2024–2025 Annual Report of the Integrity Commissioner of Nunavut (TD 9, Inuktitut, SO 7(2))

TD-9-7(2)-IN

Nunavut — Committees

ᓄᓇᕗᑦ ᒪᓕᒐᓕᐅᕐᕕᐊ ᐊᕐᕌᒍᑕᒫᖅᓯᐅᑏᑦ ᐅᓂᒃᑳᑦ ᐊᐃᕐᕆᓕ 2024−ᒥᑦ ᒫᔾᔨ 2025−ᒧᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᑎᑎᕋᕐᕕᐊ ᑲᑕᕆᓇ ᐲᑐᓴᓐ, K.C. ᓱᓕᑦᑎᐊᕐᓂᕐᒧᑦ ᑲᒥᓴᓇ

ᐊᑭᖃᓐᖏᑦᑐᖅ: 888-398-2785 ᓱᒃᑲᔪᒃᑰᕈᑖ: 866- 676-4923 Toll-Free: 888-398-2785 Fax: 866-676-4923 kpeterson@integritycom.nu.ca www.integritycom.nu.ca ᐊᐃᕐᕆᓕ 27, 2026 ᑕᐃᕕᑎ ᔪᐊᓇᓯ ᓄᓇᕗᑦ ᒪᓕᒐᓕᐅᕐᕕᐊᓄᑦ ᐅᖃᖅᑎ 926 ᓯᕗᒧᒋᐊᖅ ᐊᑐᕆᐊᖅ ᐃᖃᓗᐃᑦ, ᓄᓇᕗᑦ X0A 3H0 ᐅᖃᖅᑎ ᔪᐊᓇᓯᒧᑦ: ᐱᔾᔪᑖ: ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐊᕐᕌᒍᑕᒫᖅᓯᐅᑏᑦ ᐅᓂᒃᑳᖏᑦ ᓱᓖᓛᒃ ᐅᐱᑦᑐᖓ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᔪᓐᓇᕋᒪ ᓄᓇᕗᑦ ᒪᓕᒐᓕᐅᕐᕕᐊᓄᑦ. ᖁᕕᐊᓱᒃᑐᖓ ᐅᑯᓄᖓ ᐃᓚᖃᓯᐅᔾᔨᔪᓐᓇᕋᒪ ᐊᕐᕌᒍᑕᒫᖅᓯᐅᑏᑦ ᐅᓂᒃᑳᖏᓐᓂᒃ ᓇᓗᓇᐃᔭᐃᓯᒪᔪᓂᒃ ᖃᓄᐃᓕᐅᖃᑦᑕᓚᐅᕐᓂᓐᓂᒃ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑎᓪᓗᖓ. ᐅᓂᒃᑲᐅᓯᕆᔭᒃᑲ ᐱᒋᐊᖅᓯᒪᔪᑦ ᐊᐃᕐᕆᓕ 2024-ᒥᑦ ᒫᔾᔨ 2025-ᒧᑦ. ᑭᖑᓪᓕᕐᒥᒃ ᑲᑎᒪᕐᔪᐊᓕᕐᒥᒍᔅᓯ ᐅᑯᐊ ᐊᕐᕌᒍᑕᒫᖅᓯᐅᑏᑦ ᐅᓂᒃᑳᑦ ᒪᓕᒐᓕᐅᕐᕕᖕᒧᑦ ᓴᖅᑭᑕᐅᑎᓛᖅᐸᑎᑦ. ᓱᓕᓪᓗᖓ ᑎᑎᕋᖅᑐᖓ, ᑲᑕᕆᓇ ᐲᑐᓴᓐ, K.C. ᓱᓕᑦᑎᐊᕐᓂᕐᒧᑦ ᑲᒥᓴᓇ ᐊᔾᔨᖏᓐᓂᒃ ᐱᔪᖅ: ᒪᓕᒐᓕᐅᕐᕕᖕᒧᑦ ᑎᑎᕋᖅᑎ

2 ᑲᒥᓴᓇᐅᑉ ᐅᖃᐅᓯᖏᑦ ᐊᒃᓱᐊᓗᒃ ᖁᕕᐊᒋᔭᕋ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᔪᓐᓇᕋᒪ ᓄᓇᕗᑦ ᒪᓕᒐᓕᐅᕐᕕᐊᓄᑦ ᐊᒃᑑᐸ 2018−ᒥᑦ 2023−ᒧᑦ. ᐊᒃᑑᐸ 2023-ᖑᑎᓪᓗᒍ, ᑕᓪᓕᒪᒃᑲᓐᓂᕐᓄᑦ ᐊᕐᕌᒍᓄᑦ ᐃᓕᓯᒪᒃᑲᓐᓂᕈᓐᓇᕐᒪᖔᕐᒪ, ᐊᐱᕆᔭᐅᒐᒪᓗ ᐊᖏᓚᐅᖅᓯᒪᓪᓗᖓ. ᓄᓇᕗᑦ ᒪᓕᒐᓕᐅᕐᕕᐊ ᖁᔭᓐᓇᒦᕈᒪᔭᒃᑲ ᐅᕙᓐᓂᒃ ᓇᓗᖅᑯᑎᓚᐅᓐᖏᒻᒪᑕ ᐊᖏᖅᓯᒪᑦᑎᐊᓚᐅᕋᒪ ᑕᕝᕗᖓ ᐃᖅᑲᓇᐃᔮᓐᓄᑦ ᐊᒻᒪ ᐊᔾᔨᒌᓐᖏᑦᑐᓄᑦ ᐱᔭᒃᓴᖅᑖᕆᓯᒪᔭᓐᓄᑦ. ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑎᓪᓗᖓ, ᐅᔾᔨᕆᓚᐅᖅᑐᖓ ᒪᓕᒐᓕᐅᕐᕕᖕᒧᑦ ᓂᕈᐊᖅᑕᐅᓯᒪᔪᑦ ᒪᓕᒐᓕᐅᖅᑏᑦ ᓱᓕᑦᑎᐊᕐᓂᖏᓐᓂᒃ ᐊᖏᖅᓯᒪᑦᑎᐊᕐᓂᖏᓐᓄᓪᓗ ᓂᕈᐊᖅᑕᐅᓯᒪᓂᒥᖕᓄᑦ. ᑕᐃᒪᓐᓇ ᐊᖏᖅᓯᒪᑦᑎᐊᖅᑎᓪᓗᒋᑦ ᐊᒃᓱᐊᓗᒃ ᐱᔪᒥᒃᓱᖕᓇᖅᓯᓲᖅ ᐊᒻᒪ ᐊᖏᔪᐊᓘᓪᓗᓂ. ᓂᕈᐊᖅᑕᐅᓯᒪᔪᑦ ᐃᒡᓗᕙᓗᐊᔾᔭᐃᖅᓯᓯᒪᖃᑦᑕᕆᐊᓖᑦ ᓂᕈᐊᖅᑎᖏᑦᑕ ᑭᓐᖒᒪᔭᖏᓐᓄᑦ ᐊᒻᒪ ᓄᓇᕗᒻᒥᐅᓕᒫᓄᑦ ᑐᓐᖓᕕᖃᑦᑎᐊᕆᐊᖃᖅᖢᑎᒡᓗ. ᓂᕈᐊᖅᑕᐅᓯᒪᑎᓪᓗᒋᑦ ᐃᓚᒥᖕᓂᒃ ᓄᓇᒥᖕᓂᒡᓗ ᕿᒪᒃᓯᒪᑯᑖᖃᑦᑕᕆᐊᓖᑦ, ᐊᒃᓱᕈᖅᑎᑕᐅᓕᖃᑦᑕᖅᖢᑎᒡᓗ ᐃᓄᖕᓄᑦ, ᐱᖃᓐᓇᕆᔭᖏᓐᓄᑦ ᐊᒻᒪ ᐃᓚᒥᖕᓄᑦ, ᐊᒻᒪ ᖃᐅᔨᓴᑦᑎᐊᖏᓐᓇᕆᐊᖃᖅᖢᑎᒃ ᐃᖢᐊᓐᖏᑦᑐᒨᓕᓐᖏᒃᑲᓗᐊᕐᒪᖔᕐᒥ, ᐱ.ᔭᒃᓴᖅᑖᖅᑎᑕᐅᓯᒪᕗᖓ ᐃᑲᔪᖅᑐᒃᓴᐅᑕᐅᓪᓗᖓ ᒪᓕᒐᓕᐅᖅᑎᓂᒃ ᖃᓄᐃᓕᐅᕆᐊᖃᕐᒪᖔᕐᒥ ᐊᔾᔨᒌᓐᖏᑦᑐᓄᑦ ᐊᒻᒪ ᐱᔭᕐᓂᓐᖏᑦᑐᒃᑰᓕᕌᖓᑕ. ᓱᓕᑦᑎᐊᕐᓂᕐᒧᑦ ᑲᒥᓴᓇᐅᓪᓗᖓ ᐅᔾᔨᕆᓯᒪᔪᖓ ᒪᓕᒐᓕᐅᖅᑏᑦ ᐅᔾᔨᕈᓱᑦᑎᐊᕐᓂᖏᓐᓂᒃ ᐱᔭᒃᓴᖅᑖᖅᑎᑕᐅᓯᒪᓂᕐᒥᖕᓂᒃ ᑕᒪᒃᑮᖕᓄᑦ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᒃᑯᑦ ᐊᒻᒪ ᑕᑎᒋᔭᐅᔪᓐᓇᕐᓂᖏᓐᓂᒃ ᓄᓇᕗᒻᒥᐅᓄᑦ ᐃᓄᖕᓄᑦ. ᐱᐅᖕᒥᔪᖅ ᖃᓄᐃᑦᑕᕆᐊᖃᖅᐳᖔᖅᑕᐅᖃᑦᑕᖅᖢᓂ ᖃᓄᐃᓕᐅᓚᐅᓐᖏᓐᓂᕐᒥᖕᓂᒃ ᖃᓄᐃᑦᑑᓂᕐᒧᓪᓗ ᑎᑭᐅᔾᔭᐅᔭᕌᖓᒥᒃ. ᑕᐃᒪᐃᓐᓂᖓᓄᑦ ᓇᓗᓇᐃᖅᓯᕗᖅ ᒪᓕᒐᓕᐅᖅᑏᑦ ᐊᖏᖅᓯᒪᑦᑎᐊᕐᓂᖏᓐᓂᒃ ᐱᔭᒃᓴᖅᑖᕆᓯᒪᔭᒥᖕᓄᑦ. ᓱᓕᑦᑎᐊᕐᓂᕐᒧᑦ ᑲᒥᓴᓇ ᐃᒻᒥᒃᑰᖅᖢᓂ ᑲᒪᔨᐅᖃᑕᐅᕗᖅ ᓄᓇᕗᑦ ᒪᓕᒐᓕᐅᕐᕕᖕᒧᑦ. ᐊᓯᓕᒫᖏᓐᓄᑦ ᖃᓄᐃᓕᖓᖁᔭᐅᓇᓂ ᑕᖅᑳᓐᖓᓪᓗ ᑎᓕᔭᐅᓯᒪᓂᓂ ᖃᓄᖅ ᐱᓕᕆᐊᕆᔭᕆᐊᖃᖅᑕᒥᓂᒃ ᐱᓕᕆᐊᖃᕆᐊᖃᕐᒪᖔᖅ. ᓱᓕᑦᑎᐊᕐᓂᕐᒧᑦ ᑲᒥᓴᓇ ᒪᓕᒐᓕᐅᕐᕕᓕᒫᒧᑦ ᐱᓕᕆᔨᐅᕗᖅ ᐊᒻᒪ ᓄᓇᕗᒻᒥᐅᓕᒫᓄᑦ. ᐃᓚᖏᑦ ᒐᕙᒪᖃᕐᕖᑦ ᐃᖅᑲᓇᐃᔮᓐᓂᒃ ᑕᐃᓯᖃᑦᑕᕐᒥᔪᑦ ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᑲᒥᓴᓇᒥᒃ, ᐊᓯᖏᓐᓄᓪᓗ ᐃᖅᑲᓇᐃᔭᖅᑎᑦᑎᐊᕙᐅᓂᕐᒧᑦ ᑲᒥᓴᓇᒥᒃ. ᒐᕙᒪᖃᕐᕕᓕᒫᑦ ᖃᓪᓗᓈᓂ ᐅᑭᐅᖅᑕᖅᑐᒥᓗ, ᐊᒻᒪ ᒪᓕᒐᓕᐅᕐᕕᒡᔪᐊᖅ ᐃᑦᑐᐃᓪᓗ ᑲᑎᒪᔨᖏᑦ ᑲᒪᔨᖃᕐᒥᔪᑦ ᐊᔾᔨᐸᓗᖏᓐᓂᒃ ᐃᔨᖅᑲᓇᐃᔮᓕᖕᓂᒃ ᓄᓇᕗᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᑎᑐᑦ. ᑖᒃᑯᑎᒎᓇᖅ ᓱᓕᑦᑎᐊᕐᓂᖅ ᑕᖅᑲᒃᑯᓄᖓ ᑕᑎᒋᔭᐅᔪᓐᓇᕐᓂᕐᒧᑦ ᑐᓐᖓᕕᒋᔭᐅᕗᖅ [Cite your source here.]

3 ᐅᓂᒃᑳᑎᒍᑦ ᓇᓗᓇᐃᔭᐃᒃᑲᓐᓂᕐᓂᐊᖅᑐᖓ ᖃᓄᐃᑦᑐᓂᒃ ᐃᖅᑲᓇᐃᔮᖃᕐᒪᖔᕐᒪ, ᑭᓯᐊᓂ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐱᔭᒃᓴᓪᓗᐊᑕᕆᕚ ᐃᑲᔪᕐᓗᓂ ᒪᓕᒐᓕᐅᕐᕕᖕᒧᑦ ᒪᓕᒐᓕᐅᖅᑎᓂᒃ ᐱᔭᒃᓴᖅᑖᕆᓯᒪᔭᒥᓂᒃ ᐱᓕᕆᑦᑎᐊᖁᓪᓗᒋᑦ, ᓴᖅᑭᔮᑦᑎᐊᕐᓗᑎᒃ ᓱᓕᑦᑎᐊᕐᓗᑎᒡᓗ, ᒪᓕᒡᓗᒋᑦ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᑉ ᐃᓗᓕᖏᓐᓂ ᑎᑎᕋᖅᓯᒪᔪᑦ. ᐱᖁᔭᕐᔪᐊᖅ ᐅᖃᖅᓯᒪᕗᖅ ᓱᓕᑦᑎᐊᕐᓂᕐᒧᑦ ᑲᒥᓴᓇ ᐊᕐᕌᒍᑕᒫᖅ ᐅᓂᒃᑳᓕᐅᖃᑦᑕᕐᓗᓂ ᐅᖃᖅᑎᒧᑦ ᐊᒻᒪ ᒪᓕᒐᓕᐅᕐᕕᖕᒧᑦ, ᓇᓗᓇᐃᔭᐃᓗᓂ ᖃᓄᐃᓕᐅᕐᓂᕆᓚᐅᖅᑕᒥᓂᒃ ᐊᕐᕌᒎᓚᐅᖅᑐᖅ ᑮᓇᐅᔭᓕᕆᓐᓇᖓᓂ. ᑕᐃᒪᐃᓐᓂᖓᓄᑦ, ᐅᓇ ᐅᓂᒃᑳᖅ ᓇᓗᓇᐃᔭᐃᓯᒪᔪᖅ ᖃᓄᐃᓕᐅᕐᓂᕆᓚᐅᖅᑕᓐᓂᒃ ᐊᐃᕐᕆᓕ 2024−ᒥᑦ ᒫᔾᔨ 2025-ᒧᑦ.

4 ᒪᓕᒐᓕᐅᕐᕕᖕᒧᑦ ᒪᓕᒐᓕᐅᖅᑏᑦ ᑕᖅᑲᒃᑯᓄᖓ ᓇᓗᖅᑯᑎᒋᔭᐅᔭᕆᐊᖃᓐᖏᓐᓂᖏᑦ ᐱᓪᓚᕆᐊᓘᕗᖅ ᐊᐅᓚᑦᓯᔨᐅᖕᒪᑕ ᒪᓕᒐᓕᐅᕐᕕᖕᒥᒃ ᐊᒻᒪ ᓄᓇᕗᑦ ᒐᕙᒪᒃᑯᑦ ᐃᓗᐃᒃᑲᐅᓪᓗᑎᒃ. ᓄᓇᕗᒻᒥᐅᑦ ᓂᕆᐅᖕᓂᖃᖅᐳᑦ ᓂᕈᐊᖅᑕᐅᓯᒪᔪᑦ ᐃᒻᒥᓂᒃ ᑲᒪᑦᑎᐊᕐᓂᐊᕐᓂᖏᓐᓂᒃ ᐃᒻᒥᒨᖓᔪᑦ ᑭᖑᓪᓕᐅᑎᓯᒪᓗᓂᒋᑦ. ᓂᕈᐊᖅᑕᐅᓯᒪᔪᑦ ᐃᓂᒥᓃᓐᓂᕐᒥᓄᑦ ᐃᒻᒥᒧᑦ, ᐃᓚᒥᓄᑦ ᐊᓯᐊᓄᓪᓘᓐᓃᑦ ᐃᓄᖕᒧᑦ ᐱᓯᓂᓯᐅᔪᒧᓪᓘᓐᓃᑦ ᐱᕚᓪᓕᐅᑕᐅᔭᕆᐊᖃᓐᖏᓚᖅ. ᐃᒻᒥᓂᒃ ᐊᐅᓚᑦᑕᕆᐊᖃᖅᐳᖅ ᓱᓕᓗᓂ, ᓴᖅᑭᔮᑦᑎᐊᕐᓗᓂ ᐊᒻᒪ ᐃᒻᒥᓂᒃ ᒪᑭᒪᑦᑎᐊᕐᓗᓂ. ᐱᓕᕆᐊᖏᑦ ᓱᕐᕋᓗᐊᔾᔭᐃᖅᓯᒪᔭᕆᐊᖃᖅᐳᑦ ᓵᓐᖓᑦᑎᐊᕐᓗᓂᓗ ᓄᓇᕗᒻᒥᐅᓕᒫᑦ ᑭᓐᖒᒪᔭᖏᓐᓄᑦ ᐱᔪᒪᓂᖏᓐᓄᓪᓗ. ᓄᓇᕗᑦ ᐱᓐᖑᖅᑎᑕᐅᓚᐅᖅᑎᓪᓗᒍ, ᓯᕗᓪᓕᖅᐹᑦ ᒪᓕᒐᓕᐅᖅᑏᑦ 2001-ᖑᑎᓪᓗᒍ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᕐᒥᒃ ᐊᓂᒍᖅᑎᑦᑎᓚᐅᖅᓯᒪᔪᑦ. ᐱᖁᔭᕐᔪᐊᖅ ᐱᖁᔭᖅᑎᒍᑦ ᓇᓗᓇᐃᖅᓯᕗᖅ ᒪᓕᒐᓕᐅᖅᑏᑦ ᐱᓕᕆᑦᑎᐊᕐᓗᑎᒃ ᐊᒻᒪ ᓱᓕᑦᑎᐊᕐᓂᕐᒥᒃ ᑐᓐᖓᕕᖃᕐᓗᑎᒃ ᐊᐅᓚᓂᖃᕆᐊᖃᕐᓂᖏᓐᓂᒃ. ᐋᖅᑭᒃᓯᓯᒪᕗᖅ ᒪᓕᒋᐊᓕᖕᓂᒃ ᓵᑕᒃᓴᐅᔪᓐᓇᕐᓂᕐᒥᒡᓗ ᑕᒪᓐᓇ ᐊᖏᖅᓯᒪᓂᓂ ᐊᑐᕐᓂᐊᕈᓂᐅᒃ. ᑖᓐᓇ ᐊᑐᖅᖢᒍ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐃᓂᖓ ᓴᖅᑭᑕᐅᓯᒪᕗᖅ, ᑖᓐᓇ ᐃᒻᒥᒃᑰᖅᖢᓂ ᑲᒪᔨᐅᖃᑕᐅᕗᖅ ᒪᓕᒐᓕᐅᕐᕕᖕᒧᑦ. ᓂᕈᐊᖅᑕᐅᓯᒪᔪᑦ ᐊᑐᕐᓂᐊᕐᓂᕆᓯᒪᔭᖏᑦ ᓇᓗᓇᐃᖅᑕᐅᓯᒪᕗᑦ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ, ᑖᓐᓇᓗ ᐊᑕᓐᖏᖢᓂ ᐊᔾᔨᒋᓐᖏᖢᓂᐅᒡᓗ ᒪᓕᒐᓕᐅᖅᑏᑦ ᐃᖅᑲᓇᐃᔭᖅᑎᑦᑎᐊᕙᐅᓂᐊᕐᓂᕐᒧᑦ ᒪᓕᒐᖓᓐᓂᒃ, ᑖᓐᓇ ᒪᓕᒐᓕᐅᖅᑎᓄᑦ ᐊᖏᕈᑎᒋᔭᐅᓯᒪᖕᒪᑦ ᒪᓕᑦᑎᐊᕐᓂᐊᕐᓂᕐᒥᖕᓂᒃ ᒪᑭᒪᑦᑎᐊᕐᓂᐊᕐᓂᕐᒥᒡᓗ. ᒪᓕᒐᓕᐅᖅᑏᑦ ᐊᒻᒪ ᐊᐅᓚᑦᓯᔩᑦ ᑲᑎᒪᔨᖏᑦᑕ ᐱᖁᔭᕐᔪᐊᖓ, ᐱᓗᐊᕐᓗᒍ ᓈᓴᐅᑎᓕᒃ 18(1)(c) ᐊᒻᒪ ᓈᓴᐅᑎᓕᒃ 11, ᐅᖃᖅᓯᒪᕗᖅ ᒪᓕᒐᓕᐅᕐᕕᒃ ᒪᓕᒐᓕᐅᖅᑎᓂᒃ ᐃᓂᖅᑎᕆᔪᓐᓇᕐᓂᕐᒥᒃ ᐱᔪᓐᓇᕐᓂᖅᑖᖅᑎᑕᐅᓯᒪᓂᖓᓐᓂᒃ, ᐃᓚᓕᐅᖢᒍ ᐱᐅᒃᓴᓐᖏᓐᓂᕐᒥᓂᒃ ᓇᓗᓇᐃᖅᓯᓂᖅ, ᓄᖅᑲᖓᑎᑦᑎᑲᐃᓐᓇᕈᓐᓇᕐᓂᖅ ᐊᒻᒪ ᒪᓕᒐᓕᐅᖅᑎᓂᒃ ᐊᓂᑦᑎᔪᓐᓇᕐᓂᖅ. ᒪᓕᒐᓕᐅᕐᕕᒃ ᑭᖑᓂᑦᑎᓐᓂ ᑕᒪᑐᒥᖓ ᐱᔪᓐᓇᕐᓂᖅᑖᕆᓯᒪᔭᒥᖕᓂᒃ ᐊᑐᖃᑦᑕᖅᓯᒪᔪᑦ. ᖃᓄᐃᓕᐅᕐᓂᖓᑕ ᖃᓄᐃᑦᑑᓂᖓ ᖃᓄᐃᓕᐅᕐᓂᖓᓘᓐᓃᑦ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅᖅᑎᒍᑦ ᓇᓗᓇᐃᖅᓯᒪᓐᖏᑉᐸᑦ, ᒪᓕᒐᓕᐅᕐᕕᒃ ᐱᔪᓐᓇᐅᑎᖃᖅᐳᖅ ᖃᓄᖅ ᖃᓄᐃᓕᐅᕐᓂᖓ ᑲᒪᒋᔭᐅᔪᓐᓇᕐᒪᖔᖓ. ᓱᓕᑦᑎᐊᕐᓂᕐᒧᑦ ᑲᒥᓴᓇ ᐱᖁᔭᕐᔪᐊᖅᑎᒍᑦ ᐱᔪᓐᓇᕐᓂᖅᑖᖅᑎᑕᐅᓯᒪᓐᖏᓚᖅ ᓇᐅᑦᑎᖅᓱᕈᓐᓇᕐᓂᕐᒥᒃ ᒪᓕᒃᑎᑦᑎᓇᓱᖕᓂᕐᒥᒡᓘᓐᓃᑦ ᒪᓕᒐᓕᐅᖅᑎᐅᑉ ᐃᖅᑲᓇᐃᔭᖅᑎᑦᑎᐊᕙᐅᓂᕐᒧᑦ ᒪᓕᒐᖓᓂᒃ. ᐃᓗᓕᖏᑦ

5 ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ ᒪᓕᒐᓕᐅᖅᑏᑦ ᐊᑐᕆᐊᖃᖅᑕᖏᑦ ᓂᕈᐊᖅᑕᐅᓯᒪᔪᑦ ᐊᖏᕈᑎᒋᓯᒪᔭᖏᑦ ᓇᓗᓇᐃᔭᖅᑕᐅᓯᒪᕗᑦ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ ᐊᒻᒪ ᓇᓗᓇᐃᔭᑦᑎᐊᖅᓯᒪᓪᓗᑎᒃ ᒪᕐᕈᐃᓕᖓᓪᓗᑎᓪᓗ, ᐃᒫᒃ: 1. ᐱᔭᒃᓴᖅᑖᖅᑎᑕᐅᓯᒪᕗᑦ ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᕐᒥᒃ ᐱᓕᕆᐊᒥᒍᑦ ᓂᕈᐊᖅᑕᐅᓯᒪᓪᓗᓂ, ᐊᒻᒪ ᐃᒻᒥᒨᖓᔪᑦ ᐋᖅᑭᒃᓱᖅᓯᒪᑦᑎᐊᕐᓗᓂᒋᑦ ᐱᓯᓂᓯᕆᔭᓂᓗ ᐃᒻᒥᒧᑦ ᐊᒡᕕᐊᕈᑎᖃᕐᓂᕐᒥᒃ ᓴᖅᑭᑦᑐᖃᔾᔮᓐᖏᒻᒪᑦ; 2. ᑕᖅᑲᐅᓐᖓᖅᑐᒃᓴᓂᒃ ᑕᑕᑎᕆᓯᒪᔪᓂᒃ ᐊᕐᕌᒍᑕᒫᖅ ᐊᑐᐃᓐᓇᕈᐃᔭᕆᐊᖃᖅᐳᖅ ᓴᖅᑭᔮᑦᑎᐊᕐᓂᐊᕐᒪᑕ ᒪᓕᒐᓕᐅᖅᑎᐅᑉ ᐃᓚᒋᔭᐅᔾᔪᑎᖃᕐᕕᖏᑦ ᐊᒻᒪ ᐃᓚᖏᑕ ᐃᓚᒋᔭᐅᔾᔪᑎᖃᕐᕕᖏᑦ. ᑮᓇᐅᔭᓕᕆᓂᕐᒧᑦ ᑐᕌᖓᒃᐸᑦ, ᐱᓯᓂᓯᖓᓄᑦ ᐅᕝᕙᓘᓐᓃᑦ ᐊᓯᔾᔨᖅᑐᖃᖅᐸᑦ ᐃᓚᒋᔭᐅᔾᔪᑎᖃᕐᕕᖏᑦ ᐊᕐᕌᒎᑉ ᐃᓗᐊᓂ, ᒪᓕᒐᓕᐅᖅᑏᑦ ᑕᒪᑐᒥᖓ ᓇᓗᓇᐃᖅᓯᔭᕆᐊᓖᑦ ᑕᑕᑎᕆᐊᓖᑦ ᐃᓚᒋᐊᕈᑎᖏᑕ ᑕᑕᑎᕆᐊᓕᖏᑦᑎᒍᑦ. ᐊᖏᖅᓯᒪᔭᖏᑦᑕ ᖁᓛᓂ ᑎᑎᕋᖅᓯᒪᔪᑦ ᖄᒃᑲᓐᓂᐊᒍᑦ, ᐊᑕᐅᓯᐅᓐᖏᑦᑐᓂᒃ ᓇᓗᓇᐃᔭᑦᑎᐊᖅᓯᒪᔪᓂᒃ ᐱᔭᒃᓴᖅᑖᖅᑎᑕᐅᒃᑲᓐᓂᖅᓯᒪᕗᑦ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ ᓇᓗᓇᐃᔭᖅᓯᒪᔪᓂᒃ. ᐅᑯᓂᖓ ᐃᓚᖃᖅᖢᑎᒃ: • ᖃᓄᐃᑦᑐᑐᐃᓐᓇᕐᓂᒃ ᑕᑯᕚᖅᑖᖅᑕᐃᓕᒪᓗᓂ ᐃᑲᔫᓯᐊᖅᑖᖅᑕᐃᓕᒪᓗᓂᓗ ᐊᒃᑐᐃᓂᖃᕐᓂᐊᖅᐸᑦ ᒪᓕᒐᓕᐅᖅᑎᐅᑉ ᐱᔭᒃᓴᖅᑖᕆᓯᒪᔭᖏᓐᓄᑦ ᐊᒃᑐᐃᓂᖃᕐᓂᐊᖅᐸᓪᓘᓐᓃᑦ; • ᐊᑐᕐᓂᕐᓗᓐᖏᓪᓗᓂ ᑲᓐᖑᓇᖅᑑᑎᑕᐅᔪᓂᒃ ᑐᓴᐅᒪᔾᔪᑎᓂᒃ ᑐᓴᐅᒪᔭᒥᓂᒃ ᓂᕈᐊᖅᑕᐅᓯᒪᓂᓂ ᐱᔾᔪᑎᒋᓪᓗᒍ, ᑐᓴᐅᒪᔾᔪᑏᑦ ᑕᖅᑲᐅᖓ ᐊᑐᐃᓐᓇᕈᖅᑎᑕᐅᓯᒪᓐᖏᑦᑐᑦ; • ᓂᕈᐊᖅᑕᐅᓯᒪᓂᓂ ᐊᑐᓐᖏᓪᓗᒍ ᐊᓯᒥᑕ ᑎᒥᓐᖑᖅᑎᑕᐅᓯᒪᔪᑦ, ᑲᑎᒪᔩᑦ, ᐃᖅᑲᖅᑐᐃᕕᒃᑎᑐᑦ ᐊᐅᓚᓂᓕᖕᓄᑦ ᐊᓯᖏᓐᓄᓪᓘᓐᓃᑦ ᐃᓱᒪᓕᐊᕆᔭᖏᓐᓂᒃ ᐊᓯᔾᔨᖅᑎᑦᑎᓇᓱᓐᖏᓪᓗᓂ; • ᐊᑭᓕᖅᓱᖅᑕᐅᓗᓂ ᐊᔭᐅᖅᑐᐃᓇᓱᖕᓂᕐᒥ ᐃᓚᐅᓐᖏᓪᓗᓂ ᐱᕚᓪᓕᖁᔨᓂᕐᒧᑦ ᐊᓯᖏᓐᓂᒃ ᑎᒥᓐᖑᖅᑎᑕᐅᓯᒪᔪᓂᒃ, ᑲᑐᔾᔨᖃᑎᒌᓂᒃ ᐅᕝᕙᓘᓐᓃᑦ ᐃᓄᖕᓂᒃ.

6 ᒥᓂᔅᑕᐃᑦ ᐅᕝᕙᓘᓐᓃᑦ ᒥᓂᔅᑕᐃᑦ ᑲᑎᒪᔨᖏᓐᓄᑦ ᐃᓚᒋᔭᐅᖃᑕᐅᔪᑦ ᓴᓐᖏᓂᖅᓴᓂᒃ ᐱᔭᒃᓴᖅᑖᖅᑎᑕᐅᓯᒪᕗᑦ ᐃᓚᒋᔭᐅᖃᑕᐅᔾᔮᓐᖏᓪᓗᑎᒃ ᐱᓯᓂᓯᐅᑉ ᐱᔪᒪᔭᖏᓐᓂᒃ ᐅᕝᕙᓘᓐᓃᑦ ᑮᓇᐅᔭᓕᖅᓯᓯᒪᔭᖏᓐᓂᒃ ᑲᑎᒪᔨᐅᓗᓂ ᑲᒪᔨᐅᓗᓂᓘᓐᓃᑦ. ᒥᓂᔅᑕ ᐱᓯᓂᓯᖃᖅᐸᑦ, ᐅᕝᕙᓘᓐᓃᑦ ᑮᓇᐅᔭᓕᖅᓯᓯᒪᒃᐸᑦ, ᐊᓯᒥᓄᑦ ᐸᖅᑭᔭᐅᑎᑦᑕᕆᐊᖃᖅᑕᖏᑦ. ᒥᓂᔅᑕ ᐃᓚᐅᔭᕆᐊᖃᓐᖏᓚᖅ ᖃᐅᔨᒪᔮᖃᕆᐊᖃᓐᖏᓚᕐᓗ ᐱᓯᓂᓯᒥᑕ ᐊᐅᓚᑕᖏᓐᓂᒃ ᑮᓇᐅᔭᓕᖅᓯᓯᒪᔭᖏᓐᓂᒡᓘᓐᓃᑦ, ᑖᓐᓇ ᐊᐅᓚᑕᐅᔭᕆᐊᖃᕐᒪᑦ ᑲᒪᒋᔭᐅᓗᓂᓘᓐᓃᑦ ᐃᒻᒥᒃᑰᖅᑐᒧᑦ ᒐᕙᒪᒃᑯᓐᓄᑦ ᐊᑕᓂᖃᓐᖏᑦᑐᒧᑦ. ᑕᒪᒃᑯᐊᓕᒫᖅ ᐃᓕᐅᖅᑲᖅᑕᐅᓯᒪᕗᑦ ᑕᖅᑲᒃᑯᓄᖓ ᓇᓗᖅᑯᑎᒋᔭᐅᑦᑕᐃᓕᒪᓂᒃ ᐱᔾᔪᑎᒋᓪᓗᒍ, ᓯᕗᓪᓕᖅᐸᐅᑎᒋᓯᓂᒪᓪᓗᒍ ᐃᖅᑲᓇᐃᔮᖃᕐᓂᖅ ᑕᖅᑲᒃᑯᐊ ᐊᒻᒪ ᓄᓇᕗᒻᒥᐅᑦ ᐃᓱᒪᒋᓪᓗᒋᑦ. ᓱᓕᑦᑎᐊᕐᓂᕐᒧᑦ ᑲᒥᓴᓇ ᑎᒃᑯᐊᖅᑕᐅᕙᒃᐳᖅ ᓄᓇᕗᑦ ᑲᒥᓴᓇᖓᓐᓄᑦ, ᒪᓕᒃᖢᓂᒋᑦ ᒪᓕᒐᓕᐅᖅᑏᑦ ᐊᑐᓕᖁᔭᓕᐊᖏᑦ. ᑕᓪᓕᒪᓄᑦ ᐊᕐᕌᒍᓄᑦ ᑎᒃᑯᐊᖅᑕᐅᓚᐅᖅᑐᖓ ᐊᒃᑑᐸ 23, 2018−ᒥ, ᐊᒻᒪ ᐃᓕᓯᒪᓂᕋ ᑕᓪᓕᒪᓄᑦ ᐊᕐᕌᒍᓄᑦ ᐃᓚᔭᐅᒃᑲᓐᓂᓚᐅᖅᖢᓂ ᐊᒃᑑᐸ 2023-ᒥ. ᓱᓕᑦᑎᐊᕐᓂᕐᒧᑦ ᑲᒥᓴᓇ ᐃᒻᒥᒃᑰᖅᖢᓂ ᑲᒪᔨᐅᕗᖅ ᒪᓕᒐᓕᐅᕐᕕᖕᒧᑦ, ᐃᓕᓯᒪᕝᕕᖕᒥᓂᓗ ᐲᖅᑕᐅᔪᓐᓇᓐᖏᖢᓂ ᑭᓯᐊᓂ ᐱᔾᔪᑎᒃᓴᖃᖅᐸᑦ ᐅᕝᕙᓘᓐᓃᑦ ᐊᔪᓕᕐᓂᖅᐸᑦ. ᓱᓕᑦᑎᐊᕐᓂᕐᒧᑦ ᑲᒥᓴᓇ ᐱᔭᒃᓴᖅᑖᖅᑎᑕᐅᓯᒪᕗᑦ ᐃᓚᐃᓐᓈᕆᓐᖏᓪᓗᓂ ᐊᐅᓚᑦᓯᓂᐊᕐᓂᕐᒥᒃ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᕐᒥᒃ. ᓱᓕᓂᐊᕐᓂᕐᒥᒃ ᑐᓐᖓᕕᖃᕐᓂᐊᕐᓂᕋᓚᐅᖅᓯᒪᔪᖅ, ᐱᔭᒃᓴᒥᓂᒡᓗ ᐱᓕᕆᐊᖃᕐᓗᓂ ᐃᓚᐃᓐᓈᕆᔭᖃᓐᖏᓪᓗᓂ, ᐊᒻᒪ ᑲᓐᖑᓇᖅᑑᑎᑕᐅᔪᓂᒃ ᑐᓴᐅᒪᔾᔪᑎᓂᒃ ᐅᖃᐅᔾᔪᕐᓂᕆᓚᐅᖅᑕᒥᓂᒡᓗ ᓴᖅᑭᑦᑎᓐᖏᓪᓗᓂ ᑭᓯᐊᓂ ᑕᐃᒪᐃᑦᑕᕆᐊᖃᖅᑎᑕᐅᒍᓂ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ. ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐃᓱᒪᓕᐊᕆᔭᖏᑦ ᐊᔪᐃᓐᓈᕆᔭᐅᔪᓐᓇᓐᖏᑦᑐᑦ. ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐱᔭᒃᓴᖅᑖᕆᓯᒪᔭᖏᑦ

7 ᐃᓕᓐᓂᐊᕐᓂᖅ ᖃᐅᔨᒪᔨᑕᕆᔭᐅᓂᕐᓗ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐱᔭᒃᓴᓪᓗᐊᑕᕆᕚ ᒪᓕᒐᓕᐅᖅᑎᓂᒃ ᑐᑭᓯᑎᑦᑎᓂᕐᒥᒃ ᖃᓄᐃᑦᑐᓂᒃ ᐱᔭᒃᓴᖅᑖᖅᓯᒪᖕᒪᖔᖏᑦ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ, ᐊᒻᒪ ᑐᑭᒧᐊᒃᑎᒋᔭᐅᖃᑦᑕᕐᓗᓂ ᐃᒻᒥᒧᑦ ᐊᒡᕕᐊᕈᑎᖃᖅᑐᖃᕐᓂᐊᓐᖏᒻᒪᑦ ᐊᒻᒪ ᐊᒡᕕᐊᕈᑎᑕᖃᖅᐸᑦ ᑕᒪᓐᓇ ᐋᖅᑭᒡᓗᓂᐅᒃ. ᒪᓕᒐᓕᐅᖅᑏᑦ ᓂᕈᐊᖅᑕᐅᓚᐅᖅᑎᓪᓗᒋᑦ, ᓱᓕᑦᑎᐊᕐᓂᕐᒧᑦ ᑲᒥᓴᓇ ᒪᓕᒐᓕᐅᖅᑎᓂᒃ ᐃᓕᓐᓂᐊᖅᑎᑦᑎᖃᑦᑕᖅᑐᖅ ᖃᓄᐃᑦᑐᓂᒃ ᐱᔭᒃᓴᖅᑖᖅᑎᑕᐅᓯᒪᖕᒪᖔᖏᑦ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ. ᒪᓕᒐᓕᐅᖅᑎᓕᒫᑦ, ᓂᕈᐊᖅᑕᐅᓵᕋᓗᐊᖅᐸᑕ ᐅᕝᕙᓘᓐᓃᑦ ᓂᕈᐊᖅᑕᐅᒃᑲᓐᓂᕋᓗᐊᖅᐸᑕ ᐃᓕᓐᓂᐊᖅᑎᑕᐅᔪᐃᓐᓇᐅᖃᑦᑕᖅᑐᑦ. ᓇᓗᓇᐃᔭᐃᓯᒪᕙᖕᒥᔪᖅ ᖃᓄᐃᑦᑐᓂᒃ ᒪᓕᒐᖅᑕᖃᕐᒪᖔᖓ ᐱᖁᔭᕐᔪᐊᑉ ᐊᑖᒎᖅᑐᓂᒃ ᐊᒻᒪ ᖃᓄᖅ ᓵᒋᐊᖅᑕᐅᔪᓐᓇᕐᒪᖔᖓ ᒪᓕᓐᖏᓐᓂᕈᑎᒃ ᐊᑐᕆᐊᖃᖅᑕᒥᖕᓂᒃ. ᓱᓕᑦᑎᐊᕐᓂᕐᒧᑦ ᑲᒥᓴᓇ ᑕᐃᒪᓐᖓᓕᒫᖅ ᖃᐅᔨᒪᔨᑕᕆᔭᐅᖃᑦᑕᖅᐳᖅ ᐃᓘᓐᓇᖏᑦ ᐱᔭᒃᓴᖅᑖᕆᔭᐅᓯᒪᔪᑦ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᑦ ᐃᓗᐊᓃᑦᑐᓂᒃ, ᓲᕐᓗ ᑕᑯᕚᑦ ᐃᑲᔫᓯᐊᓪᓗ ᒥᒃᓵᓄᑦ ᒪᓕᒐᓕᐅᖅᑎ ᑐᓐᓂᖅᑯᓯᐊᖅᑕᐅᓇᓱᖕᓂᕈᓂ, ᖃᓄᐃᓕᐅᕆᐊᖃᕐᒪᖔᑦ ᒪᓕᒐᓕᐅᖅᑎ ᐃᖅᑲᓇᐃᔮᒥᓃᓪᓗᓂ ᐊᒻᒪ ᖃᓄᖅ ᑲᒪᒋᔭᖃᖃᑦᑕᕆᐊᖃᕐᓂᖓᓂᒃ ᑲᓐᖑᓇᖅᑑᑎᑕᐅᔭᕆᐊᓖᑦ. ᓱᓕᑦᑎᐊᕐᓂᕐᒧᑦ ᑲᒥᓴᓇ ᐊᒃᓱᐊᓗᒃ ᐃᑲᔪᖅᑎᒋᔭᐅᔪᖅ ᒪᓕᒐᓕᐅᖅᑎᓄᑦ. ᑕᐃᒪᓐᓇ ᖃᐅᔨᒪᔨᑕᕆᔭᐅᓂᖅ ᐊᒃᓱᐊᓗᒃ ᐱᕐᔪᐊᖑᓂᖅᐹᖅ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᓗᓂ. ᑕᐃᒪᐃᓐᓂᖓᓄᑦ, ᓱᓕᑦᑎᐊᕐᓂᕐᒧᑦ ᑲᒥᓴᓇ ᐊᒃᑐᐃᓂᖃᕆᐊᖃᓐᖏᓚᖅ ᓄᓇᓕᖕᓂ ᑕᑯᔭᐅᔪᒪᔪᓂᒃ ᐊᒃᑐᐃᓂᖃᕐᓂᐊᖅᑎᓂᓪᓗ, ᒪᓕᒐᓕᐅᖅᑎᓄᓪᓗ ᐊᑐᐃᓐᓇᐅᓗᓂ ᐃᑲᔪᖅᑕᐅᔪᒪᔪᓄᑦ ᐊᒻᒪ ᐅᖃᐅᔾᔪᐃᓂᖓ ᓇᓗᓇᐃᔭᑦᑎᐊᖅᓯᒪᓗᓂ ᑭᐅᓴᕋᐃᓪᓗᓂᓗ. ᒪᓕᒐᓕᐅᖅᑏᑦ ᐊᑐᓂ ᓱᓕᑦᑎᐊᕐᓂᕐᒧᑦ ᑲᒥᓴᓇᒥᒃ ᑲᑎᒪᖃᑎᖃᕆᐊᓕᒃ ᓂᕈᐊᖅᑕᐅᓚᐅᕐᕕᐊᓂ ᐅᓪᓗᑦ 90 ᑐᖔᓂ, ᐊᒻᒪ ᑭᖑᓂᐊᒍᑦ ᐊᕐᕌᒍᑕᒫᖅ. ᑲᑎᒪᖃᑎᒋᖃᑦᑕᓕᕐᓗᓂᐅᒃ. ᑲᑎᒪᔾᔪᑎᖃᓗᐊᓐᖑᐊᓲᑦ ᕿᒥᕐᕈᓇᒃᑕᐅᔪᓐᓇᕐᓂᐊᕐᒪᑕ ᒪᓕᒐᓕᐅᖅᑎᐅᑉ ᑕᖅᑲᐅᓐᖓᖅᑐᒃᓴᑦ ᑕᑕᑎᖅᓯᒪᔭᖏᖏᑦ, ᐊᒻᒪ ᐅᖃᐅᓯᕆᓗᓂᔾᔪᒃ ᒪᓕᒐᓕᐅᖅᑎᐅᑉ ᐱᔭᒃᓴᖅᑖᕆᓯᒪᔭᖏᑦ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ. ᖄᒃᑲᓐᓂᐊᒍᑦ, ᑖᒃᑯᑎᒎᓇᖅ ᑲᑎᒪᖃᑎᒌᖃᑦᑕᕐᓂᒃᑯᑦ ᓱᓕᑦᑎᐊᕐᓂᕐᒧᑦ ᑲᒥᓴᓇ ᐊᑐᓂ ᓂᕈᐊᖅᑕᐅᓯᒪᔪᓂᒃ ᑐᑭᓯᒃᑲᓐᓂᓲᖅ ᐊᒻᒪ ᐃᓚᑖᕆᓪᓗᓂᔾᔪᒃ ᑕᑎᒌᒍᓐᓇᖅᓯᓪᓗᑎᒡᓗ ᑲᒥᓴᓇ ᐊᒻᒪ ᒪᓕᒐᓕᐅᖅᑏᑦ, ᑕᒪᑐᒪᓂ ᐊᕐᕌᒍᒥ ᓂᕈᐊᖅᑕᐅᓯᒪᔪᑦ ᑲᑎᒪᖃᑎᒋᔪᓐᓇᖅᓯᓚᐅᖅᑕᒃᑲ ᐃᖃᓗᖕᓂ.

8 ᐊᑐᖅᑎᑦᑎᓂᖅ ᓱᓕᑦᑎᐊᕐᓂᕐᒧᑦ ᑲᒥᓴᓇ ᐱᕐᔪᐊᕌᓗᖕᒥᒃ ᐱᔭᒃᓴᖅᑖᖅᑎᑕᐅᓯᒪᒋᕗᖅ, ᐊᑐᖅᑎᑦᑎᓂᖅ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᕐᒥᒃ. ᐃᓚᖃᕈᓐᓇᖅᑐᖅ ᐱᖁᔭᕐᔪᐊᕐᒥᒃ ᓯᖁᒥᑦᑎᔪᖃᕋᓱᒋᓐᓈᒍᓂ ᑕᒪᓐᓇ ᖃᐅᔨᓴᕐᓗᓂᐅᒃ, ᐊᒻᒪ ᐅᖃᐱᓗᒡᕕᐅᔪᓐᓇᖅᖢᓂ ᓂᕈᐊᖅᑕᐅᓯᒪᔪᖅ ᐱᖁᔭᕐᔪᐊᕐᒦᑦᑐᒥᒃ ᐊᑕᐅᓯᕐᒥᒃ ᐅᓄᒃᑲᓐᓂᖅᑐᓂᒡᓘᓐᓃᑦ ᓯᖁᒥᑦᑎᔪᖃᕋᓱᒋᓐᓈᔪᖃᖅᐸᑦ. ᐅᑯᑎᒎᓇᖅ ᐅᓂᒃᑳᑎᒍᑦ ᐅᖃᖅᑲᐅᒐᒪ, ᓱᓕᑦᑎᐊᕐᓂᕐᒧᑦ ᑲᒥᓴᓇ ᖃᐅᔨᒪᔨᑕᕆᔭᐅᕗᖅ, ᐱᓗᐊᕐᓗᒍ ᐃᑲᔪᕐᓗᓂᒋᑦ ᒪᓕᒐᓕᐅᖅᑏᑦ ᑐᑭᓯᐅᒪᓂᐊᕐᒪᑕ ᖃᓄᐃᑦᑐᓂᒃ ᐱᔭᒃᓴᖅᑖᖅᑎᑕᐅᓯᒪᖕᒪᖔᖏᑦ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ ᐊᒻᒪ ᖃᐅᔨᒪᔨᑕᕆᔭᐅᓗᓂ ᐃᒻᒥᒧᑦ ᐊᒡᕕᐊᕈᑎᖃᕐᓂᐊᓐᖏᒻᒪᑦ ᑕᖅᑲᒃᑯᐊ ᐃᒻᒥᒨᖓᔪᓪᓗ ᐱᓪᓗᒋᑦ. ᓯᖁᒥᑦᑎᑦᑕᐃᓕᒪᓂᖅ ᓵᓐᖓᔭᐅᓗᐊᓐᖑᐊᕋᓗᐊᖅᑎᓪᓗᒋᑦ, ᓱᓕᑦᑎᐊᕐᓂᕐᒧᑦ ᑲᒥᓴᓇ ᖃᐅᔨᓴᐃᔨᒋᔭᐅᓂᕐᒥᒃ ᐊᑐᖃᑦᑕᕐᒥᔪᖅ ᐱᖁᔭᕐᔪᐊᖅᑎᒍᑦ, ᐊᒻᒪ ᓇᓗᓇᐃᖅᓯᓗᓂ ᒪᓕᒐᓕᐅᖅᑎ ᐱᖁᔭᕐᔪᐊᕐᒥᒃ ᓯᖁᒥᑦᑎᓚᐅᕐᒪᖔᖓ. ᒪᓕᒐᓕᐅᖅᑎᒥᒃ ᓯᖁᒥᑦᑎᓇᓱᒋᓐᓈᔪᖃᖅᐸᑦ (ᓲᕐᓗ ᓯᖁᒥᑦᑎᓗᓂ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᑉ ᐃᓗᓕᖏᓐᓃᖃᑕᐅᔪᒥᒃ) ᐊᒻᒪ ᐱᔭᐅᓗᓂ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ, ᖃᐅᔨᓴᐃᓕᕋᔭᖅᑐᖅ ᐊᒻᒪ ᓯᖁᒥᑕᐅᓇᓱᒋᔪᒨᖓᔪᓂᒃ ᐅᓂᒃᑳᓕᐅᕐᓗᓂ ᐱᕙᓪᓕᐊᔾᔪᓰᑦ ᓇᓗᓇᐃᔭᖅᓯᒪᔪᑦ ᐱᖁᔭᕐᔪᐊᑉ ᐃᓗᐊᒍᑦ ᓈᓴᐅᑎᓖᑦ 36-45 ᒪᓕᒡᓗᓂᒋᑦ. ᑎᑎᖅᑲᑎᒎᖓᔪᒃᑯᑦ ᐅᖃᐱᓗᒡᕕᐅᒍᒪ ᖃᐅᔨᓴᐃᓂᖅᑕᖃᓕᕋᔭᖅᑐᖅ, ᖃᐅᔨᓴᐃᓂᕐᒥᒃ ᐱᒋᐊᖅᑎᑦᑎᔪᓐᓇᖅᑐᖓ ᑕᒪᓐᓇ ᐅᖃᐅᓯᕆᔭᐅᔪᖅ ᐊᓯᐊᒍᖔᖅ ᐅᕙᓐᓄᐊᖅᑕᒃᐸᑦ. ᓱᓕᑦᑎᐊᕐᓂᕐᒧᑦ ᑲᒥᓴᓇᐅᓪᓗᖓ, ᐱᖁᔭᕐᔪᐊᖅᑎᒍᑦ ᐊᖏᔪᑲᓪᓚᖕᒥᒃ ᐱᔪᓐᓇᕐᓂᖅᑖᖅᑎᑕᐅᓯᒪᔪᖓ, ᑎᑎᖅᑲᓂᒃ ᓴᖅᑭᑦᑎᔭᕆᐊᖃᖅᑎᑦᑎᔪᓐᓇᖅᖢᖓ, ᑐᓴᐅᒪᔾᔪᑎᓂᒃ ᑐᒃᓯᕌᖃᕈᓐᓇᖅᖢᖓ ᐅᕝᕙᓘᓐᓃᑦ ᖃᐃᖁᔨᔪᓐᓇᖅᖢᖓ ᑐᓴᐅᒪᔪᓂᒃ ᖃᓄᐃᓕᐅᕐᓂᐅᓚᐅᖅᑐᓂᑦ. ᐸᓖᓯᒃᑯᓐᓂᑦ ᕿᓂᕈᓐᓇᐅᑎᓂᒃ ᐊᓯᖏᓐᓂᒡᓗ ᐱᔪᓐᓇᐅᑎᓂᒃ ᑐᒃᓯᕌᖃᕈᓐᓇᖅᑐᖓ. ᑭᓇᑐᐃᓐᓇᖅ ᓱᓕᑦᑎᐊᕐᓂᕐᒧᑦ ᑲᒥᓴᓇᒥᒃ ᕿᒥᕐᕈᓇᖁᔨᔪᓐᓇᖅᑐᖅ ᒪᓕᒐᓕᐅᖅᑎᒥᒃ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᕐᒥᒃ ᓯᖁᒥᑦᑎᓇᓱᓐᓈᒍᓂ. ᓱᓕᑦᑎᐊᕐᓂᕐᒧᑦ ᑲᒥᓴᓇ ᐅᖃᐱᓗᒡᕕᐅᒃᐸᑦ ᑖᓐᓇ ᐅᖃᐱᓘᑕᐅᔪᖅ ᑎᑎᖅᑲᑎᒎᖓᒋᐊᓕᒃ ᐊᒻᒪ ᐊᐃᑉᐸᖃᕐᓗᓂ ᓱᓕᓂᕋᕈᑎᓂᒃ ᑎᑎᖅᑲᓂᒃ. ᑕᐃᒪᐃᑦᑕᕆᐊᖃᖅᑎᑕᐅᔪᖅ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᑉ ᐃᓗᐊᓃᑦᑐᓄᑦ ᓈᓴᐅᑎᓕᒃ 36(2) ᐊᒻᒪ (3). ᐅᖃᐱᓘᑕᐅᔪᖅ ᓇᓗᓇᐃᖅᓯᓯᒪᔭᕆᐊᓕᒃ ᖃᓄᐃᑦᑐᒥᒃ ᓯᖁᒥᑦᑎᓇᓱᒋᔭᐅᖕᒪᖔᖓ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ. ᐅᖃᐱᓘᑕᐅᔪᖅ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᑉ ᓱᑯᑦᑎᐊᓂᒃ ᓯᖁᒥᑦᑎᓯᒪᖕᒪᖔᖓᓂᒃ ᓇᓗᓇᐃᖅᓯᓯᒪᓐᖏᑉᐸᑦ ᖃᓄᐃᓕᐅᖅᑕᐅᒃᑲᓐᓂᕈᓐᓇᓐᖏᑦᑐᖅ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ. ᒐᕙᒪᒃᑯᓐᓂ ᐊᖓᔪᖅᑲᐅᑏᑦ ᓇᓗᓇᐃᖅᓯᓯᒪᔪᑦ ᕿᒥᕐᕈᓇᖁᔨᓂᕐᒥᒃ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ. ᑖᒃᑯᐊ ᐊᖓᔪᖅᑲᐅᑏᑦ ᓇᓗᓇᐃᖅᑕᐅᓯᒪᔪᑦ ᐱᖁᔭᕐᔪᐊᑉ ᐃᓗᐊᒎᖅᑐᒃᑯᑦ ᓈᓴᐅᑎᓕᒃ 36(1.1). ᒪᓕᒐᓕᐅᕐᕕᒃ ᐃᒻᒥᒃᑯᕐᓗᓂ, ᐊᑐᓕᖁᔭᖅᑎᒍᑦ, ᕿᒥᕐᕈᓇᒃᓯᖁᔨᔪᓐᓇᖅᑐᖅ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ. ᓯᕗᓕᖅᑎ ᕿᒥᕐᕈᓴᒃᑕᐅᖁᔨᔪᓐᓇᖅᑐᖅ ᑖᓐᓇ ᓯᖁᒥᑦᑎᓇᓱᒋᔭᐅᔪᖅ ᒥᓂᔅᑕᐅᒃᐸᑦ.

9 ᖃᓄᐃᑦᑐᑐᐃᓐᓇᐃᑦ ᐅᓂᒃᑳᓕᐊᑦ ᓴᖅᑭᑦᑐᑦ ᓱᓕᑦᑎᐊᕐᓂᕐᒧᑦ ᑲᒥᓴᓇ ᖃᐅᔨᓴᓚᐅᖅᑎᓪᓗᒍ, ᑲᑎᒪᕐᔪᐊᕐᓇᕐᒥ ᒪᓕᒐᓕᐅᕐᕕᖕᒧᑦ ᓴᖅᑭᑕᐅᔭᕆᐊᓕᒃ ᒪᓕᒐᓕᐅᕐᕕᖕᒧᑦ ᐅᖃᖅᑎᒧᑦ. ᐅᓂᒃᑳᑦ ᓇᓗᓇᐃᖅᓯᓯᒪᔭᕆᐊᓖᑦ ᖃᓄᐃᑦᑐᒥᒃ ᓯᖁᒥᑦᑎᓇᓱᒋᔭᐅᓚᐅᕐᒪᖔᖓᓂᒃ, ᓱᓕᔪᕐᓇᐅᑏᑦ ᑲᒥᓴᓇᒧᑦ ᖃᐅᔨᔭᖏᑦ, ᐊᒻᒪ ᑖᒃᑯᐊ ᓱᓕᔪᕐᓇᐅᑏᑦ ᑐᑭᓯᓇᖅᓯᑎᑦᑎᒃᐸᑕ ᒪᓕᒐᓕᐅᖅᑎ ᓯᖁᒥᑦᑎᓚᐅᕐᓂᖓᓂᒃ ᐊᑕᐅᓯᕐᒥᒃ ᐅᓄᒃᑲᓐᓂᖅᑐᓂᒡᓘᓐᓃᑦ ᐱᔭᒃᓴᖅᑖᕆᓯᒪᔭᖏᓐᓂᒃ ᓱᓕᑦᑎᐊᕐᒧᑦ ᐱᖁᔭᕐᔪᐊᖅᑎᒍᑦ. ᓱᓕᑦᑎᐊᕐᓂᕐᒧᑦ ᑲᒥᓴᓇ ᖃᐅᔨᒍᓂ ᒪᓕᒐᓕᐅᖅᑎ ᐱᖁᔭᕐᔪᐊᕐᒥᒃ ᓯᖁᒥᑦᑎᓚᐅᕐᓂᖓᓂᒃ, ᑖᒃᑯᐊ ᐅᓂᒃᑳᑦ ᐊᑐᓕᖁᔭᕐᓂᒃ ᐃᓗᓕᖃᕆᐊᓕᒃ ᐱᔾᔪᑎᓕᖕᓂᒃ ᖃᓄᖅ ᐃᓂᖅᑎᖅᑕᐅᓂᐊᕐᒪᖔᖓ ᐅᕝᕙᓘᓐᓃᑦ ᐊᑭᓖᑎᑕᐅᓂᐊᕐᒪᖔᖓ. ᐃᓚᖃᕈᓐᓇᖅᑐᑦ ᑖᓐᓇ ᖃᓄᐃᓕᐅᖅᑕᐅᒃᑲᓐᓂᕈᓐᓇᐃᓪᓕᓂᖓᓂᒃ, ᒪᓕᒐᓕᐅᖅᑎ ᐃᓂᖅᑎᖅᑕᐅᓗᓂ, ᐊᑭᓖᑎᑕᐅᓗᓂ ᐅᕝᕙᓘᓐᓃᑦ ᐋᖅᑭᒋᐊᕈᑎᓂᒃ ᐊᐅᓚᔾᔭᐃᔾᔪᑎᖃᕐᓗᑎᒃ. ᐃᓂᖅᑎᕈᑦ ᓴᓐᖏᓂᖅᐹᖅ ᐅᖃᖅᓯᒪᕗᖅ ᒪᓕᒐᓕᐅᖅᑎᐅᑉ ᐃᓂᖓ ᐃᓄᖃᕈᓐᓃᖅᑎᑕᐅᓂᖓᓂᒃ ᐅᕝᕙᓘᓐᓃᑦ ᒪᓕᒐᓕᐅᖅᑎ ᐲᖅᑕᐅᓗᓂ ᐃᓂᖓᓂᑦ. ᒪᓕᒐᓕᐅᕐᕕᒃ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐊᑐᓕᖁᔭᖏᓐᓂᒃ ᐊᖏᖅᓯᔪᓐᓇᖅᑐᑦ ᐅᕝᕙᓘᓐᓃᑦ ᐋᒃᑳᕐᓗᓂᒋᑦ. ᒪᓕᒐᓕᐅᕐᕕᒃ ᑕᒪᑐᒥᖓ ᓱᒃᑯᐃᔭᕆᐊᖃᓕᖅᑐᖅ ᑲᒪᒋᔪᓐᓃᕐᓗᓂᐅᒃ, ᐃᓇᖏᖅᑕᐅᔪᓐᓇᓐᖏᖢᑎᒡᓗ ᑐᑭᓯᔭᐅᔪᑦ ᐅᕝᕙᓘᓐᓃᑦ ᐃᓂᖅᑎᕈᑏᑦ ᐊᑐᕆᐊᖃᖅᑎᑕᐅᔪᑦ ᐊᑐᓕᖁᔭᓕᐊᕆᔭᐅᔪᓪᓗ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ. ᒪᓕᒐᓕᐅᖅᑎ ᐅᖃᐱᓘᑕᐅᓚᐅᖅᑐᖅ ᓂᓪᓕᓐᖏᑉᐸᑦ ᓇᓗᓇᐃᖅᓯᒃᐸᓪᓗ, ᐅᖃᐱᓘᑎᑕᖃᖅᐸᑦ ᐅᖃᐱᓘᑎᑕᖃᓐᖏᑉᐸᓪᓘᓐᓃᑦ, ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᑎᑎᕋᕐᕕᐊ ᑲᓐᖑᓇᖅᑑᑎᑦᑎᓂᐊᖅᐳᖅ ᐱᓕᕆᐊᖑᔪᒥᒃ, ᐅᕝᕙᓘᓐᓃᑦ ᐅᓂᒃᑳᑦ ᐅᖃᐱᓘᑕᐅᓚᐅᖅᑐᒥᓐᖔᖅᑐᑦ ᓴᖅᑭᑕᐅᒃᐸᑕ ᒪᓕᒐᓕᐅᕐᕕᖕᒧᑦ. ᑕᐃᒪᓐᓇ ᐱᐅᓯᖃᖅᐳᑦ ᐅᖃᐱᓘᑕᐅᔪᖅ ᐊᑐᕐᓂᕐᓘᑕᐅᓕᖁᓐᖏᖢᒍ. ᐅᓂᒃᑳᑦ ᕿᒥᕐᕈᓇᓚᐅᖅᑎᓪᓗᒋᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ, ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐃᑭᐊᖅᑭᕕᒃᑰᕈᑖᒍᑦ ᐃᓕᔭᐅᖃᑦᑕᖅᑐᑦ. (www.integritycom.nu.ca) ᐱᖁᔭᕐᔪᐊᑉ ᕿᒥᕐᕈᓇᒃᑕᐅᖏᓐᓇᕐᓂᖓ ᓱᓕᑦᑎᐊᕐᓂᕐᒧᑦ ᑲᒥᓴᓇ ᖃᐅᔨᒪᔨᑕᕆᔭᐅᕙᒃᑭᕗᖅ ᐊᑐᓕᖁᔭᒃᑯᑦ ᐊᓯᔾᔨᖅᑕᐅᓐᓂᖅᐸᑕ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᑉ ᐃᓗᓕᖏᓐᓃᑦᑐᑦ ᐊᒻᒪ ᐱᖁᔭᕐᔪᐊᖅ ᕿᒥᕐᕈᓇᒃᑕᐅᖃᑦᑕᕆᐊᖃᖅᖢᓂ ᑕᓪᓕᒪᑦ ᐊᕐᕌᒍᑦ ᐊᓂᒍᕐᓂᑕᒫᖏᓐᓂ. ᑕᒪᓐᓇ ᖃᐅᔨᒪᔨᑕᕆᔭᐅᓂᖅ ᐊᒻᒪ ᐊᑐᓕᖁᔭᐃᑦ ᑐᓐᓂᖅᑎᑕᐅᖃᑦᑕᖅᑐᑦ ᒪᓕᒐᓕᐅᕐᕕᑉ ᑲᑎᒪᔨᓕᕆᔨᒃᑯᑦ ᑲᑎᒪᔨᖏᓐᓄᑦ, ᐃᓱᒪᒃᓴᖅᓯᐅᕈᑕᐅᓂᐊᕐᒪᑕ ᐊᒻᒪ ᖃᓄᐃᑦᑐᓂᒃ ᐊᐅᓚᔾᔭᐃᓂᐊᕐᒪᖔᖏᑦ (ᐃᓚᖃᕈᓐᓇᖅᖢᓂ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᑉ ᐋᖅᑭᒋᐊᖅᑕᐅᓂᖓᓂᒃ).

10 ᐊᑕᐅᓯᐅᓐᖏᑦᑐᓂᒃ ᖃᓄᖅᑑᕈᑎᒃᓴᓕᐅᕐᕕᐅᓯᒪᔪᑦ ᑲᑎᒪᔨᓕᕆᔨᒃᑯᑦ ᑲᑎᒪᔨᖏᑦ. ᐅᑯᓂᖓ ᐃᓗᓕᖃᖃᓯᐅᔾᔨᓯᒪᔪᑦ: 1. ᐊᕐᕌᒍᑕᒫᖅ ᓴᖅᑭᑦᑎᓂᕐᒧᑦ ᐅᖃᐅᓯᖅᑕᑦ ᐊᒻᒪ ᐊᓯᖏᖅ ᐅᖃᐅᓯᖅᑕᓕᐊᕆᔭᐅᓯᒪᔪᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐃᑭᐊᖅᑭᕕᖓᒎᖅᑎᑕᐅᕙᖕᒥᔪᑦ ᑭᒃᑯᑐᐃᓐᓇᕐᓄᑦ ᐊᑐᐃᓐᓇᐅᔪᓐᓇᖁᓪᓗᒋᑦ. 2. ᒥᓂᔅᑕ ᐱᓯᓂᓯᖃᕈᓂ ᐃᓚᒋᔭᐅᔾᔪᑎᖃᕈᓂᓗ ᐊᓯᒥᓄᑦ ᐊᐅᓚᑕᐅᑎᑦᑕᕆᐊᖃᖅᐸᐅᒃ ᐅᑯᑎᒎᓈᖅᑎᑕᐅᓗᑎᒡᓗ ᐃᓗᓕᑯᓘᔭᖃᐅᕐᓗᑎᒃ ᐱᓯᓂᓯᖃᕐᕕᒋᔭᖓ ᓇᓗᓇᐃᖅᑕᖓ. ᑖᒃᑯᐊ ᐊᑐᓕᖁᔭᐃᑦ ᐊᖏᖅᑕᐅᓯᒪᓕᖅᑐᑦ ᑲᑎᒪᔨᓕᕆᔨᒃᑯᓐᓄᑦ ᐊᒻᒪ ᐋᖅᑭᒋᐊᕈᑎᓂᒃ ᐋᖅᑭᒃᓱᐃᕙᓪᓕᐊᓕᕐᓗᑎᒃ ᐊᑐᓕᖅᑎᑕᐅᔪᓐᓇᖅᓯᓂᐊᕐᒪᑕ. ᐋᖅᑭᒋᐊᕈᑏᑦ ᐱᔭᕇᖅᑕᐅᓂᐊᕋᓱᒋᔭᐅᔪᑦ ᐊᕐᕕᓂᓕᒋᔭᖏᑦ ᒪᓕᒐᓕᐅᖅᑏᑦ ᓄᖑᑎᑕᐅᓚᐅᓐᖏᓐᓂᖏᓐᓂ.

11 ᑕᖅᑲᐅᓐᖓᖅᑐᒃᓴᐃᑦ ᑎᑎᖅᑲᑦ ᐊᑕᐅᓯᖅ ᒪᓕᒐᓕᐅᖅᑎ ᐱᓐᖏᑕᑐᐊᕆᓪᓗᒍ, ᐊᕐᕕᓂᓕᕆᓕᖓᓂ ᒪᓕᒐᓕᐅᖅᑎᓕᒫᑦ ᑕᖅᑲᐅᓐᖓᖅᑐᒃᓴᑦ ᑎᑎᖅᑲᖏᓐᓂᒃ ᑕᑕᑎᕆᓚᐅᖅᑐᑦ ᑕᒪᑐᒪᓂ ᐅᓂᒃᑳᕐᓇᐅᔪᒥ ᐅᓪᓗᓕᓚᐅᖅᑕᒪ ᑐᖔᓂ. ᑕᐃᒪᓐᓇ ᒪᓕᒐᓕᐅᖅᑎ ᑕᖅᑲᐅᓐᖓᖅᑐᒃᓴᓂᒃ ᑎᑎᖅᑲᓂᒃ ᑭᖑᕙᓚᐅᖅᑐᖅ ᔪᐃᓕ ᖃᐃᕐᓂᖅ, ᐊᒥᑦᑐᕐᒧᑦ ᑭᒡᒐᖅᑐᐃᔨ. ᑕᐃᒪᓐᖓᓂᑦ ᑕᑕᑎᕆᐊᓕᖕᓂᒃ ᑕᑕᑎᕆᐊᓂᒃᓯᒪᓕᖅᑐᖅ. ᑕᑕᑎᕆᐊᓕᒃ 1 ᑕᖅᑲᐅᓐᖓᖅᑐᒃᓴᑦ ᑎᑎᖅᑲᑦ ᐃᓗᓕᖏᑦ ᓇᓗᓇᐃᔭᖅᑕᐅᓯᒪᔪᑦ ᐱᖁᔭᕐᔪᐊᖅᑎᒍᑦ, ᐊᒻᒪ ᐱᖁᑎᓪᓚᕇᑦ, ᐊᑭᓕᒃᓴᓐᖑᑐᐃᓐᓇᕆᐊᓖᑦ, ᑮᓇᐅᔭᑦ ᐃᓯᖅᐸᓪᓕᐊᔪᑦ, ᑳᓐᑐᕌᑦ, ᓇᖕᒥᓂᖃᕐᕕᒋᔭᖏᑦ ᐊᓯᖏᓪᓗ, ᐃᓚᓕᐅᓪᓗᒋᑦ ᖃᓄᐃᓕᐅᕐᓂᐅᔪᑦ ᐊᑐᕆᐊᖃᓐᖏᑎᑕᑦ, ᑭᓯᐊᓂᓗ ᐊᑐᕈᓐᓇᖅᑎᑕᐅᔪᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ ᒪᓕᒡᓗᒍ ᐱᖁᔭᕐᔪᐊᖅ. ᑕᖅᑲᐅᓐᖓᖅᑐᒃᓴᑦ ᑎᑎᖅᑲᑦ ᐋᖅᑭᒋᐊᖅᑕᐅᔪᓐᓇᖅᑐᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ ᐊᒻᒪ ᑕᒪᑐᒪᓂ ᐊᕐᕌᒎᓚᐅᖅᑐᒥ ᐊᓯᔾᔨᖅᓯᓚᐅᖅᖢᖓ. ᐋᖅᑭᒋᐊᖅᑕᒃᑲ ᓇᓗᓇᐃᖅᓯᖁᔨᕗᑦ ᒪᓕᒐᓕᐅᖅᑏᑦ ᐊᑭᓪᓕᒋᐊᖅᓯᒪᔪᓂ ᐃᒡᓗᖃᕐᒪᖔᖏᑦ, ᐊᑭᒡᓕᒋᐊᖅᓯᒪᔪᓃᑉᐸᓪᓗ, ᓇᓗᓇᐃᔭᕐᓗᒍ ᑭᓱᓂᒃ ᑖᓐᓇ ᐃᓗᓕᖃᕐᒪᖔᖓ (ᐆᒃᑑᑎᒋᓗᒍ, ᐊᑭᓪᓕᒋᐊᖅᓯᒪᒃᐸᑦ ᐊᐃᑉᐸᖓᑕ ᐃᖅᑲᓇᐃᔮᖓᒍᑦ, ᐅᕝᕙᓘᓐᓃᑦ ᑭᒃᑯᑐᐃᓐᓇᕐᓄᑦ ᐊᑐᖅᑐᐊᒐᕐᒦᑉᐸᑦ). ᑮᓇᐅᔭᓕᕆᓐᓇᐅᑉ ᐊᕐᕌᒎᐊ ᐊᑐᖅᑎᓪᓗᒍ, ᒪᓕᒐᓕᐅᖅᑏᑦ ᑕᑕᑎᕆᓚᐅᖅᑐᑦ ᓴᖅᑭᑕᐅᔪᒃᓴᑦ ᑎᑎᖅᑲᑦ ᐃᓚᒋᐊᕈᑎᖏᓐᓂᒃ (ᑕᑕᑎᕆᐊᓕᒃ 2) ᐅᕝᕙᓘᓐᓃᑦ ᓴᖅᑭᑦᑕᕆᐊᓖᑦ ᐅᖃᐅᓯᖏᓐᓂᒃ ᑕᑯᕚᖅᑖᖅᑎᑕᐅᓐᓂᕈᓂ ᑐᓐᓂᖅᑯᓯᐊᖅᑖᖅᑎᑕᐅᓂᕈᓂᓗ (ᑕᑕᑎᕆᐊᓕᒃ 3), ᑕᐃᒪᐃᖁᔭᐅᒍᓂ ᐅᕙᓐᓄᑦ ᐅᕝᕙᓘᓐᓃᑦ ᒪᓕᒐᓕᐅᖅᑎ ᓇᖕᒥᓂᖅ ᑕᑕᑎᕆᔪᒪᒃᐸᑦ. ᑕᖅᑲᐅᓐᖓᖅᑐᒃᓴᑦ ᑎᑎᖅᑲᖏᑦ ᕿᒥᕐᕈᓇᒃᑕᐅᔪᓐᓇᖅᑐᑦ ᑭᒃᑯᑐᐃᓐᓇᕐᓄᑦ ᐊᒻᒪ ᑕᑯᔪᒪᓂᕋᕈᓐᓇᖅᑐᖅ ᒪᓕᒐᓕᐅᕐᕕᖕᒧᑦ ᑎᑎᕋᖅᑎᖓᒍᑦ ᐊᒻᒪ ᐋᖅᑭᒃᓱᐃᓗᓂ ᑕᑯᔪᓐᓇᖅᓯᓂᐊᕐᒪᒋᑦ. ᖁᓛᓂ ᐅᖃᖅᑲᐅᒐᒪ, ᒪᓕᒐᓕᐅᕐᕕᐅᑉ ᑲᑎᒪᔨᓕᕆᔨᒃᑯᑦ ᑲᑎᒪᔨᖁᑎᖏᑦ ᐅᕙᓐᓂᓐᖔᖅᑐᓂᒃ ᐊᑐᓕᖁᔭᕐᓂᒃ ᐊᖏᖅᓯᓚᐅᖅᑐᑦ ᑕᑕᑎᖅᓯᒪᔪᑦ ᑕᖅᑲᒃᑯᓄᖓ ᐊᑐᐃᓐᓇᐅᓂᖅᓴᐅᔪᓐᓇᕐᓂᐊᕐᒪᑕ ᐃᓕᔭᐅᖃᑦᑕᖅᐸᑕ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐃᑭᐊᖅᑭᕕᖓᒍᑦ. ᐱᒋᐊᖅᑎᑦᑎᓯᒪᓕᖅᑐᑦ ᐋᖅᑭᒋᐊᖅᑕᐅᔪᓐᓇᕐᓂᐊᕐᒪᑦ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅ ᑖᓐᓇ ᐊᑐᓕᖁᔭᖅ ᐊᑐᓕᖅᑎᑕᐅᔪᓐᓇᕐᓂᐊᕐᒪᑦ. ᓂᕆᐅᒃᑐᒍᑦ ᑕᑕᑎᖅᓯᒪᔪᑦ ᐃᑭᐊᖅᑭᕕᒃᑯᑦ ᑕᑯᔭᐅᔪᓐᓇᖅᓯᓂᐊᕐᓂᖓᓂᒃ ᓴᕙᒋᔭᖓᓐᓂ ᒪᓕᒐᓕᐅᖅᑏᑦ ᐃᒃᓯᕚᓕᖅᐸᑕ. ᐱᓕᕆᐊᕆᖃᑦᑕᓚᐅᖅᑕᒃᑲ ᐊᐃᕐᕆᓕ 2024-ᒥᑦ ᒫᔾᔨ 2024−ᒧᑦ

12 ᐊᕐᕌᒍᑕᒫᖅ ᑲᑎᒪᖃᑎᒋᔭᐅᖃᑦᑕᕐᓂᖓ ᓱᓕᑦᑎᐊᕐᓂᕐᒧᑦ ᑲᒥᓴᓇ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ ᒪᓕᒐᓕᐅᖅᑏᑦ ᐊᕐᕌᒍ ᐊᑕᐅᓯᐊᕐᓗᒍ ᑲᑎᒪᖃᑎᖃᕆᐊᓖᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᒥᒃ. ᑲᑎᒪᖃᑎᒌᒍᓐᓇᖅᑐᑦ ᓵᓐᖓᖃᑦᑕᐅᑎᓗᑎᒃ ᐅᕝᕙᓘᓐᓃᑦ ᐅᖄᓚᐅᑎᒃᑯᑦ. ᐊᕐᕌᒍᑕᒫᖅ ᑲᑎᒪᖃᑦᑕᖅᐳᑦ ᕿᒥᕐᕈᓇᒍᓐᓇᕐᓂᐊᕐᒪᑕ ᑕᖅᑲᐅᓐᖓᖅᑐᒃᓴᑦ ᑎᑎᖅᑲᖏᓐᓂᒃ ᒪᓕᒐᓕᐅᖅᑎᒧᑦ ᐋᖅᑭᒃᑕᐅᓚᐅᖅᑐᓂᒃ ᐊᒻᒪ ᐊᓯᖏᓐᓂᒃ ᐅᖃᐅᓯᖃᕐᓗᑎᒃ ᐅᕝᕙᓘᓐᓃᑦ ᒪᓕᒐᓕᐅᖅᑎᒧᑦ ᐃᓱᒫᓘᑕᐅᔪᑦ ᐅᖃᐅᓯᕆᓗᒋᑦ. ᐅᖃᖅᑲᐅᒐᒪ, ᓵᓐᖓᖃᑦᑕᐅᑎᓗᑕ ᑲᑎᒪᖃᑎᒋᖃᑦᑕᓚᐅᖅᑕᒃᑲ ᐊᒻᒪ ᒪᓕᒐᓕᐅᖅᑏᑦ ᐃᒻᒥᓂᒃ ᐊᑐᐃᓐᓇᕈᖅᑎᓯᒪᓚᐅᖅᑐᑦ ᑕᒪᓐᓇ ᐱᔾᔪᑎᒋᓪᓗᒍ. ᒪᕐᕉᒃ ᒪᓕᒐᓕᐅᖅᑏᒃ ᑲᑎᒪᖃᑎᒋᔪᓐᓇᓚᐅᓐᖏᑖᒃᑲᒃ ᐃᖃᓗᖕᓃᓐᓂᓐᓂ ᐊᒻᒪ ᐅᐸᒃᓯᒪᓚᐅᓐᖏᓐᓂᖏᓐᓂ ᑕᐃᑯᓐᖓᖅᑎᓪᓗᖓ. ᐋᖅᑭᒃᓱᐃᓚᐅᖅᑐᒍᑦ ᐅᖄᓚᐅᑎᒃᑯᑦ ᑲᑎᒪᖃᑎᒋᔪᓐᓇᕐᓂᐊᕋᒃᑭᑦ. ᑕᐃᒪᐃᑦᑐᑦ ᑲᑎᒪᓃᑦ ᐊᒃᓱᐊᓗᒃ ᐱᕐᔪᐊᖑᔪᑦ ᒪᓕᒐᓕᐅᖅᑏᑦ ᐊᒻᒪ ᐅᕙᖓ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᓪᓗᖓ ᐃᖅᑲᓇᐃᔭᖃᑎᒋᔪᓐᓇᕋᒃᑭᑦ. ᑖᓐᓇ ᒪᓕᒐᓕᐅᖅᑎ ᐅᓂᒃᑲᐅᓯᖃᕈᓐᓇᓲᖑᔪᖅ ᓴᖅᑭᑕᐅᔪᒃᓴᑦ ᑎᑎᖅᑲᑦ ᖃᓄᐃᓕᖓᖕᒪᖔᖏᑦ ᑐᑭᓯᐊᓂᓐᖏᓐᓂᕈᒃᑭᑦ, ᐋᖅᑭᒋᐊᕆᐊᓖᑦ ᐋᖅᑭᒋᐊᕐᓗᒋᑦ ᐊᒻᒪ ᖃᐅᔨᒪᔨᑕᕆᔪᓐᓇᖅᖢᓂᖓ ᒫᓐᓇ ᐱᕙᓪᓕᐊᔪᑦ ᐱᔾᔪᑎᒋᓪᓗᒋᑦ ᐅᕝᕙᓘᓐᓃᑦ ᒫᓐᓇ ᐊᑐᖅᑕᖓ. ᐅᕙᓐᓄᓪᓕ, ᖃᐅᔨᒪᓂᖅᓴᐅᓕᓲᕆᔭᒃᑲ ᐊᑐᓂ ᒪᓕᒐᓕᐅᖅᑏᑦ, ᖃᓄᖅ ᐱᒋᐊᕈᑎᖃᓚᐅᕐᒪᖔᖓ, ᐃᓚᔮᖏᑦ ᐊᒻᒪ ᑭᓱᓂᒃ ᓂᕆᐅᖕᓂᖃᕐᒪᖔᖓ ᐊᒻᒪ ᑭᓱᓂᒃ ᓯᕗᓪᓕᐅᔾᔨᓯᒪᖕᒪᖔᖏᑦ. ᐃᓕᑉᐹᓪᓕᐅᑎᒋᖃᑦᑕᕐᒥᔭᒃᑲ ᑐᑭᓯᒃᑲᓐᓂᓲᖑᓪᓗᖓᓗ ᒪᓕᒐᓕᐅᖅᑎᑦ ᐃᓕᖅᑯᓯᑐᖃᕐᓂᖅ ᐱᔪᒥᒃᓲᑎᑖᖃᑦᑕᕐᒪᖔᖏᑦ, ᑐᑭᓯᒃᑲᓐᓂᖅᖢᖓᓗ ᖃᓄᖅ ᑲᑎᑕᐅᔪᓐᓇᕐᒪᖔᖏᑦ ᐃᓕᖅᑯᓯᑐᖃᒃᑯᑦ ᐅᒃᐱᕆᔭᐅᔪᑦ ᐊᒻᒪ ᒪᓕᒐᓕᐅᕐᕖᑦ ᑎᒥᖁᑎᖏᑦᑕ ᐋᖅᑭᐅᒪᔾᔪᑎᖏᑦ ᒪᓕᒃᑕᐅᓲᖏᓪᓗ. ᒪᓕᒐᓕᐅᖅᑎᓄᑦ ᐅᖃᐅᔾᔪᐃᔨᐅᓂᖅ ᑐᑭᒧᐊᒃᑎᒋᔭᐅᓂᕐᓗ ᖃᖓᑐᐃᓐᓇᖅ ᐃᑲᔪᖅᑕᐅᔪᒪᒍᓂ ᖃᐅᔨᒪᔨᑕᖃᕈᒪᒍᓂᓘᓐᓃᑦ ᖃᓄᐃᓕᐅᕆᐊᖃᕐᓂᓂ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ ᐱᔾᔪᑎᒋᓗᓂᐅᒃ. ᑕᒪᓐᓇ ᐅᖃᖃᑎᒌᖕᓂᖅ, ᐊᒻᒪ ᐃᑲᔪᖅᑕᐅᔾᔪᑎᒋᔭᖓ, ᐅᖃᐅᓯᒃᑰᒐᓗᐊᖅᐸᑦ ᑎᑎᕋᖅᓯᒪᔪᒃᑰᕋᓗᐊᖅᐸᓪᓗ, ᑲᓐᖑᓇᖅᑑᑎᑕᐅᔪᑦ, ᐱᓐᖏᑕᑐᐊᕆᓗᒋᑦ ᑕᐃᒃᑯᐊ ᓇᓗᓇᐃᔭᖅᑕᐅᑦᑎᐊᖅᓯᒪᔪᑦ ᐊᑐᓐᖏᑦᑑᑎᑕᐅᔪᓐᓇᖅᑐᑦ. ᒪᓕᒐᓕᐅᖅᑏᑦ ᑲᔪᖏᖅᓴᖅᑕᐅᕗᑦ ᐅᖃᖃᑎᖃᖅᑳᕐᓗᑎᒃ ᖃᓄᐃᓕᒋᐊᓚᐅᓐᖏᓐᓂᕐᒥᓂᒃ. ᑕᐃᒪᓐᓇ ᓱᓕᑦᑎᐊᕐᓂᕐᒧᑦ ᑲᒥᓴᓇᒥᒃ ᖃᐅᔨᒋᐊᖅᑳᖃᑦᑕᖅᐸᑦ ᑐᑭᒧᐊᒃᑎᖃᖅᐸᓪᓗ, ᐃᒻᒥᒧᑦ ᐊᒡᕕᐊᕈᑎᖃᓐᖏᑦᑑᔪᓐᓇᖅᑐᑦ ᐅᕝᕙᓘᓐᓃᑦ ᓇᐅᒃᑯᑐᐃᓐᓇᖅ ᓯᖁᒥᑦᑎᓐᖏᓐᓂᖅᓴᐅᔪᓐᓇᖅᑐᑦ ᐱᖁᔭᕐᔪᐊᕐᒥᒃ ᑖᒃᑯᓄᖔᖅᑐᓂᑦ, ᐊᒻᒪ ᑭᖑᓂᐊᒍᑦ ᖃᐅᔨᓴᖅᑕᐅᔾᔪᑎᒋᓕᕐᓗᓂᒋᑦ.

13 ᐱᐅᓂᖅᓴᐅᔪᖅ ᑕᐃᒪᓐᓇ ᑐᑭᓯᓇᓱᖕᓂᖃᖅᑳᖃᑦᑕᖅᐸᑕ ᓯᖁᒥᑦᑎᓂᐊᓐᖏᒻᒪᑕ. ᒪᓕᒐᓕᐅᖅᑎ ᑎᑎᖅᑲᑎᒍᑦ ᐃᑲᔪᖅᑕᐅᔪᒪᒃᐸᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ, ᐊᒻᒪ ᒪᓕᒐᓕᐅᖅᑎ ᐅᖃᐅᔾᔨᒃᐸᑦ ᖃᓄᑐᐃᓐᓇᖅ, ᐅᖃᐱᓘᑕᐅᔾᔮᓐᖏᓚᖅ ᐃᓂᖅᑎᖅᑕᐅᔾᔮᓐᖏᓚᕐᓗᓂ ᒪᓕᒐᓕᐅᖅᑎ ᖃᓄᐃᓕᐅᕐᓂᕆᔪᒪᓚᐅᖅᑕᖓᓄᑦ ᐃᑲᔪᖅᑕᐅᔪᒪᖅᑲᐅᒐᒥ. ᑕᒪᑐᒪᓂ ᑮᓇᐅᔭᓕᕆᓐᓇᐅᑉ ᐊᕐᕌᒍᒋᓚᐅᖅᑕᖓᓂ, ᒪᓕᒐᓕᐅᖅᑏᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ ᐃᑲᔪᖅᑕᐅᔪᒪᖃᑦᑕᖅᓯᒪᔪᑦ ᐊᒥᓱᑦ, ᐱᓗᐊᕐᓗᒍ ᖃᓄᐃᓕᒋᐊᖅᓯᓚᐅᓐᖏᓐᓂᕐᒥᓂ ᐊᐅᓚᔾᔭᐃᒋᐊᓚᐅᓐᖏᓐᓂᕐᒥᓂᓗ, ᓯᕗᓂᐊᓂ, ᐊᒻᒪ ᒪᓕᒐᓕᐅᖅᑎ ᐃᓱᒪᓐᓂᕈᓂ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᕐᒥᒃ ᓯᖁᒥᑦᑎᑐᐃᓐᓇᕆᐊᖃᕐᓂᕐᒥᓂᒃ. ᐅᕙᓐᓄᑦ ᑐᑭᓯᒋᐊᖃᑦᑕᓚᐅᖅᑐᑦ ᖃᕆᓴᐅᔭᒃᑯᑦ ᑎᑎᕋᖅᖢᑎᒃ, ᐃᓚᖏᓪᓗ ᐅᕙᓐᓄᑦ ᐅᖄᓚᓪᓗᑎᒃ. ᐃᓛᓐᓂ ᒪᓕᒐᓕᐅᖅᑏᑦ ᑐᒃᓯᕋᕐᕕᐅᖃᑦᑕᓚᐅᖅᑐᑦ ᑎᑎᖅᑲᓂᒃ ᐅᕝᕙᓘᓐᓃᑦ ᐊᓯᖏᓐᓂᒃ ᑐᓴᐅᒪᔾᔪᑎᓂᒃ ᐃᑲᔫᑕᐅᒃᑲᓐᓂᖁᓪᓗᒋᑦ ᖃᓄᐃᓕᐅᕆᐊᖃᕐᓂᐊᕐᓂᖓᓄᑦ. ᑕᐃᒫᑐᐃᓐᓇᖅ ᑐᓴᐅᒪᔾᔪᑎᒃᓂ ᑐᒃᓯᕋᕐᕕᐅᔪᑦ ᒪᓕᑦᑎᐊᖃᑦᑕᓚᐅᖅᑐᑦ ᐊᒻᒪ ᐅᖃᐅᔾᔭᒥᓂᒃ ᐊᑐᖃᑦᑕᓚᐅᖅᖢᑎᒃ. ᑲᒥᓴᓇᒥᑦ ᐅᖃᐅᔾᔭᖏᑦ ᒪᓕᓐᖏᑉᐸᑕ ᑖᓐᓇ ᒪᓕᒐᓕᐅᖅᑎ ᐃᓂᖅᑎᖅᑕᐅᔪᓐᓇᖅᑐᖅ ᒪᓕᒐᓕᐅᕐᕕᖕᒥ ᐊᑐᓕᖁᔭᑦ ᒪᓕᒡᓗᒋᑦ ᐊᒻᒪ ᐊᑐᖅᖢᒋᑦ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᑉ ᐃᓗᐊᓃᑦᑐᑦ, ᐃᓚᓕᐅᓪᓗᒍ ᐅᓂᒃᑳᑦ ᒪᓕᒐᓕᐅᕐᕕᖕᒨᖅᑕᐅᓂᖏᑦ ᑕᒪᓐᓇ ᐱᔾᔪᑎᒋᓪᓗᒍ. ᐅᑯᓇᓂ ᐅᓂᒃᑳᑦ ᐃᓗᓕᖏᓐᓂ ᓇᓗᓇᐃᖅᓯᖅᑲᐅᒐᒪ, ᖃᐅᔨᒪᔨᑕᖃᕈᒪᔪᑦ ᐅᓄᖅᓯᕙᓪᓕᐊᖏᓐᓇᖅᑐᑦ ᑕᐃᒪᓐᖓᓂᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᓐᖑᓚᐅᕋᒪ. ᓇᓕᖅᑯᑕᖅᖢᒋᑦ, ᑕᒫᓂ 25 ᐳᓴᓐᑎᒥᑦ 30 ᐳᓴᓐᑎᒧᑦ ᐅᓄᖅᓯᕚᓪᓕᖅᑐᑦ ᑕᐃᒪᓐᖓᓂᑦ ᐃᓕᓚᐅᖅᓯᒪᒐᒪ. ᒪᓕᒐᓕᐅᖅᑏᑦ ᖁᔭᓕᕙᒃᑲ ᐃᒃᐱᒍᓱᑦᑎᐊᖅᐸᓪᓕᐊᖕᒪᑕ ᐱᔭᒃᓴᖅᑖᕆᓯᒪᔭᒥᖕᓂᒃ ᐊᒻᒪ ᐅᔾᔨᕈᓱᖕᓂᕐᒥᑕ ᑐᑭᓕᐅᕆᓂᖏᑦᑎᒍᑦ ᐱᐅᓂᖅᓴᒧᑦ ᓵᓯᒪᓪᓗᑎᒃ. ᒪᓕᒐᓕᐅᖅᑏᑦ ᐃᑲᔪᖅᑕᐅᔪᒪᔾᔪᑎᒋᓚᐅᖅᑕᖏᑦ ᐊᔾᔨᒌᓚᐅᓐᖏᑦᑐᑦ: • ᐃᒻᒥᒧᑦ ᐊᒡᕕᐊᕈᑎᖃᑐᐃᓐᓇᕆᐊᖃᕐᓂᖅ (ᐱᖁᔭᕐᔪᐊᑉ ᐃᓗᐊᓃᑦᑐᑦ ᓈᓴᐅᑎᓖᑦ 8 ᐊᒻᒪ 15); • ᓇᓗᓇᐃᑦᑎᐊᖅᓯᒪᔪᑦ ᑐᓴᐅᒪᔾᔪᑏᑦ ᐃᓚᖃᕐᓗᑎᒃ/ᐃᓚᖃᓐᖏᓪᓗᑎᒃ ᑕᖅᑲᐅᓐᖓᖅᑐᒃᓴᐃᑦ ᑎᑎᖅᑲᖏᓐᓂᒃ (ᓈᓴᐅᑎᓕᒃ 5 ᐊᒻᒪ ᑕᑕᑎᕆᐊᓖᑦ 1, 2 ᐊᒻᒪ 3); • ᑕᖅᑲᐅᓐᖓᖅᑐᒃᓴᑦ ᑎᑎᖅᑲᖏᑕ ᐃᒪᒋᐊᕈᑎᖏᓐᓂᒃ ᑎᑎᕋᕆᐊᖃᕐᓂᖅ; • ᐱᔭᕆᐊᖃᓐᖏᓐᓂᖅ ᖄᒃᑲᓐᓂᐊᒍᑦ ᐊᑭᓕᖅᑕᐅᓂᕐᒥᒃ, ᖁᔭᓐᓇᒦᕈᓯᐊᑦ ᐃᑲᔫᓯᐊᓪᓘᓐᓃᑦ ᒪᓕᒐᓕᐅᖅᑎᐅᓂᕐᒥᒍᑦ ᐱᓕᕆᐊᒥᓂᒃ ᐊᑐᕐᓗᓂ (ᓈᓴᐅᑎᓕᒃ 13); • ᖄᒃᑲᓐᓂᐊᒍᑦ ᐊᑭᓕᖅᑕᐅᔭᕆᐊᖃᓐᖏᓐᓂᖅ ᒪᓕᒐᓕᐅᖅᑎᐅᑉ ᑎᑎᕋᕐᕕᐊᑕ ᓯᓚᑖᒍᑦ, ᐊᒻᒪ ᑕᒪᓐᓇ ᐱᓕᕆᐊᕆᔮ ᐊᖏᖅᑕᐅᓯᒪᖕᒪᖔᖓ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ, ᑕᐃᒫᒃ ᑭᓯᐊᓂ ᐊᑐᓐᖏᑦᑑᑎᑕᐅᔪᓐᓇᕐᒪᑦ ᒪᓕᒐᖅ; • ᐊᑐᐃᓐᓇᕈᐃᓂᖅ ᑎᑎᖅᑲᓂᒃ ᐃᑲᔪᖅᓱᐃᔪᓂᒃ ᐃᑲᔫᑎᓂᒡᓘᓐᓃᑦ ᒪᓕᒐᓕᐅᖅᑎᒧᑦ ᐅᕝᕙᓘᓐᓃᑦ ᐃᓄᑐᐃᓐᓇᕐᒧᑦ;

14 • ᐊᑭᓕᖅᓱᖅᑕᐅᓐᖏᓪᓗᓂ ᐃᖅᑲᓇᐃᔭᖃᑕᐅᓂᖅ ᓄᓇᓕᖕᓂᓘᓐᓃᑦ ᖃᓄᐃᓕᐅᕐᓂᐅᔪᒥ; • ᐃᓚᐅᓂᕕᓂᕐᒥᓂ ᐃᓚᒋᔭᐅᖃᑕᐅᓚᐅᕐᓂᕐᒥᒡᓗ ᐱᔭᒃᓴᖅᑖᒥᒍᑦ, ᐃᖏᕐᕋᔭᓂᒃᑯᑦ ᐅᕝᕙᓘᓐᓃᑦ ᑕᑯᕚᖅᑖᕐᓂᖅ ᐃᖅᑲᓇᐃᔮᒥᓂᒃ ᐊᑐᖅᑎᓪᓗᒍ. • ᒪᓕᒐᓕᐅᖅᑎᐅᑉ ᐃᓚᔮᖏᑕ ᖃᓄᐃᓕᐅᖃᑦᑕᕐᓂᖏᑦ ᐊᒻᒪ ᑕᒪᓐᓇ ᐃᒻᒥᒧᑦ ᐊᒡᕕᐊᕈᑎᒋᔭᐅᔪᓐᓇᕐᒪᖔᖓ ᒪᓕᒐᓕᐅᖅᑎᐅᑉ ᐱᓕᕆᐊᖓᓄᑦ ᐱᖁᔭᕐᔪᐊᖅ ᒪᓕᒡᓗᒍ. ᐅᑯᐊ ᐊᐱᖅᑯᑕᐅᒡᒍᓚᐅᖅᑐᑦ ᒪᓕᒐᓕᐅᖅᑎᓄᑦ: • ᑕᖅᑲᐅᓐᖓᖅᑐᒃᓴᑦ ᑎᑎᖅᑲᑦ ᐃᓗᓕᖏᓐᓃᑦᑕᕆᐊᓖᑦ; • ᖃᓄᐃᓕᐅᕐᓃᑦ ᖃᓄᐃᓐᓃᓪᓘᓐᓃᑦ ᐃᒻᒥᒧᑦ ᐊᒡᕕᐊᕈᑕᐅᓕᑐᐃᓐᓇᕆᐊᓖᑦ; • ᑕᑯᕚᑦ ᐃᑲᔫᑎᓪᓗ ᐊᒻᒪ ᖄᒃᑲᓐᓂᖃᒍᑦ ᐊᑭᓕᖅᑕᐅᓂᖅ ᑕᑯᓐᓇᕐᓗᒋᑦ ᒪᓕᒐᓕᐅᖅᑎᐅᑉ ᒪᓕᒐᓕᐅᕐᕕᒥ ᑮᓇᐅᔾᔭᒃᓵᖏᑦ ᐃᑲᔫᓯᐊᖅᑖᕆᖃᑦᑕᖅᑕᖏᓪᓗ. ᐅᖃᒃᑲᓐᓂᕈᒪᑐᐃᓐᓇᖅᐳᖓ ᒪᓕᒐᓕᐅᖅᑏᑦ ᐊᑐᓂ ᐅᖃᓪᓚᖃᑎᒋᖃᑦᑕᖅᓯᒪᓂᒃᑲ ᑭᓇᑐᐃᓐᓇᕐᒧᑦ ᐅᖃᐅᓯᕆᔭᐅᖃᑦᑕᓐᖏᑦᑐᑦ. ᖃᐅᔨᒪᔨᑕᕆᔭᐅᔪᒪᒍᒪ, ᖃᓄᕐᓗ ᐅᖃᐅᑎᓚᐅᕐᓂᒃᑲ ᑕᒪᒃᑯᐊᓕᒫᖅ ᓇᒧᑦ ᐅᖃᐅᓯᕆᔭᐅᖃᑦᑕᓐᖏᑦᑐᑦ ᑭᓯᐊᓂ ᒫᓐᓇ ᒪᓕᒐᓕᐅᖅᑎ ᐊᖏᕈᓯᐅᖅᐸᑦ ᐅᖃᐅᓯᕆᔭᐅᔪᓐᓇᖅᑎᓪᓗᓂᒋᑦ ᐊᒻᒪ ᐊᖏᖅᐸᑦ. ᑕᐃᒪᐃᓕᖓᕗᖅ ᒪᓕᒐᓕᐅᖅᑎ ᐅᖃᓪᓚᖃᑎᖃᖅᑎᓪᓗᒍ ᓱᓕᑦᑎᐊᕐᓂᕐᒧᑦ ᑲᒥᓴᓇᒥᒃ ᒪᑐᐃᖓᑦᑎᐊᕈᓐᓇᕐᓂᐊᕐᒪᑦ ᐊᒻᒪ ᐅᖃᖅᑕᐃᓕᒪᓐᖏᓪᓗᓂ. ᐱᖁᔭᖅᑎᒍᑦ ᐱᔭᒃᓴᖅᑖᕆᓯᒪᔭᖏᑕ ᖄᒃᑲᓐᓂᐊᒍᑦ, ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐅᓂᒃᑲᐅᓯᕆᖅᑲᐅᓪᓗᓂᒋᑦ ᐅᑯᑎᒎᓇᖅ ᐅᓂᒃᑳᖅᑎᒍᑦ, ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᑉ ᐃᓗᐊᓃᑦᑐᖅ ᓈᓴᐅᑎᓕᒃ 24(2.1) ᐃᒪᐃᓕᖓᒃᑲᓐᓂᖅᑐᖅ: 24(2.1). ᓱᓕᑦᑎᐊᕐᓂᕐᒧᑦ ᑲᒥᓴᓇ ᐱᔪᒪᒍᓂ ᐊᓯᖏᓐᓂᒃ ᐱᓕᕆᐊᖃᕈᓐᓇᖅᑐᖅ ᓱᓕᑦᑎᐊᕐᓂᕐᒧᑦ ᑲᒥᓴᓇ ᓈᒻᒪᒐᓱᒋᒃᐸᐅᒃ ᑐᒃᓯᕌᖑᔪᖅ ᒪᓕᒐᓕᐅᕐᕕᖕᒧᑦ ᐅᕝᕙᓘᓐᓃᑦ ᑲᑎᒪᔨᓕᕆᔨᒃᑯᑦ ᑲᑎᒪᔨᖏᓐᓄᑦ. ᑲᑎᒪᔨᓕᕆᔨᒃᑯᑦ ᑲᑎᒪᔨᖏᓐᓄᑦ ᑎᓕᔭᐅᓂᒃᑯᑦ ᐱᓕᕆᐊᕕᓃᑦ

15 ∙ ᒥᓂᔅᑕᐃᑦ ᐃᑲᔪᖅᑎᖏᑦ ᑎᑎᕋᖅᑎᖏᓪᓗ ᑲᑎᒪᔨᓕᕆᔨᒃᑯᑦ ᑲᑎᒪᔨᖏᑦ ᖄᒃᑲᓐᓂᐊᒍᑦ ᐱᔭᒃᓴᖅᑖᖅᑎᑦᑎᓯᒪᔪᖅ ᓱᓕᑦᑎᐊᕐᓂᕐᒧᑦ ᑲᒥᓴᓇᒥᒃ ᐱᔾᔪᑎᒋᓪᓗᒋᑦ ᓄᓇᕗᑦ ᒐᕙᒪᒃᑯᑦ ᒥᓂᔅᑕᖏᑦᑕ ᐊᑐᓂ ᐃᖅᑲᓇᐃᔭᖅᑎᖏᑦ, ᐆᒃᑑᑎᒋᓗᒋᑦ ᒥᓂᔅᑕᐃᑦ ᐃᑲᔪᖅᑎᖏᑦ ᐊᒻᒪ ᒥᓂᔅᑕᐃᑦ ᑎᑎᕋᖅᑎᖏᑦ. ᑐᑭᓯᐅᒪᓂᕋ ᒪᓕᒃᖢᒍ, ᐃᓚᓕᐅᔾᔭᐅᓯᒪᖅᑰᖅᑐᑦ ᒥᓂᔅᑕᐃᑦ ᒐᕙᒪᓕᕆᓂᕐᒧᑦ ᖃᐅᔨᒪᔨᑕᖏᑦ. ᐃᖅᑲᓇᐃᔭᓯᒋᐊᕋᒥᒃ, ᐊᖓᔪᖅᑲᐅᑏᑦ ᐃᖅᑲᓇᐃᔭᖅᑏᑦ ᑎᑎᕋᖅᓯᒪᔪᓂᒃ ᑳᓐᑐᕌᓂᒃ ᐊᑎᓕᐅᖃᑎᖃᖃᑦᑕᖅᑐᑦ ᒥᓂᔅᑕᒥᓂᒃ ᐊᒻᒪ ᓄᓇᕗᑦ ᒐᕙᒪᒃᑯᓐᓂᒃ. ᐃᖅᑲᓇᐃᔭᕐᓂᕐᒧᑦ ᒪᓕᒐᑦ ᐊᑐᖅᑕᐅᒡᒍᔪᑦ ᐱᔭᒃᓴᖅᑖᕆᓯᒪᔭᖏᑦ, ᑮᓇᐅᔾᔭᒃᓵᖏᑦ ᐊᒻᒪ ᐊᓯᖏᑦ ᐃᑲᔫᓯᐊᑦ, ᒪᓕᒐᖅᑕᖃᐅᕆᕗᖅ ᐃᒻᒥᒧᑦ ᐊᒡᕕᐊᕈᑎᖃᕐᓂᕐᒥᒃ ᐱᔾᔪᑎᓕᖕᓂᒃ. ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᖅ ᐊᒡᕕᐃᕈᑎᖃᑐᐃᓐᓇᕆᐊᖃᕐᓂᕐᓗ ᐱᓪᓗᒍ, ᐃᖅᑲᓇᐃᔭᖅᑏᑦ ᐊᖓᔪᖅᑲᐅᑏᑦ ᑲᓐᖑᓇᖅᑑᑎᑕᐅᔪᓂᒃ ᑎᑎᖅᑲᓂᒃ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ ᑐᓐᓂᖅᑯᑎᖃᕆᐊᓕᒃ ᐃᖅᑲᓇᐃᔭᓕᓵᕐᕕᖓᑕ ᐅᓪᓗᑦ 30 ᑐᖔᓂ (ᑭᖑᓂᐊᒍᓪᓗ ᑕᐃᒪᐃᒃᑲᓐᓂᕆᐊᖃᕈᓂ), ᓇᓗᓇᐃᔭᐃᓯᒪᓗᓂ ᐃᖅᑲᓇᐃᔭᖅᑎᐅᑉ ᐱᓯᓂᓯᓕᕆᓂᖓ, ᓇᖕᒥᓂᖃᖃᑕᐅᕝᕕᖏᑦ ᐊᒻᒪ ᐊᑭᓕᖅᓱᖅᑕᐅᓐᖏᓪᓗᓂ ᐃᖅᑲᓇᐃᔭᕐᓂᖓ ᐊᒻᒪ ᐊᓯᖏᑦ ᐱᓕᕆᐊᖏᑦ ᓄᓇᕗᑦ ᒐᕙᒪᒃᑯᑦ ᓯᓚᑖᓂ ᐊᒻᒪ ᐊᒃᑐᐃᑐᐃᓐᓇᕆᐊᓕᖕᓂᒃ ᓄᓇᕗᑦ ᒐᕙᒪᒃᑯᑦ ᐊᑐᐊᒐᖏᓐᓂᒃ ᑮᓇᐅᔭᖁᑎᖏᓐᓂᒡᓘᓐᓃᑦ. ᑖᓐᓇ ᑳᓐᑐᕌᒃ ᐅᖃᖅᓯᒪᔪᖅ ᓱᓕᑦᑎᐊᕐᓂᕐᒧᑦ ᑲᒥᓴᓇ ᕿᒥᕐᕈᓇᖃᑦᑕᕐᓂᐊᕐᓗᓂ ᑎᑎᕋᓚᐅᖅᑕᖏᓐᓂᒃ ᐊᒻᒪ ᑎᓕᓯᓗᓂ ᐋᖅᑭᒋᐊᖅᑐᖃᕆᐊᖃᖅᐸᑦ ᐃᒻᒥᒧᑦ ᐊᒡᕕᐊᕈᑎᖃᑐᐃᓐᓇᕆᐊᕐᓂᖓ ᐊᒡᕕᐊᕈᑎᖃᕋᓱᒋᔭᐅᓂᖓᓘᓐᓃᑦ ᐃᓱᒪᒋᓗᒍ. ᑭᖑᓪᓕᕐᒥ ᐊᕐᕌᒍᑕᒫᖅᓯᐅᑏᑦ ᐅᓂᒃᑳᖏᓐᓂ ᐅᖃᓚᐅᕋᒪ, ᐃᖅᑲᓇᐃᔭᖅᑏᑦ ᐊᖓᔪᖅᑲᐅᑏᑦ ᐅᕙᓐᓄᑦ ᐃᑲᔪᖅᑕᐅᔪᒪᓯᒪᔪᑦ. ᐃᖅᑲᓇᐃᔭᖅᑏᑦ ᐊᖓᔪᖅᑲᐅᑏᑦ ᐊᐱᖅᑯᑎᖃᖃᑦᑕᓚᐅᖅᑐᑦ ᐃᒻᒥᒧᑦ ᐊᒡᕕᐊᕈᑎᖃᑐᐃᓐᓇᕆᐊᖃᕐᒪᖔᖅ, ᐊᒻᒪ ᐃᓚᖓᓂ, ᖃᓄᐃᓐᓂᖅ ᐱᔾᔪᑎᒋᓗᒍ ᑕᒪᒃᑮᒃ ᐊᒃᑐᖅᑕᐅᔪᓐᓇᖅᑑᒃ ᐃᖅᑲᓇᐃᔭᖅᑎ ᐊᒻᒪ ᓂᕈᐊᖅᑕᐅᓯᒪᔪᖅ ᒪᓕᒐᓕᐅᖅᑎ ᐃᖅᑲᓇᐃᔭᕐᕕᒋᔭᖓ. ᑕᐃᒪᐃᒃᑲᓗᐊᖅᑎᓪᓗᒍ, ᐊᑐᕆᐊᓖᑦ (ᓇᓗᓇᐃᔭᖅᑕᐅᓯᒪᔪᑦ ᒥᓂᔅᑕᐃᑦ ᒪᓕᒐᖏᑦᑕ ᐅᖃᓕᒫᖏᓐᓂ) ᐅᖃᖅᓯᒪᕗᑦ ᑕᖅᑲᐅᓐᖓᖅᑐᒃᓴᑦ ᐅᖃᐅᓯᖏᑦ ᑕᑕᑎᖅᑕᐅᖁᔭᐅᓪᓗᑎᒃ ᐱᔭᕇᖅᑕᐅᓗᑎᒡᓗ ᐊᖓᔪᖅᑲᐅᑏᑦ ᐃᑲᔪᖅᑎᖏᓐᓄᑦ ᐃᖅᑲᓇᐃᔭᓯᒋᐊᕈᓂ, ᐊᒻᒪ ᐋᖅᑭᒋᐊᖅᑕᐅᖃᑦᑕᕐᓗᑎᒃ ᖃᓄᐃᑉᐸᓪᓕᐊᓃᑦ ᐊᓯᔾᔨᖅᑕᕐᓂᖏᑦ ᐱᔾᔪᑎᒋᓪᓗᒋᑦ, ᑕᒪᓐᓇ ᐊᑐᖅᑕᐅᓯᒪᓐᖏᑦᑐᖅ, ᐊᒻᒪ ᒪᓕᒐᖅᑕᖃᕋᓂ ᖃᐅᔨᒋᐊᖃᑦᑕᕆᐊᖃᕐᓂᖅ ᐃᒻᒥᒧᑦ ᐊᒡᕕᐊᕈᑎᖃᕐᓂᖅ ᐱᔾᔪᑎᒋᓗᒍ. ᑖᒃᑯᐊᒃ ᑕᒪᒃᑮᒃ ᐊᑐᓕᖅᑎᑕᐅᔭᕆᐊᓖᑦ ᒪᓕᒐᕐᓄᓪᓗ ᐃᓕᖃᓯᐅᔾᔭᐅᓗᑎᒃ ᐱᔾᔪᑎᒋᔭᐅᑎᓪᓗᒋᑦ ᐊᖓᔪᖅᑲᐅᑏᑦ ᐊᓪᓚᕕᖕᒥ ᐃᖅᑲᓇᐃᔭᖅᑏᑦ.

16 • ᒥᓂᔅᑕᐃᑦ ᑐᖏᓕᖏᑦ 2014−ᖑᓚᐅᖅᑎᓐᓇᒍ, ᒐᕙᒪᒃᑯᓐᓂ ᒥᓂᔅᑕᐃᑦ ᑐᑭᓕᖏᑦ ᒐᕙᒪᒃᑯᓐᓂ (ᒥᓂᔅᑕᐃᑦ ᑐᖏᓕᖏᑦ ᐊᓯᖏᓪᓗ ᒐᕙᒪᒃᑯᓐᓂ ᐊᖓᔪᖅᑲᐅᑏᑦ) ᐊᕐᕌᒍᑕᒫᖅ ᑲᓐᖑᓇᖅᑑᑎᑕᐅᔪᓂᒃ ᐅᓂᒃᑳᓂᒃ ᓯᕗᓕᖅᑎᒧᑦ ᑐᓂᓯᖃᑦᑕᕆᐊᖃᓚᐅᖅᑐᑦ, ᓇᓗᓇᐃᔭᐃᓯᒪᓗᑎᒃ ᒫᓐᓇ ᐱᓯᓂᓯᓕᕆᖃᑕᐅᖕᒪᖔᖓ ᐅᕝᕙᓘᓐᓃᑦ ᐃᒻᒥᒨᖓᔪᓂᒃ ᓇᖕᒥᓂᖃᖃᑕᐅᖕᒪᖔᖓ ᑮᓇᐅᔭᓕᖅᓯᓐᓂᕐᒪᖔᓪᓗ ᐃᒻᒥᒧᑦ ᐊᒡᕕᐊᕈᑎᒋᓕᑐᐃᓐᓇᕆᐊᖃᖅᑕᒥᖕᓂᒃ, ᐊᒻᒪ ᓄᓇᓕᖕᓂ ᐊᑭᓕᖅᓱᖅᑕᐅᓐᖏᓪᓗᓂ ᐃᖅᑲᓇᐃᔭᖃᑦᑕᕐᒪᖔᑦ ᑲᑎᒪᔨᐅᖃᑕᐅᖕᒪᖔᓪᓘᓐᓃᑦ ᐅᕝᕙᓘᓐᓃᑦ ᐱᓯᓂᓯᓕᕆᖃᑕᐅᖕᒪᖔᖓ ᐊᓕᖅᓱᖅᑕᐅᓐᖏᓪᓗᓂ. ᑖᓐᓇᐅᓚᐅᖅᑎᓪᓗᒍ, ᓯᕗᓕᖅᑎ ᐃᓱᒪᓕᐅᓕᖅᐳᖅ ᖃᓄᐃᓕᐅᖅᑕᓕᒫᖏᑦ ᑎᒍᒥᐊᖅᑕᖏᓪᓘᓐᓃᑦ ᐃᒻᒥᒧᑦ ᐊᒡᕕᐊᕈᑎᑕᖃᕐᒪᖔᑦ ᐊᑐᕐᓗᒍ ᑐᖏᓕᕆᔭᐅᔫᑉ ᐊᖏᖅᓯᒪᓂᖏᑦ ᓄᓇᕗᑦ ᒐᕙᒪᒃᑯᓐᓄᑦ, ᐊᒻᒪ ᖃᓄᐃᓕᐅᕆᐊᖃᕈᓂ ᖃᓄᐃᓕᐅᕈᑎᒋᓕᕐᓗᓂᐅᒃ. ᑕᒪᓐᓇ ᐊᓯᔾᔨᓚᐅᖅᓯᒪᔪᖅ 2014−ᒥ ᑖᒃᑯᐊ ᑲᑎᒪᔨᓕᕆᔨᒃᑯᑦ ᑲᑎᒪᔨᖏᑦ, ᒪᓕᒃᖢᒋᑦ ᑐᒃᓯᕌᕆᔭᐅᓚᐅᖅᑐᖅ ᑕᐃᔅᓱᒪᓂ ᓯᕗᓕᖅᑎᐅᓚᐅᖅᑐᒧᑦ ᐲᑕ ᑕᑉᑑᓇᒧᑦ, ᑕᒪᓐᓇ ᐱᔭᒃᓴᓐᖑᖅᑎᓯᒪᔪᑦ ᐊᕐᕌᒍᑕᒫᖅ ᑲᒪᒋᔭᐅᓕᕐᓗᓂ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ. ᒫᓐᓇ ᐊᑐᖅᑕᐅᓕᖅᑐᖅ ᑖᓐᓇ ᓱᓕᑦᑎᐊᕐᓂᕐᒧᑦ ᑲᒥᓴᓇ ᐅᖃᖃᑎᖃᕐᓗᓂ ᒐᕙᒪᓕᕆᔨᒃᑯᑦ ᒥᓂᔅᑕᖓᑕ ᑐᖏᓕᐊᓂᒃ ᑕᖅᑲᐅᓐᖓᖅᑐᒃᓴᓂᒃ ᑎᑎᖅᑲᓂᒃ ᑐᒃᓯᕋᕐᕕᒋᓗᒍ ᑲᒥᓴᓇᒧᑦ ᐅᓪᓗᓕᖅᑕᐅᓯᒪᔫᑉ ᑐᖔᓂ. ᑕᖅᑲᐅᓐᖓᖅᑐᒃᓴᖅ ᑎᑎᖅᑲᓂᒃ ᐱᓚᐅᖅᑐᖓ ᒥᓂᔅᑕᐅᑉ ᑐᖏᓕᖏᓐᓂᒃ ᐊᒻᒪ ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖏᑦᑕ ᐊᖓᔪᖅᑳᖏᓐᓂᑦ ᑕᐃᒫᒃ ᑐᒃᓯᕌᕆᓚᐅᖅᑕᒃᑲ ᒪᓕᒃᑕᐅᓪᓗᑎᒃ ᐊᒻᒪ ᐅᓪᓗᖅ ᓇᓗᓇᐃᖅᑕᐅᓯᒪᔫᑉ ᑐᖔᓂ ᐱᓚᐅᖅᖢᒋᑦ. ᐃᓚᖏᑦ ᑭᑭᑕᐅᓯᒪᔪᑦ ᑕᑕᑎᕆᐊᓖᑦ ᐊᓯᖏᓐᓂ, ᐃᓱᒫᓗᖕᓇᖅᑐᖃᓚᐅᓐᖏᑦᑐᖅ ᐊᒻᒪ ᓯᕗᓕᖅᑎᒧᑦ ᐃᓱᒫᓘᑎᒃᓴᖃᓐᖏᓐᓂᖅ ᓇᓗᓇᐃᓚᐅᖅᖢᒍ. ᖁᔭᓐᓇᒦᒃᑲᓐᓂᕈᒪᕙᕋ ᒐᕙᒪᓕᕆᔨᒃᑯᑦ ᒥᓂᔅᑕᖓᑕ ᑐᖏᓕᐊ ᑕᒪᓐᓇ ᐊᑐᕈᓐᓇᓚᐅᕋᑦᑎᒍᑦ. • ᒪᓕᒐᓕᐅᕐᕕᐅᑉ ᐃᒻᒥᒃᑰᖅᑐᑦ ᑲᒪᔨᖏᑦ ᐊᒻᒪ 2014-ᒥ, ᒪᓕᒐᓕᐅᕐᕕᐅᑉ ᑲᑎᒪᔨᓕᕆᔨᒃᑯᑦ ᑲᑎᒪᔨᖏᑦ ᐃᓱᒪᓕᐅᓚᐅᖅᓯᒪᔪᑦ, ᒐᕙᒪᒃᑯᓐᓂ ᐊᖓᔪᖅᑲᐅᑕᐅᓂᖅᐹᑦ ᐊᔾᔨᒌᓂᒃ ᒪᓕᖃᑦᑕᖁᓪᓗᒋᑦ, ᒪᓕᒐᓕᐅᕐᕕᐅᑉ ᑎᑎᕋᖅᑎᐊ ᐊᒻᒪ ᑎᒪᓴᑦ ᒪᓕᒐᓕᐅᕐᕕᐅᑉ ᐃᒻᒥᒃᑰᖅᑐᑦ ᑲᒪᔨᖏᑦ (ᐅᖃᐅᓯᓕᕆᓂᕐᒧᑦ ᑲᒥᓴᓇ, ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇ, ᓱᕈᓯᕐᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨ, ᐊᒻᒪ ᓂᕈᐊᖅᑐᓕᕆᔨ) ᑐᓂᓯᖃᑦᑕᕆᐊᖃᓕᓚᐅᖅᑐᑦ ᑲᓐᖑᓇᖅᑑᑎᑕᐅᔪᓂᒃ ᐅᖃᐅᓯᖅᑕᓂᒃ (ᐱᔾᔪᑎᓕᖕᓂᒃ ᐱᖁᑎᖏᑦᑕ ᒥᒃᓵᓅᖓᔪᓂᒃ, ᐊᑭᓕᒃᓴᓐᖑᑐᐃᓐᓇᕆᐊᓕᖕᓂᒃ, ᓇᑭᑦ ᑮᓇᐅᔭᓂᒃ ᐃᓯᕐᕕᐅᕙᓪᓕᐊᖕᒪᖔᖏᑦ, ᓄᓇᕗᑦ ᒐᕙᒪᒃᑯᓐᓄᑦ ᑳᓐᑐᕌᑦ ᐊᒻᒪ ᐊᓯᖏᑦ ᐃᖅᑲᓇᐃᔮᒥᑕ ᓯᓚᑖᓃᑦᑐᑦ ᑭᓲᖕᒪᖔᖏᑦ) ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ ᑎᑎᖅᑲᑦ ᕿᒥᕐᕈᓇᒍᓐᓇᕐᓂᐊᕐᒪᒋᑦ. ᑲᑎᒪᔨᓕᕆᔨᒃᑯᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᒥᒃ ᑎᓕᓯᓕᓚᐅᖅᓯᒪᔪᑦᐃᓱᒫᓗᖕᓇᖅᑐᖃᖅᐸᑦ ᑕᒪᓐᓇ ᓇᓗᓇᐃᖅᑕᐅᖁᓪᓗᒍ ᑲᑎᒪᔨᓕᕆᔨᒃᑯᑦ ᑲᑎᒪᔨᖏᓐᓄᑦ. ᑲᓐᖑᓇᖅᑑᑎᑕᐅᔪᑦ ᐅᖃᐅᓯᖅᑕᖏᑦ ᐊᔾᔨᓖᑦ ᑕᒻᖅᑲᐅᓐᖓᖅᑐᒃᓴᐅᑕᐅᔪᑦ ᑎᑎᖅᑲᑦ ᐋᖅᑭᒃᓯᒪᓂᖏᑦᑎᒍᑦ ᒪᓕᒐᓕᐅᖅᑎᓄᑦ

17 ᐊᑎᓕᐅᖅᑕᐅᖃᑦᑕᖅᑐᓂᒃ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅ ᒪᓕᒃᖢᒍ. ᓴᖅᑭᑕᐅᔪᒃᓴᑦ ᑎᑎᖅᑲᑦ ᐃᒻᒥᒃᑰᖅᑐᑦ ᑲᒪᔨᐅᑉ ᑐᓐᓂᖅᑯᑎᒋᔭᕆᐊᖃᖅᑕᖏᑦ ᐃᖅᑲᓇᐃᔮᒥᓄᑦ ᐊᖏᖅᑎᑕᐅᓗᕈᑎᒃ, ᐊᒻᒪ ᐊᕐᕌᒍᑕᒫᖅ ᑭᖑᓂᐊᒍᑦ. ᑖᒃᑯᐊ ᑲᓐᖑᓇᖅᑑᑎᑕᐅᔪᑦ ᐊᕐᕌᒍᑕᒫᖅ ᑎᑎᕋᖅᑕᐅᖃᑦᑕᖅᑐᑦ ᐱᓚᐅᖅᑕᒃᑲ ᑖᒃᑯᓇᓐᖓᓕᒫᖅ ᑭᖑᕙᖅᓯᓂᒪᓐᖏᖢᑎᒃ. ᑖᒃᑯᐊ ᑎᑎᕋᖅᑕᐅᓯᒪᔪᑦ ᕿᒥᕐᕈᓇᓚᐅᖅᖢᒋᑦ ᐅᖃᖅᑎᒧᑦ ᑐᓐᓂᖅᑯᑎᒋᓚᐅᖅᑕᒃᑲ. ᕿᒥᕐᕈᓇᒃᖢᒋᑦ ᐃᓱᒫᓘᑎᒃᓴᖅᑕᖃᓚᐅᓐᖏᑦᑐᖅ ᖃᐃᑕᐅᔪᕕᓂᓕᒫᑦ ᐃᒻᒥᒃᑰᖅᑐᑦ ᑲᒪᔨᖏᓐᓄᑦ. ᐊᓯᓕᒫᖏᑦ ᑕᑯᓐᓇᖅᖢᒋᑦ ᐃᒻᒥᒃᑰᖅᑐᑦ ᑲᒪᔩᑦ ᐅᕙᓐᓄᑦ ᑐᑭᓯᓇᓱᖕᓂᖃᖃᑦᑕᖅᑐᑦ ᖃᓄᕐᓗ ᐃᓱᒪᒋᖕᒪᖔᖏᑦ ᐊᐱᖅᓱᖅᐸᒃᖢᑎᒃ ᐱᔾᔪᑎᒋᓪᓗᒋᑦ ᑕᒪᒃᑯᐊ ᖃᓄᐃᓕᐅᕐᓂᐅᔪᑦ, ᐊᑭᓕᖅᓱᖅᑕᐅᓐᖏᖢᑎᒃ ᐃᖅᑲᓇᐃᔭᕐᕕᖏᑦ ᐊᒻᒪ ᐃᒻᒪᖄ ᑳᓐᑐᕌᑦ. ᑕᐃᒪᓐᖓᓕᒫᖅ ᑖᒃᑯᐊ ᑲᒪᔩᑦ ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᖏᑦ ᓴᖅᑭᔮᑦᑎᐊᕋᓱᖕᓂᖏᓪᓗ ᖁᔭᓇᖅᑐᖅ. • ᓄᓇᕗᒻᒥ ᓂᕈᐊᕐᓂᓕᕆᓂᕐᒧᑦ ᐱᖁᔭᕐᔪᐊᖅ ᐃᓚᕈᓯᐊ ᓈᓴᐅᑎᓕᒃ 24(2) ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᑉ ᐃᓗᐊᓃᒃᑐᖅ ᐃᒪᐃᓕᖓᕗᖅ: 24(2). ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐱᔭᒃᓴᖏᑦ ᓇᓗᓇᐃᖅᑕᐅᓯᒪᕗᑦ ᐅᑯᑎᒎᓇᖅ ᐱᖁᔭᕐᔪᐊᖅᑎᒍᑦ ᐊᒻᒪ ᐱᔭᒃᓴᖅᑖᖏᑦ ᑎᓕᔭᐅᓂᒃᑯᑦ ᓇᓗᓇᐃᖅᑕᐅᓯᒪᒋᕗᑦ ᐊᓯᖏᑎᒍᑦ ᐱᖁᔭᕐᔪᐊᖅᑎᒍᑦ. ᓂᕈᐊᕐᓂᓕᕆᓂᕐᒧᑦ ᐱᖁᔭᕐᔪᐊᕐᒥ, ᒪᓕᒐᓕᐅᖅᑏᑦ ᓴᖅᑭᑦᑎᓚᐅᖅᓯᒪᔪᑦ “ᐊᓯᐊᒎᕐᓂᐅᑉ ᐱᕙᓪᓕᐊᔾᔪᓯᖏᓐᓂᒃ”, ᓯᖁᒥᑦᑎᔪᖃᕋᓱᒋᔭᐅᑎᓪᓗᒍ ᓂᕈᐊᖅᑐᓕᕆᓂᕐᒧᑦ ᐱᖁᔭᕐᔪᐊᕐᒥᒃ. ᑖᓐᓇ ᓂᕈᐊᒐᒃᓴᖅ ᐃᖅᑲᖅᑐᐃᕕᒃᑎᒎᓐᖏᑦᑑᔪᓐᓇᖅᑐᖅ ᓲᕐᓗ ᓴᓐᖐᓐᓂᖅᓴᒃᑯᑦ ᓯᖁᒥᑦᑎᓂᕋᖅᑕᐅᑎᓪᓗᒍ ᐊᖏᖃᑎᖃᖅᐸᑦ ᓈᓚᖕᓂᐊᕐᓂᕐᒧᑦ ᐊᖏᕈᑎᓕᐅᖃᑎᖃᕐᓗᓂ ᓱᓕᑦᑎᐊᕐᓂᕐᒧᑦ ᑲᒥᓴᓇᒥᒃ. ᑕᐃᒪᐃᑦᑐᖅ ᐊᖏᕈᑦ ᐅᖃᖅᓯᒪᕗᖅ ᓂᕈᐊᒐᒃᓴᖅ (ᐅᕝᕙᓘᓐᓃᑦ ᑭᒡᒐᖅᑐᐃᔨᖓ ᓯᖁᒥᑦᑎᓂᕐᒥᒃ ᐊᖏᖅᓯᒪᒍᓂ ᐊᒻᒪ ᐊᖏᖃᑎᖃᕐᓗᓂ ᖃᓄᐃᑦᑐᑐᐃᓐᓇᕐᓂᒃ ᐃᓂᖅᑎᕈᑎᐅᔪᓂᒃ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ ᓈᒻᒪᒐᓱᒋᔭᐅᔪᓂᒃ. ᐃᓂᖅᑎᕈᑏᑦ ᐃᓚᖃᑐᐃᓐᓇᕆᐊᖃᖅᐳᖅ ᑕᖅᑲᒃᑯᓄᖓ ᒪᒥᐊᓪᓗᓂ, ᐊᑭᓖᓗᓂ ᐅᕝᕙᓘᓐᓃᑦ ᐊᓯᖏᓐᓂᒃ ᐊᑐᖅᑎᑕᐅᓗᓂ ᑎᓕᔭᐅᓂᒃᑯᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ. ᑖᓐᓇ ᐱᓕᕆᐊᒃᓴᖅ ᓱᓕᑦᑎᐊᕐᓂᕐᒧᑦ ᑲᒥᓴᓇᒧᑦ ᑐᓐᓂᖅᑯᑕᐅᓚᐅᖅᑐᖅ ᒪᓕᒐᓕᐅᖅᑎᓄᑦ, ᐊᒃᑐᐃᓂᖃᓐᖏᖢᓂ, ᐃᓚᒋᔭᐅᓐᖏᖢᓂ ᐅᐃᒍᒋᔭᐅᓐᖏᖢᓂᓗ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐱᔭᒃᓴᖅᑖᓪᓗᐊᑕᖏᓐᓄᑦ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅᑎᒍᑦ, ᐅᑯᑎᒎᓇᖅ ᐅᓂᒃᑳᑎᒍᑦ ᐅᖃᐅᓯᕆᖅᑲᐅᔭᑎᑐᑦ. ᑭᓱᑐᐃᓐᓇᐃᑦ ᐅᖃᐅᓯᕆᓪᓗᒋᑦ, ᓂᕈᐊᕐᓂᓕᕆᓂᕐᒧᑦ ᐱᖁᔭᕐᔪᐊᖅ ᐅᖃᐅᓯᕆᔭᐅᓕᕌᖓᑦ ᒥᑭᔫᑎᓂᒃ ᓯᖁᒥᑦᑎᓂᕐᓂᒃ ᐱᔾᔪᑎᖃᒡᒍᔪᖅ, ᓲᕐᓗ ᓂᕈᐊᕐᓂᖅᑕᖃᓚᐅᖅᑎᓪᓗᒍ ᐅᓂᒃᑳᓂᒃ ᖃᐃᑦᑎᓐᖏᓐᓂᖅ. ᒪᕐᕉᒃ ᑕᐃᓚᐅᖅᑖᒃᑲᒃ ᓯᕗᓪᓕᕐᓂ ᐅᓂᒃᑳᓂ ᐋᖅᑭᒃᑕᐅᓚᐅᖅᑐᖅ ᒪᓕᖕᓂᐊᕐᓂᕐᒧᑦ ᐊᖏᕈᑎᑎᒍᑦ ᐊᒻᒪ ᐃᖅᑲᖅᑐᐃᕕᒃᑎᒎᖅᑎᑦᑎᓚᐅᓐᖏᖢᑕ ᑕᒪᑐᒥᖓ. ᓱᓕ ᑕᐃᒪᓐᓇ ᐃᓱᒪᖃᖅᑐᖓ, ᐅᖃᖃᑎᒋᖃᑦᑕᕆᐊᖃᕐᓂᖏᑦ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᑎᑎᕋᕐᕕᐊ ᐊᒻᒪ

18 ᓂᕈᐊᖅᑐᓕᕆᔨ. ᑕᐃᒪᓐᓇ ᐅᖃᓪᓚᖃᑎᒌᒃᑎᓪᓗᒋᒃ ᐃᓱᒪᒃᓴᖅᓯᐅᕈᑕᐅᖃᑕᐅᔭᕆᐊᓕᒃ ᑕᒪᓐᓇ ᐱᕙᓪᓕᐊᔾᔪᓯᖅ ᐊᑑᑎᖃᑦᑎᐊᕐᒪᖔᖓ ᐊᒻᒪ ᐱᔭᕐᓂᓐᖏᔾᔪᑏᑦ ᐱᑕᖃᐅᒡᒍᖕᒥᖕᒪᑕ ᑕᒪᓐᓇ ᐱᕙᓪᓕᐊᔾᔪᓯᖅ ᐱᔾᔪᑎᒋᓪᓗᒍ. ᐅᑯᐊ ᐅᓂᒃᑳᑦ ᐊᑐᖅᑎᓪᓗᒋᑦ, ᐅᖃᐱᓗᒃᑐᖃᓚᐅᓐᖏᑦᑐᖅ ᖃᐅᔨᓴᖅᑕᐅᔭᕆᐊᓕᖅᑎᑦᑎᔪᒥᒃ ᐅᓂᒃᑲᐅᓯᕆᔭᐅᔭᕆᐊᖃᖅᑐᒥᒡᓗ ᒪᓕᒐᓕᐅᕐᕕᖕᒧᑦ. ᐃᓛᓐᓂᓚᐅᓱᖓᖅ ᐊᐱᕆᔭᐅᖃᑦᑕᖅᑐᒍᑦ ᓱᓕᑦᑎᐊᕐᓂᕐᒧᑦ ᑲᒥᓴᓇ ᒐᕙᒪᖃᕐᕕᖕᒥ ᓇᓕᐊᖕᓂ ᐱᔪᓐᓇᕐᓂᖃᕐᒪᖔᖓᓂᒃ, ᑭᓱᓪᓗ ᖃᐅᔨᓴᖅᑕᐅᔪᓐᓇᕐᒪᖔᖏᑦ ᐊᒻᒪ ᐅᓂᒃᑲᐅᓯᕆᔭᐅᔭᕆᐊᖃᕐᓗᑎᒃ ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᑉ ᐃᓗᐊᓃᑦᑐᑦ ᒪᓕᒡᓗᒋᑦ. ᑕᖅᑲᒃᑯᓄᖓᑦ ᐊᐱᖅᑯᑕᐅᓚᐅᖅᑐᑦ

19 ᓱᓕᑦᑎᐊᕐᓂᕐᒧᑦ ᑲᒥᓴᓇᐅᓪᓗᖓ ᓄᓇᕗᒻᒧᑦ, ᑲᓇᑕᓕᒫᒥ ᑲᒥᓴᓇᐅᖃᑎᒃᑲ ᐊᔾᔨᐸᓗᖏᓐᓂᒃ ᐃᖅᑲᓇᐃᔮᓖᑦ ᑲᑐᔾᔨᖃᑎᒌᖏᓐᓄᑦ ᐃᓚᒋᔭᐅᖃᑕᐅᔪᖓ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᑲᓇᑕᒥ ᐊᕕᒃᑐᖅᓯᒪᔪᓂ, ᑲᓇᑕᐅᑉ ᒐᕙᒪᒃᑯᖏᑦᑕ ᒪᓕᒐᓕᐅᕐᕕᒡᔪᐊᖓᓂ ᐃᑦᑐᐃᓪᓗ ᑲᑎᒪᕕᖏᓐᓂ. ᑖᒃᑯᐊ ᑕᐃᔭᐅᔪᑦ ᑲᓇᑕᒥ ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᑲᑐᔾᔨᖃᑎᒌᓂᒃ, ᐅᕝᕙᓘᓐᓃᑦ CCOIN ᓇᐃᒡᓕᑎᕐᓗᒍ. ᑖᒃᑯᐊ ᐃᒻᒥᒧᑦ ᐊᒡᕕᐊᕈᑎᖃᖅᑕᐃᓕᒪᓂᕐᒧᑦ ᑲᒥᓴᓇᐃᑦ, ᐃᖅᑲᓇᐃᔭᖅᑎᑦᑎᐊᕙᐅᓂᕐᒧᑦ ᑲᒥᓴᓇᐃᑦ ᐊᒻᒪ ᓱᓕᑦᑎᐊᕐᓂᕐᒧᑦ ᑲᒥᓴᓇᐃᑦ ᐊᕐᕌᒍᑕᒫᖅ ᑲᑎᒪᕐᔪᐊᒡᒍᔪᑦ, ᓯᑎᐱᕆᒥᐅᒡᒍᔪᖅ, ᐊᒻᒪ ᐊᕐᕌᒎ ᐃᓗᐊᓂ ᐅᖃᖃᑎᒌᖃᑦᑕᖅᖢᑎᒃ ᑕᐅᖅᓰᖃᑎᒌᒍᓐᓇᕐᓂᐊᕋᒥᒃ ᐊᑐᖅᓯᒪᔭᒥᖕᓂᒃ, ᐱᔭᕐᓂᓐᖏᑦᑐᖁᑎᒥᖕᓂᒃ ᖃᓄᕐᓗ ᐱᐅᓂᖅᐹᓂᒃ ᐱᐅᓯᖃᕐᓂᖅ ᐊᑲᐅᓛᖑᖕᒪᖔᖓ ᐃᑲᔪᖃᑎᒌᒃᖢᑎᒃ ᐱᔭᒃᓴᖅᑖᕆᓯᒪᔭᒥᓂᒃ ᐱᔾᔪᑎᖃᖅᖢᑎᒃ. ᑲᒥᓴᓇᓄᑦ ᐃᓱᒪᓕᐅᕈᑕᐅᔪᑦ ᐊᑕᐅᓯᕐᒧᑦ ᖃᕆᓴᐅᔭᕐᒧᑦ ᐃᓕᐅᖅᑲᖅᑕᐅᖃᑦᑕᖅᑐᑦ ᐊᒻᒪ ᐊᑐᐃᓐᓇᕈᖅᑎᑕᐅᓯᒪᓪᓗᑎᒃ ᑲᒥᓴᓇᓕᒫᓄᑦ. ᐊᕐᕌᒍᑕᒫᖅ ᑲᑎᒪᓂᕆᖃᑦᑕᖅᑕᕗᑦ ᑲᑎᒪᓂᓪᓚᕆᐊᓘᕗᖅ ᐃᖅᑲᓇᐃᔭᖅᐸᓪᓕᐊᓯᓐᓈᖅᖢᑕ ᐊᔾᔨᒌᓐᖏᑦᑐᓂ ᒐᕙᒪᖃᕐᕕᓕᖕᓂ ᐊᑐᖅᑕᐅᖃᑦᑕᖅᑐᑦ ᕿᒥᕐᕈᓇᒃᖢᑎᒃᑯᑦ ᑲᑎᒪᔾᔪᑎᒋᓪᓗᑎᒃᑯᓪᓗ. ᐅᖃᓪᓚᒋᐊᖅᑐᖅᑎᑕᐅᔪᑦ ᖃᐃᖁᔭᐅᒡᒍᕗᑦ ᐃᑲᔪᕈᓐᓇᕐᓂᐊᕐᒪᑕ ᑲᒥᓴᓇᓂᒃ ᖃᓄᖅ ᐱᔭᒃᓴᖅᑖᕆᓯᒪᔭᒥᓂᒃ ᐊᐅᓚᑦᑎᖃᑦᑕᕐᒪᖔᖏᑦ. ᐅᓂᒃᑲᐅᔾᔭᐅᖃᑦᑕᕐᒥᔪᒍᑦ ᒫᓐᓇ ᕿᒥᕐᕈᓂᐅᔪᓂᒃ ᖃᐅᔨᓴᐃᓂᕐᓂᒡᓗ. ᐊᕐᕌᒍᑕᒫᖅᓯᐅᒻᒥᒃ ᑲᑎᒪᑎᓪᓗᑕ ᐱᕐᔪᐊᖑᓂᖅᐹᖅ ᑲᒥᓴᓇᐃᑦ ᐃᑲᔪᖃᑎᒌᖃᑦᑕᕐᓂᖏᑦ. ᑲᒥᓴᓇ ᐊᓯᒥᓂᒃ ᑲᒥᓴᓇᐅᖃᑎᒥᓂᒃ ᐊᐱᕆᔪᓐᓇᖅᑐᖅ ᐱᔪᓐᓇᕐᓂᖅᑖᕐᕕᒋᓯᒪᔭᒥᓂ ᖃᓄᖅ ᐊᐅᓚᓂᖃᖃᑦᑕᕐᒪᖔᖏᑦ ᐊᒻᒪ ᑖᓐᓇ ᐊᐱᖅᑯᑖ ᖃᓄᖅ ᑕᐅᑐᒃᑕᐅᖕᒪᖔᖓ ᐊᓯᒥᓄᑦ, ᐊᒻᒪ ᐃᓱᒪᓕᐅᕈᑕᐅᔪᑦ ᖃᕆᓴᐅᔭᒃᑯᖅᑎᑕᑦ ᐃᓱᓕᒋᔭᖏᓪᓗ ᐃᑭᐊᖅᑭᕕᖕᒧᐊᖅᑕᐅᕙᓪᓕᐊᖃᑦᑕᖅᖢᑎᒃ ᑲᒥᓴᓇᓕᒫᓄᑦ ᐃᑲᔪᑕᐅᒃᑲᓐᓂᖁᓪᓗᒍ. ᓯᑎᐱᕆ 2024-ᒥ, ᐊᕐᕌᒍᑕᒫᖅᓯᐅᑦ ᑲᑎᒪᓂᖅ ᑯᐸᐃᒃ ᓯᑎᒦᓚᐅᖅᑐᖅ. ᒪᒥᐊᓇᖅᑑᒐᓗᐊᖅ ᐅᐸᒍᓐᓇᓚᐅᓐᖏᑦᑐᖓ ᐃᒻᒥᒨᖓᔪᒥᒃ ᐊᑲᐅᓐᖏᓕᐅᕈᑎᖃᕐᓂᕋ ᐱᔾᔪᑎᒋᓪᓗᒍ. ᑲᒥᓴᓇᐅᖃᑎᓐᓂ ᐃᖅᑲᓇᐃᔭᖃᑎᖃᕐᓂᖅ

20 ᓄᓇᕗᒻᒥ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᓂᕋ ᐊᑐᖅᖢᒍ ᐃᖅᑲᓇᐃᔮᒃᑲ ᐱᔭᕇᖅᐸᓪᓕᐊᓇᔭᓐᖏᑕᒃᑲ ᐃᑲᔪᖅᑕᐅᓐᖏᓐᓂᕈᒪ ᒪᓕᒐᓕᐅᕐᕕᖕᒧᑦ ᐃᖅᑲᓇᐃᔭᖅᑎᓄᑦ. ᑎᑎᕋᕐᕕᒐ ᐊᓪᓚᒃᑎᖃᓐᖏᓐᓂᖓ ᐱᔾᔪᒋᓪᓗᒍ, ᑎᑎᕋᖅᑎᐅᑉ ᑎᑎᕋᕐᕕᐊ ᐃᑲᔪᓪᓚᕆᖃᑦᑕᖅᑐᖅ ᖃᓄᑐᐃᓐᓇᖅ. ᓲᕐᓗ ᐋᖅᑭᒃᓱᐃᕙᒃᖢᑎᒃ ᑲᑎᒪᖃᑎᖃᕐᓂᐊᕐᓂᓐᓂᒃ ᓂᕈᐊᖅᑕᐅᓯᒪᔪᓂᒃ ᒪᓕᒐᓕᐅᖅᑎᓂᒃ, ᐊᕐᕌᒍᑕᒫᖅᓯᐅᑏᑦ ᓴᖅᑭᑦᑎᓂᐊᕐᓂᕐᒧᑦ ᑎᑎᖅᑲᑦ ᒪᓕᒐᓕᐅᖅᑎᓄᑦ ᑐᓂᐅᖅᑲᖅᑕᐅᕙᒃᖢᑎᒃ ᐊᒻᒪ ᑐᓴᐅᒪᑎᑕᐅᕙᒃᖢᖓ ᖃᓄᖅ ᐱᐅᓯᖃᖅᐸᓚᐅᕐᒪᖔᖏᑦ ᒪᓕᒐᓕᐅᕐᕕᒃ. ᑖᓐᓇᐅᖅᑲᐅᖕᒥᑎᓪᓗᒍ, ᐊᓯᖏᑦ ᐃᖅᑲᓇᐃᔭᖅᑏᑦ ᐱᑐᐃᓐᓇᐅᓐᖏᑦᑐᓄᑦ ᐃᑲᔪᖅᑎᒋᖃᑦᑕᕐᒥᔭᒃᑲ, ᒪᓕᒐᕐᓂᐊᖅᑎᖓᓪᓗ ᐃᓱᒪᓯᐅᖅᐸᒃᖢᒍ, ᖃᐅᔨᓴᐃᓃᑦ ᐊᒻᒪ ᖃᖓᑦᑕᕐᓂᐊᕐᓂᒃᑲ ᐋᖅᑭᒃᓱᖅᑕᐅᕙᒃᖢᑎᒃ. ᐱᔭᒃᓴᖅᑖᕆᓯᒪᔭᒃᑲ ᐱᔭᕇᕈᓐᓇᕋᔭᓐᖏᑕᒃᑲ ᑕᐃᒪᓐᖓᓕᒫᖅ ᐃᑲᔪᖅᑕᐅᓐᖏᓐᓂᕈᒪ. ᐊᒃᓱᐊᓗᒃ ᖁᔭᓕᕙᒃᑲ ᑕᐃᒃᑯᐊ ᐅᕙᓐᓂᒃ ᐃᑲᔪᖃᑦᑕᖅᑐᑦ ᐱᔭᒃᓴᒃᑲ ᐱᓕᕆᐊᕆᔪᓐᓇᕐᓂᐊᕋᒃᑭᑦ. ᑳᑐᕆᓐ ᐲᑐᓴᓐ, K.C. ᓱᓕᑦᑎᐊᕐᓂᕐᒧᑦ ᑲᒥᓴᓇ, ᓄᓇᕗᑦ ᒪᓕᒐᓕᐅᕐᕕᖕᒥ ᐃᖅᑲᓇᐃᔭᖅᑏᑦ ᐊᒻᒪ ᓱᓇᒃᑯᑖᖏᑦ

Document details

Collection	Nunavut — Committees
Citation	TD-9-7(2)-IN
Type	statute
Volume / chapter	TD 009 7(2) IN 2024 2025 Annual Report of the Integrity Commissioner of Nunavut
Language	en
Format	pdf
Source	TERRITORIAL
Identifier	1d06b96376c56d2bfb4897de94b2967473dd439f

Source file is stored in the law ingest library (pdf).