖑᓕᖅᑐᖅ. ᒥᓂᔅᑕ ᖃᐅᔨᒪᖕᒥᔪᖅ ᑳᓐᑐᕌᒃᓴᓂᒃ ᑖᒃᑯᐊ ᒐᕙᒪᒃᑯᑦ ᑕᖅᑲᐅᙵᐃᓚᐅᖅᑐᑦ ᔫᓐ 2021−ᒥ ᓄᑖᒥᒃ ᐃᒥᕐᒧᑦ ᓴᓗᒻᓴᐃᕕᖕᓂᒃ ᓴᓇᔪᒪᓪᓗᑎᒃ ᐃᒃᐱᐊᕐᔪᖕᒥ, ᐊᐅᓱᐃᑦᑐᕐᒥᓪᓗ. ᒪᓕᒐᓕᐅᖅᑏᑦ ᐊᖏᖅᓯᓚᐅᖅᓯᒪᔪᑦ ᐊᑭᑐᔪᖅᑐᕈᑎᒃᓴᐃᑦ ᑮᓇᐅᔭᓂᒃ ᓴᓇᔭᐅᔪᓐᓇᖁᓪᓗᒍ ᐃᒥᕐᒧᑦ ᓴᓗᒻᒪᖅᓴᐃᕕᒃ. ᐅᓪᓗᒥ ᖃᓄᐃᓕᖓᓕᕐᒪᖔᑦ ᓇᓗᓇᐃᖅᓯᔪᓐᓴᖅᐸ ᒥᓂᔅᑕ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ (ᑐᓵᔨᑎᒍᑦ): ᓄᓇᓕᓐᓂ ᐱᔨᑦᓯᖅᑎᑦᑐᓐᓄᑦ, ᒥᓂᔅᑕ ᓯᒪᐃᓚᒃ. ᐊᖓᔪᖅᑳᖅ ᑯᕋᐃᒃ ᓯᒪᐃᓚᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐊᒻᒪᓗ ᖁᔭᓐᓇᒦᒃ, ᑖᓐᓇ ᐊᐱᖅᑯᑎᒋᒐᖕᓂ ᖃᓛᖅᑎᑦᑎᖃᑦᑕᕐᓂᖅ ᐊᒻᒪᓗ ᖃᓄᐃᓕᖓᓕᕐᒪᖔᑦ ᐃᒃᐱᐊᕐᔪᒃ. ᖃᓛᖅᑎᑦᑎᓂᖅ ᐱᔾᔪᑎᒃᓴᖃᐅᖅᖢᑎᒃ ᑕᐃᒪᐃᓕᖃᑦᑕᖅᐳᑦ ᐊᑦᑕᓇᙱᑦᑐᒥᒃ ᐃᒥᖃᕐᓂᐊᕋᑦᑕ ᑕᐃᓐᓇᓗ ᓴᓗᒻᒪᖅᓴᐃᕕᒃ ᐃᒥᕐᒧᑦ ᐊᑦᑕᓇᔾᔭᐃᖅᓯᒪᓂᖅ ᐃᒥᕐᒥᒃ ᑕᒪᒃᑯᐊ ᒪᓕᒃᖢᑎᒃᑯᑦ. ᐃᒃᐱᐊᕐᔪᒃ ᐱᔾᔪᑎᒋᓪᓗᒍ ᐃᒥᕐᒧᑦ ᓴᓗᒻᒪᖅᓴᐃᕕᒃ, ᒫᓐᓇ ᐱᓕᕆᐊᕆᔭᐅᔪᖅ ᓄᕕᐱᕆ 2025 ᑕᐃᓐᓇᓗ ᑳᓐᑐᕌᒃᑎ ᑕᐃᔅᓱᒥᖓ ᓴᓇᕕᐅᓂᐊᖅᑐᒥᒃ ᐋᖅᑭᒃᓱᐃᕙᒌᖅᓯᒪᓪᓗᓂ ᐃᒥᕐᒥᒃ ᖃᐅᔨᓴᐃᓪᓗᑎᒃ, ᐱᔭᕇᖅᑕᐅᓂᐊᖅᑐᖅ ᐊᐅᔭᐅᓕᖅᐸᑦ 2027-ᒥ ᑖᓐᓇ ᓴᓗᒻᒪᖅᓴᐃᕕᒃ ᐃᒥᕐᒧᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᓯᕗᓪᓕᖅᐹᕐᒥ ᐃᓚᒋᐊᕈᑏᑦ ᐊᐱᕆᒍᒃ, ᒥᔅᑕ ᑕᖅᑐ. ᑕᖅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᑏᓰᕝᕙ 2024-ᖑᑎᓪᓗᒍ ᒐᕙᒪᒃᑯᑦ ᑳᓐᑐᕌᒃᓴᓂᒃ ᑕᖅᑲᐅᖓᐃᓚᐅᖅᓯᒪᒻᒪᔪᑦ, ᐃᒃᐱᐊᕐᔪᖕᒥ ᐃᒥᕐᒧᑦ ᓴᓗᒻᒪᖅᓴᐃᕕᒃ ᓄᑖᖅ ᓴᓇᔭᐅᔪᓐᓇᕐᓂᐊᕐᒪᑦ. ᑖᓐᓇ ᑳᓐᑐᕌᒃ Arctic Fresh-ᑯᓐᓄᑦ ᑐᓐᓂᖅᑯᑕᐅᓚᐅᖅᓯᒪᔪᖅ ᐄᑉᐳᓗ 2025-ᒥ, ᐊᒻᒪᓗ ᑕᐃᒃᑯᐊ ᑳᓐᑐᕌᒃ ᑎᑎᖅᑲᖁᑎᖏᑦ ᐅᖃᖅᓯᒪᔪᑦ: “ᐃᓄᐃᑦ 20%-ᖑᔭᕆᐊᖃᖅᖢᑎᒃ ᐃᖅᑲᓇᐃᔭᖅᑐᑦ.” ᑖᒃᑯᐊ ᑳᓐᑐᕌᒃᑏᑦ ᒪᓕᒃᑲᓗᐊᕐᒪᖔᑕ ᑕᒪᑐᒥᖓ ᓇᓗᓇᐃᖅᓯᔪᓐᓇᖅᐹ ᑖᓐᓇ ᒥᓂᔅᑕᕆᔭᐅᔪᖅ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᓄᓇᓕᓐᓂ ᐱᔨᑦᓯᖅᑎᒃᑯᓐᓄᑦ ᒥᓂᔅᑕ, ᒥᔅᑕ ᓯᒪᐃᓚᒃ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 16 ᐊᖓᔪᖅᑳᖅ ᑯᕋᐃᒃ ᓯᒪᐃᓚᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐊᒻᒪᓗ ᖁᔭᓐᓇᒦᒃ ᑖᓐᓇ ᐊᐱᖅᑯᑎᒋᓪᓗᒍ ᐃᓄᐃᑦ ᖃᑦᓯ %-ᖑᒋᐊᖃᕐᓂᖏᑦ ᐊᒻᒪᓗ ᐃᖅᑲᓇᐃᔭᖃᑎᒋᓪᓗᑎᒃᑯᑦ ᑖᒃᑯᐊ ᐱᖁᑎᕐᔪᐊᓕᕆᔨᒃᑯᑦ. ᓄᑖᙳᕆᐊᕐᓂᖓ ᓄᑖᙳᕆᐊᖅᑎᑕᐅᕙᓪᓕᐊᓂᖓ ᐱᔾᔪᑎᒋᓪᓗᒍᒃ ᐊᒡᕕᐊᕈᑎᖃᕐᓂᖅ ᑲᒪᒋᔭᕗᑦ, ᑖᒃᑯᐊᓗ ᐊᙳᑎᓯᒪᒐᓗᐊᕐᒪᖔᑦ ᑳᓐᑐᕌᒃ ᐃᓗᓕᖏᓐᓂᒃ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᑐᒡᓕᐊᓂ ᐊᒻᒪ ᑭᖑᓪᓕᖅᐹᖅ ᐊᐱᖅᑯᑎᒋᔭᐃᑦ, ᒥᔅᑕ ᑕᖅᑐ. ᑕᖅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐊᒻᒪᓗ ᖁᔭᓐᓇᒦᒃ ᑖᓐᓇ ᑭᐅᒐᕕᑦ. ᒥᓂᔅᑕ ᖃᐅᔨᒪᔪᒃᓴᐅᕗᖅ ᐊᐅᓱᐃᑦᑐᕐᒥᐅᑦ ᐃᒥᖃᕐᕕᖃᕐᒪᑕ ᓯᕐᒥᖕᓂ ᐊᐅᑉᐸᓪᓕᐊᔪᓂᙶᖅᑐᓂᒃ, ᐊᒻᒪᓗ ᑖᒃᑯᐊ ᓯᕐᒦᑦ ᒥᑭᓪᓕᕙᓪᓕᐊᓕᖅᑎᓪᓗᒋᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐃᓱᒫᓘᑎᒋᔭᐅᕙᓪᓕᐊᑐᐃᓐᓇᓕᕐᒪᑦ ᓯᕗᓂᒃᓴᑦᑎᓐᓂᑦ ᐃᒥᖃᕐᓂᐊᕐᒪᖔᑦ. ᑕᐃᒃᑯᐊ ᒐᕙᒪᐅᓚᐅᖅᓯᒪᔪᑦ ᖃᐅᔨᓴᐃᓚᐅᖅᓯᒪᔪᑦ ᐊᐅᓱᐃᑦᑑᑉ ᐃᒥᖅᑕᕐᕕᒋᖃᑦᑕᖅᑕᖓᓐᓂᒃ ᐊᒻᒪᓗ ᑕᒪᓐᓇ ᓂᓪᓕᐅᑎᒋᒐᒃᑯᒃ ᐅᑭᐅᖅᓯᐅᕐᒥ ᑲᑎᒪᕐᔪᐊᖅᑎᓪᓗᑕ ᐅᖃᓚᐅᖅᓯᒪᔪᖅ ᑕᒪᓐᓇᒎᖅ ᖃᐅᔨᓴᕐᓂᐅᓚᐅᖅᑐᒥᒃ ᑭᓱᓂᑦ ᑐᑭᓯᓚᐅᕐᒪᖔᖅ ᑕᑯᒋᐊᕐᓂᐊᖅᑐᖅ. ᒥᓂᔅᑕᖃᐃ ᓇᓗᓇᐃᖅᓯᔪᓐᓇᖅᐸ ᑭᓱᓂᒃ ᑐᑭᓯᓚᐅᕐᒪᖔᑦ ᐊᑐᓕᖁᔭᓕᐅᕐᒪᖔᓪᓗ, ᖃᓄᐃᑦᑑᓚᐅᕐᒪᖔᓪᓗ ᐊᑐᓕᖁᔭᖅ ᖃᐅᔨᓴᖅᑕᐅᓂᒃᑰᖅᓯᒪᔪᖅ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᒥᓂᔅᑕ ᓄᓇᓕᓐᓂ ᐱᔨᑦᓯᖅᑎᒃᑯᓐᓄᑦ, ᓯᒪᐃᓚᒃ. ᐊᖓᔪᖅᑳᖅ ᑯᕋᐃᒃ ᓯᒪᐃᓚᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐊᒻᒪᓗ ᖁᔭᓐᓇᒦᒃ ᑖᓐᓇ ᐊᐱᖅᑯᑎᒋᒐᖕᓂ. ᑕᐃᓐᓇ ᐊᐅᓱᐃᑦᑐᕐᒧᑦ ᐃᒥᖅᑕᕐᕕᐅᖃᑦᑕᖅᑐᖅ ᐱᓪᓗᒍ, ᑕᐃᓐᓇ ᓴᓗᒻᒪᖅᓴᐃᕕᒃ ᓄᑖᖅ ᑕᐃᓐᓇᐅᖦᖤᖅᐳᖅ ᓴᓇᔭᐅᓂᐊᕐᓂᖓ ᒪᓕᒃᓯᒪᔪᑦ ᐱᔭᕐᓂᖏᑦᑑᖃᑦᑕᕐᒪᑦ, ᐊᐳᖅᑕᐅᑏᓪᓗ ᑕᒪᒃᑯᐊᖑᖃᑦᑕᕐᒪᑕ, ᐊᓄᕌᒡᒍᓪᓗᓂᓗ ᑕᒃᐱᓐᓇ, ᓯᓚᖓᓗ ᑕᒪᒃᑯᐊ ᐃᓱᒪᒋᔭᐃᓐᓇᕆᒋᐊᖃᕋᑦᑎᒃᑯᑦ. ᒫᓐᓇ ᑖᓐᓇ ᑲᒪᒋᔭᐅᕙᓪᓕᐊᔪᖅ ᐊᒻᒪᓗ ᑳᓐᑐᕌᒃ ᐊᕐᕌᓂ ᐊᑎᓕᐅᖅᑕᐅᓚᐅᖅᓯᒪᓪᓗᓂ. ᓄᕖᕝᕙ 2025 ᑖᓐᓇ ᐱᓕᕆᔭᒃᓴᖓᑦ ᐊᕐᕌᒎᑉ ᐃᓗᐊᓂ ᐱᔭᕇᖅᑕᐅᓚᐅᖅᖢᓂ. ᖃᐅᔨᓴᖅᑕᐅᓪᓗᑎᒡᓗ ᑖᒃᑯᐊ ᐃᒦᑦ ᐊᒻᒪᓗ ᓱᓕ ᑲᒪᒋᔭᐅᔪᖅ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐅᖃᐅᓯᒃᑯᑦ ᐊᐱᖅᑯᑏᑦ. ᐊᑎᖁᑎᒃᑲ ᒪᓕᒡᓗᒋᑦ, ᐊᕐᕕᐊ ᓂᒋᐊᓄᑦ, ᒥᔅᑕ ᖃᑉᓗᑦᓯᐊᖅ. ᐊᐱᖅᑯᑦ 37 – 7(2): ᑮᓇᐅᔭᓕᕆᔨᑦ ᐱᔨᑦᑎᐅᑎᖏᓄᑦ (ᖃᑉᓗᑦᓯᐊᖅ) ᖃᑉᓗᑦᓯᐊᖅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᑑᓴᕈᓗᒃᑲ ᑐᓐᓂᖅᑯᑎᒋᓂᐊᕋᒃᑭᑦ ᑮᓇᐅᔭᓕᕆᔨᒃᑯᑦ ᒥᓂᔅᑕᖓᓐᓄᑦ. ᐊᒻᒪ ᐱᔾᔪᑎᓖᑦ ᑮᓇᐅᔭᒃᑯᕕᖕᒥ ᐱᔨᑦᑎᖅᑕᐅᓂᖅ ᓄᓇᕗᑦ ᓄᓇᓕᖁᑎᖏᓐᓂᑦ. ᐅᖃᖅᑏ, ᑖᓐᓇ ᐃᓱᒫᓘᑎᒋᔭᐅᖃᑕᐅᔪᖅ ᓂᕈᐊᖅᑎᓄᑦ ᐊᒻᒪᓗ ᐅᕙᓐᓄᑦ ᐅᖃᐅᓯᕆᔭᐅᖏᓐᓇᖅᖢᓂ ᑮᓇᐅᔭᒃᑯᕕᖃᕆᐊᖃᕐᓃᑦ ᓄᓇᓕᕗᑦ ᐊᕐᕕᐊᑦ. ᐅᖃᖅᑏ, ᐃᖃᓗᖕᒥᐅᑕᐃᑦ ᐊᒻᒪᓗ ᐃᓄᒋᐊᓐᓂᖅᓴᐃᑦ, ᑖᒃᑯᐊ ᐃᓱᒪᖅᓱᑦᑎᐊᖅᖢᑎᒃ ᐱᓱᑐᐃᓐᓇᖅᖢᑎᑦ ᑮᓇᐅᔭᒃᑯᕕᓕᐊᖃᑦᑕᕐᒪᑕ ᑮᓇᐅᔭᒃᑯᕕᖕᒥᓗ ᒪᑐᐃᖅᓯᓪᓗᑎᒃ ᕿᑐᕐᖏᐅᖅᑎᓪᓗᒋᑦ ᐊᑲᐅᙱᓕᐅᕈᑎᖃᕋᒥᒡᓗ ᐋᖅᑭᒃᓱᓂᒡᔪᒃ. ᑕᐃᒪᐃᒃᑲᓗᐊᖅᓗᒍ ᓄᓇᓕᐊᓛᖑᓂᖅᓴᐅᔪᖅ ᐊᑲᐅᙱᓕᐅᕈᑎᖃᖃᑦᑕᕐᒪᑕ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 17 ᑖᓐᓇ ᒥᓂᔅᑕ ᖃᐅᔨᒪᔪᒃᓴᐅᔪᖅ ᑳᓐᑐᕌᒃᓴᓂᑦ ᑕᖅᑲᐅᖓᐃᓚᐅᖅᓯᒪᖕᒪᑦ 2026-ᒥ ᒐᕙᒪᒃᑯᑦ ᑮᓇᐅᔭᒃᑯᕕᖕᓂ ᐃᔨᑦᑎᕈᑎᓂᒃ ᑳᓐᑐᕌᓐᓂᑦ ᐱᓪᓗᑎᒃ. ᐃᒪᐃᓕᒡᓗᑎᒃ, “ᓄᓇᓕᖕᓂ ᑮᓇᐅᔭᒃᑯᕕᓕᕆᓂᕐᒧᑦ ᑮᓇᐅᔭᒃᑯᕕᓕᕆᓂᖅ ᓄᓇᕗᒻᒥᐅᓄᑦ ᐊᑐᐃᓐᓇᖁᖅᑎᑕᐅᖁᓪᓗᓂ.” ᒫᓐᓇ ᑮᓇᐅᔭᒃᑯᕖᑦ ᐱᔨᑦᑎᖅᑎᖓᑦ ᑳᓐᑐᕌᒃ ᖁᓕᓪᓗᐊᓄᑦ ᐊᕐᕌᒍᓄᑦ ᐊᑐᖅᑕᐅᓯᒪᓕᕐᒪᑦ. ᑖᒃᑯᐊᖃᐃ ᑐᕌᒐᓕᐊᕆᔭᐅᓯᒪᔪᑦ ᐊᖑᒻᒪᑎᔭᐅᕙᑦ ᐊᒻᒪᓗ ᖃᖓᑦ ᑳᓐᑐᕌᒃᓴᓂᑦ ᑮᓇᐅᔭᒃᑯᕕᖕᓄᑦ ᐱᔪᑦ ᓴᖅᑭᑕᐅᒃᑲᓐᓂᓛᖅᐸᑦ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᑮᓇᐅᔭᓕᕆᔨᒃᑯᓐᓄᑦ ᒥᓂᔅᑕ, ᒥᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐅᖃᖅᑎᑦᓯᔩ. ᒪ’ᓈᖅᖢᖑᓪᓗ ᑮᓇᐅᔭᕐᒥ ᕼᐊᕕᔅᓯᒥᓪᓘᓐᓃᑦ ᑐᓂᔭᐅᒐᒪ $0.2- ᒥᓪᓘᓐᓃᑦ ᒪ’ᓇ. (ᑐᓵᔨᑎᒎᓕᖅᑐᖅ) ᑮᓇᐅᔭᒃᑯᕖᑦ ᒫᓂ ᓄᓇᕘᒻᒥ ᐃᓪᓗᖑ ᖃᐅᔨᒪᑦᑎᐊᖅᖢᑕ ᑕᒪᓐᓇ ᐃᓱᒫᓘᑎᒋᔭᐅᖕᒪᑦ ᐊᕐᕕᐊᑦ ᐃᓚᒋᔭᐅᖃᑕᐅᓪᓗᓂ. ᐊᒻᒪᓗ ᑖᓐᓇ ᒪᓕᒐᓕᐅᖅᑎ ᐊᐱᕆᒐᒥ ᓂᓪᓕᐅᑎᖃᖃᓯᐅᔾᔨᖅᑲᐅᔪᖅ ᑖᒃᑯᐊ ᒐᕙᒪᒃᑯᑦ ᑳᓐᑐᕌᖃᕐᓂᖏᓐᓂᑦ ᕈᐃᔪᓪ ᑮᓇᐅᔭᒃᑯᕕᒃᑯᑦ ᐱᔨᑦᑎᕈᑎᓂᑦ ᑕᒪᒃᑯᓂᖓ ᒪᑐᐃᖅᓯᒃᑲᓐᓂᖁᓪᓗᒍ ᓄᓇᓕᖕᓂ ᓄᓇᕗᑦ ᐃᓗᐊᓂ. ᑕᑯᓐᓇᕐᓗᒍ ᕈᐃᔪᓪ ᑮᓇᐅᔭᒃᑯᕕᒃᑯᑦ ᐊᕐᕕᐊᑦ ᑕᐃᑲᓂ ᑭᒡᒐᖅᑐᐃᔨᖃᓕᖅᑐᖅ 2018-ᒥ ᐸᓐᓂᖅᑑᖅ 2019-ᒥ. ᑖᓐᓇ ᑳᓐᑐᕌᒃ ᐃᓱᓕᓐᓂᐊᓯᔪᖅ ᖁᓕᓄᑦ ᐊᕐᕌᒍᓄᑦ ᐋᖅᑭᒃᓯᒪᓚᐅᖅᓯᒪᖕᒪᑕ. ᑕᐃᒪᐃᑦᑐᓂᒃ ᑭᒡᒐᖅᑐᐃᔪᓂᒃ ᐋᖅᑭᒃᓯᒪᔪᓂᑦ ᑕᒪᒃᑯᓄᖓ ᑕᑯᒃᑲᓐᓂᕈᒪᔪᒍᑦ ᐊᓯᖏᓐᓂᑦ ᓄᓇᓕᓐᓂ ᐱᔨᑦᑎᕈᓂᒃ ᐊᑐᐃᓐᓇᖃᕐᓂᖅᓴᐅᓂᐊᕐᒪᑕ ᓄᓇᕗᒻᒥ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐅᖃᖅᑎᑦᓯᔩ. ᐅᖃᖅᑎ: ᓯᕗᓪᓕᖅᐹᕐᒥᒃ ᐃᓚᒋᐊᖁᑏᑦ ᐊᐱᖅᑯᑎᒋᔭᐃᑦ. ᒥᔅᑕ ᖃᑉᓗᑦᓯᐊᖅ. ᖃᑉᓗᑦᓯᐊᖅ: ᒪ’ᓇ, ᐅᖃᖅᑎᑦᓯᔩ. (ᑐᓵᔨᑎᒎᓕᖅᑐᖅ) ᒥᓂᔅᑕ ᖃᐅᔨᒪᖕᒪᑦ ᑖᒃᑯᐊ ᕈᐃᔪᑦ ᑮᓇᐅᔭᒃᑯᕕᖓ ᐊᑕᐅᓯᙱᑦᑐᓂᒃ ᑭᒡᒐᖅᑐᐃᔨᑖᖃᑦᑖᖅᓯᒪᓕᕐᒪᑕ ᓄᓇᕗᑦ ᓄᓇᓕᖕᓂ, ᐃᓚᓕᐅᓪᓗᒍ ᐊᕐᕕᐊᑦ, ᑭᙵᐃᑦ, ᐸᓐᓂᖅᑑᕐᓗ. ᑮᓇᐅᔭᒃᑯᕖᑦ ᑕᒪᓐᓇ ᑐᙵᕕᒋᓗᒍ ᐊᖏᓪᓕᒋᐊᖅᑎᑦᑎᒃᑲᓐᓂᕆᐊᓖᑦ ᐱᔨᑦᑎᕈᑏᑦ ᑕᒪᒃᑯᐊ ᐊᑐᐃᓐᓇᕈᖅᑎᑕᐅᔪᑦ ᐅᓄᖅᓯᑲᓐᓂᖁᓪᓗᒋᑦ. ᒥᓂᔅᑕ ᓇᓗᓇᐃᖅᓯᔪᓐᓇᖅᐹ ᖃᓄᖅ ᑮᓇᐅᔭᒃᑯᕕᖕᓂᑦ ᐃᖅᑲᓇᐃᔭᖃᑎᖃᕈᓐᓇᕐᓂᐊᕐᒪᑕ ᑖᓐᓇ ᑐᕌᒐᓕᐊᕆᔭᐅᔪᖅ ᐊᙳᑎᔭᐅᔪᓐᓇᕐᓂᐊᕐᒪᑦ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᑮᓇᐅᔭᓕᕆᔨᒃᑯᓐᓄᑦ ᒥᓂᔅᑕ, ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐅᖃᖅᑎᑦᓯᔩ. (ᑐᓵᔨᑎᒎᓕᖅᑐᖅ) ᑖᒃᑯᐊ ᑳᓐᑐᕌᒃᓯᒪᔪᓂᑦ ᐱᓕᕆᖃᑎᖃᕐᓂᕗᑦ ᑖᒃᑯᐊ ᕈᐃᔪᓪ ᑮᓇᐅᔭᒃᑯᕕᖓ, ᐃᖅᑲᓇᐃᔭᖃᑎᖃᖁᓐᓇᕋᓗᐊᕐᒥᔪᒍᑦ ᑳᓐᑐᕌᒃᑎᓂ ᐊᓪᓚᕝᕕᓕᕆᓂᕐᒥᑦ ᑳᓐᑐᕌᒃᒥᑦ ᖃᓄᕐᓗ ᑳᓐᑐᕌᒃ ᐋᖅᑭᓯᒪᕙᓐᓂᖓᑦᑎᖑᑦ ᓯᕗᒧᓐᓂᐊᕈᑦᑕ. ᑳᓐᑐᕌᒃᕆᔪᒫᓛᖅᑕᕗᑦ ᐊᑐᕆᐊᓕᔅᓰᓛᕈᓐᓇᖏᓐᓇᑦᑕ ᑮᓇᐅᔭᒃᑯᕖᑦ ᐱᓪᓗᒋᑦ, ᓄᓇᓕᓐᓃᖁᒐᓗᐊᕈᑦᑎᒍᑦ. ᐱᖓᓱᓂᑦ ᑮᓇᐅᔭᒃᑯᕕᖃᕋᑦᑕ ᓄᓇᖃᖅᑳᓯᓚᔪᑦ ᑮᓇᐅᔭᒃᑯᕕᖓ, ᓰᐊᐃᕖᓰᒃᑯᑦ ᑮᓇᐅᔭᒃᑯᕕᖓ, ᐊᒻᒪᓗ ᕈᐃᔪᓪ ᑮᓇᐅᔭᒃᑯᕕᖓ, ᑖᒃᑯᐊ ᓄᓇᕗᒻᒦᔅᓱᑎᒃ. ᖁᓕᐅᙱᓱᖓᖅᑐᑦ 25 ᓄᓇᓕᓐᓂ ᑮᓇᐅᔭᒃᑯᕕᖃᓪᓚᑦᑖᖅᐳᑦ, ᑮᓇᐅᔭᒃᑯᕕᓪᓚᒃᑖᖑᑉᐸ ᑎᒥᐅᔪᒥᒃ. ᑭᓯᐊᓂᑦᑕᐅᖅ ᑮᓇᐅᔭᓕᕆᒃᑯᑎᒍᑦ ᐊᖑᒻᒪᑦᓴᐃᓐᓇᕈᒪᒐᑦᑕ ᐱᕙᓪᓕᐊᔪᓂᒃ, ᓯᕗᒧᒐᓱᓐᓂᐊᕈᑦᑕ. ᑕᐅᑐᑉᐸᓪᓕᐊᒻᒥᔪᒍᑦ ᓄᑖᖑᓂᖅᓴᓂᑦ ᖃᕆᑕᐅᔭᒃᑯᑦ ᐱᓇᓱᒃᐸᑦᑐᓂᒃ ᑮᓇᐅᔭᓕᕆᕝᕕᒻᒥ ᓄᓇᕗᒻᒥᐅᓄᑦ

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 18 ᐊᑐᖅᑕᐅᓂᕋᖅᑕᐅᓯᒪᖃᑦᑕᖅᓱᑎᒃ. ᑮᓇᐅᔭᒃᑯᕕᒻᒨᕆᐊᑐᒍᓐᓃᖅᓱᑎᒃ ᐊᐅᑦᑕᔫᖅᑖᕐᓂᐊᖁᕕᑦ ᖃᕆᑕᐅᔭᖅᓯᐅᕐᒧᑦ ᐊᑐᕐᓗᑎᑦ ᑕᐃᒪᐃᑦᓱᓐᓇᕋᔭᕋᕕᑦ. ᑕᕝᕙ ᐱᔨᑦᓯᕆᐊᒃᑲᓐᓂᕈᒪᓐᓂᕈᑦᑕ ᑕᒪᓐᓇ ᐃᓱᒪᓇᕋᔭᖅᐳᑦ ᓄᓇᓕᓐᓄᑦ ᐊᒥᓲᓂᖅᓴᓄᑦ ᓄᓇᕗᒻᒥ. ᖁᔭᓐᓇᒦᒃ, ᐅᖃᖅᑎᑦᓯᔩ. ᐅᖃᖅᑎ: ᑐᒡᓕᐊᓂ ᐊᒻᒪᓗ ᑭᖑᓪᓕᖅᐹᖅ ᐊᐱᖅᑯᑎᒋᔭᐃᑦ, ᒥᔅᑕ ᖃᑉᓗᑦᓯᐊᖅ. ᖃᑉᓗᑦᓯᐊᖅ: ᒪ’ᓇ, ᐅᖃᖅᑎᑦᓯᔩ. ᒪ’ᓈᖅᐸᕋᓗ ᒥᓂᔅᑕ ᑭᐅᒻᒪᑦ. (ᑐᓵᔨᑎᒎᓕᖅᑐᖅ) ᒥᓂᔅᑕ ᐃᖅᑲᐅᒪᔪᒃᓴᐅᕗᖅ ᐅᖃᔪᒻᒪᑦ ᐅᒡᓗᒥ, ᑕᓪᓕᕐᒥᐅᓚᐅᖅᑐᖅ ᐃᑦᓯᕙᓂᖃᖅᑎᓪᓗᒍ ᒪᓕᒐᓕᐅᕐᕕᒻᒥ, ᑕᒪᒃᑯᐊ ᐃᓐᓇᕆᔭᖅᐳᑦ ᐱᓪᓗᒋᑦ. ᑭᓱ ᐅᖃᐅᓯᐅᓪᓛᑦᑖᖅᑐᓂᒃ ᐅᖃᐅᓯᕆᓛᐅᖅᑖᓂᒃ ᒥᓂᔅᑕᐃᑦ ᐅᖃᐅᓯᖏᓐᓂᑦ, ᐱᒻᒪᕆᐅᓂᖓᓂᒃ ᐅᖃᖅᖢᒍ: “ᐱᑦᑕᐃᓕᒪᑎᑦᓯᓂᖅ ᐊᒻᒪᓗ ᐱᓂᕐᓗᑦᑕᐃᓕᒪᓂᖅ ᐃᓐᓇᕐᓂᒃ ᑮᓇᐅᔭᑎᒍᑦ.” ᐅᖃᖅᑏ, ᒥᓂᔅᑕ ᐅᖃᕈᓐᓇᖅᐹ ᖃᓄᖅ ᒐᕙᒪᒃᑯᑦ ᐱᓇᓱᖃᑎᕋᖅᐸᑉᐸᑦ ᑮᓇᐅᔭᒃᑯᕕᓐᓂᒃ ᐃᓄᒃᑎᑐᑦ ᐱᔨᔅᓯᕋᐅᑎᖃᕐᓂᖅᓴᐅᓕᖁᓪᓗᒋᑦ ᐱᔨᔅᓯᕋᐅᑎᐅᒍᓐᓇᖅᑐᑦ ᓄᓇᕗᒻᒥ? ᐱᓗᐊᖅᑐᒥᒃ ᐃᓐᓇᕐᓄᑦ ᖃᓪᓗᓇᐅᔭᕈᓐᓇᖏᑦᑐᓄᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᒥᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐅᖃᖅᑎᑦᓯᔩ. (ᑐᓵᔨᑎᒎᓕᖅᑐᖅ) ᐅᖃᓪᓗᐊᑐᐃᓐᓇᕐᓗᖓ ᑕᐃᒫᑎᒋ ᖃᐅᔨᒪᑎᒋᙱᓐᓇᒪ ᑐᓴᕋᔅᓴᕈᑎᒃᑲ ᒪᓕᑦᑐᒋᑦ ᑭᓯᐊᓂ ᐅᖃᖃᑎᖃᕆᐊᕈᓐᓇᖅᐳᖓ ᐱᓕᕆᔨᓂᑦ ᑳᓐᑐᕌᑦᓂ ᕿᒥᕐᕈᓕᕈᑎᒃ ᑭᐅᒐᓱᓛᖅᐳᖓ ᐃᓗᓕᖃᕐᓂᖅᓴᐅᓕᕐᓗᓂ. ᑭᓯᐊᓂ ᐅᖃᕈᓐᓇᖅᐳᖓ ᑮᓇᐅᔭᒃᑯᕕᓕᓂᖅ ᐃᓄᐃᑦ, ᐅᖃᐅᓯᑉ ᓴᐳᔾᔭᐅᒍᑎᒃᓴᖓᓄᑦ ᐱᖁᔭᖅ ᐊᑖᓂ ᐊᑐᕋᑦᑎᒍ ᓄᓇᕗᒻᒥ. ᐱᔨᔅᓯᖅᑐᓕᒫᓄᑦ ᐊᑐᖅᑕᐅᒋᐊᖃᖅᓱᓂ ᐊᒻᒪᓗ ᑲᒥᓯᓇᐅᑉ, ᐅᖃᐅᓯᓕᕆᓂᕐᒧᑦ ᑲᒥᓯᓇᒧᑦ ᐊᓪᓚᕝᕕᖓᓂ ᑕᒪᒃᑯᐊ ᓇᓗᓇᐃᔭᖅᑕᐅᓯᒪᑦᓯᐊᖅᓱᑎᒃ. ᐊᒻᒪ ᐃᓄᒃᑐᑦᑕᐅᖅ ᐃᓚᓕᐅᑎᓯᒪᓗᒍ, ᑕᑯᒍᒪᒐᑦᑎᒍᑦ ᒐᕙᒪᒃᑯᑦ ᐱᔨᔅᓯᒃᑲᓐᓂᖁᔨᒐᑦᑕ ᐃᓄᒃᑎᑑᖅᑐᓂᒃ. ᐃᓄᒃᑎᑑᖅᑕᐅᓪᓗᑎᒃ ᐃᓐᓇᐅᒍᑎᒃ, ᐃᓅᓱᑦᑑᒍᑎᓪᓘᓐᓃᑦ. ᑭᓇᑐᐃᓐᓇᕐᓘᓐᓃᑦ ᐅᖃᐅᓯᕐᒥᒍᑦ ᓴᐳᔾᔭᐅᒋᐊᖃᖅᑎᓪᓗᒍ ᐅᖃᐅᓯᖓ ᐅᖃᐅᓯᖅᑕᕆᔭᐅᔪᓂᒃ ᓄᓇᕗᒻᒥ ᐱᖁᔭᖅᑎᒍᑦ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐅᖃᖅᑎᑦᓯᔩ. ᐅᖃᖅᑎ: ᑕᓯᐅᔭᕐᔪᐊᕐᒧᑦ ᒪᓕᒐᓕᐅᖅᑎ, ᒥᔅᑕ ᖃᕝᕕᒃ. ᐊᐱᖅᑯᑦ 38 – 7(2): ᐃᐱᖅᓯᒪᕝᕕᐊ ᑰᒡᔪᐋᑉ ᐃᓚᖏᓄᓪᓗ ᐱᔭᒃᓴᒧᑦ (ᖃᕝᕕᒃ) ᖃᕝᕕᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐅᓪᓗᒥ ᐊᐱᖅᑯᑎᒃᑲ ᓯᕗᓕᖅᑎᒧᑦ. ᐅᖃᖅᑏ, ᐃᖅᑲᐅᒪᔪᔅᓴᐅᕗᑦ ᓯᕗᓕᖅᑎ ᐊᓯᖏᓪᓗ ᒥᓂᔅᑕᐅᖃᑎᒋᑦ ᑎᑎᕋᕐᕕᒋᖃᑦᑕᕋᑖᓚᐅᕋᒃᑭᑦ ᑰᔾᔫᐊᕌᓘᑉ ᐱᓕᕆᐊᕆᔭᒃᓴᐅᓂᖓ ᑕᑉᐸᓃ, ᑕᐅᓇᓂ ᐅᐊᓐᓈᑕ ᒫᓂᑑᐸ. ᐊᒻᒪᓗ ᐃᖅᑲᓇᐃᔪᔅᓴᐅᕗᖅ ᓯᕗᓕᖅᑎ ᐃᓪᓗᒨᖅᓯᔪᒐᒪ ᑕᓯᐅᔭᕐᒧᑦ ᐱᓂᐊᕐᓂᐅᓚᐅᖅᑐᒥ ᐅᑭᐅᖑᓚᐅᖅᑐᖅ. ᐅᖃᖅᑏ, ᐅᐸᒍᓐᓇᓚᐅᕋᒪ ᒪᓕᒐᓕᐅᖅᑎᐅᓪᓗᖓ ᑕᓯᐅᔭᕐᔪᐊᕐᒧᑦ. ᒫᓐᓇ ᖁᔭᓐᓇᒦᕈᒪᓪᓗᒋᑦ ᑖᓐᓇ ᑭᖕ ᑭᒡᒐᖅᑐᐃᔨᐅᓚᐅᖅᑐᖅ, ᒥᐊᓕ ᓴᐃᒪᓐ. ᐅᖃᐅᓯᒃᓴᖃᑦᓯᐊᓚᐅᕐᓂᖓᓄᑦ ᐱᓂᐊᕐᓂᖃᖅᑎᓪᓗᑕ. ᐅᖃᖅᑎᑦᑎᔩ, ᑖᓐᓇ ᑐᓚᑦᑕᕐᕕᒃᓴᐅᖁᔭᐅᓂᖓ ᑰᔾᔪᐊᕌᓘᑉ ᐅᖃᐅᓯᐅᓚᐅᖅᓯᒪᒻᒪᑦ ᑕᓯᐅᔭᕐᔪᐊᕐᒦᑦᑐᑦ ᑲᑎᒪᓂᖃᖅᑎᑕᐅᓪᓗᒋᑦ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 19 ᒥᓂᔅᑕᐅᔪᖅ ᐅᖃᕈᓐᓇᖅᐹ, ᐊᔾᔨᖓᓂᒃ ᑕᒪᑐᒪ ᑭᐅᔾᔪᑎᒋᔭᒪ ᖃᖓᒃᑯᑦ ᐃᒡᓗᒨᖅᓯᒍᒫᖅᐸ ᑭᐅᔾᔪᑎᒋᔭᒥᓂᒃ? ᐅᕙᖓ ᑎᑎᕋᕈᑎᒍᓚᐅᖅᑕᖓᓄᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᓄᓇᕗᒻᒧᑦ ᓯᕗᓕᖅᑎ, ᒥᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐅᖃᖅᑎᑦᓯᔩ. ᐄᓛᒃ, ᑖᓐᓇ ᑰᔾᔪᐊᕐᒥ ᐱᓕᕆᖑᓲᐊᖅᓯᒪᔪᖅ ᑐᓚᑦᑕᕐᕕᓕᕆᓂᕐᒧᑦ ᑐᕌᖓᔪᖅ, ᖃᓪᓗᓈᑎᑐᑦ ᑐᓚᑦᑕᕐᕕᒃ ᑰᔾᔪᐊᕌᓗᒻᒥ ᐱᓕᕆᐊᖅ. ᑕᒪᓐᓇ ᐱᓕᕆᐊᖑᓂᖓ ᑐᓴᕐᕕᒋᑦᑕᐅᔭᖅᓯᒪᔭᕗᑦ ᑖᒃᑯᐊ ᒫᓂᑑᐸᐅᑉ ᒐᕙᒪᒃᑯᖏᑦ ᐊᒻᒪᑦᑕᐅᖅ ᐅᑯᐊ ᓇᖕᒥᓂᖅ ᐱᓕᕆᕝᕕᓖᑦ ᑐᓴᖅᑎᑦᓯᔪᖃᑦᑕᐅᔭᖅᓯᒪᓪᓗᓂ. ᒪᓕᒐᓕᐅᖅᑎ ᑎᑎᖃᓚᐅᖅᓯᒪᑎᓪᓗᒍ ᐅᕙᑉᑎᓐᓄ ᑭᐅᔾᔪᑎᒃᓴᒥ ᐋᖅᑭᒃᓱᐃᕙᓪᓕᐊᔾᔪᒍ ᒫᓐᓇ, ᑕᒡᕗᖓ ᐃᒡᓗᕐᔪᐊᕐᒧᑦ ᓴᖅᑭᑦᑎᖁᓐᓂᖅᐸᒍ ᓴᖅᑭᑦᑎᒥᐊᖅᑑᓗᐊᕋᓗᐊᖅᖢᒍ ᑭᓯᐊᓂ ᒪᓕᒐᓕᐅᖅᑎᓃᖔᓚᐅᕐᒪᑦ ᑕᐃᓐᓇ ᑎᑎᖅᑲᖅ ᒪᓕᒐᓕᐅᖅᑎᒧᑦ ᑐᕌᖓᓇᔭᖅᑐᖅ ᑭᐅᔾᔪᑎᖓ. ᒪ’ᓇ, ᐅᖃᖅᑎᑦᓯᔩ. ᐅᖃᖅᑎ: ᓯᕗᓪᓕᖅᐹᕐᒥ ᐃᓚᒋᐊᕈᑏᑦ ᐊᐱᕆᒍᒃ, ᒥᔅᑕ ᖃᕝᕕᒃ. ᖃᕝᕕᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑎᑦᑎᔩ. ᐅᑭᐅᖑᕋᑖᓚᐅᖅᑐᖅ ᑲᑎᖃᑕᐅᓚᐅᕐᒪᑦ ᒫᓂᑑᐸᒥ ᓯᕗᓕᖅᑎᐅᔪᓂᑦ ᑭᕙᓪᓕᕐᒥ. ᐊᐅᔭᒃᑯᑦ ᐅᐊᔭᖃᕐᓂᕐᒥᑦ ᐱᓇᓱᒃᑕᐅᔪᓂᑦ ᐊᓯᖏᓐᓂᒃ. ᐊᒻᒪ ᐅᖃᐅᓯᐅᓚᐅᖅᑐᒥ ᐅᖃᖅᓱᒋᑦ ᑖᓐᓇ ᑭᕙᓪᓕᕐᒥ ᐃᑯᒻᒪᖅᑯᑎᓕᐅᕈᑎᓂᑦ ᐊᒻᒪ ᐊᐅᑦᑕᔫᒥᑦ ᐅᐊᔭᖃᕐᓂᖅ. ᑖᑦᓱᒪ ᒫᓂᑑᐸᒥᐅᑦ ᑰᒻᒧᑦ ᓯᒥᑦᑕᐅᓯᒪᔪᑦ ᐃᑯᒻᒪᖅᑯᑎᓕᐅᕈᑏᑦ ᑰᔾᔪᐊᕌᓗᒻᒥ, ᑖᓐᓇ ᖃᓄᖅ ᐱᕚᓪᓕᕐᓂᖃᕋᔭᕐᒪᑦ ᑐᓚᑦᑕᕐᕕᖓᓂ ᑰᔾᔪᕌᓘᑉ ᐊᓯᖏᓐᓂᓪᓗ ᐊᑐᐃᓐᓇᕈᖅᑎᑦᓯᑲᓐᓂᕐᓗᓂ ᐅᑭᐅᖅᑕᖅᑐᒥ ᐱᔪᓂᒃ. ᖁᔭᓐᓇᒦᒃ, ᐅᖃᖅᑎᑦᓯᔩ. ᐅᖃᖅᑎ: ᒥᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐅᖃᖅᑎᑦᓯᔩ. (ᑐᓵᔨᑎᒎᓕᖅᑐᖅ) ᑖᒃᑯᐊ ᖃᓄᓪᓚᒃᑖᖅ ᐅᖃᐅᓯᖃᓚᐅᕐᓂᕐᒪᖔᑉᑕ ᐃᒫᒃ, ᑕᒪᒃᑮᓐᓂᑦ ᐅᖃᕋᓱᔾᔮᖏᔅᓱᖓ. ᐃᒫᒃ, ᐃᓛᒃ, ᒪᑐᓯᒪᔪᒥᒃ ᑲᑎᒪᖃᑎᒌᓚᐅᕋᑦᑕ ᓯᕗᓕᖅᑎᐅᔪᑎᒍᑦ. ᐊᒻᒪ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖓᑕ ᐊᖏᔪᖅᑳᖓ ᐃᓚᒋᓪᓗᒍ. ᐃᒫᒃ, ᐅᖃᐅᓯᖃᓗᐊᖃᑦᑕᕈᒪᙱᔅᓱᖓ ᐅᖃᐅᓯᐅᕙᓪᓕᐊᔪᓂᒃ ᐱᕙᓪᓕᐊᔪᒃᑯᑦ ᓴᖅᑭᑕᐅᔪᒻᒪᑦ ᑲᑎᒪᓚᐅᖅᑎᓪᓗᑕ. ᑭᓱᓂᑦ ᐅᖃᐅᓯᖃᓪᓚᒃᑑᒐᓗᐊᑦ ᐅᖃᐅᓯᐅᔪᕕᓂᕐᓂᑦ. ᑖᓐᓇ ᑐᓚᑦᑕᕐᕕᓕᐅᕐᓂᖅ ᑰᔾᔪᐊᕋᓗᒻᒥ ᐊᓯᖏᓐᓂᓪᓘᓐᓃᑦ ᐱᕙᓪᓕᐊᔪᖃᕐᓂᐊᖅᐸᑦ ᐊᑦᑐᐃᓂᐊᕈᓂᓗ ᓄᓇᕗᒻᒥᐅᓂᒃ. ᓂᕆᐅᑉᐳᒍᑦ ᑕᒪᕐᒥᒃ ᒪᓕᒐᕐᓂᑦ ᑲᒪᔪᑦ ᐊᕙᑎᓕᕆᓂᕐᒧᓪᓗ ᐅᖃᖃᑎᒌᒍᑎᓄᑦ ᐊᖏᖅᑕᐅᔭᕆᐊᓖᑦ, ᐊᖑᒻᒪᑦᓯᐊᖅᑕᐅᖁᓪᓗᒋᑦ ᐊᑐᐊᒐᐃᓪᓗ ᐊᑐᖅᑕᐅᑦᓯᐊᕐᓗᑎᒃ. ᓄᓇᕗᒻᒥᐅᓪᓗ ᑭᐅᒍᓐᓇᖅᕕᖃᖅᑎᑕᐅᑦᓯᐊᕐᓗᑎᒃ ᖃᓄᖅ ᐊᑐᖅᑕᐅᒍᓐᓇᕐᓂᖏᑕ. ᐃᓚᐅᒋᐊᖃᖅᐳᒍᑦ ᖃᓄᑐᐃᓐᓇ ᐱᕙᓪᓕᐊᓂᖃᕆᐊᖃᖅᐸᑦ, ᑐᕌᖓᓪᓗᐊᕐᒥᔪᖅ ᓄᓇᕗᒻᒥ ᐱᓇᓱᒃᑕᐅᔪᓂᒃ ᐊᒻᒪᓗ ᓄᓇᕗᑦ ᓯᓚᑖᓃᑦᑐᓂᒃ, ᐊᑦᑐᐃᓂᖃᕋᔭᕈᑎᒃ ᓄᓇᕗᒻᒥᐅᓂᒃ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐅᖃᖅᑎᑦᓯᔩ. ᐅᖃᖅᑎ: ᖁᔭᓐᓇᒦᒃ, ᒥᓂᔅᑕ ᒪᐃᓐ. ᐅᖃᐅᓯᒃᑯᑦ ᐊᐱᖅᑯᑏᑦ. ᐸᓐᓂᖅᑑᕐᒧᑦ ᒪᓕᒐᓕᐅᖅᑎ ᒥᔅᑕ ᒪᐃᒃ. ᐊᐱᖅᑯᑦ 39 – 7(2): ᐋᓐᓂᐊᕕᓕᐊᖅᑐᑦ ᖃᖓᑦᑕᐅᑎᖏᓄᑦ (ᒪᐃᒃ) ᒪᐃᒃ: ᖁᔭᓐᓇᒦᒃ, ᐅᖃᖅᑏ. ᖃᓂᒪᓐᓇᖏᑦᑐᓕᕆᓂᕐᒧᑦ ᐃᖏᕐᕋᖃᑦᑕᓂᕐᒧᑦ ᒥᔅᓵᓄᑦ ᐊᐱᖅᑯᑎᔅᓴᖃᖅᑐᖓ ᒥᓂᔅᑕᒧᑦ ᖃᓂᒪᓐᓇᖏᑦᑐᓕᕆᔨᒃᑯᓐᓄᑦ, ᑖᔅᓱᒧᖓ ᐃᓱᒫᓘᑕᐅᓯᒪᔪᒧᑦ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 20 ᒥᓂᔅᑕ ᖃᐅᔨᒪᒻᒪᓐ, ᑖᓐᓇ ᐱᓕᕆᕝᕕᒋᔭᖓ ᓇᓗᓇᐃᖅᓯᓚᐅᖅᓯᒪᒻᒪᑦ ᑭᒃᑯᑐᐃᓐᓇᕐᓄᑦ ᑐᓴᕋᔅᓴᐅᔪᒃᑯᑦ ᐅᖄᓚᐅᑎᑕᖃᕐᓂᐊᓕᕐᓂᖓᓂᒃ ᑕᕝᕙᓂ ᐃᖃᓗᓐᓂᑦ ᐅᑕᖅᑭᕕᖓᓂ, ᖃᖓᑕᓲᒃᑯᕕᖓᓂ. ᑖᓐᓇ ᓈᒻᒪᑦᑐᖅ ᖁᕕᐊᓇᖅᑐᖅ ᐃᑲᔫᑎᖃᙳᓱᒻᒪᑦ. ᑖᒃᑯᐊ ᓇᓗᓇᐃᖅᓯᓂᕆᓚᐅᖅᓯᒪᔭᖓ ᖃᓂᒪᓐᓇᖏᑦᑐᓕᕆᔨᒃᑯᑦ ᑖᒃᑯᓄᖓ ᐋᓐᓂᐊᕕᓕᐊᖃᑦᑕᖅᑐᓄᑦ ᐃᑲᔫᑎᒋᓂᐊᕐᖓᑦ ᑖᓐᓇ ᑖᒃᑯᐊ ᐃᖏᕐᕋᔪᓪᓘᓐᓃᑦ ᐋᓐᓂᐊᕕᓕᐊᖅᓯᒪᔪᓪᓘᓐᓃᑦ ᐃᑲᔪᖅᑕᐅᔭᕆᐊᖃᓕᕋᐃᑉᐸᑕ ᐱᔾᔪᑎᖃᕐᓗᑎᒃ ᖃᖓᑕᓲᖅ ᑭᖑᕙᕆᐊᕐᓂᖓᓂᒃ ᑐᕝᕙᓘᓐᓃᑦ ᑕᕝᕗᖓ ᓴᐃᓕᔮᕐᕕᒻᒨᕆᐊᖃᕐᓂᖓᓂᒃ. ᐅᖃᖅᑎᑦᑎᔩ, ᑕᐃᒪ ᓂᕆᐅᓇᑦᑎᐊᕋᓗᐊᕐᖓᑦ ᑖᒃᑯᐊ ᐊᑲᐅᔪᒥᑦ ᐊᑲᐅᓈᕈᑎᓂᐊᖅᑐᓴᐅᒻᒥᒻᒪᑦ ᐸᓐᓂᑑᕐᒥᐅᓄᑦ, ᑕᕝᕗᖓ ᐃᖃᓗᓐᓄᑦ ᐋᓐᓂᐊᕕᐊᒐᓚᑉᐸᒻᒪᑕ ᐅᕝᕙᓘᓐᓃᑦ ᐋᑐᕚᒧᑦ. ᒥᓂᔅᑕᖃᐃ ᓇᓗᓇᐃᖅᓯᔪᓐᓇᖅᑲ ᑖᓐᓇ ᐅᖄᓚᐅᑦ ᐊᑐᐃᓐᓇᐅᓂᐊᖅᑐᖅ ᑭᐅᔭᐅᖃᑦᑕᕐᓂᐊᕐᒪᖔᖅ ᑖᒃᑯᓄᖓ ᖃᓂᒪᓐᓇᖏᑦᑐᓕᕆᔨᒃᑯᑦ ᐃᖅᑲᓇᐃᔭᖅᑎᖏᓐᓄᑦ? ᐊᒻᒪᓗᖃᐃ ᓇᓗᓇᐃᖅᓯᒋᐊᒃᑲᓐᓂᕈᓐᓇᖃᑦ ᑖᓐᓇ ᐊᑐᐃᓐᓇᐅᓂᐊᕐᒪᖔᖅ ᐅᖄᓚᐅᑦ ᐃᓄᑦᑎᑐᑦ ᐊᒻᒪᓗ ᖃᓪᓗᓈᑎᑐᑦ? ᑖᓐᓇ ᐊᐱᖅᑯᑎᒐ ᓯᕗᓪᓕᕐᒥ. ᖁᔭᓐᓇᒦᒃ, ᐅᖃᖅᑎᑦᑎᔩ. ᐅᖃᖅᑎ: ᖁᔭᓐᓇᒦᒃ. ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᒥᓂᔅᑕ, ᒥᔅ ᐳᕉᔅᑐ. ᐊᖓᔪᖅᑳᖅ ᔮᓇᑦ ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐋᓐᓂᐊᖅᑐᓕᕆᔨᒃᑯᑦ ᓈᓴᐅᑎᖃᖅᐳᒍᑦ ᐃᖅᑲᓇᐃᔭᖅᑎᖃᖅᓱᓂ ᐃᓄᑦᑎᑑᖁᓐᓇᑦᓯᐊᖅᑐᓂᒃ ᐊᐅᓪᓚᖅᑐᓕᕆᓂᕐᒥᑦ ᑲᒪᕙᑦᑐᑦ ᐃᖅᑲᓇᐃᔭᕐᓇᐅᑎᓪᓗᒍ. ᑕᐃᒫᒃ ᐅᖃᖃᑎᖃᑦᓴᐃᓐᓇᕐᕕᒃᓴᐅᓲᖑᔪᑦ ᐃᓄᑦᑎᑑᓲᒥᒃ. ᑖᓐᓇ ᑭᐅᔪᖅ ᐃᓄᑦᑎᑑᑦᓱᓐᓇᖏᒃᑯᓂ. ᐊᒻᒪ ᐊᔪᐃᓐᓈᐸᒻᒥᔪᑦ ᖃᓪᓗᓈᑎᑐᑦᑕᐅᖅ ᐃᖅᑲᓇᐃᔭᕐᓇᐅᖏᑦᑎᓪᓗᒍ ᐊᑐᐃᓐᓇᖅᑕᖃᑦᓴᐃᓐᓇᖁᓪᓗᒍᑦᑕᐅᖅ ᐃᓄᑦᑎᑑᕈᓐᓇᑦᓯᐊᖅᑐᒥᓪᓗ ᐊᑐᐃᓐᓇᖃᖃᑦᑕᖁᓪᓗᒋᑦ ᐃᑲᔪᕈᓐᓇᖅᑐᒥᒃ. ᑖᒃᑯᐊᓗ ᑐᔪᕐᒥᕖᑦ ᑳᓐᑐᕌᒃᒥᑎᒍᑦ ᐱᔨᑦᓯᖃᕈᓐᓇᐅᑎᖃᕈᓐᓇᓲᖑᒻᒥᔪᑦ ᐃᓄᑦᑎᑐᑦ. ᐊᒻᒪᓗ ᐋᓐᓂᐊᖅᑐᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ ᑲᒪᕙᑦᑐᑦ ᑳᓐᑐᕌᒃᕆᔮᓂᑦ, ᐅᖃᖃᑎᑦᓴᐃᓐᓇᖅᐸᒃᓱᑎᒃ ᑖᓐᓇ ᐊᑐᐃᓐᓇᐅᑎᑕᐅᑦᓴᐃᓐᓇᕋᓗᐊᕐᒪᖔᖅ ᐅᖃᓗᒍᓐᓇᕐᓂᖅ. ᐊᒃᓲᑦ, ᐊᐅᓪᓚᐸᓪᓕᐊᔪᖅ ᐃᑲᔪᖅᑕᐅᒍᓐᓇᖏᒃᑯᓂ ᐅᖃᐅᓯᕐᒥᑦ ᐊᑐᕐᓗᓂᒍ ᑐᓴᖅᑎᑦᓯᒋᐊᕈᓐᓇᕐᒥᕗᑦ. ᑕᐃᒪᐃᑦᑐᒥᒃ ᐊᖅᑯᓵᓚᐅᖅᓯᒪᓐᓂᕈᑎᒃ ᑖᓐᓇ ᐋᓐᓂᐊᕕᓕᐊᖅᐸᑦᑐᓂ ᑲᒪᔨᐅᔪᒧᑦ, ᖃᐅᔨᒪᓕᕋᔭᕋᑦᑎᒍ ᐃᑲᔪᕈᑎᒋᓛᕋᑦᑎᒍᓗ ᖃᓄᖅᑑᒋᐊᕈᑎᒃᓴᒧᑦ. ᖁᔭᓐᓇᒦᒃ, ᐅᖃᖅᑎᑦᓯᔩ. ᐅᖃᖅᑎ: ᓯᕗᓪᓕᖅᐹᕐᒥ ᐊᐱᖅᑯᑎᒋᔭᕕᑦ ᐃᓚᒋᐊᕈᑎᖓ, ᒥᔅᑕ ᒪᐃᒃ. ᒪᐃᒃ: ᖁᔭᓐᓇᒦᒃ, ᐅᖃᖅᑎᑦᑎᔩ. ᖁᔭᓐᓇᒦᒃ, ᒥᓂᔅᑕ. ᒥᓂᔅᑕ ᑕᐃᒪ ᖃᐅᔨᒪᒻᒥᒻᒪᑦ ᑕᕝᕙᙵᓂᓛᒃ ᐅᓇ ᑭᒃᑯᑐᐃᓐᓇᕐᓄᑦ ᑐᓴᕋᔅᓴᐅᕙᑦᑐᓂ ᐅᖃᖅᓯᒪᒻᒪᑦ. “ᐸᕐᓇᓯᒪᒻᒪᑕ ᐅᖄᓚᐅᑎᓂᒃ ᐊᖅᑭᔅᓱᐃᓂᐊᖅᑐᑦ, ᑖᒃᑯᓄᖓ ᐱᓗᐊᖅᑐᒥ ᐋᓐᓂᐊᕕᓕᐊᖃᑦᑕᖅᑐᓄᑦ ᐊᑐᖅᑕᐅᒍᓐᓇᕐᓂᐊᖅᑐᒥᑦ ᑕᒫᓂ ᓄᓇᕘᑦ ᐃᓗᐊᓂ ᒥᑦᑕᕐᕕᐅᔪᓂᑦ.” ᑖᒃᑯᐊ ᑲᔪᓯᕙᓪᓕᐊᓂᐊᕐᕙᓗᒻᒪᑕ. ᑖᓐᓇᖃᐃ ᒥᓂᔅᑕ ᓇᓗᓇᐃᖅᓯᒍᓐᓇᕆᕙ ᑕᐃᒪᓕ ᐸᓐᓂᖅᑑᒥ ᖃᖓ ᐱᑕᖃᓛᕐᒪᖔᖅ ᐅᖄᓚᐅᒻᒥᑦ ᐋᓐᓂᐊᕕᓕᐊᖅᑐᒧᑦ ᐊᑐᖅᑕᐅᒍᓐᓇᕋᔭᖅᑐᒥᒃ? ᖃᖓᓕᑭᐊᖓᐃᑦ ᐸᓐᓂᖅᑑᒥ ᐱᑕᖃᓛᖅᑲ? ᖁᔭᓐᓇᒦᒃ, ᐅᖃᖅᑎᑦᑎᔩ. ᐅᖃᖅᑎ: ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᒥᓂᔅᑕ, ᒥᔅ ᐳᕉᔅᑐ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 21 ᐊᖓᔪᖅᑳᖅ ᔮᓇᑦ ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐅᖃᕈᓐᓇᖅᐳᖓ ᐋᓐᓂᐊᖅᑐᓕᕆᔨᒃᑯᑦ, ᐃᖅᑲᓇᐃᔭᖅᑐᓕᕆᔨᒃᑯᑦ, ᐱᖁᑎᕐᔪᐊᓕᕆᔨᒃᑯᓐᓂ ᐅᖃᖃᑎᖃᖅᓯᒪᕗᒍᑦ ᑲᖏᖅᓯᓂᕐᒥ ᐅᖃᓘᑎᒥᒃ ᐋᖅᑭᒃᓯᔪᖃᓛᓕᖁᓪᓗᒍ. ᑖᒃᑯᐊ ᐅᖄᓚᐅᑏᑦ ᐊᑐᐃᓐᓇᐅᖏᒻᒪᑕ ᓱᓕ ᖃᓪᓗᓈᓃᑦᑐᓂᑦ. ᐅᖃᖃᑎᖃᖅᐸᓪᓕᐊᒐᓗᐊᖅᐳᒍᑦ ᐃᖅᑲᓇᐃᔭᕐᕕᑎᓐᓂᑦ, ᐃᖏᕐᕋᔪᓕᕆᔨᒃᑯᑦ ᐃᓚᖏᓪᓗᑎᒍᑦ ᑲᔪᓰᓐᓇᕋᔭᖅᑐᒥᒃ ᐊᑐᐃᓐᓇᐅᑎᑦᓯᒍᓐᓇᕋᔭᕐᒪᖔᑕ ᑭᒃᑯᓕᒫᓄᑦ ᐅᖃᓘᑎᒥᒃ ᐊᑐᖅᑕᐅᒍᓐᓇᖅᑐᒥᒃ. ᑐᓴᖅᑎᑦᓯᒍᑎᖃᕆᐊᖅᓯᒪᓂᐊᖅᑐᒍᑦ ᐊᐅᓪᓚᖅᑐᓕᕆᔩᑦ ᐅᖃᓗᕝᕕᒋᒃᑭᑦ, ᖃᕆᑕᐅᔭᒃᑯᑦ ᓴᖅᑭᔮᖅᑎᑕᐅᓗᓂ ᐅᖃᓘᑎᖓᓪᓗ ᓴᖅᑭᔮᖅᑎᑕᐅᖏᓐᓇᖅᓱᓂ ᐊᑭᖃᙱᑦᑐᖅ. ᐅᖃᓗᕝᕕᖃᕐᒥᔪᒍᑦ ᐋᓐᓂᐊᕕᓕᐊᖅᑐᓄᑦ ᑐᓂᔭᐅᕙᑦᑐᓂᒃ ᓈᓴᐅᑎᖃᖅᓱᑎᒃ. ᓯᕗᒧᒋᐊᕈᑎᒋᓂᐊᕈᑦᑎᒍ ᐅᖃᓘᑏᑦ ᐊᖅᑭᐸᓪᓕᐊᓗᑎᒍᑦ, ᐃᑲᔪᖅᑕᐅᒃᑲᓐᓂᕈᓐᓇᕈᓪᓗᒋᑦ ᐋᓐᓂᐊᕕᓕᐊᖅᐸᓪᓕᐊᔪᑦ ᐅᖃᓘᑎᕋᓛᖃᙱᒃᑯᑎᑦ ᐱᓗᐊᖅᑐᒥᒃ. ᑭᓇᒥᓪᓗ ᐃᑲᔪᖅᑕᐅᒋᐊᖃᕐᓂᕈᑎᒃ. ᑐᓴᕋᒃᓴᐃᑦ ᐊᑐᐃᓐᓇᐅᑎᒋᕗᖁᑎᒋᑦᓯᐊᖃᑦᑕᖅᓱᑎᒍᑦ. ᑖᒃᑯᐊ ᐱᔨᑦᓯᕋᐅᑎᑦᑎᓐᓂᑦ ᓄᓇᕗᒻᒥᐅᑦ ᑕᒪᒃᑯᓇᖓᑦ ᑕᐃᒪ ᐊᑐᖅᑕᐅᒍᓐᓇᖃᑦᑕᕐᓂᐊᖅᑐᓂᑦ ᐱᕗᒍᑦ. ᖁᔭᓐᓇᒦᒃ, ᐅᖃᖅᑏᑦ. ᐅᖃᖅᑎ: ᐊᐱᕆᒍᒃ, ᒥᔅᑕ ᒪᐃᒃ. ᒪᐃᒃ: ᖁᔭᓐᓇᒦᒃ, ᐅᖃᖅᑏ. ᖁᔭᓐᓇᒦᓪᓗ ᒥᓂᔅᑕ ᑭᐅᑦᑎᐊᕐᖓᑦ. ᑕᐃᒪ ᒥᓂᔅᑕ ᐊᐱᕆᔪᒪᓕᕐᒥᔭᕋ ᑕᒪᒃᑯᐊ ᑲᓇᐃᑎᐊᓐ ᓄᐊᑦᑯᑦ ᖃᖓᑕᓲᖑᑎᖏᑦᑕ ᖃᖓᑦᑕᖃᑦᑕᕆᐊᖃᕐᓂᖏᑦ ᑎᑭᖃᑦᑕᕆᐊᖃᕐᓂᖏᑦ ᐊᓯᔾᔨᖃᑦᑕᕐᖓᑕ. ᑕᐃᒪ ᐅᑦᑑᑎᒋᓗᒍ ᐅᓇ ᐸᓐᓂᖅᑑᒥ ᐃᓐᓇᕐᒥᑦ ᐊᐅᓪᓚᕋᓱᑦᑐᖃᕋᔭᕐᓂᖅᑲᑦ ᐋᑐᕚᒧᑦ, ᑕᐃᒪ ᐱᔭᕆᐊᑐᔪᒃᑰᖃᑦᑕᖅᑐᑦ ᐱᔾᔪᑎᒋᓪᓗᒍ ᑖᓐᓇ ᓯᕙᑖᕐᕕᒻᒥ ᖃᖓᑕᒋᐊᖃᕐᓂᖅ. ᑕᐃᒪ ᐋᓐᓂᐊᕕᓕᐊᖅᑐᑦ ᐃᓐᓇᐃᑦ ᐅᖃᐅᓯᕆᒐᒃᑯ ᑕᕝᕙᓂ ᑖᓐᓇ ᐸᓐᓂᖅᑑᒦᖔᕐᓗᓂ ᐅᖓᒻᒧᒋᐊᒃᑲᓂᑦᑕᖅᑯᖅ ᕿᑭᖅᑕᕐᔪᐊᒧᑦ, ᕿᑭᖅᑕᕐᔪᐊᒥᑦ ᐃᖃᓗᓐᓄᑦ, ᐃᖃᓗᓐᓂ ᑰᔾᔪᐊᕐᒧᑦ, ᑰᔾᔪᐊᒥᑦ ᐋᑐᕚᒧᑦ. ᑕᕝᕙ ᐋᓐᓂᐊᕕᓕᐊᖅᑐᖅ ᑕᐃᒪᐃᒍᓐᓇᖅᑐᖅ ᐃᓐᓇᐅᓗᓂ. ᑖᓐᓇ ᐊᒥᓲᓪᓗᑕ ᖃᐅᔨᓯᒪᔭᕗᑦ ᑕᐃᒪᙵᑦ ᑲᓇᐃᑎᐊᓐ ᓄᐊᑦ ᐋᖅᑭᔅᓯᓚᐅᖅᓯᒪᒻᒪᑦ ᕿᑭᖅᑕᕐᔪᐊᒃᑰᕆᐊᓕᒻᒥ. ᑖᓐᓇ ᐅᓪᓛᒃᑯᑦ ᐊᐅᓪᓚᕈᒪ, ᐅᓐᓄᒃᑯᑦ ᐋᑐᕚᒧᑦ ᑎᑭᑦᑕᖅᑯᖓ. ᓄᖅᑲᕐᓗᖓ ᑎᓴᒪᐃᕋᕐᓗᖓᖃᐃ, ᑕᐃᒪᐃᖃᑦᑕᖅᑐᐃᑦ. ᒥᓂᔅᑕᖃᐃ ᑎᓕᓯᒋᐊᕈᓐᓇᖅᑲ ᐃᖅᑲᓇᐃᔭᖅᑎᖏᓐᓂᑦ ᑖᓐᓇ ᖃᖓᑕᓲᒃᑯᑦ ᐊᐅᓪᓚᕆᐊᖃᖃᑦᑕᕐᓂᖅ ᐋᓐᓂᐊᕕᓕᐊᖅᑐᓄᑦ ᐱᓗᐊᖅᑐᒥ ᐃᓐᓇᕐᓄᑦ, ᑕᐃᒫᒃ ᐋᖅᑭᒋᐊᒃᑲᓐᓂᕈᓐᓇᖅᑲᑦ. ᓄᖅᑲᖅᑕᕈᓐᓇᓕᕐᓗᑎᒃ ᒪᕐᕈᐊᖅᑎᑐᐃᓐᓇᕐᓗᑎᒃ, ᐅᐸᒐᓱᑦᑕᒥᓄᑦ ᑕᕝᕙᓂ ᐅᓪᓗᓴᐃᓐᓇᕐᒥ? ᒥᓂᔅᑕᖃᐃ ᑕᒪᔅᓱᒥᖓ ᑲᒪᒋᐊᕈᓐᓇᖅᑲ? ᐊᐱᖅᑯᑎᒋᔭᕋ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ, ᒥᓂᔅᑕ ᐳᕉᔅᑐ. ᐊᖓᔪᖅᑳᖅ ᔮᓇᑦ ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏᑦ. ᖁᔭᓕᔭᕋᑦᑕᐅᖅ ᒪᓕᒐᓕᐅᖅᑎ ᑕᐃᒪᐃᖁᔨᒻᒪᓐ. ᖃᐅᔨᒪᒐᒪ ᐱᒻᒪᕆᐊᓘᒻᒪᑦ ᑕᐃᒃᑯᓄᖓ ᖃᖓᑦᑕᐅᑎᓕᕆᔨᐅᔪᓄᑦ, ᖃᖓᑦᑕᐅᓯᖅᓯᖃᑦᑕᖅᑲᑕ ᑎᑭᓴᕋᐃᔾᔫᒥᓂᐊᖅᑐᓂᑦ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 22 ᐃᓱᒪᒋᔭᖃᕆᐊᖃᖃᑦᑕᖅᑐᐃᑦ ᑭᒃᑯᑦ ᐃᑭᒪᓂᐊᕐᒪᖔᑕ, ᑲᔪᖏᖅᓴᐃᖏᓐᓇᐸᒻᒥᔪᒍᑦᑕᐅᖅ ᐃᓐᓇᒻᒪᕆᐅᒐᐃᑉᐸᑕ ᐋᓐᓂᐊᕕᓐᓄᑦ ᐃᑲᔪᖅᑕᐅᖃᑦᑕᕆᐊᓖᑦ ᑎᑭᓴᕋᐃᓐᓂᖅᐹᖑᔪᓂᑦ ᐃᑭᖁᓲᕋᓗᐊᕗᑦ ᑕᐃᒪᐃᖏᓐᓇᕈᓐᓇᖃᑦᑕᖏᒻᒪᑕ. ᐱᔾᔪᑎᒋᓪᓗᒍᐃᓛᒃ ᑎᑭᑎᒐᓱᐊᕆᐊᖃᓲᕆᒐᑦᑎᒍᑦ ᖄᖏᐅᑎᙱᓪᓗᑎᒃ. ᑕᐃᒃᑯᐊᓗ ᐋᓐᓂᐊᕕᓕᐊᖅᑐᐃᑦ ᐊᐅᓪᓚᖅᑐᑎᑦ ᐃᒪᐃᖑᓐᓇᖃᑦᑕᕐᒥᔪᐃᑦ, ᖃᐅᔨᒪᑉᐸᑕ ᐊᐅᓪᓚᕆᐊᖃᓛᕐᖓᑕ ᐋᓐᓂᐊᓲᖅᑎᖏᓐᓂᑦ ᐅᖃᖃᑎᖃᖃᑦᑕᕐᓗᑎᒃ ᐋᓐᓂᐊᕕᖏᓐᓂᑦ, ᑭᓱᓂᑦ ᐱᒋᐊᖃᓛᕐᒪᑕ ᐅᖃᐅᔾᔨᖃᑦᑕᕐᓗᑎᒃ. ᓄᓇᕗᒻᒥ ᐅᕙᓃᓛᒃ ᐊᖑᑎᑯᑖᖑᓂᖅᐹᖑᔪᒥᑦ ᓴᓂᓕᖃᖃᑦᑕᕋᒪ ᓇᐃᒃᑲᒪ ᖃᐅᔨᒪᕕᐅᑎᑉᐸᒃᑲᒪ. ᖃᖓᑕᓲᕐᒥᓗ ᐃᔅᓯᕚᓕᕋᐃᒐᒪ ᐃᑲᕐᕋᒐᓚᓐᓄᑦ ᐊᑲᐅᙱᑦᑎᐊᓕᓲᖑᒻᒪᑦ. ᐃᓯᒐᒃᑲᓗ ᐃᑯᕐᕋᖃᖅᑎᒐᓱᐊᖏᓐᓇᓲᕆᒐᒃᑭᑦ ᖃᖓᑕᓲᕐᓂᐊᕋᐃᒐᒪ ᐊᒻᒪᓗ ᑐᓄᓐᓄᑦ ᐋᖅᑭᓯᓯᒪᓪᓗᖓ, ᑐᓄᓐᓄᑦ ᐊᑲᐅᒃᑲᓐᓂᕈᑎᒥᒃ. ᐋᓐᓂᐊᕕᓕᐊᖅᑐᐃᑦ ᑕᐃᒪᐃᖃᑦᑕᕈᓐᓇᒥᒻᒪᑕ. ᐋᓐᓂᐊᕕᓕᐊᕐᓂᐊᖅᑐᐃᑦ ᐃᓐᓇᒻᒪᕇᑦ ᐅᖃᖃᑎᖃᖃᑦᑕᖅᐸᑕ ᐋᓐᓂᐊᓯᐅᖅᑎᖏᓐᓂᒃ ᐊᐅᓪᓚᖅᑐᓕᕆᔨᖏᓐᓂᒃ ᐃᑯᕐᕋᒋᕈᓐᓇᙱᒃᑲᓗᐊᕐᒪᖔᑕ ᐃᓯᖏᓐᓄᑦ ᐊᒻᒪᓗ ᑐᓄᖓᓄᑦ ᐊᑲᐅᒍᑎᐅᒃᑲᓐᓂᕈᓐᓇᖅᑐᓂᒃ ᓇᔅᓴᖅᑎᑕᐅᒍᓐᓇᙱᒃᑲᓗᐊᕐᒪᖔᑕ. ᐱᓕᕆᑦᑎᐊᕋᓱᓪᓚᕆᑉᐸᒃᑲᑦᑕᐃᓛᒃ, ᐅᖃᖅᑏ. ᑭᒃᑯᑐᐃᓐᓇᐃᑦ ᐊᐅᓪᓚᕆᐊᓖᑦ ᐊᑲᐅᔪᒦᑎᒐᓱᐊᓲᕆᒐᑦᑎᒍᑦ. ᐊᒻᒪᓗ ᐅᖃᐅᔾᔭᐅᖃᑦᑕᕈᑦᑕ ᖃᓄᐃᓐᓂᒥᓂᕆᔭᖏᓐᓂᑦ ᐋᖅᑭᒋᐊᖅᓯᖃᑦᑕᕋᓱᐊᕈᓐᓇᖅᑐᒍᑦ ᑭᖑᓂᐊᒍᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᖁᔭᓐᓇᒦᒃ. ᐅᖃᐅᓯᒃᑯᑦ ᐊᐱᖅᑯᑏᑦ. ᐊᐃᕕᓕᖕᒧᑦ ᒪᓕᒐᓕᐅᖅᑎ, ᒥᔅ ᐊᖑᑎᐊᓗᒃ. ᐊᐱᖅᑯᑦ 40 – 7(2): ᒥᑦᑕᕝᕕᑦᑕ ᐱᖁᑎᕐᔪᐊᖏᓄᑦ (ᐊᖑᑎᐋᓗᒃ) ᐊᖑᑎᐊᓗᒃ: ᖁᔭᓐᓇᒦᒃ, ᐅᖃᖅᑏ. ᐃᑦᓯᕚᙳᕋᒪ. (ᑐᓵᔨᑎᒎᓕᖅᑐᖅ) ᐊᐱᖅᑯᑎᒃᑲᓕ ᑐᕌᖓᙳᓱᑦᑐᐃᑦ ᐃᖏᕐᕋᔪᓕᕆᔨᒃᑯᑦ ᐊᐅᓚᔪᓐᓇᐅᑎᓕᕆᔨᒃᑯᑦ ᓄᓇᕗᒻᒥ ᒥᓂᔅᑕᖓᓄᑦ. ᐊᐱᕆᒋᐊᒃᑲᓐᓂᕈᒪᒐᒪ ᐃᓱᒫᓗᒋᔭᓐᓂᒃ ᐅᖃᐅᓯᕆᖃᑦᑕᓚᐅᖅᑕᕐᓂᒃ ᐅᑭᐅᒃᑯᑦ ᐃᔅᓯᕙᓂᖃᖅᑎᓪᓗᒍ ᒪᓕᒐᓕᐅᕐᕕᒃ. ᐳᓛᕆᐊᕋᑖᕐᓂᕆᓚᐅᖅᑕᓐᓂ ᓇᐅᔮᕐᒧᑦ ᕼᐋᒻᒪᓚᒃᑯᖏᑦ ᐅᖃᐅᔾᔨᓚᐅᕐᖓᑕ ᑲᑎᒪᔨᖏᑦ ᐃᓚᖓᒡᒎᖅ ᓄᓇᓕᖓᑕ ᓯᕗᓪᓕᐅᖁᓪᓚᕆᑦᑕᖓ ᑖᓐᓇᐅᒻᒪᑦ ᒥᕝᕕᖓᑕ ᐅᐃᒍᔭᐅᒋᐊᕐᓂᖓᑕ ᑭᓪᓕᒋᐊᖅᑕᐅᓂᖓ. ᒥᓂᔅᑕ ᐃᖅᑲᐅᒪᒻᒪᑦ ᑎᑎᖅᑲᐃᑦ ᒪᓕᒐᓕᐅᕐᕕᒻᒨᖅᑕᐅᖃᑦᑕᔪᒻᒪᑕ ᒪᓕᒐᓕᐅᕐᕕᐅᕋᑖᔪᔪᒥ ᐅᖃᐅᓯᖃᖅᑐᑎᒃ ᑐᐊᕕᕐᓇᓕᕐᓂᖓᓂᒃ ᐅᐃᒍᔭᐅᒋᐊᖃᕐᓂᖓ ᓇᐅᔮᑦ ᒥᕝᕕᖓᑕ. ᐅᖃᖅᑏ, ᐱᓕᕆᕕᖓ ᐃᖏᕐᕋᔪᓕᕆᔨᒃᑯᑦ ᐊᐅᓚᔪᓐᓇᐅᑎᓕᕆᔨᒃᑯᓪᓗ 2026-2027−ᒥ ᐊᑭᑐᔪᖅᑐᕈᑎᔅᓴᖏᑦ ᐃᓚᖃᔪᒻᒪᑕ ᑮᓇᐅᓂᒃ ᑎᑎᕋᐅᔭᖅᑕᐅᒍᑎᔅᓴᖏᓐᓂᒡᒎᖅ ᒥᕝᕕᖓᑕ ᐅᐃᒍᔭᐅᓂᔅᓴᖓᓄᑦ. ᒥᓂᔅᑕ ᓇᓗᓇᐃᖅᓯᒍᓐᓇᓕᖅᑲ ᐅᓪᓗᒥ ᖃᓄᐃᓕᖓᓕᕐᒪᖔᑦ ᑖᓐᓇ ᐱᓕᕆᐊᖑᔭᕆᐊᓕᒃ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᖁᔭᓐᓇᒦᒃ. ᐃᖏᕐᕋᔪᓕᕆᔨᒃᑯᑦ ᐊᐅᓚᔪᓐᓇᐅᑎᓕᕆᔨᒃᑯᓐᓄᑦ ᒥᓂᔅᑕ ᕼᐃᒃᔅ. ᐊᖓᔪᖅᑳᖅ ᔪᐊᔾ ᕼᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖁᔭᓐᓇᒦᒃ ᒪᓕᒐᓕᐅᖅᑎ ᐊᐱᕆᒃᑲᓐᓂᕐᖓᑦ. ᐊᐱᖅᑯᑎᖃᒃᑲᓐᓂᕐᖓᑦ ᑖᔅᓱᒥᖓ. ᖃᐅᔨᒪᒐᑦᑕ ᓇᐅᔮᑦ ᒥᕝᕕᖓ ᓇᐃᓛᖑᖃᑕᐅᒻᒪᑦ ᐃᓛᒃ ᓄᓇᕗᒻᒥ. ᐃᓕᓴᕆᔭᕗᓪᓗ ᐅᐃᒍᒋᐊᖃᓛᕋᑦᑎᒍᑦ. ᐊᔾᔨᒌᙱᑦᑐᓂᒃ ᓇᓖᕌᕋᔅᓴᓂᒃ ᕿᒥᕐᕈᒐᑦᑕ ᒫᓐᓇ ᐊᒻᒪᓗ ᑲᔪᖏᒻᒪᕆᑦᑐᖓ ᖃᓄᐃᓕᖓᓕᕐᒪᖔᑦ ᓇᓗᓇᐃᖅᑐᐃᒍᓐᓇᓛᕋᒪ ᓯᕗᓂᕆᓛᖅᑕᑦᑎᓐᓂ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᓯᕗᓪᓕᖅᐹᕐᒥ ᐃᓚᒋᐊᕈᑏᑦ ᐊᐱᕆᒍᒃ, ᒥᔅ ᐊᖑᑎᐊᓗᒃ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 23 ᐊᖑᑎᐊᓗᒃ: ᖁᔭᓐᓇᒦᒃ, ᐅᖃᖅᑎᑦᑎᔩ. (ᑐᓵᔨᑎᒎᓕᖅᑐᖅ) ᑖᓐᓇ ᐃᓱᒫᓘᑎᒋᔭᕋ ᐅᖃᐅᓯᕆᒐᒃᑯ ᒪᓕᒐᓕᐅᕐᕕᐅᑉ ᐅᑭᐅᒃᑯᑦ ᐃᑦᓯᕙᓂᕆᔪᔭᖓᓂ ᒥᓂᔅᑕ ᐅᖃᔪᒻᒪᑦ ᐊᑭᖓᒎᖅ ᐅᐃᒍᔭᐅᑉᐸᑦ ᓇᐅᔮᑦ ᒥᕝᕕᖓ ᒥᔅᓴᐅᓯᔭᐅᓯᒪᒻᒪᑦ ᐊᑭᖃᕋᔭᖅᑐᒋᔭᐅᓪᓗᓂ $30−ᒥᓕᐊᓐᓂᑦ ᐊᒻᒪ $40−ᒥᓂᓕᐊᓐᓂ ᐊᑯᓐᓂᖓᓂ. ᒥᓂᔅᑕ ᓇᓗᓇᐃᖅᓯᒍᓐᓇᖅᐸ ᑖᓐᓇ ᐱᓕᕆᐊᔅᓴᐅᔪᖅ ᑮᓇᐅᔭᖃᖅᑎᑕᐅᒍᓐᓇᓛᕐᒪᖔᑦ ᓄᑖᖑᔪᓂᑦ ᒐᕙᒪᑐᖃᒃᑯᓐᓂ ᐅᑭᐅᖅᑕᖅᑐᒥ ᐱᖁᑎᕐᔪᐊᓕᐅᕈᑎᔅᓴᓂᒃ ᑮᓇᐅᔭᓂᒃ? ᖁᔭᓐᓇᒥᒃ, ᐅᖃᖅᑏ. ᐅᖃᖅᑎ: ᖁᔭᓐᓇᒦᒃ. ᐃᖏᕐᕋᔪᓕᕆᔨᒃᑯᑦ ᐊᐅᓚᔪᓐᓇᐅᑎᓕᕆᔨᒃᑯᓐᓄᑦ ᒥᓂᔅᑕ ᕼᐃᒃᔅ. ᐊᖓᔪᖅᑳᖅ ᔪᐊᔾ ᕼᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖁᔭᓐᓇᒦᓪᓗ ᑲᑎᒪᔨ ᑖᔅᓱᒥᖓ ᐊᐱᖅᓱᖃᑦᑕᕐᖓᑦ. ᐅᖃᖅᑏ, ᓈᓴᐅᑏ ᐱᔪᔭᒃᑲ ᒥᔅᓴᐅᓯᓯᒪᑐᐃᓐᓇᔪᒐᑦᑎᒍᑦ ᐊᑭᒋᔪᓐᓇᖅᑕᖓᓂᒃ ᑕᑯᓐᓈᑎᑦᑎᓂᖅ ᐅᖃᐅᓯᖃᑐᐃᓐᓇᔪᒐᒪ. ᐊᔾᔨᒌᙱᑦᑐᓂᒃ ᒐᕙᒪᑐᖃᒃᑯᑦ ᐱᓕᕆᔾᔪᑎᖏᓐᓂᒃ ᑕᑯᓐᓈᖏᓐᓇᐸᑦᑐᒍᑦ ᐱᕕᒋᔪᓐᓇᙱᒃᑲᓗᐊᕐᒪᖔᑎᒍᑦ ᐊᒻᒪᓗ ᐊᑐᐃᓐᓇᕈᖅᑐᖃᕋᐃᒻᒪᑦ ᑕᐃᒪᐃᑦᑐᓂᒃ ᐱᒐᓱᐊᓲᖑᔪᒍᑦ. ᑖᓐᓇᑦᑕᐅᖅ ᓈᒻᒪᓯᓯᐊᕆᒍᑦᑎᒍᑦ ᒐᕙᒪᑐᖃᒃᑯᑦ ᑮᓇᐅᔭᓂᒃ ᑕᐃᒪᐃᓕᐅᕈᑎᔅᓴᓂᒃ ᐊᑐᐃᓐᓇᖃᓕᕐᒥᑉᐸᑕ ᐊᒻᒪ ᑐᓴᖅᑕᐅᑎᑦᑎᔾᔪᑎᖃᕈᒪᓛᖅᑐᖓ ᓯᕗᓂᑦᑎᐊᑦᑎᓐᓂ ᑖᔅᓱᒥᖓ ᐱᔾᔪᑎᖃᖅᑐᒥᒃ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᑐᒡᓕᐊᓂ ᐊᒻᒪᓗ ᑭᖑᓪᓕᖅᐹᖅ ᐃᓚᒋᐊᕈᑏᑦ ᐊᐱᕆᒍᒃ, ᒥᔅ ᐊᖑᑎᐊᓗᒃ. ᐊᖑᑎᐊᓗᒃ: ᖁᔭᓐᓇᒦᒃ, ᐅᖃᖅᑎᑦᑎᔩ. (ᑐᓵᔨᑎᒎᓕᖅᑐᖅ) ᐱᓕᕆᕕᖓᑕ ᐃᖏᕐᕋᔪᓕᕆᔨᒃᑯᑦ ᐊᐅᓚᔪᓐᓇᐅᑎᓕᕆᔨᒃᑯᑦ 2026-2027−ᒥ ᑮᓇᐅᔭᖅᑐᕈᑎᔅᓴᖏᑦ ᐊᑭᑐᔪᖅᑐᕈᑎᔅᓴᖏᑦ ᐃᓚᖃᔪᒻᒪᑕ ᑮᓇᐅᓂᒃ ᓴᓇᔭᐅᓂᔅᓴᖓᓄᑦ. ᐊᐅᓪᓚᕆᐊᖅᑐᕐᕕᐅᑉ ᓴᓂᐊᓂ ᖃᖓᑕᓲᑦ ᓄᖅᑲᖓᕕᖓᓂ ᐊᒻᒪᓗᑦᑕᐅᖅ ᐊᓯᓐᓂᑦᑕᐅᓗᓂ ᐅᖅᓱᐊᓗᖃᐅᑎᖓ. ᒥᓂᔅᑕ ᓇᓗᓇᐃᖅᓯᒍᓐᓇᓕᖅᑲ ᐅᓪᓗᒥ ᖃᓄᐃᓕᖓᓕᕐᒪᖔᑕ ᓴᓇᓂᐅᒐᔭᖅᑐᐃᑦ ᖃᖓᑕᓲᓄᑦ ᓄᖅᑲᕕᐅᒐᔭᖅᑐᒥ ᐊᒻᒪ ᐅᖅᓱᐊᓗᖃᐅᑎᖏᑦ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐃᖏᕐᕋᔪᓕᕆᔨᒃᑯᑦ ᐊᐅᓚᔪᓐᓇᐅᑎᓕᕆᔨᒃᑯᓐᓄᓪᓗ ᒥᓂᔅᑕ, ᒥᓂᔅᑕ ᕼᐃᒃ. ᐊᖓᔪᖅᑳᖅ ᔪᐊᔾ ᕼᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐅᖃᖅᑏ, ᑕᐃᒃᑯᐊ ᖃᖓᑕᓲᑦ ᓄᖅᑲᖓᕕᖏᑦ ᐊᑭᑐᔪᓂᒃ ᐸᕐᓇᐅᑎᓕᕆᑎᓪᓗᑕ ᑳᓐᑐᕌᒃ ᐱᒐᓱᐊᕋᔅᓴᐅᓗᒍ ᓴᖅᑭᕐᓂᐊᓕᖅᑕᕗᑦ ᐊᐅᔭᐅᓂᐊᖅᑐᖅ ᐊᒻᒪ ᓇᐅᔮᓕᕆᔪᐃᑦ ᒪᑉᐱᖅᓯᒪᕋᑖᕋᒃᑭᑦ ᑖᓐᓇ ᑭᖑᓂᐊᒍᑦ ᑐᓂᒋᐊᖃᕐᓂᐊᖅᑕᕋ ᒪᓕᒐᓕᐅᖅᑎᒧᑦ ᓇᓂᓯᒪᓕᕈᒃᑭᑦ ᑭᐅᔾᔪᑎᒃᑲ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᖁᔭᓐᓇᒦᒃ. ᑲᑎᒪᔾᔪᑎᑦᑎᓐᓄᑦ ᑲᔪᓯᒋᐊᕐᓗᑕ. ᓈᓴᐅᑎᖓ 7, ᑎᑎᖅᑲᑎᒍᑦ ᐊᐱᖅᑯᑏᑦ. 8, ᑎᑎᖅᑲᑎᒍᑦ ᐊᐱᖅᑯᑎᕕᓂᕐᓄᑦ ᑭᐅᔾᔪᑏᑦ. 9, ᒪᑐᐃᖅᓯᔾᔪᑎᓄᑦ ᑭᐅᔾᔪᑏᑦ. 10, ᑮᓇᐅᔭᖅᑑᑎᒃᓴᓄᑦ ᑭᐅᔾᔪᑏᑦ. 11, ᐊᑎᓕᖅᓯᒪᔪᑎᒍᑦ ᑐᑦᓯᕋᐅᑏᑦ. 12, ᐊᑎᓕᐅᖅᓯᒪᔪᑎᒍᑦ ᑐᑦᓯᕋᐅᑎᓄᑦ ᑭᐅᔾᔪᑏᑦ. 13, ᑲᑎᒪᔨᕋᓛᑦ ᑲᑎᒪᔨᕋᓛᖑᑲᐃᓐᓇᖅᑐᓪᓗ ᐅᓂᒃᑳᖏᑦ ᕿᒥᕐᕈᓇᓚᐅᖅᑎᓪᓗᒋᑦ ᐱᖁᔭᑦᓴᓂᒃ ᐊᓯᖏᓐᓂᓪᓗ. 14, ᑎᑎᖅᑲᐃᑦ ᓴᖅᑭᑕᐅᓂᖏᑦ. 15, ᐱᖁᔨᕗᖔᕐᓂᐊᕐᓂᕐᒧᑦ ᖃᐅᔨᒃᑲᐃᔾᔪᑏᑦ. 16, ᐱᖁᔨᕗᖔᕐᓂᐊᕐᓂᕐᒧᑦ ᖃᐅᔨᒃᑲᐃᔾᔪᑏᑦ ᓯᕗᓪᓕᖅᐹᕐᒥ ᐅᖃᓕᒫᖅᑕᐅᓂᖏᑦ ᐱᖁᔭᒃᓴᑦ. 17, ᐱᖁᔨᕗᖔᕈᑏᑦ. 18, ᓯᕗᓪᓕᖅᐹᕐᒥ ᐅᖃᓕᒫᖅᑕᐅᓂᖏᑦ ᐱᖁᔭᒃᓴᑦ. 19, ᑐᒡᓕᐊᓂ ᐅᖃᓕᒫᖅᑕᐅᓂᖏᑦ ᐱᖁᔭᒃᓴᑦ. ᑮᓇᐅᔭᓕᕆᔨᒃᑯᓐᓄᑦ ᒥᓂᔅᑕ, ᒥᔅᑕ ᒪᐃᓐ. ᑲᑎᒪᔾᔪᑎᒃᓴᖅ 19: ᑐᒡᓕᐊᓂ ᐅᖃᓕᒫᖅᑕᐅᓂᖏᑦ ᒪᓕᒐᒃᓴᑦ ᒪᓕᒐᒃᓴᖅ 2 - ᑮᓇᐃᔭᑦ ᐊᑐᖅᑕᐅᑲᐃᓐᓇᕐᓂᐊᖅᑐᑦ (ᐊᑭᑐᔫᑎᓄᑦ) ᒪᓕᒐᖅ, ᓇᐄᓴᐅᑖ 1, 2026-2027- ᑐᒡᓕᐊᓂ ᐅᖃᓕᒫᖅᑕᐅᓂᖓ

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 24 ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ ᐅᖃᖅᑎᑦᓯᔩ. (ᑐᓵᔨᑎᒎᓕᖅᑐᖅ) ᐱᒋᐊᖅᑎᑦᑎᕗᖓ ᐊᐃᑉᐱᖅᑕᐅᓪᓗᖓ ᐃᖃᓗᐃᑦ ᑕᓯᓗᒃ ᐸᓕᒐᓕᐅᖅᑎᖓᓄᑦ ᐱᖁᔭᔅᓴᖅ 2. ᑮᓇᐅᔭᓂᒃ ᐃᓕᒐᐊᖅᓯᒍᒪᔾᔪᓰᑦ ᐊᑭᑐᔪᖅᑐᕈᑎᔅᓴᓄᑦ #1 2026-2027 ᐊᐃᑉᐹᓂ ᐅᖃᓕᒫᖅᑕᐅᖁᓪᓗᒍ. ᐅᖃᖅᑎᑦᑎᔩ, ᑖᓐᓇ ᑮᓇᐅᔭᓂᒃ ᐃᓚᒋᐊᖅᓯᒍᑎᐅᓂᐊᖅᑐᖅ ᐊᑭᑐᔪᖅᑐᕈᑎᓄᑦ ᐃᓱᓕᕝᕕᖃᖅᑐᓄᑦ ᒫᑦᓯ 31, 2027. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐱᖁᔨᕗᖔᕈᑦ ᓈᒻᒪᒃᑐᖅ. ᐱᖁᔨᕗᖔᕈᒻᒧᑦ. ᓈᒻᒪᒃᓴᖅᑐᑦ. ᓈᒻᒪᒃᓴᙱᑦᑐᑦ. ᐱᖁᔨᕗᖔᕈᑦ ᑲᔪᓯᕗᖅ ᐊᒻᒪᓗ ᑖᓐᓇ ᐱᖁᔭᒃᓴᖅ 2, ᑲᑎᒪᑐᐃᓐᓇᖅᑐᓄᑦ ᑐᓂᔭᐅᒍᓐᓇᖅᓯᕗᖅ. ᑐᒡᓕᐊᓂ ᐅᖃᓕᒫᖅᑕᐅᓂᖏᑦ ᐱᖁᔭᒃᓴᑦ. ᒪᓕᒐᓕᕆᔨᒃᑯᑦ ᒥᓂᔅᑕᖓ, ᒥᓂᔅᑕ ᕼᐃᒃᔅ. ᒪᓕᒐᒃᓴᖅ 3 - ᐊᔾᔨᒌᖏᑦᑐᓄᑦ ᒪᓕᒐᐅᔪᓄᑦ ᐋᖅᑭᒋᐊᕈᑎᖏᓄᑦ ᒪᓕᒐᖅ - ᑐᒡᓕᐊᓂ ᐅᖃᓕᒫᖅᑕᐅᓂᖓ ᐊᖓᔪᖅᑳᖅ ᔪᐊᔾ ᕼᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐅᖃᖅᑏ, ᐱᒋᐊᖅᑎᑦᑎᕗᖓ ᐊᐃᑉᐱᖅᑕᐅᓪᓗᖓ ᒪᓕᒐᓕᐅᖅᑎᐅᔪᒧᑦ ᑲᖏᖅᓯᓂᐅᑉ ᓂᒋᐊᓄᑦ. ᐱᖁᔭᒃᓴᖅ 3, ᐊᔾᔨᒌᙱᑦᑐᓄᑦ ᒪᓕᒐᕈᓘᔭᕐᓄᑦ ᐋᖅᑭᒋᐊᖅᓯᓂᕐᒧᑦ ᐱᖁᔭᕐᔪᐊᖑᔪᖅ. ᑖᓐᓇ ᐱᖁᔭᖅ ᐊᓯᔾᔩᓂᐊᖅᑐᖅ ᐱᖁᔭᕐᓂᒃ. ᖃᕆᓴᐅᔭᒃᑯᑦ ᓴᖅᑭᖅᑕᐅᓪᓗᓂ ᖃᕆᓴᐅᔭᓕᕆᔾᔪᑎᓂᒃ ᖃᕆᓴᐅᓄᑦ ᐃᓯᕈᑎᓂᒃ ᐊᒻᒪᓗᑦᑕᐅᖅ ᐋᖅᑭᒋᐊᖅᓯᔾᔪᑕᐅᓗᓂ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᖁᔭᓐᓇᒦᑦᑕᐅᖅ. ᐱᖁᔨᕗᖔᕈᑦ ᓈᒻᒪᒃᑐᖅ. ᐱᖁᔨᕗᖔᕈᒻᒧᑦ ᓂᕈᐊᖅ, ᓈᒻᒪᒃᓴᖅᑐᑦ. ᓈᒻᒪᒃᓴᙱᑦᑐᑦ. ᐱᖁᔨᕗᖔᕈᑦ ᑲᔪᓯᒋᕗᖅ, ᑖᓐᓇᓗ ᐱᖁᔭᒃᓴᖅ 3, ᑲᑎᒪᔨᕋᓛᑦ ᒪᓕᒐᓕᕆᔨᓂᒃ ᕿᒥᕐᕈᔨᓅᖅᑕᐅᓂᐊᓕᖅᑐᖅ. ᑐᒡᓕᐊᓂ ᐅᖃᓕᒫᖅᑕᐅᓂᖏᑦ ᐱᖁᔭᒃᓴᑦ. ᒥᓂᔅᑕ ᑮᓇᐅᓕᕆᓂᕐᒧᑦ, ᒥᓂᔅᑕ ᒪᐃᓐ. ᒪᓕᒐᒃᓴᖅ 4 - ᒪᓕᒐᖅ ᐋᖅᑭᒋᐊᕈᔾᔪᑎᐊ ᑮᓇᐅᔭᓕᐊᓄᑦ ᐃᓐᓇ ᑖᒃᓯᒧᑦ ᒪᓕᒐᖅ - ᑐᒡᓕᐊᓂ ᐅᖃᓕᒫᖅᑕᐅᓂᖓ ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐅᖃᖅᑎᑦᓯᔩ. (ᑐᓵᔨᑎᒎᓕᖅᑐᖅ) ᐱᒋᐊᖅᑎᑦᑎᕗᖓ ᐊᐃᑉᐱᖅᑕᐅᓪᓗᖓ ᒪᓕᒐᓕᐅᖅᑎᐅᔪᒧᑦ ᐃᖃᓗᐃᑦ ᑕᓯᓗᒻᒧᑦ. ᐱᖁᔭᔅᓴᖅ 4, ᐋᖅᑭᒋᐊᖅᓯᔾᔪᑎᐅᔪᖅ ᐃᖅᑲᓇᐃᔮᓂᒃ ᑮᓇᐅᔾᔭᔅᓴᓄᑦ ᐱᖁᔭᕐᔪᐊᖓᓂ ᑖᒃᓰᔭᐃᔭᕐᓂᕐᒧᑦ. ᑖᓐᓇ ᐱᖁᔭᔅᓴᖅ ᐊᓯᔾᔩᕗᖅ ᑖᒃᓰᔭᐃᔭᕐᓂᕐᒧᑦ ᐱᖁᔭᕐᔪᐊᖓᓂᒃ ᐊᖏᓪᓕᕆᐊᓕᕆᓪᓗᓂ ᓱᕈᓯᕐᓄᑦ ᑐᕌᖅᐸᑦᑐᓂᒃ ᐊᒻᒪ ᑭᓱᕈᓘᔭᐃᑦ ᐊᑭᖏᓐᓂᒃ ᒪᓕᔅᓴᕆᐊᖅᑎᑕᐅᓪᓗᓂ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ (ᑐᓵᔨᑎᒍᑦ): ᐱᖁᔨᕗᖔᕈᑎ ᓈᒻᒪᑦᑐᖅ. ᐱᖁᔨᕗᕌᕈᒻᒧᑦ, ᓈᒻᒪᓴᖅᑐᐃᑦ. ᐊᑭᕋᖅᑐᖅᑐᐃᑦ. ᐱᖁᔨᕗᖔᕈᑎ ᑲᔪᓯᔪᖅ. ᐱᖁᔭᔅᓴᖅ 4, ᑲᑎᒪᔨᕋᓛᓄᑦ ᒪᓕᒐᓕᕆᓂᕐᒧᑦ ᑐᓂᔭᐅᒍᓐᓇᖅᓯᕗᖅ. ᓈᓴᐅᑎᓕᒃ 20, ᐃᓱᒪᔅᓴᖅᓯᐅᕈᑎᖃᕐᓂᖅ ᑲᑎᒪᑐᐃᓐᓇᓂᕐᓂᒃ ᐱᖁᔭᔅᓴᕐᓂᒃ ᐊᓯᖏᓐᓂᓗ. ᐱᒋᐊᓚᐅᙱᓐᓂᑦᑎᓐᓂ ᑲᑎᒪᑐᐃᓐᓇᓂᕐᒥᒃ 20−ᒥᓂᑦ ᓄᖅᑲᖓᑲᐃᓐᓇᙳᓱᑦᑐᒍᑦ. ᐃᖅᓱᖅᑏ. >> ᓄᖅᑲᖓᑲᐃᓐᓇᖅᑐᑦ) 15:00 ᐊᒻᒪᓗ ᑲᑎᒪᑐᐃᓐᓇᕐᓂᖅ ᐱᒋᐊᖅᑐᖅ 15:31 ᑲᑎᒪᔾᔪᑎᒃᓴᖅ 20: ᑲᑎᒪᔨᕋᓛᑦ ᑕᒪᐃᓐᓄᑦ ᒪᓕᒐᒃᓴᓄᑦ ᐊᓯᖏᓐᓂᓪᓗ ᐃᓱᒪᖅᓴᖅᓯᐅᕐᓂᖏᑦ ᐃᒃᓯᕙᐅᑕᖅ (ᒥᔅᑕ ᔭᐃᒥ ᖃᑉᓗᑦᓯᐊᖅ): ᐅᑉᓗᑦᓯᐊᖅ, ᓄᓇᕗᒻᒥᐅᑦ. ᐅᑎᖅᓯᒪᓕᕐᒥᔪᒍᑦ ᑲᑎᒪᔨᑦ. (ᑐᓵᔨᑎᒎᓕᖅᑐᖅ) ᑖᒃᑯᐊ ᑲᑎᒪᔨᕋᓛᑦ ᑲᑎᒪᑐᐃᓐᓇᓂᕐᒥᒃ ᒪᑐᐃᖁᓕᖅᐸᕋ. ᑲᑎᒪᑐᐃᓐᓇᖅᑎᓪᓗᑕ ᐅᑯᓂᖓ ᐱᓕᕆᐊᒃᓴᖃᖅᐳᒍᑦ, ᒪᓕᒐᒃᓴᖅ 1 ᐊᒻᒪ ᒪᓕᒐᒃᓴᖅ 2. ᖃᓄᐃᓕᐅᕈᒪᕙᑦ ᑲᑎᒪᔨᕋᓛᑦ? ᒥᔅᑕ ᑕᖅᑐ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 25 ᑕᖅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᑲᑎᒪᔾᔪᑎᖃᕈᒪᔪᒍᑦ ᑲᑎᒪᔾᔪᑎᖃᕐᓗᑕ ᒪᓕᒐᒃᓴᖅ 1-ᒥ, ᑮᓇᐅᔭᖅᑐᕈᑎᒃᓴᐃᑦ (ᐊᐅᓚᔾᔪᑏᑦ ᐋᖅᑭᐅᒪᐃᓐᓇᕈᑏᓪᓗ) ᐱᖁᔭᕐᔪᐊᖅ, 2026-2027, ᐊᒻᒪᓗᑦᑕᐅᖅ 2026-2027 ᐊᐅᓚᔾᔪᑎᓄᑦ ᐊᑐᕈᒫᖅᑕᖏᑦ ᐃᓕᓐᓂᐊᖅᑐᓕᕆᔨᒃᑯᑦ. ᐱᕕᖃᕈᑦᑕ, ᐊᐃᑉᐸᖓᓅᕐᓂᐊᖅᑐᒍᑦ 2026-2027-ᒥ ᐊᐅᓚᔾᔪᑎᓄᑦ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᓐᓄᑦ ᐱᕕᖃᕈᑦᑕ. ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᐊᖏᖃᑎᒌᑉᐱᑕ ᐱᓕᕆᐊᕆᖅᑳᕐᓂᐊᕋᑦᑎᒍ ᒪᓕᒐᒃᓴᖅ 1? ᐃᓚᖏᑦ ᑲᑎᒪᔩᑦ: ᐊᖏᖅᑐᑦ. ᒪᓕᒐᒃᓴᖅ 1 - ᑮᓇᐅᔭᖅᑐᕈᑎᔅᓴᐃᑦ (ᐊᐅᓚᔾᔪᑎᓄᑦ ᐋᖅᑭᐅᒪᐃᓐᓇᕈᑎᓄᓪᓗ) ᐱᖁᔭᕐᔪᐊᖅ, 2026-2027 - ᑲᑎᒪᔨᕋᓛᑦ ᐃᓱᒪᖅᓴᖅᓯᐅᕐᓂᖏᑦ ᐃᒃᓯᕙᐅᑕᖅ (ᑐᓵᔨᑎᒍᑦ): ᐊᐱᕆᔪᒪᔭᕋ ᒥᓂᔅᑕ ᒪᐃᓐ ᑕᑉᐸᐅᖓᖃᑎᖃᕈᒪᕖᑦ ᑲᑎᒪᔨᕋᓛᑦ ᓵᖓᓄᑦ ᐃᖅᑲᓇᐃᔭᖅᑎᓂ? ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. ᐄ’. ᒪ’ᓇ. ᐃᒃᓯᕙᐅᑕᖅ (ᑐᓵᔨᑎᒍᑦ): ᑲᑎᒪᔨᕋᓛᑦ ᐊᖏᖅᐸᑦ ᐃᓯᖅᑎᑕᐅᔪᓐᓇᕐᒪᖔᑕ ᐃᖅᑲᓇᐃᔭᖅᑎᖏᑦ ᒥᓂᔅᑕᐅᑉ? ᐃᓚᖏᑦ ᑲᑎᒪᔩᑦ: ᐊᖏᖅᑐᑦ. ᐃᒃᓯᕙᐅᑕᖅ (ᑐᓵᔨᑎᒍᑦ): ᐃᖅᓱᖅᑏ, ᐅᑯᐊ ᐃᓯᖅᑎᓚᐅᒃᑭᑦ. ᓂᐱᓕᐅᖅᓯᒪᓂᐊᕐᒪᑦ, ᒥᓂᔅᑕ ᒪᐃᓐ, ᑭᓇᒃᑰᒻᒪᖔᑕ ᐃᖅᑲᓇᐃᔭᖅᑎᑎ ᑕᐃᑲᐃᓐᓇᒃᑭ ᐊᒻᒪᓗ ᒪᑐᐃᕈᑎᓐᓄᐊᓂᐊᖅᐳᑎᑦ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᐅᓪᓗᒥ ᐱᖃᑎᒋᔭᒃᑲ ᑖᒃᑯᐊ ᕇᐱᑲ ᕼᐊᐃᓐᓄ, ᑐᖏᓕᖓ ᒥᓂᔅᑕᐅᑉ; ᐊᒻᒪᓗ ᒪᑎᐅ ᓘᔅᒧᐊ, ᐱᓕᕆᕕᖕᒥ ᑮᓇᐅᔭᓕᕆᔨᓕ. (ᑐᓵᔨᑎᒎᕈᓐᓃᖅᑐᖅ) ᓯᕗᓪᓕᖅᐹᒥ ᐃᖅᑲᐅᒪᒃᖢᒍ ᒥᓂᔅᑕ ᐊᕿᐊᕈᖅ, ᑕᒫᓃᓐᓂ ᐊᔪᕐᒪᑦ ᑕᒫᓃᔾᔪᑎᒐᒃᑯ ᐃᓚᖏᓪᓗ ᐃᖅᑲᐅᒪᖦᖢᒋᑦ. (ᑐᓵᔨᑎᒎᓕᑐᖅ) ᐃᒃᓯᕙᐅᑖᖅ, ᖁᕕᐊᓱᒃᐳᖓ ᐃᓕᔅᓯᓐᓄᑦ ᐅᐸᒍᑎᔪᓐᓇᕋᒪ ᑲᑎᒪᔨᕋᓛᓄᓪᓗ ᐅᓪᓗᒥ ᐅᖃᐅᓯᖃᕐᓂᐊᕐᓗᖓ ᐃᓕᓐᓂᐊᕐᓂᓕᕆᔨᒃᑯᓐᓂ ᑐᒃᓯᕋᐅᑕᐅᔪᒥᒃ ᑮᓇᐅᔭᖅᑑᑎᒃᓴᓂᒃ. 2026-27 ᑮᓇᐅᔭᓕᕆᓂᕐᒧᑦ ᐊᕐᕌᒍᒧᑦ, ᐱᓕᕆᕝᕕᒃ ᑐᒃᓯᕋᖅᑐᖅ ᑲᑎᖦᖢᒋᑦ $309,853,000 ᐊᐅᓚᔾᔪᑎᓄᑦ ᐋᖅᑭᐅᒪᔾᔪᑎᓄᓪᓗ ᑮᓇᐅᔭᓂᑦ. ᑖᓐᓇ ᑭᒡᒐᖅᑐᐃᔪᖅ ᐅᓄᖅᓯᒋᐊᖅᓯᒪᓪᓗᓂ $20,308,000-ᓂᒃ 2025-26-ᒥ ᑮᓇᐅᔭᑦ ᐊᑐᖅᑐᒃᓴᓂᒃ. ᑖᒃᑯᓇᙵᑦ ᐅᓄᖅᓯᒋᐊᕈᑎᓂᒃ, $6,118,000 ᐱᔭᕆᐊᖃᕐᓂᐊᖅᑐᑦ ᐃᑲᔪᖅᓱᐃᓂᕐᒧᑦ ᓄᑖᒧᑦ ᓄᓇᕗᒻᒥ ᐃᓕᓴᐃᔩᑦ ᑲᑐᔾᔨᖃᑎᒌᖏᓐᓄᑦ ᐊᖏᖃᑎᒌᒍᑎᒧᑦ, ᐊᒻᒪᓗ $2,190,000 ᐱᔭᕆᐊᖃᖅᑐᑦ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑕ ᐊᖏᖃᑎᒌᒍᑎᖓᓄᑦ. ᑖᒃᑯᐊ ᐋᖅᑭᒋᐊᖅᑕᐅᔪᑦ ᐃᓕᓴᐃᔨᑦ, ᐃᑲᔪᖅᑎᑦ ᐃᖅᑲᓇᐃᔭᖅᑎᑦ, ᐊᒻᒪ ᐱᓕᕆᕝᕕᖕᒥ ᐃᖅᑲᓇᐃᔭᖅᑎᑦ ᐊᑭᓕᖅᓱᖅᑕᐅᑦᑎᐊᕐᓂᖏᓐᓂᒃ ᐱᓇᔪᖃᑕᐅᖏᓐᓇᕈᓐᓇᖁᓪᓗᑕ ᐃᖅᑲᓇᐃᔭᕐᕕᐅᔪᓐᓇᕐᓗᑕ, ᐃᓕᓐᓂᐊᕐᕕᕗᓪᓗ ᐃᖏᕐᕋᑦᑎᐊᖏᓐᓇᕐᓗᑎᒃ ᐃᖅᑲᓇᐃᔭᖅᑎᖃᑦᑎᐊᕐᓗᑎᒡᓗ. ᐊᖏᓛᖅ ᐊᑕᐅᓯᖅ ᐅᓄᖅᓯᒋᐊᕈᑎ ᐃᓕᓐᓂᐊᕐᓂᓕᕆᔨᒃᑯᑦ ᑮᓇᐅᔭᖅᑐᕈᑎᒃᓴᖏᓐᓂ $12,000,000 ᐱᐅᓯᒋᐊᕈᑎ ᓄᓇᕗᒻᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᑦ (FANS) ᐱᓕᕆᐊᒃᓴᒧᑦ. ᑖᓐᓇ ᑮᓇᐅᔭᓕᐅᕈᑕᐅᓇᓱᒃᑐᖅ ᐅᓄᖅᓯᒋᐊᖅᑎᑦᑎᕗᖅ ᑮᓇᐅᔭᖁᑎᒋᔭᐅᔪᓂᒃ ᐃᓕᓐᓂᐊᖅᑎᓄᑦ ᐊᑐᐃᓐᓇᐅᔪᓂᒃ ᑐᓗᖅᑕᕈᑕᐅᕙᒃᑐᑦ ᐲᔭᕈᒪᓪᓗᒋᑦ ᓯᓚᑦᑐᖅᓴᕐᕕᖕᒧᑦ ᐃᓕᓐᓂᐊᖃᑦᑕᖅᑐᑦ, ᖃᓄᐃᓕᐅᕈᑕᐅᓪᓗᓂᓗ ᐅᓄᖅᓯᕙᓪᓕᐊᔪᑦ ᐱᔭᐅᔪᒪᕙᒃᑐᑦ

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 26 ᐱᓕᒻᒪᒃᓴᕈᒪᔪᑦ, ᐊᔪᕈᓐᓃᖅᓴᖅᐸᓪᓕᐊᔪᒪᔪᓪᓗ. ᐃᑲᔪᖅᑐᐃᓂᖅ ᐃᓐᓇᕐᓂᒃ ᐃᓕᓐᓂᐊᖅᑐᓂᒃ ᐱᒻᒪᕆᐊᓘᕗᖅ ᐱᕙᓪᓕᐊᖁᓪᓗᒋᑦ ᓄᓇᕗᒻᒥ ᓯᕗᓂᒃᓴᒥ ᐃᖅᑲᓇᐃᔭᖅᑎᐅᓛᖅᑐᑦ. ᐃᒃᓯᕙᐅᑖᖅ, ᐱᓕᕆᕝᕕᒋᔭᐅᔪᖅ ᖃᔅᓯᑲᓪᓚᖕᓂᒃ ᐱᒻᒪᕆᐅᔪᓂᒃ ᐃᖅᑲᓇᐃᔭᕐᕕᖕᒥᓂ ᓴᓂᕐᕙᐃᕙᓪᓕᐊᒋᕗᑦ ᑮᓇᐅᔭᖁᑎᒋᔭᐅᔪᑦ ᐊᑕᐅᑦᑎᒃᑰᖃᑎᖃᑦᑎᐊᖁᓪᓗᒋᑦ ᐱᓕᕆᐊᒃᓴᓄᑦ ᐱᔭᐅᔭᕆᐊᓕᖕᓄᑦ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓕᒫᓂᑦ. ᑕᒪᓐᓇ ᐃᓚᖃᖅᐳᖅ ᐊᓯᔾᔨᖅᑎᕆᓂᕐᒥᒃ $4,000,000−ᓂᒃ ᐃᓕᓐᓂᐊᓕᒻᒪᒃᓴᔪᓕᕆᓂᕐᒧᑦ ᓄᑕᖅᑲᓪᓗ ᑲᒪᒋᔭᐅᕙᖕᓂᖏᓐᓄᑦ ᐊᖏᒡᓕᒋᐊᖅᑎᑦᑎᔪᒪᓂᕐᒧᑦ ᑮᓇᐅᔭᖁᑎᒋᔭᐅᓂᐊᖅᑐᓂᒃ ᓚᐃᓴᖃᖅᑐᓄᑦ ᐸᐃᕆᕝᕕᖕᓄᑦ ᐃᑲᔪᕈᒪᓂᕐᒧᓪᓗ ᓇᓕᒧᒌᓕᖅᑎᑦᑎᓂᕐᒥᒃ ᐱᔨᑦᑎᕋᕐᓂᕆᔭᐅᕙᒃᑐᓂᒃ ᐃᓚᒌᓄᑦ. ᐱᓕᕆᕝᕕᒋᔭᐅᔪᖅ ᐱᑎᑦᑎᓂᐊᕆᕗᖅ $2,700,000−ᓂᒃ ᖄᒃᑲᓐᓂᐊᒍᑦ ᑮᓇᐅᔭᖁᑎᒋᔭᐅᓂᐊᖅᑐᓂᒃ ᐱᓕᕆᕝᕕᒋᔭᑦᑎᓐᓄᑦ ᐱᓕᕆᕝᕕᒋᕙᒃᑕᑦᑎᓐᓄᑦ ᑭᐅᓯᔪᒪᓪᓗᑎᒃ ᑮᓇᐅᔭᖁᑎᒋᔭᐅᔪᓂᒃ ᐱᑕᖃᙱᓐᓂᕆᔭᐅᔪᓂᒃ ᐊᒃᑐᐊᓂᓕᖕᓂᒃ ᐃᑭᑎᑦᑎᑦᑕᐃᓕᒪᓂᕐᒧᑦ ᐃᓕᓐᓂᐊᕐᕕᑦᑎᓐᓂ, ᐅᓄᖅᓯᒋᐊᖅᓯᒪᔪᓂᒃ ᐊᐅᓚᑦᑎᓂᕐᒧᑦ ᐱᔨᑦᑎᕋᕐᕕᖃᕐᓂᕐᒧᓪᓗ ᐊᑭᒋᔭᐅᔪᓄᑦ, ᐃᑲᔪᖅᑐᐃᔪᒪᓂᕐᒧᓪᓗ ᓄᑖᒥᒃ ᓄᓇᕘᓕᒫᒥ ᓴᓗᒻᒪᖅᓴᐃᔨᓄᑦ ᓴᓗᒻᒪᖅᓴᐅᑎᓂᒃ ᐊᔪᕈᓐᓃᖅᓴᖅᑎᑦᑎᓂᕐᒧᓪᓗ ᑳᓐᑐᓛᒋᔭᐅᔪᒥᒃ. ᖄᒃᑲᓐᓂᐊᒍᑦ, $260,000 ᓴᓂᕐᕙᒃᑕᐅᓯᒪᖕᒥᔪᑦ ᐃᑲᔪᖅᑐᐃᔾᔪᑕᐅᓂᐊᖅᖢᑎᒃ ᐅᖃᐅᓯᓕᕆᓂᕐᒧᑦ ᑲᑎᒪᔨᕋᓛᓂᒃ ᑕᒪᐃᓐᓄᑦ 26-ᖑᔪᓄᑦ ᓄᓇᓕᖕᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ, ᖃᐅᔨᒪᓇᑦᑎᐊᖁᓪᓗᒍ ᐱᓕᕆᔾᔪᑎᖃᑦᑎᐊᕋᓗᐊᕐᒪᖔᑕ ᐱᔭᕆᐊᖃᖅᑕᖏᓐᓂᒃ ᐱᓕᕆᐊᒃᓴᖏᓐᓂᒃ ᐱᓕᕆᐊᖃᕐᓂᐊᕐᓗᑎᒃ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᕐᒥᑦ ᐊᒻᒪ ᓄᑖᒥ ᐅᖃᐅᓯᖅ ᐃᓕᓴᐃᔾᔪᑕᐅᔪᒧᑦ ᐊᑐᐊᒐᐃᑦ. 2026-27−ᒥ, ᐃᓕᓐᓂᐊᕐᓂᓕᕆᔨᒃᑯᑦ ᐋᖅᑭᒃᓱᐃᒃᑲᓐᓂᕐᓂᐊᕆᕗᑦ ᑮᓇᐅᔭᖁᑎᖏᓐᓂᒃ ᓯᕗᓕᖅᑎᑦᑎᐊᕙᐅᓕᒃᑲᓐᓂᖁᓪᓗᒋᑦ ᐃᑲᔪᖅᑐᐃᓗᑎᒡᓗ ᐊᑐᓕᖅᑎᑕᐅᔪᒥᑦ ᒪᕐᕉᖕᓂᒃ ᐅᖃᐅᓯᓕᖕᓄᑦ ᐃᓕᓐᓂᐊᖅᑎᑦᑎᓂᕐᒥᒃ ᓄᑖᓂᒡᓗ ᐃᓕᓐᓂᐊᕐᕕᖕᓄᑦ ᒪᑭᒪᔾᔪᑎᓂᑦ. ᑕᒪᓐᓇ ᐃᓚᖃᖅᐳᖅ ᓴᖅᑭᑎᑦᑎᓂᕐᒥᒃ ᒥᓂᔅᑕᐅᑉ ᑐᒡᓕᐊᑕ ᐃᑲᔪᖅᑎᖓᓂᒃ ᐃᓕᓐᓂᐊᕆᐅᖅᓴᓕᓵᖅᑐᓄᑦ ᓯᕗᕙᓯᖕᓂᖅᓴᓄᓪᓗ ᐃᓕᓐᓂᐊᕐᓂᕐᒧᑦ, ᐊᓯᔾᔨᖅᓯᓯᒪᓪᓗᓂ ᐱᑕᖃᖅᐸᒌᖅᑐᒥᒃ ᐃᓂᒥᒃ, ᐱᕕᒃᓴᖃᖅᑎᑦᑎᔪᒪᓂᕐᒧᑦ ᐱᓕᕆᐊᖃᓪᓚᕆᒍᒪᓂᕐᒧᑦ ᖃᓄᐃᓕᐅᖅᐸᓪᓕᐊᔪᒪᓂᕐᒧᑦ ᑲᒪᒋᔭᖃᕐᓂᕐᒥᒃ ᐱᓕᕆᐊᒃᓴᓂᒃ ᐋᖅᑭᒃᓱᐃᕙᓪᓕᐊᓂᕐᒧᑦ, ᐊᑐᖅᑕᐅᕙᒃᑐᓕᒫᓄᓪᓗ ᐊᔪᕈᓐᓃᖅᓴᖅᑎᑦᑎᓂᕐᒧᑦ ᐱᐅᓯᒋᐊᖅᑎᑦᑎᓂᕐᒥᒃ. ᐃᒃᓯᕙᐅᑖᖅ, ᐃᓕᓐᓂᐊᕐᓂᓕᕆᔨᒃᑯᑦ ᐃᓚᒋᐊᖅᓯᓂᐊᕐᒥᔪᑦ ᒪᕐᕉᖕᓂᒃ ᓄᑖᓂᒃ ᐃᖅᑲᓇᐃᔮᒃᓴᓂᒃ ᐃᑲᔪᖅᓱᐃᔨᑦ ᐱᔨᑦᑎᕋᖅᑎᑦ ᐱᓕᕆᕝᕕᖓᓂ, ᑐᑭᒧᐊᒃᑎᑦᑎᔨ ᐅᖃᐅᓯᕐᒧᑦ ᐃᓕᓴᐃᔾᔪᑕᐅᔪᒧᑦ ᐊᒻᒪ ᐅᖃᐅᔾᔨᒋᐊᖅᑎ, ᒪᕐᕉᖕᓂᒃ ᐅᖃᐅᓯᓕᖕᓄᑦ ᐃᓕᓐᓂᐊᕐᓂᖅ. ᑖᒃᑯᐊ ᐃᖅᑲᓇᐃᔮᒃᓴᑦ ᐃᑲᔪᖅᑐᐃᓪᓚᕆᖕᓂᐊᖅᑐᑦ ᐊᑐᓕᖅᑎᑕᐅᔪᒥᑦ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᕐᒥᑦ, ᐃᓄᒃᑐᑦ ᓴᐳᔾᔨᓂᕐᒧᑦ ᐱᖁᔭᖅ, ᐊᒻᒪᓗ ᐅᖃᐅᓯᖅ ᐃᓕᓴᐃᔾᔪᑕᐅᔪᒧᑦ ᐊᑐᐊᒐᐃᑦ. ᖄᒃᑲᓐᓂᐊᒍᑦ, ᐱᖓᓲᔪᖅᑐᑦ ᓄᑖᑦ ᐃᖅᑲᓇᐃᔮᒃᓴᐃᑦ ᐃᓚᒋᐊᖅᑕᐅᓂᐊᖅᑐᑦ ᐃᑲᔪᖅᑐᐃᔾᔪᑕᐅᓂᐊᖅᑐᑦ ᒪᑐᐃᖅᑕᐅᓂᖓᓄᑦ ᐸᖕᓂᖅ ᐃᓕᓐᓂᐊᕐᕕᐊᓗᒃ ᑕᓗᕐᔪᐊᓂ, ᐃᓚᐅᓪᓗᑎᒃ ᐃᓕᓴᐃᔨᑦ ᐊᖓᔪᖅᑳᖓᑦ, ᒪᕐᕉᒃ ᐃᓕᓴᐃᔩᒃ, ᒪᕐᕉᒃ ᓴᓗᒻᒪᖅᓴᐃᔩᒃ, ᐊᒻᒪᓗ ᐃᓕᓐᓂᐊᕐᕕᖕᒥ ᑎᑎᕋᖅᑎ. ᑕᒪᒃᑯᐊ ᐊᓯᔾᔨᕐᓂᐅᔪᑦ ᐱᒻᒪᕆᐊᓘᓂᐊᖅᐳᑦ ᐱᓕᕆᕝᕕᒋᔭᐅᔪᖅ ᑲᔪᓯᑎᑦᑎᔪᓐᓇᑦᑎᐊᖁᓪᓗᒍ ᐱᔨᑦᑎᕋᐅᑎᑦᑎᐊᕙᐅᓂᖅᓴᓂᒃ, ᐃᑲᔪᖅᑐᐃᓗᑎᒃ 11,170−ᓂᒃ ᐃᓕᓐᓂᐊᖅᑎᓂᒃ 1,516.5−ᓂᒡᓗ ᐃᖅᑲᓇᐃᔭᖅᑎᓂᒃ, ᒪᕐᕉᖕᓂᒃ ᐅᖃᐅᓯᓕᖕᓄᑦ ᐃᓕᓐᓂᐊᖅᑎᑕᐅᑦᑎᐊᒃᑲᓐᓂᕐᓗᑎᒃ, ᐃᓕᓐᓂᐊᕐᕕᒃᐳᓪᓗ ᐱᕙᒌᔭᖅᓯᒪᑦᑎᐊᕐᓗᑎᒃ ᑐᙵᓱᒃᑎᑦᑎᓗᑎᒃ ᐃᓕᓐᓂᐊᖅᑎᓂᒃ ᓯᑎᐱᕆ 2026−ᒥ. ᐃᒃᓯᕙᐅᑖᖅ, ᐱᓕᕆᕝᕕᒋᔭᐅᔪᖅ ᓱᓕ ᑲᒪᒋᔭᖃᓪᓗᐊᑕᖅᐳᑦ ᐱᐅᓯᒋᐊᖅᑎᑦᑎᔪᒪᓪᓗᑎᒃ ᓴᖅᑭᑦᑐᓂᒃ ᐃᓕᓐᓂᐊᕆᐅᖅᓴᓕᓵᖅᑐᓄᑦ, ᐃᓕᓐᓂᐊᖅᑎᓄᑦ ᐃᓐᓇᕐᓄᓪᓗ ᐃᓕᓐᓂᐊᖅᑐᓄᑦ, ᒪᕐᕉᖕᓂᒃ ᐅᖃᐅᓯᓕᑦ ᐃᓕᓐᓂᐊᕐᓂᖅ ᓴᙱᒃᑎᒋᐊᕐᓗᒍ, ᐊᒻᒪᓗ ᐃᓕᓐᓂᐊᕐᕖᑦ ᓄᓇᓖᓪᓗ ᐱᑎᑕᐅᑦᑎᐊᖅᐸᒡᓗᑎᒃ ᐃᑲᔪᖅᑐᐃᔾᔪᑎᓂᒃ ᐱᔭᕆᐊᓕᖏᓐᓂᒃ. ᐊᖏᖅᓯᒪᐃᓐᓇᖅᐳᒍᑦ ᐊᑐᑦᑎᐊᕈᒪᓪᓗᑕ ᐱᓕᕆᔾᔪᑎᑦᑎᓐᓂᒃ ᐊᒻᒪ ᐱᐅᓂᖅᐹᓂᒃ ᐱᓕᕆᐊᓂᒃ ᐱᔨᑦᑎᕋᐅᑎᓂᒡᓗ ᓴᖅᑭᑦᑎᔪᒪᓪᓗᑕ ᓄᓇᕘᓕᒫᒥ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 27 (ᑐᓵᔨᑎᒎᕈᓐᓃᖅᑐᖅ) ᑲᑎᒪᔨᕋᓛᑦ ᒪ’ᓈᖅᐸᒃᑲ ᑕᕝᕘᓇ ᑕᑯᒃᓴᐅᔫᓪᓗᐊᕋᑉᑕ ᐊᐱᖅᓱᖅᑕᐅᔫᓪᓗᐊᕋᑉᑕᓗ ᑕᒪᓐᓇ ᑲᑎᒪᖃᑎᒌᓐᓂᕆᔭᕗᑦ ᑲᑎᖃᑎᒌᓐᓂᕆᔭᕗᑦ ᑐᕌᒐᕆᔭᑉᑎᓐᓄᑦ ᐃᑲᔫᑕᐅᒻᒪᑦ ᐊᒻᒪ ᑕᒪᓐᓇ ᐃᓕᓐᓂᐊᖅᑐᓕᕆᓂᖅ ᐱᐅᓂᖅᐹᒥ ᐊᐅᓪᓛᕐᓂᖃᖁᓪᓗᑎᒍ ᐃᓕᓐᓂᐊᖅᑐᓗᒃᑖᓄᑦ. ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᐃᒃᓯᕙᐅᑕᖓ ᑲᑎᒪᔨᕋᓛᓄᑦ ᒪᑐᐃᕈᑎᓂᑦ ᐅᖃᐅᓯᒃᓴᖃᖅᐹ? ᒥᔅᑕ ᐳᐊᑐ, ᐊᑏ. ᐳᐊᑐ: ᖁᐊᓇᖅᑯᑎᑦ, ᐃᒃᓯᕙᐅᑖᖅ. ᖁᔭᓐᓇᒦᒃ, ᐃᒃᓯᕙᐅᑖᖅ. ᖁᕕᐊᓱᑉᐳᖓ ᐅᖃᐅᓯᖃᕆᐊᒃᓴᖅ ᒪᑐᐃᖅᓯᔾᔪᑎᑦᑎᓐᓂᑦ ᐱᔾᔪᑎᓗᒋᑦ ᑲᑎᒪᔨᕋᓛᖑᔪᑦ ᐃᓅᓯᕐᒥ ᖃᓄᐃᓐᖏᑦᑎᐊᕋᓱᓐᓂᕐᒧᑦ ᕿᒥᕐᕈᓂᖃᙳᓱᑦᑎᓪᓗᒋᑦ ᑐᒃᓯᕌᖑᔪᓂᑦ 2026-2027-ᒥ ᑮᓇᐅᔭᖅᑐᕈᑎᒃᓴᖏᓐᓂᑦ ᒥᒃᓴᐅᓯᔭᐅᓯᒪᔪᓂᑦ ᐊᒻᒪᓗ 2026-2030-ᒥ ᐱᓕᕆᐊᒃᓴᓄᑦ ᐸᕐᓇᐅᑎᖏᓐᓂᑦ ᐱᓕᕆᕕᖓᑕ ᐃᓕᓐᓂᐊᖅᑐᓕᕆᔨᒃᑯᑦ. ᑖᒃᓱᒪ ᐱᓕᕆᕕᐅᔫᑉ ᑐᒃᓯᕌᖏᑦ 2026-2027-ᒥ ᐊᐅᓚᒍᑎᒃᓴᑦ ᐊᖅᑭᐅᒪᑎᑦᑎᒍᑎᒃᓴᓪᓗ ᐊᑐᕈᒫᕐᓂᐊᖅᑐᑦ $309.853 ᒥᓕᐊᓐ ᑖᓚᐅᒻᒪᑕ. ᑖᓐᓇ ᐊᖏᓂᖅᓴᐅᔪᖅ 7.0%-ᒥᑦ ᑐᒃᓯᕌᕆᔪᔭᖏᓐᓂᑦ 2025-2026-ᒥ ᑮᓇᐅᔭᓕᕆᔾᔪᑎᑦ ᐊᕐᕌᒍᖓᓂ. ᐃᖅᑲᓇᐃᔮᖁᑎᖏᑦ ᑖᒃᓱᒪ ᐱᓕᕆᕕᐅᔫᑉ ᐊᒥᓱᕈᕆᐊᖅᑕᐅᔪᒪᔪᑦ 1,508.5−ᓂᑦ, 2025-2026−ᒥ ᑮᓇᐅᔭᓕᕆᔾᔪᑎᑦ ᐊᕐᕌᒍᖓᓂ ᑕᒪᐅᖓ 1,516.5−ᓄᑦ, 2026-2027-ᒥ ᑮᓇᐅᔭᓕᕆᔾᔪᑎᒃ ᐊᕐᕌᒍᖓᓂ. ᒪᓕᒐᓕᐅᖅᑏᑦ ᐅᖃᐅᓯᖃᖃᑦᑕᔪᔪᑦ ᐊᒥᓱᑲᓪᓚᓐᓂᑦ ᐃᓱᒫᓗᒋᔭᒥᓂᒃ ᐃᓱᒫᓗᓇᖅᑐᓂᓪᓗ ᒥᓂᔅᑕ ᓴᖅᑭᔮᕋᑖᕐᓂᕆᔪᔭᖓᓂ ᑲᑎᒪᔨᕋᓛᑦ ᓵᖓᓂ. ᑖᒃᓱᒪ ᐱᓕᕆᕕᐅᑉ 2026-2030-ᒥ ᐱᓕᕆᐊᒃᓴᓄᑦ ᐸᕐᓇᐅᑎᖓ ᓇᓗᓇᐃᖅᓯᓯᒪᒻᒪᑦ ᒪᕐᕉᒡᒎᖅ ᐸᕐᓇᓯᒪᔭᖏᑦ ᐱᓕᕆᐊᕆᓛᕐᓗᒋᑦ 2026-2027-ᒥ ᑮᓇᐅᔭᓕᕆᔾᔪᑎᑦ ᐊᕐᕌᒍᖓᓂ ᑖᒃᑯᐊᖑᒻᒪᑎᒃ “ᓴᓇᓗᑎᒃ ᐃᓄᓐᓄᑦ−ᑐᕌᖓᔪᒥᑦ ᐃᓕᓐᓂᐊᑎᑦᑎᔨᑖᕋᓱᐊᕐᓂᕐᒥᑦ ᐊᒻᒪᓗ ᐃᓕᓴᐃᔨᓂᑦ ᓄᖅᑲᖅᑕᐃᓕᑎᑦᑎᓂᕐᒧᑦ ᑐᑭᒧᐊᒍᑎᒃᓴᕐᓂᑦ ᐊᒥᓱᕈᕆᐊᖅᑕᐅᒐᓱᐊᕐᓗᑎᒃ ᐃᓄᐃᑦ ᐃᓕᓴᐃᔩᑦ ᐃᓕᓴᕕᑦᑎᓐᓂ” ᐊᒻᒪᓗ “ᓴᓇᓗᑎᒃ ᐃᓕᓴᐃᔨᑖᒃᑲᓐᓂᕋᓱᐊᕐᓂᕐᒧᑦ ᑐᕌᖓᔪᒥᑦ ᐊᒻᒪᓗ ᐃᓕᓴᐃᔨᓂᑦ ᓄᖅᑲᖅᑕᐃᓕᑎᑦᑎᓂᕐᒧᑦ ᑐᑭᒧᐊᒍᑎᒃᓴᕐᓂᑦ ᐊᒥᓱᕈᕆᐊᖅᑕᐅᒐᓱᐊᕐᓗᑎᒃ ᐊᔪᓐᖏᑦᑎᐊᖅᑐᑦ ᐃᓕᓴᐃᔨᖃᐃᓐᓇᖁᓪᓗᒍ ᐃᓕᓴᕕᑦᑎᓐᓂ.” ᒪᓕᒐᓕᐅᖅᑏᑦ ᓂᕆᐅᑦᑎᐊᓂᐊᖅᐳᑦ ᑲᔪᓰᓐᓇᖅᑐᓂᑦ ᖃᓄᐃᓕᖓᓕᕐᒪᖔᑕ ᓇᓗᓇᐃᖅᑐᐃᕕᐅᖃᑦᑕᓛᕐᓂᕐᒥᓄᑦ ᐊᑐᓕᖅᑎᑕᐅᑎᓪᓗᒋᒃ ᑖᒃᑯᐊ ᑐᑭᒧᐊᒍᑎᒃᓵᒃ. ᕕᕝᕗᐊᕆ 28, 2025−ᒥ, ᒐᕙᒪᑐᖃᒃᑯᑦ ᐊᒻᒪᓗ ᓄᓇᕗᑦ ᒐᕙᒪᖓ ᑐᓴᖅᑕᐅᑎᑦᑎᔪᒻᒪᑎᒃ ᒪᕐᕈᐃᓄᑦ ᐊᖏᖃᑎᒌᒍᑎᑕᖃᕐᒪᑦ ᐊᑖᒍᑦ ᑲᓇᑕᓕᒫᒥ ᐃᓕᓴᕕᓐᓂᑦ ᓂᕿᖃᖅᑎᑦᑎᓂᕐᒧᑦ ᐱᓕᕆᓂᐅᔪᓂᑦ. ᑕᐃᓐᓇ ᑐᓴᖅᑕᐅᑎᑦᑎᔾᔪᑎ ᓇᓗᓇᐃᖅᑐᐃᔪᔪᖅ ᐃᒪᓐᓇ “ᑲᑎᓪᓗᒋᑦ ᒐᕙᒪᑐᖃᒃᑯᑦ ᑮᓇᐅᔭᑦ ᐃᓕᐅᖅᑲᓂᐊᖅᑕᖏᑦ ᐃᓕᓴᕕᓐᓄᑦ ᓂᕿᓕᕆᔾᔪᑎᒃᓴᐃᑦ ᓄᓇᕗᒻᒥ ᑕᒫᓂᐸᓘᓛᕐᒪᑕ $7.6 ᒥᓕᐊᓐ ᑖᓚᐃᑦ ᐊᕐᕌᒍᓂ ᐱᖓᓱᓂ ᐊᒡᒋᖅᑐᓂ, ᓵᓐᖓᑦᑎᒋᐊᕐᓂᖅᓴᐅᓗᑎᒃ ᓂᖅᑎᐅᕕᓐᓂᑦ ᐊᓯᖏᓐᓂᓪᓗ ᐱᖁᑎᑖᖑᒋᐊᓕᓐᓂᑦ ᐱᑕᖃᕆᐊᓕᓐᓂᑦ ᐃᓕᓴᕕᓐᓂ ᓂᕆᑎᑦᑎᖃᑦᑕᓂᐊᖅᐸᑕ ᓄᓇᕗᒻᒥ.” ᑖᒃᓱᒪ ᐱᓕᕆᕕᐅᔫᑉ 2026-2030-ᒥ ᐱᓕᕆᐊᒃᓴᓄᑦ ᐸᕐᓇᐅᑎᖓ ᓇᓗᓇᐃᖅᓯᓯᒪᒻᒪᑦ ᐃᓚᖓᑦᒎᖅ ᐸᕐᓇᓯᒪᔭᖓ ᐱᓕᕆᐊᕆᓛᕐᓗᓂᐅᒃ 2026-2027-ᒥ ᑮᓇᐅᔭᓕᕆᔾᔪᑎᑦ ᐊᕐᕌᒍᖓᓂ ᑕᒪᓐᓇᐅᒻᒪᑦ “ᓴᓇᓗᑎᒃ ᓄᓇᕗᒻᒧᑦ−ᑐᕌᖓᔪᒥᑦ ᐃᓕᓴᕕᓐᓂ ᓂᕆᑎᑦᑎᖃᑦᑕᓂᕐᒧᑦ ᐊᑐᐊᒐᐅᔪᓂᑦ.” ᒪᓕᒐᓕᐅᖅᑏᑦ ᓂᕆᐅᑦᑎᐊᖅᐳᑦ ᑲᔪᓰᓐᓇᖅᑐᓂᑦ ᓇᓗᓇᐃᖅᑐᐃᕕᐅᖃᑦᑕᓛᕐᓂᕐᒥᓄᑦ ᐊᑐᓕᖅᑎᑕᐅᓂᖓᓂᑦ ᑖᒃᓱᒪ ᐱᓕᕆᓂᐅᔫᑉ. ᑖᒃᓱᒪ ᐱᓕᕆᕕᐅᔫᑉ 2026-2030-ᒥ ᐱᓕᕆᐊᒃᓴᑦ ᐸᕐᓇᐅᑎᖏᑦ ᓇᓗᓇᐃᖅᓯᓯᒪᒻᒪᑕ ᐃᓚᖓᑦᒎᖅ ᐸᕐᓇᓯᒪᔭᖏᓐᓄᑦ ᐱᓕᕆᐊᕆᔭᐅᓛᕐᓗᓂ 2026-2027 ᑮᓇᐅᔭᓕᕆᔾᔪᑎᒃ ᐊᕐᕌᒍᖓᓂ ᑕᒪᓐᓇᐅᒻᒪᑦ “ᕿᒥᕐᕈᓗᑎᒃ ᑐᐊᕕᕐᓇᖅᑐᖅᑕᖃᖅᑎᓪᓗᒍ ᐱᓕᕆᒋᐊᕐᓂᕐᒧᑦ ᐊᑐᐊᒐᖏᓐᓂᑦ ᓄᓇᕗᒻᒥ ᐃᓕᓴᕕᖏᓐᓂ ᐃᖅᑲᓇᐃᔭᖅᑎᖏᓐᓄᑦ

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 28 ᒪᓕᑦᑕᐅᒋᐊᓕᓐᓄᑦ ᐅᖃᓕᒫᒐᖓᓄᑦ ᐊᒻᒪᓗ ᐊᑦᑕᓇᖅᑐᒦᑦᑕᐃᓕᑎᑦᑎᓂᕐᒧᑦ ᐃᓕᓴᕕᓐᓂ ᐃᓕᓴᕖᑦ ᐊᖏᔪᖅᑳᖏᑕ ᐸᕐᓇᓂᕐᒧᑦ ᒪᓕᑦᑕᐅᒋᐊᓕᓐᓄᑦ ᐅᖃᓕᒫᒐᖓᓂᑦ.” ᑲᑎᒪᔨᕋᓛᑦ ᑲᔪᖏᖅᓴᐃᕗᑦ ᐱᓕᕆᕕᐅᔪᒥᑦ ᐱᓕᕆᖃᑎᖃᖁᔭᐅᓪᓗᓂ ᖃᓂᒃᓴᕐᓗᓂ ᓄᓇᕗᒻᒥ ᐃᓕᓴᐃᔩᑦ ᑲᑐᔾᔨᖃᑎᒌᖏᓐᓂᑦ ᐊᒻᒪᓗ ᑭᒡᒐᖅᑐᐃᔨᐅᔪᓂᑦ ᓄᓇᕗᒻᒥ ᓄᓇᓕᓐᓂ ᐃᓕᓐᓂᐊᖅᑐᓕᕆᓂᕐᒧᑦ ᑲᑎᒪᔨᖏᓐᓂᑦ ᐱᓕᕆᐊᖃᕐᓗᑎᒃ ᐃᓱᒫᓗᒋᔭᐅᔪᒥᑦ ᐋᓐᓂᖅᑎᕆᖃᑦᑕᕐᓂᐅᔪᓂᑦ ᐃᓕᓴᕕᓐᓂ. ᐃᓕᓐᓂᐊᖅᑐᓕᕆᔨᒃᑯᑦ ᐱᓕᕆᕕᖓᑕ 2023-2024−ᒥ ᐊᕐᕌᖑᑕᒫᖅᓯᐅᑎᖏᑦ ᐅᓂᒃᑳᓕᐊᒥᓃᑦ ᒪᓕᖓᓕᐅᖅᕕᒻᒧᑦ ᓴᖅᑭᖅᑕᐅᔪᒻᒪᑕ ᓯᑎᐱᕆ 17, 2025-ᒥ. ᒪᓕᒐᓕᐅᖅᑏᑦ ᓂᕆᐅᑦᑎᐊᖅᐳᑦ ᒪᓕᖓᓕᐅᖅᕕᒻᒧᑦ ᓴᖅᑭᖅᑕᐅᓛᕐᓂᖏᓐᓂᑦ 2024-2025-ᒥ ᐊᕐᕌᒍᑕᒫᖅᓯᐅᑎᖏᑦ ᐅᓂᒃᑳᓕᐊᒥᓂᖏᑦ ᖄᖏᐅᑎᓐᖏᓪᓗᑎᒃ. ᑕᐃᒃᑯᐊ 2024-2025-ᒥ ᐊᕐᕌᒍᑕᒫᖅᓯᐅᑎᖏᑦ ᐅᓂᒃᑳᓕᐊᒥᓃᑦ ᓇᓗᓇᐃᖅᓯᓯᒪᔪᒻᒪᑕ ᐃᓕᓐᓂᐊᖅᑏᑦ ᐅᐸᖃᑦᑕᕐᓂᖏᑦ ᓄᑲᖅᑎᖅᐹᖏᓐᓂᑦ ᒍᕋᐃᑦ 12-ᒧᑦ ᓄᓇᕗᒻᒥ 69%-ᒥᓐᓂᕐᒪᑕ ᐃᓕᓐᓂᐊᕐᓇᖓᓂ ᐊᕐᕌᒍᒥ. ᐃᓛᒃᑯᑦ ᐃᓕᓴᕖᑦ ᓇᓗᓇᐃᖅᑐᖅᑕᐅᓯᒪᓚᐅᓐᖏᑦᑐᑦ ᐅᓂᒃᑳᓕᐊᒥᓂᖏᓐᓂ. ᑖᓐᓇ ᑐᑭᓯᑎᑦᑎᒋᐊᕈᑎ ᑭᖑᓪᓕᖅᐹᒥ ᓴᖅᑭᖅᑕᐅᓚᐅᖅᓯᒪᔪᖅ ᐃᓕᓐᓂᐊᖅᑐᓕᕆᔨᒃᑯᑦ 2020-2021-ᒥ ᐊᕐᕌᒍᑕᒫᖅᓯᐅᑎᖏᓐᓂ ᐅᓂᒃᑳᓕᐊᒥᓂᕐᓂ. ᑖᒃᓱᒪ ᐱᓕᕆᕕᐅᔫᑉ 2026-2030-ᒥ ᐱᓕᕆᐊᒃᓴᑦ ᐸᕐᓇᐅᑎᖏᑦ ᓇᓗᓇᐃᖅᓯᓯᒪᒻᒪᑕ ᐃᓚᖓᑦᒎᖅ ᐸᕐᓇᓯᒪᔭᖏᓐᓄᑦ ᐱᓕᕆᐊᕆᔭᐅᓛᕐᓗᓂ 2026-2027 ᑮᓇᐅᔭᓕᕆᔾᔪᑎᒃ ᐊᕐᕌᒍᖓᓂ ᑕᒪᓐᓇᐅᒻᒪᑦ “ᐱᓕᕆᖃᑎᖃᕐᓂᖅ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓂᑦ ᓴᖅᑭᔮᑦᑎᐊᑎᑦᑎᓂᖅᓴᐅᓗᑎᒃ ᓱᒻᒪᑦ ᐅᐸᑦᑎᐊᖃᑦᑕᕆᐊᖃᕐᒪᖔᑕ ᐃᓕᓴᕕᒻᒧᑦ, ᐱᖃᓯᐅᔾᔭᐅᓗᑎᒃ ᐊᑐᖅᑕᐅᓂᖏᑦ ᐃᓕᓴᕖᑦ ᐊᖏᔪᖅᑳᖏᑕ ᐅᓂᒃᑳᖏᓐᓂᑦ ᓯᐊᒻᒪᑦᑎᓗᑎᒃ ᐱᓕᕆᑦᑎᐊᕐᓂᐅᔪᓂᑦ ᐅᐸᓐᓂᖅᓴᐅᑎᑦᑎᒐᓱᓐᓂᕐᒥ.” ᑲᑎᒪᔨᕋᓛᑦ ᓴᓐᖏᓈᖅᑐᒥᑦ ᐃᑲᔪᖅᓰᕗᑦ ᐱᓕᕆᓂᐅᔪᓂᑦ ᐃᓕᓐᓂᐊᖅᑎᓂᑦ ᐅᐸᓐᓂᖅᓴᐅᑎᑦᑎᒐᓱᓐᓂᕐᒧᑦ ᐊᒻᒪᓗ ᐅᐸᖃᑦᑕᖏᑦᑐᓂᑦ ᓄᖑᔾᔫᒥᑎᑦᑎᒐᓱᐊᕐᓗᑎᒃ. ᑖᒃᓱᒪ ᐱᓕᕆᕕᐅᔫᑉ 2026-2030-ᒥ ᐱᓕᕆᐊᒃᓴᑦ ᐸᕐᓇᐅᑎᖏᑦ ᓇᓗᓇᐃᖅᓯᓯᒪᒻᒪᑕ ᐃᓚᖓᑦᒎᖅ ᐸᕐᓇᓯᒪᔭᖏᓐᓄᑦ ᐱᓕᕆᐊᕆᔭᐅᓛᕐᓗᓂ 2026-2027 ᑮᓇᐅᔭᓕᕆᔾᔪᑎᒃ ᐊᕐᕌᒍᖓᓂ ᑕᒪᓐᓇᐅᒻᒪᑦ “ᐊᑐᓕᖅᑎᑦᑎᓂᖅ ᓄᑖᖑᔪᓂᑦ ᓄᓇᕗᒻᒥ ᐃᓕᓐᓂᐊᕈᑎᓂᑦ ᖁᑦᑎᓐᓂᓕᓐᓂ 2 ᐊᒻᒪ 3.” ᔫᓂ 2, 2025-ᒥ, ᑎᑎᖅᑲᐅᓯᐊᒥᓃᑦ ᒥᓂᔅᑕᐅᔪᒥᑦ ᐃᓕᓐᓂᐊᖅᑐᓕᕆᓂᕐᒧᑦ ᒪᓕᒐᓕᐅᖅᕕᒻᒧᑦ ᓴᖅᑭᖅᑕᐅᔪᒻᒪᑕ. ᑕᐃᒃᑯᐊ ᑎᑎᖅᑲᐅᓯᐊᒥᓃᑦ ᐃᓗᓕᖃᔪᔪᑦ ᓇᓗᓇᐃᖅᓯᓂᕐᒥᑦ ᖃᖓ ᓄᓇᕗᒻᒥ ᐃᓕᓐᓂᐊᕈᑎᖏᑦ ᓄᑲᖅᑎᖅᐹᖏᓐᓂᑦ ᒍᕋᐃᑦ 12-ᒧᑦ. ᑕᐃᓐᓇ ᑎᑎᖅᑲᖅ ᓇᓗᓇᐃᖅᓯᓯᒪᔪᔪᖅ ᐃᓕᓐᓂᐊᖅᑐᓕᕆᔨᒃᑯᑦ “ᐃᓘᓐᓇᖏᓐᓂᑦ ᐊᑐᓕᖅᑎᑦᑎᓯᒪᓕᕈᒪᒻᒪᑕ ᒍᕋᐃᑦᓕᒫᓄᑦ ᐃᓕᓐᓂᐊᕋᒃᓴᓕᒫᓄᓪᓗ ᐊᕐᕌᒍᖓᓂ 2036−ᒥ.” ᓄᑖᑦ ᓇᓕᐊᓐᓂᑦ ᐅᖃᐅᓯᕐᒥᑦ ᐊᑐᕐᓗᑎᒃ ᐃᓕᓐᓂᐊᑎᑦᑎᓂᐅᔪᓐᓇᖅᑐᑦ ᒪᓕᒐᖏᑦ ᐊᑖᒍᑦ ᐃᓕᓐᓂᐊᖅᑐᓕᕆᔨᒃᑯᑦ ᐱᖁᔭᕐᔪᐊᖓᑕ ᑕᖅᑲᐅᖓ ᓴᖅᑭᖅᑕᐅᔪᒻᒪᑕ ᔪᓚᐃ 2025-ᒥ. ᑖᒃᓱᒪ ᐱᓕᕆᕕᐅᔫᑉ 2026-2030-ᒥ ᐱᓕᕆᐊᒃᓴᑦ ᐸᕐᓇᐅᑎᖏᑦ ᓇᓗᓇᐃᖅᓯᓯᒪᒻᒪᑕ ᐃᓚᖓᑦᒎᖅ ᐸᕐᓇᓯᒪᔭᖏᓐᓄᑦ ᐱᓕᕆᐊᕆᔭᐅᓛᕐᓗᓂ 2026-2027 ᑮᓇᐅᔭᓕᕆᔾᔪᑎᒃ ᐊᕐᕌᒍᖓᓂ ᑕᒪᓐᓇᐅᒻᒪᑦ “ᐸᕐᓇᓪᓗᑎᒃ ᐊᑐᓕᖅᑎᑕᐅᓂᖏᓐᓄᑦ ᒪᕐᕉᓐᓂᒃ ᐅᖃᐅᓰᓐᓂᒃ ᐊᑐᕐᓗᑎᒃ ᐃᓕᓐᓂᐊᑎᑦᑎᒍᑎᒃᓴᓂᑦ ᒍᕋᐃᑦ 4ᒥᑦ-7ᓄᑦ.” ᒪᓕᒐᓕᐅᖅᑏᑦ ᓂᕆᐅᑦᑎᐊᖅᐳᑦ ᑐᓴᖅᑎᑕᐅᖃᑦᑕᓛᕐᓂᕐᒥᓄᑦ ᖃᓄᐃᓕᔭᐅᕙᓪᓕᐊᓯᒪᒻᒪᖔᑕ ᑕᒪᒃᑯᐊ ᐱᒋᐊᖅᑎᑕᐅᓯᒪᔪᑦ. ᓄᑖᖑᔪᖅ ᐃᓕᓐᓂᐊᕆᐅᖅᓴᑎᑦᑎᓂᕐᒧᑦ ᐊᒻᒪᓗ ᐸᐃᕆᕕᓐᓄᑦ ᐱᖁᔭᕐᔪᐊᖅ ᐱᙳᖅᑎᑕᐅᔪᒻᒪᑦ ᔫᓂ 3, 2025-ᒥ. ᑖᓐᓇ ᓱᓕ ᐊᑐᓕᖅᑎᑕᐅᓯᒪᓐᖏᑦᑐᖅ. ᑖᒃᓱᒪ ᐱᓕᕆᕕᐅᔫᑉ 2026-2030-ᒥ ᐱᓕᕆᐊᒃᓴᑦ ᐸᕐᓇᐅᑎᖏᑦ ᓇᓗᓇᐃᖅᓯᓯᒪᒻᒪᑕ ᐃᓚᖓᑦᒎᖅ ᐸᕐᓇᓯᒪᔭᖏᓐᓄᑦ ᐱᓕᕆᐊᕆᔭᐅᓛᕐᓗᓂ 2027-2028-ᒥ ᑮᓇᐅᔭᓕᕆᔾᔪᑎᒃ ᐊᕐᕌᒍᖓᓂ ᑕᒪᓐᓇᐅᒻᒪᑦ “ᓴᓇᓂᖅ ᒪᓕᒐᒃᓴᓂᑦ ᑐᕌᖓᔪᓂᑦ ᐃᓕᓐᓂᐊᕆᐅᖅᓴᑎᑦᑎᓂᕐᒧᑦ ᐊᒻᒪᓗ ᐸᐃᕆᕕᓐᓄᑦ ᐱᖁᔭᕐᔪᐊᖓᓄᑦ.” ᓄᑖᖑᔪᒥᑦ ᓯᓚᑦᑐᓴᖅᕕᓐᓂ ᐃᓕᓐᓂᐊᖅᑎᓂᑦ ᐃᑲᔪᖅᓰᓂᕐᒧᑦ ᐱᖁᔭᕐᔪᐊᖅ ᐱᙳᖅᑎᑕᐅᔪᒻᒪᑦ ᒫᑦᓯ 11, 2025-ᒥ. ᑖᓐᓇ ᓱᓕ ᐊᑐᓕᖅᑎᑕᐅᓯᒪᓐᖏᑦᑐᖅ. ᑖᒃᓱᒪ ᐱᓕᕆᕕᐅᔫᑉ 2026-2030-ᒥ ᐱᓕᕆᐊᒃᓴᓄᑦ ᐸᕐᓇᐅᑎᖓ ᓇᓗᓇᐃᖅᓯᓯᒪᒻᒪᑕ ᐃᓚᖓᑦᒎᖅ ᐸᕐᓇᓯᒪᔭᖏᑕ ᐱᓕᕆᐊᕆᔭᐅᓛᕐᓗᓂ 2026-2027-ᒥ

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 29 ᑮᓇᐅᔭᓕᕆᔾᔪᑎᑦ ᐊᕐᕋᒍᖓᓂ ᑕᒪᓐᓇᐅᒻᒪᑦ “ᓴᓇᓂᖅ ᓯᓚᑦᑐᓴᖅᕕᓐᓂ ᐃᓕᓐᓂᐊᖅᑎᓂᑦ ᐃᑲᔪᖅᓰᓂᕐᒧᑦ ᒪᓕᒐᐅᔪᓂᑦ.” ᓄᑖᖑᔪᑦ ᓯᓚᑦᑐᓴᖅᕕᓐᓂ ᐃᓕᓐᓂᐊᖅᑎᓂᑦ ᑮᓇᐅᔭᓄᑦ ᐃᑲᔪᖅᓰᓂᕐᒧᑦ ᒪᓕᒐᐅᔪᑦ ᑕᖅᑲᐅᖓ ᓴᖅᑭᖅᑕᐅᔪᒻᒪᑕ 2025-ᒥ ᐊᑖᒍᑦ ᐃᓕᓐᓂᐊᖅᑎᓂᑦ ᑮᓇᐅᔭᓄᑦ ᐃᑲᔪᕐᓂᕐᒧᑦ ᐱᖁᔭᕐᔪᐊᖓᒍᑦ. ᑖᓐᓇ ᐱᖁᔭᕐᔪᐊᖅ ᐊᒻᒪᓗ ᒪᓕᒐᑦ ᐲᔭᖅᑕᐅᓛᖅᑐᑦ ᐊᑐᓕᖅᑎᑕᐅᑉᐸᑕ ᓄᑖᖑᔪᑦ ᓯᓚᑦᑐᓴᖅᕕᓐᓂ ᐃᓕᓐᓂᐊᖅᑎᓄᑦ ᐃᑲᔪᖅᓰᓂᕐᒧᑦ ᐱᖁᔭᕐᔪᐊᖅ. ᑖᒃᓱᒪ ᐱᓕᕆᕕᐅᔫᑉ ᑐᒃᓯᕌᖏᑦ 2026-2027-ᒥ ᑮᓇᐅᔭᖅᑐᕈᑎᒃᓴᑦ ᒥᒃᓴᐅᓯᔭᐅᓯᒪᔪᑦ ᓇᓗᓇᐃᖅᓯᓯᒪᒻᒪᑕ ᑮᓇᐅᔭᖏᑦ ᐊᑐᕈᒫᕐᓂᐊᖅᑐᖁᑎᖃᕐᒪᑕ ᑮᓇᐅᔭᓄᑦ ᑐᓂᕐᕈᑎᓄᑦ ᐊᑖᒍᑦ ᑮᓇᐅᔭᖅᑎᒍᑦ ᐃᑲᔫᑎᖏᒍᑦ ᐃᓕᓐᓂᐊᖅᑎᓄᑦ ᐊᖏᓪᓕᒋᐊᖅᑕᐅᓂᐅᓴᒻᒪᑕ ᑕᒫᓐᖓᑦ $8.916 ᒥᓕᐊᓐ ᑖᓚᓂᑦ 2025-2026-u ᑮᓇᐅᔭᓕᕆᔾᔪᑎᑦ ᐊᕐᕌᒍᖓᓂᑦ ᑕᒪᐅᖓ $23.428 ᒥᓕᐊᓐ ᑖᓚᓄᑦ 2026-2027 ᑮᓇᐅᔭᓕᕆᔾᔪᑎᑦ ᐊᕐᕌᒍᖓᓂ. ᑕᒪᓐᓇ ᐃᓚᒋᐊᖅᓯᓂᐅᔪᖅ 162.7%−ᓂᑦ. ᑖᒃᓱᒪ ᐱᓕᕆᕕᐅᔫᑉ 2026-2030-ᒥ ᐱᓕᕆᐊᒃᓴᑦ ᐸᕐᓇᐅᑎᖏᑦ ᓇᓗᓇᐃᖅᓯᓯᒪᒻᒪᑕ ᐃᓚᖓᑦᒎᖅ ᐸᕐᓇᓯᒪᔭᖏᓐᓄᑦ ᐱᓕᕆᐊᕆᔭᐅᓛᕐᓗᓂ 2026-2027 ᑮᓇᐅᔭᓕᕆᔾᔪᑎᒃ ᐊᕐᕌᒍᖓᓂ ᑕᒪᓐᓇᐅᒻᒪᑦ “ᓴᖅᑭᖅᓯᓂᖅ ᓄᑖᖑᔪᒥᑦ ᑮᓇᐅᔭᖅᑎᒍᑦ ᐃᑲᔫᑎᐅᔪᓂᑦ ᓄᓇᕗᒻᒥ ᐃᓕᓐᓂᐊᖅᑐᓄᑦ ᐱᓕᕆᓂᐅᔪᒥ ᒪᓕᓪᓗᑎᒃ ᖃᐅᔨᔭᒥᓂᐅᔪᓂᑦ ᑮᓇᐅᔭᖅᑎᒍᑦ ᐃᑲᔫᑎᐅᔪᓂᑦ ᐃᓕᓐᓂᐊᖅᑎᓄᑦ ᐃᓗᓕᖅᑐᔪᒥᑦ ᕿᒥᕐᕈᔭᐅᓂᒥᓂᖓᓂᑦ.” ᒪᓕᒐᓕᐅᖅᑏᑦ ᓂᕆᐅᑦᑎᐊᖅᐳᑦ ᓯᕗᓂᕆᓛᖅᑕᑎᓐᓂ ᐊᕐᕌᒍᑕᒫᖅᓯᐅᑎᖏᑦ ᐅᓂᒃᑳᓕᐊᒥᓃᑦ ᐊᑖᒍᑦ ᐃᓕᓐᓂᐊᖅᑐᓕᕆᓂᕐᒧᑦ ᐱᖁᔭᕐᔪᐊᑉ ᐃᓗᓕᖃᖅᑐᓂᑦ ᓇᓗᓇᐃᖅᑐᑎᐊᖅᓯᒪᔪᓂᑦ ᑐᑭᓯᐅᒪᔾᔪᑎᓂᑦ ᐱᔾᔪᑎᖃᖅᑐᓂᑦ ᐱᓕᕆᓂᐅᔪᒥᑦ, ᐱᖃᓯᐅᔾᔨᓗᑎᒃ ᑐᑭᓯᒃᑲᓐᓂᕈᑎᒃᓴᓂᑦ ᐱᔾᔪᑎᖃᖅᑐᓂᑦ ᖃᑦᑎᑦ ᓯᓚᑦᑐᓴᕐᕕᓂ ᐱᔭᕇᖅᑐᒥᓃᑦ ᓄᓇᕗᒻᒥ ᐃᖅᑲᓇᐃᔭᖅᑎᓄᑦ ᐃᓚᓕᐅᑎᕙᒻᒪᖔᑕ ᐱᔭᕇᕋᐃᒻᒪᑕ ᐃᓕᓐᓂᐊᖅᑕᖏᓐᓂᑦ. ᕕᕝᕗᐊᕆ 2026-ᒥ, ᐃᓄᐃᑦ ᑕᐱᕇᑦ ᑲᓇᑕᒥ ᑐᓴᖅᑕᐅᑎᑦᑎᔪᒻᒪᑕ ᑕᐃᓐᓇᒎᖅ ᐃᓕᓐᓂᐊᑎᑦᑎᕕᓪᓗᐊᑕᒃᓴᖓ ᓄᑖᖑᓛᖅᑑᑉ ᐃᓄᐃᑦ ᓯᓚᑦᑐᓴᖅᕕᔾᔪᐊᖓ ᐊᕐᕕᐊᓃᓛᕐᒪᑦ. ᑖᒃᓱᒪ ᐱᓕᕆᕕᐅᔫᑉ 2026-2030-ᒥ ᐱᓕᕆᐊᒃᓴᑦ ᐸᕐᓇᐅᑎᖏᑦ ᓇᓗᓇᐃᖅᓯᓯᒪᒻᒪᑕ ᐃᓚᖓᑦᒎᖅ ᐸᕐᓇᓯᒪᔭᖏᓐᓄᑦ ᐱᓕᕆᐊᕆᔭᐅᓛᕐᓗᓂ 2026-2027 ᑮᓇᐅᔭᓕᕆᔾᔪᑎᒃ ᐊᕐᕌᒍᖓᓂ ᑕᒪᓐᓇᐅᒻᒪᑦ “ᐱᒋᐊᕐᓗᑎᒃ ᕿᒥᕐᕈᓂᐅᔪᒥᑦ ᓯᓚᑦᑐᓴᖅᕕᔾᔪᐊᓄᑦ ᐊᒻᒪᓗ ᐃᓕᑕᕆᔭᐅᔾᔪᑎᑖᖅᑎᑦᑎᓲᑦ ᐱᔭᕇᕈᑎᒥᑦ ᐱᖁᔭᕐᔪᐊᖓᓂᑦ.” ᑐᑭᓯᐅᒪᑎᑦᑎᔾᔪᑏᑦ ᓴᖅᑭᖅᑕᐅᓯᒪᔪᑦ ᐃᓄᐃᑦ ᑕᐱᕇᑦ ᑲᓇᑕᒃᑯᓐᓂᑦ ᓇᓗᓇᐃᖅᓯᓯᒪᒻᒪᑕ ᑕᐃᓐᓇ ᐃᓄᐃᑦ ᓯᓚᑦᑐᓴᖅᕕᔾᔪᐊᖓ ᐸᕐᓇᒻᒪᑦ ᐊᑐᐃᓐᓇᐅᑎᑦᑎᓛᕐᓗᓂ ᐊᖏᔫᑎᓂᑦ ᒥᑭᔫᑕᐅᓂᖅᓴᓪᓗ ᐱᔭᕇᕋᓱᐊᕈᑎᓂᑦ ᐊᒥᓱᑲᓪᓚᓐᓂ ᐃᓕᓐᓂᐊᕋᒃᓴᓂ, ᐱᖃᓯᐅᔾᔭᐅᓪᓗᑎᒃ ᐃᓕᓐᓂᐊᖅᑐᓕᕆᓂᖅ, ᐋᓐᓂᐊᓯᐅᖅᑎᓕᕆᓂᖅ, ᐃᕐᓂᓱᒃᓰᔨᓕᕆᓂᖅ ᐃᓄᓕᕆᓂᖅ, ᐃᓄᒃᑐᑦ ᑐᑭᓕᐅᕆᓂᕐᒥᑦ ᑐᓵᔨᐅᓂᕐᒥᓪᓗ, ᓴᓇᓂᕐᒥᑦ ᑕᑯᒥᓇᖅᑐᓂᑦ ᐊᒻᒪᓗ ᐊᕙᑎᒥᑦ ᖃᐅᔨᒪᔨᐅᓂᕐᒥᑦ. ᐱᔾᔪᑎᒋᓪᓗᒍ ᐃᓕᓐᓂᐊᕋᒃᓴᖁᑎᖏᑦ ᖃᓕᕇᑦᑎᒻᒪᑕ ᓄᓇᕗᑦ ᓯᓚᑦᑐᓴᕝᕕᒻᒥ ᐃᓕᓐᓂᐊᖅᑕᐅᕙᑦᑐᓪᓗ ᐅᓪᓗᒥ, ᑐᑭᓯᓇᖅᓯᓯᒪᕗᖅ ᒪᓕᒐᓕᐅᖅᑎᓄᑦ ᑖᒃᑯᐊ ᖃᓂᒌᓪᓗᑎᒃ ᐃᓕᓐᓂᐊᑎᑦᑎᕕᐅᔫᒃ ᐱᓕᕆᖃᑎᒌᒋᐊᖃᓛᕐᒪᑎᑦ ᑎᑭᓚᐅᖅᑎᓐᓇᒍ ᒪᑐᐃᖅᑕᐅᕕᒃᓴᖓ 2030-ᒥ. ᑕᕝᕙ ᐃᓱᓕᑉᐳᑦ ᒪᑐᐃᖅᓯᔾᔪᑎᒃᑲ ᐱᓗᒋᑦ ᑐᒃᓯᕌᖑᔪᑦ 2026-2027-ᒥ ᑮᓇᐅᔭᖅᑐᕈᑎᒃᓴᑦ ᒥᒃᓴᐅᓯᔭᐅᓯᒪᔪᑦ ᐊᒻᒪᓗ 2026-2030-ᒥ ᐱᓕᕆᐊᒃᓴᓄᑦ ᐸᕐᓇᐅᑎᖏᓐᓂᑦ ᐱᓕᕆᕕᖓᑕ ᐃᓕᓐᓂᐊᖅᑐᓕᕆᔨᒃᑯᑦ. ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᑭᓱᑐᐃᓐᓇᕐᓄᑦ ᑐᕌᖓᔪᓂᑦ ᐊᐱᖅᑯᑎᒃᓴᖃᖅᐱᓰ, ᐃᓗᓕᑯᓘᔭᖏᓐᓂ ᐅᖃᐅᓯᖃᓚᐅᙱᓂᑦᑎᓐᓂ? ᒥᔅ ᐊᖑᑎᐊᓗᒃ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 30 ᐊᖑᑎᐊᓗᒃ: ᖁᔭᓐᓇᒦᒃ, ᐃᒃᓯᕙᐅᑖᖅ, ᒥᓂᔅᑕ. ᑖᓐᓇᓕ ᐊᐱᖅᑯᑎᒋᔭᕋ ᐊᐱᕆᖁᔭᐅᓚᐅᖅᓯᒪᒐᒪ ᐃᓕᓐᓂᐊᕐᕕᕗᑦ ᕿᑎᕝᕕᖓ ᒪᑐᓯᒪᐃᓐᓇᕐᖓᑦ ᓴᓇᔭᐅᖏᓐᓇᖅᓱᓂᓗ. ᐊᐅᔭᖅ ᒪᒃᑯᑦᑐᐃᑦ ᓱᓕᕆᐊᒃᓴᖃᓛᙱᒥᒻᒪᑕ, ᖃᓄᖅ ᐊᑐᖅᑕᐅᒍᓐᓇᕋᔭᖅᐸᖃᐃ ᑕᐃᓐᓇ ᕿᑎᕝᕕᒃ ᓄᑖᖅ ᐅᕝᕙᓘᓐᓃᑦ ᐅᑕᖅᑭᒋᐊᖃᖅᐱᑕ ᐅᒃᑯᐃᕆᐊᖃᓕᖅᐸᑦ ᑭᓯᐊᓂ? ᑖᓐᓇ ᐊᐱᖅᑯᑎᒐ. ᖁᔭᓐᓇᒦᒃ. ᐃᒃᓯᕙᐅᑕᖅ (ᑐᓵᔨᑎᒍᑦ): ᒪ’ᓇ, ᒥᔅ ᐊᖑᑎᐊᓗᒃ. ᐃᒻᒪᖃ ᑖᓐᓇ ᐱᕕᖃᖅᑎᒋᐊᓂᐊᖅᐸᒋᑦ ᐅᕙᑦᓯᐊᕈ (ᑐᓵᔨᑎᒎᓕᖅᑐᖅ) ᐃᓕᓐᓂᐊᕐᕖᑦ ᐊᐅᓚᑕᐅᓂᖏᓃᓕᕈᑦᑕ ᑕᕝᕙᓂ G-5. ᐊᑎᖁᑎᖃᕈᓐᓃᕋᒪ ᑭᓱᑐᐃᓐᓇᕐᓄᑦ ᐅᖃᐅᓯᒃᓴᓂ. ᒫᓐᓇ ᒪᒃᐱᖅᑐᒐᖓᓄᑦ ᕿᒥᕐᕈᓇᓐᓂᐊᓕᕋᑦᑕ 2026-2027 ᓇᓕᖅᑯᑕᖅᑕᐅᓯᒪᔪᑦ ᐊᑐᕈᒪᕐᓂᐊᖅᑐᑦ G-4 ᐱᒋᐊᕐᓗᑕ. ᕿᒥᕐᕈᓇᓐᓂᐊᓕᕋᑦᑕ ᐃᓕᓐᓂᐊᖅᑐᓕᕆᔨᒃᑯᑦ, ᑐᑦᑕᕐᕕᖓ. ᑲᑎᒪᔩᑦ ᐊᐱᖅᑯᑎᔅᓴᖃᖅᐹᑦ? ᒥᔅᑕ ᐲᑕᓴᓐ. ᐲᑕᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᑖᒃᑯᐊ ᐱᓕᕆᕕᓯ 2026-2030 ᐸᕐᓇᐅᑎᓯ ᐅᖃᖅᓯᒪᔪᑦ ᒪᕐᕈᐃᓕᖓᔫᓐᓂᒎᖅ ᐱᒋᐊᖅᑎᑦᑎᔪᒪᒻᒪᑕ 2026-2027 ᑮᓇᐅᔭᓕᕆᓐᓇᐅᑉ ᐊᕐᕌᒍᐊᓂ ᐋᖅᑭᒃᓱᐃᓗᑎᑦ ᐃᓄᓐᓄᑦ ᑐᕌᖓᔪᑦ ᐃᓕᓴᖅᑎᓂᑦ ᕿᓂᖃᑦᑕᕐᓗᑎᑦ ᐃᖅᑲᓇᐃᔭᖅᑏᓐᓇᕐᓗᒋᓪᓗ ᐅᓄᖅᓯᑲᓐᓂᖁᓪᓗᒋᑦ ᐃᓄᐃᑦ ᐃᓕᓴᐃᔩᑦ ᐃᓕᓐᓂᐊᕐᕕᖕᓂ. 0.ᑖᒃᑯᐊ ᐊᔾᔨᒌᙱᑎᒋᒻᒪᒋ ᑖᒃᑯᐊ ᐋᖅᑭᓱᖅᑕᐅᔪᒪᔪᑦ ᒫᓐᓇ ᑕᑯᓐᓇᕐᓗᒋᑦ ᐃᓕᓴᔨᓂᑦ ᐱᓯᒪᐃᓐᓇᕈᒪᓂᖅ? ᖁᔭᓐᓇᒦᒃ. ᐃᒃᓯᕙᐅᑕᖅ (ᑐᓵᔨᑎᒍᑦ): ᒥᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᖁᔭᓐᓇᒦᖅᖢᒍ ᑖᓐᓇ ᐊᐱᖅᑯᑎᒋᒻᒪᒍ. ᑕᐃᒃᑯᐊ ᐃᓄᓐᓄᑦ ᑐᕌᖓᔪᑦ ᐃᓕᓴᐃᔨᒃᓴᖅᓯᐅᕐᓂᖅ ᑐᑭᒧᐊᕈᑎᖏᓪᓗ, ᐊᔾᔨᒌᙱᐊᕐᔪᓐᓂᖃᖅᑐᖅ ᑐᕌᖓᓗᐊᙳᐊᓂᐊᕐᒪᑕ ᑖᓐᓇ ᐃᓄᖕᓄᑦ ᐃᓕᓴᐃᔨᓄᑦ, ᐊᒻᒪᓗ ᑖᒃᑯᐊ ᐃᓕᓐᓂᐊᖅᑐᓕᕆᔨᒃᑯᑦ ᐅᖃᖅᓯᒪᓪᓗᑎᑦ ᐃᓄᖕᓂᑦ ᐅᓄᒃᑲᓂᖅᑐᓂᑦ ᐃᓕᓴᐃᔨᑦᑕᖃᕆᐊᖃᓪᓚᕆᑦᑐᖅ ᓄᓇᕗᒻᒧᑦ ᑐᕌᖑᔪᑦ ᐃᓕᓐᓂᐊᕈᑎᒃᓴᐃᑦ ᐱᓪᓗᒋᑦ. ᐊᒻᒪᓗ ᓄᑖᑦ ᑕᐃᒃᑯᐊ ᐃᓄᐃᑦ ᐅᖃᐅᓯᖏᑦ ᐊᑐᕐᓗᑎᑦ ᐃᓕᓐᓂᐊᑎᑦᑎᖃᑦᑕᓂᐊᕐᓗᑎᑦ. ᖃᓄᐃᑦᑐᓂᑦ ᐃᓗᓕᖃᕐᓂᐊᕐᒪᖔᖅ ᓱᓕ ᒫᓐᓇ ᓇᓗᔪᒍᑦ, ᑭᓯᐊᓂ ᐊᐅᓚᔾᔭᒃᑕᐅᔪᒃᓴᑦ ᑕᒪᒃᑯᐊ ᐃᑲᔪᖅᓱᓂᐊᖅᑐᑦ ᐃᓄᖕᓄᑦ ᐃᓄᖕᓂᑦ ᐃᓕᓴᐃᔨᓂᑦ ᐊᒻᒪᓗ ᓄᑖᓂᑦ ᕿᓂᖅᐸᓪᓕᐊᓗᑕ. ᐃᓕᓐᓂᐊᖅᑐᓕᕆᔨᒃᑯᑦ ᑕᒪᑐᒥᖓ ᐅᖃᐅᓯᖃᖅᐸᓪᓕᐊᓕᑕᐃᓐᓇᖅᑐᑦ. ᓄᓇᕗᑦ ᑐᙵᕕᒃᑯᓪᓗ ᑕᐃᒃᑯᐊ ᐅᖃᓪᓚᖃᑎᒋᓯᒪᔭᕗᑦ ᖃᓄᖅ ᐃᑲᔪᖅᓱᖅᑎᒋᒻᒪᖔᖏᑦ ᖃᓄᕐᓗ ᐃᓱᒪᖃᕐᒪᖔᖏᑦ. ᐱᒋᐊᖅᑕᐅᓯᒪᓕᖅᑐᖅ ᑕᒪᓐᓇ ᑕᐃᒃᑯᐊ ᐃᓄᐃᑦ ᐃᓕᓴᐃᔩᑦ ᑕᐃᑲᓃᖏᓐᓇᖃᑦᑕᖁᓪᓗᒋᑦ, ᑕᐃᒪᐃᓕᖓᕗᒍᑦ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᔅᑕ ᐲᑕᓴᓐ. ᐲᑕᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᓗᓕᑯᓘᔭᖏᓐᓂᑦ ᐅᖃᐅᓯᖃᙱᒃᑲᓗᐊᕐᓗᑕ. ᐅᓇ ᐊᐱᖅᑯᑎᒋᓗᒍ, ᖃᔅᓯᐅᕙᑦ ᐃᓄᐃᑦ ᓄᓇᕗᒻᒥᐅᑕᐃᑦ ᒫᓐᓇ ᓇᓗᓇᐃᒃᑯᑕᖃᖅᖢᑎᑦ ᐃᓕᓴᐃᔪᑦ ᓄᓇᕗᑦ ᐃᓕᓐᓂᐊᕐᕕᖏᓐᓂ? ᖁᔭᓐᓇᒦᒃ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) 808, ᐃᓐᓄᑦᑕᐅᓯᒪᔪᑦ ᐃᓕᓴᐃᔩᑦ ᐊᒻᒪ ᑖᒃᑯᓇᙵᑦ 808, 298.5 - ᐅᓪᓘᖃᐃ ᓇᑉᐸᖓᓂ ᐃᖅᑲᓇᐃᔭᖅᑐᖅ - 509.5 ᖃᓪᓗᓈᖑᓪᓗᑎᑦ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᐊᐱᖅᑯᑎᑦ? ᐱᖃᖅᐱ ᓱᓕ ᒪᓕᒐᓕᐅᖅᑎ? ᑖᓂᐅᓪ ᖃᕝᕕᒃ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 31 ᖃᕝᕕᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᐅᓐᓄᓴᒃᑯᓪᓗ, ᒥᔅᑕ ᒪᐃᓐ ᐊᒻᒪᓗ ᐃᖅᑲᓇᐃᔭᖅᑎᖏᑦ. ᑕᐃᓐᓇ ᐅᑎᕐᕕᒋᔪᒪᓪᓗᒍ ᓯᕗᓪᓕᖅᐹᖅ ᐊᐱᖅᑯᑎᒋᔭᐅᖅᑲᐅᔪᖅ ᐃᖃᓗᒃᑑᑦᑎᐊᑉ ᒪᓕᒐᓕᐅᖅᑎᖓᓐᓄᑦ ᕿᓂᕐᓂᑦ ᐃᓄᖕᓂᑦ ᐃᓕᓴᐃᔨᓂ. ᑕᑯᐃᓐᓇᖃᑦᑕᖅᑐᒍᑦ ᓄᓇᓕᓕᒫᓂᐅᖅᑰᖅᑐᖅ, ᑕᑯᐃᓐᓇᖃᑦᑕᖅᑐᒍᑦ ᐃᓪᓗᑭᔅᓴᕐᓂᖅ ᑕᒻᒪᓐᓇᓗ ᐱᔾᔪᑎᓪᓚᕆᐅᓪᓗᓂ ᐃᖅᑲᓇᐃᔭᖅᑎᑖᕋᓱᑦᑎᓪᓗᑕ ᐃᓕᓴᐃᔨᓂᑦ ᓄᓇᕗᑦ ᐃᓗᐊᓂ. ᖃᓄᖅ ᐃᖅᑲᓇᐃᔭᖃᑎᒋᕕᓯᐅᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑕᒪᓐᓇ ᐱᔾᔪᑎᒋᓪᓗᒍ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᑖᓐᓇ ᐊᐱᖅᑯᑎᓴᑦᑎᐊᖅ. ᐊᐳᖅᑕᐅᑎᒋᖃᑦᑕᕋᑦᑎᒃᑯ ᐃᓕᓐᓂᐊᖅᑐᓕᕆᔨᐅᓪᓗᑕ ᐊᒻᒪᓗ ᐊᓯᖏᓐᓅᔪᔅᓴᐅᔪᖅ ᐱᓕᕆᕕᒻᒧᑦ. ᐄ’, ᐃᒡᓗᓂᑦ ᐃᖅᑲᓇᐃᔭᖅᑎᓄᑦ ᑐᕌᖓᔪᓂᑦ ᐅᓄᒃᑲᓂᖅᑐᓂᑦ ᐱᓇᓱᒃᓯᒪᔪᒍᑦ ᐅᕙᒍᑐᐊᖑᓇᑕᓗ, ᐱᓕᕆᕖᑦ ᑖᒃᑯᐊ ᐊᒥᓲᒻᒪᑕ ᐃᒡᓗᓂᑦ ᑎᒍᓯᒃᑲᓐᓂᕋᓱᑦᑐᑦ. ᐃᒡᓗᑦ ᐃᖅᑲᓇᐃᔭᖅᑎᓄᑦ ᑐᕌᖓᔪᑦ ᐊᑐᖅᑕᐅᑦᑎᐊᖃᑦᑕᖁᓪᓗᒋᑦ. ᐆᒃᑑᑎᒋᓗᒍᖃᐃ ᐃᓚᖏᑦ ᐃᖅᑲᓇᐃᔭᖅᑏᓂᒃᑯᐊ ᐊᑕᐅᓯᕐᒧᑦ ᑲᑎᑕᐅᖃᑦᑕᕐᒪᑕ. ᑕᐃᒪᐃᔾᔪᑎᖃᖅᑐᓂ ᓲᕐᓗ ᐃᖅᑲᓇᐃᔭᖅᑏᑦ ᕿᑐᕐᖓᖃᙱᑦᑐᖅ. ᕿᑐᕐᖓᖃᙱᑉᐸᑎᒃ ᑖᒃᑯᐊ ᐃᓕᓴᐃᔩᑦ ᐊᑕᐅᓯᕐᒧᑦ ᐃᓕᔭᐅᖃᑦᑕᖅᑐᑦ ᐊᑕᐅᓯᖅᓯᐅᑕᐅᒐᓗᐊᒧᑦ. ᖃᐅᔨᒪᓪᓗᑕᓗ ᑕᒪᓐᓇ ᓈᒻᒪᒋᔭᐅᖃᑦᑕᙱᑦᑐᑦ ᐊᓯᒥᓐᓂᑦ ᐃᒡᓗᒥᐅᑕᖃᖃᑦᑕᙱᑉᐸᑕ ᐃᓚᖏᑦ. ᑭᓯᐊᓂ, ᑕᖅᑭᑕᒫᑦ ᐊᑭᓕᕆᐊᖃᖅᑕᖏᑦ ᐅᓄᙱᓂᖅᓴᐅᓲᑦ. ᐄ’, ᐃᒡᓗᓕᕆᔨᕐᔪᐊᒃᑯᑦ ᐃᖅᑲᓇᐃᔭᖃᑎᒌᓐᓇᖅᑕᕗᑦ ᐅᓄᒃᑲᓂᖅᑐᓂᑦ ᐃᒡᓗᓂᑦ ᑎᒍᓯᓇᓱᑦᑎᓪᓗᑕ ᓲᕐᓗ ᑕᓗᕐᔪᐊᕐᒥ ᓄᑖᖅ ᐃᓕᓐᓂᐊᕕᒃ ᑕᐃᑲᓃᒻᒪᑦ ᐃᓕᔭᐅᒃᑲᓂᕐᓂᐊᖅᑐᑦ ᑕᐃᒃᑯᐊ ᑕᐃᑲᓂ ᐃᖅᑲᓇᐃᔭᖅᑏᑦ ᒪᑐᐃᖅᓯᔾᔪᑎᓂᑦ ᓇᓗᓇᐃᖅᑲᐅᓪᓗᒍ. ᐊᒻᒪᓗ, ᐃᖅᑲᓇᐃᔭᖅᑏᑦ ᑖᒃᑯᐊᖑᒻᒥᑎᓪᓗᒋᑦ, ᐱᓇᓱᖃᑦᑕᐃᓇᖅᑐᒍᑦ ᐃᒡᓗᓂᑦ ᐅᓄᒃᑲᓂᖅᑐᓂᑦ ᑎᒍᓯᔪᒪᓪᓗᑕ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᑖᓂᐅᓪ ᖃᕝᕕᒃ. ᖃᕝᕕᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᐊᒻᒪᓗ ᖁᔭᓐᓇᒦᒃ ᒥᔅᑕ ᒥᓂᔅᑕ. ᐅᖃᖅᑲᐅᒐᕕᑦ ᑕᒪᓐᓇ ᐊᑲᐅᙱᓕᐅᕈᑕᐅᖃᑦᑕᕐᒪᑦ ᐃᒡᓗᒥᑦ ᐊᒥᖅᑳᖅᑐᑦ ᐃᓕᓴᐃᔩᑦ. ᐃᒃᑯᐊ ᓄᖅᑲᖅᓴᕋᐃᖃᑦᑕᖂᕐᒪᑕ ᑕᒪᓐᓇ ᐱᔾᔪᑎᒋᓪᓗᒋᑦ ᐅᕝᕙᓘᓐᓃᑦ ᐊᓯᖏᓐᓂ ᐃᖅᑲᓇᐃᔮᖅᑖᕐᓗᑎᑦ, ᑕᐃᒪᓐᓇᐅᔾᔪᑎᒋᖃᑦᑕᖅᑰᕐᒪᔾᔪᒃ. ᐃᓕᓐᓂᐊᕐᕖᑦ ᐊᓯᖏᓐᓄᑦ ᐃᖅᑲᓇᐃᔮᖅᑖᖃᑦᑕᕐᒪᑕ ᑕᒪᓐᓇ ᐱᔾᔪᑎᒋᓪᓗᒋ. ᑕᒪᓐᓇᖃᐃ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᖃᓄᖅᑑᕈᑎᒋᔭᐅᔪᓐᓇᖅᐸ ᑕᐃᒃᑯᐊ ᐃᓚᒌᑦ ᐅᕝᕙᓘᓐᓃᑦ ᕿᑐᕐᖓᖃᙱᑦᑐᑦ ᒪᑯᐊ ᐊᒥᖅᑳᖃᑦᑕᕆᖃᔾᔮᖏᒻᒪᑕ ᐃᒡᓗᓂᑦ ᑖᓐᓇ ᐃᓕᓐᓂᐊᖅᑐᓕᕆᓂᖅ ᓵᙵᔭᑐᐊᕆᓗᒍ ᐊᓯᖏᑦ ᐃᓱᒫᓘᑎᒋᙱᓪᓗᒋᑦ. ᓇᐅᒃᑯᑦ ᐱᐅᓯᒃᑲᓐᓂᖁᓪᓗᒍ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᑖᒃᑯᐊ ᐃᖅᑲᓇᐃᔭᖅᑎᓄᑦ ᐃᓪᓗᔅᓴᐃᑦ ᐱᔾᔪᑎᒋᓪᓗᒋᑦ, ᐃᓕᑕᕆᒐᓗᐊᖅᐸᕗᑦ ᐊᒥᒐᖅᐸᒻᒪᑕ ᐃᒡᓗᒃᓴᓂᑦ ᓇᒥᑐᐃᓐᓇᖅ, ᐊᒃᑐᖅᑕᐅᕙᑦᑐᑎᑦ ᒐᕙᒪᒃᑯᑦ ᑎᒥᖁᑎᖏᑦ ᓇᓂᑐᐃᓐᓇᒥ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 32 ᑕᐃᒪ ᐃᓚᖓᓐᓂ ᓇᐅᑦᓯᖅᑐᒐᓱᑉᐸᓪᓕᐊᓯᒪᔪᑦ ᐊᒥᒐᓗᐊᕈᑎᐅᔪᓂᑦ ᐃᒡᓗᓂᑦ ᐱᔭᕆᐊᖃᕋᔭᖅᑐᓂᑦ ᓄᓇᓕᖕᓂ, ᑕᒪᒃᑯᐊ ᑐᓴᕋᒃᓴᑦ ᐊᑐᐃᓐᓇᐅᖃᑦᑕᖁᒥᓇᓛᖅᐳᖅ ᓄᓇᕗᑦ ᐃᒡᓗᓕᕆᔨᕐᔪᐊᒃᑯᓐᓂ ᐊᓯᖏᓐᓂᓪᓗ ᒐᕙᒪᒃᑯᓐᓂ. ᑖᓐᓇ ᓇᐅᒃᑯᑦ ᐊᒃᑐᐃᒍᑎᓪᓚᕆᐅᕙᒻᒪᑦ ᐱᓯᒪᑦᓰᓐᓇᕈᑎᐅᕙᑦᑐᑦ ᐃᖅᑲᓇᐃᔭᖅᑎᓂᑦ ᐃᖅᑲᓇᐃᔭᖅᑎᑖᕋᓱᓐᓂᑯᓪᓘᓐᓃᑦ. ᐱᓯᒪᑦᓰᓐᓇᓂᐅᕈᑎᐅᕙᑦᑐᖅ ᐃᖅᑲᓇᐃᔭᖅᑎᓂᑦ ᐃᖅᑲᓇᐃᔭᖅᑎᑖᕋᓱᓐᓂᑯᓪᓘᓐᓃᑦ ᐊᓱᕉᑏᓐᓇᓂᐊᖅᑕᕗᑦ. ᐅᓇᑦᑕᐅᖃᐃ ᐊᖅᑯᑎᒋᔪᓐᓇᖅᑰᕋᔭᖅᐸᕗᑦ ᐃᑲᔪᕈᑎᖃᕈᓐᓇᕋᔭᖅᑰᖅᑐᖅ ᐃᑲᔪᖅᓱᖅᑕᐅᑲᓐᓂᓕᕈᓂ ᓇᒻᒥᓂᖅ ᐃᓪᓗᑖᕋᓱᓐᓂᖅ. ᑐᙵᓱᑎᑦᑎᓗᐊᖅᐳᒍᑦ ᐅᓄᖅᓯᒋᐊᖅᑕᐅᒐᔭᖅᐸᑦ ᐃᑲᔪᖅᓱᖅᑕᐅᑲᓐᓂᕋᔭᖅᐸᑦ ᓇᒻᒥᓂᖅ ᐃᓪᓗᒃᑖᕋᓱᑉᐸᓐᓂᖅ ᐃᖅᑲᓇᐃᔭᖅᑎᖁᑎᕗᑦ ᐃᓕᓐᓂᐊᕐᕕᓂ ᓇᒥᓂᖅ ᐊᖏᕐᕋᖃᕈᓐᓇᓂᖅᓴᐅᓕᕐᓗᑎ ᐊᑐᖅᑐᐊᕈᓐᓇᕐᓗᑎᓪᓗᑎᓪᓗ. ᑖᓐᓇ ᐱᒃᑯᒥᓇᕋᔭᙳᐊᖅᓱᓂ ᐃᖅᑲᓇᐃᔭᖅᑎᓂᑦ, ᐃᖅᑲᓇᐃᔭᖅᑎᑑᙱᑦᑐᑦ ᑭᓯᐊᓂ ᓇᒻᒥᓂᖅᑕᐅ ᐃᒡᓗᖃᕋᓱᒍᒪᔪᓄᑦ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᑖᓂᐅᓪ ᖃᕝᕕᒃ. ᖃᕝᕕᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ, ᐊᒪᓗ ᖁᔭᓐᓇᒦᒃ, ᒥᓂᔅᑕ. ᑖᒃᑯᐊ ᐸᕐᓇᐅᑎᑦᑎᓐᓂ ᓯᑕᒫᓃᑦᑐᒥᑦ “ᕿᓂᕐᓂᖅ ᑮᓇᐅᔭᖃᕈᓐᓇᐅᑎᐅᔪᓂᑦ ᐊᑭᑐᔫᑎᓄᑦ ᑖᓐᓇ ᐃᕕᖅᑎᑕᐅᕙᓪᓕᐊᑎᓪᓗᒍ ᐅᓪᓗᓕᒫᖅ ᓄᑲᖅᑎᖅᐹᑦ ᐃᓕᓐᓂᐊᕈᓐᓇᓕᕐᓗᑎᑦ”, ᓯᕗᓪᓕᖅᐹᖅ ᐊᐱᖅᑯᑎᒐ: ᖃᑦᑎᐅᕙᑦ ᐅᓪᓗᓕᒫᖅ ᐃᓕᓐᓂᐊᐸᑦᑐᑦ ᓄᑲᖅᑎᖅᐹᑦ ᓇᓕᖏᓐᓂ ᓄᓇᓕᓐᓂ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᕈᓐᓃᖅᑐᖅ) 2023-ᒥ, ᐃᓕᓐᓂᐊᖅᑐᓕᕆᔨᒃᑯᑦ ᑕᓪᓕᒪᓂᑦ ᓄᓇᓕᓐᓂ ᐃᕕᖅᑎᑦᓯᓚᐅᖅᓯᒪᒻᒪᑕ ᓄᑲᖅᑎᖅᐹᓄᑦ ᐅᓪᓗᓕᒫᖅᑎᑦᑎᒍᓐᓇᓕᕐᓗᑎᑦ. ᑕᒫᓂ ᐃᖅᑲᐅᒪᔪᔅᓴᐅᕗᖅ ᑕᒪᓕᒐᓕᐅᖅᑎ 7-ᑲᓂᕐᓂᑦ ᓄᓇᓕᓐᓂ ᐃᓚᓕᐅᑎᑦᓯᓕᓚᐅᖅᓯᒪᒻᒪᑕ, ᑕᕝᕙ 12 ᐊᑐᐃᓐᓇᕈᖅᑎᑕᐅᓯᒪᓕᖅᐳᑦ ᓄᓇᓕᓐᓂ. ᑖᒃᑯᐊ ᓱᓕ ᐊᒥᐊᒃᑯᖏᑦ 15 ᓄᓇᓖᑦ ᐃᓕᓐᓂᐊᖅᑐᓕᕆᔨᒃᑯᑦ ᓇᓚᐅᑦᑖᖅᓯᒪᕗᑦ ᐊᔾᔨᒋᒐᔭᙳᐊᖅᑕᖏᓐᓂ ᓄᑖᙳᕆᐊᖅᑕᐅᒋᐊᓕᓐᓄᑦ ᐃᒡᓗᓄᑦ ᐃᓂᔅᓴᓄᑦ ᐃᓪᓗᕈᓯᖃᒃᑲᓐᓂᕆᐊᖃᕋᔭᕐᒥᒻᒪᑦ. ᐊᑭᑐᔪᑲᓪᓚᐅᒐᔭᕐᒥᒻᒪᑦ ᑕᒫᓂ $80-ᒥᓕᐊᓐᒦᒐᔭᖅᑰᕐᒪᑦ ᐅᓪᓗᓕᒪᖅ ᓄᑲᖅᑎᖅᐹᑦ ᐃᓕᓐᓂᐊᕈᓐᓇᓕᕋᔭᕈᑎ ᐊᒥᒃᑯᖏᓐᓂ ᓄᓇᓕᓐᓂ. ᑖᒃᑯᐊ ᐱᖃᓯᐅᖅᑐᑦ ᐅᐃᕖ ᐃᓕᓐᓂᐊᕐᕕᖓᓂ, 15-ᖑᓪᓗᐊᓕᖅᑐᑦ ᑕᕝᕙ ᒫᓐᓇ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᑖᓂᐅᓪ ᖃᕝᕕᒃ. ᖃᕝᕕᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ ᐊᒻᒪᓗ ᒥᓂᔅᑕ. ᑎᑎᕋᖅᓯᒪᔪᓂ ᐱᖃᖅᑮᑦ ᑖᒃᑯᐊ ᓄᓇᓕᓐᓂ ᐅᓪᓗᓕᒫᖅᑎᑦᑎᕙᑦᑐᓂᑦ ᓄᑲᖅᑎᖅᐹᓂᑦ ᐊᒻᒪᓗ ᐅᓪᓗᓕᒫᖅᑎᑦᑎᕙᙱᑦᑐᓂᑦ ᓄᓇᓕᓐᓂ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᖃᕝᕕᒃ. ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᕈᓐᓃᖅᑐᖅ) ᑎᑎᕋᖅᓯᒪᔪᖃᖅᑐᖓ. ᐅᑯᐊ ᓄᓇᓕᐅᕗᑦ ᐅᓪᓗᓕᒫᖅ ᐃᓕᓐᓂᐊᕐᕕᖃᖅᑐᖅ: ᐃᓪᓗᓕᒑᕐᔪᒃ, ᑭᒻᒥᕈᑦ, ᖃᐅᓱᐃᑦᑐᖅ, ᐅᖅᓱᖅᑑ, ᖁᕐᓗᖅᑑᖅ, ᓴᓂᑭᓗᐊᖅ, ᐊᐅᓱᐃᑦᑐᖅ, ᒥᑦᑎᒪᑕᓕᒃ, ᖃᓗᕐᔪᐊᖅ; ᐃᖃᓗᐃᑦ, ᐱᖃᓯᐅᔾᔨᓯᒪᔪ ᓂᐊᖁᙳ ᐃᓕᓐᓂᐊᕐᕕᐊᓂ ᐊᒻᒪ ᐃᑯᓚᐃ ᑐᐊ-ᓱᓚᐃ, ᐅᐃᕖᒃᑯᑦ ᐃᓕᓂᐊᕐᕕᖓ, ᐊᒻᒪᓗ ᕿᑭᖅᑕᕐᔪᐊᒥᓗ ᐊᒻᒪᓗ ᑎᑭᕋᕐᔪᐊᒥ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 33 ᐃᒃᓯᕙᐅᑕᖅ (ᑐᓵᔨᑎᒍᑦ) ᓱᓕ ᐊᐱᖅᑯᑎᔅᓴᖃᖅᑭᑦ, ᒥᔅᑕ ᖃᕝᕕᒃ? ᖃᕝᕕᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ ᐊᒻᒪᓗ ᒥᓂᔅᑕ. ᓴᖑᓗᖓ ᐱᖓᔪᐊᓐᓄᑦ ᐸᕐᓇᐅᑎᔅᓯᓐᓂ “ᐱᓇᓱᐊᕋᔅᓴᐅᔪᓂᑦ: ᐱᕙᓪᓕᐊᓗᒋᑦ ᓄᓇᕗᒻᒧᑦ ᐊᑐᐊᒐᕆᔭᐅᔪᑦ ᓂᕿᒋᔭᐅᕙᑦᑐᓄᑦ”, ᖃᓄᐃᑦᑐᑦ ᐃᓄᕈᕐᒥᑕᐃᑦ ᐊᑐᐃᓐᓇᐅᑎᑕᐅᕙᑦ? ᐅᓪᓛᕈᕐᒥᑕᑦ? ᑕᒪᒃᑯᓄᖓ ᑐᕌᖓᔪᔅᓴᐅᑕᐅᔪᓄᑦ ᐃᓕᓐᓂᐊᖅᑎᓄᑦ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᐅᑖᖅ. (ᑐᓵᔨᑎᒎᓕᖅᑐᖅ) ᒫᓐᓇ ᐊᔾᔨᒌᙱᓚᑦ. ᐊᓯᔾᔨᖅᓯᒪᓪᓚᕆᑦᑐᓪᓕ ᓱᕈᓯᐅᓂᓐᓂ . ᐃᓕᓐᓂᐊᕐᕕᓕᐊᖅᑐᖓ ᐊᐅᓚᔨᒐᒪ ᓯᑭᓐ ᓲᑉ-ᖃᖅᐸᓚᐅᖅᓯᒪᒻᒪᑦ ᐹᓕᖃᖅᑐᓂ, ᐊᖏᔪᐊᓗᒻᒥ, ᖃᔪᖅᑐᕋᓱᑉᐸᓚᐅᖅᓯᒪᔪᒍᑦ ᐊᔪᕐᓇᙱᑦᑕᕌᖓᑦ. ᐃᓕᓐᓂᐊᕐᕕ ᒪᓕᑦᑐᒍ ᒫᓐᓇᐅᔪᖅ. ᐄ’, ᐃᓄᑦᓯᐅᑏᑦ ᐃᓚᓕᐅᑎᔭᐅᓯᒪᕙᑦᑐᑦ ᐊᔪᕐᓇᙱᑦᑕᕌᖓᑦ, ᖃᐅᑕᒫᓪᓚᑦᑖᓂᐊᕐᒪᖔᖅ ᓇᓗᓇᑐᐃᓐᓇᐸᑦᑐᖅ ᐊᓯᔾᔨᔭᕐᒪᑦ. ᐃᓕᓐᓂᐊᖅᑏᑦ ᐃᓕᓴᐃᔨᖏᑦ ᐊᑐᐃᓐᓇᕈᐃᓲᖑᒍᓐᓇᓲᖑᔪᑦ ᓂᕆᔭᔅᓴᓂᑦ ᒪᑯᓇᙵ ᐃᒻᒧᒧᑦ ᓴᓇᒐᓚᒃᓯᒪᔪᓂᓪᓗ. ᐅᓇ ᐱᓇᓱᓪᓗᐊᑕᕆᒍᒪᒐᑦᑎᒍ ᐃᓕᓐᓂᐊᕐᕕᒃ ᐃᓕᓐᓂᐊᖅᑐᓕᕆᔨᒃᑯᑎᒍ ᐊᑐᐊᒐᓕᐅᕐᓗᑕ ᓂᕿᓕᕆᓂᕐᒧᑦ ᑐᑭᒧᐊᕈᑎᔅᓴᖏᓐᓂᓪᓗ, ᐊᐱᖅᓲᑎᖃᑐᐃᓐᓇᐸᓐᓂᐊᖏᒻᒪᑕ ᑭᓱᓂᑦ ᓂᖅᑎᐅᖃᑦᑕᕈᓐᓇᓕᐊᖏᓐᓂ. ᑕᐃᒪ ᓂᕿᓕᕆᔨᒥ ᐅᖃᖃᑎᖃᖅᐸᓪᓕᐊᔪᒍᑦ ᐋᓐᓂᐊᖅᑐᓕᕆᔨᒃᑯᓪᓗ ᑕᒪᒃᑯᐊ ᐊᑐᖅᑕᐅᒐᓱᒍᓐᓇᕋᔭᖅᑐᑦ ᐱᔾᔪᑎᒋᓪᓗᒋᑦ, ᐊᓪᓛᒃ ᓂᕿᓕᕆᓂᕐᒧᑦ ᐃᓚᓕᐅᑦᓱᒍ. ᐃ ᑲᔪᑦᑐᐃᒍᒪᓪᓗᑕᓗ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᔅᑕ ᖃᕝᕕᒃ. ᖃᕝᕕᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᓕᑕᕆᔪᒪᓪᓗᒍ ᐋᓐᓂᐊᖅᑐᓕᕆᔨᒃᑯᑦ ᓂᕿᑦᓴᖃᖅᑎᑦᑎᒍᓐᓇᓲᖑᒻᒪᑕ ᓄᓇᕗᓕᒫᒥ ᒫᓐᓇᐅᓕᖅᑐᖅ. ᐱᕈᕐᓇᑰᒐᒪ ᓂᕿᑦᓴᓂᑦ ᐊᑐᐃᓐᓇᖃᖅᑐᖃᖅᐸᙱᑎᓪᓗᒍ, ᑖᓐᓇ ᐅᐱᓐᓇᖅᐳᖅ ᐃᑲᔪᒃᓴᐃᓐᓇᕐᒪᑕ ᑕᒪᑐᒧᖓ. ᑖᓐᓇ 27 ᐊᒻᒪᓗ 28-ᒧᑦ ᐊᕐᕌᒍᒧᑦ, ᓯᑕᒫᓄᑦ ᐸᕐᓇᐅᑎᓂ: “ᐃᕕᖅᑎᑕᐅᓗᑎᑦ ᐅᓪᓗᓕᒫᖅ ᐃᓕᓴᐃᓂᕐᒥ ᓄᓇᓕᒃᑲᓐᓂᐅᔪᙵ.” ᓇᓪᓕᐊ ᑕᐃᒪ ᓄᓇᓕ ᑭᙳᓇᕋᔭᖅᐸ ᐃᕕᖅᑎᑕᐅᒐᔭᔅᓴᕐᓂᖓ ᑖᔅᓱᒪ ᓄᑲᖅᑎᖅᐹᓂ ᐅᓪᓗᓕᒪᖅᑎᑦᑎᕙᓐᓂ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᑦᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᐃᓕᓐᓂᐊᖅᑐᓕᕆᔨᒃᑯᑦ ᒫᓐᓇ ᕿᒥᕐᕈᕗᒍᑦ ᑲᖏᖅᓯᓂᕐᒥ ᐊᕐᕕᐊᓂᓘᓐᓃᑦ ᐃᕕᖅᑎᑕᐅᕙᓪᓕᐊᒍᒫᖅᑰᕐᓂᖏᓐᓂ. ᓱᓕ ᑕᒪᓐᓇ ᓇᓗᓇᐃᖅᑕᐅᔭᕆᐊᖃᖅᐳᖅ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᓱᓕ ᐊᐱᖅᑯᑎᔅᓴᖃᖅᑐᖃᖅᐹ ᑖᒃᑯᐊ ᑐᑦᑕᕐᕕᖓᓄᑦ? ᖁᕐᓗᖅᑐᒧᑦ, ᒥᔅᑕ ᖁᓕᒃᑖᓇ? ᖁᓕᒃᑖᓇ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᐊᐱᖅᑯᑎᒐᓕ ᖃᑦᑎᑦ ᐃᓕᑕᕆᔭᐅᔾᔪᑎᖃᙱᑦᑐᑦ ᐃᓕᓴᐃᔨᐅᕙᑦ ᓄᓇᕗᑦ ᐃᓕᓐᓂᐊᕐᕕᖏᓐᓂ ᐱᔪᓐᓇᕐᓂᖃᖅᑎᑕᐅᓪᓗᑎ ᑎᑎᖅᑲᑎᒍᑦ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 34 ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᐊᒥᓲᓂᖏᑦ 89-ᖑᕗᑦ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᔅᑕ ᖁᓕᒃᑖᓇ. ᖁᓕᒃᑖᓇ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᑖᓐᓇ ᑎᑎᖅᑲᑎᒍᑦ ᐱᔪᓐᓇᕐᓂᖃᖅᑎᑕᐅᓂᖅ ᐃᓱᒫᓗᓐᓇᕐᓚᕐᒪᑦ ᐃᓕᓴᐃᔩᑦ ᐱᔪᓐᓇᐅᑎᖃᙱᑦᓱᑎᑦ ᐃᓕᓴᐃᔪᑦ ᓄᑕᖅᑲᑎᓐᓂ. ᑕᕝᕙ ᐱᐅᓛᒥᖃᐃ ᐃᓕᓐᓂᐊᖅᑎᑕᐅᔪᓐᓃᖅᐳᑦ. ᑖᓐᓇ ᑭᖑᕙᒃᑲᓐᓂᕈᑎᒋᑐᐃᓐᓇᑐᑎᒍ ᑲᓇᑕᒥ. ᐅᕙᓐᓄᑦ, ᐱᔪᓐᓇᐅᑎᖃᖅᑎᑕᐅᓂᖅ ᑎᑎᖅᑲᑎᒍᑦ ᐃᓕᓐᓂᐊᕕᑦᑎᓐᓂ, ᐄ’, ᐃᓕᓴᐃᖃᑦᑕᕆᐊᖃᕋᓗᐊᖅᑐᒍᑦ ᐊᔪᕐᓇᙱᑉᐸᑦ ᑎᑎᖅᑲᑎᒍᑦ ᐱᔪᓐᓇᕐᓂᖃᖅᑎᑕᐅᓗᓂ. ᐊᐱᖅᑯᑎᒋᔭᕋᓕ: ᖃᓄᖅ ᐸᕐᓇᐅᑎᖃᖅᐸᑦ ᐃᓕᓐᓂᐊᖅᑐᓕᕆᔨᒃᑯᓐᓂ ᓄᖑᔾᔫᒥᖁᓪᓗᒋᑦ ᐃᓕᓴᐃᒍᓐᓇᕐᓂᖃᖅᑎᑕᐅᓯᒪᔪᑦ ᑎᑎᖅᑲᑎᒍᑦ ᐃᓕᓐᓂᐊᕐᕕᑦᑎᓐᓂ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᓯᕗᓪᓕᖅᐹᒥᒃ ᐃᓕᓴᖅᓯᖅᑳᕐᓗᖓ ᐃᓱᒫᓘᑖᓂᒃ ᒪᓕᒐᓕᐅᖅᑎᐅᑉ. ᖁᔭᓐᓇᒦᒃ ᐅᓐᓂᖅᓯᐅᕐᒪᒍ ᐃᓱᒫᓘᑎᓂ. ᑖᒃᑯᐊ ᑮᓇᐅᔭᐃᑦ ᐊᖏᖅᑕᐅᔭᕆᐊᖃᖅᐸᑦᑐᑦ ᑲᑎᒪᔨᕋᓛᖑᔪᓪᓗ ᑲᑎᒪᔨᑐᐃᓐᓇᐃᑦ ᒐᕙᒪᑎᒍᑦ ᑐᓴᕈᒪᒻᒪᑕ ᒪᓕᒐᓕᐅᖅᑎᓂᑦ ᖃᓄᖅᑑᕈᓐᓇᐸᓪᓕᐊᓯᓐᓇᖁᓪᓗᑕ ᑕᒪᒃᑯᓂᖓ. ᐅᖃᖅᑳᕐᓗᖓ 93-ᖑᔫᒐᓗᐊᖅ ᐋᖅᑭᒋᐊᑐᐃᓐᓇᖅᐸᕋ ᐱᔪᓐᓇᕐᓂᖃᖅᑎᑕᐅᓯᒪᔪᑦ. ᐃᖅᑲᓇᐃᔭᖅᑎᑖᖅᐸᓐᓂᕐᒥᓪᓕ ᓇᓗᓇᐃᖅᓯᒍᑎᖃᑦᓯᐊᕆᐊᖃᓲᖑᔪᖅ ᐱᐊᓂᑦᑕᐅᔭᕆᐊᖃᖅᓱᓂ ᐃᓱᒪᓕᐅᕈᑕᐅᓂᐊᕈᓂ ᐱᔪᓐᓇᕐᓂᖃᙱᑦᑐᒥᒃ ᐃᓕᓴᐃᔨᑖᖅᑐᖃᕈᓂ ᐱᔪᓐᓇᕐᓂᖃᖅᑎᑕᐅᓂᒃᑯᑦ ᖃᐅᔨᒪᓂᖃᕆᐊᖃᓲᖑᕗᖅ ᐊᔪᙱᓐᓂᖃᕐᓗᑎᒃ ᐃᓕᓴᐅᑎᐅᓪᓚᑦᑖᖅᑐᒧᑦ ᓇᓕᐊᓐᓄᑦ. ᐅᓇᖃᐃ ᑕᐅᑐᓐᓂᖅᓴᕆᓗᑎᒍᑦ ᐃᓘᓐᓈ ᐃᓕᓴᐃᔨᑭᑦᓴᕐᓂᖅ ᑲᓇᑕᒥ ᐱᒻᒪᑦ ᐊᒻᒪ ᐊᒥᒐᖅᑎᓪᓗᒋᑦ ᐃᖅᑲᓇᐃᔭᕈᓐᓇᖅᑐᑦ. ᐅᕙᒍᑦ ᐊᑦᓱᕈᐃᓐᓇᕆᐊᖃᕐᓂᐊᖅᐳᒍᑦ ᑲᔪᖏᖅᓴᐃᒍᓐᓇᕐᓗᑕ ᐃᖅᑲᓇᐃᔭᕐᕕᐅᒍᒪᓗᑕ ᐃᑲᔫᑎᖃᑦᓯᐊᖅᐸᓪᓗᓂ ᐃᑲᔪᖅᑐᐃᓂᖃᕐᓗᓂᓗ ᑮᓇᐅᔭᖅᑐᕈᑎᑦᓴᓄᑦ ᑕᕝᕙᓂ ᐃᓚᒋᖃᓯᐅᑎᒻᒪᒍ ᓄᑖᒥᒃ ᐊᖏᕈᑎᖃᓕᕐᓂᖓ ᐃᓕᓴᐃᔨᓄᑦ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓄᑦ ᐊᒻᒪᓗ ᐃᖅᑲᓇᐃᔭᖅᑐᓂᒃ ᑲᑐᔾᔨᖃᑎᒌᒃᑯᖏᓐᓂᒃ ᐅᓂᖅᓯᒋᐊᕆᐊᖃᖅᓯᒪᒻᒪᑕ ᑮᓇᐅᔾᔭᔅᓵᖏᑦ ᐃᑲᔫᑎᖏᓪᓗ ᐋᖅᑭᒍᑎᐅᓕᕐᓗᓃᓛᙱᒃᑲᓗᐊᖅᑐᖓ ᐊᒥᒐᖅᐸᓐᓂᕐᒥᒃ ᐃᓕᓴᐃᓂᖅ ᐃᓚᒋᑐᐃᓐᓇᕐᒥᔮ. ᐃᓕᑕᕆᒐᓗᐊᖅᓱᒍ ᐃᓱᒫᓘᑕᐅᓂᖓ ᐃᖅᑲᓇᐃᔮᕆᓯᒪᕙᕗᑦ ᑕᒪᒃᑯᐊ ᑎᑎᖅᑲᐃᑦ ᐱᔪᓐᓇᕐᓂᖃᕈᑎᐅᔪᑦ ᐊᑐᖅᑕᐅᓗᐊᙱᒃᑲᓗᐊᕐᒪᖔᑕ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᐊᐱᖅᑯᑎᒃᓴᑦ ᑐᑭᒧᐊᒃᑎᑦᑎᔨᓄᑦ. ᒪᓕᒐᓕᐅᖅᑎ ᐸᖕᓂᖅᑑᕐᒧᑦ, ᔮᓂ ᒪᐃᒃ. ᒪᐃᒃ: ᖁᔭᓐᓇᒦᒃ, ᐃᒃᓯᕙᐅᑖᖅ. ᐊᐱᖅᑯᑎᔅᓴᖃᙳᓱᑦᑐᖓ ᑖᒃᑯᐊ ᐃᓕᓐᓂᐊᕐᕖᑦ ᐃᓱᒫᓗᖕᓇᖅᑐᒦᖁᔨᙱᓐᓂᕐᒥᒃ, (ᑐᓵᔨᑎᒎᓕᖅᑐᖅ) ᐊᑦᑕᕐᓇᖅᑐᒦᙱᓐᓂᕐᒥᒃ, (ᑐᓵᔨᑎᒎᕈᓐᓃᖅᑐᖅ) ᑖᒃᑯᐊ ᐃᓕᓐᓂᐊᖅᑐᓕᕆᔨᒃᑯᑦ ᐸᕐᓇᓯᒪᔭᖏᑦ 2026-2030 ᓇᓗᓇᐃᖅᓯᓯᒪᒻᒪᑕ ᑖᓐᓇ ᑲᒪᒋᔭᐅᔪᒫᕐᓂᐊᕐᕙᓗᑦᑐᓂ ᑖᔅᓱᒧᖓ ᐊᕐᕌᒍᒧᑦ 2026-2027 ᑮᓇᐅᔭᖅᑐᕐᓇᖓᓄᑦ. (ᑐᓵᔨᑎᒎᓕᖅᑐᖅ) ᑐᑭᒧᐊᕈᑎᖏᓐᓂᒃ ᕿᒥᕐᕈᒐᔭᕐᓗᑎᒃ ᐅᖃᓕᒫᒐᖏᓐᓂᒃ ᐃᓕᓐᓂᐊᕐᕕᓐᓂᒃ ᐊᒻᒪᓗ ᐊᑦᑕᓇᖅᑕᐃᓕᓂᕐᒧᑦ ᐅᖃᓕᒫᒐᖏᓐᓂᒃ ᐸᕐᓇᐅᑎᒥᒃ. ᑭᓱᑦ ᐊᓯᔾᔨᖅᑕᐅᒐᓱᓪᓚᑦᑖᕐᓂᐊᖅᐸᑦ?

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 35 ᐃᒃᓯᕙᐅᑕᖅ (ᑐᓵᔨᑎᒍᑦ): ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᐅᓇᖃᐃ ᐱᓪᓗᐊᑕᖓ ᐃᓕᓐᓂᐊᕐᕖᑦ ᐊᑦᑕᓇᙱᑦᑑᖁᑉᓗᒋᑦ ᓄᑕᖅᑲᓄᑦ. ᓄᑕᖅᑲᐃᑦ ᐃᓱᒪᒋᒍᑦᑎᒍᑦ ᐃᓅᓯᕆᒋᔭᓐᓂ ᐃᓪᓗᒥᐅᑕᕆᔭᓐᓂ ᐊᑦᑕᓇᖅᑐᒦᖁᙱᓐᓇᕕᒋᑦ ᐃᑉᐱᒋᔭᐅᑦᓯᐊᑦᓴᐃᓐᓇᖁᒐᕕᒋᑦ ᖃᐅᑕᒫᑦ ᐃᓕᓐᓂᐊᕐᕕᒻᒦᒃᑯᑎᒃ, ᐊᖏᕐᕋᖅᓯᒪᒍᑎᒃ. ᑖᒃᑯᐊ ᖃᓄᐃᑦᑐᖃᖅᐸᑦ ᖃᓄᐃᓕᖓᒋᐊᕈᑏᑦ 2019ᒥ ᓄᑖᙳᕆᐊᖅᑕᐅᓚᐅᖅᓯᒪᒻᒪᑕ. ᑕᕝᕙ ᑐᐊᕕᕐᓇᖅᑐᓄᑦ ᐸᕐᓇᐅᑏᑦ ᖃᓄᖅ ᒪᑐᔭᐅᑦᓴᕆᐊᖃᕋᔭᕐᒪᖔᑦ ᑕᒪᒃᑯᐊᓗ ᐅᖅᑯᓴᑦᑕᕆᐊᖃᕐᓃᑦ ᐅᕝᕙᓗ ᐊᓂᒋᐊᖃᓕᕐᓂᕈᑎᒃ ᐃᓕᓐᓂᐊᕐᕕᒻᒥ ᑕᒪᒃᑯᐊ ᖃᐅᑕᒫᑦ ᕿᒥᕐᕈᔭᐅᕙᑦᑐᑦ ᓄᑖᙳᕆᐊᖅᑕᐅᒋᐊᖃᕈᑎᒃ ᑕᐃᒪᐃᑉᐸᑦᑐᑦ. ᓄᑖᙳᕆᐊᕈᒪᕙᕗᑦ ᑕᕝᕙ ᑕᒪᒃᑯᐊ ᑐᑭᒧᐊᕈᑎᐅᕙᑦᑐᑦ ᓈᒻᒪᓐᓂᖅᓴᐅᓕᖁᑉᓗᒋᑦ 2026ᒥ ᐅᖓᑖᓄᑦ, ᒪᑯᐊ ᓲᕐᓗ ᐃᓕᓐᓂᐊᕐᕕᒻᒥ ᐊᑐᐃᓐᓇᖃᕐᕕᐅᔪᓐᓇᕐᓂᖅ ᑕᒪᒃᑯᐊ ᖁᖁᐊᕈᑏᑦ, ᑐᐊᕕᕐᓇᖅᑐᖅᓯᐅᑏᑦ ᐊᒻᒪᓗ ᖃᓄᖅ ᐱᐅᓯᖃᕆᐊᖃᕐᒪᖔᑕ ᐅᖃᓗᒡᕕᒋᒋᐊᓕᖏᓐᓄᑦ ᐸᓖᓯᒃᑰᖅᐸᑦ, ᖃᑦᑎᕆᔨᒃᑰᖅᐸᑦ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᐸᓐᓂᖅᑑᒧᑦ, ᒥᔅᑕ ᒪᐃᒃ. ᒪᐃᒃ: ᖁᔭᓐᓇᒦᒃ, ᐃᒃᓯᕙᐅᑖᖅ. ᑐᑭᓯᑦᑎᐊᑲᓐᓂᕐᓂᐊᕋᑦᑕ, ᑖᒃᑯᐊ ᑮᓇᐅᔭᖅᑐᕐᓂᐊᕐᕙᓗᒻᒪᑕ ᕿᒥᕐᕈᓃᑦ. (ᑐᓵᔨᑎᒎᓕᖅᑐᖅ) ᖃᓄᓪᓚᑦᑖᖅ ᐊᓯᔾᔨᖅᓯᒋᐊᔅᓴᖅ ᐃᓱᒪᔅᓴᖅᓯᐅᕈᑎᖃᖅᑭᓯ? (ᑐᓵᔨᑎᒎᕈᓐᓃᖅᑐᖅ) ᓱᓇᐅᕙᑦ? ᑭᓱᑦ ᐊᓯᔾᔨᕆᐊᕈᑎᒋᓂᐊᖅᒋᑦ ᐃᓱᒪᒋᔭᐅᕙᑦ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᖃᓄᐃᔅᓴᙱᒃᑯᕕᑦ ᑐᖏᓕᕋ ᕼᐊᐃᓐᓄ ᑭᐅᖁᔭᕋᓗᐊᕋ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᔅ ᕼᐊᐃᓐᓄ. ᕼᐊᐃᓐᓄ: ᖁᔭᓐᓇᒦᒃ, ᐃᒃᓯᕙᐅᑖᖅ. ᖁᔭᓐᓇᒦᒃ ᒪᓕᒐᓕᐅᖅᑎ ᐊᐱᕆᒐᕕᑦ. ᑖᒃᑯᐊ ᐃᓕᓴᐃᔨᓄᑦ ᓇᓗᓇᐃᒃᑯᑕᐅᖃᑦᑕᖅᑐᑦ ᖃᓄᐃᓕᐅᕆᐊᖃᕐᓂᖏᓐᓂᒃ ᑐᐊᕕᕐᓇᖅᑐᖃᕐᓂᖅᐸᑦ, ᐊᑦᑕᕐᓇᖅᑐᒃᑰᖅᑐᖃᕐᓂᖅᐸᑦ, ᐱᕐᕈᐊᕿᔪᖃᕐᓂᖅᐸᓘᓐᓃᑦ ᓄᓇᓕᖕᓂ. ᑖᒃᑯᐊ ᑮᓇᐅᔭᖅᑑᑕᐅᓂᐊᖅᑐᑦ ᓄᑖᙳᕆᐊᕐᓂᖓ, ᐃᓕᓐᓂᐊᖅᑎᑕᐅᓂᖏᑦ ᐃᓕᓴᐃᔩᑦ, ᐊᒻᒪ ᐃᓕᓐᓂᐊᕐᕕᖕᒥ ᐊᖓᔪᖅᑳᖑᔪᑦ. ᑮᓇᐅᔭᑦ ᐊᒥᓲᓗᐊᔾᔮᙱᑦᑑᒐᓗᐊᑦ ᑭᓯᐊᓂ ᐃᓕᓐᓂᐊᖅᑎᑦᑎᓂᖅ ᐊᒻᒪ ᓄᖅᑲᖓᑲᐃᓐᓇᕐᓂᖅ, ᓲᕐᓗᖃᐃ ᐃᓕᓐᓂᐊᖅᑏᑦ ᓄᖅᑲᖓᑲᐃᓐᓇᕐᓗᑎᒃ, ᐃᓕᓴᐃᔩᑦ ᐃᓕᓐᓂᐊᕋᔭᖅᑐᐃᑦ ᐃᓕᓐᓂᐊᕐᕕᐅᑉ ᐃᓗᐊᓂ. ᑕᒪᒃᑯᓂᖓ ᐃᓗᓕᖃᖅᑐᖅ. ᖁᔭᓐᓇᒦᒃ, ᒪᓕᒐᓕᐅᖅᑏ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᐸᓐᓂᖅᑑᕐᒧᑦ, ᒥᔅᑕ ᒪᐃᒃ. ᒪᐃᒃ: ᖁᔭᓐᓇᒦᒃ, ᐃᒃᓯᕙᐅᑖᖅ. ᖁᔭᓐᓇᒦᓪᓗ. ᐅᓇ ᐊᐱᖅᑯᑎᒋᔪᒪᓕᕐᒥᔭᕋ ᑕᕝᕙᓂ ᐊᓂᒍᖅᑐᓂ ᐊᕐᕌᒍᑦ ᑕᓪᓕᒪᑦ ᑕᑯᓐᓇᕐᓗᒋᑦ. ᑖᒃᑯᐊ ᐊᑲᐅᙱᓕᐅᖃᑦᑕᑐᖅᑲᐃ ᖁᕝᕙᕆᐊᖅᓯᒪᕙᑦ ᐃᓕᓐᓂᐊᕐᕖᑦ ᐃᓗᐊᓂ ᐅᕝᕙᓗᓐᓃᑦ ᐊᕐᕙᕆᐊᖅᓯᒪᕙᑦ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. ᑕᒪᒃᑯᐊ ᐊᒥᓱᙳᖅᐸᓪᓕᐊᓂᖅᑕᖃᖅᓯᒪᖕᒪᖔᑦ ᐅᑭᐅᑦ ᑕᓪᓕᒪᑦ ᖄᖏᖅᓯᒪᔪᑦ ᑕᑯᖦᖢᒋᑦ ᖃᓄᖅ ᓇᓗᓇᐃᔭᖅᓯᒪᔪᓂᒃ ᓇᓗᓇᐃᖅᓯᒪᔪᓂᒃ ᒫᓐᓇ ᐃᓕᓐᓂᐊᖅᑐᓕᕆᔨᒃᑯᑦ

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 36 ᐋᖅᑭᒃᓯᓯᒪᙱᑦᑐᑦ, ᑭᓯᐊᓂ ᐅᖃᖅᑑᓪᓗᐊᖅᑐᑦ ᐅᓗᕆᐊᓇᖅᑐᒦᓯᐅᖅᑕᐃᓕᔾᔪᑕᐅᔪᓂᑦ ᐱᓕᕆᒋᐊᒃᑲᓐᓂᖅᓯᒪᔫᒐᓗᐃᑦ. ᖃᑉᓗᓈᑎᑐᑦ ᑕᐃᒍᕐᓚᒃᑲ: (ᑐᓵᔨᑎᒎᓕᖅᑐᖅ) ᖁᐊᖅᓵᓚᐅᖅᓯᒪᓐᓂᕐᒪᑕ ᒪᑯᐊ ᐃᓱᒪᒋᔭᐅᓪᓗᑎᒃ ᑕᐃᒫᒃ ᑲᒪᒋᔭᐅᖃᑦᑕᖅᑐᐃᑦ, ᓂᙵᐅᒪᓕᕈᓐᓃᕐᔫᒥᑎᑕᐅᒐᓱᐊᖅᑐᑎᓪᓗ ᐃᓕᓴᕕᓐᓂᓗ, ᐊᔅᓱᕈᕐᓇᕐᖓᑦ ᖃᐅᔨᒪᓪᓗᑎᒃ ᐸᕐᓇᓯᒪᖃᑦᑕᖅᑐᐃᑦ ᐊᑦᑕᓇᖅᑐᓕᕆᔾᔪᑎᔅᓴᓂᒃ. ᐊᕐᕌᒍᓄᑦ ᑕᓪᓕᒪᓂ ᐊᓂᒍᖅᓯᒪᔪᓂ ᓈᓴᖅᑕᐅᓪᓚᕆᓯᒪᙱᑦᑑᒐᓗᐊᑦ, ᑭᓯᐊᓂ ᐃᓕᓐᓂᐊᖅᑐᓕᕆᔨᒃᑯᑦ ᐸᕐᓇᓂᖅᓴᐅᓯᒪᔪᐃᑦ ᐱᓕᒻᒪᔅᓴᐃᓂᖅᓴᐅᓪᓗᑎᓪᓗ. ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᐸᓐᓂᖅᑑᒧᑦ, ᒥᔅᑕ ᒪᐃᒃ. ᒪᐃᒃ: ᖁᔭᓐᓇᒦᒃ, ᐃᒃᓯᕙᐅᑖᖅ. ᖁᔭᓐᓇᒦᓪᓗ ᒥᓂᔅᑕ. ᑎᑎᕋᖅᓯᒪᔪᓂᖅᑲᐃ ᑖᔅᓱᒪ ᒥᔅᓵᓄᑦ ᐅᖃᐅᓯᕆᔭᕕᑦ ᓴᖅᑮᒍᓐᓇᖅᑭᑦ ᑖᒃᑯᓄᖓ ᒪᓕᒐᓕᐅᖅᑎᓄᑦ, ᑖᓐᓇ ᐊᐱᖅᑯᑎᒋᕋᑖᖅᑕᕋ ᐱᔾᔪᑎᒋᓪᓗᒍ? ᖃᐅᔨᑦᑎᐊᕆᐊᖃᕋᑦᑕ ᐃᓕᓐᓂᐊᕐᕖᑦ ᐊᑲᐅᙱᓕᐊᓕᖅᐸᓪᓕᐊᕙᑦ ᐅᕝᕙᓗ ᐊᑲᐅᔪᒨᕐᓂᖅᓴᐅᕙᓪᓕᐊᕙᑦ? ᑖᓐᓇ ᐱᔾᔪᑎᒋᓗᒍ ᓇᓗᓇᐃᖅᓯᑦᑎᐊᖁᓇᖅᑑᒐᓗᐊᖅ ᖃᐅᔨᒪᑦᑎᐊᕐᓂᐊᕋᑦᑕ ᐊᑲᐅᙱᓕᐅᖅᐸᓪᓕᐊᓯᒪᑉᐸᑦ ᐊᕐᕌᒍᑦ ᑕᓪᓕᒪᑦ ᐃᓗᐊᓂ ᐃᓕᓐᓂᐊᕐᕕᐅᑉ ᐃᓗᐊᓂ ᐊᑦᑕᓇᕐᓂᖓ ᐅᓗᕆᐊᓇᕐᓂᖓ. ᐊᐱᖅᑯᑎᒋᖅᑲᐅᔭᓐᓂ ᓯᕗᓪᓕᕐᒥ, ᓱᓇᓪᓚᕆᓐᓂᒃ ᐊᓯᔾᔨᖅᑐᖃᕈᒫᕐᓂᐊᖅᑲ ᐅᕝᕙᓘᓐᓃᑦ ᐃᓯᒪᒋᔭᐅᕙᑦ? ᑖᓐᓇ ᑐᑭᖃᑦᑎᐊᓂᐊᕐᖓᑦ ᐊᐱᖅᑯᑎᒋᓇᓱᖅᑲᐅᔭᕋ. ᐅᓇ ᑭᓯᐊᓂ ᐊᐱᖅᑯᑎᒋᒃᑲᓐᓂᕈᒪᔭᕋ ᑕᒪᔅᓱᒧᖓ ᐃᓕᓐᓂᐊᕐᕕᐅᑉ ᐃᓗᐊᓂ ᖃᓄᐃᓕᐅᕐᓂᖅᑕᖃᓲᖑᒻᒪᑦ ᑕᐃᒪᙵᓕᒫᖅ. ᑖᓐᓇ ᐃᓕᓐᓂᐊᖅᑐᓕᕆᔨᒃᑯᖅᑲᐃ ᑖᒃᑯᓂᖓ ᐃᖅᑲᓇᐃᔭᖃᑎᖃᑦᑎᐊᕋᓗᐊᖅᑯᑦ ᓄᓇᕗᒻᒥ ᐃᓕᓴᐃᔩᑦ ᑲᑐᔾᔨᖃᑎᒌᓐᓂᖏᓐᓂᒃ ᐊᒻᒪᓗ ᓄᓇᓕᓐᓂ ᐃᓕᓐᓂᐊᖅᑐᓕᕆᓂᕐᒧᑦ ᑲᑎᒪᔨᖏᑦ ᑕᒫᓂ ᓄᓇᕗᒻᒥ. ᑖᒃᑯᐊ ᐱᔾᔪᑎᒋᓪᓗᒋᑦ ᐃᓕᓐᓂᐊᕐᕕᐅᑉ ᐃᓗᐊᓂ ᓴᐃᒪᓂᖃᑦᑎᐊᕆᐊᖃᕐᓂᖓ. ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. ᐄ’, ᐃᓕᓐᓂᐊᖅᑐᓕᕆᔨᒃᑯᑦ, ᖃᓄᖅ ᓈᓴᐅᑎᓂᒃ ᖃᐅᔨᒪᔭᐅᕌᓂᒃᑐᓂᒃ ᑐᓂᓯᔫᓪᓗᐊᕈᒫᖅᑐᑦ, ᓴᖅᑭᔫᓪᓗᐊᕈᒫᖅᑐᑦ ᑐᑭᓯᓐᓇᖅᓯᒃᑲᓐᓂᕐᓂᐊᕐᒪᑦ ᑕᒪᓐᓇ. ᑭᓯᐊᓂ, ᓱᓇᓪᓚᕆᖕᓂᒃ ᓈᓴᐅᑎᑕᖃᕐᓂᐊᕐᒪᖔᑦ ᒫᓐᓇ ᐅᖃᕐᓂᖅ ᐊᔪᕋᓗᐊᖅᖢᖓ. ᑖᒃᑯᐊ ᐃᓕᓐᓂᐊᖅᑎᑦᓯᔩᑦ ᑲᑐᔾᔨᖃᑎᒌᒃᑯᖏᑦ ᐱᓕᕆᖃᑎᒋᔭᐅᓪᓚᕆᒃᑐᑦ, ᐃᓕᓐᓂᐊᕈᑎᒃᓴᑦ ᐃᓕᓐᓂᐊᖅᑎᑦᓯᔨᓄᑦ ᑐᕌᖓᔪᑦ ᐆᒃᑑᑎᒋᖦᖢᒋᑦ, ᐊᒻᒪᓗ ᓄᓇᓕᖕᓂ ᑖᒃᑯᐊ ᑲᑎᒪᔨᕋᓛᕆᔭᐅᔪᑦ ᐱᓕᕆᖃᑎᒋᔭᐅᓂᓗᐃᓐᓇᐅᔭᖅᖢᑎᑦᑕᐅᖅ. ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᖁᑦᑎᒃᑐᒧᑦ, ᒥᔅᑕ ᑕᖅᑐ. ᑕᖅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᐱᓕᕆᕕᓯ ᐃᓕᓐᓂᐊᖅᑐᓕᕆᔨᒃᑯᑦ 2023-2024-ᒥ ᐊᕐᕌᒍᑕᒫᖅᓯᐅᑎᐅᑉ ᐅᓂᒃᑳᓕᐊᒥᓂᖏᑦ ᒪᓕᒐᓕᐅᕐᕕᒻᒨᖅᑕᐅᔪᒻᒪᑕ ᓰᑏᕝᕙ 17ᖑᑎᓪᓗᒍ, 2025-ᒥ. ᐅᖃᖅᓯᒪᔪᒻᒪᑕ ᐅᐸᖃᑦᑕᕐᓂᖏᒡᒎᖅ ᒥᑭᔫᑕᐅᓂᖅᐹᖏᓐᓂᑦ ᖁᑦᑎᖏᓂᓕᒃ 12ᒧᑦ, 69%-ᒦᓕᕐᓂᕐᖓᑕ. ᐊᕐᕌᒍᖓᓄᓪᓕᑭᐊᖅ 2024-25-ᒥ ᐅᐸᖃᑦᑕᕐᓃᑦ ᖃᓄᐃᓕᖓᓐᓂᖅᑲᑦ ᐃᓕᓴᕕᓐᓂ ᐅᐸᖃᑦᑕᕐᓃᑦ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᐅᑕᖅᑭᒐᓛᑲᐃᓐᓇᕆᔅᓯ. ᓈᓴᐅᑦ ᓴᖅᑭᖅᑎᒐᓱᐊᑲᐃᓐᓇᕋᑦᑎᒍᑦ. 2024-25-ᒧᑦ ᐅᐸᖃᑦᑕᕐᓂᒥᓂᖏᑦ 65%-ᒦᑦᑐᒥᓃᑦ ᐃᓕᓴᕕᓕᒫᑦ ᐃᓕᓐᓂᐊᖅᑎᓕᒫᑦ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 37 ᐃᒃᓯᕙᐅᑕᖅ: ᒪᓕᒐᓕᐅᖅᑎ ᖁᑦᑎᒃᑐᒧᑦ, ᒥᔅᑕ ᑕᖅᑐ. ᑕᖅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᖁᔭᓐᓇᒦᑦᑕᐅᖅ ᑭᐅᒐᕕᖓ. ᐱᓕᕆᕕᓯ ᐊᕐᕌᒍᑕᒫᖅᓯᐅᑎᒥᒃ ᐅᓂᒃᑳᓕᐊᒥᓂᖏᑦ ᐊᑖᒍᑦ ᐃᓕᓐᓂᐊᖅᑐᓕᕆᓂᕐᒧᑦ ᐱᖁᔭᕐᔪᐊᖓᓄᑦ ᐃᓕᓴᕕᑦᑎᒍᑦ ᓇᓗᓇᐃᖅᑐᐃᖃᑦᑕᙱᒻᒪᑕ ᐅᐸᖃᑦᑕᕐᓂᐅᓯᒪᔪᓂᒃ ᑕᐃᒪᙵᓂᑦ 2020-2021 ᐊᕐᕌᒍᑕᒫᖅᓯᐅᑎᓂ ᐅᓂᒃᑳᓕᐊᕆᓚᐅᖅᓯᒪᔭᖏᓐᓂ. ᐱᓕᕆᕕᓯ, ᐃᕝᕕᓪᓗ, ᐊᖏᖅᓯᒪᓂᖃᕈᓐᓇᖅᑭᓰ ᓯᕗᓂᕆᓛᖅᑕᑦᑎᓐᓂ ᐊᕐᕌᒍᑕᒫᖅᓯᐅᑎᓂᑦ ᐅᓂᒃᑳᓕᐊᒥᓂᕐᓂᒃ ᑕᐃᒪᐃᑦᑐᓂᒃ ᑐᑭᓯᒃᑲᓐᓂᕈᑎᔅᓴᓂᒃ ᐃᓚᖃᖅᑎᓪᓗᒋᑦ? (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᐃᓕᓐᓂᐊᖅᑐᓕᕆᔨᒃᑯᑦ ᐊᕐᕌᒍᑦ ᖃᑦᑏᓐᓇᕈᓗᐃᑦ ᐊᓂᒍᓕᖅᑐᐃᑦ, ᒪᓕᒐᓕᐅᖅᑎ ᐅᖃᕋᑖᕐᖓᑦ, ᐃᓕᓐᓂᐊᖅᑐᓕᕆᔨᒃᑯᑦ ᓄᖅᑲᓚᐅᖅᓯᒪᔪᑦ ᐃᓕᓴᕕᑦᑎᒍᑦ ᐅᐸᖃᑦᑕᖅᑐᓂᑦ ᓴᖅᑭᖅᓯᖃᑦᑕᓂᕐᒥᒃ, ᓄᓇᕗᑦ ᐊᕕᑦᑐᖅᓯᒪᓂᖏᑎᒍᖔᖅ ᐅᓂᒃᑳᓕᐅᖃᑦᑕᓕᔪᒻᒪᑕ. ᑖᓐᓇ ᒪᓕᓐᓂᐊᖅᑕᕗᑦ ᐸᕐᓇᐅᑎᓕᐊᖑᓯᒪᔪᖅ. ᐃᓕᓴᕕᑦᑎᒍᑦ ᐃᓛᒃᑯᑦ ᐅᐸᖃᑦᑕᕐᓃᑦ ᓈᓴᐅᑎᖏᑦ ᑕᑯᔭᐅᖃᑦᑕᔪᒻᒪᑕ ᐅᓂᒃᑳᕆᔭᐅᑎᓪᓗᒋᑦ. ᐃᓱᒫᓘᑎᖃᕐᕕᐅᓚᐅᖅᓯᒪᒻᒪᑕ ᑲᙳᑎᑦᑎᑎᒋᐊᖏᑕ ᓄᓇᓕᓐᓂᑦ ᐅᐸᖃᑦᑕᑎᑦᑎᑎᐊᙱᓂᖅᓴᐅᔪᓂ ᐊᓯᖏᓐᓂ ᓄᓇᓕᓐᓂ, ᑕᐃᒫᓪᓕ ᐃᓗᓕᖏᓐᓂᒃ ᓴᖅᑭᖅᓯᖃᑦᑕᕈᒪᓂᐊᕋᓗᐊᖅᑐᒍᑦ ᐊᕕᑦᑐᖅᓯᒪᔪᑎᒍᑦ, ᓄᓇᕗᑦ ᐱᖓᓱᓂᒃ ᐊᕕᑦᑐᖅᓯᒪᔪᖏᑎᒍᑦ. ᑲᙳᑎᑦᑎᑦᑕᐃᓕᒪᒐᓱᓪᓗᑕ ᓄᓇᓖᑦ ᐃᖅᑲᓇᐃᔭᖅᑎᖏᓐᓂᒃ, ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓂᓗ ᐊᒻᒪ ᐃᓚᒌᑦ ᐊᑦᑐᐊᓂᖃᕐᓂᕆᔭᖏᑦ ᐃᓕᓴᕕᓐᓄᑦ ᓇᓗᓇᐃᖅᑕᐅᔪᓄᑦ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᖁᑦᑎᒃᑐᒧᑦ, ᒥᔅᑕ ᑕᖅᑐ. ᑕᖅᑐ: ᖁᔭᓐᓇᒦᒃ, ᐃᒃᓯᕙᐅᑖᖅ. ᑖᓐᓇ ᐅᖃᐅᓯᕆᔭᐃᑦ ᑐᑭᓯᓇᕐᒪᑦ, ᖁᔭᓐᓇᒦᒃ. (ᑐᓵᔨᑎᒎᓕᖅᑐᖅ) ᐱᓕᕆᕕᓯ 2026-2030-ᒧᑦ ᐱᓕᕆᐊᔅᓴᓄᑦ ᐸᕐᓇᐅᑎᖓ ᐅᖃᖅᓯᒪᒻᒪᑦ ᐃᓚᖓᒎᖅ ᐸᕐᓈᕆᔭᖓ ᐱᓕᕆᐊᕆᓛᕐᓗᓂᐅᒃ 2026-2027 ᐊᕐᕌᒍᖓᓂ “ᐃᖅᑲᓇᐃᔭᖃᑎᖃᕐᓗᑎᒃ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᓂᑦ ᐅᐸᖃᑦᑕᕆᐊᖃᕐᓂᖅ ᓴᖅᑭᔮᕆᐊᖅᑎᑕᐅᓗᓂ, ᐊᑐᖅᑕᐅᖃᑦᑕᕐᓗᑎᓪᓗ ᐃᓕᓴᕖᑦ ᐊᖏᔪᖅᑳᖏᑕ ᐅᓂᒃᑳᓕᐊᒥᓂᖏᑦ ᐊᐅᓚᑦᑎᑎᐊᖅᑐᐃᑦ ᒪᓕᔅᓴᕆᐊᖅᑕᐅᖃᑦᑕᕐᓗᑎᒃ.” ᖃᓄᒃᑲᓐᓂᕐᓗ ᐱᓕᕆᒃᑲᓐᓂᕆᐊᔅᓴᖅ ᐃᓱᒪᔅᓴᖅᓯᐅᕈᑎᖃᖅᓯᒪᕕᓯ? (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᑕᑯᓐᓈᖅᑐᒋᑦ ᐃᓕᓴᐃᔩᑦ ᐊᖏᔪᖅᑳᖏᑕ ᐅᓂᒃᑳᓕᐊᒥᓂᖏᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓅᖅᑕᐅᕙᒻᒪᑕ ᐊᒻᒪᓗ ᐃᓕᓐᓂᐊᖅᑐᓕᕆᔨᒃᑯᑦ ᐱᓕᕆᕕᖓᓄᑦ. ᐊᒻᒪ ᐃᓕᓐᓂᐊᖅᑐᓕᕆᔨᒃᑯᑦ ᖃᐅᔨᓯᒪᔪᑦ ᐊᕐᕌᒍᓂᒃ ᐊᓂᒍᖅᑐᓂᒃ ᐃᓚᖏᑦ ᐃᓕᓴᕖᑦ ᐃᓚᖏᓪᓗ ᐃᓕᓴᕖᑦ ᐊᐅᓚᑦᑎᔨᖏᑦ ᐱᐅᓪᓚᕆᑦᑐᐊᓗᒻᒥᒃ ᐊᑦᑐᖅᓯᓂᖃᕈᓐᓴᕐᖓᑕ ᐅᐸᖃᑦᑕᖅᑎᑦᑎᓂᖅᓴᐅᕈᓐᓇᖅᑐᓂᒃ. ᐊᔾᔨᒌᙱᑦᑐᕈᓘᔭᕐᓂᒃ ᐱᒋᐊᖅᑎᑦᑎᓪᓗᑎᒃ ᐃᓚᖏᓐᓂᓪᓗ ᐱᖃᑕᐅᔾᔫᒥᑎᑦᑎᓗᑎᒃ ᐃᓕᓐᓂᐊᕐᓇᐅᒍᓐᓃᑎᑦᑎᓪᓗᒍᓗ ᐱᓕᕆᖃᑦᑕᕐᓂᐅᔪᓂᒃ. ᐃᓕᓐᓂᐊᖅᑐᓕᕆᔨᒃᑯᑦ ᐃᓕᓴᕖᑦ ᐊᖓᔪᖅᑳᖏᑕ ᐅᓂᒃᑳᖏᓐᓂᒃ ᐊᑐᖃᑦᑕᕈᒪᔪᐃᑦ. ᑕᐃᒃᑯᐊ ᐊᐅᓚᑦᑎᐊᖅᑐᐃᑦ ᖃᐅᔨᔭᐅᔪᐃᑦ ᐊᑕᐅᓯᕐᒥ ᓄᓇᓕᒻᒥ ᓯᐊᒻᒪᒋᐊᖅᑕᐅᖃᑦᑕᕐᓗᑎᒃ ᐊᓯᖏᓐᓄᑦ ᓄᓇᓕᓐᓄᑦ. ᐅᐸᖃᑦᑕᖅᑐᐃᑦ ᐊᒥᓱᕈᕆᐊᖁᒐᓗᐊᕋᑦᑎᒍᑦᑕᐅᖅ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 38 ᐃᓕᓐᓂᐊᖅᑐᓕᕆᔨᒃᑯᑦ ᓈᒻᒪᒋᔭᖃᑦᑎᐊᙱᒻᒪᑕ ᐅᐸᖃᑦᑕᑦᑎᐊᙱᓐᓂᐅᔪᓂᒃ ᒫᓐᓇ. ᐊᒥᓱᐊᓗᓐᓂᒃ ᐃᑲᔫᓯᐊᕈᓐᓇᕐᖓᑕ ᓯᕗᓂᕆᓛᖅᑕᖏᓐᓄᓪᓗ ᐃᑲᔪᖅᑕᐅᒍᓐᓇᕐᖓᑕ ᐃᓕᓐᓂᐊᕆᐊᖃᑦᑕᖅᑲᑕ. ᐃᓕᓐᓂᐊᖅᑐᓕᕆᔨᒃᑯᑦ ᐃᑲᔪᖅᓰᖃᑦᑕᕈᒪᔪᑦ ᐊᖓᔪᖅᑳᕆᔭᐅᔪᓂᒃ ᓱᕈᓯᕐᓂᓪᓗ ᐅᐸᖃᑦᑕᓂᖅᓴᐅᖁᓪᓗᒋᑦ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᐊᐃᕕᓕᖕᒧᑦ, ᒥᔅ ᐊᖑᑎᐊᓗᒃ. ᐊᖑᑎᐊᓗᒃ: ᖁᔭᓐᓇᒦᒃ, ᐃᒃᓯᕙᐅᑖᖅ. ᐊᐱᖅᑯᑎᒋᖅᑲᐅᔭᕋ ᐊᐱᕆᒃᑲᓐᓂᓕᕐᒥᔪᖓ. ᓯᕗᓪᓕᕐᒥ ᐅᖃᖅᑳᕐᓚᖓᐃ, ᐳᓛᕆᐊᓚᐅᕋᑦᑕ ᕿᒥᕐᕈᒋᐊᖅᑐᓚᐅᕋᑦᑕ ᕕᐊᕆᓗ ᐃᓕᓐᓂᐊᕐᕕᖕᒥᒃ. ᐱᐅᔪᐊᓘᓕᖅᑐᖅ ᕿᑎᒡᕕᖓ ᐊᒻᒪ ᐱᖓᓱᑦ ᐃᓕᓐᓂᐊᕐᕖᑦ ᐱᐊᓂᒃᓯᒪᓕᖅᑐᑦ, ᐱᐅᔪᐊᓘᓚᐅᖅᑐᖅ. ᖁᔭᓐᓇᒦᒃ. ᑖᓐᓇᓕ ᐊᐱᖅᑯᑎᒐᐃ, ᐊᐱᕆᖁᔭᐅᓚᐅᖅᓯᒪᒐᒪ ᐃᓕᓐᓂᐊᕐᕕᐅᑉ ᕿᑎᒡᕕᖓ, ᐊᑐᖅᑕᐅᔪᓐᓇᕋᔭᕐᒪᖔᑦ ᐊᐅᔭᖅ ᓄᖅᑲᖓᓕᖅᐸᑕ ᓄᑕᕋᐃᑦ ᐃᓕᓐᓂᐊᕌᓂᒃᐸᑕ, ᑕᐃᓐᓇ ᓄᑖᖅ, ᖃᓄᖅᑑᓚᐅᕐᓚᖓᑐᕉᓚᔭᐅᓚᐅᕋᒪ ᐊᐱᖅᑯᑎᒋᔭᕋ ᑖᓐᓇ. ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᐊᐅᔭᐅᑎᓪᓗᒍ, ᐱᙳᐊᕐᕖᑦ ᐃᓕᓴᕖᑦ ᐊᑐᖅᑕᐅᓂᖏᑦ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᐅᓚᑕᐅᓲᖑᒻᒪᑕ, ᐃᒪᐃᑦᑐᖅᑕᖃᕐᓂᐊᖅᑲᑦ ᐊᐅᔭᒃᑯᑦ ᐃᓕᓐᓂᐊᖅᑏᑦ ᐱᓕᕆᑎᑕᐅᖃᑦᑕᕐᓗᑎᒃ ᐅᕝᕙᓘᓐᓃᑦ ᓱᔪᖃᕐᓂᐊᖅᑲᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ ᑐᔅᓯᕋᐅᑎᓕᐅᕆᐊᓖᑦ. ᑕᐃᒃᑯᐊᓗ ᑐᔅᓯᕋᐅᑎᒥᒃ ᕿᒥᕐᕈᒐᔭᖅᑐᐃᑦ ᑕᐃᒪᐃᖁᔨᒻᒪᖔᑕ ᐃᓱᒪᔅᓴᖅᓯᐅᕈᑕᐅᒐᔭᕐᖓᑕ. ᓴᓪᓕᕐᒥᐅᑦ ᐅᖃᐅᓯᕆᓗᒋᑦ, ᐃᓕᓴᕕᐅᑉ ᐱᖁᑎᖏᑦ ᓴᐳᒻᒥᔭᐅᒋᐊᖃᕐᒥᒻᒪᑕᑦᑕᐅᖅ ᐊᒻᒪ ᓴᓗᒻᒪᓴᖅᑕᐅᑦᑎᐊᖃᑦᑕᖅᐸᑕ ᓱᔪᖃᒪᐅᖅᑎᓪᓗᒍ ᑕᒪᒃᑯᐊ ᒪᓕᑦᑕᐅᒋᐊᖃᕋᔭᕐᒥᔪᐃᑦ. ᐃᓕᓐᓂᐊᖅᑐᓕᕆᔨᒃᑯᑦ ᖃᐅᔨᒪᒻᒪᑕ ᓄᓇᓕᓐᓄᑦ ᐱᒻᒪᕆᐊᓘᕙᒻᒪᑕ ᑕᐃᒪᐃᑦᑐᑦ ᐱᙳᐊᕐᕖᑦ. ᑕᐃᒫᒃ ᑕᕝᕙ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐃᑲᔪᖅᓯᒐᓱᐊᓲᖑᕗᑦ ᐊᑐᖅᑕᐅᕖᙵᖅᑎᑕᐅᒐᓱᑦᑐᑎᒃ ᐱᙳᐊᕐᕖᑦ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᐊᐃᕕᓕᖕᒧᑦ, ᒥᔅ ᐊᖑᑎᐊᓗᒃ. ᐊᖑᑎᐊᓗᒃ: ᖁᔭᓐᓇᒦᒃ, ᒥᓂᔅᑕ ᒪᐃᓐ. ᐄ’, ᑕᒡᕙ ᑐᓵᔭᐅᔪᒃᓴᐅᕗᒍᑦ ᐅᕝᕙᓘᓐᓃᑦ ᑕᐅᑐᒃᑕᐅᔪᒃᓴᐅᕗᒍᑦ ᑭᐅᔭᐅᑎᓪᓗᖓ. ᖃᓄᖅ. ᓄᑖᖑᓗᐊᖅᑎᓪᓗᒍᑦᑕᐅᖅ ᐊᓐᓂᕐᓇᐅᒐᓗᐊᖅ ᒪᑐᐃᕌᓂᙱᑎᓪᓗᒍ, ᐱᐊᓂᙱᑎᓪᓗᒍ ᐃᓕᓐᓂᐊᕐᕕᒃ. ᐱᐊᓂᑦᑎᐊᖅᐸᑦ ᖃᓄᐃᓛᖅᐸᑭᐊᖅ. ᖁᔭᓐᓇᒦᒃ. ᑕᐃᒪᓕ. ᐃᒃᓯᕙᐅᑕᖅ: ᒥᔅᑕ ᒪᐃᓐ, ᐅᖃᐅᓯᑐᐃᓐᓇᕐᒥᓂᑦ ᓂᓪᓕᕐᕕᖃᕈᒪᕕᑦ? ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ, (ᑐᓵᔨᑎᒎᓕᖅᑐᖅ) ᐅᖃᐅᓯᐅᕋᑖᖅᑐᒥᑦ ᐅᖃᕐᕕᖃᕈᒪᔪᖓ. ᑕᐃᓐᓇ ᐱᓕᕆᐊᖑᔪᖅ ᓴᓪᓕᕐᒥ ᑖᓐᓇ ᐱᔭᕇᖅᑕᐅᕕᔅᓴᖃᕐᖓᑦ ᑭᓯᐊᓂ 2027 ᓄᙳᕈᔪᐊᓂ. ᓄᑖᕐᓗ ᐱᙳᐊᕐᕕᒃ ᐊᑐᖅᑕᐅᒍᓐᓇᑐᐃᓐᓇᕆᐊᓕᒃ ᑐᖅᑯᖅᓯᒪᕕᐅᓗᓂ ᓯᕐᓗᐊᕆᔭᐅᓗᓂ ᐃᓕᓴᕕᒻᒥᐅᑕᔅᓴᓄᑦ ᓴᓇᔭᐅᑎᓪᓗᒍ ᐃᓂᒋᔭᐅᑎᑕᐅᑲᐃᓐᓇᑐᐃᓐᓇᕆᐊᖃᕐᖓᑦ. ᑖᓐᓇᑦᑕᐅᖅ ᐃᓱᒪᒋᔭᐅᒋᐊᕆᐊᖃᑐᐃᓐᓇᕆᐊᖃᕐᒥᔪᖅ. ᐅᖃᐅᓯᕆᑐᐃᓐᓇᕈᒪᕋᑖᕋᒃᑯ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᐊᑎᖁᑎᖃᕈᓐᓃᖅᑰᕋᒪ ᐊᐱᖅᑯᖅᑎᒃᓴᑦ ᒥᒃᓵᓄᑦ. ᐄᑯᓗᒃ. ᒪᓕᒐᓕᐅᖅᑎ ᐸᓐᓂᖅᑑᒧᑦ, ᒥᔅᑕ ᒪᐃᒃ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 39 ᒪᐃᒃ: ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᓕᓐᓂᐊᕕᓐᓂᒃ ᓂᕆᖃᑦᑕᕐᓂᐅᑉ ᓂᕿᖃᖅᑎᑕᐅᖃᑦᑕᕐᓂᖏᓐᓂᒃ ᒥᔅᓵᓄᑦ ᐊᐱᕆᔪᒪᓕᕐᒥᒐᒪ. ᑕᐃᒪ ᕕᕗᐊᕆ 28-ᖑᑎᓪᓗᒍ, 2025, ᑖᒃᑯᐊ ᒐᕙᒪᐃᑦ ᐱᓕᕆᓚᐅᖅᓯᒪᔪᒥᓂᐅᒻᒪᑕ ᐊᖏᖃᑎᒌᒍᑎᒥᒃ, ᑖᒃᑯᐊ ᐱᔾᔪᑎᒋᓪᓗᒋᑦ ᐃᓕᓐᓂᐊᕐᕕᒻᒥ ᓂᕆᖃᑦᑕᕆᐊᓖᑦ, ᓂᕆᔭᔅᓴᖃᖃᑦᑕᕆᐊᓖᑦ. (ᑐᓵᔨᑎᒎᓕᖅᑐᖅ) ᐱᓕᕆᕝᕕᓯ 2026-2030ᒧᑦ ᐸᕐᓇᐅᑎᖓ ᐅᖃᖅᓯᒪᖕᒪᑕ ᐃᓚᖏᑦ ᐸᕐᓇᒃᓯᒪᔭᖏᑦ ᐊᐅᓚᔾᔪᑎᒃᓴᐃᑦ 2026-27 ᐃᓗᐊᓂ ᓴᓇᖁᓪᓗᒋᑦ ᓄᓇᕗᒻᒥ ᑐᕌᖓᔪᓂᒃ ᓂᕆᔾᔪᑎᒃᓴᓄᑦ ᒪᓕᒐᕆᓂᐊᖅᑕᖏᓐᓄᑦ. ᖃᓄᐃᑦᑐᓄᑦ ᑕᒪᒃᑯᐊ ᑭᐅᓯᓯᒪᓂᐊᖅᐸ ᑭᓱᓂᒃ? ᖁᔭᓐᓇᒦᒃ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᑖᒃᑯᐊ ᑕᒪᒃᑯᐊ ᑭᐅᔭᐅᓂᐊᖅᑐᒃᓴᐅᔪᑦ ᐃᓗᐊᓂ ᑕᖅᑲᒪᓂ ᖃᓄᐃᑦᑐᓂᒃ ᓂᕿᓂᒃ ᓂᕿᖃᖅᑎᑦᑎᔭᕆᐊᖃᕐᒪᖔᑕ ᓯᕗᓪᓕᐅᔾᔭᐅᓯᒪᓂᐊᕐᒪᑕ ᒫᓐᓇᐅᔪᖅ ᒫᓐᓇ ᓂᕆᔾᔪᑎᒃᓴᓂᒃ ᒪᓕᖃᑦᑕᕐᒪᑕ. ᓄᓇᕗᒻᒧᑦ ᑐᕌᖓᔪᑦ ᑖᒃᑯᐊ ᓇᓕᖅᑯᑕᐅᑐᐃᓐᓇᙱᓪᓗᑎᒃ ᐃᖅᑲᓇᐃᔭᖅᑎᓄᑦ. ᐊᒻᒪᓗᑦᑕᐅᖅ ᑕᖅᑲᒪᓃᑦᑐᖃᕐᒪᑦ ᓂᖀᑦ ᐊᑦᑕᓇᔾᔭᖅᓯᒪᔭᕆᐊᖃᕐᓂᖏᓐᓄᑦ ᑭᐅᔭᐅᖁᔾᓗᒋᑦ. ᓂᕿᑦᑎᐊᕙᓕᕆᓂᖅ, ᓂᖀᓪᓗ ᐊᑦᑕᓇᔾᔭᐃᖅᓯᒪᔭᕆᐊᖃᙱᓐᓂᖏᓐᓂᒃ ᑕᖅᑲᒪᓂ ᐃᓗᓕᖃᖅᑐᑦ ᑖᒃᑯᐊ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᐸᓐᓂᖅᑑᒧᑦ, ᒥᔅᑕ ᒪᐃᒃ. ᒪᐃᒃ: ᖁᔭᓐᓇᒦᒃ, ᐃᒃᓯᕙᐅᑖᖅ. ᖁᔭᓐᓇᒦᒃ ᒥᓂᔅᑕ. ᐃᓛᒃ ᐃᓱᒪᓇᖃᑦᑕᕐᖓᑦ ᑕᒪᒃᑯᐊ ᓂᕿᓕᐅᕐᕖᑦ ᐊᓯᖏᓪᓗ ᓇᑉᐸᕆᐊᓖᑦ ᓂᕿᓕᕆᓂᖅ ᐃᓕᓐᓂᐊᕐᕕᐅᑉ ᐃᓗᐊᓂ ᐱᔾᔪᑎᒋᓪᓗᒍ. ᑕᒪᒃᑯᐊ ᐃᓱᒪᓴᒋᔭᐅᕚᑦ ᑖᓐᓇ ᕿᒥᕐᕈᔭᐅᑎᓪᓗᒍ, ᐸᕐᓇᑕᐅᑎᓪᓗᒍ. ᐃᓛᒃ ᑐᑭᓯᓇᖅᑐᖅ, ᑖᒃᑯᐊ ᖃᓂᒪᓐᓇᙱᑦᑐᓕᕆᔨᒃᑯᓪᓗ ᐃᓄᓕᕆᔨᒃᑯᓪᓗ ᐊᓯᖏᓪᓗ ᑕᒪᒃᑯᐊ ᓄᓇᕗᑦ ᑐᙵᕕᒃᑯᓪᓗ ᑕᒪᒃᑯᓂᖓ ᐱᓕᕆᖃᑕᐅᖃᑦᑕᖅᑐᐃᑦ ᐃᓕᓐᓂᐊᕐᕕᐅᑉ ᐃᓗᐊᓂ ᐃᓕᓐᓂᐊᖅᑎᓄᑦ ᓂᕆᔭᔅᓴᓄᑦ. ᖃᐅᔨᒪᙱᑦᑐᖓ ᐅᓪᓛᕈᒻᒥᑕᕐᓂᐊᕐᒪᖔᖅ ᐅᕝᕙᓘᓐᓃᑦ ᐅᓪᓗᕆᒻᒥᑕᕐᓂᐊᕐᒪᖔᖅ. ᑕᒪᒃᑯᐊ ᑕᖅᑲᒃᑯᐊ ᓈᓚᑦᑐᑦ ᐅᕙᖓᑎᑐᑦ ᐃᓚᖏᑦ ᑐᑭᓯᐅᒪᙱᒻᒪᑕ ᑐᑭᓯᑎᑕᐅᒋᐊᕈᓐᓇᖅᑭᑕ? ᖁᔭᓐᓇᒦᒃ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᐄ, ᒪ’ᓇ, ᐃᒃᓯᕙᐅᑖᖅ. ᐄ’, ᑖᓐᓇ ᐊᐱᖅᑯᓯᒃᓴᑦᓯᐊᕐᔪᐊᖅ. ᑖᑉᑯᐊ ᑮᓇᐅᔭᐃᑦ ᑕᑯᒍᑦᑎᒍᑦ ᑖᒃᑯᐊ $7.6-ᒥᓕᐊᓐ ᐃᓚᖓ ᑖᒃᑯᓄᖓ ᐃᓕᓐᓂᐊᕐᕖᑦ ᐃᓗᐊᓂ ᐱᖁᑎᒋᔭᐅᔪᓄᑦ ᖃᓄᖅ ᖃᐅᔨᓴᖅᑕᐅᒋᐊᖃᕐᓂᖏᓐᓄᑦ ᑐᕌᖓᑎᑕᐅᓯᒪᔪᑦ, ᐊᒻᒪ ᐃᓚᖓᒍᑦ ᓄᑖᓂᒃ ᓂᐅᕕᕈᑕᐅᔫᓪᓗᐊᖅᖢᑎᒡᓗ, ᐆᒃᑑᑎᒋᓗᒋᑦ ᑖᒃᑯᐊ ᖃᕿᐅᓯᕖᑦ, ᐃᒐᔾᔪᑎᓗᖀᑦ ᑕᒪᓐᓇ ᐱᐅᔫᒐᓗᐊᖅ ᑭᓯᐊᓂ ᐃᓕᑕᕆᔭᕗᑦ ᑖᓐᓇ $7.6 ᒥᓕᐊᓐ ᒥᑭᓗᐊᕐᒪᑦ ᐊᒥᒐᖅᓯᓂᖅᑕᖃᓪᓚᕆᖕᒪᑦ ᓱᓕ. ᑐᑭᓯᐅᒪᖦᖢᑕᓗ ᐅᑯᐊᓕ ᓄᓇᕗᑦ ᑐᙵᕕᒃᑯᑦ $15-ᒥᓕᐊᓐ ᑐᓂᔭᐅᔫᓐᓃᑦ ᐃᓕᓐᓂᐊᕐᕖᑦ ᐃᓗᐊᓄᑦ ᓂᕆᑎᑦᑎᑕᕈᑕᐅᔫᓪᓗᐊᖅᑐᓂᒃ ᑐᓂᔭᐅᓚᐅᕐᒪᑕ ᑕᒪᓐᓇ ᐃᑲᔫᑕᐅᓇᔭᖅᑑᒐᓗᐊᖅ. ᑐᑭᓯᐅᒪᔭᒃᑯᑦ ᐱᓕᕆᖃᑎᖃᖅᑑᒐᐃᓗᑦ ᓄᓇᓕᖕᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᕋᓛᖏᑦ ᑕᒪᒃᑯᓂᖓ ᐱᓕᕆᖃᑎᖃᖅᑑᒐᓗᐃᑦ ᑐᙵᕕᒃᑯᑦ ᐃᓕᓐᓂᐊᖅᑐᓕᕆᔨᕋᓛᓄᑦ ᑐᓂᐅᖅᑲᖅᑕᐅᔫᓪᓗᐊᕐᓂᐊᕐᒪᑕ ᑕᒪᒃᑯᐊ ᑮᓇᐃᔭᐃᑦ. ᐊᒥᒐᖅᓯᓂᖅᑕᖃᕐᓂᖓ ᐅᔾᔨᕆᔭᕗᑦ ᓱᓕ. ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᐸᓐᓂᖅᑑᒧᑦ, ᒥᔅᑕ ᒪᐃᒃ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 40 ᒪᐃᒃ: ᖁᔭᓐᓇᒦᒃ, ᐃᒃᓯᕙᐅᑖᖅ. ᖁᔭᓐᓇᒦᒃ ᒥᓂᔅᑕ. ᖃᖓᑭᐊᕐᖓᐃ ᓴᖅᑮᓛᖅᑭᓯ, ᐃᓛᒃ ᒫᓐᓇ 2026-2027 ᓴᓇᔪᒫᕐᓂᐊᕐᕙᓗᒻᒪᑕ ᓄᓇᕗᓪᓗᐊᑕᕐᒧᑦ ᐃᓐᓕᓂᐊᕐᕕᖕᓂ ᓂᕿᖃᖅᑎᑦᑎᓂᕐᒧᑦ ᐱᓕᕆᐊᕐᒧᑦ ᒪᓕᒐᒃᓴᑦ. ᖃᖓ ᑖᓐᓇ ᓴᖅᑭᕋᔭᖅᑲ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᑖᒃᑯᐊ ᒪᓕᒐᖏᑦ ᐱᔭᕇᖅᑕᐅᔪᒪᔪᑦ ᑮᓇᐅᔭᓕᕆᓐᓇᐅᑉ ᐊᕐᕌᒍᐊ ᐃᓱᓕᑉᐸᑦ 2026-2027 ᐃᓱᐊᓂ. (ᑐᓵᔨᑎᒎᕈᓐᓂᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᐃᖃᓗᒃᑑᑦᑎᐊᕐᒧᑦ, ᒥᔅᑕ ᐲᑕᓴᓐ. ᐲᑕᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᐱᓕᕆᕕᓯ ᑐᒃᓯᕋᐅᑎᖓ 2026-2027 ᒥᒃᓴᐅᓴᒃᓯᒪᖕᒪᑕ ᐊᖓᔪᖅᑳᖃᕐᕕᒃ ᐊᑐᖅᑕᐅᓂᐊᖅᑐᖅ ᑳᓐᑐᕌᒃᑕᐅᓯᒪᔪᓄᑦ $2.185 ᒥᓕᐊᓐ 2025-2026 ᐊᕐᕌᒍᐊᓂ $4.884- ᒥᓕᐊᓐ 2026-2027 ᐊᕐᕌᒍᐊᓄᑦ. ᐊᑭᑦᑐᕆᐊᖅᑐᖅ 123%ᒥᒃ. ᑭᓱᓂᒃ ᐱᔾᔪᑎᖃᖅᐸᒃᖢᓂ ᐊᑭᑦᑐᕆᐊᖅᓯᒪᕙ ᑖᓐᓇ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᑖᒃᑯᐊ ᐊᔾᔨᒌᖕᒪᑕ ᑖᔅᓱᒥᖓ ᐱᔾᔪᑎᖃᖅᑐᑦ. ᐊᑭᑦᑐᕆᐊᕈᑎᒃᓴᐅᔭᕆᐊᖃᖅᑐᑦ. ᑖᒃᑯᓄᖓ ᖃᑦᑎᕆᔾᔪᑎᓂᒃ ᓇᐃᑦᑎᖅᓱᐊᖃᕐᓂᖅ ᓂᐅᕕᖅᑕᐅᖃᑦᑕᖅᑐᓪᓗ ᐅᓄᖅᓯᒋᐊᕐᒥᖕᒪᑕ ᓴᓗᒻᒪᖅᓴᐃᔾᔪᑎᒃᓴᓄᑦ ᐊᑐᖅᑕᐅᓂᐊᖅᑐᑦ ᐃᓕᓴᔾᔪᑎᒃᓴᐃᓪᓗ ᓴᓗᒻᒪᖅᓴᐃᔨᓄᑦ. ᐊᒻᒪᓗᑦᑕᐅᖅ ᑳᓐᑐᕌᒃᑕᐅᖃᑦᑕᖅᑐᖅ ᐊᑐᐊᒐᒃᓴᐅᓕᕐᓂᕐᒧᑦ, ᖃᕆᓴᐅᔭᖏᓪᓗ ᓄᑖᕈᕆᐊᖅᑕᐅᔾᔪᑎᖏᑦ, ᑐᓴᐅᒪᔾᔪᑎᖏᓪᓗ, ᐊᒻᒪ ᐱᓕᕆᕕᖕᒧᑦ ᐸᕐᓇᐅᑏᑦ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᐊᐱᖅᑯᑎᒃᓴᑦ (ᑐᓵᔨᑎᒎᓕᖅᑐᖅ) ᐊᖓᔪᖅᑳᖃᕐᕕᐅᑉ ᐊᑖᒍᑦ (ᑐᓵᔨᑎᒎᕈᓐᓃᖅᑐᖅ) ᐱᑕᖃᕈᓐᓃᖅᑰᕐᒪᑦ. (ᑐᓵᔨᑎᒎᓕᖅᑐᖅ) ᒪᓕᒐᓕᐅᖅᑏᑦ ᐊᖏᖅᐸᑦ ᐃᓕᓐᓂᐊᖅᑐᓕᕆᔨᒃᑯᑦ ᐊᑐᕈᒫᖅᑕᖓ ᐊᖓᔪᖅᑳᖃᕐᕕᖕᒧᑦ ᐊᐅᓚᑦᔪᑎᓄᑦ ᐋᖅᑭᐅᒪᐃᓐᓇᕈᑎᓄᓪᓗ $23,467,000 ᐊᖏᖅᐱᓯᐅᒃ? ᐃᓚᖏᑦ ᑲᑎᒪᔩᑦ: ᐊᖏᖅᑐᑦ. ᐃᒃᓯᕙᐅᑕᖅ (ᑐᓵᔨᑎᒍᑦ): G5ᒧᐊᕆᑦᑎ. ᒫᓐᓇ ᕿᒥᕐᕈᓇᖕᓂᐊᕋᑦᑎᒍᑦ ᐃᓕᓐᓂᐊᖅᑐᓕᕆᔨᒃᑯᑦ ᐃᓕᓐᓂᐊᕐᕕᖕᓄᑦ ᐊᐅᓚᑦᑎᔾᔪᑎᓄᑦ ᐊᑐᕈᒫᖅᑕᖏᑦ. ᑲᑎᒪᔩᑦ ᐊᐱᖅᑯᑎᒃᓴᖃᖅᐸᑦ? (ᑐᓵᔨᑎᒎᕈᓐᓃᖅᑐᖅ) ᒪᓕᒐᓕᐅᖅᑎ, ᒥᔅᑕ ᑲᐅᑐᒃ. ᑲᐅᑐᒃ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᐱᓕᕆᕕᓯ ᑐᒃᓴᕋᐅᑎᖓ 2026-2027-ᒥ ᐊᑐᕈᒫᖅᑐᓄᑦ ᐅᖃᖅᓯᒪᖕᒪᑕ ᐃᓕᓐᓂᐊᕐᕕᖕᒧᑦ ᐊᐅᓚᑦᑎᔾᔪᑏᑦ ᐊᑭᓕᖅᓱᐃᔾᔪᑏᑦ ᐃᖅᑲᓇᐃᔭᖅᑎᓄᑦ ᐃᓄᐃᓴᒡᓕᒋᐊᕐᓂᐊᕐᒪᑦ $184.681-ᒥᓕᐊᓐ 2025-2026ᒥᑦ $181.734-ᒥᓕᐊᓐ ᐊᕐᕌᒍᐊᓂ 2026-2027-ᒥ. ᑖᒃᑯᐊ ᐃᓄᐃᓴᒡᓕᒋᐊᕐᒪᑦ ᑖᒃᑯᐊ 1.5%ᒥᒃ. ᑭᓱᓂᒃ ᐱᔾᔪᑎᖃᖅᖢᓂ ᑕᐃᒪᐃᓕᕙ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᑖᓐᓇ ᐃᒪᓐᓇᐃᓕᓯᒪᔪᖅ ᑖᒃᑯᐊ ᐱᓕᕆᕕᒃ ᐃᓐᓄᒃᓯᒪᙱᓐᓂᖏᓐᓄᑦ ᐃᖅᑲᓇᐃᔮᑦ ᓄᒃᑎᖅᑎᕆᔾᔪᑕᐅᓚᐅᖅᑐᑦ ᐃᓄᐃᓴᒡᓕᒋᐊᖅᑕᕗᖅ ᑖᓐᓇ ᐅᖃᐅᓯᖃᖅᑐᖅ ᑮᓇᐅᔭᐃᑦ ᐊᑐᖅᑕᐅᙱᑦᑐᑦ ᐊᓯᖏᓐᓄᑦ ᐊᑐᖅᑕᐅᔭᕆᐊᓕᖕᓄᑦ ᓄᒃᑎᖅᑕᐅᓪᓗᑎᒃ ᐱᓕᕆᕕᐅᑉ ᐃᓗᐊᓂ. ᑖᒃᑯᐊᓗ ᑮᓇᐅᔭᖏᑦ ᐊᑐᖅᑕᐅᓂᐊᖅᑐᑦ ᑮᓇᐅᔭᖃᖅᑎᑦᑎᔾᔪᑎᖏᓐᓂᒃ ᐃᓕᓐᓂᐊᖅᑏᑦ ᐃᓐᓇᕐᓄᑦ ᓄᓇᕗᒻᒥ ᓯᓚᑦᑐᖅᓴᕐᕕᖕᒥᑦᑐᑦ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 41 ᐃᒃᓯᕙᐅᑕᖅ: ᒪᓕᒐᓕᐅᖅᑎ ᐅᖅᑯᕐᒥᐅᓄᑦ, ᒥᔅᑕ ᑲᐅᑐᒃ. ᑲᐅᑐᒃ: ᖁᔭᓐᓇᒦᒃ, ᐃᒃᓯᕙᐅᑖᖅ. ᖁᔭᓐᓇᒦᒃ ᒥᓂᔅᑕ, ᑭᐅᒐᕕᑦ. (ᑐᓵᔨᑎᒎᓕᖅᑐᖅ) ᔫᓐ 2, 2025ᖑᑎᓪᓗᒍ ᑎᑎᕋᐅᓯᐅᓚᐅᕐᒪᑕ ᒥᓂᔅᑕᒋᓚᐅᖅᑕᖓᓂᑦ ᐃᓕᓐᓂᐊᖅᑐᓕᕆᔨᒃᑯᑦ ᓴᖅᑭᑕᐅᓚᐅᕐᒪᑦ ᒪᓕᒐᓕᐅᕐᕕᖕᒥ. ᑎᑎᕋᖅ ᐱᖃᓯᐅᔾᔨᓚᐅᕐᒪᑦ ᐊᑐᓕᖅᑎᑦᑎᔾᔪᑎᒃᓴᖓ ᓄᓇᕗᒻᒥ ᐃᓕᓴᐃᔾᔪᑎᒃᓴᑦ ᐃᓕᓴᓕᓵᖅᑐᓄᑦ ᖁᑦᑎᖕᓂᓕᒃ 12ᒧᑦ. ᑎᑎᕋᐅᓯᐊᖅ ᐅᖃᖅᓯᒪᓕᕐᒪᑕ ᐱᓕᕆᕕᒎᖅ “ᓂᕆᐅᖕᒪᑦ ᓄᓇᕗᒻᒥ ᐃᓕᓐᓂᐊᕈᑎᒃᓴᐃᑦ ᓄᓇᕗᒻᒥ ᐊᑐᓕᖅᑎᑕᐅᔪᐃᓐᓇᐅᖁᓪᓗᒋᑦ ᐃᓘᓐᓇᖏᓐᓂ ᐃᓕᓐᓂᐊᖅᑏᑦ ᖁᑦᑎᖏᓂᕆᔭᖏᓐᓄᑦ ᐊᕐᕌᒍ 2026-2036ᒧᑦ ᑎᑭᓪᓗᒍ.” ᑖᓐᓇ ᐱᓕᕆᕕᒃ ᐃᓱᒪᕙ ᑖᓐᓇ ᐱᓪᓚᑦᑖᕋᓱᒋᓪᓗᒍ ᐊᑐᓕᖅᑎᑕᐅᕝᕕᒃᓴᖓ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. ᑕᒪᓐᓇ ᑕᐅᑐᒃᖢᒍ ᒫᓐᓇ ᐊᖑᒪᑦᓯᐊᖅᑐᑦ ᑖᒃᑯᐊ ᐃᓕᓐᓂᐊᕐᔪᐊᖅᑐᓕᕆᔨᕐᔪᐊᒃᑯᑦ ᑖᒃᑯᓂᖓ (ᑐᓵᔨᑎᒍᑦ) ᐅᖃᕐᓂᐊᖅᑕᕋ. ᐃᓕᓐᓂᐊᕈᑎᒃᓴᓂᒃ ᖃᐅᔨᒪᙱᓐᓇᒪ ᐅᖃᕆᐊᒃᓴᖅ ᐃᓄᒃᑎᑐᑦ. ᐱᓕᕆᕕᒃ ᐊᖏᖅᓯᒪᑦᑎᐊᖅᑐᑦ ᑖᔅᓱᒥᖓ ᐱᓕᕆᐊᖃᕐᓂᕐᒧᑦ ᐱᓕᕆᕕᒃ ᐅᔾᔨᕈᓱᖕᒪᑦ ᐃᓕᓐᓂᐊᕈᑎᒃᓴᓂᒃ ᐃᓄᒃᑎᑐᑦ ᑕᐃᒪᓐᓇ ᓄᓇᕐᔪᐊᕐᒦᑦᑐᓄᑦ ᐃᓕᓴᐃᔾᔪᑎᖃᖃᑦᑕᕐᓗᑎᒃ ᑕᐃᒪᓐᓇ ᐱᐅᓂᖅᐹᒥᒃ ᐱᔭᕇᖅᓯᔪᓐᓇᕐᓂᐊᕐᒪᑕ. ᒪᕐᕉᖕᓂᒃ ᐅᖃᐅᓰᕐᓂᒃ ᐊᑐᕐᓗᑎᒃ ᐃᓕᓐᓂᐊᕐᓂᕐᒥᓂᒃ ᐱᔭᕇᖅᓯᔪᓐᓇᖁᓪᓗᒋᑦ. ᑖᓐᓇ ᐸᕐᓇᒃᓯᒪᔭᕗᑦ ᑖᔅᓱᒥᖓ ᐊᖑᒻᒪᑎᑦᑎᐊᖅᑐᖅ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᖁᕐᓗᖅᑑᕐᒧᑦ ᒪᓕᒐᓕᐅᖅᑎ, ᒥᔅᑕ ᖁᓕᒃᑖᓇ. ᖁᓕᒃᑖᓇ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᐱᓕᕆᕕᐅᑉ ᐆᒃᑐᕋᐅᑎᓕᐊᖏᑦ 2026-2027 ᒥ ᐊᑐᕈᒫᖅᑕᖏᑦ ᐅᖃᖅᓯᒪᖕᒪᑕ ᐅᓄᑲᓪᓚᒃᑐᑦ ᐃᖅᑲᓇᐃᔮᒃᓴᑦ ᕿᑎᕐᒥᐅᓂ ᐃᓕᓐᓂᐊᕐᓂᕐᒧᑦ 242.5 ᐃᓂᐅᔪᑦ 2025-2026 ᐊᕐᕌᒍᐊᓂ 248.5 ᐃᓂᐅᔪᑦ 2026-2027 ᐊᕐᕌᒍᐊᓂ. ᑭᓱᒥᒃ ᓴᖅᑭᑦᑎᓂᐊᕋᔅᓯ ᑕᕝᕙᓂ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᑕᓗᕐᔪᐊᓂ ᐃᓚᒋᐊᖅᓯᓯᒪᔪᖅ ᐃᓕᓴᐃᔩᑦ ᐊᖓᔪᖅᑳᖓᑦ, ᑎᑎᕋᖅᑎ, ᒪᕐᕉᒃ ᐃᓕᓴᐃᔩᒃ, ᒪᕐᕉᒡᓗ ᓴᓗᒻᒪᖅᓴᐃᔩᒃ, ᑖᒃᑯᓂᖓ ᐊᑐᖅᑕᐅᓂᐊᖅᑐᖅ ᐸᖕᓂᖅ ᐃᓕᓐᓂᐊᕐᕕᐊᓗᐊ ᒪᑐᐃᖅᑕᐅᒃᐸᑦ ᐊᑐᖅᑕᐅᓂᐊᖅᑐᖅ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᖁᕐᓗᖅᑑᒧᑦ, ᒥᔅᑕ ᖁᓕᒃᑖᓇ. ᖁᓕᒃᑖᓇ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ ᐊᒻᒪᓗ ᖁᔭᓐᓇᒦᒃ ᑭᐅᒐᕕᑦ. 248 ᑖᒃᑯᐊ. ᖃᔅᓯᑦ ᐊᒡᒍᖅᑐᖅᓯᒪᔪᓂᒃ ᐃᖅᑲᓇᐃᔭᖅᑏᑦ ᐃᓐᓄᒃᑕᐅᓯᒪᙱᓚᑦ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᐅᐊᑦᑎᐊᕈ ᐊᐃ. ᐅᑯᐊ ᐃᖅᑲᓇᐃᔭᖅᑏᑦ ᓇᓗᓇᐃᖅᑎᓐᓇᓱᖕᒪᑎᒃ. ᑭᓯᐊᓂ ᐃᓐᓄᒃᑕᐅᓯᒪᙱᑦᑐᑦ ᑖᒃᑯᐊ ᓇᓗᓇᐃᕈᓐᓇᖅᖢᒋᑦ. ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓄᑦ ᐃᖅᑲᓇᐃᔭᖅᑏᑦ 25%ᒥᒃ ᐃᓐᓄᒃᑕᐅᓯᒪᙱᑦᑐᑦ 25%. ᐊᒻᒪᓗ ᓄᓇᕗᒻᒥ ᐃᓕᓴᐃᔩᑦ ᑲᑐᔾᔨᖃᑎᒌᑦ 10% ᐃᓐᓄᒃᑕᐅᓯᒪᙱᑦᑐᑦ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 42 ᐊᒻᒪᓗ ᑖᓐᓇ ᒪᓕᒐᓕᐅᖅᑎ ᓈᓴᐅᑎᖏᓐᓂᒃ ᑐᓴᕈᒪᖕᒪᑦ. ᐅᑯᐊ ᓈᓴᐅᑎᖏᑦ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ 105 ᐃᓐᓄᒃᑕᐅᓯᒪᙱᑦᑐᑦ, ᐊᒻᒪᓗ ᓄᓇᕗᒻᒥ ᐃᓕᓴᐃᔩᑦ ᑲᑐᔾᔨᖃᑎᒌᖏᓐᓄᑦ ᐃᖅᑲᓇᐃᔭᖅᑏᑦ 91ᖑᓪᓗᑎᒃ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᐃᓕᓐᓂᐊᖅᑐᓕᕆᔨᒃᑯᑦ ᐃᓕᓴᕐᕖᑦ ᐊᐅᓚᑕᐅᓂᖏᑦ ᐊᐱᖅᑯᑎᒃᓴᐃᑦ. ᐃᖃᓗᒃᑑᑦᑎᐊᕐᒧᑦ ᒪᓕᒐᓕᐅᖅᑎ, ᒥᔅᑕ ᐲᑕᓴᓐ. ᐲᑕᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᑕᐃᒃᑯᐊ ᓄᑖᑦ ᓇᓕᐊᖕᓂᒃ ᐅᖃᐅᓯᕐᓂᒃ ᐃᓕᓴᖅᑎᑦᑎᓂᐊᕐᓂᕐᒧᑦ ᒪᓕᒐᑦ ᐃᓕᓐᓂᐊᖅᑐᓕᕆᔨᒃᑯᑦ ᐱᖁᔭᕐᔪᐊᖓᑦ ᓴᖅᑭᑕᐅᓚᐅᕐᒪᑦ ᔫᓐ 25ᒥ. ᐊᒻᒪ ᐸᕐᓇᐅᑎᓯ ᐅᖃᖅᓯᒪᓪᓗᑎᒃ ᓯᕗᓪᓕᐅᔾᔨᓯᒪᓪᓗᑎᒃ ᒪᕐᕈᐃᖕᓂᒃ ᐅᖃᐅᓰᖕᓂᒃ ᐊᑐᕐᓗᑎᒃ ᐃᓕᓐᓂᐊᖅᑎᑦᑎᓂᐊᕐᓗᑎᒃ ᖁᕝᕙᓯᖕᓂᓕᒃ 4ᒥᑦ 7ᒧᑦ. ᑭᓱᓂᒃ ᐊᐳᖅᑕᐅᑎᓂᒃ ᐱᑕᖃᖅᐸ ᑕᒪᓐᓇ ᐊᑐᓕᖅᑎᑕᐅᕙᓪᓕᐊᓇᓱᒃᑎᓪᓗᒍ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᑕᐃᒃᑯᐊ ᓄᑖᑦ ᒪᕐᕈᐃᖕᓄᑦ ᒪᕐᕈᐃᖕᓂᒃ ᐅᖃᐅᓰᖕᓂᒃ ᐊᑐᕐᓂ ᐅᓇ ᐊᐳᖅᑕᐅᑕᐅᓂᖅᐹᑦ. ᐃᓄᐃᑦ ᐅᖃᐅᓯᖏᓐᓂᒃ ᐊᑐᕈᓐᓇᖅᑐᑦ ᐃᓄᒃᑎᑐᓪᓗ ᐃᓄᐃᓐᓇᖅᑐᓪᓘᓐᓃᑦ ᐊᐳᖅᑕᐅᑎᒋᓂᖅᐹᕗᑦ ᑖᓐᓇ ᐊᖏᓂᖅᐹᖅ. ᑕᑯᓯᒪᓕᖅᑕᕗᑦ ᑕᐃᒪᐃᓐᓂᖓᓄᑦ ᐃᓕᓐᓂᐊᖅᑐᓕᕆᔨᒃᑯᑦ ᐱᓕᕆᕕᐊ ᓄᓇᕗᒻᒥ ᓯᓚᑦᑐᖅᓴᕐᕕᖕᒥ ᐃᖅᑲᓇᐃᔭᖃᑎᖃᖅᑐᖅ ᐊᒻᒪ ᐃᑲᔪᖅᓱᒃᑲᓐᓂᕈᒪᓪᓗᑎᒃ ᐃᓕᓴᖅᑎᓂᒃ ᐃᓕᓴᐃᔨᙳᕈᓐᓇᖅᑐᓂᒃ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᐃᖃᓗᒃᑑᑦᑎᐊᕐᒧᑦ ᒪᓕᒐᓕᐅᖅᑎ, ᒥᔅᑕ ᐲᑕᓴᓐ. ᐲᑕᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᐊᒃᑑᐸ 2021-ᖑᑎᓪᓗᒍ ᓄᓇᕗᑦ ᑐᙵᕕᒃᑯᑦ ᓇᓗᓇᐃᖅᓯᓚᐅᖅᓯᒪᔪᖅ ᐃᖅᑲᖅᑐᐃᕕᒃᑰᖅᑎᑦᑎᓂᐊᖅᓯᒪᓪᓗᑎᒃ ᐃᖅᑲᖅᑐᐃᕕᖕᓂ ᐃᖃᓗᖕᓂ. ᑖᓐᓇ ᖃᓄᐃᓕᖓᓕᖅᐸ ᐅᓪᓗᒥᒧᑦ ᑎᑭᒃᖢᒍ? ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᑖᓐᓇ ᑐᖏᓕᕋ ᑭᐅᑎᒃᑯᒃᑯ, ᑭᐅᑎᑦᑐᓐᓇᕈᖕᓂ. ᐃᒃᓯᕙᐅᑕᖅ: ᒥᔅ ᕼᐊᐃᓐᓄ. ᕼᐊᐃᓐᓄ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᖁᔭᓐᓇᒦᒃ ᑖᓐᓇ ᐱᕐᔪᐊᕌᓗᒃ ᐊᐱᖅᑯᑎᒋᒐᖕᓂ. ᑭᓇᑐᐃᓐᓇᖅ ᐃᖅᑲᖅᑐᐃᕕᒃᑎᒎᖅᑎᑕᐅᓂᖅ ᑮᓇᐅᔮᓗᖕᓂᒃ ᐊᑐᖃᑦᑕᕐᒪᑦ, ᑮᓇᐅᔭᑦ ᑕᒪᒃᑯᐊ ᐊᓂᕙᓪᓕᐊᔪᑦ ᐃᓕᓐᓂᐊᕐᕕᖕᓅᙱᑦᑐᖅ ᔭᒐᐃᖃᑦᑕᖅᑐᒍᑦ ᑮᓇᐅᔭᓂᒃ ᐃᖅᑲᖅᑐᐃᕕᒃᑎᒎᕆᐊᖃᓕᕌᖓᑦᑕ ᐃᓕᓐᓂᐊᕐᕕᖕᓅᙱᑦᑐᖅ. ᐃᖅᑲᖅᑐᐃᕕᒃᑰᖅᑎᑕᐅᒍᑦᑕ ᒪᓕᒐᕐᓂᐊᖅᑎᓂᒃ ᐊᑭᓕᖅᓱᐃᒋᐊᖃᕋᑦᑕ. ᒪᑯᐊᓗ ᐃᖅᑲᓇᐃᔭᖃᑎᒋᔭᕗᑦ ᑕᒃᑯᐊ ᑐᙵᕕᒃᑯᑦ ᐃᓕᓐᓂᐊᖅᑐᓕᕆᔨᒃᑯᑦ ᐊᒻᒪᓗ ᒐᕙᒪᒃᑯᑦ ᐃᓗᐃᒃᑲᐅᓪᓗᒍ. ᓇᓗᓇᐃᖅᓯᓇᓱᒃᑐᒍᑦ ᑭᓱᒥᒃ ᐱᔾᔪᑎᒃᓴᖃᕐᒪᖔᑦ. ᑕᐃᒪᙵᑦ ᑖᓐᓇ ᐃᖅᑲᖅᑐᐃᕕᓕᕆᓂᖅ ᓴᖅᑭᓚᐅᖅᑎᓪᓗᒍ ᐅᖃᓪᓚᖃᑎᒌᕈᓘᔭᖅᓯᒪᔪᒍᑦ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 43 ᐱᔪᓐᓇᖅᑎᒃᑯᕕᖓ ᐊᑏ, ᕿᑐᕐᖓᕗᑦ ᐃᒃᑯᐊ ᐅᖃᐅᓯᖃᕆᐊᕈᓐᓇᕐᓂᐊᕐᒪᑕ. ᐃᖅᑲᓇᐃᔭᖃᑎᒌᒍᓐᓇᙱᒃᑯᑦᑕ ᔭᒐᐃᓲᖑᔪᒍᑦ. ᐊᑏ, ᐃᑲᔪᖅᑕᐅᖃᑦᑕᖅᑕ. ᖁᔭᓐᓇᒦᒃ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᐊᐃᕕᓕᖕᒧᑦ, ᒥᔅ ᐊᖑᑎᐊᓗᒃ. ᐊᖑᑎᐊᓗᒃ: ᖃᓄᐃᓕᓚᐅᕐᒥᑕ? ᐃᒃᓯᕙᐅᑕᖅ: (ᑐᓴᖅᓴᐅᙱᑦᑐᖅ) ᐊᑎᖁᑎᒃᑲ ᒪᓕᒃᖢᒋᑦ ᐱᑕᖃᕈᓐᓃᕐᒪᑦ ᑕᕝᕙᓂ (ᑐᓵᔨᑎᒎᓕᖅᑐᖅ) ᐊᖏᖅᐱᓯ ᑖᒃᑯᐊ ᐃᓕᓐᓂᐊᖅᑐᓕᕆᔨᒃᑯᑦ ᐃᓕᓐᓂᐊᕐᕖᑦ ᐊᐅᓚᑕᐅᓂᖏᑦ ᑲᑎᓕᒪᐅᖅᖢᒋᑦ ᐊᐅᓚᔾᔪᑏᑦ ᒪᑭᒪᐅᑏᑦ $215,182,000 ᐊᖏᖅᐱᓯᐅᒃ? ᐃᓚᖏᑦ ᑲᑎᒪᔩᑦ: ᐊᖏᖅᑐᑦ. ᐃᒃᓯᕙᐅᑕᖅ (ᑐᓵᔨᑎᒍᑦ): ᒪᒃᐱᖅᑐᒐᖅ G-6ᒨᕐᓗᑎᑦ. ᕿᒥᕐᕈᓇᖕᓂᐊᓕᖅᑕᕗᑦ ᐃᑲᔪᖅᓲᑎᓄᑦ ᐱᔨᑦᑎᖅᑏᑦ. ᐊᐱᖅᑯᑎᒃᓴᐃᑦ? (ᑐᓵᔨᑎᒎᕈᓐᓃᖅᑐᖅ) ᒪᓕᒐᓕᐅᖅᑎ ᐊᒡᒍᒧᑦ, ᒥᔅᑕ ᐊᑕᒍᑦᑖᓗᒃ. ᐊᑕᒍᑦᑖᓗᒃ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᐱᓕᕆᕝᕕᓯ 2026-2027 ᑮᓇᐅᔭᑦ ᐊᑐᕈᒫᕐᓂᐊᖅᑐᖏᑦ ᐅᖃᖅᓯᒪᔪᑦ ᑕᐃᒃᑯᐊ ᐃᖅᑲᓇᐃᔭᖅᑏᑦ ᐅᓄᕐᓂᖏᑦ ᐃᓕᓐᓂᐊᕈᑎᒃᓴᓕᐅᕐᓂᖅ ᐅᓄᖅᓯᒋᐊᖅᑕᐅᓚᖅᑐᖅ 20.0-ᓂᑦ ᐃᖅᑲᓇᐃᔮᖑᔪᓂᑦ 2025-2026ᒥ 22.0-ᖑᓚᐅᖁᖅᖢᑎᒃ 2026-2027. ᓇᓕᐊᒃ ᐅᑯᐊ ᑭᓱᑦ ᐃᖅᑲᓇᐃᔮᑦ ᓄᐃᔭᐅᕙᓪᓕᐊᓂᐊᕐᒪᑕ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᓇᓕᐊᒃ ᐅᖃᐅᓯᖅ ᐊᑐᕐᓗᒍ ᐃᓕᓴᐃᔩᑦ ᖃᐅᔨᒪᔨᑕᖓᑦ ᐊᒻᒪᓗ ᒪᕐᕈᐃᖕᓂᒃ ᐅᖃᐅᓰᖕᓂᒃ ᐊᑐᕐᓗᑎᒃ ᐃᓕᓴᐃᓂᖅ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᐊᒡᒍᒧᑦ, ᒥᔅᑕ ᐊᖑᑎᐊᓗᒃ. ᒥᔅᑕ ᐊᑕᒍᑦᑖᓗᒃ, ᒪᒥᐊᓇᖅ. ᐊᑕᒍᑦᑖᓗᒃ: ᖁᔭᓐᓇᒦᒃ, ᐃᒃᓯᕙᐅᑖᖅ. ᖁᔭᓐᓇᒦᒃ, ᒥᓂᔅᑕ ᑭᐅᒐᕕᑦ. (ᑐᓵᔨᑎᒎᓕᖅᑐᖅ) ᑖᒃᑯᐊ ᐃᖅᑲᓇᐃᔮᑦ ᒫᓐᓇ ᖃᔅᓯᑦ ᐃᓐᓄᒃᑕᐅᓯᒪᙱᓚᑦ? ᖁᔭᓐᓇᒦᒃ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᑐᑭᓯᓇᖅᓯᑎᒃᑲᓐᓂᖁᓪᓗᒍ ᓇᓕᐊᖕᓂᒃ ᐊᒡᒍᖅᑐᖅᓯᒪᔪᓂᒃ ᐊᐱᖅᑯᑎᖃᖅᐱᑦ? ᐃᓐᓄᒃᑕᐅᓯᒪᙱᑦᑐᒍ ᐱᔾᔪᑎᒋᓪᓗᒍ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᔅᑕ ᐊᑕᒍᑦᑖᓗᒃ ᓇᓗᓇᐃᕈᓐᓇᕈᕕᑦ. ᐊᑕᒍᑦᑖᓗᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᑖᒃᑯᓇᓂ ᐃᑲᔪᖅᓱᖅᑐᓕᔪᓂᒃ ᐱᓕᕆᐊᕆᔭᑦᑎᓐᓂ ᐊᐱᖅᑯᑎᖃᕋᓗᐊᖅᑐᖓ. ᓇᓕᐊᒃ ᐃᖅᑲᓇᐃᔮᖅ ᐃᓄᖃᙱᑦᑕᕆᐊᕐᒃᓴᖏᓐᓂᒃ? ᐃᒃᓯᕙᐅᑕᖅ: ᒥᓂᔅᑕ ᒪᐃᓐ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 44 ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ. ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᐃᑲᔪᖅᓱᐃᔩᑦ 7 ᐃᓐᓄᒃᑕᐅᓯᒪᙱᑦᑐᑦ. ᖃᐅᔨᓴᐃᔨᑦ ᑎᓴᒪᑦ. ᑲᑎᓕᒫᕐᓗᒋᑦ ᑖᒃᑯᐊ ᐃᓕᓴᖅᑏᑦ ᐱᓪᓗᒋᑦ 11 ᐃᓐᓄᒃᑕᐅᓯᒪᙱᑦᑐᑦ ᐃᖅᑲᓇᐃᔮᑦ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᖁᕐᓗᖅᑑᕐᒧᑦ, ᒥᔅᑕ ᖁᓕᒃᑖᓇ. ᖁᓕᒃᑖᓇ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᑖᒃᑯᐊ ᐱᓕᕆᕝᕕᓯ 2026-2030 ᐸᕐᓇᐅᑏᑦ ᐅᖃᖅᓯᒪᔪᑦ 2026-2027ᒥ ᐊᐅᓚᔾᔭᐃᔪᒪᔭᖓᑦ. ᑖᒃᑯᐊ ᓄᓇᕗᒻᒥ ᐃᓕᓐᓂᐊᕈᑎᒃᓴᐃᑦ ᐋᖅᑭᒃᓱᖅᑕᐅᖏᓐᓇᕐᓗᑎᒃ ᖁᕝᕙᓯᖕᓂᓕᒃ 7ᒥᑦ 12ᒧᑦ. ᐃᓕᓐᓂᐊᕈᑎᒃᓴᐃᑦ ᐊᒻᒪᓗ ᐱᓕᕆᐊᙳᖅᑎᑕᐅᓯᒪᔪᑦ ᓄᓇᕗᒻᒥ ᑕᐃᒃᑯᐊ ᐃᖅᑲᓇᐃᔭᖅᑏᑦ ᖃᓄᐃᑦᑐᓂᒃ ᑭᙴᒪᔭᐅᔭᖏᑦ. ᐆᒃᑑᑎᒋᓗᒋᑦ ᖃᓄᐃᑦᑐᑦ ᐃᓕᓐᓂᐊᕈᑎᒃᓴᐃᑦ ᐱᓕᕆᐊᙳᖅᑎᑕᐅᓯᒪᔪᓪᓗ ᑭᙴᒪᔭᐅᕙᑦ ᐃᖅᑲᓇᐃᔭᖅᑏᑦ ᐱᓪᓗᒋᑦ ᖃᓄᐃᑦᑐᓂᒡᓗ ᐃᖅᑲᓇᐃᔮᖃᕐᒪᖔᑦ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎ ᖁᕝᕙᓯᖕᓂᓖᑦ 10ᒥᑦ 12ᒧᑦ ᐸᕐᓇᐅᓯᐅᖅᓯᒪᔪᒍᑦ ᐱᓕᒻᒪᒃᓴᖅᐸᓪᓚᐃᓗᑎᒃ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᕐᓗᑎᒃ ᐊᒻᒪᓗ ᒪᓕᑲᑕᒡᓗᑎᒃ ᐱᓕᒻᒪᒃᓯᒪᔪᓂᒃ. ᐆᒃᑑᑎᒋᑐᐃᓐᓇᖅᖢᒋᑦ ᑖᒃᑯᐊ ᐊᒻᒪ ᒪᑯᐊᓗ ᓴᓇᔨᓪᓚᕇᑦ ᓲᕐᓗ ᕿᔪᓕᕆᔩᑦ ᓱᓪᓗᓕᕆᔩᑦ ᑕᒪᒃᑯᐊᕈᔪᐃᑦ ᐃᓕᓐᓂᐊᖅᑎᓪᓗᒋᑦ ᓲᕐᓗ ᓄᓇᕗᒻᒥ ᑭᙴᒪᖃᑦᑕᕋᑦᑕ ᑭᓱᓕᕆᔨᓂᒃ ᑕᐃᒪᐃᑦᑐᙳᕆᐅᖅᓴᖅᑎᓐᓇᓱᒍᓐᓇᕐᓂᐊᖅᑕᕗᑦ ᐃᖅᑲᓇᐃᔮᖅᑖᕆᔪᓐᓇᓛᖅᑕᖏᑦ ᐃᓱᓕᑦᑎᒍᓂ ᖁᕕᐊᓇᖅᑐᐊᓘᓇᔭᖅᑐᖅ. ᓲᕐᓗ ᖁᕐᓗᖅᑑᕐᒥ ᐊᒃᓱᐊᓗᒃ ᐱᐅᔪᒥᒃ ᓴᖅᑭᔮᖅᑎᑦᑎᓚᐅᖅᓯᒪᖕᒪᑕ ᐃᓕᓐᓂᐊᕐᕖᑦ ᐃᖅᑲᓇᐃᔭᖅᑎᙳᕆᐅᖅᓴᕐᓂᖅ ᐱᓪᓗᒍ. ᐃᓕᓐᓂᐊᕈᑎᒃᓴᐃᑦ ᑕᒪᒃᑯᐊ ᑕᐃᒪᐃᑦᑐᓄᑦ ᑐᕌᖓᔪᑦ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᑕᓯᐊᓗᖕᒧᑦ, ᒥᔅᑕ ᖃᕝᕕᒃ. ᖃᕝᕕᒃ (ᑐᓵᔨᑎᒍᑦ) ᐊᐱᖅᑯᑎᒋᔪᒪᓪᓗᒍ ᐅᓇ ᐊᐅᓚᔾᔭᒃᑕᐅᔪᒪᔪᖅ ᑭᖑᓪᓕᖅᐹᑦ ᐅᖓᓕᐊᓂ ᑕᐃᒃᑯᐊ ᐃᓕᓐᓂᐊᕈᑎᒃᓴᐃᑦ ᐱᔪᓐᓇᕐᓂᖅᑖᖅᑎᑕᐅᓯᒪᖃᑦᑕᖅᑐᑦ ᐸᐃᑉᐹᑐᐃᓐᓇᖅᑎᒍᑦ ᑎᑎᕋᖅ ᐃᓕᓴᐃᔨᓪᓚᕆᙳᙱᒃᑲᓗᐊᖅᑎᓪᓗᒋᑦ. ᖃᓄᐃᑦᑐᓂᒃ ᐃᓕᓐᓂᐊᕈᑎᒃᓴᓂᒃ ᐅᖃᐅᓯᖃᖅᐱᑦ ᐃᑲᔪᖅᓱᖅᑕᐅᑦᑎᐊᕈᓐᓇᖁᓪᓗᒋᑦ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ. ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᑕᐃᒃᑯᐊ ᐃᓕᓴᐃᔩᑦ ᐸᐃᑉᐹᑎᒍᑦ ᐱᔪᓐᓇᕐᓂᖅᑖᖅᑎᑕᐅᓯᒪᔪᑦ ᑭᙴᒪᔪᖅᑕᖃᕌᖓᑦ ᓲᕐᓗ ᐃᓄᐃᑦ ᐅᖃᐅᓯᖓᑦ ᐊᑐᕐᓗᒍ ᐃᓕᓴᐃᔩᑦ ᐅᕝᕙᓘᓐᓃᑦ ᕿᔪᓕᕆᓂᕐᒥᒃ ᐃᓕᓴᐃᔩᑦ. ᒪᑯᐊ ᐱᑐᐃᓐᓇᐅᙱᑦᑐᓂᒃ ᓲᕐᓗ ᑭᖑᕝᕕᖅᑎᐅᖃᑦᑕᖅᑐᑦ. ᐃᑲᔪᖅᓱᖅᑕᐅᔪᒪᓂᖅ ᐅᑯᐊ ᑕᑯᓐᓇᖅᑕᕗᑦ. ᐸᕐᓇᐃᓂᖅ, ᖃᐅᔨᓴᐃᓂᖅ, ᐅᓂᒃᑲᐅᓯᖃᕐᓂᖅ, ᐃᒡᓗᕈᓯᕐᒥ ᐊᐅᓚᑦᑎᓂᖅ ᐊᒻᒪᓗ ᖃᓄᖅ ᐅᖃᓪᓚᖃᑎᖃᕈᓐᓇᕐᒪᖔᑦ ᐃᓕᓴᖅᑎᓂᒃ ᐊᒻᒪᓗ ᐸᖅᑭᔨᓂᒃ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᑕᓯᐊᓗᖕᒧᑦ, ᒥᔅᑕ ᖃᕝᕕᒃ. ᖃᕝᕕᒃ (ᑐᓵᔨᑎᒍᑦ) ᖁᔭᓐᓇᒦᒃ, ᐃᒃᓯᕙᐅᑖᖅ. ᑖᒃᑯᐊ ᐱᔪᓐᓇᐅᑎᖃᖅᑎᑕᐅᔪᑦ ᑎᑎᖅᑲᑎᒍᑦ ᖃᓄᖅ ᐃᑲᔪᖅᓱᖅᑕᐅᑦᓴᐃᓐᓇᖃᑦᑕᕐᓂᖏᓐᓂᒃ ᐃᑲᔪᖅᑎᐅᑎᓪᓗᒋᑦ? ᖁᔭᓐᓇᒦᒃ, ᐃᒃᓯᕙᐅᑖᖅ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 45 ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ. ᐃᒃᓯᕙᐅᑖᖅ. (ᑐᓵᔨᑎᒍᑦ) ᑖᒃᑯᐊ ᐱᔪᓐᓇᕐᓂᖃᖅᑎᑕᐅᔪᑦ ᑎᑎᖅᑲᑎᒍᑦ ᐱᕕᖃᕈᓐᓇᑦᓯᐊᖅᑐᑦ ᐱᓕᒻᒪᑦᓴᐅᑎᓄᑦ ᑐᕌᖓᔪᓂᒃ ᐱᓕᒻᒪᑦᓴᕈᑎᖃᓲᖑᒻᒪᑦ ᐊᑐᐃᓐᓇᐅᑎᑕᐅᑉᓗᑎᒃ ᐃᓕᓴᐃᔨᓄᑦ ᐃᓕᓐᓂᐊᕐᕕᓐᓂ. ᐃᓕᓴᐃᔩᑦ ᑕᐃᒪᓐᓇᑦᑕᐅᖅ ᐱᔪᓐᓇᕐᓂᖃᖅᑎᑕᐅᔪᑦ ᑎᑎᖅᑲᑎᒍᑦ ᐱᕕᖃᖅᑎᑕᐅᑦᓯᐊᕐᒥᔪᑦ. ᐸᕐᓇᒍᑎᐅᔪᑦ ᒪᓕᑦᑐᒋᑦ ᓇᓕᒧᓐᓂᖃᑦᓯᐊᖁᓪᓗᒋᑦᑕᐅᖅ ᐃᓕᓴᐃᔨᐅᖃᑎᒥᓂᒃ ᐃᓕᓴᕐᕕᐅᔪᓂᒃ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᑕᓯᐊᓗᖕᒧᑦ, ᒥᔅᑕ ᖃᕝᕕᒃ. ᖃᕝᕕᒃ (ᑐᓵᔨᑎᒍᑦ) ᖁᔭᓐᓇᒦᒃ, ᐃᒃᓯᕙᐅᑖᖅ. ᖁᔭᓐᓇᒦᓪᓗ ᒥᓂᔅᑕ. ᖃᓄᖅ ᐅᓪᓗᖅᓯᐅᑎᓕᐅᖅᓯᒪᕙᑦ ᐃᕕᖅᑎᑕᐅᓛᓛᕐᓂᖓ ᐱᓕᒻᒪᑦᓴᐅᑎᖃᖅᐸᓐᓂᖅ ᐃᓕᓴᕐᕕᓕᒫᓂ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ. ᐃᒃᓯᕙᐅᑖᖅ. (ᑐᓵᔨᑎᒍᑦ) ᑕᕝᕙ ᐃᓕᓐᓂᐊᖅᑐᓕᕆᔨᒃᑯᑎᒍᑦ ᐸᕐᓇᑦᑐᒍᑦ ᑲᔪᓰᓐᓇᖁᓪᓗᑎᒍᑦ ᐅᑭᐊᒃᓵᖅ 2025ᒥ ᓯᕗᓪᓕᖅᐹᒥᒃ ᐃᖅᑲᓇᐃᔭᕐᕕᒻᒥ ᐱᓕᒻᒪᑦᓴᐃᓂᖃᓚᐅᖅᓯᒪᒐᑦᑕ. ᐱᔪᓐᓇᕐᓂᖃᖅᑎᑕᐅᔪᓂᒃ ᑎᑎᖅᑲᑎᒍᑦ ᐊᕙᑎᐅᓗᐊᓚᐅᖅᑐᑦ ᐃᓚᐅᔪᑦ. ᐊᔾᔨᐸᓗᐊᓂᒃ ᐱᓕᒻᒪᑦᓴᐃᓂᖃᓛᕈᒪᕗᒍᑦ ᐅᑭᐅᕆᔭᑦᑎᓐᓂ. ᐸᕐᓇᐅᑕᐅᑦᓴᐃᓐᓇᖅᑐᖅ ᐊᑕᐅᓯᐊᑐᐃᓐᓇᕋᓱᔾᔭᙱᒻᒪᑦ ᐊᑐᐃᓐᓇᐅᑎᑕᐅᓂᖓ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᐊᐱᖅᑯᑎᔅᓴᑦ? ᑖᒃᑯᐊ ᐃᓕᓐᓂᐊᖅᑐᓕᕆᔨᒻᒪᕆᒃᑯᑦ ᖁᑦᓯᓂᖅᓴᒧᑦ. ᒥᔅᑕ ᒪᐃᒃ. ᒪᐃᒃ: ᖁᔭᓐᓇᒦᒃ, ᐃᒃᓯᕙᐅᑕᖅ. ᐸᐃᕆᕕᓕᕆᓂᕐᒧᑦ ᐊᐱᕆᓂᐅᓴᔪᖓ. ᑕᐃᒪ ᐃᓕᓐᓂᐊᖅᑐᓕᕆᔨᒃᑯᑦ 2026- 2027 ᐊᑐᕈᒪᔭᖏᓐᓂ ᑕᕝᕙᓂ ᓇᓗᓇᐃᖅᓯᓯᒪᒻᒪᑕ ᑖᔅᓱᒧᖓ ᐸᐃᕆᕕᖕᓄᑦ ᑕᐃᒪ ᑮᓇᐅᔭᖅᑐᕐᓂᕆᔭᖓ $2.15- ᒥᓕᐊᖑᓯᒪᒻᒪᑦ 2025-2026 ᑮᓇᐅᔭᖅᑐᕐᓇᖓᓂ. ᑮᓇᐅᔭᖅᑐᕐᓂᕐᒥ ᐊᕐᕌᒍᒥ. ᑕᕝᕗᖓ $6.15-ᒥᓕᐊᓐ 2026- 2027 ᑮᓇᐅᔭᖅᑐᕐᓇᖓᓂ ᐊᕐᕌᒍᖓᓂ. ᑖᓐᓇ ᖃᓅᓇ ᑐᑭᓯᑎᑦᑎᒋᐊᕈᓐᓇᖅᑭᑦ ᐊᖏᓪᓕᒋᐊᕐᖓᑦ 186%. ᑖᓐᓇ ᖃᓄᖅ ᐅᓇ ᑕᐃᒪᐃᑉᐸᑦ? ᑐᑭᓯᔪᒥᓇᐅᒐᓗᐊᖅ ᖁᕝᕙᕆᐊᕈᑎᒋᔭᖓ. ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪ’ᓇ ᒪᓕᒐᓕᐅᖅᑎ ᐸᖕᓂᖅᑑᕐᒧᑦ, ᒥᔅᑕ ᒪᐃᒃ. ᑖᒻᓇ ᐊᐱᖅᑯᑎᒋᔭᑦ ᐊᑎᕐᕕᒋᒋᐊᕐᓂᐊᖅᐸᒋᑦ G7 ᐱᓕᓵᖅᑐᓄᑦ ᐱᓕᓵᙱᑦᑐᓄᓪᓗ ᐃᓕᓐᓂᐊᖅᑐᓕᕆᓯᐅᕐᒪᑦ. ᐊᐱᖅᑯᑎᒃᓴᑦ ᑕᕝᕗᖓ ᐃᓕᓐᓂᐊᖅᑐᓕᕆᔨᒃᑯᑦ ᐃᑲᔪᖅᓱᖅᑏᑦ. ᒪᓕᒐᓕᐅᖅᑎ ᑕᓯᓗᖕᒧᑦ, ᒥᔅᑕ ᖃᕝᕕᒃ. ᖃᕝᕕᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᐸᕐᓇᐅᑎᔅᓯᓐᓂ 27-28 ᐸᕐᓇᐅᑎᓯ ᑲᔪᓰᓐᓇᕐᓂᐊᕋᔅᓯ ᐃᓕᓐᓂᐊᕈᑎᑦᓴᓂᒃ ᖁᑦᑎᓐᓂᓕᖕᓂᒃ 7ᒥᑦ 12ᒧᑦ ᐃᓕᓴᐅᑎᓂᒃ. ᑐᑭᒧᐊᓕᕐᓗᑎᓪᓗ ᓄᓇᕗᑦ ᒐᕙᒪᒃᑯᑦ ᓇᒻᒥᓂᖅᓱᐸᓪᓕᐊᓂᕐᒧᑦ ᐸᕐᓇᐅᑎᐊᓂᒃ. ᐊᐱᕆᔪᒪᕙᕋ ᒥᓂᔅᑕ ᐱᕙᓪᓕᐊᔭᐅᑦᓴᐃᓐᓇᕐᓂᖓᓂᒃ ᐃᓕᓴᐅᑏᑦ ᖁᑦᑎᓐᓂᓕᓐᓂᒃ 7ᒥᑦ 12ᒧᑦ ᖃᓄᖅ ᑐᑭᒧᐊᕈᑎᐅᓇᓱᑉᐸ ᓄᓇᕗᑦ ᓇᒻᒥᓂᖅᓱᖅᐸᓪᓕᐊᓂᕐᒧᑦ ᐸᕐᓇᐅᑎᐊᓄᑦ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ. ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᑖᓐᓇ ᑐᖏᓕᕋ ᕼᐊᐃᓐᓅᑉ ᑭᐅᒍᓐᓇᕈᓂᒍ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᔅ ᕼᐊᐃᓐᓄ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 46 ᕼᐊᐃᓐᓄ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᖁᔭᓐᓇᒦᖅᐸᕋ ᐊᐱᕆᒻᒪᑦ ᒪᓕᒐᓕᐅᖅᑎ. ᓄᓇᕗᑦ ᐱᕕᖃᕐᕕᐅᑦᓯᐊᓕᕐᒥᒻᒪᑦ ᓇᒻᒥᓂᖅᓱᕐᓂᕐᒥᒃ ᐅᖃᐅᓯᖃᕋᑦᑕ ᐱᔨᑦᓯᖃᖅᓯᒪᓕᖅᑐᑦ ᐃᓕᓐᓂᐊᕐᕕᓐᓅᖃᑦᑕᖅᓱᑎᒃ ᑭᓱᓂᒃ ᑮᓇᐅᔭᓂᒃ ᐊᑐᐃᓐᓇᖅᑕᖃᕋᔭᕐᒪᖔᑦ. ᐃᓕᓐᓂᐊᕐᕕᐊᓗᒻᒦᑦᑐᓄᒃ ᑭᑐᓂᒃ ᐃᓕᓴᐅᑎᓂᒃ ᐊᑐᐃᓐᓇᐅᑕᐅᒍᓐᓇᖅᐸᑦ ᐱᔭᕇᖅᓯᓂᕐᒧᑦ. ᐃᖅᑲᓇᐃᔭᖃᑎᒋᑦᓯᐊᖅᐸᕗᑦ ᑖᒃᑯᐊ ᓇᒻᒥᓂᖅᓱᖅᐸᓪᓕᐊᓂᕐᒧᑦ ᑎᒥᖁᑎᐅᔪᑦ. ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᐊᑎᖁᑎᒃᑲ ᑕᕝᕙᓂ ᐃᓕᓐᓂᐊᖅᑐᓕᕆᔨᒃᑯᑦ ᐃᑲᔪᖅᓱᖅᑏᑦ. ᐱᑕᖃᕈᓐᓃᖅᑰᖅᑐᖅ. (ᑐᓵᔨᑎᒍᑦ) ᒪᓕᒐᓕᐅᖅᑏᑦ ᐊᖏᖅᐸᑦ ᑖᒃᑯᐊ ᐃᑲᔪᖅᑐᐃᔪᑦ ᐱᔨᑦᓯᖅᑎᖏᑦ ᐃᓕᓐᓂᐊᖅᑐᓕᕆᔨᒃᑯᑦ $34,396,000? ᒪᒃᐱᒐᖓᓅᓕᕐᒥᑕ G7. ᕿᒥᕐᕈᓂᐊᓕᕐᒥᕙᕗᑦ ᐃᓕᓐᓂᐊᓵᓕᓂᕐᒧᑦ ᐃᓕᓐᓂᐊᔅᓲᔭᖅᓯᒪᓂᕐᒧᓪᓗ ᐃᓕᓐᓂᐊᖅᑐᓕᕆᔨᐅᔪᑦ. (ᑐᓵᔨᑎᒍᕈᓐᓃᖅᑐᖅ) ᐃᒻᒪᖄ ᓯᕗᓪᓕᖅᐸᐅᑎᓪᓗᒍ ᐊᐱᖅᑯᑎᒋᓕᓚᐅᕐᒥᓄᑦ ᐅᑎᕐᓗᖓ, ᒥᔅᑕ ᒪᐃᒃ ᓈᒻᒪᒃᓴᖅᐸᑦ ᐸᖕᓂᖅᑑᕐᒧᑦ ᒪᓕᒐᓕᐅᖅᑎ. ᒪᐃᒃ: ᖁᔭᓐᓇᒦᒃ. ᒪᒥᐊᓇᐅᒐᓗᐊᖅ ᑕᒻᒪᖅᑲᐅᒐᒪ ᓯᕗᓪᓕᕐᒥ. ᑖᓐᓇ ᐸᐃᕆᕕᓕᕆᓂᖅ ᐸᕐᓇᑕᐅᓯᒪᓂᖓ ᑕᕝᕙᓂ 2026-2027 ᑮᓇᐅᖅᔭᖅᑐᕐᓂᕆᒐᔭᖅᑕᖓ ᐸᐃᕆᕕᓕᕆᓂᐅᑉ ᐊᑐᖅᓯᒪᔪᖅ ᑖᓐᓇ $2.15-ᒥᓕᐊᓐ 2025-2026 ᑮᓇᐅᔭᖅᑐᕐᓂᖓᑕ ᐊᕐᕌᒍᖓᓂ, ᑕᒪᑐᒪᓂ ᐊᕐᕌᒍᒥ 2026-2027, $6.15-ᒥᓕᐊᖑᓕᐊᕈᓐᓇᕐᖓᑦ ᑮᓇᐅᔭᖅᑐᕐᓂᖓ ᑕᒫᓂ ᐊᕐᕌᒍᒥ. ᑖᓐᓇ ᐊᑭᑦᑐᕆᐊᖅᑐᖅ 186%. ᑖᓐᓇ ᖃᓄᐃᒋᙱᑕᕋ ᑕᐃᒪᐃᓕᖓᑉᐸᑦ, ᐊᐱᖅᑯᑎᒋᔪᒪᑐᐃᓐᓇᖅᑕᕋ, ᖃᓄᕐᖑᓇ ᑕᐃᒪᐃᑉᐸ, ᑕᐃᒪᐃᓕᓯᒪᕙ ᐊᖏᓪᓕᒋᐊᖅᓯᒪᕙ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. ᐄᓛᒃ ᑖᓐᓇ ᐊᖏᓪᓕᒋᐊᕐᓂᕋᐃᓯᒪᔭᖓ $16.1-ᒥᓕᐊᓐ, ᑕᑯᒃᖢᒍ ᐃᓗᓕᖃᖅᑐᖅ ᐊᔾᔨᒌᙱᑦᑐᓂᑦ: ᓯᕗᓪᓕᖅᐹᖅ ᑖᒃᑯᐊ ᐃᑲᔫᑎᒃᓴᑦ ᐃᓕᓐᓂᐊᕆᐊᖅᑕᖅᑐᓄᑦ ᓄᓇᕗᒻᒥ, FANS, ᖁᓪᓗᓈᑎᑐᑦ Financial Assistance for Nunavut Students $12-ᒥᓕᐊᓐᓂᑦ ᐊᖏᓪᓕᒋᐊᖅᓯᒪᔪᑦ. ᐃᑲᔫᑎᒃᓴᒃᑲᓐᓂᕐᓂᑦ ᓴᖅᑮᔾᔪᑕᐅᓂᐊᖅᖢᓂ ᐃᓕᓐᓂᐊᕆᐊᖅᑕᖅᑐᓄᑦ ᐊᒻᒪ ᐃᓗᓕᖃᖅᖢᓂᑦᑕᐅᖅ ᐸᐃᕆᕕᓕᕆᓂᕐᒧᑦ ᐃᓕᓐᓂᐊᓕᓵᖅᑐᓄᓗ ᑐᕌᖓᔪᓂᑦ ᐃᑲᔫᑎᓂᑦ $4-ᒥᓕᐊᓐᒥᒃ ᐃᓚᒋᐊᕐᓂᖃᖅᓯᒃᖢᓂ ᑕᒪᓐᓇ. ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᐸᓐᓂᖅᑑᒧᑦ, ᒥᔅᑕ ᒪᐃᒃ. ᒪᐃᒃ: ᖁᔭᓐᓇᒥᒃ, ᐃᒃᓯᕙᐆᑕᖅ, ᐊᒻᒪᓗ ᖁᔭᓐᓇᒦᒃ, ᒥᓂᔅᑕ. ᑕᐃᒪ ᑖᓐᓇ $6-ᒥᓕᐊᒦᓐᓂᐊᓕᕐᖓᑦ ᑕᒪᑐᒪᓂ, ᑕᐃᒪᖃᐃ ᓂᕆᐅᒃᑭᕙᑦ ᐊᖏᓪᓕᒋᐊᒃᑲᓐᓂᓛᖅᑐᖅ ᑕᕝᕙᓂ ᐊᕐᕌᒍᒥ 2027-2028 ᑮᓇᐅᔭᖅᑐᕐᓂᖓᓂ? ᐊᖏᓪᓕᒋᐊᒃᑲᓂᓛᕆᕚ? ᖁᔭᓐᓇᒦᒃ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. ᐄ’, ᒫᓐᓇ ᖃᐅᔨᒪᓐᓇᙱᑦᑐᖅ ᐊᖏᓪᓕᕐᓂᖅᑕᖃᒃᑲᓐᓂᕈᒫᕐᒪᖔᖅ 2027-2028-ᒥ. ᑭᓯᐊᓂ, ᑐᒃᓯᕋᑲᓐᓂᕐᓂᐊᕐᓂᕋᖅᓯᒪᔫᒐᓗᐃᑦ ᐃᓕᓐᓂᐊᖅᑐᓕᕆᔨᒃᑯᑦ. ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᐃᖃᓗᒃᑑᑦᑎᐊᕐᒧᑦ, ᒥᔅᑕ ᐲᑕᓴᓐ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 47 ᐲᑕᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᐱᓕᕆᕝᕕᓯ 2026-2030 ᐸᕐᓇᐅᑎᓯ, ᐸᕐᓇᒍᑕᐅᓯᒪᔪᖅ ᐃᓚᒋᔭᖓ 2026-2027-ᒧᑦ ᕿᒥᕐᕈᐸᓪᓕᐊᓗᓯ ᐃᓕᓴᕐᕕᔾᔪᐊᓂ ᐊᒻᒪ ᐃᓕᑕᕆᔭᐅᔾᔪᑎᑖᕐᓂᕐᒧᑦ ᐱᖁᔭᐅᓂᐊᖅᑐᒥ. ᑭᓱ ᑕᐃᒪ ᐋᖅᑭᒋᐊᕈᑎᔅᓴᐃᑦ ᐃᓱᒪᒃᓴᖅᓯᐅᕈᑕᐅᕙᑦ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᑖᒃᑯᐊ ᐋᖅᑭᒋᐊᕈᑏᑦ ᓇᓗᓇᐃᖅᑕᐅᔪᒫᖅᑐᑦ ᕿᒥᕐᕈᓂᖃᓚᐅᕐᓗᓂ. ᒫᓐᓇ ᖃᐅᔨᒪᕗᒍᑦ ᐱᖁᔭᕆᔭᕗᑦ ᐱᑐᖃᐅᓗᐊᓕᕐᒪᑦ. ᖃᐅᒪᓪᓗᑕᓗ ᐊᑕᖏᖅᔫᒥᔪᒥᒃ ᒪᓕᒐᒃᓴᒥᑦ ᒪᓕᒐᕈᓯᕐᓂᓪᓗ ᐱᔭᕆᐊᖃᓛᕐᒪᑦ ᐊᐅᓚᑦᑎᐊᓂᖅᓴᐅᓕᖁᓪᓗᒋᑦ ᖁᑦᓯᓂᖅᐹᒥ ᐃᓕᓴᕐᕕᐅᔪᑦ. ᐱᓕᕆᐊᖑᔪᖅ ᐱᔭᕆᐊᖃᕐᓂᖓᓗ ᐅᖃᖅᑕᐅᓯᒪᓕᕐᒪᑦ. ᐊᓯᔾᔨᕈᑏᓪᓕ ᓱᕐᕋᓯᒪᙱᒻᒪᑕ. ᐃᓕᓐᓂᐊᖅᑐᓕᕆᔨᒃᑯᑦ ᐸᕐᓇᐅᑎᖃᖅᑯᑦ, ᐸᕐᓇᐅᑎᖏᓐᓂᓪᓗ ᐃᓕᔭᐅᓯᒪᓕᖅᑐᓂ ᑕᒪᓐᓇ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᐃᖃᓗᒃᑑᑦᑎᐊᕐᒧᑦ, ᒥᔅᑕ ᐲᑕᓴᓐ. ᐲᑕᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᕖᕗᐊᕆ 2026-ᒥ, ᐃᓄᐃᒃ ᑕᐱᕇᑦ ᑲᓇᑕᒥ ᐅᖃᔪᕗᑦ ᑖᓐᓇ ᐃᓕᓴᕐᕕᔾᔪᐊᖅ ᐊᕐᕕᐊᓃᑦᓱᒫᓕᕐᒪᒡᒎᖅ. ᖃᓄᖅ ᐃᓚᐅᑎᒋᓛᖅᐱᓯ ᐃᓕᓴᕐᕕᔾᔪᐊᔅᓴᒧᑦ ᑖᔅᓱᒧᖓ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᕈᓐᓃᖅᑐᖅ) ᐃᓚᐅᓂᕆᔭᕗᑦ ᓱᓕ ᓱᖅᑯᐃᕆᐊᖃᓛᖅᑕᕗᑦ ᐃᓄᐃᑦ ᓄᓇᖓᑦ ᐃᓕᓴᕐᕕᔾᔪᐊᖅ ᐱᓪᓗᒍ. ᐱᒃᑯᒥᓇᑦᓯᐊᖅᑐᑎ. ᐃᓄᐃᑦ ᑕᐱᕇᑦ ᑲᓇᑕᒥ ᐱᓕᕆᐊᕆᒻᒪᔾᔪᒃ. ᐊᔾᔨᐅᙱᑦᓱᓂ, ᐃᓱᒪᒋᔭᕋᓕ, ᐅᔾᔨᕆᔭᐅᒻᒪᕆᔅᓯᒪᓪᓗᓂ . ᐃᓕᓐᓂᐊᖅᑐᓕᕆᔨᒃᑯᑦ ᐅᖃᖃᑎᖃᖅᐸᓪᓕᐊᖃᑦᑕᓕᖅᐳᒍᑦ ᐃᓄᐃᑦ ᑕᐱᕇᒃᑯᓐᓂ. ᑕᑯᓪᓗᒍ ᐃᓘᓐᓈ ᑐᕌᕋᓱᑉᐳᒍᑦ ᒐᕙᒪᒃᑯᑦ ᐊᖏᕈᑎᓕᐅᖅᐸᓪᓕᐊᓛᕈᒪᓪᓗᑕ ᑖᒃᑯᓄᖓ ᓱᖅᑯᐃᕆᐊᕐᓗᑕ ᖃᓄᖅ ᐱᑎᒋᓂᐊᕐᒪᖔᖅ ᐋᖅᑭᑦᓱᐃᓕᕐᓗᑕᓗ ᐱᓕᕆᖃᑎᒌᓐᓂᐊᓂᑦᑎᓐᓂ ᑕᒪᑐᒧᖓ ᐱᓇᓱᑦᑕᐅᕙᓪᓕᐊᓕᖅᑐᒧᑦ ᑲᔾᔭᓂᓱᓕ ᐱᙳᖅᑎᑕᐅᔪᒫᕐᒪᑦ. (ᑐᓵᔨᑎᒎᕈᓐᓃᖅᑐ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᑕᓯᐅᔭᕐᔪᐊᑦ, ᒥᔅᑕ ᖃᕝᕕᒃ. ᖃᕝᕕᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᐱᓕᕆᕝᕕᓯ ᐸᕐᓇᐅᑎᒋᔭᔅᓯᓐᓂ ᐱᖓᔪᐊᑦ ᐅᖃᖅᓯᒪᒻᒪᑦ “ᑖᒃᑯᐊ ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑕᐅᓂᖅ ᐸᐃᕆᕕᓕᕆᑦᑎᐊᓂᕐᒧᑦ ᐊᒻᒪ ᐃᓕᓐᓂᐊᓵᓕᓂᕐᒧᑦ, ᑖᒃᑯᐊ ᐊᑭᑦᑐᕋᐅᑎᓂᖃᕈᓐᓇᑎᐊᖁᓪᓗᒋᑦ ᑮᓇᐅᔭᔅᓴᖑᒋᓂᐊᖅᐳᑦ.” ᖃᓄᖅ ᒐᕙᒪᑐᖃᒃᑯᓐᓂ ᓇᕝᕚᕈᓐᓇᕋᔭᕐᓂᕐᒪᖔᑕ ᑮᓇᐅᔭᓂᑦ ᐊᒻᒪᓗ ᑲᔪᓯᑦᓴᐃᓐᓇᕈᓐᓇᖅᑐᓂᑦ ᐸᐃᕆᕕᖃᖁᓪᓗᒍ ᐊᒻᒪ ᐱᓕᕆᑦᓴᐃᓐᓇᕈᓐᓇᖅᑐᓂᑦ ᐸᐃᕆᕕᓐᓂ. ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᑖᓐᓇ ᐊᐱᖅᑯᑎᑦᓯᐊᕙᐅᓪᓗᓂ. ᐃᓕᓐᓂᐊᓵᓕᕆᓂᕐᒧᑦ ᓄᑕᖅᑲᓕᕆᓂᕐᓗ ᐸᐃᕆᕕᑦᑎᓂ ᐱᒻᒪᕆᐅᒻᒪᑕ ᐱᕈᖅᓴᔭᐅᑎᓪᓗᒋᑦ ᓄᑕᖅᑲᑦ ᐊᖏᔪᖅᑳᕆᔭᐅᔪᑦ ᐃᑲᔪᖅᑕᐅᒍᓐᓇᕐᓗᑎᑦ, ᐃᖅᑲᓇᐃᔭᕐᕕᐅᒍᑏᑦ ᐸᐃᕆᕕᖃᕆᐊᖃᕈᑎᓪᓘᕙ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 48 ᕖᕗᐊᕆ 2025-ᒥ, ᒐᕙᒪᑐᖃᒃᑯᑦ ᐊᖏᕈᑎᕈᓘᔭᐅᔪᒻᒪᑦ 2031-ᒧᑦ ᑎᑭᑦᑐᒍ, ᓇᐃᓈᕐᓗᒍᖃᐃ ᐅᖃᕐᓗᒍ $109.9 ᒥᓕᐊᓐᓂᑦ ᓇᕝᕚᕈᓐᓇᖅᑎᒋᓚᐅᖅᐳᒍᑦ. ᑭᓯᐊᓂ, ᐃᓕᓐᓂᐊᖅᑐᓕᕆᔨᒃᑯᑦ ᖁᕕᐊᓱᒃᑲᓗᐊᖅᑐᑎᑦ ᑐᓂᔭᐅᓂᕐᒥᓂᑦ, ᐊᓯᖏᓐᓂᑦᑕᐅᖅ ᐱᓕᕆᖃᑎᖃᖅᐸᓪᓕᐊᓄᒍᑦ ᒐᕙᒪᐅᔪᓂᑦ ᐅᓄᖅᓯᒋᐊᖅᑕᐅᑲᓐᓂᖁᓪᓗᒋᑦ ᒐᕙᒪᑐᖃᒃᑯᓐᓂ ᑮᓇᐅᔭᐃᑦ ᑲᔪᓯᑦᑎᐊᖏᓐᓇᓂᐊᕐᒪᑕ, ᓲᕐᓗ $10-ᕌᖅᐸᓐᓂᖏᑦ ᖃᐅᑕᒫᖅᓯᐅᑎᑦ ᐸᐃᕆᔭᐅᓂᖏᓐᓄᑦ, ᐊᒻᒪᓗᑦᑕᐅᖅ ᐃᑲᔪᖅᑕᐅᑦᑎᐊᑕᐃᓐᓇᖃᑦᑕᖁᓪᓗᒋᑦ ᐸᐃᕆᔪᑦ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᐃᓕᓐᓂᐊᖅᑐᓕᕆᔨᒃᑯᑦ ᐃᓕᓐᓂᐊᕆᐅᖅᓴᑎᑦᑎᓂᕐᒥ ᐊᒻᒪ ᓯᓚᑦᑐᓴᕐᕕᒻᒥ ᐃᓕᓐᓂᐊᓂᕐᒧᑦ. ᒪᓕᒐᓕᐅᖅᑎ ᐸᓐᓂᖅᑑᒧᑦ, ᒥᔅᑕ ᒪᐃᒃ. ᒪᐃᒃ: ᖁᔭᓐᓇᒦᒃ. ᑖᒃᑯᐊ ᐃᓕᓐᓂᐊᖅᑐᓕᕆᔨᒃᑯᑦ ᒫᓐᓇ ᑲᒪᒋᔭᕗᑦ. ᑐᑭᓯᒋᐊᕈᒪᑐᐃᓐᓇᕐᒥᔪᖓ ᓱᓕ, ᑐᓴᕈᒥᓇᕐᖓᑕ ᑮᓇᐅᔭᐃᑦ ᐊᑐᖅᑕᐅᔪᒪᔪᑦ ᖁᕝᕙᕆᐊᕐᓂᐊᑎᓪᓗᒋᑦ. ᑖᒃᑯᐊ (ᑐᓵᔨᑎᒎᓕᖅ) ᑮᓇᐅᔭᖅᑐᒥ ᐃᑲᔫᑏᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ. ᐃᓕᓐᓂᐊᖅᑐᓕᕆᔨᒃᑯᑦ ᑕᐃᒪ 2026-2027 (ᑐᓵᔨᑎᒎᓕᖅᑐᖅ) ᑮᓇᐅᔭᖅᑐᕈᑎᔅᓴᖏᑦ ᓇᓗᓇᐃᖅᓯᓯᒪᒻᒪᑕ ᑮᓇᐅᔭᕆᔭᐅᓂᐊᖅᑐᐃᒡᒎᖅ ᑐᓂᕐᕈᑎᔅᓴᐃᑦ ᑕᕝᕘᓇ ᐃᓕᓐᓂᐊᖅᑏᑦ ᑮᓇᐅᔭᖅᑕᕐᕕᓲᖏᒍᑦ ᐊᖏᓪᓕᒋᐊᖅᑕᐅᓂᐅᓴᒻᒪᒡᒎᖅ ᑕᒫᙵᑦ $18.916-ᒥᓕᐊᖑᔪᓪᓗᑎᑦ 2025-2026 ᐊᕐᕌᒍᖓᓂ ᑕᕝᕗᖓᖁᔭᐅᓪᓗᑎᑦ $23.428 ᒥᓕᐊᓄᑦ ᑕᕝᕙᓂ 2026-2027 ᑮᓇᐅᔭᓕᕆᔾᔪᑏᑦ ᐊᕐᕌᒍᖓᓂ. ᑖᓐᓇ ᖁᕝᕙᕆᓂᐅᒻᒪᑦ 162.7%-ᒥ. ᖃᓄᕐᖑᓇ ᑕᐃᒪᓐᓇ ᖁᕝᕙᕆᐊᕆᐊᖃᕐᖓᑦ ᖃᐅᔨᔭᐅᓐᓂᖅᑲ? (ᑐᓵᔨᑎᒎᕈᓐᓂᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. (ᑐᓵᔨᑎᒎᕈᓐᓃᖅᑐᖅ) ᑕᑯᒍᔅᓯᐅᒃ ᐊᓯᔾᔨᖅᓯᒪᓂᕆᔭᖏᑦ ᐱᓕᕆᔾᔪᑎᖏᑕ, ᕿᒥᕐᕈᓂᕐᒦᖔᓚᐅᖅᓯᒪᒻᒪᑕ ᕿᒥᕐᕈᔭᐅᓚᐅᖅᓯᒪᒻᒪᑦ. ᑖᒃᑯᐊ ᑮᓇᐅᔾᔭᔅᓴᕕᐅᕙᑦᑐᐃᑦ ᐃᓕᓐᓂᐊᖅᑎᓄᑦ 35-ᓂᑦ ᐊᑐᓕᖁᔭᓕᐊᖃᓚᐅᕐᖓᑕ. ᐃᓕᓐᓂᐊᖅᑐᓕᕆᔨᒃᑯᓪᓗ ᐊᑐᓕᖁᔭᓕᐊᓂᑦ ᒪᓕᔅᓴᕋᓱᐊᖅᓯᒪᒐᑦᑕ ᑭᐅᒐᓱᐊᖅᓯᒪᓪᓗᑎᒍ. ᑕᐃᒫ ᑕᕝᕙ ᐃᓗᓕᖏᑦ ᐅᖃᐅᓯᕆᓗᐊᕌᓗᙱᓪᓗᖏᑦ ᐊᖏᓪᓕᒋᐊᕆᒐᓱᑉᐳᒍᑦ ᐃᑲᔪᖅᓰᒍᑕᐅᒍᓐᓇᖅᑐᓂᑦ ᐃᓕᓐᓂᐊᖅᑎᓄᑦ. ᐃᑲᔪᓯᕈᑎᖃᕐᓂᖅᓴᐅᓕᕐᓗᑎ ᐃᓪᓗᒧᑦ ᐊᑭᓕᕆᐊᓕᖏᓐᓄᑦ. ᐊᒻᒪᓗᑦᑕᐅᖅ ᐃᑲᔪᖅᑎᑕᐅᒃᑲᓐᓂᓛᓕᖅᑐᑎᑦ ᐊᐅᓪᓚᖃᑦᑕᓂᕆᔭᖏᓐᓂ ᐃᓚᖏᑦ ᐃᓕᓐᓂᐊᖅᑏᑦ. ᒫᓐᓇ ᐃᓕᓐᓂᐊᖅᑐᓕᕆᔨᒃᑯᑦ ᐱᓕᕆᐊᖃᖅᑐᑦ ᐊᑐᖃᐃᓐᓇᕋᔭᖅᑐᒥ ᐊᑐᓕᖅᑎᑦᑎᒍᑎᓂᑦ. ᓄᑖᓪᓗ ᐱᖁᔭᓕᐊᖑᒐᔭᖅᑐᐃᑦ ᐊᑐᓕᖅᑎᑕᐅᓯᒪᙱᒻᒪᑕ ᓱᓕ, ᒫᓐᓇ ᐊᑯᓐᓂᖓᓃᑲᑦᑕ, ᐅᐊᑦᑎᐊᕈᕐᓂᓴᐅᓂᖅᓴᐃᑦ ᐊᑎᓕᐅᕈᑏᑦ ᐋᖅᑭᓯᒪᑦᑕᖅᑯᑦ ᓱᓕ ᐊᒻᒪᓗ ᒫᓐᓇ; ᒪᓕᒐᕆᔭᖏᑦ ᐋᖅᑭᒋᐊᖅᑕᐅᓯᒪᓪᓗᑎᑦ ᐊᑐᓕᖁᔭᓕᐊᖑᓯᒪᔪᐃᑦ ᐃᓚᖏᑦ ᐊᐅᓚᔾᔭᒋᐊᖅᑕᐅᓯᒪᔪᑦ; ᒫᓐᓇ ᐃᓕᓐᓂᐊᖅᑐᓕᕆᔨᒃᑯᑦ ᓄᑖᓂᑦ ᒪᓕᒐᓕᐅᕋᓱᑦᑐᐃᑦ ᐃᓗᓕᒋᓂᐊᖅᑕᖏᓐᓂ ᐱᖁᔭᒃᓴᖅ ᐊᑐᓕᖅᑎᑕᐅᒍᓐᓇᓛᕐᖓᑦ, ᐅᐱᕐᖓᔅᓵᖓᓂ 2027. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ: ᒪᓕᒐᓕᐅᖅᑎ ᐸᓐᓂᖅᑑᒧᑦ, ᒥᔅᑕ ᒪᐃᒃ. ᒪᐃᒃ: ᐊᐱᕆᒃᑲᓐᓂᕈᒪᑐᐃᓐᓇᖅᑐᖓ ᑖᔅᓱᒪ ᒥᔅᓵᓄᑦ. ᑖᓐᓇ 2027-2028 ᑮᓇᐅᔭᖅᑐᕐᓂᖅ ᑕᑯᓐᓇᕐᓗᒍ, ᑖᓐᓇᖃᐃ ᐃᓕᓐᓂᐊᖅᑐᓕᕆᔨᒃᑯᓐᓂ ᓂᕆᐅᒋᔭᐅᒋᕙ ᖁᕝᕙᕆᐊᒃᑲᓐᓂᓛᖅᑐᖅ ᑕᕝᕙᓂ ᑮᓇᐅᔭᖅᑐᕐᓇᐅᓛᑐᒥ? ᖁᔭᓐᓇᒦᒃ, ᐃᒃᓯᕙᐅᑖᖅ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 49 ᐃᒃᓯᕙᐅᑕᖅ: ᒥᓂᔅᑕ ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. ᐃᓛᒃ, ᑖᒃᑯᐊ ᑮᓇᐅᔭᑦ ᐋᖅᑭᒃᓯᒪᓂᐊᕐᒪᖔᑕ ᖃᓄᖅ 2027-2028 ᖃᐅᔨᓐᓇᙱᑦᑐᖅ ᓱᓕ. ᑕᕝᕗᖓ 2026-2027-ᒧᑦ ᐋᖅᑭᒃᓯᒪᔪᓂᐊᖅᑐᓂᑦ ᑐᒃᓯᕋᖅᓯᒪᒻᒪᑕ ᐃᓕᓐᓂᐊᖅᑐᓕᕆᔨᒃᑯᑦ. ᑕᒫᓂ 2025-2026 ᐃᓗᐊᓂ, ᑲᑎᓪᓗᑦᑖᖅᓱᒋᑦ ᐃᓕᓐᓂᐊᖅᑐᓕᕆᔨ, ᖃᓄᖅ, ᖃᑉᓗᓇᐅᔭᓚᐅᕐᓚᖓᐃ. (ᑐᓵᔨᑎᒎᓕᖅᑐᖅ) ᑲᑎᓗᑦᑖᕐᓗᒋᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ ᑮᓇᐅᔾᔭᔅᓵᖑᓱᑦ, ᐊᖏᓪᓕᒋᐊᖅᑕᐅᓚᐅᕐᖓᑕ $24-ᒥᓕᐊᓐᓂᒃ 2025-2026 ᐊᕐᕌᒍᖓᓂ, ᐊᔾᔨᒌᙱᑦᑐᓂ ᐃᓗᓕᖃᓚᐅᕆᓪᓗᑎ ᐱᓕᕆᓂᐅᔪᒥ. ᒥᔅᓴᐅᓯᔭᐅᓯᒪᔪᖅ ᐊᑐᓕᖅᑎᑕᐅᓪᓚᕆᑉᐸᑦ ᐱᓕᕆᓂᐅᔪᖅ $33-ᒥᓕᐊᓐᕌᕐᓂᐊᕐᖓᑦ ᐊᕐᕌᒍᑕᒫᑦ. ᑕᐃᒫᖏᓛᒃ ᑮᓇᐅᔭᓂᑦ ᑐᒃᓯᕋᒃᑲᓐᓂᕆᐊᖃᓛᖅᑐᑦ ᐃᓗᐃᑦᑑᓗᓂ ᐊᑐᓕᖅᑎᑕᐅᓂᐊᖅᑲᑕ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᐃᓕᓐᓂᐊᖅᑐᓕᕆᓂᖅ ᐸᐃᕆᕕᓕᕆᓂᕐᒧᑦ ᐃᓕᓐᓂᐊᕆᐅᖅᓴᑎᑦᑎᓂᕐᒧᓪᓗ ᓯᓚᑦᑐᓴᕐᕕᒻᒥᓗ ᐃᓕᓐᓂᐊᓂᕐᒧᑦ (ᑐᓵᔨᑎᒎᕈᓐᓃᖅᑐᖅ) ᐊᐱᖅᑯᑎᑦ? ᐊᐱᖅᑯᑎᒃᓴᖅᑕᖃᕈᓐᓃᖅᑰᖅᑐᖅ. (ᑐᓵᔨᑎᒎᓕᖅᑐᖅ) ᑲᑎᒪᔩᑦ ᐊᖏᖅᑭᓰ ᐃᓕᓐᓂᐊᖅᑐᓕᕆᔨᒃᑯᑦ ᐃᓕᓐᓂᐊᕆᐅᖅᓴᑎᑦᑎᓂᕐᒧᑦ ᓯᓚᑦᑐᓴᕐᕕᓕᕆᓂᕐᒧᓪᓗ ᐊᐅᓚᒍᑎᔅᓴᕆᒍᒪᔭᖏᑦ $36,808,000? ᐃᓚᖏᑦ ᑲᑎᒪᔩᑦ: ᐊᖏᖅᑐᑦ. ᐃᒃᓯᕙᐅᑕᖅ (ᑐᓵᔨᑎᒍᑦ): G-3-ᒧᑦ ᐅᑎᒃᑲᓐᓂᓕᕐᒥᒋᔅᓯ ᒪᒃᐱᒐᖓᓄᑦ. ᑲᑎᒪᔩᑦ ᐊᖏᖅᑭᓰ ᐃᓕᓐᓂᐊᖅᑐᓕᕆᔨᒃᑯᑦ 2026-2027-ᒥ ᑮᓇᐅᔭᖅᑐᕈᑎᔅᓴᖏᓐᓂ, ᒥᔅᓴᐅᓯᔭᐅᓯᒪᔪᓂᑦ ᐊᐅᓚᖑᑎᔅᓴᓂ ᐋᖅᑭᐅᒪᑎᑦᑎᒍᑎᔅᓴᓂ $309,853,000? ᐃᓚᖏᑦ ᑲᑎᒪᔩᑦ: ᐊᖏᖅᑐᑦ. ᐃᒃᓯᕙᐅᑕᖅ (ᑐᓵᔨᑎᒍᑦ): ᑲᑎᒪᔩᑦ ᐊᖏᖅᑭᓰ ᐱᔭᕇᕋᑦᑎᒍ ᐱᓕᕆᕕᖓ ᐃᓕᓐᓂᐊᖅᑐᓕᕆᔨᒃᑯᑦ? ᐃᓚᖏᑦ ᑲᑎᒪᔩᑦ: ᐊᖏᖅᑐᑦ. ᐃᒃᓯᕙᐅᑕᖅ (ᑐᓵᔨᑎᒍᑦ): ᒪᑐᓯᒍᑎᓂ ᐅᖃᐅᓯᒃᓴᖃᖅᑭᑦ, ᒥᔅᑕ ᒪᐃᓐ? ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐃᒃᓯᕙᐅᑖᖅ. ᐄᓛᒃ, ᓯᕗᓪᓕᖅᐹᒥ ᒪ’ᓈᕈᐊᖅᖢᒋᑦ ᑲᑎᒪᔩᑦ ᐊᐱᖅᑯᑎᑦᓴᑦᑎᐊᔾᔪᐊᒥ ᐊᐱᕆᑦᑕᓚᐅᕐᒪᑕ, ᑕᒪᒃᑯᐊ ᐅᖃᐅᓯᕆᔭᕗᑦ ᓄᓇᕗᑦ ᓯᕗᓂᒃᓴᖓᓄᑦ ᐊᑕᓪᓚᕆᒻᒪᑕ ᒪᒃᑯᑦᑐᑦ ᓄᑕᖅᑲᑦ ᑕᐅᑐᒃᖢᒋᑦ. ᐊᒻᒪ ᐅᑯᐊᓗ ᐃᑲᔪᖅᑎᒋᔭᒃᑲ ᒪ’ᓈᕈᐊᖅᑐᒋᑦ ᑕᕝᕙᓃᑦᑐᓪᓗ ᐃᓕᓐᓂᐊᑐᓕᕆᔨᕐᔪᐊᑯᓐᓃᖔᖅᓯᒪᔪᑦ ᐊᒻᒪ ᐃᓕᓐᓂᐊᕐᕕᒻᒥ ᐱᓕᕆᔪᑦ, ᐃᓕᓐᓂᐊᖅᑐᓕᕆᔨᕐᔪᐊᒃᑯᑦ ᐃᓗᐊᓂ 1,516 ᐱᓕᕆᒻᒪᑕ ᐊᔪᙱᓐᓂᖃᓗᒃᑖᖅᖢᑎᑦ, ᐃᑲᔪᕈᐊᕐᓂᖃᓗᑖᖅᖢᑎᑦ. ᒪ’ᓈᓕᖅᐸᒋᑦ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᐃᖅᓱᖅᑏ, ᐱᓕᕆᔨᖏᑦ ᐊᓂᑎᓚᐅᕐᒥᒃᑭᑦ. ᑲᑎᒪᔩᑦ ᓱᖁᔨᓕᕆᕙᑦ? ᒥᔅᑕ ᑕᖅᑐ. ᑕᖅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᐱᒋᐊᖅᑎᑦᑎᕗᖓ ᐱᕙᓪᓕᐊᓯᒪᓂᕋᕐᓗᖓ ᐅᓂᒃᑳᕆᒪᓕᕐᓂᕐᒥᑦ, ᐱᒋᐊᖅᑎᖅᐸᕋ. ᖁᔭᓐᓇᒦᒃ, ᐃᒃᓯᕙᐅᑖᖅ.

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 50 ᐃᒃᓯᕙᐅᑕᖅ (ᑐᓵᔨᑎᒍᑦ): ᐱᖁᔨᕗᖔᕈᑎᑕᖃᕐᖓᑦ, ᑖᓐᓇᓗ ᐊᐃᕙᒍᑎᔅᓴᐅᓇᓂ. ᓈᒻᒪᓴᖅᑐᐃᑦ ᐱᖁᔨᕗᖔᕈᒻᒥ? ᐊᑭᕋᖅᑐᖅᑐᐃᑦ? ᐱᖁᔨᕗᖔᕈᑎ ᑲᔪᓯᔪᖅ. ᒫᓐᓇ ᓂᑯᕕᙳᓱᓕᖅᑯᖓ ᐱᕙᓪᓕᐊᓯᒪᓂᕋᐃᓗᖓ. >>ᑲᑎᒪᑐᐃᓐᓇᕐᓂᖅ ᓄᖅᑲᖅᑐᖅ 17:23 ᐊᒻᒪᓗ ᑲᑎᒪᓂᖅ ᐱᒋᐊᖅᑐᖅ 17:24 ᐅᖃᖅᑎ: ᐃᖏᓚᐅᕐᒥᒋᔅᓯ. ᑲᑎᒪᔾᔪᑎᑦᑎᓐᓄᑦ ᐅᑎᕐᓗᑕ, ᑲᑎᒪᔾᔪᑎᒃᓴᖅ 21, ᑲᑎᒪᑐᐃᓐᓇᓚᐅᖅᑎᓪᓗᒋᑦ ᐅᓂᒃᑳᑦ ᐃᓱᒪᒃᓴᖅᓯᐅᕈᑎᖃᓚᐅᖅᑎᓪᓗᒋᑦ ᒪᓕᒐᒃᓴᓂᑦ ᐊᓯᖏᓐᓂᓪᓗ. ᒥᔅᑕ ᖃᑉᓗᑦᓯᐊᖅ. ᑲᑎᒪᔾᔪᑎᒃᓴᖅ 21: ᑲᑎᒪᑐᐃᓐᓇᓚᐅᖅᑎᓪᓗᒋᑦ ᐅᓂᒃᑳᑦ ᖃᑉᓗᑦᓯᐊᖅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᑲᑎᒪᔨᕋᓛᑎᑦ ᒪᓕᒐᒃᓴᒥ 1-ᒥ ᑲᑎᒪᔾᔪᑎᖃᕋᑖᕐᒪᑕ ᐱᕙᓪᓕᐊᓂᕐᒥᓂ ᐅᓂᒃᑳᕈᒪᔪᑦ. ᐅᖃᖅᑏ, ᓅᑦᑎᕗᖓ ᑲᑎᒪᑐᐃᓐᓇᖅᑎᓪᓗᒋᑦ ᑲᑎᒪᔾᔪᑕᐅᖅᑲᐅᔪᑦ ᐊᖏᖅᑕᐅᖁᓪᓗᒋᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐱᖁᔨᕗᖔᕈᑦ ᓈᒻᒪᒻᒪᑦ. ᐊᐃᑉᐱᖅᑕᐅᕚ? ᒥᔅᑕ ᒪᐃᒃ. ᑲᑎᒪᔾᔪᑎᒃᓴᖅ 22. ᐱᖓᔪᐊᓐᓂ ᐅᖃᓕᒫᖅᑕᐅᓂᖏᑦ ᒪᓕᒐᒃᓴᑦ. ᐊᓪᓚᑎᒻᒪᕆᒃ, ᑲᑎᒪᔾᔪᑎᒃᓴᐃᑦ. ᑲᑎᒪᔾᔪᑎᒃᓴᖅ 22: ᑲᑎᒪᔾᔪᑎᒃᓴᐃᑦ ᑎᑎᕋᖅᑎ (ᑐᓵᔨᑎᒍᑦ): ᖁᔭᓐᓇᒦᒃ. ᐃᖅᑲᐃᑎᑦᑎᕗᖓ, ᑲᑎᒪᔨᕋᓛᑦ ᑲᑎᒪᓂᐊᖅᑐᑦ ᒐᕙᒪᒃᑯᑦ ᓇᐅᑦᓯᖅᑐᖅᑏᑦ ᐅᓪᓛᒃᑯ 10-ᒥ ᓇᓄᖅ ᑲᑎᒪᕕᐊᓂ ᑲᑎᒪᓛᖅᑐᑦ. ᑲᑎᒪᔾᔪᑎᒃᓴᐃᑦ ᒪᐃ 29: 1. ᑐᒃᓯᐊᕐᓂᖅ 2. ᐊᖓᔪᖅᑳᑦ ᐅᖃᐅᓯᖏᑦ 3. ᒪᓕᒐᓕᐅᖅᑏᑦ ᐅᖃᐅᓯᖏᑦ 4. ᑭᐅᔾᔪᑎᑦ ᐅᖃᐅᓯᒃᑯᑦ ᐊᐱᖅᑯᑎᓄᑦ 5. ᐃᓕᑕᖅᓯᓂᖅ ᐳᓛᖅᑎᓂᑦ 6. ᐅᖃᐅᓯᒃᑯᑦ ᐊᐱᖅᑯᑎᑦ 7. ᑎᑎᖅᑲᒃᑯᑦ ᐊᐱᖅᑯᑎᑦ 8. ᑭᐅᔾᔪᑎᑦ ᑎᑎᖅᑲᒃᑯᑦ ᐊᐱᖅᑯᑎᓄᑦ 9. ᑭᐅᔾᔪᑎᑦ ᒪᑐᐃᕈᑎᒧᑦ 10. ᑭᐅᔾᔪᑎᑦ ᑮᓇᐅᔭᖅᑑᑎᒧᑦ ᒪᑐᐃᕈᑎᖓᓄᑦ 11. ᐊᑎᓕᐅᕈᑕᐅᓯᒪᔪᑦ 12. ᑭᐅᔾᔪᑎᑦ ᐊᑎᓕᐅᕈᑕᐅᓯᒪᔪᓄᑦ 13. ᑲᑎᒪᔨᕋᓛᑦ ᑲᑎᒪᔨᕋᓛᖑᑲᐃᓐᓇᖅᑐᓪᓗ ᒪᓕᒐᒃᓴᓂᑦ ᐊᓯᖏᓐᓂᓪᓗ ᐅᓂᒃᑳᖏᑦ 14. ᑎᑎᖅᑲᓂᑦ ᓴᖅᑭᑎᕆᓂᖅ

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 51 15. ᖃᐅᔨᒃᑲᐃᒍᑎᑦ ᐱᒋᐊᖅᑎᑕᒃᓴᓂᑦ 16. ᖃᐅᔨᒃᑲᐃᒍᑎᑦ ᐱᒋᐊᖅᑎᑕᒃᓴᓂᑦ ᒪᓕᒐᒃᓴᐃᑦ ᐅᖃᓕᒫᕐᓂᒃᓴᒥᒃ ᓯᕗᓪᓕᖅᐹᖓᓐᓂᒃ 17. ᐱᒋᐊᖅᑎᑕᐃᑦ 18. ᓯᕗᓪᓕᖅᐹᒥᒃ ᐅᖃᓕᒫᕐᓂᖅ ᒪᓕᒐᒃᓴᓂᑦ 19. ᐊᐃᑉᐹᓂᒃ ᐅᖃᓕᒫᕐᓂᖅ ᒪᓕᒐᒃᓴᓂᑦ 20. ᑲᑎᒪᔨᕋᓛᑦ ᑕᒪᐃᓐᓄᑦ ᒪᓕᒐᒃᓴᓄᑦ ᐊᓯᖏᓐᓂᓪᓗ ᐃᓱᒪᖅᓴᖅᓯᐅᕐᓂᖏᑦ 21. ᑲᑎᒪᔨᕋᓛᑦ ᑕᒪᐃᓐᓄᑦ ᐅᓂᒃᑳᖓᑦ 22. ᐱᖓᔪᐊᓐᓂᒃ ᐅᖃᓕᒫᕐᓂᖅ ᒪᓕᒐᒃᓴᓂᑦ 23. ᑲᑎᒪᔾᔪᑎᒃᓴᐃᑦ ᖁᔭᓐᓇᒦᒃ. ᖁᔭᓐᓇᒦᒃ, ᐅᖃᖅᑏ. >>ᐸᑦᑕᑐᖅᑐᑦ ᐅᖃᖅᑎ: ᖁᔭᓐᓇᒦᑦᑕᐅᖅ. ᑲᑎᒪᓂᕆᔭᕗᑦ ᒪᓕᒐᓕᐅᕐᕕᖕᒥ ᐅᓪᓗᒥ ᐃᓱᓕᑉᐳᖅ ᐊᒻᒪᓗ ᐱᒋᐊᒃᑲᓐᓂᓛᕆᓪᓗᑕ ᖃᐅᑉᐸᑦ ᐱᖓᓯᐅᓕᖅᐸᑦ, ᒪᐃ 27, ᓯᕿᙳᔭ 1:30-ᑉᐸᑦ. ᐃᖅᓱᖅᑏ. >>ᑲᑎᒪᓂᖅ ᓄᖅᑲᖅᑐᖅ 17:27ᒧᐊᖅᑎᓪᓗᒍ

ᐊᐃᑉᐹ, ᒪᐃ 26, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 52