ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 0 ᒪᓕᒐᓕᐅᕐᕕᒻᒥ ᑲᑎᒪᔾᔪᑎᒥᓃᑦ ᐋᖅᑭᒋᐊᖅᓯᒪᓐᖏᑦᑐᑦ ᓇᕿᑦᑕᖅᑕᐅᓯᒪᔪᑦ ᕿᑎᖅᑰᖅ, ᓅᕕᐱᕆ 20, 2025 ᐃᖃᓗᐃᑦ, ᓄᓇᕗᑦ ᐋᖅᑭᒋᐊᕈᑎᑦ: ᐊᑏ ᐅᑎᖅᑎᓯᐅᒃ ᐋᖅᑭᒋᐊᖅᑕᐅᔪᐃᑦ ᑎᑎᕋᖅᑎᒧᑦ ᐅᕝᕙᓘᓐᓃᑦ ᑐᖏᓕᐊᓄᑦ ᒪᓕᒐᓕᐅᕐᕕᒻᒥ ᑲᑎᒪᔾᔪᑎᒥᓃᑦ ᓇᕿᔾᔪᑕᐅᓐᖏᓚᑦ ᑐᑭᓕᐊᖅᑕᐃᓐᓇᕆᓗᒋᑦ ᒪᓕᒐᓕᐅᖅᑏᑦ ᐊᐃᕙᓂᖏᑦ. ᓇᕿᑕᐅᓯᒪᑐᐃᓐᓇᖅᑐᐃᑦ ᐅᖃᐅᓯᐅᓪᓗᐊᑕᖅᑐᑦ. ᐅᖃᖅᑕᐅᒃᑲᓂᖅᑐᒥᒃ ᐊᓯᐊᑎᒍᓪᓘᓐᓃᑦ ᓲᕐᓗ ᓇᓗᓇᐃᖅᑕᐅᔪᖃᒃᑲᓐᓂᕆᐊᖃᖅᐸᑦ ᐋᖅᑭᒋᐊᖅᑕᐅᔪᓐᓇᖅᑐᑦ ᑭᓇᑐᐃᓐᓇᖅ ᒪᓕᒐᓕᐅᕐᕕᒻᒥ ᑲᑎᒪᔾᔪᑎᓂᑦ ᐅᖃᓕᒫᖅᑐᑦ ᓱᖅᑯᐃᒪᓂᐊᕐᒪᑦ ᐅᖃᖅᑕᒥᓂᕐᒥᒃ. ᑲᑎᒪᐅᑎᒥᓂᓕᕆᔪᑦ ᐅᖃᓕᒫᕋᓐᓂᑦᑎᑦᓯᔭᕆᐊᓖᑦ ᐊᔾᔨᒌᑉᐸᓐᖏᒻᒪᑎᒃ ᐅᖃᖅ ᑕᐅᔪᖅ ᑎᑎᕋᖅᓯᒪᔪᕐᓗ. ᐊᐃᕙᔾᔪᑎᒥᓃᑦ, ᓯᑎᐱᕆ 20, 1983, ᒪᑉᐱᑐᒐᖓ 27299. ᐴᓯᔅᓂᐅᑉ 6-ᖓᓐᓂᒃ ᓇᕿᑕᐅᔾᔪᑎᖓ, ᑎᓕᓯᔾᔪᑎᒃ 55

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 1 ᓄᓇᕗᑦ ᒪᓕᒐᓕᐅᕐᕕᖓ ᐅᖃᖅᑎ ᐊᖓᔪᖅᑳᖅ ᑕᐃᕕᑎ ᔪᐊᓇᓯ (ᕿᑭᖅᑖᓘᑉ ᓂᒋᐊ) ᐊᐅᓚᑦᑎᔩᑦ ᐊᓪᓚᑦᑎ ᐊᓪᓚᑦᑎᐅᑉ ᑐᓪᓕᐊ ᓯᑏᕙᓐ ᐃᓄᒃᓱᒃ ᐅᐃᓐᑎ ᕙᓐᔅ ᐊᓪᓚᑦᑎᐅᑉ ᐃᑲᔪᖅᑎᖓ ᖂᔪ ᓄᓱᑦᑕᖅ ᒪᓕᒐᓕᕆᔨ ᒪᐃᑯᓪ ᓵᓐᑐᓗ ᐃᖅᓱᖅᑎ ᒪᓕᒃᑐ ᑲᑎᒪᐅᑎᓂᒃ ᐋᖅᑭᒃᓱᐃᔩᑦ ᐅᖃᐅᓯᕐᒥᒃ ᐅᖃᐅᓯᕐᒧᑦ ᑎᒥᖓᑦ 926 ᓯᕗᒧᒋᐊᖅ ᐊᑐᕆᐊᖅ ᐃᖃᓗᐃᑦ, ᓄᓇᕗᑦ X0A 3H0 ᐅᖄᓚᐅᑖ (867) 975-5000 ᓱᒃᑲᕈᑖ (867) 975-5190 ᐊᑭᖃᓐᖏᑦᑐᖅ (877) 334-7266 ᖃᕋᓴᐅᔭᑎᒍᑦ ᑐᕌᕈᑎᖓᑦ: www.assembly.nu.ca ᒍᐃᓐ ᕼᐄᓕ ᐊᕿᐊᕈᖅ (ᐃᖃᓗᐃᑦ-ᒪᓂᕋᔭᒃ) ᑕᐃᕕᑎ ᐊᕿᐊᕈᖅ (ᐃᖃᓗᐃᑦ-ᓂᐊᖁᓐᖒ) ᕼᐋᓇ ᐊᖑᑎᐊᓗᒃ (ᐊᐃᕕᓕᒃ) ᐱᑦᓯᐅᓛᖅ ᐳᕉᔅᑐ (ᐃᖃᓗᐃᑦ-ᓯᓈ) ᔪᐊᔾ Hᐃᒃᔅ (ᐃᖃᓗᐃᑦ-ᑕᓯᓗᒃ) ᔭᐃᒥ ᖃᑉᓗᑦᓯᐊᖅ (ᐊᕐᕕᐊᑦ ᓂᒋᐊ) ᒍᐊᑕᓐ ᑲᐅᑐᒃ (ᐅᖅᑯᕐᒥᐊᑦ) ᐳᕋᐃᔭᓐ ᑯᓄ (ᑐᓄᓂᖅ) ᓴᐃᒪᓐ ᖁᓕᒃᑖᓇ (ᖁᓪᓗᖅᑐᖅ) ᓯᓯᐅᓪ ᓂᐅᓪᕚᓇ ᓚᐅᔪᓪ (ᓇᑦᓯᓕᒃ) ᐋᕐᓗᒃ ᒪᐃᓐ (ᐊᕐᕕᐊᑉ ᐅᐊᓐᓇᖓ-ᑎᑭᕌᕐᔪᐊᖅ) ᔮᓂ ᒪᐃᒃ (ᐸᓐᓂᖅᑑᖅ) ᕗᕋᑦ ᐸᑐᓴᓐ (ᐃᖃᓗᒃᑑᑦᑎᐊᖅ) ᑕᐃᕕᑎ ᐳᐊᑐ (ᐅᖅᓱᖅᑑᖅ) ᐊᐃᕙᓚᕼᐋ ᖃᒪᓂᖅ (ᐊᒥᑦᑐᖅ) ᑖᓂᐅᓪ ᖃᕝᕕᒃ (ᑕᓯᐅᔭᕐᔪᐊᖅ) ᑯᕋᐃᒃ ᓯᒪᐃᓚᒃ (ᖃᒪᓂᑦᑐᐊᖅ) ᐋᓕᒃᓵᓐᑐ ᓴᒻᒧᖅᑐᖅ (ᑲᖏᖅᖠᓂᐅᑉ ᐅᐊᓐᓇᖓ-ᐃᒡᓗᓕᒑᕐᔪᒃ) ᓯᑏᕙᓐ ᑕᖅᑐ (ᖁᑦᑎᒃᑐᖅ) ᐋᓂ ᑕᑦᑐᐃᓂ (ᑲᖏᖅᖠᓂᖅ ᓂᒋᐊ) (ᐃᓐᓄᒃᓯᒪᖏᑦᑐᖅ) (ᐊᒡᒍ)

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 2 ᐃᓗᓕᖏᑕ ᓇᓕᖅᑲᖏᑦ ᑐᒃᓯᐊᓂᒃᑯᑦ ᒪᑐᐃᖅᓯᓂᖅ............................................................................................................................................................................5 ᓂᕈᐊᕐᓂᖅ ᐅᖃᖅᑎᒧᑦ.................................................................................................................................................................................5 ᒪᑐᐃᖅᓯᓂᖅ ᐅᖃᐅᓯᒃᑯᑦ ᑲᒥᓯᓇ ᓄᓇᕗᒻᒧᑦ.........................................................................................................................................6 ᒪᓕᒐᓕᐅᖅᑏᑦ ᐅᖃᐅᓯᖏᑦ.........................................................................................................................................................................7 ᐃᓕᑕᖅᓯᓂ ᑐᓵᔭᖅᑐᖅᓯᒪᔪᓂᑦ ᒪᓕᒐᓕᐅᕐᕕᒻᒧᑦ..................................................................................................................................17 ᓴᖅᑭᑕᐅᓂᖏᑦ ᑎᑎᖅᑲᑦ...........................................................................................................................................................................20 ᑐᓴᖅᑎᑦᑎᔾᔪᑦ ᐱᖁᔨᕗᖔᓕᐅᓛᕐᓂᐊᕐᓂᕐᒧᑦ........................................................................................................................................20 ᐱᖁᔨᕗᖔᕈᑏᑦ...........................................................................................................................................................................................22 ᐃᓕᑕᓯᓂᖅ ᑐᓵᔭᖅᑐᖅᓯᒪᔪᓂᑦ ᒪᓕᒐᓕᐅᕐᕕᒻᒧᑦ.................................................................................................................................26 ᑲᑎᒪᔾᔪᑎᒃᓴᐃᑦ...........................................................................................................................................................................................28

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 3 ᐃ. ᖃᐅᑕᒫᒧᑦ ᖃᐅᔨᒋᐊᕈᑎᑦ ᕿᑎᖅᑰᑦ, ᓅᕕᐱᕆ 20, 2025................................................................................................................................................................................................................5 ᐅ. ᒪᓕᒐᓕᐅᖅᑏᑦ ᐅᖃᐅᓯᖏᑦ 1 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐃᖃᓗᐃᑦ−ᑕᓯᓗᒃ ᑭᒡᒐᖅᑐᕐᓂᐊᕐᓗᒍ (ᕼᐃᒃᔅ)...............................................7 2 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐃᖃᓗᒃᑑᑦᑎᐊᖅ ᑭᒡᒐᖅᑐᕐᓂᐊᕐᓗᒍ (ᐸᑐᓴᓐ)................................................8 3 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐃᖃᓗᐃᑦ−ᒪᓂᕋᔭᒃ ᑭᒡᒐᖅᑐᕐᓂᐊᕐᓗᒍ (ᕼᐄᓕ ᐊᕿᐊᕈᖅ).........................9 4 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐅᖅᑯᒻᒥᐅᑦ ᑭᒡᒐᖅᑐᕐᓂᐊᕐᓗᒍ (ᑲᐅᑐᒃ)...........................................................9 5 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐊᒥᑦᑐᖅ ᑭᒡᒐᖅᑐᕐᓂᐊᕐᓗᒍ (ᖃᒪᓂᖅ).........................................................10 6 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐊᐃᕕᓕᒃ ᑭᒡᒐᖅᑐᕐᓂᐊᕐᓗᒍ (ᐊᖑᑎᐊᓗᒃ)..................................................10 7 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐃᖃᓗᐃ−ᓂᐊᖁᖒ ᑭᒡᒐᖅᑐᕐᓂᐊᕐᓗᒍ (ᐊᕿᐊᕈᖅ)...................................10 8 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᑐᓄᓂᖅ ᑭᒡᒐᖅᑐᕐᓂᐊᕐᓗᒍ (ᑯᓄ).................................................................11 9 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᑲᖏᖅᓯᓂᖅ−ᓂᒋᐊ ᑭᒡᒐᖅᑐᕐᓂᐊᕐᓗᒍ (ᑕᑦᑐᐃᓂ)....................................11 10 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᑕᓯᐅᔭᕐᔪᐊᖅ ᑭᒡᒐᖅᑐᕐᓂᐊᕐᓗᒍ (ᖃᕝᕕᒃ).................................................12 11 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐊᕐᕕᐊᑦ−ᓂᒋᐊ ᑭᒡᒐᖅᑐᕐᓂᐊᕐᓗᒍ (ᖃᑉᓗᑦᓯᐊᒃ).....................................12 12 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐅᖅᓱᖅᑑᖅ ᑭᒡᒐᖅᑐᕐᓂᐊᕐᓗᒍ (ᐳᐊᑐ)......................................................13 13 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐸᓐᓂᖅᑑᖅ ᑭᒡᒐᖅᑐᕐᓂᐊᕐᓗᒍ (ᒪᐃᒃ).......................................................13 14 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᓇᑦᓯᓕᒃ ᑭᒡᒐᖅᑐᕐᓂᐊᕐᓗᒍ (ᓚᐃᔪᓪ).........................................................14 15 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᖃᒪᓂᑦᑐᐊᖅ ᑭᒡᒐᖅᑐᕐᓂᐊᕐᓗᒍ (ᓯᒪᐃᓚᒃ)..............................................14 16 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᖁᑦᑎᒃᑐᖅ ᑭᒡᒐᖅᑐᕐᓂᐊᕐᓗᒍ (ᑕᖅᑐ)........................................................15 17 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐃᖃᓗᐃᑦ−ᓯᓈ ᑭᒡᒐᖅᑐᕐᓂᐊᕐᓗᒍ (ᐳᕉᔅᑐ)..............................................15

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 4 18 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐊᕐᕕᐊᑦ ᐅᐃᓐᓇᖓ−ᑎᑭᕋᕐᔪᐊᖅ ᑭᒡᒐᖅᑐᕐᓂᐊᕐᓗᒍ (ᒪᐃᓐ).................15 19 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᑲᖏᖅᖠᖅ ᐅᐊᓐᓇᖓ−ᐃᒡᓗᓕᒑᕐᔪᒃ ᑭᒡᒐᖅᑐᕐᓂᐊᕐᓗᒍ (ᓴᒻᒧᖅᑐᖅ)..17 20 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᖁᓪᓗᖅᑐᖅ ᑭᒡᒐᖅᑐᕐᓂᐊᕐᓗᒍ (ᖁᓕᒃᑖᓇ)..............................................17 ᐊ. ᓴᖅᑭᑕᐅᓂᖏᑦ ᑎᑎᖅᑲᑦ 1 – 7(1): ᓂᕈᐊᕐᓂᖅ ᐊᑖᒍᑦ ᖄᒃᑲᓐᓂᐊᒍᑦ ᓄᖅᑲᕐᓂᕐᒧᑦ ᐊᑭᓕᐅᑕᐅᕙᑦᑐᓄᑦ ᐱᖁᔭᖅ (ᔪᐊᓇᓯ).........................................20 ᐳ. ᐱᖁᔨᕗᖔᕈᑏᑦ 1 – 7(1): ᑎᒃᑯᐊᖅᓯᓂᖅ ᐅᖃᖅᑎᒥ (ᐳᕉᔅᑐ)......................................................................................................................................20 2 – 7(1): ᑎᒃᑯᐊᖅᓯᓂᖅ ᓯᕗᓕᖅᑎᒥ − ᑲᐅᔨᒃᑲᐃᔾᔪᑎ (ᓴᒻᒧᖅᑐᖅ).............................................................................................21 3 – 7(1): ᑎᒃᑯᐊᖅᓯᓂᖅ ᐊᖏᔪᖅᑲᐅᑎᓂ − ᖃᐅᔨᒃᑲᐃᔾᔪᑎ (ᐸᑐᓴᓐ).........................................................................................21 4 – 7(1): ᑎᒃᑯᐊᖅᓯᓂᖅ ᐅᖃᖅᑎᐅᑉ ᑐᖏᓕᐊᓂᑦ − ᖃᐅᔨᒃᑲᐃᔾᔪᑎ (ᕼᐃᒃᔅ)...........................................................................21 5 – 7(1): ᑎᒃᑯᐊᖅᓯᓂᖅ ᐃᒃᓯᕙᐅᑕᐅᑉ ᑐᖏᓕᐊᓂᑦ ᑲᑎᒪᑐᐃᓐᓇᕐᓂᕐᒧᑦ − ᖃᐅᔨᒃᑲᐃᔾᔪᑎ (ᐸᑐᓴᓐ)...............................22 6 – 7(1): ᑎᒃᑯᐊᖅᓯᓂᖅ ᐊᐅᓚᑦᑎᓂᕐᒧᑦ ᐱᔨᑦᑎᕋᕐᕕᐅᖃᖅᑕᐸᑦᑐᓂᓪᓗ ᑲᑎᒪᔩᑦ − ᖃᐅᔨᒃᑲᐃᔾᔪᑎ (ᐊᖑᑎᐊᓗᒃ).................................................................................................................................................................................................22 7 – 7(1): ᑎᒃᑯᐊᖅᓯᓂᖅ ᑲᑎᒪᔨᕋᓛᓕᐅᖅᑎᒃᑯᓐᓂᑦ − ᖃᐅᔨᒃᑲᐃᔾᔪᑎ (ᑲᐅᑐᒃ)........................................................................22 8 – 7(1): ᐅᖓᕙᕆᐊᖅᑕᐅᔪᖅ ᓄᖅᑲᕐᓂᖅ − ᖃᐅᔨᒃᑲᐃᔾᔪᑎ (ᓴᒻᒧᖅᑐᖅ)..................................................................................22 2 – 7(1): ᑎᒃᑯᐊᖅᓯᓂᖅ ᓯᕗᓕᖅᑎᒥ (ᓴᒻᒧᖅᑐᖅ).............................................................................................................................23 3 – 7(1): ᑎᒃᑯᐊᖅᓯᓂᖅ ᐊᖏᔪᖅᑲᐅᑎᓂ (ᐸᑐᓴᓐ)..........................................................................................................................23 4 – 7(1): ᑎᒃᑯᐊᖅᓯᓂᖅ ᐅᖃᖅᑎᐅᑉ ᑐᖏᓕᐊᓂᑦ (ᕼᐃᒃᔅ)............................................................................................................24 5 – 7(1): ᑎᒃᑯᐊᖅᓯᓂᖅ ᐃᒃᓯᕙᐅᑕᐅᑉ ᑐᖏᓕᐊᓂᑦ ᑲᑎᒪᑐᐃᓐᓇᕐᓂᕐᒧᑦ (ᐸᑐᓴᓐ).................................................................24 6 – 7(1): ᑎᒃᑯᐊᖅᓯᓂᖅ ᐊᐅᓚᑦᑎᓂᕐᒧᑦ ᐱᔨᑦᑎᕋᕕᐅᖃᖅᑕᐸᑦᑐᓄᓪᓗ ᑲᑎᒪᔩᑦ (ᐊᖑᑎᐊᓗᒃ).............................................25 7 – 7(1): ᑎᒃᑯᐊᖅᓯᓂᖅ ᑲᑎᒪᔨᕋᓛᓕᐅᖅᑎᒃᑯᓐᓂᑦ (ᑲᐅᑐᒃ)..........................................................................................................26 8 – 7(1): ᐅᖓᕙᕆᐊᖅᑕᐅᔪᖅ ᓄᖅᑲᕐᓂᖅ (ᓴᒻᒧᖅᑐᖅ)....................................................................................................................26

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 5 ᐃᖃᓗᐃᑦ, ᓄᓇᕗᑦ ᕿᑎᖅᑰᑦ, ᓅᕕᐱᕆ 20, 2025 ᒪᓕᒐᓕᐅᖅᑏᑦ ᐅᐸᒃᑐᑦ: ᒍᐃᓐ ᕼᐋᓕ ᐊᕿᐊᕈᖅ, ᑕᐃᕕᑎ ᐊᕿᐊᕈᖅ, ᕼᐋᓇ ᐊᖑᑎᐊᓗᒃ, ᔮᓇᑦ ᐱᑦᓯᐅᓛᖅ ᐳᕉᔅᑐ, ᔪᐊᔾ ᕼᐃᒃᔅ, ᔭᐃᒥ ᖃᓗᑉᓯᐊᖅ, ᒍᐊᑕᓐ ᑲᐅᑐᒃ, ᐳᕋᐃᔭᓐ ᑰᓄ, ᓴᐃᒪᓐ ᖁᓕᒃᑖᓇ, ᓯᓯᐊᓪ ᓂᐅᓪᕚᓇ ᓚᐅᔪᓪ, ᐋᕐᓗᒃ ᒪᐃᓐ, ᔮᓂ ᒪᐃᒃ, ᕗᕋᑦ ᐸᑐᓴᓐ, ᑕᐃᕕᑎ ᐳᐊᑐ, ᐊᐃᕙᓚᕼᐋ ᖃᒪᓂᖅ, ᑖᓂᐅᓪ ᖃᕝᕕᒃ, ᑯᐊᐃᒃ ᓯᒪᐃᓚᒃ, ᐊᓕᒃᓵᑐ ᓴᒻᒧᖅᑐᖅ, ᓯᑏᕙᓐ ᑕᖅᑐᖅ, ᐋᓂ ᑕᑦᑐᐃᓂ >>ᑲᑎᒪᓯᒋᐊᖅᑐᑦ 13:30 ᑲᑎᒪᔾᔪᑎ 1: ᑐᔅᓯᐊᓂᒃᑯᑦ ᒪᑐᐃᖅᓯᓂᖅ ᑎᑎᕋᖅᑎ: ᐅᓐᓄᒃᓴᒃᑯᑦ, ᐱᒋᐊᕈᓐᓇᖅᓯᒐᑦᑕ. ᐱᒋᐊᓚᐅᙱᓐᓂᑦᑎᓐᓂ ᒥᔅᑕ ᐊᕿᐊᕈᖅ, ᑐᒃᓯᐊᕐᓂᒃᑯᑦ ᐅᒃᑯᐃᕈᓐᓇᖅᐱᐅᒃ? >>ᑐᒃᓯᐊᖅᑐᑦ>> ᑲᑎᒪᔾᔪᑎ 2: ᓂᕈᐊᕐᓂᖅ ᐅᖃᖅᑎᒥ ᑎᑎᕋᖅᑎ: ᖁᔭᓐᓇᒦᒃ. ᑎᑎᕋᖅᑎᐅᑉ ᐱᓕᕆᐊᕆᖕᒪᒍ ᑖᓐᓇ ᑲᒥᓯᓇᐅᑉ ᓄᓇᕗᒻᒥ ᐅᖃᖅᑎᑖᓚᐅᙱᓐᓂᔅᓯᓐᓂ ᐃᓯᔾᔮᙱᒻᒪᑦ. ᐱᖁᔨᕗᖔᕈᑎᑕᖃᖅᐹ ᐅᖃᑎᒃᓴᒧᑦ ᐃᓕᓴᖅᓯᔾᔪᑎᒥᒃ? ᒥᔅ ᐳᕈᔅᑐ. ᐱᖁᔨᕗᖔᕈᑦ 1 – 7(1): ᑎᒃᑯᐊᖅᓯᓂᖅ ᐅᖃᖅᑎᒥ ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᑎᑎᕋᖅᑎ. ᐱᒋᐊᖅᑎᑦᑎᕗᖓ ᐊᐃᑉᐱᖅᑕᐅᓪᓗᖓ ᒪᓕᒐᓕᐅᖅᑎᐅᔪᒧᑦ ᖃᒪᓂᑦᑎᐊᕐᒧᑦ ᑕᐃᕕᑦ ᔪᐊᓇᓯ, ᒪᓕᒐᓕᐅᖅᑎᐅᔪᖅ ᕿᑭᖅᑖᓘᑉ ᓂᒋᐊᓄᑦ ᐃᖏᖁᓪᓗᒍ ᐅᖃᖅᑎᐅᑉ ᐃᒃᓯᕙᐅᑕᖓᓄᑦ. ᖁᔭᓐᓇᒦᒃ. ᑎᑎᕋᖅᑎ: ᐱᖁᔨᕗᖔᕈᑎ ᓈᒻᒪᖕᒪᑦ. ᐱᖁᔨᕗᖔᕈᑎᒧᑦ. ᓈᒻᒪᒃᓴᖅᑐᑦ. ᓈᒻᒪᒃᓴᙱᑦᑐᑦ. ᑲᔪᓯᕗᖅ. >>ᐸᒃᑕᑐᖅᑐᑦ ᑎᑎᕋᖅᑎ: ᐊᐱᕆᕙᕋ ᐱᖁᔨᕗᖔᕈᑎᒥᒃ ᐱᒋᐊᖅᑎᑦᑎᓵᖅᑐᖅ ᑐᒡᓕᒋᓕᕐᓗᒍ ᐅᖃᖅᑎᒥᒃ ᐃᒃᓯᕙᐅᑕᖓᓄᙵᐅᔾᔨᖁᓪᓗᒋᑦ. ᐅᖃᖅᑎ: ᐃᖅᓱᖅᑏ, ᖃᐃᖁᕗᕋ ᑖᓐᓇ ᐃᖅᓱᒐᖅ ᖁᓛᓅᖅᑕᐅᖁᓪᓗᒍ. ᐃᖏᓪᓗᓯ. ᐅᖃᖅᑎᒋᔭᐅᓕᖅᑎᓪᓗᖓ ᑕᕝᕙᓂ ᒪᓕᒐᓕᐅᕐᕕᒻᒥ ᐅᐱᒍᓱᒻᒪᕆᑉᐳᖓ ᐊᒻᒪᓗ ᐱᒃᑯᒋᕗᖓ, ᒥᑭᓪᓕᑎᖅᓯᒪᕗᖓ. ᑐᙵᓱᖁᑦᓯᐊᖅᓱᒋᓪᓗ ᐳᓛᕆᐊᖅᓯᒪᔪᐃᑦ ᑕᕝᕗᖓ ᒪᓕᒐᓕᐅᕐᕕᒻᒧᑦ, ᓄᓇᕗᒻᒥᐅᓕᒫᓪᓗ ᓈᓚᒃᑐᑦ, ᑕᑯᓐᓇᖅᑐᑦ ᑕᓚᕖᓴᒃᑯᑦ, ᖃᕆᑕᐅᔭᒃᑯᓪᓗ. ᑐᙵᓱᑦᓯᐊᕆᑦᓯ. ᑖᓐᓇ ᓯᕗᓪᓕᖅᐹᒥᒃ ᑲᑎᒪᓂᖃᓪᓚᑦᑖᓕᕋᑦᑕ ᒪᓕᒐᓕᐅᖅᑏᑦ ᐊᖏᖅᓯᒪᑎᓪᓗᒋᑦ. ᖁᔭᓐᓇᒦᕈᒪᑦᓯᐊᕆᕙᒃᑲᑦᑕᐅᖅ ᑖᒃᑯᐊ ᐅᕙᓐᓂᒃ ᐅᑉᐱᕈᓱᑦᓱᑎᒃ ᑕᕝᕗᖓ ᒪᓕᒐᓕᐅᕐᕕᐅᑉ ᐅᖃᖅᑎᖓᓄᑦ ᐃᖏᑦᓯᔪᓐᓇᕋᑦᓯ. ᖁᔭᓐᓇᒦᑦᓯᐊᖅᐸᑦᓯ. ᐅᖃᖅᑎᐅᓂᐊᓕᖅᑎᓪᓗᖓ ᐊᖏᖅᓯᒪᕗᖓ ᐊᒻᒪᓗ ᑖᒃᑯᐊ ᐱᔪᓐᓇᐅᑎᕗᑦ ᐊᒻᒪᓗ ᓴᙱᓂᕆᔭᕗᑦ ᒪᓕᒐᓕᐅᖅᑎᐅᑎᓪᓗᑕ ᑕᕝᕙᓂ ᐃᒃᓯᕚᕐᓂᕆᓂᐊᖅᑕᑦᑎᓐᓂ, ᒪᓕᒐᓕᐅᖅᑎᓕᒫᑦᑕᐅᖅ ᐅᑉᐱᕆᔭᔅᓯ ᑖᒃᑯᐊ ᐱᓕᕆᐊᕆᓂᐊᖅᑕᔅᓯᓐᓂᒃ ᐊᒻᒪᓗ ᐅᕙᖓ ᐅᖃᖅᑎᐅᑎᓪᓗᖓ ᑖᒃᑯᐊ ᐊᖏᖃᑎᒌᑦᓯᐊᕐᓂᖃᕐᓂᐊᕋᑦᑕ ᐊᒻᒪᓗ ᐊᓪᓚᕝᕕᒋᔭᑦᑕ ᐱᓕᕆᐊᕆᒋᐊᖃᖅᑕᖏᓐᓂᒃ. ᓈᒻᒪᑦᓯᐊᖅᑐᒃᑯᑦ ᐊᒻᒪᓗ ᐊᔾᔨᒌᑦᓯᐊᖅᑐᒃᑰᓪᓗᑕ ᐊᑕᐅᑦᓯᒃᑯᑦ.

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 6 ᐅᓪᓛᖑᖅᑲᐅᔪᒥ ᑕᒪᐃᓐᓂᒃ ᒪᓕᒐᓕᐅᖅᑎᓕᒫᑦ ᑕᕝᕙᓂ ᐊᖏᖅᑎᑕᐅᖅᑲᐅᒻᒪᑕ ᐊᒻᒪᓗ ᐊᓪᓚᕝᕕᒋᔭᒻᒥᓄᑦ ᐱᓕᕆᓂᐊᕐᓂᕋᖅᓯᒪᓪᓗᑎᑦ. ᒫᓐᓇ ᐱᕕᖃᕈᒪᒋᕗᖓᑦᑕᐅᖅ ᑖᒃᑯᐊ ᕿᑭᖅᑖᓘᑉ ᓂᒋᐊᓂ ᐅᕙᓂ ᐃᑲᔪᖅᑐᐃᖏᓐᓇᖅᓯᒪᒻᒪᑕ ᒫᓐᓇᒧᑦ ᐅᓪᓗᒥᒧᑦ ᐊᒻᒪᓗ ᑕᒪᓐᓇ ᓂᕈᐊᕐᓇᖅ ᑲᔪᓯᓂᖃᑦᓯᐊᓚᐅᖅᑑᒐᓗᐊᖅ. ᐊᒻᒪᑦᑕᐅᖅ ᓱᓕ ᑭᙵᕐᒥᐅᓄᑦ ᑭᒻᒥᕈᒻᒥᐅᓪᓗ ᐅᖃᐅᑎᒍᓐᓇᖅᐸᑦᓯ ᓂᕆᐅᒋᔭᓯᓐᓂᒃ ᐊᒻᒪᓗ ᑭᒡᒐᖅᑐᐃᖏᓐᓇᕐᓂᐊᕋᒪ ᐃᓕᑦᓯᓐᓂᒃ, ᐅᖃᖅᑎᐅᒐᓗᐊᖅᑎᓪᓗᖓ ᐊᒻᒪᓗ ᑖᒃᑯᐊ ᐊᑲᐅᓈᖅᑐᒃᑯᑦ ᐱᓕᕆᐊᕆᒍᓐᓇᖅᑕᒃᑰᕙᖓ ᐊᑐᐃᓐᓇᕐᓂᐊᕋᒃᑭᑦ. ᒫᓐᓇᐅᔪᒥᑦᑕᐅᖅ ᐱᕕᖃᕈᒪᒋᕗᖓᑦᑕᐅᖅ ᐃᓚᐃᓵᕋᑖᖅᑐᓂᒃ ᐃᓕᓴᖅᓯᔪᒪᓪᓗᖓ, ᐱᓗᐊᖅᑐᒥᒃ ᑖᒃᑯᐊ ᐅᓖᐱᑲ ᐸᑭ ᒪᐃᒃ, ᑭᒡᒐᖅᑐᐃᔨᐅᖃᑦᑕᖅᓯᒪᓚᐅᕐᒪᑦ ᓄᓇᕗᑦ ᐊᒻᒪᓗ ᓄᓇᕗᒻᒥ ᒪᓕᒐᓕᐅᕐᕕᐅᑉ ᐊᓪᓚᕝᕕᖓᓂ ᐱᓕᕆᖃᑦᑕᓚᐅᖅᑐᖅ ᐊᒻᒪᓗ ᑕᐃᑲᓂ ᓄᓇᕗᑦ ᓴᖅᑭᓚᐅᖅᑎᓐᓇᒍ ᒪᓕᒐᓕᐅᖅᑎᐅᖃᑦᑕᓚᐅᕐᒪᑦ. ᐃᖅᑲᐅᒪᒍᒪᒋᕙᕋᑦᑕᐅᖅ ᐃᓚᐃᓵᓚᐅᕐᒪᑕ ᖃᐅᔨᒪᔭᐅᒻᒪᕆᑦᑐᖅ ᑖᓐᓇ ᑐᓵᔨᐅᖃᑦᑕᓚᐅᖅᑐᖅ ᐊᑏᒪ ᕼᐊᑦᓚᕆ. ᓯᕗᒃᑲᖅᑕᖅᑎᒋᔭᐅᑦᓯᐊᓚᐅᖅᓱᓂᓗ ᕿᑎᕐᒥᐅᓄᑦ. ᑕᕝᕙᓂ ᒪᓕᒐᓕᐅᕐᕕᒻᒥ ᑐᓵᔨᒋᔭᐅᖏᓐᓇᖃᑦᑕᓚᐅᕐᒪᑦ ᐃᓄᐃᓐᓇᖅᑐᑦ ᐊᒻᒪᓗ ᑲᔪᓯᓂᖃᑦᓯᐊᖃᑦᑕᓚᐅᖅᓱᓂ. ᐃᖅᑲᐅᒪᑦᓯᐊᖅᐸᕗᑦ ᐃᓚᑯᓗᖏᑦ ᐊᒻᒪᓗ ᐱᖃᓐᓇᕆᔭᖏᑦ ᑕᒪᐃᓐᓂᑦᓯᐊᖅ. ᒫᓐᓇᐅᔪᒥ ᑲᑎᒪᔾᔪᑎᓅᕐᓂᐊᓕᕋᑦᑕ. ᒫᓐᓇ ᑖᓐᓇ ᐊᓪᓚᑦᑎᒻᒪᕆᐅᔪᖅ ᒪᓕᒐᓕᐅᕐᕕᒻᒥ ᐊᐱᕆᔪᒪᕙᕋ ᑲᒥᓯᓇ ᐊᑐᐃᓐᓇᐅᒻᒪᖔᑦ ᑕᕝᕗᖓ ᐅᖃᕆᐊᖅᑐᕈᓐᓇᖁᓪᓗᒍ. ᒪᑐᐃᖅᓯᓂᖅ ᐅᖃᐅᓯᒃᑯᑦ ᓄᓇᕗᒻᒥ ᑲᒥᓯᓇ ᑲᒥᓯᓇ ᐄᕙ ᖃᒪᓂᖅ ᐋᕆᐊᒃ: ᒪᓕᒐᓕᐅᖅᑎᑦ, ᐃᖏᓪᓗᓯ. ᖁᔭᓐᓇᒦᒃ. ᐅᖃᖅᑎᑦᑎᔨ, ᓯᕗᓕᖅᑎ, ᒪᓕᒐᓕᐅᕐᕕᖕᒧᑦ ᒪᓕᒐᓕᐅᖅᑏᑦ, ᖃᐅᖁᔭᐅᓯᒪᔪᑦ ᐊᒻᒪ ᓄᓇᕗᒻᒥᐅᑦ ᑕᓚᕖᓴᒃᑯᑦ ᐃᕐᖐᓐᓇᖅ ᑕᐅᑐᒃᑐᑦ. ᐅᓪᓗᒃᑯᑦ, ᐃᓘᓐᓇᓯ. ᑕᐃᒪ ᐊᕐᕌᒍᑦ ᑎᓴᒪᐅᓕᖅᑐᑦ ᐊᓂᒍᖅᓯᒪᓕᖅᑐᑦ ᒪᑐᐃᖅᓯᓚᐅᖅᓯᒪᓂᓐᓂᒃ ᐅᖃᐅᓯᒃᓴᓂᒃ ᐅᖃᓕᒫᓚᐅᖅᓯᒪᕗᖓ. ᐊᕐᕕᒋᔭᖏᓐᓂᒃ ᒪᓕᒐᓕᐅᖅᑏᑦ ᑲᑎᒪᕐᔪᐊᕐᓂᖏᑦ ᑲᑎᕐᔪᐊᖅᑎᓪᓗᒋᑦ. ᑭᓯᐊᓂ ᑕᐃᔅᓱᒪᓂᐅᔪᖅ ᓄᕙᒡᔪᐊᕐᓇᕐᓂᐊᓘᓚᐅᖅᓯᒪᖕᒪᑦ ᐱᔾᔪᑎᒋᓪᓗᒍ ᑕᒪᓐᓇ ᑲᑎᒪᕕᒡᔪᐊᕐᕕᐅᑉ ᐳᓛᖅᑐᓄᑦ ᑕᒪᓐᓇ ᐃᒃᓯᕙᐅᑕᖅ ᒪᑐᓯᒪᓚᐅᖅᓯᒪᖕᒪᑦ. ᑭᓯᐊᓂᓕ ᐅᓐᓄᓴᐅᔪᖅ ᖁᕕᐊᓱᒻᒪᕆᒃᐳᖓ ᐊᒥᓱᑦ ᑕᒫᓃᑦᑐᓐᓇᕐᒪᑕ ᑕᑯᔭᖅᑐᖅᓯᒪᔪᑦ. ᑐᙵᓱᑦᑎᐊᕆᑦᑎ. >>ᐸᒃᑕᑐᖅᑐᑦ ᐊᒻᒪᓗ ᐅᓪᓗᒥᐅᖅᑲᐅᔪᖅ ᐊᒃᓱᐊᓗᒃ ᐅᐱᖅᑲᕗᖓ ᓄᓇᕗᒻᒥ 7−ᒋᔭᖓᓐᓂᒃ ᒪᓕᒐᓕᐅᖅᑏᑦ ᐊᖏᖅᑎᑦᑎᔪᓐᓇᖅᑲᐅᒐᒪ ᒪᓕᒐᓕᐅᖅᑎᓂᒃ. ᖃᐅᔨᒪᑦᑎᐊᖅᐳᖓᓗᑦᑕᐅᖅ ᓇᖕᒥᓂᖅ ᑕᒪᓐᓇ ᐊᑐᓚᐅᖅᓯᒪᓪᓗᒍ ᖃᓄᖅ ᐃᒃᐱᒍᓱᖅᑲᐅᒻᒪᖔᔅᓯ ᓄᑖᖑᔪᓯᒍᑦ ᐊᒻᒪᓗᑦᑕᐅᖅ ᐅᓄᖅᑐᓯᒍᑦ ᐃᒃᐱᒍᓱᒃᑐᒃᓴᐅᖅᑲᐅᒋᕗᓯ ᑕᐃᒪᓐᓇ. ᐃᓛᓯᒍᑦ, ᑐᒡᓕᐊᓂ ᐱᖓᔪᐊᓐᓂ ᑎᓴᒪᖓᓐᓂᓘᓐᓃᑦ ᐃᓕᒃᑲᓐᓂᖅᑐᓯ ᑕᕝᕗᖓ ᐃᒃᓯᕙᐅᑕᕆᔭᔅᓯᓐᓄᑦ. ᐊᒻᒪᓗ ᖁᔭᒋᑦᑎᐊᖅᐸᔅᓯ ᑕᐃᒪᙵᓂᑦ ᐊᖏᖅᓯᒪᑦᑎᐊᕋᔅᓯ ᓄᓇᕗᒻᒧᑦ, ᓄᓇᕗᒻᒥᐅᑕᓄᓪᓗ ᐱᔨᑦᑎᕈᒪᓪᓗᓯ. ᐊᒻᒪᑦᑕᐅᖅ ᐊᑕᐅᓯᐅᙱᒻᒥᔪᖅ ᓂᕈᐊᖅᑕᐅᓕᓵᖅᑐᑦ ᖁᔭᒋᒋᕙᔅᓯᑦᑕᐅᖅ ᓄᑖᑦ ᑕᐃᒃᑯᐊ ᑕᕝᕗᖓ ᐃᖏᑦᑐᑦ. ᐱᔭᕐᓂᙱᑦᑐᓂᒃ ᐅᖁᒪᐃᑦᑐᓂᒡᓗ ᐱᓕᕆᖃᑦᑕᕐᓂᐊᕋᓗᐊᖅᑐᓯ ᓂᕈᐊᖅᑕᐅᓂᓯᒪᓂᓯ ᐱᓪᓗᒍ. ᑕᒫᓂ ᐱᓇᓱᐊᕈᓯᕐᒥ, ᓂᕈᐊᕋᑖᕋᔅᓯ ᓯᕗᓕᖅᑎᒋᓂᐊᖅᑕᔅᓯᓐᓂᒃ ᐊᒻᒪ ᒥᓂᔅᑕᐃᑦ ᑲᑎᒪᔨᒋᓂᐊᖅᑕᖏᓐᓂᒃ. ᐱᖁᔨᕗᖔᕈᑎᑎᒍᓪᓗ ᑕᐃᒃᑯᐊ ᓂᕈᐊᖅᑕᓯ ᐅᓪᓗᒥ ᑲᑎᒪᕐᔪᐊᕐᓂᐅᔪᒥ ᐱᙳᖅᑎᑕᐅᓂᐊᖅᑐᑦ, ᓂᕆᐅᖅᑎᐊᖅᐳᖓᓗ ᖁᕕᐊᓱᒃᖢᖓ ᒥᓂᔅᑕᙳᕈᑎᓂᒃ ᐊᑎᓕᐅᕆᔪᓐᓇᕐᓂᐊᕋᒪ ᐅᐃᑦᑎᐊᕈ. ᑕᒫᓂ ᓄᓇᕗᒻᒥ ᐊᑭᕋᕇᙳᐊᕐᓂᖅᑕᖃᙱᑎᓪᓗᒍ ᒐᕙᒪᖃᕋᑦᑕ ᒪᓕᒐᓕᐅᕐᕕᐅᑉ ᐃᓗᐊᓂ, ᐱᕐᔪᐊᕌᓗᖕᓂᒃ ᐱᔭᒃᓴᖅᑖᖅᑐᖅᑎᑕᐅᕗᑦ, ᖃᐅᔨᒪᑦᑎᐊᖅᐳᖓᓗ ᐊᑑᑎᓕᕐᔪᐊᓂᒃ ᑐᓂᓯᖃᑦᑕᕐᓂᐊᕐᓂᔅᓯᓐᓂᒃ ᑲᑎᒪᕐᔪᐊᖅᑎᓪᓗᓯ ᑕᕝᕙᓂ ᒪᓕᒐᓕᐅᕐᕕᖕᒥ ᓂᕈᐊᖅᑕᐅᓯ ᐃᓱᓕᓐᓇᓱᖕᓂᖓᓄᑦ ᑎᑭᓪᓗᒍ ᐊᒃᓱᕈᖃᑦᑕᕐᓂᐊᕋᔅᓯ ᑕᕝᕙᓂ ᐃᒃᓯᕚᖅᑎᓪᓗᓯ.

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 7 ᐱᓇᓱᐊᕈᓯᕐᓂᒃ ᑕᖅᑭᕐᓂᒃᓗ ᐊᒡᒋᖅᑐᓂᒃ, ᓵᙵᓗᐊᙳᐊᕐᓂᐊᖅᑐᓯ ᖃᓄᐃᑦᑐᓂᒃ ᐱᔭᒃᓴᖅᑖᕐᓂᐊᕐᒪᖔᑦ ᒐᕙᒪᐅᓕᖅᑐᖅ ᓯᕗᒧᐊᒍᑎᒃᓴᓂᒃ ᐊᑐᖅᑕᐅᓛᖅᑐᓂᒃ ᑕᐅᕗᖓ ᑎᑭᓪᓗᒍ ᐃᓱᓕᑦᑎᓂᖅᓯ ᐃᓱᓕᕝᕕᒃᓴᔅᓯᓐᓄᑦ. ᐊᒻᒪᑦᑕᐅᖅ ᖃᐅᔨᒪᔪᒃᓴᐅᒋᕗᓯ, ᑕᒪᓐᓇ ᑲᒥᓴᓇᐅᓂᕋ ᐃᓱᓕᑉᐸᓪᓕᐊᓂᐊᓕᕐᒥᖕᒪᑦ ᐊᕐᕌᒍ ᓄᑖᖅ ᐱᒋᐊᓕᖅᐸᑦ, ᓂᕆᐅᒃᐳᖓᓗ ᑭᖑᕝᕕᖅᑎᒋᓂᐊᖅᑕᓐᓂᒃ ᑐᙵᓱᒃᑎᑦᑎᑦᑎᐊᓛᕐᒥᔪᓯ. ᒫᓐᓇ ᐱᕕᖃᕐᓂᓐᓂ, ᐅᖃᓚᐅᑲᒍᒪᕗᖓ ᐃᓚᒋᔭᐅᖅᑕᕗᑦ ᖃᑦᑕᕋᑖᖅᑐᑦ ᖁᔭᒋᔪᒪᓪᓗᒍ, ᐱᓗᐊᖅᑐᒥᒃ ᐅᓖᐱᑲ ᐅᕿ ᐅᐃᓕᐊᒻᔅ, ᑕᐃᓐᓇ ᑲᒥᓴᓇᐅᑉ ᑐᒡᓕᑯᓗᒋᓚᐅᖅᑕᖓ ᑎᓯᐱᕆ 2019−ᒥᑦ ᑕᐅᕗᖓ ᐃᓅᔪᓐᓃᕐᓂᖓ ᑎᑭᖦᖢᒍ ᑐᒡᓕᐅᓚᐅᕐᒪᑦ ᑲᒥᓯᓇᐅᔪᒧᑦ. ᖁᔭᒋᑦᑎᐊᖅᐸᕋ. ᐊᒻᒪᑦᑕᐅᖅ ᖁᔭᒋᔪᒪᓪᓚᕆᖕᒥᔭᕋ ᒫᓐᓇ ᑲᒥᓴᓇᐅᑉ ᑐᒡᓕᕆᓕᖅᑕᖓ, ᓘ ᕕᓕᑉ ᐊᒃᓱᕈᖅᖢᓂ ᐃᖅᑲᓇᐃᔭᖃᑦᑕᕐᒪᑦ ᑎᑎᕋᕐᕕᑦᑎᓐᓂᒃ ᐃᑲᔪᖅᖢᓂ. ᐊᒻᒪᓗᑦᑕᐅᖅ ᐅᖃᕈᒪᒋᕗᖓ ᐅᐱᒋᕐᔪᐊᖅᐸᕋ ᓄᓇᕗᒻᒧᑦ ᑲᒥᓴᓇᐅᕋᑖᕐᓂᕋ. ᑕᐃᒪᙵᓕᒫᖅ ᖁᕕᐊᓱᒃᐳᖓ ᑎᒃᑯᐊᖅᑕᐅᔪᓐᓇᓚᐅᕋᒪ. >>ᐸᒃᑕᑐᖅᑐᑦ ᐊᕐᕌᒍᑦ ᑕᓪᓕᒪᑦ ᐊᓂᒍᕇᕐᒪᑕ ᕿᓚᒥᐊᓗᒃ. ᐊᒥᓱᓄᑦ ᑲᔾᔮᕐᓇᖅᑐᐊᓗᖕᓄᑦ ᓄᓇᓕᖁᑎᔅᓯᓐᓄᑦ ᐅᐸᖃᑦᑕᓚᐅᖅᐳᖓ, ᐳᓛᖃᑦᑕᓚᐳᖅᓯᒪᕗᖓ ᐊᒥᓱᓂᒡᓗ ᓄᓇᖅᑲᑎᒌᓂᒃ ᐃᓅᖃᑎᒌᓂᒃ ᑲᑎᖃᑦᑕᖅᖢᖓ. ᐱᕕᖃᖅᑎᑕᐅᖃᑦᑕᓚᐅᕐᓂᕋ ᓄᓇᕗᒻᒥᐅᓂᒃ ᐃᑲᔪᖅᓯᒪᕐᔪᐊᑐᓂᒃ ᐃᓕᓴᖅᓯᔾᔪᑎᓂᒃ ᑐᓂᓯᖃᑦᑕᓚᐅᕋᒪ ᐱᓕᕆᐊᒃᓴᓐᓂᒃ ᑕᒪᓐᓇ ᐊᑐᖅᖢᒍ ᖁᕕᐊᒋᓂᖅᐹᕆᖃᑦᑕᓚᐅᖅᑕᕋ. ᓇᓗᓇᐃᖅᓯᔪᒪᒋᕗᖓ ᓱᓕ ᒫᓐᓇᐅᔪᖅ ᖁᔭᓐᓇᒦᕈᒪᓪᓗᒍᓗ ᐅᖃᖅᑎᑦᑎᔨᐅᓚᐅᖅᑐᖅ ᑑᓂ ᐋᖁᐊᖅ, ᐅᐊᑦᑎᐊᖅ ᑕᑯᔪᓐᓇᖅᑲᐅᒐᒃᑯ, ᑕᐃᑲᓃᖦᖢᓂᓗ. ᐅᖃᖅᑎᑦᑎᔨᐅᑎᓪᓗᒍ ᓄᓇᓕᖕᓄᐊᖃᑎᒋᖃᑦᑕᓚᐅᕋᒃᑯ ᑕᐃᔅᓱᒪᓂ ᑭᒃᑯᓕᒫᓄᑦ ᑕᑯᔭᖅᑐᖅᑎᑦᑎᕙᒃᖢᑕ ᑕᒪᒃᑯᓂᖓ ᒪᓕᒐᓕᐅᕐᕕᐅᑉ ᐃᖅᓱᒐᖓᓂᒃ. ᖁᔭᓐᓇᒦᒃ. ᐃᓅᓪᓗᑕ ᓄᓇᕗᒻᒥᐅᑕᐅᓪᓗᑕᓗ, ᑕᒪᓐᓇ ᐃᓱᓕᑦᑎᔾᔪᑎᒋᓪᓗᒍ ᐊᒃᓱᐊᓗᒃ ᐅᐱᒋᔭᕗᑦ ᒥᐊᓕ ᓴᐃᒪᓐ, ᑎᒃᑯᐊᖅᑕᐅᓚᐅᕐᓂᖓᓄᑦ ᑲᓇᑕᒥ ᑭᖕ ᓵᓕ ᑭᒡᒐᑦᑐᐃᔨᖓᓂᒃ ᐃᓕᔭᐅᑎᓪᓗᒍ ᐊᒻᒪᑦᑕᐅᖅ ᖃᓄᐃᖏᑦᑎᐊᖁᔪᓇᖅᐳᖅ ᑕᒪᓐᓇ ᑕᐃᒪᓐᓇ ᑭᖕ ᑭᒡᒐᖅᑐᖅᑎᓪᓗᒍ. ᑕᐃᒪ ᒫᓐᓇ ᓇᓗᓇᐃᖅᓯᔪᒪᓕᕆᕗᖓ ᒪᑐᐃᖁᓪᓗᒍ ᓯᕗᓪᓕᖅᐹᒥᒃ ᑲᑎᒪᕐᔪᐊᕐᓂᖓ 7−ᒋᔭᖓᓂ ᒪᓕᒐᓕᐅᖅᑏᑦ. ᖁᔭᓐᓇᒦᒃ. >>ᐸᒃᑕᑐᖅᑐᑦ ᐅᖃᖅᑎ: ᓇᑯᕐᒦᒃ. ᑲᑎᒪᔾᔪᑎᑦᑎᓐᓄᑦ ᐅᑎᕐᓂᐊᓕᕐᒥᒐᑦᑕ. ᓈᓴᐅᑎᖓ 3, ᒥᓂᔅᑕᐃᑦ ᐅᖃᐅᓯᒃᓴᖏᑦ. ᑖᒃᑯᐊ ᒥᓂᔅᑕᐅᔪᑦ ᓱᓕ ᐊᖏᖅᑎᑕᐅᓚᐅᙱᒻᒪᑕ ᒥᓂᔅᑕᐅᓂᕐᒥᓄᑦ. ᒫᓐᓇ ᒥᓂᔅᑕᐃᑦ ᐅᖃᐅᓯᒃᓴᖃᔾᔮᙱᑦᑐᑦ. ᑲᑎᒪᔾᔪᑎ 4: ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ ᐅᖃᖅᑎ: ᑲᑎᒪᔾᔪᑎ 4, ᒪᓕᒐᓕᐅᖅᑏᑦ ᐅᖃᐅᓯᖏᑦ. ᑕᕝᕗᖓ ᒪᓕᒐᓕᐅᖅᑏᑦ ᐅᖃᐅᓯᖏᓐᓅᓚᐅᖅᑳᖅᑎᓐᓇᖓ ᐃᖅᑲᐃᑎᑦᓯᒋᐊᕈᒪᕗᖓ ᐃᓵᒍᓐᓇᕈᑦᓯ, ᒪᓕᒐᓕᐅᖅᑏᑦ, ᓇᓗᓇᐃᕐᓗᓯ ᑕᕝᕙᓂ ᐅᖃᐅᓯᒃᓴᖃᕈᓐᓇᕈᑦᓯ ᐊᒻᒪᓗ ᐃᓕᓴᕆᒍᒃᑭᑦ ᑖᓐᓇ ᖃᐅᒪᔪᖅ ᓯᕗᓂᓐᓃᑦᑐᖅ ᐃᑭᖃᑦᑕᕐᓂᐊᖅᑐᖅ ᖃᓂᕐᒨᕐᓇᐅᑏᑦ ᓂᐱᖃᓕᕐᓂᐊᕐᒪᑦ ᖃᐅᔨᒪᓂᐊᕋᑦᓯ. ᐊᓱᐃᓪᓛᒃ ᓂᑯᕕᓪᓗᓯ ᐅᖃᓪᓚᒍᓐᓇᖅᓯᓂᐊᖅᐳᓯ. ᐱᐊᓂᒃᑯᑦᓯᓗ ᐃᖏᓪᓗᓯ. ᐃᓕᓴᕆᖅᑳᕐᓗᒍ ᐃᖃᓗᐃᑦ−ᑕᓯᓗᖕᒧᑦ ᒪᓕᒐᓕᐅᖅᑎ, ᒥᔅᑕ ᕼᐃᒃᔅ.

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 8 ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 1 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐃᖃᓗᐃᑦ−ᑕᓯᓗᒃ ᑭᒡᒐᖅᑐᕐᓂᐊᕐᓗᒍ ᕼᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ ᐅᖃᖅᑏ, ᐅᐱᒍᓱᑦᑎᐊᖅᐳᖓ ᑖᒃᑯᓂᖓ ᐅᖃᖅᑎᒧᑦ ᐃᒃᓯᕚᖅᑎᑕᐅᒐᕕᑦ. ᐃᑉᐸᒃᓴᖅ ᐅᖃᓚᐅᕋᒪᐃᓛᒃ ᐊᒃᓱᐊᓗᒃ ᐅᐱᓐᓇᖅᑐᖅ ᑕᑉᐱᑲᓂ ᒪᓕᒐᓕᐅᕐᕕᖕᒥ ᐅᖃᖅᑎᐅᓪᓗᓂ. ᐱᓕᕆᑦᑎᐊᕐᓂᐊᖅᑐᑎᑦ ᖃᐅᔨᒪᔪᖓ. ᐅᖃᖅᑏ, ᑕᒫᓃᒃᑲᔭᙱᓐᓇᑦᑕ ᐃᓚᕗᑦ ᑕᒫᓃᙱᑉᐸᑦ. ᖁᔭᓐᓇᒦᕈᒪᔪᖓ ᐊᒃᓱᐊᓗᒃ ᑕᐃᒃᑯᐊ ᓄᓕᐊᕋ ᓯᑦᓂ ᐊᒻᒪ ᑎᓴᒪᐃᓪᓗ ᕼᐆᑉ, ᔪᐊᑕᓐ, ᐅᐃᓕ ᐊᒻᒪᓗ ᑕᐃᒃᑯᐊ ᐸᓂᒋᑲᐃᓐᓇᖅᑕᖓ ᑕᒫᓃᙱᑎᓪᓗᖓ ᓯᕗᓪᓕᖅᐹᒥ ᓂᕈᐊᖅᑕᐅᒐᔭᙱᑦᑐᖓ, ᑎᓴᒪᒋᓕᖅᑕᖓᓂ ᓂᕈᐊᖅᑕᐅᓯᒪᒐᒪ. ᐅᖃᖅᑏ, ᒫᓐᓇᐅᓂᖓᓂ ᐊᑖᑕᒐ ᖁᔭᓐᓇᒦᕈᒪᔭᕋ ᔪᐊᔾ ᐊᖏᔪᖅᑎᖅ ᐊᒻᒪ ᐹᓖᓐ ᓄᓕᐊᖓ. ᐅᖃᐅᑎᖃᑦᑕᕐᒪᑕ ᐅᖃᐅᔾᔨᒋᐊᖅᑎ ᐅᕙᓐᓂᒃ ᐊᖓᔪᖅᑳᕆᓪᓗᒍᓗ ᒐᕙᒪᓕᕆᓂᕐᒧᑦ. ᖁᔭᓐᓇᒦᑦᑎᐊᖅᐸᕋ ᐅᖃᐅᔾᔨᒋᐊᖃᑦᑕᕐᒪᑦ ᐊᒃᓱᐊᓗᒃ ᐅᕙᓐᓂᒃ ᑕᐃᒪᙵᑦ ᒪᓕᒐᓕᐅᖅᑎᐅᓕᕋᒪ, ᐃᑲᔪᖅᑐᐃᖃᑦᑕᕐᒪᑦ ᐅᕙᓐᓂᒃ ᐃᑲᔪᖃᑦᑕᖅᓯᒪᓪᓗᓂ. ᐅᓪᓗᒥ ᑕᐃᒪᐃᑦᑑᓂᕋ ᒪᓕᒃᖢᒍ ᐊᒻᒪᓗᑦᑕᐅᖅ ᐊᓈᓇᒐ ᖁᔭᓐᓇᒦᖅᐸᕋ ᑭᐅᕈᓪ, ᐅᐊᖓᓗ ᐹᓪ. ᐊᒃᓱᐊᓗᒃ ᐱᕈᖅᓴᐃᑦᑎᐊᖅᓯᒪᖕᒪᑕ ᐊᓐᓂᕐᓇᖅᑐᓂᒃ ᐃᓕᓴᐃᖃᑦᑕᖅᓯᒪᖕᒪᑕ ᐅᕙᓐᓂᒃ. ᐅᓪᓗᒥ ᐃᓅᓯᕆᓕᖅᑕᕋ ᐊᖑᑕᐅᓪᓗᖓ ᐱᐅᓂᖅᐹᖑᙱᑦᑐᖓ ᑭᓯᐊᓂ ᖃᐅᑕᒫᑦ ᐱᑦᑎᐊᖏᓐᓇᕋᓱᖃᑦᑕᖅᑐᖓ ᕿᑎᕐᖓᒃᑲ ᐅᐱᒍᓱᖕᓂᐊᕐᒪᑕ ᐅᕙᓐᓂᒃ. ᐅᖃᖅᑏ, ᐅᖃᙱᒃᑯᒪ ᒫᓐᓇᐅᔪᖅ ᖁᔭᓐᓇᒦᕈᒪᔭᒃᑲ ᓂᕈᐊᖅᑎᒋᓯᒪᔭᒃᑲ ᑖᒃᑯᐊ ᐊᓯᔾᔨᓚᐅᕐᒪᑕ ᓂᕈᐊᕐᕖᑦ ᑭᒡᓕᒋᔭᖏᑦ. ᓄᑖᖑᓕᕐᒪᑕ ᓂᕈᐊᖅᑎᒋᔭᒃᑲ ᐊᕐᕌᒍᒋᔭᑦᑎᓐᓂ ᑕᐃᒃᑯᐊ 500−ᓄᑦ ᐹᓄᑦ ᐃᓯᑲᑕᓚᐅᕋᒪ. ᑕᖃᓇᖅᑑᒐᓗᐊᖅ ᑭᓯᐊᓂ ᐊᒃᓱᐊᓗᒃ ᐅᐱᓐᓇᖅᖢᓂ ᐅᖃᖅᑏ, ᐅᓄᖅᑑᓪᓗᑕ ᑕᕝᕙᓂ ᑕᐃᒪᐃᓚᐅᕋᑦᑕ ᐃᒃᐱᒍᓱᖃᑕᐅᔪᒃᓴᐅᕗᓯ ᓂᕈᐊᖅᑎᒋᓯᒪᔭᕗᑦ ᑭᓱᓂᒃ ᐱᖁᔨᖕᒪᖔᑕ, ᐃᓕᑉᐹᓪᓕᕈᑎᒋᓚᐅᕋᑦᑎᒍᑦ ᒪᓕᒐᓕᐅᕐᕕᖕᒥ. ᐊᒻᒪᓗᑦᑕᐅᖅ ᒪᓕᒐᓕᐅᖅᑎᐅᖃᑎᒃᑲ ᑕᕝᕙᓂ ᐅᐱᒋᔭᒃᑲ ᑎᒃᑯᐊᖅᑕᐅᓚᐅᕋᒪ ᐊᐅᓚᑦᑎᔨᑦ ᒥᓂᔅᑕᐃᑦ ᑲᑎᒪᔨᖏᓐᓄᑦ ᖁᔭᓐᓇᒦᖅᑕᒃᑲ ᐊᒃᓱᐊᓗᒃ ᑕᕝᕗᙵᖃᑕᐅᒐᒪ. ᓯᕗᓪᓕᕐᒥ ᑕᕝᕙᓂ ᒪᓕᒐᓕᐅᖅᑎᐅᑎᓪᓗᖓ ᑕᕝᕙᓂ ᐊᒃᓱᐊᓗᒃ ᓴᙱᔫᑎᐅᖕᒪᑕ ᑕᕝᕙᓂ. ᐅᐱᒍᓱᑦᑎᐊᖅᑐᖓ ᐃᓘᓐᓇᔅᓯᓐᓂᒃ ᐅᐱᒍᓱᑦᑎᐊᖅᑐᖓ ᒥᓂᔅᑕᐅᖃᑎᒋᓕᖅᑕᓐᓂᒃ ᐊᒃᓱᑲᓪᓚᒃ ᐊᒃᓱᕈᕐᓇᖅᑐᓂᒃ ᓯᕗᓂᒃᓴᖃᕋᑦᑕ ᐱᓕᕆᐊᒃᓴᖃᕐᓂᐊᕋᑦᑕᓗ. ᐅᐱᒍᓱᒍᒪᓪᓗᖓ ᐃᓘᓐᓇᓯ ᑎᒃᑯᐊᖅᑕᐅᒐᔅᓯ ᐊᒻᒪᓗᑦᑕᐅᖅ ᓂᕆᐅᑦᑎᐊᖅᐳᖓ ᐃᖅᑲᓇᐃᔭᖃᑎᒌᑦᑎᐊᕐᓂᐊᕋᔅᓯ ᐊᕐᕌᒎᓂᒃ ᑎᓴᒪᓄᑦ ᐊᒡᒋᖅᑐᓄᑦ. ᖁᔭᓐᓇᒦᒃ, ᐃᒃᓯᕙᐅᑕᖅ. >>ᐸᒃᑕᑐᖅᑐᑦ ᐃᒃᓯᕙᐅᑕᖅ: ᖁᔭᓐᓇᒦᑦᑕᐅᖅ. ᐊᑎᖁᑎᒃᑲ ᒪᓕᓪᓗᒋᑦ, ᐃᖃᓗᑦᑑᑦᓯᐊᕐᒧᑦ ᒪᓕᒐᓕᐅᖅᑎ, ᒪᓕᒐᓕᐅᖅᑎ ᐲᑕᓴᓐ. ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 2 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐃᖃᓗᒃᑑᑦᑎᐊᖅ ᑭᒡᒐᖅᑐᕐᓂᐊᕐᓗᒍ ᐸᑐᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᒫᓐᓇ ᐱᒋᐊᕐᓂᖓᓂ ᐅᐱᒍᓱᒃᑐᖓ ᐃᓕᖕᓄᑦ ᐅᖃᖅᑎᐅᓕᕋᕕᑦ ᐅᐱᒋᕙᒋᑦ ᐊᒻᒪ ᒥᔅᑕ ᒪᐃᓐ ᓯᕗᓕᖅᑎᐅᓕᕐᒪᑦ 7−ᒋᓕᖅᑕᖓᓂ ᒪᓕᒐᓕᐅᖅᑏᑦ ᑲᑎᒪᔨᖓᓄᑦ. ᐅᐱᒍᓱᑦᑎᐊᖅᐳᖓ 8−ᖑᔪᑦ ᑕᐃᒃᑯᓂᖓ ᒥᓂᔅᑕᐃᑦ ᑲᑎᒪᔨᖏᓐᓄᑦ ᓂᕈᐊᖅᑕᐅᔪᓄᑦ. ᐊᒻᒪᓗᑦᑕᐅᖅ ᑖᒃᑯᐊ ᐃᖃᓗᒃᑑᑦᑎᐊᕐᒥᐅᑕᐃᑦ ᑕᐃᒃᑯᐊ ᓂᕈᐊᓚᐅᖅᑐᑦ ᐅᕙᓐᓂᒃ ᑕᑎᖃᕐᒪᑕ ᖁᔭᓐᓇᒦᑦᑎᐊᖅᐸᒃᑲ ᒪᓕᒐᓕᐅᖅᑎᙳᖅᑎᑕᐅᒐᒪ. ᐊᒻᒪᓗ ᓄᓕᐊᕋᓗ ᐃᓚᒃᑲᓗ ᖁᔭᓐᓇᒦᖅᑕᒃᑲ ᑕᕝᕙᓂ ᓂᕈᐊᒐᒃᓴᐅᑎᓪᓗᖓ ᐃᑲᔪᐃᓐᓇᖃᑦᑕᖃᑦᑕᓚᐅᕐᒪᑦ, ᐃᑲᔪᖅᑕᐅᑎᓐᓇᖓ ᑕᕝᕙᓃᒃᑲᔭᙱᑦᑐᖓ. ᐅᖃᖅᑏ, ᐊᑎᕋ ᐃᓕᓚᐅᙱᓐᓇᒃᑯ ᒥᓂᔅᑕᐃᑦ ᑲᑎᒪᔨᖏᓐᓂ ᐃᖃᓗᒃᑑᑦᑎᐊᕐᒧᑦ ᒪᓕᒐᓕᐅᖅᑎᖃᖁᔭᐅᓚᐅᕐᒪᑕ ᒪᓕᒐᓕᐅᖅᑎᑐᐃᓐᓇᕐᒥᒃ. ᒐᕙᒪᒃᑯᑦ ᑭᒡᒐᖅᑐᖅᑎᖏᓐᓂ ᑕᒪᒃᑯᓂᖓ ᐊᐱᖅᓱᖃᑦᑕᕐᓂᐊᕋᒃᑭᑦ ᐊᒃᓱᕈᕐᓇᖅᑐᓂᒃ. 7−ᒋᓕᖅᑕᖓᓂ ᒪᓕᒐᓕᐅᖅᑎᐅᖃᑕᐅᑎᓪᓗᖓ ᐊᒃᓱᕈᕐᓇᖅᑐᓂᒃ ᐊᐱᕆᖃᑦᑕᕐᓂᐊᖅᑐᖓ ᓈᓚᖃᑦᑕᕐᓂᐊᖅᐳᖓ

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 9 ᐊᒻᒪᓗᑦᑕᐅᖅ ᐅᖃᓪᓚᖃᑦᑕᕐᓂᐊᖅᑐᖓ ᑭᐅᔭᐅᔪᒪᑦᑎᐊᕐᓗᖓ ᓂᕈᐊᖅᑎᒋᓯᒪ ᐱᔪᒪᔭᖏᑦ ᒪᓕᒡᓗᒋᑦ. ᑕᐃᒪᓐᓇ ᑕᕝᕙ ᑭᒡᒐᖅᑐᐃᖁᔨᓯᒪᔪᑦ ᐅᕙᓐᓂᒃ. ᐃᑲᔪᖅᑐᐃᓂᐊᕐᒥᔪᖓ ᕿᑎᕐᒥᐅᓂᒃ ᑕᐃᒃᑯᐊ ᒐᕙᒪᒃᑯᓐᓂᒃ ᑮᓇᐅᔭᓂᒃ ᑐᓂᔭᐅᖃᑦᑕᖁᓪᓗᒋᑦ ᐊᑯᓂᓗᐊᕌᓗᒃ ᑖᒃᑯᐊ ᓄᓇᖁᑎᒋᔭᕗᑦ ᑮᓇᐅᔭᓂᒃ ᑕᑯᓯᒪᙱᒻᒪᑕ ᐱᖁᑎᕐᔪᐊᖅᑖᕈᑎᓂᒃ ᐊᒻᒪ ᐊᖓᔪᖅᑳᖃᕐᕖᓪᓗ ᐊᓯᖏᓐᓄᓪᓗ ᐃᓕᓯᓯᒪᙱᒻᒪᑕ ᐊᑯᓂ. ᐊᑦᑕᓇᔾᔭᐃᖅᓯᒪᓂᖅ, ᓂᕿᖃᑦᑎᐊᕐᓂᕐᓗ, ᐱᖁᑎᕐᔪᐊᖅᑖᒃᑲᓐᓂᕐᓂᕐᓗ ᐊᔾᔨᒌᒥᓗ ᒐᕙᒪᒃᑯᑦ ᐊᐅᓚᓂᖏᓐᓂᒃ ᐱᓂᐊᕐᕕᖃᖅᑎᐅᓗᑎᒃ ᑕᐃᒪᓐᓇ ᓂᕿᑦᑎᐊᕙᖃᖃᑦᑕᕐᓗᑕ ᓂᖀᓪᓗ ᐊᔪᖅᓴᙱᓐᓂᖅᓴᐅᓗᑎᒃ, ᐃᒡᓗᖃᑦᑎᐊᕐᓂᕐᓗ ᑕᒪᒃᑯᐊ ᐊᒃᓱᕉᑎᒋᓂᐊᖅᑕᒃᑲ. ᐊᒻᒪᓗᑦᑕᐅᖅ ᑕᒪᒃᑯᐊ ᒐᕙᒪᒃᑯᑦ ᓴᖅᑭᔮᑦᑎᐊᖏᓐᓇᖁᓪᓗᒋᑦ ᑭᐅᔪᓐᓇᑦᑎᐊᕐᓗᑎᒡᓗ ᐃᓄᖕᓄᑦ. ᒐᕙᒪᒃᑯᑦ ᐱᓕᕆᕕᓕᒫᖏᑦ ᑖᒃᑯᓂᖓ ᑕᐃᒪᓐᓇ ᐱᔭᕆᐊᖃᕐᓂᐊᕐᒥᔪᑦ ᑕᒪᒃᑯᐊ ᑕᒻᒪᖅᓯᒪᔪᖅᓯᐅᖅᑎᒃᑯᓐᓄᑦ ᖃᐅᔨᓴᖅᑕᐅᓚᐅᖅᑎᓪᓗᒋᑦ ᐱᐅᔪᒥᒃ ᓴᖅᑭᑦᑎᖃᑦᑕᖁᓪᓗᒋᑦ. ᑕᐃᒪᓐᓇ ᐱᕚᓪᓕᖁᓪᓗᒋᑦ ᐅᕙᒍᑦ 7−ᒋᓕᖅᑕᖓᓂ ᒪᓕᒐᓕᐅᖅᑏᑦ ᓄᓇᕗᒻᒥ ᑕᐃᒪᓐᓇ ᐱᖁᓪᓗᒋᑦ. ᖁᔭᓐᓇᒦᒃ, ᐅᖃᖅᑏ. >>ᐸᒃᑕᑐᖅᑐᑦ ᐅᖃᖅᑎ: ᖁᐊᓇ. ᐊᑎᖁᑎᒃᑲ ᒪᓕᓪᓗᒋᑦ, ᐃᖃᓗᐃᑦ ᒪᓂᕋᔭᖕᒧᑦ ᒪᓕᒐᓕᐅᖅᑎ, ᒥᔅ ᕼᐄᓕ ᐊᕿᐊᕈᖅ. ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 3 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐃᖃᓗᐃᑦ−ᒪᓂᕋᔭᒃ ᑭᒡᒐᖅᑐᕐᓂᐊᕐᓗᒍ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑕᖅ. (ᑐᓵᔨᑎᒍᑦ) ᐅᐱᒋᑦᑎᐊᖅᐸᒋᑦᑕᐅᖅ ᐅᖃᖅᑎᙳᕋᕕᑦ, ᓂᕈᐊᖅᑕᐅᓚᐅᕋᕕᑦ ᐅᖃᖅᑎᐅᓂᕐᒧᑦ. ᓯᕗᓪᓕᖅᐹᒥ ᐃᖃᓗᖕᒥᐅᓂᒃ ᖁᔭᓐᓇᒦᕈᒪᔪᖓ ᓂᕈᐊᖅᑎᐅᔪᓂᒡᓗ ᒪᓕᕋᔭᖕᒥ ᐃᖃᓗᖕᓂ ᐊᒃᓱᐊᓗᒃ ᑕᑎᒋᔭᐅᖕᒪᑦ. ᐅᐱᑦᑎᐊᖅᑐᖓ ᑕᒫᓃᑦᑕᕆᐊᒃᓴᖅ ᓂᐱᒋᔭᐅᓂᐊᕐᓗᖓ ᐃᓱᒫᓘᑎᒋᔭᐅᔪᓂᒃ ᐊᒻᒪ ᓂᕆᐅᒋᔭᖓᓂᒃ ᐃᓄᖁᑎᑦᑕ ᒪᓕᒐᓕᐅᕐᕕᖕᒥ. ᐅᐱᑦᑎᐊᖅᑐᖓ ᐊᒃᓱᕈᑦᑎᐊᖅᖢᖓ ᐅᐱᒍᓱᒃᐳᖓ, ᐅᐱᒍᓱᑦᑎᐊᕈᒪᕗᖓ ᒥᓂᔅᑕᐅᖃᑎᒋᔭᑦᑎᓐᓂᒃ ᐊᒻᒪᓗ ᑕᐃᒃᑯᐊ ᓂᕈᐊᖅᑕᐅᕋᑖᖅᑐᑦ ᓂᕈᐊᖅᑕᐅᒃᑲᓐᓂᖅᑐᓪᓗ ᐃᓕᓐᓂᐊᓚᐅᕋᑦᑕ ᐃᓕᑉᐹᓪᓕᖅᖢᑕ ᓴᙱᓂᑦᑎᓐᓂᒃ. ᑕᐃᒪᓐᓇ ᐃᖅᑲᓇᐃᔭᖃᑎᖃᑦᑎᐊᕈᒪᕗᖓ ᑕᒪᒃᑯᓂᖓ ᐊᖏᖅᓯᒪᓂᕗᑦ ᓄᓇᕗᒻᒥᐅᓄᑦ ᐊᑐᕐᓗᒋᑦ. ᐊᒻᒪᓗᑦᑕᐅᖅ ᐃᓕᓴᖅᓯᔪᒪᓪᓗᖓ ᐃᓚᒃᑲ, ᐊᖓᔪᖅᑳᒃᑲ ᒍᕋᐃᒡ ᐊᒻᒪᓗ ᓯᓪᕕᐊ ᕼᐄᓕ, ᐅᐃᒐ ᔭᐃᓴᓐ ᐊᕿᐊᕈᖅ ᐊᒻᒪᓗ ᕿᑐᕐᖓᒃᑲ ᔩᓚ ᖃᑦᑑᕋᐃᓐᓄᒃ, ᐋᒪᐃᔭ ᖃᒪᓂᖅ ᐊᒻᒪ ᐃᓚᕗᑦ ᐅᓄᖅᑐᐃᑦ, ᒪᒃᑯᒃᑐᑦ ᐃᓐᓇᑐᖃᐃᓪᓗ ᓴᓂᑦᑎᕐᒥᐅᕕᓪᓗ ᑕᒪᒃᑯᐊ ᐅᖃᐅᓯᕆᔭᖏᑦ ᐊᓐᓂᕆᑦᑎᐊᕋᒃᑭᑦ. ᖁᔭᓐᓇᒦᑦᑎᐊᕈᒪᔪᖓ ᐊᑭᓕᖅᓱᖅᑕᐅᒍᑎᒃ ᑕᐃᒃᑯᓂᖓ ᐃᑲᔪᖅᑐᓚᐅᖅᑐᓂᒃ ᐃᓚᕗᑦ ᐱᖃᓐᓂᕆᔭᒃᑲᓗ ᐃᑲᔪᖅᑐᐃᓚᐅᖅᑐᓂᒃ ᓂᕈᐊᒐᒃᓴᐅᑎᓪᓗᖓ. ᐊᒃᓱᕈᖅᖢᑎᒃ ᑕᐃᒪᓐᓇ ᐱᓕᕆᐊᖃᖃᑦᑕᓚᐅᕐᒪᑕ ᓲᕐᓗ ᐅᕙᓐᓂᒃ ᑲᔪᖏᖅᓴᐃᓪᓗᑎᒃ. ᐊᒻᒪ ᑰᑦ ᐃᔨᑦᓯᐊᖅ ᑕᐃᓐᓇᓗ ᑎᑎᕋᖅᑎᒋᓚᐅᖅᑕᕋ ᓂᕈᐊᒐᒃᓴᐅᑎᓪᓗᖓ, ᖁᔭᓐᓇᒦᑦᑎᐊᖅᑕᒃᑲ ᓄᓇᕗᒻᒥᐅᑦ ᒪᒃᑯᒃᑐᑦ ᑖᒃᑯᐊ ᓯᕗᓕᖅᑎ ᒍᐃᓐ, ᓇᑦᓯᖅ, ᐊᓖᓴ ᑎᒡᓕᒃ. ᑖᒃᑯᐊ ᖁᔭᓐᓇᒦᖅᐸᒃᑲ ᓯᕗᒧᐊᒃᑎᑦᑎᓂᖏᑦ ᐃᑲᔪᖅᑐᐃᓂᖏᑦ ᒪᒃᑯᒃᑐᐃᑦ ᐱᓕᕆᐊᖃᖅᑎᓪᓗᒋᑦ ᖁᕕᐊᓇᑦᑎᐊᓚᐅᖅᑐᖅ. ᓴᙱᓂᖅᑖᓚᐅᕐᒪᑕ ᓂᕈᐊᒐᒃᓴᐅᑎᓪᓗᖓ, ᐃᑲᔪᖅᑐᐃᓚᐅᕐᓂᖓ ᖁᔭᓐᓇᒦᖅᐸᒃᑲ ᓯᕗᓕᖅᑎᐅᓪᓗᑎᒃ ᒪᒃᑯᒃᑐᓄᑦ. ᐊᒻᒪ ᖁᔭᓐᓇᒦᒃ ᐋᑕᒻ ᐋᕆᐊᒃ−ᓚᐃᑦᓯᑑᓐ ᑖᓐᓇ ᒪᓕᒐᓕᐅᖅᑎᐅᓚᐅᕐᒪᑦ ᐃᖃᓗᐃᑦ ᒪᓂᕋᔭᖕᒧᑦ ᐊᕐᕌᒍᓄᖅ 8−ᓄᑦ. ᐅᖃᖅᑏ, ᐅᓄᖅᑐᒻᒪᕆᐊᓗᖕᓂᒃ ᐊᒃᓱᐊᓗᒃ ᐃᖅᑲᓇᐃᕿᔮᒃᓴᖃᕋᑦᑕ ᐅᓪᓗᒥ ᖁᓕᓄᑦ ᐃᓕᓐᓂᐊᖅᑎᓪᓗᑕ ᐊᒃᓱᐊᓗᒃ ᐱᔭᕐᓂᙱᑦᑐᓂᒃ ᑕᑯᖃᑦᑕᓚᐅᕋᑦᑕ ᐃᖅᑲᓇᐃᔭᒐᒃᓴᐃᓪᓗ ᐃᓕᑉᐹᓪᓕᕆᐊᖃᖅᑕᕗᑦ ᐊᒻᒪᓗᑦᑕᐅᖅ ᒪᓕᒐᓕᐅᖅᑎᐅᖃᑎᒃᑲ ᓴᖅᑭᑦᑎᓚᐅᕐᒪᑕ ᐱᒻᒪᕆᐅᔪᒥᒃ ᓲᕐᓗ ᐱᔪᒪᓂᖃᑦᑎᐊᕐᒪᑕ ᒪᓕᒐᓕᐅᖅᑎᐅᖃᑕᐅᔪᑦ ᐃᖅᑲᓇᐃᔭᖃᑎᒌᒡᓗᑎᒃ, ᓈᓚᖃᑎᒌᒡᓗᑎᒃ ᐃᖅᑲᒌᖃᑦᑕᐅᑎᑦᑎᐊᕐᓗᑎᒃ ᓄᓇᕗᒻᒥᐅᓂᒃ ᑭᒡᒐᖅᑐᐃᓗᑎᒃ.

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 10 ᐊᓕᐊᓇᐃᒍᓱᒃᑐᖓ ᑕᕝᕙᓂ ᐊᑐᐃᓐᓇᐅᓪᓗᖓᓗ ᐃᖅᑲᓇᐃᔭᕐᓂᐊᕋᒪ ᐱᑦᑎᐊᕐᓗᖓ ᐊᒃᓱᕉᑎᒋᓗᒍ. ᖁᔭᓐᓇᒦᒃ, ᐅᖃᖅᑎᑦᑎᔩ. >>ᐸᒃᑕᑐᖅᑐᑦ ᐅᖃᖅᑎ: ᖁᔭᓐᓇᒦᑦᑕᐅᖅ. ᓴᖑᓗᖓ ᐅᖅᑯᕐᒥᐅᓄᑦ ᑭᒡᒐᖅᑐᐃᔪᖅ ᒪᓕᒐᓕᐅᖅᑎ ᑲᐅᑐᒃ. ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 4 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐅᖅᑯᒻᒥᐅᑦ ᑭᒡᒐᖅᑐᕐᓂᐊᕐᓗᒍ ᑲᐅᑐᒃ: ᖁᔭᓐᓇᒦᒃ, ᐅᖃᖅᑎᑦᑎᔩ. ᓯᕗᓪᓕᖅᐹᕐᒥ ᖁᔭᓐᓇᒦᕈᒪᓪᓗᒋ ᐃᓚᒃᑲ, ᓄᓕᐊᕋ, ᕿᑐᕐᖓᒃᑲᓗ ᐱᖓᓱᑦ, ᐃᕐᖑᑖᒃᑲᒡᓗ ᒪᕐᕉᒃ, ᑕᒪᐅᙵᕈᓐᓇᖅᑎᑕᐅᖕᒥᒐᒪ. ᐊᒻᒪᑦᑕᐅᖅ ᓂᕈᐊᖅᑎᖁᑎᒋᔭᒃᑲ ᑭᒡᒐᖅᑐᑦᑎᐊᕈᒪᓂᐊᖅᐸᒃᑲ ᐱᓕᕆᖃᑎᒋᑦᑎᐊᕈᒪᓪᓗᒋᓪᓗ ᒪᓕᒐᓕᐅᖅᑏᑦ, ᐊᒃᑯᐊᓗ ᐊᑭᑦᑎᓐᓃᑦᑐᑦ. ᖁᔭᓐᓇᒦᒃ, ᐅᐱᒋᕙᔅᓯ. ᑕᐃᒪᓗ. ᖁᔭᓐᓇᒦᒃ. >>ᐸᒃᑕᑐᖅᑐᑦ ᐅᖃᖅᑎ: ᖁᔭᓐᓇᒦᑦᑕᐅᖅ. ᒪᓕᒐᓕᐅᖅᑎ ᐊᒥᑦᑐᕐᒧᑦ. ᒥᔅᑕ ᖃᒪᓂᖅ. ᐃᕝᕕᓪᓕ. ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 5 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐊᒥᑦᑐᖅ ᑭᒡᒐᖅᑐᕐᓂᐊᕐᓗᒍ ᖃᒪᓂᖅ: ᐄ. ᖁᔭᓐᓇᒦᒃ, ᐅᖃᖅᑎᑦᑎᔩ. ᓯᕗᓪᓕᖅᐹᒥᑦᑕᐅᖅ ᖁᔭᓕᔪᒪᔪᖓ ᐃᓚᑯᓗᒃᑲ ᐊᖏᖅᓯᒪᓚᐅᕐᒪᑕ ᐊᒻᒪ ᓂᕈᐊᖅᑎᒋᓚᐅᖅᑕᒃᑲ ᑭᒡᒐᖅᑐᕐᓂᐊᖅᐸᒃᑲ ᐱᔪᓐᓇᕐᓂᓕᒫᕋ ᒪᓕᒡᓗᒍ ᐊᒻᒪ ᐊᒃᑯᐊ ᐊᑭᑦᑎᓐᓃᑦᑐᑦ ᐃᒪᐃᓕᕙᒃᑲ, ᓂᕈᐊᖅᑕᐅᖃᑎᓕᒫᒃᑲᓗ ᑕᒪᓐᓇ ᐊᖏᔪᒥᒃ ᐱᓂᐊᕐᓂᖃᕐᓇᖅᑐᖅ ᐆᒃᑑᒪᔭᒃᑲᑎᒍᑦ ᖁᔭᓕᕗᖓ. ᐄ, ᖁᔭᓐᓇᒦᒃ, ᐅᖃᖅᑎᑦᑎᔩ. >>ᐸᒃᑕᑐᖅᑐᑦ ᐅᖃᖅᑎ: ᖁᔭᓐᓇᒦᑦᑕᐅᖅ. ᒪᓕᒐᓕᐅᖅᑏᑦ ᐅᖃᐅᓯᒃᓴᖏᓐᓂᑦ. ᐊᐃᕕᓕᖕᒧᑦ ᒪᓕᒐᓕᐅᖅᑎ, ᒥᔅ ᐊᖑᑎᐊᓗᒃ. ᐃᓕᓐᓅᖅᐸᕋ. ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 6 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐊᐃᕕᓕᒃ ᑭᒡᒐᖅᑐᕐᓂᐊᕐᓗᒍ ᐊᖑᑎᐊᓗᒃ: ᖁᔭᓐᓇᒦᒃ, ᐅᖃᖅᑎᑦᑎᔩ. ᖁᔭᓐᓇᒦᕈᒪᓪᓗᖓ ᐊᐃᕕᓕᖕᒥᐅᑕᓄᑦ ᐅᕙᓐᓂᒃ ᓂᕈᐊᓚᐅᖅᑐᓂᒃ, ᓂᕈᐊᓚᐅᙱᑦᑑᒐᓗᐊᓪᓗ. ᑕᒪᕐᒥᒃ ᐊᔾᔨᒌᑎᑉᐸᒃᑲ. ᐃᑲᔪᕈᒪᕙᒃᑲ ᑕᒪᕐᒥᒃ ᐃᓅᖃᑎᒃᑲ ᐊᐃᕕᓕᖕᒥ. ᐊᔾᔨᒌᑎᒋᐊᕐᓗᒋᑦ. ᑖᒃᑯᐊ ᖁᔭᓐᓇᒦᕈᒪᔭᒃᑲ ᐃᓚᒃᑲ, ᐅᐃᒐᓗ, ᓄᑕᕋᒃᑲᓗ, ᐃᕐᖑᑕᒃᑲᓗ ᐊᒻᒪᓗ ᑕᐃᓯᒍᒪᓪᓗᖓ ᐅᕙᓐᓂᒃ ᐱᔫᒥᒍᓱᓚᐅᖅᑐᒥᒃ ᐹᓐ ᐊᓪ, ᖁᔭᓐᓇᒦᖅᐸᒋᑦ ᐅᕙᓐᓂᒃ ᑕᐅᑐᓚᐅᕋᕕᑦ ᐊᔪᙱᓐᓂᕋᐃᓪᓗᑎᓪᓗ. ᐊᒻᒪᓗ ᐃᓐᓇᕗᑦ ᐅᖃᐅᔾᔨᒋᐊᖃᑦᑕᓚᐅᖅᑐᑦ ᐅᕙᓐᓂᒃ ᐊᔭᐅᓂᖅ ᐃᒥᖅᑕᐅᑦ ᐃᓐᓇᖃᕈᓐᓃᖅᓱᓂ ᐅᖃᐅᔾᔨᔨᖃᕈᓐᓃᖅᓱᓂ ᖁᔭᒋᕙᕋ ᐅᕙᓐᓂᒃ ᐅᖃᐅᔾᔨᒋᐊᖃᑦᑕᕐᒪᑦ ᐊᒻᒪᓗ ᐱᓕᕆᔨᒋᓚᐅᖅᑕᕋ, ᑮᓇᐅᔭᓕᕆᔨᒋᓚᐅᖅᑕᕋ ᑖᓇ ᐊᓪ ᐃᑦᑐᖅ. ᖁᔭᒋᕙᒋᑦᑕᐅᖅ ᐃᑲᔪᓚᐅᕋᕕᖓ. ᖁᔭᓐᓇᒦᖅᑕᒃᑲ ᓴᓪᓕᕐᒥᐅᑕᓕᒫᑦᑎᐊᑦ ᐅᕙᓐᓂᒃ ᐅᒃᐱᕈᓱᓚᐅᖅᑐᑦ. ᖁᔭᓐᓇᒦᒃ, ᐅᖃᖅᑎᑦᑎᔩ. >>ᐸᒃᑕᑐᖅᑐᑦ ᐅᖃᖅᑎ: ᓇᑯᕐᒦᒃ. ᐊᑎᖁᑎᒃᑲ ᒪᓕᒡᓗᒋᑦ, ᐃᖃᓗᐃᑦ ᓂᐊᖁᙴ, ᒥᔅᑕ ᐊᕿᐊᕈᖅ. ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 7 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐃᖃᓗᐃ−ᓂᐊᖁᖒ ᑭᒡᒐᖅᑐᕐᓂᐊᕐᓗᒍ

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 11 ᐊᕿᐊᕈᖅ: ᖁᔭᓐᓇᒦᒃ, ᐅᖃᖅᑎᑦᑎᔩ. ᐅᖃᖅᑎᑦᑎᔩ, ᐅᐱᒋᑦᑎᐊᖅᐸᒋᑦ ᑕᑉᐱᑯᖓ ᐃᖏᒍᓐᓇᖅᓯᒐᕕᑦ ᑭᓯᐊᓂᓗ ᐅᒡᒍᕆᑦᑎᐊᖅᓱᒋᑦ ᑕᒫᓂ ᒥᓂᔅᑕᐅᖃᑎᒋᔪᓐᓇᔾᔮᒍᓐᓃᕋᒃᑭᒃ. ᐊᒃᓱᐊᓗᒃ ᐱᓕᕆᓚᐅᖅᑕᐃᑦ ᐱᓕᕆᕐᔪᐊᓚᐅᕋᕕᑦ ᑕᐃᑲᓂ ᒥᓂᔅᑕᐅᓂᓐᓃᕕᑦ ᑭᓯᐊᓂ ᐅᐱᒋᑦᑎᐊᖅᐸᒋᑦ ᐊᒻᒪᓗ ᑕᒫᓂ 7−ᒋᓕᖅᑕᖓᓂ ᐱᓕᕆᖃᑎᒌᑦᑎᐊᕐᓂᐊᕐᒥᕗᒍᑦ. ᐃᓚᑯᓗᒃᑲ ᓯᕗᓪᓕᖅᐹᒥ ᖁᔭᓐᓇᒦᕈᒪᑦᓯᐊᖅᓱᒋᑦ ᐊᒃᓱᕈᑦᑎᐊᖅᓱᑎᒃ ᐅᕙᓐᓂᒃ ᐃᑲᔪᖅᑐᖃᑦᑕᕐᒪᑕ. ᑕᐃᒪᓐᓇᐃᑎᓪᓗᒍ ᐊᒃᓱᐊᓗᒃ ᖁᔭᒋᕙᒃᑲ ᑕᕝᕗᖓ ᐱᖓᔪᒋᓕᖅᑕᖓᓄᑦ ᐃᖏᒍᓐᓇᕋᒪᑭᐊᖅ ᐊᐱᕆᓪᓗᒋᑦ ᐊᖏᓚᐅᖅᓯᒪᒻᒪᑕ. ᑕᕝᕗᖓᓗ ᐃᖃᓗᐃᑦ ᓂᐊᖁᙴᒧᑦ ᐱᓇᓱᖔᓚᐅᕋᒪ. ᑕᐃᒪᓐᓇᐃᑎᓪᓗᒍ ᖃᐅᔨᑦᑕᓚᐅᖅᐳᖓ ᐃᓪᓗᖔᓵᓘᓪᓗᑎᓪᓗ ᐅᖓᓯᒌᑦᑑᑎᐅᓪᓗᑎᒃ. ᐅᓪᓗ ᐊᑕᐅᓯᖅ 10 ᑭᓛᒥᑕᓂᒃ ᐱᓱᓚᐅᖅᐳᖓ ᐃᓪᓗᓂᒃ ᐳᓚᕋᖅᓱᖓ ᐅᓪᓗᓕᒫᑦᑎᐊᖅ ᑖᒃᑯᐊ ᐅᐸᒃᓱᒋᑦ. ᑐᙵᓱᕝᕕᐅᑦᑎᐊᓚᐅᕋᒪ ᐊᒻᒪᓗ ᐃᓐᓇᖁᑎᑯᓗᒃᐳᑦ ᑕᑯᔭᕋᐃᒐᒃᑭᑦ ᑐᙵᓱᑦᑎᑦᑎᑦᑎᐊᖃᑦᑕᖅᓱᑎᒃ ᑎᓕᐅᕆᑦᑎᐊᖅᓱᑎᓪᓘᓚᐅᕐᒪᑕ ᑕᕝᕙᓂ ᐃᖃᓗᓐᓂ. ᐊᒃᓱᐊᓗᒃ ᖁᔭᓕᔪᒪᔭᒃᑲ ᑕᐃᒃᑯᐊ ᑐᙵᓵᕆᓚᐅᖅᑐᐃᑦ ᐊᒻᒪᓗ ᑕᐃᒃᑯᐊ ᓂᕈᐊᓚᐅᙱᑦᑐᐃᑦ. ᐊᑏᑐᖅ, ᓂᕈᐊᕐᓂᒃᑲᓐᓂᕐᒥ ᓂᕈᐊᕆᐊᖅᑐᒃᑲᓐᓂᑦᑎᐊᓛᖅᐳᑦ. ᐊᒥᓲᔪᓐᓃᖅᐸᓪᓕᐊᓕᕐᓂᖓᓄᑦ ᑖᓐᓇ ᐅᒡᒍᕆᓪᓗᒍ ᑭᓯᐊᓂ ᑖᓐᓇ ᖃᓄᖅᑑᕆᐊᖃᖅᑰᔨᔪᒥᓇᑦᑎᐊᖅᑐᖅ ᓂᕈᐊᖅᑐᓕᕆᓂᕐᒧᑦ ᑐᕌᖓᑎᓪᓗᒋᑦ. ᖁᔭᓐᓇᒦᕈᒪᑦᑎᐊᕐᒥᕙᔅᓯ ᒪᓕᒐᓕᐅᖅᑎᐅᖃᑎᒃᑲ ᑕᒫᓃᑦᑐᐃᓐᓇᐅᓕᕋᑦᑕ ᐊᒻᒪᓗ ᓂᕈᐊᖅᓯᓚᐅᕋᔅᓯ ᑕᕝᕗᖓ ᒥᓂᔅᑕᐅᒍᓐᓇᖅᓯᑎᑕᐅᓕᕐᓂᓐᓄᑦ. ᐊᒃᓱᐊᓗᒃ ᖁᔭᒋᕙᔅᓯ ᐊᒃᓱᕈᕐᓂᐊᖅᓱᖓᓗ ᑖᔅᓱᒥᖓ ᐊᖏᖅᓯᒪᓪᓗᒍ ᐊᖏᖅᓯᒪᑦᑎᐊᕐᓗᒍ ᑭᓯᐊᓂᐅᓂᐊᕐᒥᒻᒪᑦ. ᑕᐃᒃᑯᐊ ᐃᓐᓇᖁᑎᕗᑦ ᑏᑐᕆᐊᖅᑐᖃᑎᒋᑦᑎᐊᖃᑦᑕᕐᓂᐊᖅᐸᕗᑦ ᑕᐃᑲᓂ ᖃᕐᒪᕐᒥ. ᖃᐅᔨᒪᓂᐊᖅᐳᓯ ᒪᓕᒐᓕᐅᖅᑎᐅᖃᑎᒃᑲ, ᐃᖃᓗᒻᒥᐅᑕᐃᑦ ᐅᑯᐊ ᑐᙵᓇᖅᑐᕐᔪᐊᕌᓗᐃᑦ ᐊᒻᒪᓗ ᐅᐸᑦᑎᐊᖃᑦᑕᖅᓯᐅᒃ. ᑐᙵᓱᒃᑎᑕᐅᑦᑎᐊᕐᓂᐊᖅᑐᓯ ᑕᕝᕙᓂ ᐃᒡᓗᕐᔪᐊᕐᒦᙱᒐᐃᒐᔅᓯ ᑕᕝᕗᖓ ᐳᓚᕋᑦᑎᐊᖃᑦᑕᕐᓂᐊᖅᐳᓯ. ᐃᓅᖃᑎᒌᑦᑎᐊᖃᑦᑕᖅᑕ. ᖁᔭᓐᓇᒦᒃ, ᐅᖃᖅᑎᑦᑎᔩ. >>ᐸᒃᑕᑐᖅᑐᑦ ᐅᖃᖅᑎ: ᖁᔭᓐᓇᒦᑦᑕᐅᖅ. ᐊᑎᖁᑎᒃᑲ ᒪᓕᓪᓗᒋᑦ, ᑐᓄᓂᕐᒧᑦ ᒪᓕᒐᓕᐅᖅᑎ, ᒥᔅᑕ ᑯᓄᒃ. ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 8 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᑐᓄᓂᖅ ᑭᒡᒐᖅᑐᕐᓂᐊᕐᓗᒍ ᑯᓄ: ᐄ, ᖁᔭᓐᓇᒦᒃ, ᐅᖃᖅᑎᑦᑎᔩ. ᖁᔭᓐᓇᒦᒃ, ᐊᑎᕋ ᑕᐃᑦᑎᐊᕋᕕᐅᒃ. ᐄ, ᓯᕗᓪᓕᖅᐹᕐᒥᒃ ᖁᔭᓕᔪᒪᔪᖓ ᓄᓕᐊᑯᓗᒐ ᐊᒻᒪ ᕿᑐᕐᖓᒃᑲ, ᐃᓚᒃᑲᓗ ᐃᑲᔪᖅᑐᑦᑎᐊᖅᓯᒪᖕᒪᑕ, ᑲᔪᖏᖅᓴᐃᑦᑎᐊᖅᖢᑎᒃ. ᐊᒻᒪᓗ ᒥᑦᑎᒪᑕᓕᖕᒥ ᓂᕈᐊᓚᐅᖅᑐᑦ ᓂᕈᐊᓚᐅᙱᑦᑑᒐᓗᐊᓪᓗ, ᖁᔭᒋᑦᑎᐊᖅᐸᒃᑲ. ᐃᓕᔅᓯ ᐱᓪᓗᖓ ᑕᒪᐅᖓ ᐃᒃᓯᕚᕈᓐᓇᕋᒪ. ᐊᒻᒪᓗ ᑕᕝᕗᖓ ᐃᖏᑦᑐᓐᓇᕋᒪ ᒥᓂᔅᑕᒧᑦ, ᐅᒃᐱᕆᔭᐅᒐᒪ ᖁᔭᓐᓇᒦᓪᓛᓗᒃ ᑕᕝᕗᖓ ᐃᖏᑦᑐᓐᓇᖅᐳᖓ. ᐅᐱᒋᕙᔅᓯ ᑕᒪᕐᒥᒃ ᒪᓕᒐᓕᐅᖅᑎᙳᖅᑐᓯ, ᒪᒃᑯᒃᑐᓪᓗ, ᐊᕐᓇᐃᓪᓗ ᐊᖑᑏᓪᓗ, ᐊᔾᔨᒌᑦᑎᐊᒥᒃ ᐱᓕᕆᓂᐊᖅᐳᒍᑦ ᐊᒃᓱᕈᕐᓗᑕ. ᐊᒻᒪ ᐅᐱᒋᔪᒪᒻᒪᕆᒃᐸᕋ ᔮᓐ ᒪᐃᓐ, ᖃᓪᓗᓈᖑᒐᓗᐊᖅᑎᓪᓗᒍ ᓯᕗᓪᓕᖅᐹᖑᓪᓗᓂ ᓯᕗᓕᖅᑎᐅᓂᕐᒧᑦ ᐃᓕᔭᐅᖕᒪᑦ. ᐃᓄᒃᑎᑑᕈᓐᓇᑦᑎᐊᕋᕕᑦ ᐊᒻᒪᓗ ᐆᒻᒪᑎᖕᓂᙶᖅᑐᒥᒃ ᐱᓕᕆᔪᒪᔭᐃᑦ ᑕᑯᔭᐅᓯᒪᖕᒪᑦ ᓄᓇᕗᒻᒥ, ᐅᐱᒋᑦᑎᐊᖅᐸᒋᑦ, ᑲᔪᓰᓐᓇᕐᓂᐊᖅᐳᑎᑦ. ᐊᒻᒪ ᑕᐃᕕᑦ ᔪᐊᓇᓯ, ᐅᐱᒋᕙᒋᑦ ᑕᕝᕗᖓ ᐅᖃᖅᑎᐅᓂᕐᒧᑦ ᐃᖏᑦᑐᓐᓇᕋᕕᑦ. ᐱᓕᕆᖃᑎᒌᑦᑎᐊᕆᕈᒪᕗᖓ ᐊᑕᖏᕐᓗᓯ, ᐊᒃᓱᕈᕐᓇᖅᑐᒃᑰᕋᓗᐊᕐᓗᑕ, ᓴᐱᓕᖅᑕᐃᓕᒪᓗᑕ ᐱᓕᕆᑦᑎᐊᖏᓐᓇᕋᓱᖕᓂᐊᕋᑦᑕ. ᓄᓇᕗᑦ ᓯᕗᒧᐊᖅᐸᓪᓕᐊᕋᓱᖕᒪᑦ ᓇᐅᒃᑯᑐᐃᓐᓇᖅ ᐱᐅᓂᖅᓴᒧᑦ ᑐᕌᒐᖃᖁᓪᓗᑕ. ᐊᒻᒪᓗ ᐊᔪᕐᓇᙱᑦᑐᑯᓗᖕᓂᒃ ᓴᖅᑭᑦᑐᖃᖃᑦᑕᙱᒃᑲᓗᐊᖅᑎᓪᓗᒍ ᐊᔪᕐᓇᖅᑐᑦᑕᐅᖅ ᓴᖅᑭᖃᑦᑕᕐᓂᐊᕐᒥᖕᒪᑕ. ᑕᒪᓐᓇ ᓯᕗᒧᐊᕋᓱᖕᓂᖅ ᐆᒻᒪᑎᓐᓂᙶᖅᑐᑦ ᐃᑲᔪᕈᒪᓃᑦ ᓄᓇᕗᒻᒥᐅᖃᑎᑦᑎᓐᓄᑦ ᑲᔪᓰᓐᓇᕋᓱᖕᓂᐊᖅᐳᖓ. ᖁᔭᓐᓇᒦᒃ, ᐅᖃᖅᑎᑦᑎᔨ. >>ᐸᒃᑕᑐᖅᑐᑦ ᐅᖃᖅᑎ: ᓇᑯᕐᒦᒃ. ᐊᑎᖁᑎᒃᑲ ᒪᓕᓪᓗᒋᑦ. ᑲᖏᖅᓯᓂᐅᑉ ᓂᒋᐊᓄᑦ. ᒥᔅ ᑕᑦᑐᐃᓂ. ᐃᕝᕕᓪᓕ.

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 12 ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 9 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᑲᖏᖅᓯᓂᖅ−ᓂᒋᐊ ᑭᒡᒐᖅᑐᕐᓂᐊᕐᓗᒍ ᑕᑦᑐᐃᓂ: ᖁᔭᓐᓇᒦᒃ, ᐅᖃᖅᑎᑦᓯᔩ. ᓯᕗᓪᓕᖅᐹᖅ ᖁᔭᓐᓇᒦᕈᒪᑐᐃᓐᓇᖅᑕᒃᑲ ᑕᐃᒃᑯᐊ ᐅᕙᓐᓄᑦ ᓂᕈᐊᓚᐅᖅᑐᑦ. ᐳᓛᕆᐊᖅᑐᖃᑦᑕᖅᓱᖓ ᐃᓱᒪᖃᑦᑕᓚᐅᕐᒥᔪᖓ ᐊᒥᓱᐅᓗᓂᒃ ᐊᒡᓗᑦ ᐊᔾᔨᒌᙱᑦᑐᐊᓗᖕᓂᒃ ᐃᒡᓗᖃᖅᑐᒍᑦ ᑲᖏᖅᖠᓂᕐᒥ. ᐊᒻᒪ ᐊᒥᓱᕈᓘᔭᕐᓂᒃ ᐃᑲᔪᖅᑕᐅᓚᐅᕐᒥᒐᒪ ᐊᒻᒪ ᐅᖃᖃᑦᑕᖅᓱᑎᒃ ᓱᓇᒥᒃ ᐃᓱᒫᓗᖃᓚᐅᕐᒪᖔᑕ. ᑕᕝᕙᓃᒃᑲᒪ ᐱᔾᔪᑕᐅᓪᓗᓯ. ᖁᔭᓐᓇᒦᑦᓯᐊᖅᑕᑉᓯ. ᐊᒻᒪ ᐃᓚᒃᑲ, ᓄᑕᕋᒃᑲ, ᑲᐃᐅᓪ, ᐳᕋᐃᐊᓐ ᐊᒻᒪ ᑭᐊᕆ. ᑕᒪᕐᒥᒃ ᐅᕙᓐᓄᑦ ᐃᑲᔪᐃᓐᓇᖃᑦᑕᕐᒪᑕ, ᓴᕆᒪᒋᑦᓯᐊᖅᖢᒋᓪᓗ ᐊᔪᙱᑦᑐᐊᓘᖕᒪᑕ ᐊᒻᒪ ᐅᕙᓐᓄᑦ ᓴᙱᓂᒃᑲᓐᓂᕐᒥᒃ ᑐᓂᓯᓲᖑᖕᒪᑕ. ᐊᒻᒪ ᓴᑭᒐ ᑕᒫᓂ ᑎᑭᖃᑕᐅᓚᐅᕐᒪᑦ ᐅᕙᓐᓄᑦ ᐅᐱᒋᕙᕋᑦᑕᐅᖅ ᐊᒃᓱᐊᓗᒃ ᐃᓕᓐᓂᐊᖅᑎᑕᐅᓚᐅᕐᒥᒐᒪ ᖃᓄᑎᒋ ᐱᐅᑎᒋᒻᒪᖔᑦ ᐃᓅᑎᓪᓗᑕ. ᐊᔪᙱᑦᑐᐊᓘᔪᒍᑦ. ᓴᖅᑭᑎᕆᒃᑲᓐᓂᕆᐊᖃᖅᑕᕗᑦ ᐊᔪᙱᓐᓂᕗᑦ ᐃᓱᒪᕗᑦ ᐊᖏᔪᐊᓘᒻᒪᑦ. ᓲᖃᐃᒻᒪ ᐊᓕᓚᔫᑎᒥᒃ ᐊᔾᔭᖃᑦᑕᓚᐅᙱᓐᓇᑦᑕ, ᐃᓱᒪᕗᑐᐃᓐᓇᖅ ᐊᑐᖅᖢᒍ ᐊᒻᒪ ᐃᖅᑲᐅᒪᓂᕗᑦ ᐊᑐᖅᖢᒍ ᐊᒻᒪ ᑕᐅᑐᒡᓗᑕ ᐊᔪᕈᓐᓃᖅᓴᕐᓂᑰᒐᑦᑕ. ᐊᒃᓱᐊᓗᒃ ᐅᐱᒋᖃᑎᒋᔭᒃᑲ ᐃᓅᖃᑎᒃᑲ. ᐊᔪᙱᑦᑐᒻᒪᕆᐊᓘᔪᒍᑦ. ᑕᐃᒪᓕ ᐅᖃᑦᓯᐊᕈᓐᓇᖅᑐᖓ, ᐊᔪᙱᑦᑐᒻᒪᕆᐊᓘᔪᒍᑦ. ᑕᒡᕙᓂ ᑎᑭᒃᑲᑦᑕ, ᓱᓕ ᐊᔪᕈᓐᓃᖅᓴᒃᑲᓐᓂᕆᐊᖃᖅᑐᒍᑦ ᖃᓄᑎᒋ ᓯᓚᕐᔪᐊᖅ ᐊᒃᑐᐊᓂᖃᕐᒪᖔᑦ ᓄᓇᕗᒻᒥ. ᑕᐅᑐᒃᑕᐅᖏᓐᓇᑦᓯᐊᓲᖑᔪᒍᑦ. ᐃᒃᐱᒋᑦᓯᐊᖃᑦᑕᕋᒃᑭᑦ ᐊᒻᒪ ᑕᒪᑉᑕ ᑕᕝᕙᓃᑦᑐᒍᑦ ᐊᒃᓱᕈᑦᓯᐊᖅᖢᑕ ᖃᐅᔨᒪᔪᖓ ᐱᓕᕆᑦᓯᐊᕐᓂᐊᖅᑐᒍᑦ. ᖁᔭᓐᓇᒦᒃ, ᐊᒃᓱᐊᓗᒃ. (ᑐᓵᔨᑎᒎᓕᖅᑐᖅ) ᑕᒪᕐᒥᑦᓯᐊᖅ ᖁᔭᓐᓇᒦᕈᒪᑐᐃᓐᓇᖅᑐᓯ ᑕᒫᓃᖃᑕᐅᔪᓐᓇᕋᒪ ᐃᓚᒋᔭᐅᒍᓐᓇᕐᓗᖓ ᓯᕗᓕᖅᑎᐅᖃᑕᐅᔪᓐᓇᕐᓂᓐᓂᒃ. ᖁᔭᓐᓇᒦᒃ. >>ᐸᒃᑕᑐᖅᑐᑦ ᐅᖃᖅᑎ: ᖁᔭᓐᓇᒦᑦᑕᐅᖅ. ᐊᑎᖁᑎᒃᑲ ᒪᓖᓐᓇᕐᓗᒋᑦᑕᐅᖅ, ᑕᓯᐅᔭᕐᔪᐊᕐᒧᑦ ᒪᓕᒐᓕᐅᖅᑎ, ᒥᔅᑕ ᖃᕝᕕᒃ. ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 10 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᑕᓯᐅᔭᕐᔪᐊᖅ ᑭᒡᒐᖅᑐᕐᓂᐊᕐᓗᒍ ᖃᕝᕕᒃ: ᓇᑯᕐᒦᒃ ᐅᖃᖅᑏ. ᐅᓪᓗᒃᑯᑦ, ᒪᓕᒐᓕᐅᖅᑎᐅᖃᑎᒃᑲ ᐊᒻᒪᓗ ᓄᓇᕗᒻᒥᐅᑦ. ᓯᕗᓪᓕᖅᐹᕐᒥᒃ ᐅᖃᖅᑏ, ᐅᐱᒋᒍᒪᕙᒋᑦ ᑕᐅᕗᖓ ᐅᖃᖅᑎᐅᑉ ᐃᑦᓯᕙᐅᑕᖓᓄᑦ ᐃᓕᔭᐅᓚᐅᕋᕕᑦ ᐊᒻᒪᓗ ᓯᕗᓕᖅᑎ ᑖᕙ ᓄᓇᕗᒻᒥ ᐅᐱᒋᒍᒪᒋᕙᕋ ᐊᒻᒪᓗ ᑖᒃᑯᐊ ᓴᓂᒥᐅᑕᑎᑦ ᐱᓇᓱᐊᖃᑎᒌᑦᓯᐊᖃᑦᑕᔪᐃᓐᓇᐅᓚᖓᔪᓯ ᓇᓗᓇᙱᑐᒃ ᓄᓇᕗᒻᒥᐅᑦ ᐱᔾᔪᑎᒋᓪᓗᒋᑦ. ᐊᒻᒪᓗ ᐃᓘᓐᓇᓯ ᒪᓕᒐᓕᐅᖅᑎᐅᔪᓯ ᐅᐱᒋᕙᑦᓯ ᓂᕈᐊᖅᑕᐅᒍᓐᓇᓚᐅᕋᑦᓯ ᐊᑦᓱᕈᑦᓱᓯ ᓂᕈᐊᒐᔅᓴᐅᒍᓐᓇᓚᐅᕋᔅᓯ ᑕᒫᓂ 7−ᒋᓕᖅᑕᖓᓂ ᐃᓗᐊᓂ ᒪᓕᒐᓕᐅᕐᕕᐊᓂ ᒪᓕᒐᓕᐅᖅᑎᐅᓚᖓᓕᖅᑎᓪᓗᑕ. ᐅᖃᖅᑏ, ᓇᑯᕐᒦᕈᒪᕙᒃᑲ ᐃᓚᒃᑲ, ᕿᑕᕐᖓᒃᑲ ᔮᑯᓃᑕ, ᑭᑎ, ᔅᑕᓚ, ᕉᓴᓕᓐᑕ, ᑖᓂᐅᓪ ᐊᒻᒪᓗ ᐃᕐᖑᑕᕋ ᓚᑏᓯᐊ. ᕿᑐᕐᖓᒃᑲ ᐱᔾᔪᑎᒋᑦᓱᒋᑦ ᑕᒫᓃᒍᓐᓇᕋᓱᐊᕋᒪ ᐊᑦᓱᕈᑦᓱᖓ ᐱᓇᓱᐊᒻᒪᕆᓪᓗᖓ ᑕᒫᓃᕈᑎᒃᑲ ᐃᓚᒋᔭᒃᑲ. ᐊᕐᕌᒍᓂᒃ ᓯᑕᒪᓂᒃ ᑕᒪᐅᖓ ᐊᐅᓚᖃᑦᑕᓚᐅᕋᒪ ᒪᓕᒐᓕᐅᖅᑎᐅᓂᒐ ᐱᔾᔪᑎᒋᑦᓱᒍ ᐅᖃᐅᓯᖃᕈᒪᔪᖓ ᐃᖃᓗᒻᒥᐅᑦ ᑐᙵᓇᖅᑐᐊᓘᒻᒪᑕ ᑐᙵᓇᐃᓐᓇᓱᑎᓪᓗ ᐊᓕᐊᓇᓲᕗᖅ ᐃᖃᓗᒻᒥᐅᓄᑦ ᑐᙵᓱᑦᑎᑕᐅᒋᐊᒥ. ᐊᒻᒪᓗ ᑭᖑᓪᓕᐅᑎᓪᓗᒍ ᓇᑯᕐᒦᒍᒪᕙᒃᑲ ᑭᒡᒐᑐᖅᑕᒃᑲ ᓴᓂᑭᓗᐊᕐᒥᐅᑦ ᑕᓯᐅᔭᕐᔪᐊᕐᒥᐅᑦ ᐅᕙᓐᓂᒃ ᐅᑉᐱᒍᓱᒻᒪᑕ. ᐱᒐᓱᐊᒻᒪᕆᓪᓗᖓ ᐊᑦᓱᕈᕐᓗᖓ ᑭᒡᒐᑐᓚᖓᔭᒃᑲ ᑕᒫᓂ ᐊᕐᕌᒍᓂ ᓯᑕᒪᓂᒃ ᒪᓕᒐᓕᐅᖅᑎᐅᓚᖓᑎᓪᓗᑕ. ᓇᑯᕐᒦᒃ, ᐅᖃᖅᑏ ᐱᕕᖃᖅᑎᒍᓐᓇᕋᕕᒐ. >>ᐸᒃᑕᑐᖅᑐᑦ ᐅᖃᖅᑎ: ᓇᑯᕐᒦᑦᑕᐅᖅ. ᑕᐃᒪᓕ ᐊᕐᕕᐊᑦ ᓂᒋᐊᓄᑦ ᒪᓕᒐᓕᐅᖅᑎ, ᑭᒡᒐᖅᑐᐃᔨ, ᒥᔅᑕ ᖃᑉᓗᑦᓯᐊᖅ, ᐱᕕᖃᓕᖅᐳᑎᑦ.

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 13 ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 11 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐊᕐᕕᐊᑦ−ᓂᒋᐊ ᑭᒡᒐᖅᑐᕐᓂᐊᕐᓗᒍ ᖃᑉᓗᑦᓯᐊᖅ: ᒪ’ᓇ, ᐅᖃᖅᑎᑦᓯᔨ. ᓯᕗᓪᓕᖅᐹᕐᒥᒃ ᑕᕐᕆᔭᖅᑐᑦ ᑕᐅᑐᒃᑐᑦ ᑐᙵᓱᒋᑦᓯ ᓄᓇᕗᒻᒥᐅᑦ. ᐅᖃᕆᐊᖅᑳᖅᑎᓐᓇᖓ ᓯᕗᓪᓕᖅᐹᕐᒥᒃ ᑕᐃᒃᑯᐊ ᐊᕐᕕᐊᓂ ᐃᓚᙵᓵᖅᑐᑦ ᐃᓱᒪᒋᕙᒃᑲ. ᐊᒻᒪᑦᑕᐅᖅ ᑖᒻᓇ ᑎᑎᕋᓚᐅᖅᑕᕋ ᐅᖃᐅᓯᕆᒋᐊᖅᑳᖅᑎᓐᓇᒍ ᓂᕈᐊᒐᒃᓴᐅᑎᓪᓗᖓ ᑕᐃᑲᓂ ᐊᕐᕕᐊᓂ ᓱᓐᓂᓚᙱᑦᑐᖅ, ᑐᙵᔾᔪᑎᒋᓂᐊᕐᓂᕋᓚᐅᒐᒃᑲ ᓱᓐᓂᓚᙱᑦᑐᑦ, ᑕᕝᕙ ᐅᑉᐱᕆᒐᑉᓯᙵ ᑕᕝᕙᓃᓕᖅᐳᖓ. ᖁᕕᐊᓱᓪᓚᕆᒃᐳᖓᓗ ᐃᒃᓯᕙᐅᑕᕐᒧᑦ ᓂᕈᐊᒐᐅᒐᕕᑦ. ᓯᕗᓕᖅᑎ ᔮᓐ ᒪᐃᓐ ᐊᒻᒪ ᐅᖃᐅᓯᕆᖃᑕᐅᓚᐅᕋᑉᑯ ᑖᓐᓇ ᑐᙵᔾᔪᑎᒋᓂᐊᒐᕐᒪ ᐃᓚᖓᓂᑦ ᖁᕕᐊᓱᓪᓚᕆᒃᐳᖓ ᓄᓇᕗᑦ ᑐᙵᕕᒃᑯᑦ ᐃᓱᒪᑕᖓ ᔨᕆᒥᐊ ᑑᕐᖔᓗᒃ ᑕᕝᕙᓃᒻᒪᑦ. ᑖᒻᓇ ᑖᒃᑯᐊ ᓯᑕᒪᑦ ᐅᖃᐅᓯᕆᓚᒃᑲ ᓂᕈᐊᒐᒃᓴᐅᑎᓪᓗᖓ ᑐᙵᔾᔪᑎᒋᓂᐊᕐᓂᕋᓚᐅᒐᒃᑲ ᓲᕐᓗ ᖃᑉᓗᓈᑐᑦ ᑕᐃᔭᐅᖕᒪᑦ ᒪᑭᒪᔾᔪᑎᑦ, ᐃᓕᓐᓂᐊᕐᓂᖅ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᓂᖅ. ᑖᒃᑯᐊ ᑐᙵᔾᔪᑎᒋᔭᕐᒪ ᓯᑕᒪᑦ ᐃᓚᖓᓐᓂ ᐅᖃᐅᓯᕆᑦᑕᓚᐅᕋᒃᑭᑦ ᐊᕐᕕᐊᕐᒥᐅᓄᑦ. ᐊᒻᒪ ᐃᓚᖓ ᓲᕐᓗ ᐱᓕᕆᖃᑎᖃᕐᓂᖅ ᐆᒃᑑᑎᒋᓗᒍ ᔨᕆᒥᐊ ᑑᕐᖔᓗᒃ, ᐱᓕᕆᕝᕖᑦ, ᑎᒥᖁᑎᓯ ᓄᓇᕗᑦ ᑐᙵᕕᒃᑯᑦ, ᐃᓄᐃᑦ ᑎᒥᖏᑦ ᐅᕝᕙᓘᓐᓃᑦ ᕿᑎᕐᒥᐅᓂ. ᐊᒻᒪᑦᑕᐅᖅ ᓈᓚᒃᑎᐅᓂᐊᕐᓂᕋᖅᖢᖓ ᒫᓐᓇ ᐆᒻᒪᑎᓐᓂᙶᖅᑐᒥᒃ ᐃᓄᖕᓂᒃ ᐃᓱᒫᓘᑎᒋᔭᖏᓐᓂᒃ ᖃᐅᑉᐸᒋᑦ ᐃᓕᑉᓯᓐᓄᑦ, ᑕᒡᕙ ᐅᑭᐅᑦ ᓯᑕᒪᑦ ᐃᓗᐊᓂ ᖃᐃᑦᑕᕐᓂᐊᖅᐳᖓ. ᓂᕆᐅᒃᐳᖓᓗ ᐱᓕᕆᖃᑎᒌᑦᓯᐊᕐᓂᐊᕋᑉᑕ. ᐊᒻᒪᑦᑕᐅᖅ ᑐᙵᔾᔪᑎᒋᔭᕐᒪ ᐃᓚᖓ ᓂᕈᐊᒐᒃᓴᐅᑎᓪᓗᖓ ᒪᒃᑯᒃᑐᑦ ᐱᔾᔪᑎᒋᓪᓗᒋᑦ ᓂᕈᐊᒐᒃᓴᐅᖃᑕᐅᓚᐅᕋᒪ ᑖᒃᑯᐊ ᑐᙵᔾᔪᑎᒋᔭᕐᒪ ᓲᕐᓗ ᑐᙵᕕᒐ ᐃᓚᖓᓂ ᐊᑕᖃᑕᐅᓪᓗᓂ ᑭᓯᐊᓂ ᑕᕝᕗᖓᓚᐅᕐᓗᖓ, 2 ᒥᓂᑦ ᒪᐃᒐᓚᒃ. ᓄᓕᐊᕋ, ᐃᕐᓂᕋᓗ ᒪ’ᓈᓪᓚᕆᒃᐸᒃᑲ ᓂᕈᐊᕆᐊᖅᑐᓚᐅᖅᑐᓗᒃᑖᓪᓗ ᒪ’ᓈᓪᓚᕆᒃᖢᒋᑦ. ᒪ’ᓇ, ᐅᖃᖅᑎᑦᓯᔩ. >>ᐸᒃᑕᑐᖅᑐᑦ ᐅᖃᖅᑎ: ᒪ’ᓈᖅᐸᒋᑦᑕᐅᖅ. ᐅᖅᓱᖅᑑᑉ ᒪᓕᒐᓕᐅᖅᑎᖓ, ᒥᔅᑕ ᐳᐊᑐ, ᐃᒡᕕᓪᓕ. ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 12 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐅᖅᓱᖅᑑᖅ ᑭᒡᒐᖅᑐᕐᓂᐊᕐᓗᒍ ᐳᐊᑐ: ᖁᔭᓐᓇᒦᒃ, ᐅᖃᖅᑎᑦᑎᔨ. (ᑐᓵᔨᑎᒍᑦ) ᖁᔭᓐᓇᒦᒃ, ᓂᕈᐊᖅᑕᐅᔪᑦ ᐅᖃᖅᑎᒧᑦ, ᓯᕗᓕᖅᑎᓪᓗ ᐊᒻᒪ ᒥᓂᔅᑕᐅᓂᐊᖅᑐᑦ. ᖁᔭᓕᒍᒪᓪᓗᖓ ᒥᔅᑕ ᑑᓂ ᐋᑯᐊᖅ ᑕᖃᓱᐃᑦᑑᓪᓗᓂ ᐃᓕᙳᖅᓯᓂᖓᓄᓪᓗ ᐱᓚᐅᕐᓂᖓᓄᑦ ᑭᒡᒐᑐᖅᓱᓂ ᐅᖅᓱᖅᑑᕐᒥ ᐱᖓᓱᐃᖅᓱᖅᖢᓂ ᒪᓕᒐᓕᐅᕐᕕᒻᒥ. ᐊᒻᒪ ᖁᔭᓐᓇᒦᕈᒪᒋᓪᓗᒋᑦ ᐅᖅᓱᖅᑑᒥᐅᑦ ᐅᕙᓐᓂᒃ ᓂᕈᐊᖅᖠᓚᐅᕐᒪᑕ 7−ᒋᓕᖅᑕᖓᓄᑦ ᒪᓕᒐᓕᐅᕐᕕᒻᒥ ᐃᓕᑕᕆᔪᒪᓪᓗᒍ ᒥᔅ ᐳᐊᑐ, ᑕᐃᕕᑦ ᐋᖁᐊᖅ ᐊᒻᒪᓗ ᓴᓂ ᐳᐊᑐ. ᐊᑎᕐᒥᓂᒃ ᓯᕗᒨᖅᓯᓚᐅᕐᒪᑕ ᓂᕈᐊᒐᒃᓴᐅᓪᓗᑎᒃ. ᖁᔭᓐᓇᒦᕈᒪᓪᓗᒍᓗ ᓄᓕᐊᕋ, ᐃᓚᒃᑲ ᐃᑲᔪᖅᑐᐃᓚᐅᕐᓂᔅᓯᓐᓄᑦ ᑕᕝᕗᖓ ᓯᕗᒧᑉᐸᓪᓕᐊᓇᓱᑦᑎᓪᓗᖓ. ᖁᔭᓐᓇᒦᒃ, ᐅᖃᖅᑏ. >>ᐸᒃᑕᑐᖅᑐᑦ ᐅᖃᖅᑎ: ᖁᔭᓐᓇᒦᑦᑕᐅᖅ. ᐸᓐᓂᖅᑑᑉ ᒪᓕᒐᓕᐅᖅᑎᖓ, ᒥᔅᑕ ᒪᐃᒃ, ᐃᕝᕕᓪᓕ. ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 13 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐸᓐᓂᖅᑑᖅ ᑭᒡᒐᖅᑐᕐᓂᐊᕐᓗᒍ ᒪᐃᒃ: ᖁᔭᓐᓇᒦᒃ, ᐅᖃᖅᑎᑦᑎᔩ. ᖁᕕᐊᒋᔪᒪᕙᔅᓯ ᐅᕙᓂ ᒪᓕᒐᓕᐅᖅᑎᐅᔪᓯ ᑕᒪᒃᑭᖅᑐᓯ. ᑎᓕᔭᐅᔾᔪᑎᖃᕋᑦᑕ ᓄᓇᑦᑎᓐᓂ ᓂᕈᐊᖅᑕᐅᓂᒃᑯᑦ. ᑕᕝᕙᓂ ᓂᓪᓕᐊᖃᑦᑕᕐᓂᐊᕋᑦᑕ ᐱᔾᔪᑎᒋᓪᓗᒋᑦ ᑕᖅᑲᒃᑯᐊ. ᐃᓚᒋᔭᐅᑦᑎᐊᖃᑦᑕᕈᒪᓂᐊᕆᕗᖓ. ᓯᕗᓪᓕᕐᒥᒃ ᖁᕕᐊᓱᑦᑐᖓ ᐅᖃᖅᑎᑦᑎᔩ, ᓂᕈᐊᖅᑕᐅᓯᒪᒐᕕᑦ ᑕᕝᕗᖓ ᐅᖃᖅᑎᑦᑎᔨᒧᑦ ᐊᒻᒪᓗ ᓯᕗᓕᖅᑎᒋᓂᐊᓕᖅᑕᕗᑦ ᔮᓐ ᒪᐃᓐ, ᐊᒻᒪᓗ ᑖᒃᑯᐊ ᒥᓂᔅᑕᐃᑦ.

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 14 ᐊᒻᒪᑦᑕᐅᖅ ᐃᓚᒃᑲ ᖁᔭᓐᓇᒦᕐᒥᔭᒃᑲ, ᐱᓗᐊᖅᑐᒥᒃ ᓄᓕᐊᕋ. ᓄᓕᐊᕋ ᑕᐃᓐᓇ ᐱᓕᕆᖃᑎᒋᓲᕆᒻᒥᒐᒃᑯ ᑕᕝᕗᙵᕐᓂᐊᖅᑲᐅᔫᒐᓗᐊᖅ ᑕᕝᕗᖓᖐᓐᓇᕐᖓᑦ ᓯᕗᓪᓕᕐᒥᒃ ᒥᓂᔅᑕᐅᓂᕐᒧᑦ ᓂᕈᐊᖅᑕᐅᓚᐅᖅᓯᒪᒻᒥᒐᒪ ᒪᓕᒐᓕᐅᖅᑎᐅᒐᒪ ᓯᕗᓪᓕᕐᒥᒃ. ᓄᓕᐊᕋ ᐊᖕᓕᑲᓐ ᒥᓂᔅᑕᐅᓚᐅᖅᓯᒪᒻᒪᑦ. ᒥᓂᔅᑕᕈᕋᒪ ᒥᓂᔅᑕᐃᓐᓇᐅᓕᓚᐅᖅᓯᒪᒐᓐᓄᒃ. >>ᐃᒡᓚᖅᑐᑦ ᒪᐃᒃ: ᑖᓐᓇ ᐳᐃᒍᕈᓐᓇᙱᒻᒥᒐᒃᑯ ᓄᓕᐊᕋ ᐃᑲᔪᖅᑎᕕᔾᔪᐊᕌᓗᒋᓲᕆᒻᒥᒐᒃᑯ ᓇᐅᒃᑯᑐᐃᓐᓇᖅ ᕿᑐᕐᖓᒃᑲᓗ ᐊᒻᒪᓗ ᕿᑐᕐᖓᑯᓗᖏᑦ, ᐃᕐᖑᑕᒃᑲ ᐃᑲᔪᖅᑐᐃᓂᖃᒻᒪᕆᓚᐅᕐᖓᑕ ᒫᓐᓇ ᓴᙱᔪᒥᒃ ᑖᒃᑯᐊ ᐊᒻᒪᓗ ᑕᐃᒃᑯᐊ ᐸᓐᓂᖅᑑᒥ ᓂᕈᐊᖅᑐᐃᑦ, ᖁᔭᓐᓇᒦᒻᒪᕆᑉᐸᒃᑲ. ᐊᒻᒪ ᓱᓕ ᑕᕝᕙᓂ ᒪᓕᒐᓕᐅᕐᕕᒻᒥ ᒥᓂᔅᑕᐅᓪᓂᓗ ᐊᐱᖅᓱᖅᑕᐅᓐᓇᕐᖓᑦ. ᐊᐱᖅᓱᑕᐅᓪᓗᓂ ᑭᐅᓇᕐᖓᑦ. ᑕᐃᒪᐃᓕᐅᖅᑐᖃᖅᑎᓪᓗᒍ ᓄᓇᕗᒻᒥᐅᑦ ᑐᑭᓯᑦᑎᐊᓲᑦ ᖃᓄᐃᓕᐅᕐᒪᖔᑦᑕ. ᐊᐱᖅᓱᓂᒃᑯᑦ, ᑭᐅᖃᑦᑕᓂᒃᑯᑦ, ᓄᓇᕗᒻᒥᐅᑦ ᑐᓴᑦᑎᐊᓲᑦ ᖃᓄᐃᓕᐅᕋᓱᒻᒪᖔᑦᑕ. ᐊᒻᒪᓗ ᐃᓚᙵᕋᑖᓚᐅᕋᑦᑕ ᖁᔭᓐᓇᒦᒃ ᑕᐃᖅᑲᐅᒐᕕᐅᒃ ᓇᔭᒋᓚᐅᖅᑕᕋ, ᐸᑭ ᒪᐃᒃ. ᒪᓕᒐᓕᐅᖅᑎᐅᓚᐅᖅᓯᒪᔪᖅ ᐸᓐᓂᖅᑑᒧᑦ, ᕿᑭᖅᑕᕐᔪᐊᒧᑦ, ᑲᖏᖅᑐᒑᐱᒻᒧᑦ ᐊᒻᒪᓗ ᒪᓕᒐᓕᐅᖅᑎᐅᑎᓪᓗᒍ ᐸᓐᓂᖅᑑᖅ ᐃᖃᓗᓕᕆᕕᑦᑖᓚᐅᖅᓯᒪᔪᖅ ᐅᓪᓗᒥᒧᑦ ᓇᐸᔪᒥᒃ ᐊᐅᓚᑦᑎᐊᖅᑐᒥᒃ. ᐊᐃᕙᔨᐅᓚᐅᖅᓯᒪᒻᒥᒐᒪ, ᐊᐃᕙᔪᑎᑐᑦ ᐊᐱᖅᓱᖃᑦᑕᓂᐊᖅᐳᑦ. ᖁᔭᓐᓇᒦᒃ, ᐅᖃᖅᑎᑦᑎᔩ. >>ᐸᒃᑕᑐᖅᑐᑦ ᐅᖃᖅᑎ: ᖁᔭᓐᓇᒦᑦᑕᐅᖅ. ᓇᑦᓯᓕᖕᒧᑦ ᒪᓕᒐᓕᐅᖅᑎ, ᒥᔅ ᓚᐃᔪᓪ, ᐃᓕᓐᓅᖅᐸᕋ. ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 14 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᓇᑦᓯᓕᒃ ᑭᒡᒐᖅᑐᕐᓂᐊᕐᓗᒍ ᓚᐃᔪᓪ (ᑐᓲᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐊᒻᒪᓗ ᖁᕕᐊᓲᑎᕙᒋᑦ ᑕᕝᕗᖓ ᐃᖏᓐᓇᕕᑦ ᐅᖃᖅᑎᐅᑉ ᐃᓂᖓᓄᑦ. ᓯᕗᓪᓕᖅᐹᕐᒥᒃ ᓂᕈᐊᖅᑎᒋᓚᐅᖅᑕᒃᑲ ᓇᑦᓯᓕᖕᒥ ᖁᔭᓐᓇᒦᕈᒪᓪᓗᒋᑦ, ᑕᓗᕐᔪᐊᖅ ᐊᒻᒪᓗ ᑰᒑᕐᔪᒃ. ᐃᓕᔅᓯᓐᓄᑦ ᐃᑲᔪᖅᓱᖅᑕᐅᓚᐅᕋᒪ, ᑕᕝᕙ ᐱᔭᔅᓴᖅᑖᖅᑎᑕᐅᓯᒪᕗᖓ ᑭᒡᒐᖅᑐᐃᓂᐊᕐᓗᖓ ᐃᓕᓐᓂᒃ. ᑕᒪᓐᓇ ᑎᒍᑦᑎᐊᖅᑕᕋ ᑎᓕᔭᐅᓂᕋ ᐊᒻᒪᓗ ᐅᑯᐊ ᐃᒃᓯᕚᖃᑕᐅᔪᑦ ᒥᓂᔅᑕᐃᑦ ᑲᑎᒪᔨᖏᓐᓄᑦ. ᓯᕗᓪᓕᖅᐹᕐᒥᒃ ᑕᕝᕗᖓ ᐃᓯᕋᒪ ᒪᒃᑯᒃᑐᕈᓘᓪᓗᖓ ᐱᔨᑲᑖᖑᓚᐅᖅᓯᒪᒐᒪ ᑕᕝᕙᓂ ᐃᔅᓯᕚᖅᑐᖓ ᑕᑯᓐᓇᓚᐅᖅᓯᒪᙱᑕᕋ ᐱᓗᐊᕐᓗᒍ ᒫᓂ ᐃᔅᓯᕚᖅᖢᖓ. ᐊᒻᒪᓗ ᓇᓗᓇᐃᖅᓯᔪᒪᓪᓗᖓ ᑕᐃᒃᑯᐊ ᐅᐱᓐᓇᖅᑐᐊᓗᐃᑦ ᓴᖅᑭᑦᑐᓐᓇᖅᑐᑦ ᓯᕗᓂᔅᓴᑦᑎᓐᓂ ᐅᕙᑦᑎᓐᓂᒃ ᐅᑉᐱᕆᑐᐊᕈᑦᑕ. ᖁᔭᓐᓇᒦᕈᒪᓪᓗᒋᑦ ᐃᓚᒃᑲ ᐃᑲᔪᖅᓯᑦᑎᐊᕐᒪᑕ ᑲᔪᖏᖅᓴᐃᑦᑎᐊᕐᒪᑕᓗ. ᖁᔭᓐᓇᒦᒃ, ᐅᖃᖅᑏ. >>ᐸᑦᑕᒃᑐᖅᑐᑦ ᐅᖃᖅᑎ: ᓇᑯᕐᒦᒃ. ᖃᒪᓂ’ᑐᐊᕐᒧᑦ ᑭᒡᒐᖅᑐᐃᔪᖅ, ᒥᔅᑕ ᓯᒪᐃᓚᒃ. ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 15 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᖃᒪᓂᑦᑐᐊᖅ ᑭᒡᒐᖅᑐᕐᓂᐊᕐᓗᒍ ᓯᒪᐃᓚᒃ: ᒪ’ᓇ, ᐅᖃᖅᑎᑦᓯᔩ. (ᑐᓵᔨᑎᒎᓕᖅᑐᖅ) ᖁᕕᐊᓲᑎᕙᒋᑦ ᐅᖃᖅᑏ. (ᑐᓵᔨᑎᒎᕈᓐᓃᖅᑐᖅ) ᒎᑎᒧᑦ ᒪ’ᓈᕈᒪᕗᖓ, ᒪᑭᑎᑦᓯᙵᐃᓐᓇᓱᕐᒪᖓ ᑐᔅᓯᐊᖓᐃᓐᓇᕋᒪ ᐃᑲᔪᒐᐅᑦᓯᐊᕈᒪᓪᓗᖓ ᒪ’ᓈᖅᐸᕋ ᒎᑎ. ᐊᒻᒪᓗ ᖃᒪᓂ’ᑐᐊᕐᒥᐅᖃᑎᒃᑲ ᒪ’ᓈᖅᐸᑉᓯ ᒪᕐᕈᐃᖅᓱᖓ ᒪᓕᒐᓕᐅᖅᑎᙳᖅᓯᒪᓕᕋᒪ ᐱᓕᕆᑦᓯᐊᕐᓂᓗᖓᐃᓐᓇᖅᖢᖓ ᑕᐃᒪᙵᑦ ᒪᓕᒐᓕᐅᖅᑎᙳᕋᒪ. ᐱᓕᕆᑦᓯᐊᖅᑐᐃᓐᓇᕐᓂᓗᓐᓂᐊᖅᐳᖓ ᑕᐃᒪᙵᑦ ᒪᓕᒐᓕᐅᖅᑎᙳᕋᒪ, ᐱᓕᕆᐊᑦᓯᐊᖅᑐᐃᓐᓇᕐᓂᓗᕐᓂᐊᖅᐳᖓ ᐅᑭᐅᓂᒃ ᖃᐃᔪᓂᒃ ᓯᑕᒪᓂᑦ. ᐊᒻᒪᓗ ᑮᓇᐅᔭᓕᕆᔨᒋᓚᐅᖅᑕᕋ ᐹᓪ ᓂᐸᕐᔪᐊᖅ ᒪ’ᓇᐅᔪᑎᑦ ᐃᑲᔪᖓᐃᓐᓇᓚᐅᕋᕕᑦ ᑕᐃᒪᙵᑦ

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 15 ᓂᕈᐊᒐᖅᓴᙳᕋᒪ. ᐊᒻᒪ ᒪᓕᒐᓕᐅᖅᑎᐅᖃᑎᒃᑲ ᒪ’ᓇᐅᔪᓯ. ᑑᓂ ᐋᖁᐊᖅ ᐅᒡᒍᕐᓇᖅᑑᒐᓗᐊᖅ ᓄᖅᑲᕐᓂᐊᓕᓚᐅᕋᕕᑦ ᒪ’ᓇᐅᔪᑎᑦ, ᑕᐃᒪᙵᑦ ᒪᓕᒐᓕᐅᖅᑎᙳᕋᒪ ᐃᑲᔪᖅᑕᓚᐅᕋᒻᒪ. ᐊᒻᒪᓗ ᐅᖃᖅᑎᑦᓯᔨᐅᑎᓪᓗᑎᑦ ᐅᖃᐅᑦᑐᐃᑦᓯᐊᖅᑕᖅᖢᑎᑦ. ᐸᑎᑲᓪᓚᑦᓯᖃᑦᑕᓚᐅᕋᕕᑦ ᐊᒡᒐᐅᑎᓐᓂᒃ, ᐱᑦᓯᐊᕐᓂᓗᒃᑐᑎᑦ ᒪ’ᓇᐅᔪᑎᑦ. ᐊᒻᒪ ᒥᓂᔅᑕᒧᑦ ᐃᓕᔭᐅᒻᒫᕋᒪ ᒪ’ᓇᐅᔪᓯ, ᒪ’ᓈᖅᐳᖓ ᒪ’ᓇᐅᔪᓯ ᖃᓄᖅ ᐱᓂᐊᓚᐅᖅ, ᖃᓄᖅ ᓂᕈᐊᒐᐅᓂᐊᓚᐅᕐᒪᖔᕐᒫ ᓇᓗᓇᓚᐅᖅᑑᒐᓗᐊᖅ ᒪ’ᓇᐅᔪᓯ. ᐱᓕᕆᖃᑎᒌᑦᓯᐊᕐᓂᓗᓐᓂᐊᖅᐳᒍᑦ. ᓄᓇᕗᒻᒥᐅᑕᓗᒃᑖᓂᒃ ᐃᑲᔪᕈᒪᒐᑉᑕ ᓂᕈᐊᒐᒃᓴᖑᓂᓗᓚᐅᖅᐳᒍᑦ ᓄᓇᑉᑎᓐᓂ. ᐊᒻᒪᓗ ᑭᖑᓪᓕᖅᐹᒥᒃ ᐃᓚᒋᔭᒃᑲ ᒪ’ᓈᖅᐸᑉᑲ ᓯᕗᓪᓕᖅᐹᕐᒥᒃᒃ ᐊᑖᑕᒐ, ᐊᓈᓇᒐᓗ. ᐱᖃᑎᒐᓗ ᒥᐊᕋᓕᓐ, ᕿᑐᕐᖓᕗᓪᓗ ᑖᒪᓂᒃ ᐃᖃᓗᒃ, ᐱᖃᑎᑦᓈᖓᓗ ᕌᓐᓴ ᐃᒡᓗᑦᑎᓐᓂ ᓯᓂᒃᑕᖃᑕᐅᑦᑕᖅᑐᖅ. ᐊᒻᒪᓗ ᐴᕌᑦ ᑕᒫᓃᑦᑐᖅᑕᐅᖅ ᐃᖃᓗᙳᐊᓂᒃ ᑖᑑᖃᓗᙳᐊᖅᑑᓪᓗᐊᓕᑕᐃᓐᓇᕐᒪᑦ ᑎᑭᐊᓪᓚᒃᓚᐅᔪᖅ. ᐊᖃᓂᖅ ᐊᐃᓯᒪᔪᖅ ᒫᓐᓇ, ᐊᒻᒪᓗ ᓕᓕ ᐸᓂᒐ ᑕᒫᓃᑦᑐᖅᑕᐅᖅ, ᒪᓕᕆᐊᓐᓈᖓᓗ ᓄᑳ ᒫᒋ, ᐸᓂᒃ ᐊᒻᒪ ᐃᕐᖑᑕᖅᐳᑦ ᕋᐃᓕ. ᒪ’ᓈᓗᒃᑖᖅᐸᑉᓯ, ᒪᑭᑕᖓᐃᓐᓇᖅᑑᓪᓗᐊᕋᒪ ᐃᑲᔪᒐᐅᖏᓐᓇᓱᕋᒪ. ᒪ’ᓇ, ᐅᖃᖅᑎᑦᓯᔩ. >>ᐸᑦᑕᒃᑐᖅᑐᑦ ᐅᖃᖅᑎ: ᖁᔭᓐᓇᕐᒦᒃ. ᒪᓕᒐᓕᐅᖅᑏᑦ ᐅᖃᐅᓯᖏᑦ. ᖁᑦᑎᑦᑐᒧᑦ ᒪᓕᒐᓕᐅᖅᑎ, ᒥᔅᑕ ᑕᖅᑐ, ᐃᕝᕕᓪᓕ. ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 16 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᖁᑦᑎᒃᑐᖅ ᑭᒡᒐᖅᑐᕐᓂᐊᕐᓗᒍ ᑕᖅᑐ: ᖁᔭᓐᓇᒦᒃ, ᐅᖃᖅᑏ. ᐊᒻᒪ ᐊᓕᐊᓇᐃᒍᓱᖃᑎᒋᕙᒋᑦ ᑕᑉᐹᓃᑦᑐᓐᓇᕋᕕᑦ. ᐊᒻᒪ ᔮᓐ ᒪᐃᓐ, ᓯᕗᓕᖅᑎᒧᑦ ᐃᓕᔅᓯᓗ ᑕᑉᐹᓃᑦᑐᓯ ᐊᓕᐊᓇᐃᒍᓱᖃᑎᒋᕙᔅᓯ. ᓂᕆᐅᓐᓂᖃᑦᑎᐊᖅᐳᖓ ᐱᓕᕆᖃᑎᒌᑦᑎᐊᓛᕋᑦᑕ ᐅᖃᓪᓚᒋᐅᕋᒪ ᓴᔪᖃᑦᑕᕈᓐᓃᓛᖅᑐᔅᓴᐅᒐᓗᐊᖅᐳᖓ. ᖁᔭᓕᔪᒪᓪᓗᖓ ᐃᓚᒃᑲ ᐃᓕ ᓄᓕᐊᕋ, ᑲᔪᓯᔪᓐᓇᖅᑎᑦᑎᓚᐅᕐᒪᑦ ᕿᑐᕐᖓᒃᑲᓗ, ᐊᒻᒪ ᑲᔪᓯᖁᔨᖃᑦᑕᓚᐅᕐᒪᑦ ᔨᐅᕋᒥ ᑑᕐᖔᓗᒃ ᖁᔭᓐᓇᒦᒃ. ᑕᐃᒪᓗ. >>ᐸᑦᑕᒃᑐᖅᑐᑦ ᐅᖃᖅᑎ: ᖁᔭᓐᓇᕐᒦᑦᑕᐅᖅ. ᓴᖑᓗᖓ ᐃᖃᓗᐃᑦ ᓯᓈᓄᑦ, ᒥᔅᑕ ᐳᕉᔅᑐ. ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 17 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐃᖃᓗᐃᑦ−ᓯᓈ ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐊᒻᒪᓗ ᖁᕕᓲᑎᕙᒋᑦ. ᑕᑉᐹᓂ ᐃᒃᓯᕚᖅᑐᑎᑦ ᖁᕕᐊᓇᖅ ᐊᒻᒪᓗ ᖁᔭᓐᓇᒦᖅᐳᖓ, ᐅᖃᖅᑎᒋᔭᐅᓚᐅᖅᑐᖅ ᑕᐃᓐᓇ ᐊᒃᓱᐊᓗᒃ ᐅᕙᑦᑎᓐᓂᒃ ᐃᑲᔪᓚᐅᕐᒪᑦ. ᐊᒻᒪᓗ ᖁᕕᐊᓲᑎᒋᔪᒪᒋᓪᓗᒍ ᒥᔅᑕ ᒪᐃᓐ ᐊᒻᒪᓗ ᑭᒃᑯᓕᒫᑦᑎᐊᑦ, ᑕᕝᕙᓂ ᐃᒃᓯᕚᖅᑐᑦ. ᐊᒃᓱᕈᖅᖢᑕ ᑕᕝᕗᖓ ᐃᓕᓇᓱᓚᐅᖅᓯᒪᒐᑦᑕ, ᐊᔅᓱᕉᑎᒋᑦᑎᐊᖅᓯᒪᒐᑦᑎᑯᑦ ᐱᓇᓱᐊᕈᓯᒐᓴᓐᓂᒃ. ᐃᖅᑲᓇᐃᔭᖃᑎᒌᒍᓐᓇᕐᓂᐊᖅᑐᒍᑦ ᐊᒃᓱᕈᕐᓗᑕ. ᓄᓇᕗᒻᒥᐅᑦ ᑭᒡᒐᖅᑐᕐᓗᑎᒃᑯᑦ, ᑕᑎᒋᔭᐅᔪᓐᓇᕋᑦᑕ. ᐊᒻᒪᓗ ᑕᕝᕗᖓ ᒥᓂᔅᑕᐃᑦ ᑲᑎᒪᔨᖏᓐᓄᑦ ᐃᓕᔪᓐᓇᓚᐅᕋᒪ, ᐄ’, ᐃᖅᑲᓇᐃᔭᖃᑎᒌᑦᑎᐊᕈᓐᓇᖅᑐᒍᑦ ᑲᑕᑦᑎᑦᑎᔪᒪᓇᙱᓚᖅ. ᐅᖃᖅᑏ, ᖁᔭᓐᓇᒦᕈᒪᔭᒃᑲ ᐃᖃᓗᐃᑦ−ᓯᓈ ᑕᐃᒃᑯᐊ ᐅᕙᓐᓂᒃ ᑕᑎᖃᐃᓐᓇᕈᓐᓇᕐᒪᑕ, ᐅᖃᓪᓚᖃᑎᒋᔪᓐᓇᖃᑦᑕᓚᐅᕋᒃᑭᓪᓗ ᐳᓚᕋᖅᑎᓪᓗᖓ, ᐃᓄᑦᑎᐊᕚᓗᐃᑦ. ᐅᕙᓐᓂᒃ ᒥᒃᓯᑎᖅᐳᖓ ᑭᒡᒐᖅᑐᒃᑲᓐᓂᕈᓐᓇᕋᒃᑭᑦ ᑕᕝᕙᓂ, ᖁᔭᓐᓇᒦᒃ. ᐊᒻᒪ ᑕᐃᒃᑯᐊ ᐃᓐᓇᐃᑦ ᐱᓗᐊᕐᓗᒋᑦ ᑕᐃᒃᑯᐊ ᖃᕐᒪᓕᐊᖂᖃᑦᑕᕐᒪᑕ ᒪᒃᑯᓗᐊᕋᒪ ᑕᐃᑯᙵᖃᑦᑕᕈᓐᓇᙱᕈᓗᒃᓱᖓ. ᑭᓯᐊᓂ ᐅᖃᐅᔾᔪᐃᑦᑎᐊᖅᑐᐊᓘᖃᑦᑕᓚᐅᖅᑐᑦ ᐅᕙᓐᓂᒃ ᖁᕝᕙᕆᐊᖅᑎᑦᑎᓪᓗᑎᒃ ᑕᐃᑯᙵᓚᐅᖃᑦᑕᕋᒪ ᑕᑯᔭᖅᑐᖅᖢᒋᑦ ᑕᐃᒃᑯᐊ ᐃᓐᓇᐃᑦ. ᐊᒻᒪᓗ ᕿᑐᕐᖓᒃᑲ, ᑕᖅᑐ ᐋᓯᕙᒃ ᓇᐸᑦᓯ, ᐃᑲᔪᖅᓱᐃᑦᑎᐊᕐᒪᑕ ᐅᕙᓐᓂᒃ. ᐅᖃᖅᑏ, ᖁᕕᐊᓱᒋᕗᖓ ᑕᐃᒃᑯᐊ ᓄᓇᕗᑦ ᒐᕙᒪᒃᑯᓐᓂᒃ ᐃᖅᑲᓇᐃᔭᖅᑐᑦ ᖁᔭᓐᓇᒦᕈᒪᒻᒥᔭᒃᑲ ᖃᐅᑕᒫᑦᑎᐊᖅ ᐃᓄᓕᕆᖃᖅᑕᕐᒪᑕ. ᐅᖃᖅᑏ, ᐃᓘᓐᓇᖏᓐᓄᑦ ᐊᖏᖅᑕᐅᔪᒪᕗᖓ ᐃᓱᓕᑦᑎᔪᒪᓪᓗᖓ ᐅᖃᐅᓯᔅᓴᓐᓂᒃ. ᖁᔭᓐᓇᒦᒃ, ᐅᖃᖅᑏ.

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 16 ᐅᖃᖅᑎ: ᒪᓕᒐᓕᐅᖅᑎ ᐊᖏᖅᑕᐅᔪᒪᒻᒪᑦ ᐅᖃᐅᓯᒃᓴᒥᓐᓂᒃ ᐱᐊᓂᒍᒪᓪᓗᓂ, ᐋᒃᑳᖅᑕᐅᕚ? ᑐᓴᙱᓐᓇᒪ ᑲᔪᓯᒋᑦ, ᒥᔅᑕ ᐳᕉᔅᑐ. ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐄ’, ᐊᒻᒪᓗ ᖁᕕᐊᓱᒃᑐᖓ ᑕᐃᒃᑯᐊ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑏᑦ ᖃᐅᑕᒫᑦᑎᐊᖅ ᐊᒃᓱᕈᖃᑦᑕᕐᒪᑕ ᑭᓱᓂᒃ ᐅᖃᐅᓯᖃᔾᔮᖏᑦᑐᖓ ᑭᓯᐊᓂ ᑕᐃᒃᑯᐊ ᖁᔭᓐᓇᒦᕈᒪᔭᒃᑲ ᑕᐃᑲᓃᖃᑦᑕᖅᓯᒪᓂᑰᒐᒪ ᐱᔨᑦᑎᖃᑦᑕᖅᓯᒪᓪᓗᖓ ᑕᖅᑲᒃᑯᓄᖓ ᓄᓇᕗᒻᒥᐅᓄᑦ. ᐊᒻᒪ ᓂᕆᐅᑉᐳᖓ ᓱᓕᑦᑎᐊᓂᕐᒥᒃ ᑐᙵᕕᖃᕐᓗᖓ ᑕᕝᕙᓂ ᐃᒃᓯᕚᕈᓐᓇᕐᓂᐊᒪ ᓄᓇᕗᑦ ᐃᓱᒪᒋᓪᓗᒍ. ᐊᒻᒪᓗ ᓯᕗᓪᓕᖅᐹᑦᑎᐊᖅ ᐆᒻᒪᑎᒐ ᑕᖅᑑᒃᑲᓗ, ᐃᓚᐅᓪᓗᑎᒃ. ᖁᔭᓐᓇᒦᒃ, ᐅᖃᖅᑏ. >>ᐸᑦᑕᒃᑐᖅᑐᑦ ᐅᖃᖅᑎ: ᖁᔭᓐᓇᕐᒦᒃ. ᐊᑎᖁᑎᒃᑲ ᒪᓕᓪᓗᒋᑦ, ᐊᕐᕕᐊᑦ ᐅᐊᓐᓈᓄᑦ ᑎᑭᕋᕐᔪᐊᒧᓪᓗ, ᒥᔅᑕ ᒪᐃᓐ. ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 18 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᐊᕐᕕᐊᑦ ᐅᐃᓐᓇᖓ−ᑎᑭᕋᕐᔪᐊᖅ ᒪᐃᓐ: ᒪ’ᓇ, ᐅᖃᖅᑎᑦᓯᔩ. ᓯᕗᓪᓕᖅᐹᕐᒥᒃ ᐃᓕᑕᕆᓕᕋᑉᑭᑦ ᐅᖃᖅᑎᑦᑎᔨᐅᓂᕆᔭᐃᑦ ᑖᓐᓇ ᐃᒃᓯᕙᐅᑕᒃ ᐊᑐᓕᒃᑲᑦ ᓈᒻᒪᒋᑦᓯᐊᖅᑑᔭᕋᕐᓂ ᖁᕕᐊᓲᖃᑎᒋᕙᒋᑦ ᑲᑎᒪᔨᐅᓕᓵᙱᓐᓇᕕᓪᓗ ᑖᓐᓇ ᐃᒡᓗᕐᔪᐊᖅ ᖃᐅᔨᒪᑦᓯᐊᕋ’ᓂ. ᐊᐅᓚᑦᓯᑦᓯᐊᕐᓂᐊᕋᕕᑦ ᑲᑎᒪᓂᐅᓂᐊᖅᑐᓂᒃ ᖃᐅᔨᒪᒐᒪ ᖁᕕᐊᓱᖃᑎᒋᕙᒋᑦ. ᓯᕗᓪᓕᖅᐹᕐᒥᒃ ᒪᓕᒐᓕᐅᖅᑎᐅᓂᕋ ᐊᑐᕐᓗᒍ ᐅᖃᓪᓚᓗᐊᕐᓂᐊᖅᑐᖓ ᐅᓪᓗᒥ ᐃᓛᒃ ᒫᓐᓇᐅᔪᖅ, ᐊᕐᕕᐊᕐᒥᐅᑦ ᐃᓚᐃᓵᓚᐅᖅᑐᑦ ᓇᓪᓕᒋᒃᖢᒋᑦ ᐃᓱᒪᒋᒃᖢᒋᓪᓗ ᐃᓚᐃᓵᓚᐅᖅᑐ’ᓈᑦ. ᐊᒻᒪ ᓂᕈᐊᖅᑎᒋᔭᒃᑲ ᑭᓯᐊᓂ ᐊᖏᖅᓯᒪᓚᐅᖅᒪᑦ ᐃᓛᒃ ᐱᓕᕆᖁᔨᓚᐅᕐᒪᑕ ᑕᒫᓂᓯᐅᕋᒪ. ᓂᕈᐊᖅᑎᒋᔭᓗᑦᑖᒃᑲ ᑎᑭᕋᕐᔪᐊᕐᒥ ᐊᕐᕕᐊᓂᓪᓗ ᓂᕈᐊᓚᐅᖅᑐᓗᒃᑖᑦ ᐅᕙᓐᓂᓪᓗ ᓂᕈᐊᓚᐅᙱᒃᑑᒐᓗᐃᑦ ᑭᒡᒐᖅᑐᕐᓂᐊᕋᒃᑭᑦ ᐊᔾᔨᒌᑎᑦᓯᐊᕐᓗᒋᑦ ᖃᐅᔨᒪᖁᒃᖢᒋᑦ. ᐃᓚᒋᔭᒃᑲ ᓄᓕᐊᕋ ᐊᒫᓐᑕ ᓄᑕᖅᑲᒃᑲᓪᓗ ᒐᔅᑎᔅ, ᐆᑎᓐ, ᒪᐃᕝ, ᐃᑲᔪᖅᑐᐃᖏᓐᓇᐅᔭᓚᐅᖅᑐ’ᓈᑦ ᓂᕈᐊᒐᒃᓴᐅᑎᓪᓗᖓ. ᐃᕐᓂᕋ ᐊᓪᓛᑦ ᐊᐱᕆᑦᑕᓚᐅᕐᒪᑦ ᓂᕈᐊᖅᑕᐅᓂᐊᕋᓗᐊᖅᐲᑦ? ᐊᐱᕆᑦᑕᓚᐅᖅᑐ’ᓈᖑᒻᒪᑦ ᐅᖃᐅᑎᑦᑕᖅᓯᓐᓇᓚᐅᒐᕋ ᐃᓱᒫᓗᙱᒥᐊᕆᑦ ᑲᑎᒪᔨᐅᔪᓂᒃ ᐃᓱᒪᓗᐊᙱᒥᐊᕆᑦ ᒪᒃᑯᒃᑐᓐᓈᖑᒐᓗᐊᕋᕕᑦ. ᓂᕈᐊᒐᒃᓴᐅᑎᓪᓗᖓ ᐃᙱᖅᑎᐅᑦᑕᓚᐅᖅᑐᑦ ᑎᑎᕋᐅᔭᖅᑎᐅᑦᑕᓚᐅᖅᑐᑦ ᑕᐃᒍᐊᖅᖢᒋᑦ ᐃᑲᔪᖅᑐᔾᔫᓯᒪᒻᒪᑦ, ᓴᐅᒥᒃ ᓂᒡᒍᐊᖅᓯ, ᕗᕋᐃᔭᓐ ᐋᕈᐊᓛᖅ, ᔮᑯᐱ ᑖᕘ, ᐊᒻᒪ ᐃᙱᖅᑏᑦ ᐃᙱᕆᐊᕋᓗᐊᕈᒪ ᑖᓐᓇ ᐱᙳᐊᕐᕕᒃ ᐃᓄᐃᕈᑎᓂᐊᕋᓗᐊᕐᒪᑦ, ᑭᓯᐊᓂ ᑖᒃᑯᐊ ᐃᙱᖅᑎᓪᓚᕇᑦ ᐃᙱᓕᕌᖓᑕ ᐃᑎᖅᑎᖅᐸᓪᓕᐊᓱᕐᒪᑕ ᐃᓄᐃᑦ ᑕᒪᓐᓇ ᐊᑑᑕᐅᑦᑕᓱᕐᒪᑦ. ᔭᐃᑯᑉ ᐅᖃᑦᓯᐊᖅ, ᐅᐃᓕᐊᒻ ᐹᑉ, ᐃᓱᒪᑕᐅᔾᔪᐊᖅ ᐊᒻᒪ ᐋᓚᓐ ᕗᐃᓯ. ᐊᒻᒪ ᑕᐃᒪᒃᑲᓐᓂᖅ ᐃᙱᖅᑎᐅᓚᐅᖅᑐᑦ. ᐅᖃᖅᑎᑦᓯᔩ, ᓇᐃᑦᑐᒐᔮᒥᒃ ᐅᖃᐅᓯᔅᓴᖃᒃᑲᓐᓂᕋᒪ ᐊᖏᖅᑕᐅᓱᐊᕋᓗᐊᖅᐳᖓ ᐅᖃᐅᓯᒃᓴᕆᔭᒃᑲ ᓄᖑᑦᓱᐊᖅᖢᒋᑦ. ᒪ’ᓇ, ᐅᖃᖅᑎᑦᓯᔩ. ᐅᖃᖅᑎ: ᖁᔭᓐᓇᕐᒦᒃ. ᑖᓐᓇᒎᖅ ᒪᓕᒐᓕᐅᖅᑎ ᐅᖃᐅᓯᒃᓴᖏᓐᓂᒃ ᐱᔭᕇᖅᓯᔪᒪᓪᓗᓂ ᐊᖏᖅᑕᐅᔪᒪᒐᓗᐊᕐᒪᑦ, ᐋᒃᑳᖅᑐᖃᖅᐹ? ᑐᓴᙱᓐᓇᒪ, ᒥᔅᑕ ᒪᐃᓐ ᑲᔪᓯᒋᑦ. ᒪᐃᓐ: ᒪ’ᓇ, ᐅᖃᖅᑎᑦᓯᔩ. ᐊᒻᒪ ᑲᑎᒪᔨᐅᖃᑎᒃᑳ, ᒪ’ᓇ. ᐃᑲᔪᖅᑐᐃᓚᐅᖅᑐᓪᓗ ᐅᑯᐊ ᑕᐃᒍᐊᖅᖢᒋᑦ, ᑮᓇᐅᔭᓕᕆᔨᒋᓚᐅᒐᕋ ᐹᓪ ᒥᑭᔪᖏᐊᖅ, ᑐᐊᕇᓐ ᓴᓈᖅ ᐃᑲᔪᕐᔪᐊᓚᐅᖅᑐᖅ, ᐃᐅᕆᒃ ᐊᓄᐃ, ᒪ’ᓇᒃᓯᐊᒥᐊᖅ ᓄᑲᖅᑎᖅ. ᐊᒻᒪ ᑎᑭᕋᕐᔪᐊᕐᒥ ᒪᓄ ᓇᑦᑕᖅ, ᕇᑕ ᐳᐊᑐᓗ ᑐᙵᓇᐃᓐᓇᐅᔭᖅᑕᕋᑉᓯ ᒪ’ᓇ. ᐊᒻᒪ ᒪᐃᑯ ᐊᒻᒪ ᓚᕖᓂᐊ ᐊᖑᑎᑐᐊᖅ. ᐊᒻᒪ ᑕᐃᙱᑕᕋᓗᐊᒃᑲ ᐊᒥᓲᒻᒥᒻᒪᑕ. ᑕᐃᒪ ᓂᕈᐊᒐᒃᓴᐅᑎᑦᖢᖓ ᐊᔾᔨᒌᙱᑦᑐᕈᓈᓂᒃ ᓂᕈᐊᖅᑎᒋᔭᓐᓂᒃ ᐅᖃᖃᑎᖃᖅᑕᐅᔭᓚᐅᕋᒪ ᒥᔅᑕ ᐊᕿᐊᕈᖅᑎᑐᑦ ᐱᓱᓗᓐᓇᑦᓯᐊᒥᐊᓚᐅᕐᒪᑦ ᓴᓗᒃᑎᓚᐅᕋᒪ ᐋᒡᓛᑦ ᐱᓱᓗᓂᓕᒡᔪᐊᖅ ᐅᑉᓗᑕᒫᑦ. ᑭᓯᐊᓂ ᑖᒃᑯᐊ ᐅᖃᐅᓯᒃᓴᕆᔭᐅᑦᑕᓚᐅᖅᑐᑦ ᓂᕈᐊᖅᑎᒋᔭᒻᓂᒃ ᖃᓄᖅ ᐊᑑᑎᓕᒃᓯᐊᕐᒥᐊᕐᓂᒃ ᖃᐃᑎᕆᓚᐅᕐᒪᑕ ᐃᓱᒪᒋᔭᕐᒥᓂᒃ, ᐊᑐᓕᖁᔭᕐᒥᓐᓂᒃ, ᐋᓄᐊᖅᓲᑎᒋ ᖃᓄᖅ

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 17 ᐱᓕᕆᐊᕆᖁᔭᐃᑦ. ᓂᕈᐊᖅᑎᒋᔭᕗᑦ ᐅᕙᒍᓗᑦᑖᖅ ᑕᕝᕙᓂ ᑲᑎᒪᔨᐅᔪᑎᒍᑦ ᓂᕈᐊᖅᑎᒋᔭᕗᑦ ᐱᓕᕆᖁᔨᓯᒪᒻᒪᑕ ᐊᔾᔨᒌᙱᑦᑐᓂᒃ. ᑖᒃᑯᐊ ᐅᖃᐅᓯᒃᓴᕆᔭᖏᑦ ᐳᐃᒍᕆᐊᖃᕐᓂᐊᙱᓐᓇᑉᑎᒍᑦ ᑖᒃᑯᐊ ᐅᑭᐅᑦ ᓯᑕᒪᑦ ᖃᐃᔪᑦ ᑕᑯᑉᓗᒋᑦ. ᑕᕝᕙ ᓂᕈᐊᖅᑎᒋᔭᕗᑦ ᐃᑲᔪᖅᑐᐃᒻᒪᑕ ᐅᕙᑉᑎᓐᓂᒃ, ᐱᐅᔪᐃᓐᓇᕐᓂᒃ ᐅᖃᐅᓯᒃᓴᖃᖅᑕᖏᑦᑑᒐᓗᐃᑦ ᐱᐅᔪᐃᓐᓇᐅᖏᒻᒪᑕ ᒐᕙᒪᐅᑉ ᐱᓕᕆᐊᖏᑦ ᒫᓐᓇᐅᔪᖅ ᐋᖅᑭᒋᐊᓕᓐᓂᒃ ᐱᑕᖃᓪᓚᕆᒻᒪᑦ. ᑭᓯᐊᓂ ᑖᒃᑯᐊ ᓂᕈᐊᖅᑎᒋᔭᕗᑦ ᑐᙵᕕᒌᓐᓇᐅᔭᕈᑉᑎᒍ ᐅᑭᐅᓄᑦ ᓯᑕᒪᓄᑦ, ᐆᒻᒪᑎᒥᙶᖅᓯᒪᔪᓂᓪᓗ ᑖᒃᑯᐊ ᐅᖃᐅᓯᒃᓴᕆᔭᖏᑦ ᐱᓕᕆᐊᕆᖁᔭᖏᑦ ᐆᒻᒪᑎᒥᐅᑕᕆᒍᑉᑎᒍ ᐱᐅᓂᖅᓴᕐᒧᑦ ᑐᕌᕐᓂᐊᖅᑐᒍᑦ. ᐃᑲᔪᕐᓂᖃᕐᓂᐊᖅᑐᒍᑦ ᐅᕙᒍᑦ ᑕᒪᑉᑕ. ᑭᖑᓪᓕᖅᐹᒥᒃ ᐅᖃᕈᐊᓚᐅᖅᑐᖓ ᑖᓐᓇ ᐅᖃᐅᓯᖅ ᐅᖃᐅᓯᖅ ᑕᑯᒃᓱᒍ ᖃᓪᓗᓈᑐᑦ, (ᑐᓵᔨᑎᒎᓕᖅᑐᖅ) ᒪᓕᒐᓕᐅᖅᑎᐅᖃᑕᐅᔪᖅ, (ᑐᓵᔨᑎᒎᕈᓐᓃᖅᑐᖅ) ᐊᔾᔨᒌᑦᑐᓗᒃᑖᖑᒐᑦᑕ ᑕᕝᕙᓂ, ᑖᓐᓇ ᐊᑕᐅᓯᓐᓈᖑᒻᒪᑦ ᑭᓯᐊᓂ ᒪᓕᒐᓕᐅᕐᕕᒃ ᐊᑕᐅᓯᐅᙱᒻᒪᑦ, ᑲᑎᒪᕝᕕᒃ, ᐱᓕᕆᖃᑎᒌᑦ ᑕᕝᕙ ᑕᒪᓐᓇ ᐃᓱᒪᒋᓕᐅᒥᓚᐅᕋᒃᑯ ᑲᑐᔾᔨᖃᑎᒌᓐᓂᖅ ᐱᓕᕆᖃᑎᒌᓐᓂᖅ ᑕᕝᕙᓂ ᐃᒡᓘᑉ ᐃᓗᐊᓂ ᐊᑐᖅᑕᕐᓂᐊᕋᑉᑎᒍ ᑕᒪᓐᓇ ᐊᑑᑕᐅᑦᑕᕐᓂᐊᖅᑐᖅ ᓄᓇᕗᒻᒥᐅᓄᑦ. ᐊᑏ, ᐊᑐᑦᓯᐊᖅᑕᕐᓚᕗᑦ ᐅᑭᐅᑦ ᖃᐃᔪᑦ ᑕᑯᒃᖢᒋᑦ ᓄᓇᕗᒻᒥᐅᑕᐃᓪᓗ ᐱᔾᔪᑎᒋᓪᓗᒋᑦ. ᒪ’ᓇ, ᐅᖃᖅᑎᑦᓯᔩ. >>ᐸᑦᑕᒃᑐᖅᑐᑦ ᐅᖃᖅᑎ: ᒪ’ᓈᖅᐸᒋᑦᑕᐅᖅ. ᑭᖑᓪᓕᖅᐹᖑᖅᑰᖅᑐᖅ ᑭᓯᐊᓂ ᑖᓐᓇ ᐅᖃᐅᓯᒃᓴᖃᕐᒥᔪᖅᑕᐅᖅ, ᑲᖏᖅᓯᓂᐅᑉ ᐅᐊᓐᓇᖓᓄᑦ ᒪᓕᒐᓕᐅᖅᑎ ᓴᒻᒧᖅᑐᖅ. ᐃᓕᓴᕆᕙᒋᑦ. ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 19 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᑲᖏᖅᖠᓂᖅ ᐊᐅᓐᓇᖓᓄ−ᐃᒡᓗᓕᒑᕐᔪᒃ ᓴᒻᒧᖅᑐᖅ: ᖁᔭᓐᓇᒦᒃ, ᐅᖃᖅᑎᑦᑎᔩ. ᓯᕗᓪᓕᕐᒥᒃ ᖁᔭᓕᔪᒪᕗᖓ ᐃᑲᔪᖅᑎᒋᓚᐅᖅᑕᓐᓂᑦ ᐊᒻᒪᓗ ᐊᖏᖅᓯᒪᓚᐅᖅᑐᓄᑦ ᓂᕈᐊᒐᒃᓴᐅᑎᓪᓗᖓ, ᓄᓕᐊᕋ, ᓄᑕᖅᑲᒃᑲ, ᓄᓕᐊᕋ ᒥᓯᐅᓪ, ᓵᑦ, ᓗᐃᑦ, ᑕᓂᐅᓪ, ᑯᕆᔅᑏᑦ. ᑕᐃᒃᑯᐊᓗ ᓂᕈᐊᖅᑎᒋᓚᐅᖅᑕᒃᑲ ᑲᖏᖅᓯᓂᕐᒥᑦ ᐊᒻᒪ ᐃᒡᓗᓕᒑᕐᔪᒻᒥᑦ ᖁᔭᓐᓇᒦᒻᒪᕆᐊᓗᒃ. ᐅᓪᓛᖅ ᐊᑦᑕᖅᓯᓪᓗᖓ ᐃᓱᒪᒋᓗᐊᖅᑕᓯ ᐅᖃᐅᓯᕆᖃᑦᑕᓚᐅᕐᒥᒐᑉᓯᐅᒃ ᑕᐃᒃᑯᐊᑦᑕᐅᖅ ᐅᑭᐅᓂ ᓯᑕᒪᓂᑦ ᐊᒡᒋᖅᑐᓂᒃ ᐱᓕᕆᐊᕆᒋᐊᕐᓂᐊᖅᐸᒃᑲ ᐃᑲᔪᖅᑎᒋᔪᐃᑦ ᑕᒪᒃᑯᐊ ᓂᕈᐊᖅᑕᐅᖃᑎᒋᓯᒪᔭᒃᑲ. ᐃᓄᑑᓪᓗᓂ ᓱᓇᑐᐃᓐᓇᑦᑎᐊᓂ ᐊᔪᕐᓇᕐᒪᑦ, ᐃᑲᔪᖅᑎᒌᓪᓗᑕ ᑭᓯᐊᓂ ᐱᓕᕆᖃᑎᒌᑦᓯᐊᕈᑉᑕ ᓄᓇᕗᑦ ᐃᓱᒪᒋᓗᒍ ᐱᕈᖅᐹᓪᓕᕋᔭᖅᑐᖅ, ᐃᑲᔪᖅᑎᐊᕆᐊᖃᕐᓃᑦ ᐃᓅᖃᑎᑦᑎᓐᓂ. ᑕᐃᓐᓇᓗ ᑮᓇᐅᔭᓕᕆᔨᒋᓚᐅᖅᑕᕋ ᖁᔭᓐᓇᒦᕈᒪᑉᓗᒍ ᑖᒻ ᓴᒻᒧᖅᑐᖅ, ᖁᔭᓐᓇᒦᒻᒪᕆᐊᓗᒃ ᐊᒻᒪᓗ ᐃᑲᔪᖅᑎᒌᓐᓇᖅᐸᒃᖢᑎᒃ ᓇᓗᓕᕌᖓᒪ ᐅᖃᓗᒡᕕᒋᕙᒃᖢᑎᑦ ᐅᖃᐅᔾᔪᖅᑎᒋᕙᒃᖢᒍ, ᖃᐅᔨᒪᔭᐅᖅᑰᖅᑑᒐᓗᐊᖅ ᐃᓚᖏᓐᓄᑦ ᒪᓕᒐᓕᐅᖅᑎᓄᑦ ᑖᒻ ᓴᒻᒧᖅᑐᖅ, ᑎᓴᒪᖓᓐᓂ ᒪᓕᒐᓕᐅᕐᕕᒻᒥ ᑲᑎᒪᔨᐅᖃᑕᐅᓚᐅᖅᓯᒪᔪᖅ. ᖁᔭᓐᓇᒦᒃ, ᐅᖃᖅᑎᑦᑎᔩ. >>ᐸᑦᑕᖅᑐᖅᑐᑦ ᐅᖃᖅᑎ: ᐄ, ᖁᔭᓐᓇᒦᑦᑕᐅᖅ. ᑕᕐᒪᕐᓂᕈᒪ ᒪᒥᐊᕝᕕᒋᑦᓯᐊᖅᐸᕋ ᑖᓐᓇ ᑭᖑᓪᓕᖅᐹᖑᖔᖅᑐᖅ ᖁᕐᓗᖅᑑᕐᒧᑦ ᒪᓕᒐᓕᐅᖅᑎ ᒥᔅᑕ ᖁᓕᒃᑖᓇ, ᒪᒥᐊᕝᕕᒋᕙᒋᑦ. ᒪᓕᒐᓕᐅᖅᑏᑦ ᐅᖃᐅᓯᒃᓴᖏᑦ 20 – 7(1): ᐃᓱᒪᒋᔭᖏᑦ ᓂᕈᐊᖅᑕᐅᓚᐅᖅᑎᓪᓗᒍ ᖁᓪᓗᖅᑐᖅ ᑭᒡᒐᖅᑐᕐᓂᐊᕐᓗᒍ ᖁᓕᒃᑖᓇ: (ᑐᓵᔨᑎᒍᑦ) ᖁᔭᓐᓇᒦᒃ, ᐅᖃᖅᑏ. ᓯᕗᓪᓕᖅᐹᑦᑎᐊᕐᒥᒃ ᖁᓪᓕᖅᐹᕆᓗᒍ ᐅᕙᓂ ᒪᓕᒐᓕᐅᖅᑎᓕᒫᑦᑎᐊᑦ ᓂᕈᐊᖅᑕᐅᓚᐅᖅᑐᐃᑦ ᐆᒧᖓ ᑲᑎᒪᕐᔪᐊᕐᕕᒻᒧᑦ ᐊᒻᒪ ᔅᑖᓐᓕ ᐊᓇᑉᓚᒃ, ᐹᐱ ᐊᓇᑉᓚᒃ ᑕᐃᒃᑯᐊ ᐊᑎᕐᒥᓂᑦᑕᐅᖅ ᓴᖅᑭᖅᓯᔪᒻᒪᑕ ᓂᕈᐊᕋᔅᓴᐅᓪᓗᑎᒃ. ᐊᖏᖅᓯᒪᓂᖃᑦᑎᐊᕐᓗᓂ ᐱᒍᒪᓂᖃᑦᑎᐊᕐᓗᓂ ᐱᔨᑦᑎᕋᕐᓇᕐᖓᑦ ᓄᓇᖅᑲᑎᑦᑎᓐᓂᑦ ᐊᒻᒪᑦᑕᐅᖅ ᖁᔭᓐᓇᒦᒃ ᐃᓱᒪᖅᓱᖅᑐᑕ ᓂᕈᐊᕈᓐᓇᖃᑕᐅᓚᐅᕋᔅᓯᑦ. ᓂᕈᐊᖅᑎᒋᓯᒪᔭᒃᑲ ᖁᔭᓐᓇᒦᒃ, ᐅᑉᐱᕆᔭᐅᓚᐅᕋᒪ ᐊᒻᒪ ᑲᔪᖏᑦᑎᐊᖅᑐᖓ ᐃᓕᔅᓯᓐᓂ ᐱᓕᕆᔾᔪᔾᔨᒋᐊᔅᓴᖅ ᐅᕙᓃᒃᑲᒪ ᐅᕙᓃᑎᑕᐅᒐᒪ ᐃᓕᔅᓯᓐᓄᑦ ᐊᒻᒪ ᐃᓕᕗᖓ ᑭᒡᒐᖅᑐᐃᓂᐊᕐᓗᖓ ᐃᓕᔅᓯ ᐱᒍᒪᔭᖏᓐᓂᑦ ᓯᕗᓪᓕᐅᖁᔭᖏᓐᓂᓪᓗ ᐊᒻᒪ ᓴᖅᑭᖁᔭᔅᓯᓐᓂᒃ ᓄᓇᓕᔅᓯᓐᓂ.

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 18 ᒫᓐᓇ ᑕᐃᓯᒍᒪᒻᒥᒐᒪ ᕿᑐᕐᖓᒃᑲ, ᐃᕐᖑᑕᒃᑲᓗ ᑯᐃᓐᑎᑦ, ᕕᓐᑕᕐ, ᓵᑦ ᐊᒻᒪ ᑕᓐᑐᕋ. ᐃᑲᔪᖅᓯᖅᑕᐅᓐᓂᖏᒃᑯᒪ ᐅᕙᓃᒃᑲᔭᙱᓐᓇᒪ ᐅᓪᓗᒥ. ᒫᓐᓇ ᐅᐱᒍᓱᒍᒪᒐᒪ ᐊᔾᔨᐅᖏᒻᒪᕆᑦᑐᒥᒃ ᐃᓅᓯᓐᓂᓗ ᐱᒻᒪᕆᐊᓘᓯᒪᔪᒥᒃ ᓄᓕᐊᕆᓚᐅᖅᑕᕋ ᒥᓕ ᖁᓕᒃᑖᓇ, ᑕᐃᓐᓇ ᖁᕐᓗᖅᑑᖅ ᐆᒻᒪᑎᒋᓪᓚᕆᒻᒪᒍᒃ ᐃᓅᓯᓕᒫᖅ ᐱᓯᒪᑦᑎᖃᑦᑕᓚᐅᖅᑐᖅ ᐊᔅᓱᕈᖅᑐᓂ ᐃᓱᒪᒃᑯᓪᓗ ᓴᙱᔪᐊᓗᒻᒥᒃ ᐃᑲᔪᕐᓂᖃᖃᑦᑕᓚᐅᕐᖓᑦ ᐅᑉᐱᕈᓱᓐᓂᖃᑦᑎᐊᖅᑐᓂ ᖁᕐᓗᖅᑑᕐᒥ, ᖁᕐᓗᖅᑑᕐᒧᐃᓂᓪᓗ. ᓱᓕ ᐊᔪᕈᖅᓯᐅᑎᕙᑉᐹᖓ ᑐᑭᒧᐊᑦᑎᐸᑉᐹᖓ ᐅᓪᓗᒥᒧᑦ ᐊᒻᒪ ᓇᔅᓴᐃᓐᓇᕐᓂᐊᖅᑲᒃᑲ ᐅᕙᖓ ᐃᖅᑲᓇᐃᔮᖓᓄᑦ. ᒥᑭᓪᓕᑎᖅᑯᖓ ᐅᕙᓂ ᐃᔅᓯᕚᖃᑕᐅᒍᓐᓇᕋᒪ ᐃᓕᔅᓯᓐᓄᓕᒫᖅ ᐅᓪᓗᒥ, ᐊᒻᒪ ᐃᖅᑲᓇᐃᔭᕆᐊᕈᓐᓇᖅᓯᔪᖓ ᐊᔅᓱᕐᓗᕐᓗᖓ ᐃᓕᔅᓯᓐᓄᑦ. ᖁᐊᓇ. >>ᐸᑦᑕᖅᑐᖅᑐᑦ ᐅᖃᖅᑎ: ᖁᐊᓈᖅᐸᒋᑦᑕᐅᖅ. ᑲᑎᒪᔾᔪᑎᑦᑎᓐᓄᑦ ᑲᔪᓯᓗᑕ ᓈᓴᐅᑎᖓ 5, ᐳᓛᕆᐊᖅᓯᒪᔪᓂᑦ ᐃᓕᓴᖅᓯᓂᖅ. ᐊᑎᓕᐅᖅᐸᓪᓕᐊᓂᐊᕐᒥᒐᒃᑭᑦᑕᐅᖅ ᐃᓵᒃᓯᒪᔪᓂᑦ. ᐱᒋᐊᖁᑎᖃᖅᑳᕐᓗᒍ ᒪᓕᒐᓕᐅᖅᑎ ᖃᒪᓂᑦᑐᐊᕐᒧᑦ ᒥᔅᑕ ᓯᒪᐃᓚᒃ. ᑲᑎᒪᔾᔪᑎᒃᓴᖅ 5: ᐃᓕᑕᖅᓯᓂᖅ ᑐᓵᔭᖅᑐᖅᓯᒪᔪᓂᑦ ᒪᓕᒐᓕᐅᕐᕕᒻᒧᑦ ᓯᒪᐃᓚᒃ: ᒪ’ᓇ, ᐅᖃᖅᑎᑦᓯᔩ. ᓯᕗᓪᓕᖅᐸᐅᔫᓪᓗᐊᕋᒪ. ᒪᕐᕉᑯᐊᒃ ᑕᐃᓚᐅᖅᑖᒃᑲ ᕗᕌᑦ ᓯᖓᖅᑎ ᐊᒻᒪᓗ ᓇᔭᖓ ᓕᓕ ᐅᒃᐸᑎᑯ. (ᑐᓵᔨᑎᒎᓕᖅᑐᖅ) ᐊᖏᔪᑦᑎᖅᐹᖁᑎᒐᓗ ᐊᒻᒪᓗ ᒥᓕ ᐃᖃᓗᓐᓅᖃᑕᐅᒍᓐᓇᓚᐅᕐᖓᑎᒃ ᐊᖏᖅᑎᑕᐅᔭᖅᑐᖅᑎᓪᓗᑕ, >>ᐸᒃᑕᑐᖅᑐᑦ ᖁᔭᓐᓇᒦᒃ ᐃᖃᓗᓐᓅᖃᑕᐅᒍᓐᓇᖅᓯᒪᒐᔅᓯᒃ. ᐊᒻᒪ ᐅᖃᖅᑎᒥᓂᖅᐳᑦ ᐃᓕᓴᕆᕙᕋ ᑑᓂ ᐋᖁᐊᖅ, ᖁᔭᓐᓇᒦᒃ ᐊᕐᕌᒍᓄᑦ ᑕᓪᓕᒪᐅᓚᐅᖅᑐᓄᑦ. ᐊᒻᒪᑦᑕᐅᖅ ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᖓ ᔨᐅᕋᒥ ᑑᕐᖔᓗᒃ ᐱᓕᕆᖃᑎᒋᒍᓐᓇᕐᓂᐊᕋᒃᑭᑦ ᐊᕐᕌᒍᓂ ᑎᓴᒪᓂ ᐊᒡᒋᖅᑐᓂᑦ ᓄᓇᕗᒻᒥᐅᓂ ᐱᔾᔪᔾᔨᓗᑕ. ᖁᔭᓐᓇᒦᒃ, ᐅᖃᖅᑏ. >>ᐸᒃᑕᑐᖅᑐᑦ ᐅᖃᖅᑎ: ᒪ’ᓇ, ᐊᑎᖁᑎᒃᑲ ᒪᓕᓪᓗᒋᑦ, ᑲᖏᖅᓯᓂᐅᑉ ᐅᐊᓐᓇᖓᓄᑦ ᐃᒡᓗᓕᒑᕐᔪᒻᒧᓪᓗ, ᒥᔅᑕ ᓴᒻᒧᖅᑐᖅ. ᓴᒻᒧᖅᑐᖅ: ᖁᔭᓐᓇᒦᒃ, ᐅᖃᖅᑏ. ᐃᓕᑕᖅᓯᔪᒪᔪᖓ ᑕᒫᓃᑦᑐᓂ, ᑑᓂ ᐋᖁᐊᖅ, ᖁᔭᓐᓇᒦᒃ, ᐊᕐᕌᒍᓄᑦ ᑎᓴᒪᐅᓚᐅᖅᑐᓄᑦ, ᒍᕆᑎ ᖃᑯᖅᑎᓐᓂᖅ. ᖁᔭᓐᓇᒦᒃ, ᐃᒃᓯᕙᐅᑖᖅ, ᐅᖃᖅᑎᑦᑎᔩ. >>ᐸᑦᑕᖅᑐᖅᑐᑦ ᐅᖃᖅᑎ: ᖁᔭᓐᓇᒦᒃ, ᑐᙵᓱᑦᓯᐊᕆᑦᓯ. ᐃᖃᓗᐃᑦ ᓯᓈ, ᒥᔅ ᐳᕉᔅᑕ. ᐳᕉᔅᑕ: (ᑐᓵᔨᑎᒍᑦ) ᖁᔭᓐᓇᒦᒃ, ᐅᖃᖅᑏ. ᓯᕗᓪᓕᖅᐹᕐᒥᒃ ᑐᙵᓱᒋᔅᓯᑦ ᐊᑕᖏᑦᑎᐊᕐᓗᓯ ᐃᓘᓐᓇᓯ ᑲᑎᒪᕐᔪᐊᕐᕕᒻᒧᑦ ᖁᕕᐊᓇᖅᑯᖅ ᐃᓄᒋᐊᕌᓗᓐᓂ ᑕᑯᒋᐊᔅᓴᖅ. ᐅᖃᖅᑏ, ᐃᓕᓴᖅᓯᒍᒪᔪᖓ ᐊᒃᑲᓐᓂ ᑕᖁᓕᒃ ᐹᐱ ᓚᐃᔪᓪᒥᒃ, ᑖᓐᓇᐅᓇ ᐱᒋᐊᖅᑎᑦᑎᓯᒪᔪᖅ ᓄᑖᕐᒥᒃ ᐅᖃᐅᓯᔅᓴᖃᑖᖅᑎᑦᑎᖃᑦᑕᖅᑐᓂ ᑕᑯᒐᐃᒐᓐᓄᒃ ᐅᖃᓲᖑᒻᒪᑦ “ᓱᓕ ᐃᓱᒪᒃᑲᐅᕖᑦ?” “ᐄᖑᕙᓪᓚᐃᔪᖅ ᓱᓕ” ᑭᐅᖃᑦᑕᖅᑕᕋ. ᐊᒻᒪ ᐋᓐᑎ ᒨ ᑳᑎ ᒪᐃᔪᕐ ᐅᕙᓃᒻᒥᒪᑦᑕᐅᖅ, ᑐᙵᓱᒋᑦ ᑲᑎᒪᕐᔪᐊᕐᕕᓐᓄᑦ. ᐊᒻᒪᑦᑕᐅᖅ ᑐᙵᓱᑦᑎᓪᓚᕆᒍᒪᒻᒥᔭᕋ ᑯᑭᒃ. ᖁᔭᓐᓇᒦᒃ, ᐅᖃᖅᑏ. >>ᐸᑦᑕᖅᑐᖅᑐᑦ ᐅᖃᖅᑎ: ᑐᙵᓱᑦᓯᐊᕆᔅᓯ ᑕᒪᔅᓯ, ᐊᒻᒪᓗ ᐊᑎᖁᑎᓐᓂ ᓱᓕ ᐊᕐᕕᐊᑦ ᐅᐊᓐᓇᖓᓄᑦ ᑎᑭᕋᕐᔪᐊᕐᒧᓪᓗ ᒥᔅᑕ ᒪᐃᓐ.

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 19 ᒪᐃᓐ: ᒪ’ᓇ, ᐅᖃᖅᑎᑦᓯᔩ. ᐃᓕᑕᕆᔭᐅᕌᓂᒃᑑᒐᓗᐃᑦ ᐃᓚᖏᑦ ᐃᓕᑕᕆᒃᑲᓐᓂᕈᐊᖅᖢᒋᑦ ᓄᓇᕗᑦ ᑐᙵᕕᒃᑯᑦ ᐃᒃᓯᕙᐅᑕᕆᔭᖓ ᔨᐅᕋᒥ ᑑᕐᖔᓗᒃ, ᐱᓕᕆᖃᑎᒋᓯᒪᑦᑕᖅᖢᒍᑉᓗ ᐅᑭᐅᓂ ᖄᖏᖅᓯᒪᔪᓂᑦ ᐊᒻᒪ ᓯᕗᓂᒃᓴᒥ ᓱᓕ ᐱᓕᕆᖃᑎᒋᑐᐃᓐᓇᕈᐊᕐᓂᐊᖅᖢᒍ, ᓄᓇᕗᑦ ᑐᙵᕕᒃᑯᓐᓄᓪᓗ ᐃᒃᓯᕙᐅᑕᐅᓚᐅᖅᑐᖅ ᐊᓗᑭ ᑰᑦᑎᖅ, ᑐᙵᓱᒋᑦ ᑕᕝᕗᖓ ᒪᓕᒐᓕᐅᕐᕕᒻᒧᑦ. >>ᐸᑦᑕᖅᑐᖅᑐᑦ ᒪᐃᓐ: ᐱᓕᕆᒐᕕᑦ ᓱᓕ ᓄᓇᕗᑦ ᐱᔾᔪᑎᒋᖦᖢᒋᑦ ᐃᓄᐃᑦ ᐱᔾᔪᑎᒋᖦᖢᒋᑦ ᑐᙵᓱᒃᑕᕆᑦ. ᐊᒻᒪ ᐅᖃᖅᑎᑦᓯᔨᒋᓚᐅᖅᓯᒪᔭᕗᑦ ᐊᒻᒪ ᑐᕌᓐᑐᒃᑯᑦ ᕼᐋᑭᖅᑎᖏᓐᓂᑦ ᐅᑉᐱᕈᓱᓪᓚᕆᒃᑐᖅᑕᐅᖅ ᐅᑉᐱᕈᓱᒍᓐᓃᓚᙱᑦᑐᖅ ᐅᕙᖓᑐᑦ, ᑑᓂ ᐋᖁᐊᖅ, ᑲᑎᒪᔨᐅᖃᑦᑖᓚᐅᕋᕕᑦ ᑑᓃ, ᐊᒻᒪ ᑐᙵᓇᐃᓐᓇᐅᔭᖅᑕᖅᓯᒪᒐᕕᑦ ᒪᑦᓈᖅᐸᒋᑦ. ᒪ’ᓇ, ᐅᖃᖅᑎᑦᓯᔩ. >>ᐸᑦᑕᖅᑐᖅᑐᑦ ᐅᖃᖅᑎ: ᖁᔭᓐᓇᒦᒃ, ᐊᑎᖁᑎᒃᑲ ᒪᓕᓪᓗᒋᑦ ᐃᖃᓗᐃᑦ ᓂᐊᖁᖒᒧᑦ ᒥᔅᑕ ᐊᕿᐊᕈᖅ. ᐊᕿᐊᕈᖅ: ᖁᔭᓐᓇᒦᒃ, ᐅᖃᖅᑎᑦᑎᔩ. ᐃᓕᓴᕆᔪᒪᒻᒥᕙᒃᑲ ᑖᒃᑯᐊ ᐅᖃᐅᓯᐅᕋᑖᖅᑑᒐᓗᐊᑦ ᐃᓚᖏᑦ, ᑖᓐᓇ ᐊᖏᔪᖅᑳᕆᔭᐅᔪᖅ ᓄᓇᐊᕗᑦ ᑐᙵᕕᒃᑯᓐᓄᑦ, ᔨᐅᕋᒥ ᑑᕐᖔᓗᒃ ᐊᒻᒪᓗ ᓴᑭᒃᑖᕆᓚᐅᖅᑕᕋ ᒍᕆᑎ ᖃᑯᖅᑎᓐᓂᖅ, ᐃᓕᓴᕆᑦᑎᐊᖅᐸᒋᑦ. >>ᐸᑦᑕᖅᑐᖅᑐᑦ ᐊᕿᐊᕈᖅ: ᐊᒻᒪᓗ ᑖᓐᓇ ᐅᖃᖅᑎᒋᓚᐅᖅᑕᕗᑦ ᑑᓂ ᐋᖁᐊᖅ, ᐊᒻᒪᓗ ᑖᒃᑯᐊ ᓂᕈᐊᖅᑎᒋᔭᒃᑲ ᐃᓚᑯᓗᑦᑎ, ᐅᖃᖅᑎᑦᑎᔩ, ᐊᓗᑭ ᑰᑦᑎᖅ, ᐸᓂᖓᓗ ᓯᑯ, ᐄᒪᓕ ᔪᐊᓇᓯᐃ, ᖁᓕᒃᑕᓕᒃ, ᓯᓐᑎᐊ. ᓇᐅᑯᓗᐃᖏᒃᑯᐊ ᐊᓂᕋᑖᕐᒪᑎᒃ ᓄᑲᖅᑎᑯᓘᒃ ᐸᑦᑑᒃᑯᒃ ᐃᓕᓴᕆᖃᓯᐅᑎᒐᓗᐊᕐᒥᕙᒃᑲ. ᖁᔭᓐᓇᒦᒃ, ᐅᖃᖅᑎᑦᑎᔩ. >>ᐸᒃᑕᑐᖅᑐᑦ ᐅᖃᖅᑎ: ᖁᔭᓐᓇᒦᒃ, ᑐᙵᓱᑦᓯᐊᕐᓕᑦ. ᐊᕐᕕᐊᑦ ᓂᒋᐊᓄᑦ, ᒥᔅᑕ ᖃᑉᓗᑦᓯᐊᖅ, ᐃᕝᕕᓪᓕ. ᖃᑉᓗᑦᓯᐊᖅ: ᒪ’ᓇ, ᐅᖃᖅᑎᑦᓯᔩ. ᐃᓕᑕᕆᒍᐊᒐᒃᑲ ᑖᒃᑯᐊᒃ ᒪᕐᕉᒃ ᑕᕝᕕᓃᖃᑕᐅᔫᒃ, ᓄᓕᐊᕋ ᓄᐊᒪ ᔩᑦ, ᐊᒻᒪ ᐃᕐᓂᕋ, ᐳᕋᔅᓕ ᔭᐃᒻᔅ. ᒪ’ᓇ, ᐅᖃᖅᑎᑦᓯᔩ. >>ᐸᑦᑕᖅᑐᖅᑐᑦ ᐅᖃᖅᑎ: ᖁᔭᓐᓇᒦᒃ. ᐃᓕᑕᖅᓯᓂᖅ ᐳᓛᕆᐊᖅᓯᒪᔪᓂᑦ ᑲᑎᒪᔾᔪᑎᓃᒃᑲᑦᑕ ᓈᓴᐅᑎᓕᒃ 5. ᐃᓕᓴᖅᓯᔪᒪᔪᖅ, ᓇᑦᓯᓕᒃ ᒥᔅ ᓚᐃᔪᓪ, ᓇᑦᓯᓕᐅᑉ ᒪᓕᒐᓕᐅᖅᑎᖓ. ᓚᐃᔪᓪ: (ᑐᓵᔨᑎᒍᑦ) ᖁᔭᓐᓇᒦᒃ, ᐅᖃᖅᑏ. ᐃᓕᓴᖅᓯᒍᒪᒻᒥᒐᒪᑦᑕᐅᖅ ᐊᒃᑲᓐᓂᒃ ᐹᑉᒥᒃ ᐊᒻᒪ ᔪᐃ ᖁᕕᐊᓚᑦᑎᑏᓐᓇᓲᖑᒐᕕᑦ ᐃᓪᓚᖅᓯᖃᑦᑕᖅᑐᑎ ᐃᔪᕐᓂᕈᒪ ᑖᔅᓱᒪ ᑕᐃᒪᐃᑎᒃᑳᖓ. ᐊᒻᒪ ᐊᑦᑕᒐ ᐋᓐᑦ ᑳᑎ ᐃᑲᔪᖅᓰᓐᓇᕋᕕᑦᑕᐅᖅ, ᖁᔭᓐᓇᒦᒃ. ᐊᒻᒪᑦᑕᐅᖅ ᐃᓕᓴᖅᓯᒍᒪᒻᒥᔪᖓ ᐅᖃᖅᑎᐅᓚᐅᖅᑐᖅ ᒥᔅᑕ ᐋᖁᐊᖅ, ᒪᓕᒐᔅᓴᑦᑎᐊᕙᓪᓚᕆᐅᒻᒪᑦ ᓄᓇᓕᕋᓛᕐᒦᖔᖅᑐᓂ ᑕᑯᔅᓴᐅᑎᑦᑎᓚᐅᕐᖓᑦ ᖃᓄᖅ ᐱᒍᓐᓇᓂᑦᑎᓐᓂᑦ ᑲᑐᐃᔾᔨᖃᑎᒌᒃᑯᑦᑕ. ᐃᓕᓴᖅᓯᒍᒪᒻᒥᔪᖓ ᑐᙵᕕᒃᑯᑦ ᐊᖏᔪᖅᑳᕆᔪᔭᖓ ᐊᓗᑭ ᑰᑦᑎᖅ, ᖁᕕᐊᓇᓚᐅᖅᑯᖅ ᐱᓕᕆᖃᑎᒋᒋᐊᔅᓴᖅ ᓴᖅᑭᔮᖅᑎᑦᑎᓪᓗᑕᓗ ᐱᒻᒪᕆᐊᓘᒻᒪᑦ ᒪᒃᑯᑦᑐᓂ ᐱᓕᕆᖃᑎᖃᕐᓂᑦᑎᓐᓂᑦ ᖃᐅᔨᑎᓚᐅᕋᕕᙵ ᐃᓕᕝᕕᒋᔭᕐᔪᐊᕌᓗᒋᓚᐅᕋᒃᑭᒃ. ᐊᒻᒪᑦᑕᐅᖅ ᑐᙵᕕᒃᑯᑦ ᐊᖏᔪᖅᑳᕆᔭᖓ, ᔨᐅᕋᒥ ᑑᕐᖔᓗᒃ. ᖁᔭᓐᓇᒦᒃ, ᐅᖃᖅᑏ. >>ᐸᑦᑕᖅᑐᖅᑐᑦ

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 20 ᐅᖃᖅᑎ: ᖁᔭᓐᓇᒦᒃ, ᐃᓕᓴᖅᓯᓂᖅ ᒪᓕᒐᓕᐅᕐᕕᒻᒧᑦ ᐳᓛᕆᐊᖅᓯᒪᔪᓂᑦ. ᐊᑎᖁᑎᖃᕈᓐᓃᕋᒪ, ᒪᒥᐊᓇᖅ, ᒥᔅᑕ ᖃᒪᓂᖅ. ᖃᒪᓂᖅ: ᐄ’. ᖁᔭᓐᓇᒦᒃ, ᐅᖃᖅᑎᑦᑎᔩ. ᐅᐱᒋᕙᕋ ᑕᐃᒪᓐᓇᐅᓚᐅᖅᓯᒪᓂᐊᕋᓱᒋᓚᐅᙱᖦᖢᖓ ᐅᕙᓃᖃᑕᐅᒐᒪ. ᕿᑐᕐᖓᑯᓘᒃᑲᒃ ᐊᐃᓴᐃᔭ, ᐅᓘᓵᑦ, ᑕᕝᕙᓃᒻᒪᑎᒃ. ᐊᒻᒪ ᔨᐅᕋᒥ, ᑐᙵᕕᒃᑯᓐᓂ ᐃᒃᓯᕙᐅᑕᐅᓕᖅᑐᖅ, ᕿᑭᖅᑕᓂᒃᑯᓐᓂ ᑲᑎᒪᔨᐅᖃᑎᒋᓚᐅᒃᑲᓚᐅᖅᓯᒪᒐᒃᑯᒃ ᖁᕕᐊᓱᑦᑐᖓ. ᖁᔭᓐᓇᒦᒃ. >>ᐸᑦᑕᖅᑐᖅᑐᑦ ᐅᖃᖅᑎ: ᑐᙵᓱᑦᑎᐊᕆᑦᓯ ᒪᓕᒐᓕᐅᕐᕕᒻᒧᑦ. ᓱᓕᐅᕚᑦ ᐊᑎᓕᐅᖅᑎᑕᐅᓯᒪᔪᖅᑕᖃᙱᓛ ᐊᑎᓕᐅᖅᑕᐅᒍᒪᔪᓂᑦ? ᒪᓕᒐᓕᐅᕐᕕᒻᒧᑦ ᐳᓛᕆᐊᖅᓯᒪᔪᓂᑦ? ᐅᕙᖓᑦᑕᐅᖃᐃ ᐱᕕᖃᕈᒫᕐᔪᒃᑲᒪᑦᑕᐅᖅ ᐅᖃᖅᑎᐅᑎᓪᓗᖓ ᑖᓐᓇ ᐃᓕᑕᖅᓯᓂᖅ ᐳᓛᕆᐊᖅᓯᒪᔪᓂ ᐊᑐᐃᓐᓇᖃᑦᑕᕐᓂᐊᖅᑕᕘᒐᓗᐊᖅ, ᑭᓯᐊᓂ ᑖᒃᑯᐊ ᐃᓚᒋᔭᒃᑲ ᐅᕙᓃᖃᑕᐅᔪᑯᓘᒻᒪᑕ ᑐᙵᓱᖁᑦᓯᐊᖅᓱᒋᑦ ᐱᒋᐊᕈᑎᒋᖅᑳᕐᓗᒍ ᓇᖏᖅᓯᖁᓪᓗᒍᓗ ᓄᓕᐊᕋ, ᐄᒪᓕ ᔪᐊᓇᓯ, ᑐᙵᓱᑦᑎᑕᐅᓕ. >>ᐸᑦᑕᖅᑐᖅᑐᑦ ᐅᖃᖅᑎ: ᑖᓐᓇ ᐋᓐᓄᕌᖅ ᑖᒃᑯᐊ ᐊᑐᖅᑕᒃᑲᓂ ᐊᓐᓄᕌᓂ ᒥᖅᓱᑲᐅᑦᑐᖅᓯᒪᖅᑲᐅᒻᒪᑦ ᖁᔭᒋᑦᓯᐊᖅᓱᒍᓗ ᑕᒪᒃᑯᓇᙵ ᑕᑯᒥᓇᑦᑎᐊᖅᑐᓂ ᓴᓇᓯᑎᐊᓗᒃ ᒥᖅᓱᖅᓯᑎᐊᓘᒻᒪᑦ ᖁᔭᒋᑦᓯᐊᖅᓱᒍᓗ. ᑖᓐᓇᓗ ᓴᓂᓕᑦᑎᐊᖓ ᐊᐃᕋᐃᓐᓄᒐ ᐊᓗᑭ ᑰᑦᑎᖅ, ᑐᙵᓱᑦᓯᐊᕆᑦ ᒪᓕᒐᓕᐅᕐᕕᒻᒧᑦ. ᑖᓐᓇᓗ ᐸᓂᑯᓗᐊ ᓯᑯ ᕉHᐊᔅ, ᑐᙵᓱᑦᓯᐊᕆᑦ ᒪᓕᒐᓕᐅᕐᕕᒻᒧᑦ. ᕿᑐᕐᖓᒃᑲᓗ ᓯᑕᒪᑦ ᐅᕙᓃᖃᑕᐅᔪᑦ, ᐸᓂᓐᓂ ᐊᖏᔪᑦᓯᖅᐹᖅ ᓯᓐᑎᐊ ᔪᐊᓇᓯ. >>ᐸᑦᑕᖅᑐᖅᑐᑦ ᐅᖃᖅᑎ: ᖁᓕᒃᑕᓕᒃ ᔪᐊᓇᓯ. >>ᐸᒃᑕᑐᖅᑐᑦ ᐅᖃᖅᑎ: ᐊᒻᒪ ᐸᓂᑯᓘᒃᑲᒃ ᑖᒃᑯᐊᒃ ᓄᑲᖅᓯᖅᐹᖑᔫᒃ, >>ᐸᒃᑕᑐᖅᑐᑦ ᐅᖃᖅᑎ: ᐱᑦᑖᓗᒃ ᔪᐊᓇᓯ. >>ᐸᒃᑕᑐᖅᑐᑦ ᐅᖃᖅᑎ: ᐊᒻᒪ ᐸᑦᑕ ᔪᐊᓇᓯ. >>ᐸᑦᑕᖅᑐᖅᑐᑦ ᐅᖃᖅᑎ: ᑖᓐᓇᑦᑕᐅᖅ ᐃᓕᓴᕆᒍᒪᒻᒥᒐᒃᑯᑦᑕᐅᖅ ᖃᖏᐊᕋ ᐅᕙᓃᖃᑕᐅᒻᒥᒻᒪᑦ ᐊᖏᔪᖅᐹᕆᔭᒻᒪ ᐸᓂᖓ, ᒥᐊᓕᐋᑦ ᐊᓪᓚ, ᑐᙵᓱᖁᑦᓯᐊᕆᕙᕋᑦᑕᐅᖅ. >>ᐸᑦᑕᖅᑐᖅᑐᑦ ᐅᖃᖅᑎ: ᑲᑎᒪᔾᔪᑎᑦᑎᓐᓄᑦ ᓈᓴᐅᑎᓕᒃ 6. ᑖᓐᓇ ᐅᖃᐅᓯᒃᑯᑦ ᐊᐱᖅᓱᕐᓂᖅ ᑖᒃᑯᐊ ᒥᓂᔅᑕᐃᑦ ᐊᖏᖅᑎᑕᐅᓯᒪᙱᒻᒪᑕ ᓱᓕ, ᐅᖃᐅᓯᒃᑯᑦ ᐊᐱᖅᓱᕐᓂᖃᔾᔮᖏᑦᑐᒍᑦ ᐅᓪᓗᒥᐅᔪᖅ ᐊᒻᒪᓗ ᐊᑐᖅᓯᒪᔭᓐᓂ ᐃᓚᖏᑦ ᒪᓕᒐᓕᐅᖅᑏᑦ ᓴᐅᒥᓐᓃᑦᑐᑦ ᐃᒻᒪᖄ, ᐊᐱᖅᓱᕈᒪᔫᒐᓗᐊᑦ ᑭᓴᓂ ᒫᓐᓇ ᐱᕕᖃᔾᔮᖏᓐᓇᑦᑕ. ᑖᒃᑯᐊ ᑕᓕᖅᐱᓐᓃᑦᑐᑦ ᐊᐱᖅᓱᖅᑕᐅᔾᔮᙱᑲᓚᐅᖅᑐᓯᑦ.

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 21 ᑲᔪᓯᑐᐃᓐᓇᕈᑦᑕ, ᓈᓴᐅᑎᓕᒃ 7, ᑎᑎᖅᑲᑎᒍᑦ ᐊᐱᖅᑯᑏᑦ. ᑖᒃᑯᐊ ᓱᓕ ᒥᓂᔅᑕᐅᑎᐅᔪᑦ ᐊᖏᖅᓯᒪᙱᒻᒪᑕ ᒥᓂᔅᑕᐅᓂᕐᒥᓄᑦ. ᑎᑎᖅᑲᑎᒍᑦ ᐊᐱᖅᓱᕐᓂᖅ ᑲᔪᓯᔾᔮᖏᒻᒥᔪᖅ ᐅᓪᓗᒥ. ᓈᓴᐅᑎᓕᒃ 8, ᐊᑎᓕᐅᖅᓯᒪᔪᑎᒍᑦ ᑐᒃᓯᕋᐅᑏᑦ. ᐱᑕᖃᖅᑐᖃᖅᐸ? ᐋᒃᑲᐅᖅᑰᕐᒪᑦ. ᐅᓂᒃᑳᑦ, ᑲᑎᒪᔨᕋᓛᑦ, ᑲᑎᒪᔨᕋᓛᖑᑲᐃᓐᓇᖅᑐᓪᓗ ᐱᖁᔭᒃᓴᓂᒃ ᐊᓯᖏᓐᓂᓪᓗ. ᑖᓐᓇ ᑲᑎᒪᔨᕋᓛᑦ ᓱᓕ ᓇᓗᓇᐃᖅᑕᐅᓯᒪᙱᒻᒪᑕ ᐅᓪᓗᒥ ᐅᓂᒃᑳᕈᓐᓇᔾᔮᙱᒻᒥᔪᑦ. ᑲᑎᒪᔾᔪᑎᒃᓴᑦ 10: ᓴᖅᑭᑕᐅᓂᖏᑦ ᑎᑎᖅᑲᑦ ᓴᖅᑭᑕᐅᓂᖏᑦ ᑎᑎᖅᑲᑦ 1 – 7(1): ᓂᕈᐊᕐᓂᖅ ᐊᑖᒍᑦ ᖄᒃᑲᓐᓂᐊᒍᑦ ᓄᖅᑲᕐᓂᕐᒧᑦ ᐊᑭᓕᐅᑕᐅᕙᑦᑐᓄᑦ ᐱᖁᔭᖅ ᓈᓴᐅᑎᓕᒃ 10, ᑎᑎᖅᑲᐃᑦ ᓴᖅᑭᑕᐅᓂᖏᑦ. ᐊᑕᐅᓯᕐᒥᒃ ᓴᖅᑮᔪᒪᕗᖓ. ᑖᓐᓇ ᐊᑕᐅᓯᖅ ᓴᖅᑭᓐᓂᐊᖅᑕᕋ ᓇᓗᓇᐃᖅᓯᕗᖅ ᓂᕈᐊᖅᑐᓕᕆᓂᕐᒧᑦ ᐊᑎᓕᐅᖅᓯᒪᖃᑕᐅᔪᑦ ᑖᒃᑯᐊ ᒪᓕᒐᓕᐅᖅᑏᑦ ᑕᐃᒍᖅᑕᐅᔪᑦ ᓄᖅᑲᕕᒃᑐᑦ ᖄᒃᑲᓐᓂᐊᒍᑦ ᐱᔪᓐᓇᕐᓂᖏᓐᓄᑦ ᐱᖁᔭᖅ, ᑕᐃᒃᑰᓇ ᐊᑎᓕᐅᖅᓯᒪᖃᑕᐅᔪᓄᑦ. ᓇᓗᓇᐃᕐᓂᐊᖅᑐᐃᑦ ᑕᕝᕙᓂ, ᑕᕝᕗᖓ ᓴᖅᑭᑉᐸᒃᑲ. ᑲᑎᒪᔾᔪᑎ 11, ᑕᕝᕙᐅᓯᕗᖃᐃ. ᐱᖁᔨᕗᖔᓕᐅᕐᓂᐊᕐᓂᕋᖅᑐᓄᑦ ᖃᐅᔨᒃᑲᐃᔾᔪᑎᑦ. ᐃᓕᓴᕆᖅᑳᖅᐸᕋ ᑲᖏᖅᖠᓂᐅᑉ ᐅᐊᖕᓇᖓᓄᑦ ᐃᒡᓗᓕᒑᕐᔪᖕᒧᑦ, ᒥᔅᑕ ᓴᒻᒧᖅᑑᖅ. ᑲᑎᒪᔾᔪᑎᒃᓴᑦ 11: ᑐᓴᖅᑎᑦᑎᒍᑎ ᐱᖁᔨᕗᖔᓕᐅᓛᕐᓂᐊᕐᓂᕐᒧᑦ ᐱᖁᔨᕗᖔᕈᑦ 2 – 7(1): ᑎᒃᑯᐊᖅᓯᓂᖅ ᓯᕗᓕᖅᑎᒥ − ᑲᐅᔨᒃᑲᐃᔾᔪᑎ ᓴᒻᒧᖅᑑᖅ: ᖁᔭᓐᓇᒦᒃ, ᐃᒃᓯᕙᐅᑕᖅ. (ᑐᓵᔨᑎᒍᑦ) ᖃᐅᔨᒃᑲᐃᕗᖓ ᓇᒡᒐᔾᔭᐅᒥ ᓄᕕᐱᕆ 24−ᒥ, 2025−ᒥ. ᐅᑯᓂᖓ ᐱᒋᐊᖅᑎᑦᑎᓂᐊᕋᒪ. ᑕᐃᒪᐃᒻᒪᑦ ᓅᑦᑎᕗᖓ ᐊᐃᑉᐱᖅᑕᐅᓪᓗᖓ ᒪᓕᒐᓕᐅᖅᑎᖓᓐᓄᑦ ᐊᐃᕕᓕᐅᑉ ᒪᓕᒐᓕᐅᖅᑏᑦ ᑲᑎᒪᔨᖏᑦ ᐊᑐᓕᖁᔭᓕᐅᖁᓪᓗᒋᑦ ᑲᒥᓯᓇᖓᓐᓄᑦ ᓄᓇᕗᒻᒥ ᑖᓐᓇ ᔮᓐ ᒪᐃᓐ ᒪᓕᒐᓕᐅᖅᑎ ᐊᕐᕕᐊᑦ ᐅᐊᖕᓇᖓᓄᑦ ᑎᑭᕋᕐᔪᐊᕐᒧᓪᓗ ᑎᒃᑯᐊᖅᑕᐅᖁᓪᓗᒍ ᓯᕗᓕᖅᑎᐅᓂᐊᕐᒪᑦ ᓄᓇᕗᒻᒧᑦ ᐊᒻᒪ ᐃᓚᒋᔭᐅᓗᓂ ᐊᐅᓚᑦᑎᔩᑦ ᑲᑎᒪᔨᖏᓐᓄᑦ. ᐅᖃᖅᑎ, ᓈᒻᒪᒃᓯᒃᐸᑦ ᐃᓘᓐᓇᖏᓐᓄᑦ ᐊᖏᖅᑕᐅᔪᒪᓂᐊᖅᑐᖓ ᑖᓐᓇ ᐱᖁᔨᕗᖔᕋ ᓅᑕᐅᖁᓪᓗᒍ ᐅᓪᓗᒥ. ᖁᔭᓐᓇᒦᒃ. ᐅᖃᖅᑎ: ᖁᔭᓐᓇᒦᒃ. ᐃᓕᓴᕆᓂᐊᓕᕆᕙᕋᑦᑕᐅᖅ ᐃᖃᓗᒃᑑᑦᓯᐊᑉ ᒪᓕᒐᓕᐅᖅᑎᖓ, ᒥᔅᑕ ᐲᑕᓴᓐ. ᐱᖁᔨᕗᖔᕈᑦ 3 – 7(1): ᑎᒃᑯᐊᖅᓯᓂᖅ ᐊᖏᔪᖅᑲᐅᑎᓂ − ᖃᐅᔨᒃᑲᐃᔾᔪᑎ ᐲᑕᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖃᐅᔨᒃᑲᐃᕗᖓ ᓇᒡᒐᔾᔭᐅ, ᓄᕕᐱᕆ 24, 2025ᒥ ᐆᒥᖓ ᐱᖁᔨᕗᖔᕐᓂᐊᕋᒪ. ᑕᐃᒪᐃᒻᒪᑦ ᓅᑦᑎᕗᖓ ᐊᐃᑉᐱᖅᑕᐅᓪᓗᖓ ᒪᓕᒐᓕᐅᖅᑎᖓᓐᓄᑦ ᐸᖕᓂᖅᑑᑉ ᑖᒃᑯᐊ ᒪᓕᒐᓕᐅᖅᑏᑦ ᑲᑎᒪᔨᖏᑦ ᐊᑐᓕᖁᔭᓕᐅᕈᑎᖏᑦ ᑲᒥᓯᓇᖓᓐᓄᑦ ᓄᓇᕗᒻᒥ ᐅᑯᐊ ᑎᒃᑯᐊᖅᑕᐅᖁᓪᓗᒋᑦ ᐊᐅᓚᑦᑎᔩᑦ ᑲᑎᒪᔨᖏᓐᓄᑦ. • ᒍᐃᓐ ᕼᐄᓕ ᐊᕿᐊᕈᖅ, ᐃᖃᓗᐃᑦ ᒪᓂᕋᔭᖕᒧᑦ ᒪᓕᒐᓕᐅᖅᑎ • ᑕᐃᕕᑦ ᐊᕿᐊᕈᖅ, ᒪᓕᒐᓕᐅᖅᑎ ᐃᖃᓗᐃᑦ ᓂᐊᖁᙴᒧᑦ • ᔮᓇᑦ ᐱᑦᓯᐅᓛᖅ ᐳᕉᔅᑐ, ᐃᖃᓗᐃᑦ ᓯᓈᓄᑦ ᒪᓕᒐᓕᐅᖅᑎ • ᔪᐊᔾ ᕼᐃᒃᔅ, ᐃᖃᓗᐃᑦ ᑕᓯᓗᖕᒧᑦ. • ᐳᕋᐃᐊᓐ ᑯᓄ ᒪᓕᒐᓕᐅᖅᑎ ᑐᓄᓂᕐᒧᑦ, • ᓯᓯᐅᓪ ᓇᐅᓪᕙᓇ ᓇᐃᔪᓪ ᒪᓕᒐᓕᐅᖅᑎ ᓇᑦᑎᓕᖕᒧᑦ, • ᑯᕋᐃᒡ ᓯᒪᐃᓚᒃ ᒪᓕᒐᓕᐅᖅᑎ ᖃᒪᓂᑦᑐᐊᕐᒪᑦ • ᐋᓂ ᑕᑦᑐᐃᓂᖅ ᒪᓕᒐᓕᐅᖅᑎ ᑲᖏᖅᖠᓂᐅᑉ ᓂᒋᐊᓄᑦ.

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 22 ᐅᖃᖅᑎ, ᓈᒻᒪᒃᓯᒃᐸᑦ ᐃᓘᓐᓇᖏᓐᓄᑦ ᐊᖏᖅᑕᐅᔪᒪᓂᐊᖅᑐᖓ ᐅᓪᓗᒥ ᐱᖁᔨᕗᖔᕋ ᐱᓕᕆᖁᓪᓗᒍ. ᐅᖃᖅᑎ: ᖁᔭᓐᓇᒦᒃ. ᐃᓕᓴᕆᓚᐅᕐᒥᓚᒍ ᐃᖃᓗᐃᑦ ᑕᓯᓗᒻᒧᑦ ᒪᓕᒐᓕᐅᖅᑎ, ᕼᐃᒃᔅ. ᐱᖁᔨᕗᖔᕈᑦ 4 – 7(1): ᑎᒃᑯᐊᖅᓯᓂᖅ ᐅᖃᖅᑎᐅᑉ ᑐᖏᓕᐊᓂᑦ − ᖃᐅᔨᒃᑲᐃᔾᔪᑎ ᕼᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑎ. ᖃᐅᔨᒃᑲᐃᕗᖓ ᓇᒡᒐᔾᔭᐅ ᓄᕕᐱᕆ 24, 2025ᒥ ᐆᒥᖓ ᐱᖁᔨᕗᖔᕐᓂᐊᕋᒪ. ᑕᐃᒪᐃᒻᒪᑦ ᓅᑦᑎᕗᖓ ᐊᐃᑉᐱᖅᑕᐅᓪᓗᖓ ᒪᓕᒐᓕᐅᖅᑎᖓᓐᓄᑦ ᖁᑦᑎᒃᑐᖅ ᑖᓐᓇ ᕗᕆᐊᑦ ᐲᑕᓴᓐ ᒪᓕᒐᓕᐅᖅᑎᐅᔪᖅ ᐃᖃᓗᖕᓄᑦ ᑎᒃᑯᐊᖅᑕᐅᖁᓪᓗᒍ ᐅᖃᖅᑎᐅᑉ ᑐᖏᓕᕆᓂᐊᕐᒪᒍ ᒪᓕᒐᓕᐅᕐᕕᖕᒥ. ᐅᖃᖅᑏ, ᓈᒻᒪᒃᓯᒃᐸᑦ ᐅᓪᓗᒥ ᐃᓘᓐᓇᖏᓐᓄᑦ ᐊᖏᖅᑕᐅᔪᒪᓂᐊᖅᑐᖓ ᐱᖁᔨᕗᖔᕋ ᓅᑦᑐᓐᓇᖁᓪᓗᒍ. ᐅᖃᖅᑎ: ᐃᓕᓴᕆᒃᑲᓐᓂᕐᓗᒍ ᐃᖃᓗᒃᑑᑦᓯᐊᑉ ᒪᓕᒐᓕᐅᖅᑎᖓ, ᒥᔅᑕ ᐲᑕᓴᓐ. ᐱᖁᔨᕗᖔᕈᑦ 5 – 7(1): ᑎᒃᑯᐊᖅᓯᓂᖅ ᐃᒃᓯᕙᐅᑕᐅᑉ ᑐᖏᓕᐊᓂᑦ ᑲᑎᒪᑐᐃᓐᓇᕐᓂᕐᒧᑦ − ᖃᐅᔨᒃᑲᐃᔾᔪᑎ ᐲᑕᓴᓐ: ᖁᔭᓐᓇᒦᒃ, ᐅᖃᖅᑏ. ᖃᐅᔨᒃᑲᐃᕗᖓ ᓇᒡᒐᔾᔭᐅᒥ ᓄᕕᐱᕆ 2025−ᒥ, ᐅᑯᓂᖓ ᓅᑦᑎᓂᐊᕋᒪ. ᑕᐃᒪᐃᒻᒪᑦ ᓅᑦᑎᕗᖓ ᐊᐃᑉᐱᖅᑕᐅᓪᓗᖓ ᒪᓕᒐᓕᐅᖅᑎᖓᓐᓄᑦ ᐸᖕᓂᖅᑑᑉ. ᔭᐃᒥ ᖃᑉᓗᑦᓯᐊᖅ ᐊᕐᕕᐊᓄᑦ ᓂᒋᐊᓄᑦ ᒪᓕᒐᓕᐅᖅᑎ ᐊᒻᒪ ᓴᐃᒪᓐ ᑐᓕᑦᑖᓇᐅᑉ ᑖᓐᓇ ᖁᕐᓗᖅᑑᕐᒧᑦ ᒪᓕᒐᓕᐅᖅᑎᐅᔪᖅ ᐃᒃᓯᕙᐅᑕᐅᖃᑕᐅᖁᓪᓗᒋᑦ ᑲᑎᒪᑐᐃᓐᓇᖅᑎᓪᓗᒋᑦ. ᐅᖃᖅᑏ, ᓈᒻᒪᒃᓯᒃᐸᑦ ᐅᓪᓗᒥ ᐃᓘᓐᓇᖏᓐᓄᑦ ᐊᖏᖅᑕᐅᔪᒪᓂᐊᖅᑐᖓ ᐱᖁᔨᕗᖔᕋ ᐱᓕᕆᔪᒪᓪᓗᒍ. ᐅᖃᖅᑎ: ᖁᐊᓇ. ᑲᑎᒪᔾᔪᑏᑦ 11-ᒦᒃᑲᑦᑕᐃ. ᐃᓕᓴᕆᓚᐅᕐᒥᓚᒍ ᑖᓐᓇ ᒪᓕᒐᓕᐅᖅᑎ ᐊᐃᕕᓕᒻᒧᑦ, ᒥᔅ ᐊᖑᑎᐊᓗᒃ. ᐱᖁᔨᕗᖔᕈᑦ 6 – 7(1): ᑎᒃᑯᐊᖅᓯᓂᖅ ᐊᐅᓚᑦᑎᓂᕐᒧᑦ ᐱᔨᑦᑎᕋᕐᕕᐅᖃᖅᑕᐸᑦᑐᓂᓪᓗ ᑲᑎᒪᔩᑦ ᐊᖑᑎᐊᓗᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖃᐅᔨᒃᑲᐃᕗᖓ ᓇᒡᒐᔾᔭᐅ ᓅᕖᑉᐱᕆ 24-ᒥ, 2025-ᒥ ᐆᒥᖓ ᓅᑦᑎᓂᐊᕋᒪ ᐱᖁᔨᕗᖔᕐᒥᒃ. ᑕᐃᒪᐃᒻᒪᑦ ᓅᑦᑎᕗᖓ ᐊᐃᑉᐱᖅᑕᐅᓪᓗᖓ ᒪᓕᒐᓕᐅᖅᑎᖓᓐᓄᑦ ᖁᕐᓗᖅᑑᑉ ᐅᑯᐊ ᒪᓕᒐᓕᐅᖅᑏᑦ ᑎᒃᑯᐊᖅᑕᐅᖁᓪᓗᒋᑦ ᑲᑎᒪᔨᓕᕆᔩᑦ ᑲᑎᒪᔨᖏᓐᓄᑦ: • ᔪᐊᔾ ᕼᐃᒃᔅ, ᒪᓕᒐᓕᐅᖅᑎ ᐃᖃᓗᐃᑦ−ᑕᓯᓗᒻᒧᑦ; • ᒍᐊᑕᓐ ᑲᐅᑐᒃ, ᒪᓕᒐᓕᐅᖅᑎ ᐅᖅᑯᕐᒥᐅᓄᑦ • ᔮᓂ ᒪᐃᒃ, ᒪᓕᒐᓕᐅᖅᑎ ᐸᓐᓂᖅᑑᒧᑦ • ᑖᓂᐅ ᖃᕝᕕᒃ, ᒪᓕᒐᓕᐅᖅᑎ ᑕᓯᐅᔭᕐᔪᐊᕐᒧᑦ ᐅᖃᖅᑏ, ᓈᒻᒪᒃᓯᑉᐸᑦ ᐃᓘᓐᓇᖏᓐᓄᑦ ᐊᖏᖅᑕᐅᔪᒪᓂᐊᖅᑐᖓ ᐅᓪᓗᒥ ᐱᖁᔨᕗᖔᖅ ᐱᓕᕆᖁᓪᓗᒍ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᖁᔭᓐᓇᕐᒦᑦᑕᐅᖅ. ᐅᖅᑯᕐᒥᐅᑦ ᒪᓕᒐᓕᐅᖅᑎᖓ ᐃᓕᓴᕆᓚᐅᕐᒥᓚᒍ, ᒥᔅᑕ ᑲᐅᑐᒃ. ᐱᖁᔨᕗᖔᕈᑦ 7 – 7(1): ᑎᒃᑯᐊᖅᓯᓂᖅ ᑲᑎᒪᔨᕋᓛᓕᐅᖅᑎᒃᑯᓐᓂᑦ ᑲᐅᑐᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖃᐅᔨᒃᑲᐃᕗᖓ ᓇᒡᒐᔾᔭᐅᒥ ᓅᕖᑉᐱᕆ 24, 2025-ᒥ ᐆᒥᖓ ᓅᑦᑎᓂᐊᕋᒪ ᐱᖁᔨᕗᖔᕐᒥᒃ. ᑕᐃᒪᐃᒻᒪᑦ ᓅᑦᑎᕗᖓ ᐊᐃᑉᐱᖅᑕᐅᓪᓗᖓ ᒪᓕᒐᓕᐅᖅᑎᖓᓐᓄᑦ ᐃᖃᓗᑦᑑᑦᑎᐊᖅ ᐅᑯᐊ ᒪᓕᒐᓕᐅᖅᑏᑦ ᑎᒃᑯᐊᖅᑕᐅᖁᓪᓗᒋᑦ ᑎᒃᑯᐊᖅᓯᔩᑦ ᑲᑎᒪᔨᕋᓛᖓᓐᓄᑦ • ᑕᐃᕕᑦ ᐴᑐ, ᐅᖅᓱᖅᑑᕐᒧᑦ ᒪᓕᒐᓕᐅᖅᑎ • ᐊᐃᕝᕙᓚᕼᐊ ᖃᒪᓂᖅ, ᐊᒥᑦᑐᕐᒧᑦ ᒪᓕᒐᓕᐅᖅᑎ • ᑖᓂᐅ ᖃᕝᕕ, ᑕᓯᐅᔭᕐᔪᐊᕐᒧᑦ ᒪᓕᒐᓕᐅᖅᑎ

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 23 ᐅᖃᖅᑏ, ᓈᒻᒪᒃᓯᑉᐸᑦ ᑕᐃᓐᓇ ᐃᓘᓐᓇᖏᓐᓄᑦ ᐊᖏᖅᑕᐅᔪᒪᓂᐊᖅᑐᖓ ᐱᖁᔨᕗᖔᕈᑦ ᐅᓪᓗᒥ ᐱᓕᕆᖁᓪᓗᒍ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᓇᑯᕐᒦᕆᕙᒋᑦᑕᐅᖅ. ᐃᓕᓴᕆᓚᐅᕐᒥᓚᒍ ᑲᖏᖅᓯᓂᐅᑉ ᐅᐊᓐᓇᖓᓄᑦ ᐃᓪᓗᓕᒑᕐᔪᒻᒧᓪᓗ, ᒥᔅᑕ ᓴᒻᒧᖅᑐᖅ. ᐱᖁᔨᕗᖔᕈᑦ 8 – 7(1): ᐅᖓᕙᕆᐊᖅᑕᐅᔪᖅ ᓄᖅᑲᕐᓂᖅ − ᖃᐅᔨᒃᑲᐃᔾᔪᑎ ᓴᒻᒧᖅᑐᖅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖃᐅᔨᒃᑲᐃᕗᖓ ᓇᒡᒐᔾᔭᐅᒥ ᓅᕖᑉᐱᕆ 24, 2025-ᒥ ᐅᑯᓂᖓ ᓅᑦᑎᓂᐊᕋᒪ. ᐱᖁᔨᕗᖓ ᐊᐃᑉᐱᖅᑕᐅᓪᓗᖓ ᒪᓕᒐᓕᐅᖅᑎᖓᓐᓄᑦ ᐃᖃᓗᐃᑦ ᓂᐊᖁᙴᒧᑦ ᒪᓕᓪᓗᒋᑦ ᒪᓕᒐᖅ ᑎᑎᕋᖅᓯᒪᓂᖓ 3, ᒪᓕᒐᓕᐅᕐᕕᒃ ᒪᑐᑉᐸᑦ ᐅᓪᓗᒥ ᑲᑎᒪᕐᔪᐊᕐᓂᖅ ᓄᖅᑲᖔᖁᓪᓗᒍ ᑎᑭᓐᓇᓱᓐᓂᖓᓂ ᒫᔅᓯ 5, 2026. ᐅᖃᖅᑏ, ᓈᒻᒪᒃᓯᑉᐸᑦ ᐃᓘᓐᓇᖏᓐᓄᑦ ᐊᖏᖅᑕᐅᔪᒪᓂᐊᖅᑐᖓ ᐱᖁᔨᕗᖔᕈᑦ ᐅᓪᓗᒥ ᐱᓕᕆᖁᓪᓗᒍ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᖁᔭᓐᓇᕐᒦᒃ. ᑲᑎᒪᔾᔪᑏᑦ 12−ᒨᖅᑰᕋᑦᑕ ᑕᒻᒪᖏᒃᑯᒪ. ᑖᓐᓇ ᓈᓴᐅᑎᓕᒃ 12-ᒨᕈᑦᑕ ᑲᑎᒪᔾᔪᑎᑦᑎᓐᓂᒃ ᐱᖁᔨᕗᖔᓕᐅᕐᓂᐊᕐᓂᕐᒧᑦ ᖃᐅᔨᒃᑲᐃᔾᔪᑏᑦ ᓯᕗᓪᓕᖅᐹᕐᒥᒃ ᐅᖃᓕᒫᖅᑕᐅᖁᓪᓗᒋᑦ ᐱᖁᔭᔅᓴᑦ. ᐱᑕᖃᙱᒻᒪᑦ. ᑲᔪᓯᒃᑲᓐᓂᑐᐃᓐᓇᕈᑦᑕ, ᓈᓴᐅᑎ 13, ᐱᖁᔨᕗᖔᕈᑏᑦ. ᑲᖏᖅᓯᓂᐅᑉ ᐅᐊᓐᓈᓄᑦ ᐃᓪᓗᓕᒑᕐᔪᒻᒧᓪᓗ, ᒥᔅᑕ ᓴᒻᒧᖅᑐᖅ. ᑲᑎᒪᔨᔪᑎᒃᓴᑦ 13: ᐱᖁᔨᕗᖔᕈᑎᓄᑦ ᓴᒻᒧᖅᑐᖅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐅᖃᖅᑏ, ᐃᓘᓐᓇᖏᓐᓄᑦ ᐊᖏᖅᑕᐅᔪᒪᒐᓗᐊᖅᑐᖓ ᐱᖁᔨᕗᖔᕈᑦ ᐅᓪᓗᒥ ᐱᓕᕆᔭᐅᖁᓪᓗᒍ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᖁᔭᓐᓇᕐᒦᒃ. ᐊᖏᖅᑕᐅᔪᒪᒻᒪᑦ ᐱᖁᔨᕗᖔᕈᒥᓂᒃ ᐱᓕᕆᐊᖃᕈᒪᓪᓗᓂ ᐅᓪᓗᒥ. ᐋᒃᑳᖅᑐᖃᖅᐹ? ᑐᓴᙱᓐᓇᒪ, ᑲᔪᓯᒋᑦ. ᐱᖁᔨᕗᖔᕈᑦ 2 – 7(1): ᑎᒃᑯᐊᖅᓯᓂᖅ ᓯᕗᓕᖅᑎᒥ ᓴᒻᒧᖅᑐᖅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐅᖃᖅᑏ, ᐃᒪᐃᒻᒪᑦ ᑎᑎᕋᖅᓯᒪᓂᖓ 60, ᒪᓕᒐᓕᐅᖅᑏᑦ ᑲᑎᒪᔨᖏᓐᓄᑦ ᐊᐅᓚᑦᑎᔩᓪᓗ ᑲᑎᒪᔨᖏᑕ ᐱᖁᔭᕐᔪᐊᖓ ᐃᓂᖃᖅᑎᑦᑎᒻᒪᑦ ᓯᕗᓕᖅᑏᑦ ᓄᓇᕗᒻᒥ ᓂᕈᐊᖅᑕᐅᖁᓪᓗᒍ ᒪᓕᒐᓕᐅᖅᑏᑦ ᑲᑎᒪᔨᖏᓐᓂᒃ. ᐊᒻᒪ ᑎᒃᑯᐊᖅᑕᐅᓗᓂ ᑲᒥᓴᓇᒧᑦ ᐊᑐᓕᖁᔭᓕᐊᖏᑦ ᒪᓕᒐᓕᐅᖅᑏᑦ ᑲᑎᒪᔨᖏᑦ ᐊᑐᕐᓗᒋᑦ. ᐊᒻᒪᓗ ᐃᒪᐃᒻᒪᑦ ᒪᓕᒐᓕᐅᖅᑏᑦ ᑲᑎᒪᔨᖏᑦ ᐸᕐᓇᒃᓯᒪᓕᕐᒪᑕ ᐊᑐᐃᓐᓇᕈᐃᔪᓐᓇᖅᓯᒻᒪᑕ ᐊᑐᓕᖁᔭᓕᐅᕈᒪᓪᓗᑎᒃ ᑎᒃᑯᐊᖅᓯᓂᕐᒧᑦ. ᑕᐃᒪᐃᒻᒪᑦ ᓅᑦᑎᕗᖓ ᐊᐃᑉᐱᖅᑕᐅᓪᓗᖓ ᒪᓕᒐᓕᐅᖅᑎᖓᓐᓄᑦ ᐊᐃᕕᓕᐅᑉ, ᒪᓕᒐᓕᐅᖅᑏᑦ ᑲᑎᒪᔨᖏᑦ ᐊᑐᓕᖁᔭᓕᐅᖁᓪᓗᒋᑦ ᑲᒥᓴᓇᖓᓐᓄᑦ ᓄᓇᕗᒻᒥ, ᑖᓐᓇ ᔮᓐ ᒪᐃᓐ ᒪᓕᒐᓕᐅᖅᑎ ᐊᕐᕕᐊᑦ ᐅᐊᓐᓇᖓᓄᑦ ᑎᑭᕋᕐᔪᐊᕐᒧᓪᓗ ᑎᒃᑯᐊᖅᑕᐅᖁᓪᓗᒍ ᓯᕗᓕᖅᑎᐅᓂᐊᕐᒪᑦ ᓄᓇᕗᒻᒥ ᐊᒻᒪ ᐃᓚᒋᔭᐅᓕᕐᓗᓂ ᐊᐅᓚᑦᑎᔩᑦ ᑲᑎᒪᔨᖏᓐᓄᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᑖᓐᓇ ᐱᖁᔨᕗᖔᕈᑦ ᓈᒻᒪᒻᒪᑦ, ᐱᖁᔨᕗᖔᕈᑎᒧᑦ. ᓂᕈᐊᕈᒪᓕᕐᒪᑕ ᑖᒃᑯᐊ ᓈᒻᒪᓴᖅᑐᐃᑦ ᐃᓵᒋᑦᑎ. ᓈᒻᒪᓴᙱᑦᑐᑦ. ᑲᔪᓯᕗᖅ. >>ᐸᑦᑕᒃᑐᖅᑐᑦ ᐅᖃᖅᑎ: ᐱᖁᔨᕗᖔᕈᑎᓄᑦ, ᐃᖃᓗᑦᑑᑦᑎᐊᖅ ᒪᓕᒐᓕᐅᖅᑎᖓ, ᒥᔅᑕ ᐲᑕᓴᓐ. ᐸᑐᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐃᓘᓐᓇᖏᓐᓄᑦ ᐊᖏᖅᑕᐅᔪᒪᓪᓗᖓ ᐱᖁᔨᕗᖔᕈᑦ ᐅᓪᓗᒥ ᑲᒪᒋᔭᐅᖁᓪᓗᒍ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐱᖁᔨᕗᖔᕈᑎᒧᑦ, ᐱᓕᕆᔪᖃᕈᒪᒻᒪᑦ ᐅᓪᓗᒥ. ᐋᒃᑳᖅᑐᖃᖅᐹ? ᑐᓴᙱᓐᓇᒪ, ᑲᔪᓯᒋᑦ.

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 24 ᐱᖁᔨᕗᖔᕈᑦ 3 – 7(1): ᑎᒃᑯᐊᖅᓯᓂᖅ ᐊᖏᔪᖅᑲᐅᑎᓂ ᐸᑐᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐃᒪᐃᒻᒪᑦ ᑎᑎᕋᖅᓯᒪᓂᖓ 60, ᒪᓕᒐᓕᐅᖅᑏᑦ ᑲᑎᒪᔨᖏᓐᓄᑦ ᐊᐅᓚᑦᑎᔩᓪᓗ ᑲᑎᒪᔨᖏᑕ ᐱᖁᔭᕐᔪᐊᖏᓐᓄᑦ ᐊᐅᓚᑦᑎᔩᑦ ᑲᑎᒪᔨᖏᑦ ᓄᓇᕗᒻᒥ. ᐅᑯᐊ ᑎᒃᑯᐊᖅᑕᐅᖁᓪᓗᒋᑦ ᑲᒥᓴᓇᒧᑦ ᐊᑐᓕᖁᔭᓕᐅᖅᓯᒪᓂᖏᑦ ᒪᓕᓪᓗᒋᑦ ᒪᓕᒐᓕᐅᖅᑏᑦ ᑲᑎᒪᔨᖓᑕ. ᐃᒪᐃᓕᖓᒻᒪᑦ ᒪᓕᒐᓕᐅᖅᑏᑦ ᑲᑎᒪᔨᖏᑦ ᐊᑐᓕᖁᔭᓕᐅᕈᓐᓇᖅᓯᒻᒪᑕ ᑎᒃᑯᐊᖅᑕᐅᖁᔭᐅᔪᓂᒃ, ᒫᓐᓇ ᓅᑦᑎᕗᖓ ᐊᐃᑉᐱᖅᑕᐅᓪᓗᖓ ᒪᓕᒐᓕᐅᖅᑎᖓᓐᓄᑦ ᐸᓐᓂᖅᑑᑉ. ᒪᓕᒐᓕᐅᖅᑏᑦ ᑲᑎᒪᔨᖏᑦ ᑖᒃᑯᐊ ᐊᑐᓕᖁᔭᓕᐊᕗᑦ ᓄᓇᕗᑦ ᑲᒥᓴᓇᖓᓄᑦ ᐅᑯᐊ ᑎᒃᑯᐊᖅᑕᐅᖁᓪᓗᒋᑦ ᐊᐅᓚᑦᑎᔩᑦ ᑲᑎᒪᔨᖏᓐᓄᑦ: • ᒍᐊᐃᓐ ᕼᐄᓕ ᐊᕿᐊᕈᖅ, ᒪᓕᒐᓕᐅᖅᑎ ᐃᖃᓗᐃᑦ−ᒪᓂᕋᔭᒃ • ᑕᐃᕕᑎ ᐊᕿᐊᕈᖅ, ᒪᓕᒐᓕᐅᖅᑎ ᐃᖃᓗᐃᑦ−ᓂᐊᖁᙴ • ᔮᓇᑦ ᐱᑦᓯᐅᓛᖅ ᐳᕉᔅᑐ, ᒪᓕᒐᓕᐅᖅᑎ ᐃᖃᓗᐃᑦ ᓯᓈ • ᔪᐊᔾ ᕼᐃᒃᔅ, ᒪᓕᒐᓕᐅᖅᑎ ᐃᖃᓗᐃᑦ−ᑕᓯᓗᒃ • ᐳᕋᐃᔭᓐ ᑯᓄᒃ, ᒪᓕᒐᓕᐅᖅᑎ ᑐᓄᓂᖅ • ᓯᓯᐅᓪ ᓂᐅᓪᕙᓇ ᓚᐃᔪᓪ, ᒪᓕᒐᓕᐅᖅᑎ ᓇᑦᑎᓕᒃ • ᑯᕋᐃᒡ ᓯᒪᐃᓚᒃ, ᒪᓕᒐᓕᐅᖅᑎ ᖃᒪᓂ’ᑐᐊᑦ, ᐊᒻᒪᓗ • ᐋᓂ ᑕᑦᑐᐃᓂ ᒪᓕᒐᓕᐅᖅᑎ ᑲᖏᖅᖠᓂᐅᑉ ᓂᒋᐊᓄᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐱᖁᔨᕗᖔᕈᑦ ᓈᒻᒪᑦᑐᖅ ᐱᖁᔨᕗᖔᕈᒻᒧᑦ. ᓂᕈᐊᕈᓐᓇᖅᓯᕗᓯ, ᓈᒻᒪᓴᖅᑐᑦ? ᓈᒻᒪᓴᙱᑦᑐᑦ? ᐱᖁᔨᕗᖔᕈᑦ ᑲᔪᓯᕗᖅ. >>ᐸᑦᑕᒃᑐᖅᑐᑦ ᐅᖃᖅᑎ: ᐱᖁᔨᕗᖔᕈᑎᓄᑦ, (ᑐᓵᔨᑎᒎᓕᖅᑐᖅ) ᒪᓕᒐᓕᐅᖅᑎ ᐃᖃᓗᐃᑦ−ᑕᓯᓗᒻᒧᑦ, ᒥᔅᑕ ᕼᐃᒃᔅ. ᕼᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐊᖏᖅᑕᐅᔪᒪᓪᓗᖓ ᐱᖁᔨᕗᖔᕈᑎᒐ ᑲᒪᒋᔭᐅᖁᓪᓗᒍ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ (ᑐᓵᔨᑎᒍᑦ): ᖁᔭᓐᓇᒦᒃ. ᒪᓕᒐᓕᐅᖅᑎ ᐊᖏᖅᑕᐅᔪᒪᕗᖅ ᐱᖁᔨᕗᖔᕈᑎᖓ ᐱᒋᐊᖅᑎᑕᐅᖁᓪᓗᒍ. ᐋᒡᒑᖅᑐᖃᖅᐹ? ᐱᑕᖃᙱᒻᒪᑦ, ᑲᔪᓯᒋᐊᕈᓐᓇᖅᓯᕗᑎᑦ, ᒥᔅᑕ ᕼᐃᒃᔅ. ᐱᖁᔨᕗᖔᕈᑦ 4 – 7(1): ᑎᒃᑯᐊᖅᓯᓂᖅ ᐅᖃᖅᑎᐅᑉ ᑐᖏᓕᐊᓂᑦ ᕼᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖁᔭᓐᓇᒦᒃ, ᒪᓕᒐᓕᐅᖅᑎᐅᖃᑎᒃᑳ. ᐅᖃᖅᑏ, ᐃᒪᐃᒻᒪᑦ ᓈᓴᐅᑎᓕᒃ 14, ᒪᓕᒐᓕᐅᕐᕕᒻᒥ ᐊᒻᒪᓗ ᓯᕗᓕᖅᑎᓄᑦ ᐱᖁᔭᖅ ᑖᓐᓇ ᒪᓕᒐᓕᐅᕐᕕᒃ ᓯᕗᓪᓕᖅᐹᕐᒥᒃ ᐃᒃᓯᕙᑎᓪᓗᒋᑦ ᓂᕈᐊᕐᓂᐊᖅᑐᑎᒃ ᐅᖃᖅᑎᐅᑉ ᑐᖏᓕᖓᓄᑦ. ᐃᒪᐃᒻᒪᑦ ᒪᓕᒐᓕᐅᕐᕕᒃ ᑎᒃᑯᐊᖅᓯᒍᓐᓇᖅᓯᒻᒪᑕ ᒪᓕᒐᓕᐅᕐᕕᒻᒥ. ᑕᐃᒪᐃᒻᒪᑦ ᐱᒋᐊᖅᑎᑦᓯᕗᖓ ᒪᓕᒐᓕᐅᖅᑎᐅᔪᖅ ᖁᑦᑎᑦᑐᒧᑦ ᕗᕆᐊᑦ ᐲᑕᓴᓐ ᒪᓕᒐᓕᐅᖅᑎᐅᔪᖅ ᐃᖃᓗᒃᑑᑦᑎᐊᕐᒧᑦ ᑎᒃᑯᐊᖅᑕᐅᖁᓪᓗᒍ ᐅᖃᖅᑎᐅᑉ ᑐᖏᓕᖓᓄᑦ ᒪᓕᒐᓕᐅᕐᕕᒻᒥ. ᖁᔭᓐᓇᒦᒃ, ᐅᖃᖅᑏ.

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 25 ᐅᖃᖅᑎ: ᖁᔭᓐᓇᕐᒦᒃ. ᐱᖁᔨᕗᖔᕈᑦ ᓈᒻᒪᑦᑐᖅ ᐱᖁᔨᕗᖔᕈᒻᒧᑦ. ᓂᕈᐊᓕᕆᔅᓯ. ᓈᒻᒪᓴᖅᑐᐃᑦ? ᓈᒻᒪᓴᙱᑦᑐᐃᑦ? ᑲᔪᓯᕗᖅ ᐱᖁᔨᕗᖔᕈᑦ. >>ᐸᑦᑕᒃᑐᖅᑐᑦ ᐅᖃᖅᑎ: ᐃᖃᓗᒃᑑᑦᑎᐊᖅ ᒪᓕᒐᓕᐅᖅᑎᖓ, ᒥᔅᑕ ᐲᑕᓴᓐ. ᐸᑐᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐊᖏᖅᑕᐅᔪᒪᓪᓗᖓ ᐱᖁᔨᕗᖔᕈᑎᒐ ᐅᓪᓗᒥ ᑲᒪᒋᔭᐅᖁᓪᓗᒍ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᖁᐊᓇ. ᒪᓕᒐᓕᐅᖅᑎ ᐊᖏᖅᑕᐅᔪᒪᕗᖅ ᑖᔅᓱᒥᖓ ᐱᖁᔨᕗᖔᕈᑎᒥᒃ ᐱᓕᕆᐊᖃᕈᒪᓪᓗᓂ. ᐋᒡᒑᖅᑐᖃᖅᐹ? ᑐᓴᙱᓐᓇᒪ. ᑲᔪᓯᒃᑲᓐᓂᕆᑦ ᒥᔅᑕ ᐲᑕᓴᓐ. ᐱᖁᔨᕗᖔᕈᑦ 5 – 7(1): ᑎᒃᑯᐊᖅᓯᓂᖅ ᐃᒃᓯᕙᐅᑕᐅᑉ ᑐᖏᓕᐊᓂᑦ ᑲᑎᒪᑐᐃᓐᓇᕐᓂᕐᒧᑦ ᐸᑐᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐃᒪᐃᒻᒪᑦ ᓈᓴᐅᑎᒃ 43, ᒪᓕᒐᓕᐅᕐᕕᒻᒥ ᓯᕗᓕᖅᑎᓄᓪᓗ ᐱᖁᔭᖅ ᐱᕕᖃᖅᑎᑦᑎᒻᒪ ᒪᓕᒐᓕᐅᕐᕕᒃ ᓯᕗᓪᓕᖅᐹᕐᒥᒃ ᐃᑦᓯᕙᑎᓪᓗᒋᑦ ᒪᕐᕉᓐᓂᒃ ᑐᖏᓕᐅᓂᐊᖅᑑᓐᓂᒃ ᐃᒃᓯᕙᐅᑖᓐᓂᒃ ᑲᑎᒪᔨᑐᐃᓐᓇᕐᓂᒃ. ᐊᒻᒪᓗ ᐃᒪᐃᒻᒪᑦ ᒪᓕᒐᓕᐅᕐᕕᒃ ᑲᔪᓯᒋᐊᕈᓐᓇᖅᓯᕗᖅ ᑎᒃᑯᐊᖅᓯᓂᕐᒥᒃ. ᑕᐃᒪᐃᒻᒪ ᐱᒋᐊᖅᑎᑦᓯᕗᖓ ᐸᓐᓂᖅᑑᕐᒧᑦ ᐊᐃᑉᐱᖅᑕᐅᓪᓗᓂ ᒪᓕᒐᓕᐅᖅᑎᒧᑦ ᔭᐃᒥ ᖃᑉᓗᑦᓯᐊᖅ ᐊᕐᕕᐊᑦ ᓂᒋᐊᓄᑦ ᐊᒻᒪ ᓴᐃᒪᑦ ᖁᓕᒃᑖᓇ ᒪᓕᒐᓕᐅᖅᑎᐅᔪᖅ ᖁᕐᓗᖅᑐᒧᑦ ᑎᒃᑯᐊᖅᑕᐅᖁᓪᓗᒋᑦ ᑐᖏᓕᐅᖁᓪᓗᒋᑦ ᐃᔅᓯᕙᐅᑕᐅᓂᕐᒧᑦ ᑲᑎᒪᔨᑐᐃᓐᓇᕐᓂᑦ. ᐅᖃᖅᑎ: ᖁᔭᓐᓇᒦᒃ, ᐱᖁᔨᕗᖔᕈᑦ ᓈᒻᒪᑦᑐᖅ. ᐱᖁᔨᕗᖔᕈᒻᒧᑦ ᓂᕈᐊᕈᓐᓇᖅᓯᕗᓯᑦ. ᓈᒻᒪᔅᓴᖅᑐᑦ? ᓈᒻᒪᓴᙱᑦᑐᑦ? ᓂᕈᐊᙱᑦᑐᑦ? ᐱᖁᔨᕗᖔᕈᑦ ᑲᔪᓯᕗᖅ. >>ᐸᑦᑕᖅᑐᖅᑐᑦ ᐅᖃᖅᑎ: ᐊᐃᕕᓕᐅᑉ ᒪᓕᒐᓕᐅᖅᑎᖓ ᒥᔅ ᐊᖑᑎᐊᓗᒃ, ᐃᓕᓴᕆᕙᒋᑦ. ᐱᖁᔨᕗᖔᕈᑦ 6 – 7(1): ᑎᒃᑯᐊᖅᓯᓂᖅ ᐊᐅᓚᑦᑎᓂᕐᒧᑦ ᐱᔨᑦᑎᕋᕕᐅᖃᖅᑕᐸᑦᑐᓄᓪᓗ ᑲᑎᒪᔩᑦ ᐊᖑᑎᐊᓗᒃ: (ᑐᓵᔨᑎᒍᑦ) ᖁᔭᓐᓇᒦᒃ, ᐅᖃᖅᑏ. ᐊᖏᖅᑕᐅᔪᒪᓪᓗᖓ ᑲᒪᒋᔪᒪᓪᓗᒍ ᐱᖁᔨᕗᖔᕈᑎᒐ ᐅᓪᓗᒥ. ᐅᖃᖅᑎ: ᓇᑯᕐᒦᒃ, ᒪᓕᒐᓕᐅᖅᑎ ᐊᖏᖅᑕᐅᔪᒪᕗᖅ ᐱᖁᔨᕗᖔᕈᑎᒥᒃ ᑲᒪᖁᔨᓪᓗᓂ ᐅᓪᓗᒥ. ᐋᒃᑳᖅᑐᖃᖅᐹ? ᑐᓴᙱᒃᑲᒪ ᑲᔪᓯᒋᑦ. ᐊᖑᑎᐊᓗᒃ: (ᑐᓵᔨᑎᒍᑦ) ᖁᔭᓐᓇᒦᒃ, ᐅᖃᖅᑏ. ᐃᒪᐃᒻᒪᑦ ᓈᓴᐅᑎᖓ 38, ᒪᓕᒐᓕᐅᕐᕕᒻᒥ ᓯᕗᓕᖅᑎᓄᑦ ᐱᖁᔭᖅ. ᒪᓕᒐᓕᐅᕐᕕᒃ ᓯᕗᓪᓕᖅᐹᕐᒥᒃ ᐃᒃᓯᕙᓂᖃᖅᑎᓪᓗᒋᑦ ᑎᒃᑯᐊᖅᓯᓂᐊᖅᐳᑦ ᐊᐅᓚᑦᓯᔩᑦ ᐱᔨᑦᓯᖅᑐᓕᕆᔨᑦ ᑲᑎᒪᔨᖏᓐᓄᑦ ᐊᒻᒪ ᐃᒪᐃᒻᒪ ᒪᓕᒐᓕᐅᕐᕕᒃ ᑎᒃᑯᐊᖅᓯᒍᓐᓇᖅᓯᕗᑦ. ᒫᓐᓇ ᑕᐃᒪᐃᒻᒪ ᐱᒋᐊᖅᑎᑦᓯᕗᖓ ᐊᐃᑉᐱᖅᑕᐅᓪᓗᓂ ᒪᓕᒐᓕᐅᖅᑎᒧᑦ ᖁᕐᓗᖅᑑᕐᒧᑦ, ᑖᒃᑯᐊ ᒪᓕᒐᓕᐅᖅᑏᑦ ᑎᒃᑯᐊᖅᑕᐅᖁᓪᓗᒋᑦ ᐊᐅᓚᑦᓯᔩᑦ ᐱᔨᑦᓯᖅᑏᓪᓗ ᑲᑎᒪᔨᖏᓐᓄᑦ: • ᔪᐊᔾ Hᐃᒃᔅ, ᒪᓕᒐᓕᐅᖅᑎ ᐃᖃᓗᐃᑦ ᑕᓯᓗᒃ • ᒍᐊᑕᑦ ᑲᐅᑐᖅ, ᒪᓕᒐᓕᐅᖅᑎ ᐅᖅᑯᕐᒥᐅᒃ • ᔮᓂ ᒪᐃᒃ, ᒪᓕᒐᓕᐅᖅᑎ ᐸᓐᓂᖅᑑᖅ; ᐊᒻᒪᓗ • ᑖᓂᐅᓪ ᖃᕝᕕᒃ, ᒪᓕᒐᓕᐅᖅᑎ ᑕᓯᐅᔭᕐᔪᐊᖅ

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 26 ᐊᒻᒪᓗ ᓱᓕ ᐱᒋᐊᖅᑎᑦᓯᕗᖓ ᒪᓕᒐᓕᐅᖅᑎ ᑯᕋᐃᒃ ᓯᒪᐃᓚᒃ ᒪᓕᒐᓕᐅᖅᑎᐅᔪᖅ ᖃᒪᓂᑦᑐᐊᕐᒧᑦ ᑎᒃᑯᐊᖅᑕᐅᖁᓪᓗᒍ ᓇᓪᓕᐅᒃᑯᒫᖅ, ᒥᓂᔅᑕᐅᖃᑕᐅᔪᓐᓇᕐᓗᓂ ᐊᐅᓚᑦᓯᔩᑦ ᐱᔨᑦᓯᖅᑏᓪᓗ ᑲᑎᒪᔨᖏᓐᓄᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᑖᓐᓇ ᐱᖁᔨᕗᖔᕈᑦ ᓈᒻᒪᒻᒪᑦ, ᐱᖁᔨᕗᖔᕈᒻᒧᑦ ᓂᕈᐊᒃᑲᓐᓂᓚᐅᕐᒥᒋᔅᓯ. ᓈᒻᒪᔅᓴᖅᑐᑦ? ᓈᒻᒪᔅᓴᖏᑦᑐᑦ? ᓂᕈᐊᙱᑦᑐᑦ? ᑲᔪᓯᕗᖅ ᐱᖁᔨᕗᖔᕈᑦ. >>ᐸᑦᑕᖅᑐᖅᑐᑦ ᐅᖃᖅᑎ: ᐅᖅᑯᕐᒥᐅᑦ ᒪᓕᒐᓕᐅᖅᑎᖓ ᒥᔅᑕ ᑲᐅᑐᖅ. ᑲᐅᑐᖅ: (ᑐᓵᔨᑎᒍᑦ) ᖁᔭᓐᓇᒦᒃ, ᐅᖃᖅᑏ. ᐊᖏᖅᑕᐅᔪᒪᓪᓗᖓ ᑲᒪᒋᔪᒪᓪᓗᒍ ᐱᖁᔨᕗᖔᕈᑎᒐ ᐅᓪᓗᒥ. ᐅᖃᖅᑎ: ᖁᔭᓐᓇᒦᒃ, ᐊᖏᖅᑕᐅᔪᒪᔫᒐᓗᐊᕉᖅ ᐱᖁᔨᕗᖔᕈᑎᒥᓂᒃ ᐱᓕᕆᐊᖃᕈᒪᓪᓗᓂ. ᐋᒃᑳᖅᑐᖃᖅᐸ? ᑐᓴᙱᓐᓇᒪ. ᒥᔅᑕ ᑲᐅᑐᖅ ᑲᔪᓯᒋᑦ. ᐱᖁᔨᕗᖔᕈᑦ 7 – 7(1): ᑎᒃᑯᐊᖅᓯᓂᖅ ᑲᑎᒪᔨᕋᓛᓕᐅᖅᑎᒃᑯᓐᓂᑦ ᑲᐅᑐᒃ: (ᑐᓵᔨᑎᒍᑦ) ᖁᔭᓐᓇᒦᒃ, ᐅᖃᖅᑏ. ᐃᒪᐃᒻᒪᑦ, ᓈᓴᐅᑎᖓ ᒪᓕᒐᖏᑦ ᒪᓕᒐᓕᐅᕐᕕᒻᒥᑦ. ᒪᓕᒐᓕᐅᕐᕕᒃ ᓯᕗᓪᓕᖅᐹᕐᒥᒃ ᐃᔅᓯᕙᓂᖃᖅᑎᓪᓗᒋᑦ ᓂᕈᐊᕐᓂᖃᓚᐅᖅᑎᓪᓗᒍ ᑖᒃᑯᓂᖓ ᑎᒃᑯᐊᖅᑎᑦᓯᓂᖅ ᑲᑎᒪᔨᕋᓛᓕᐅᖁᓪᓗᒍ ᐅᓂᒃᑳᕐᓗᑎ ᐊᑐᓕᖁᔨᕙᓪᓗᑎᓪᓗ ᐊᒻᒪᓗ ᐊᑲᐅᓈᓕᖅᐸᑦ ᑖᒃᑯᐊ ᑲᑎᒪᔨᕋᓛᖑᓂᐊᕐᓗᑎᑦ ᒪᓕᒐᓕᐅᕐᕕᒻᒥᑦ. ᐊᒻᒪᓗ ᐃᒪᐃᒻᒪᑦ ᒪᓕᒐᓕᐅᕐᕕᒃ ᑎᒃᑯᐊᖅᓯᔪᓐᓇᖅᓯᒻᒪᑦ. ᒫᓐᓇ ᑕᐃᒪᐃᒻᒪᑦ ᐱᒋᐊᖅᑎᑦᓯᕗᖓ ᐊᐃᑉᐱᖅᑕᐅᓪᓗᓂ ᒪᓕᒐᓕᐅᖅᑎᒧᑦ ᐃᖃᓗᑦᑑᑦᑎᐊᕐᒧᑦ. ᑖᒃᑯᐊ ᒪᓕᒐᓕᐅᖅᑏᑦ ᑎᒃᑯᐊᖅᑕᐅᖁᓪᓗᒋᑦ ᑎᒃᑯᐊᖅᑎᑦᓯᔨᐅᓂᐊᖅᑐᓄᑦ • ᑕᐃᕕᑦ ᐳᐊᑕ, ᒪᓕᒐᓕᐅᖅᑎ ᐅᖅᓱᖅᑑᖅ • ᐊᐃᕝᕙᓚHᐋ ᖃᒪᓂᖅ, ᒪᓕᒐᓕᐅᖅᑎ ᐊᒥᑦᑐᖅ; ᐊᒻᒪᓗ • ᑖᓂᐅᓪ ᖃᕝᕕᒃ, ᒪᓕᒐᓕᐅᖅᑎ ᑕᓯᐅᔭᕐᔪᐊᖅ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᖁᔭᓐᓇᒦᑦᑕᐅᖅ. ᐱᖁᔨᕗᖔᕈᑦ ᓈᒻᒪᑦᓯᐊᕐᒪᑦ. ᐱᖁᔨᕗᖔᕈᒻᒧᑦ ᓂᕈᐊᖁᔭᐅᓕᕋᑦᓯ. ᓈᒻᒪᔅᓴᖅᑐᐃᑦ? ᓈᒻᒪᓴᙱᑦᑐᐃᑦ? ᓂᕈᐊᙱᑦᑐᐃᑦ? ᐱᖁᔨᕗᖔᕈᑦ ᑲᔪᓯᕗᖅ. >>ᐸᑦᑕᖅᑐᖅᑐᑦ ᐅᖃᖅᑎ: ᑲᖏᖅᓯᓂᐅᑉ ᐅᐊᓐᓇᖓᓄᑦ ᐃᒡᓗᓕᒑᕐᔪᒻᒧᓪᓗ, ᒥᔅᑕ ᓴᒻᒧᖅᑐᖅ. ᓴᒻᒧᖅᑐᖅ: (ᑐᓵᔨᑎᒍᑦ) ᖁᔭᓐᓇᒦᒃ, ᐅᖃᖅᑏ. ᐅᖃᖅᑏ, ᐊᖏᖅᑕᐅᔪᒪᓪᓗᖓ ᐱᖁᔨᕗᖔᕈᑎᒐ ᐅᓪᓗᒥ ᑲᒪᒋᔪᒪᓪᓗᒍ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᒪᓕᒐᓕᐅᖅᑎ ᐊᖏᖅᑕᐅᔪᒪᔫᒐᓗᐊᖅ ᐱᖁᔨᕗᖔᕈᑎᖓ ᑲᒪᒋᔪᒪᓪᓗᓂᐅᒃ ᐅᓪᓗᒥ. ᐋᒃᑳᖅᑐᖃᖅᐸ? ᑐᓴᙱᓐᓇᒪ, ᒥᔅᑕ ᓴᒻᒧᖅᑐᖅ, ᐃᓕᓐᓄᑦ.

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 27 ᐱᖁᔨᕗᖔᕈᑦ 8 – 7(1): ᐅᖓᕙᕆᐊᖅᑕᐅᔪᖅ ᓄᖅᑲᕐᓂᖅ ᓴᒻᒧᖅᑐᖅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐱᒋᐊᖅᑎᑦᓯᕗᖓ ᐊᐃᑉᐱᖅᑕᐅᓪᓗᓂ ᐃᖃᓗᐃᑦ ᓂᐊᖁᙴᖅ ᑖᒃᑯᐊ ᒪᓕᒐᕐᓃᑦᑐᑦ 3, ᐃᒡᓗᒥ ᐃᒃᓯᕙᓕᕈᑎᒃ ᐃᓱᓕᑦᑎᓂᐊᖅᐳᖅ ᒫᔅᓯ 5, 2026−ᖓᓄᑦ ᓄᖅᑲᖓᓂᐊᖅᐳᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᖁᔭᓐᓇᕐᒦᑦᑕᐅᖅ. ᐱᖁᔨᕗᖔᕈᑎ ᓈᒻᒪᒻᒪᑦ, ᐱᖁᔨᕗᖔᕈᑎᒧᑦ. ᓂᕈᐊᕈᓐᓇᖅᓯᕗᓯ, ᓈᒻᒪᓴᖅᑐᑦ? ᓈᒻᒪᓴᙱᑦᑐᑦ? ᓂᕈᐊᙱᑦᑐᑦ, ᐱᑕᖃᙱ. ᑲᔪᓯᕗᖅ ᑖᓐᓇ ᐱᖁᔨᕗᖔᕈᑦ. >>ᐸᑦᑕᒃᑐᖅᑐᑦ ᐅᖃᖅᑎ: ᖁᔭᓐᓇᕐᒦᒃ. ᒥᔅ ᐳᕉᔅᑐ ᐃᓕᓴᕆᓚᐅᕐᒥᓚᒋᑦ. ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐊᖏᖅᑕᐅᔪᒪᓪᓗᖓ ᑲᑎᒪᔾᔪᑎᓄᑦ 5-ᒧᑦ ᐅᑎᑲᐃᓐᓇᕈᓐᓇᖁᓪᓗᑕ ᐅᓪᓗᒥ ᐅᖃᖅᑏ. ᐅᖃᖅᑎ: ᖁᔭᓐᓇᒦᒃ. ᑲᑎᒪᔨᐅᖃᑎᕗᑦ ᑲᑎᒪᔾᔪᑎᑦᑎᓐᓄᑦ ᓈᓴᐅᑎᓕᒃ 5−ᒧᑦ ᐅᑎᕈᒪᒻᒪᑦ. ᐊᖏᖅᐱᓰ? ᒥᔅ ᐳᕉᔅᑐ, ᑲᔪᓯᒋᑦ. ᑲᑎᒪᔾᔪᑎᒃᓴᑦ 5: ᐃᓕᑕᖅᓯᓂᖅ ᑐᓵᔭᖅᑐᖅᓯᒪᔪᓂᑦ ᒪᓕᒐᓕᐅᕐᔪᒻᒧᑦ ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᒪᓕᒐᓕᐅᖅᑎᐅᖃᑎᒃᑲᓗ. ᐊᓕᐊᓇᐃᑦ ᐅᐱᒍᓱᓪᓚᕆᔅᓱᖓᓗ ᑐᙵᓱᑦᑎᑦᑎᔪᒪᓪᓗᖓᓗ ᐃᒡᓗᒧᑦ ᓄᕙᓕᙵᖅ ᐱᐊᑎ ᐳᕉᔅᑐ ᖃᐅᔨᒪᔭᔅᓴᕆᕙᓯᐅᒃ ᐊᒥᓱᓯᒍᑦ ᐃᖅᑲᓇᐃᔮᕆᖃᑦᑕᖅᓯᒪᔭᒥᓄᑦ ᑐᓵᔨᐅᕙᑦᑐᓂ ᑐᑭᓕᐅᕆᔨᐅᕙᓚᐅᖅᑐᓂᓗ ᐋᔩᖃᑎᖃᕐᓂᖃᖅᑎᓪᓗᒍ ᓄᓇᑖᕈᑎᒥᑦ. ᐊᒻᒪᓗ ᐊᒥᓱᑦ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑐᐃᑦ ᐃᖅᑲᐅᒪᔪᔅᓴᐅᕗᑦ ᑐᑭᓕᐅᕇᓐᓇᖅᐸᓚᐅᕐᒪᑦ ᒪᓕᒐᓗᑦᑖᓂᒃ ᕿᒥᕐᕈᕙᑦᑕᑦᑎᓐᓂᒃ, ᐊᒻᒪᓗ ᑕᑯᒋᐊᖅᐸᑦᑕᑦᑎᓐᓂᒃ ᓄᓇᕗᒻᒥ. ᑐᙵᓱᒋᑦ ᐊᓈᓈᒃ. >>ᐸᑦᑕᒃᑐᖅᑐᑦ ᐳᕉᔅᑐ (ᑐᓵᔨᑎᒍᑦ): ᐅᖃᖅᑏ, ᐊᔭᒐ ᑯᕆᔅᑎ ᑕᒫᓃᒻᒥᒻᒪᑦ ᐃᕐᖑᑕᖓᓗ ᑐᙵᓱᑦᑎᔪᒪᓪᓗᓯᓗ ᑕᕝᕗᖓ ᐃᓪᓗᒧᑦ ᖁᔭᓐᓇᒦᑦᑎᐊᖅ ᑕᒪᔅᓯ ᒪᓕᒐᓕᐅᖅᑎᐅᖃᑎᒃᑲ. ᖁᔭᓐᓇᒦᒃ, ᐅᖃᖅᑏ. >>ᐸᑦᑕᒃᑐᖅᑐᑦ ᐅᖃᖅᑎ: ᓇᑯᕐᒦᕆᕙᒋᑦ ᐊᒻᒪᓗ ᑐᙵᓱᖁᑦᓯᐊᖅᐸᑦᑎᒋᑦ, ᐃᑉᐱᒋᖃᑎᒋᑦᓯᐊᖅᐸᑦᑎᒋᑦ ᒥᔅ ᐱᐊᑎ ᐳᕉᔅᑐ. ᐊᒻᒪᓗ ᐳᓛᕆᐊᖅᓯᒪᔪᐃᑦ ᑕᒪᐅᖓ ᒪᓕᒐᓕᐅᕐᕕᑦᑎᓐᓄᑦ. ᑲᑎᒪᔾᔪᑎᑦᑎᓐᓄᑦ ᐅᑎᕈᑦᑕ. ᖁᓕᓪᓗ ᓯᑕᒪᓪᓗ, ᓯᕗᓪᓕᖅᐹᕐᒥᒃ ᐅᖃᓕᒫᖅᑕᐅᓂᖏᑦ ᐱᖁᔭᔅᓴᑦ. ᐱᑕᖃᙱᒻᒪᑦ. ᑲᔪᓯᓗᑕ, ᑐᒡᓕᐊᓂᒃ ᐅᖃᓕᒫᖅᑕᐅᓂᖏᑦ ᐱᖁᔭᒃᓴᑦ. ᓱᓖᓛᒃ ᐱᑕᖃᙱᒻᒪᑦ. ᓈᓴᐅᑎᓕᒃ 16, ᑲᑎᒪᔾᔪᑎᒃᓴᐃᑦ. ᐃᖅᑲᐃᑎᑦᓯᒋᐊᕈᒪᒋᕗᖓ ᑖᓐᓇ ᒪᒥᐊᓇᖅ. ᐊᓪᓚᑦᑏ, ᐃᓕᓐᓄᑦ ᑐᓂᕙᕋ. ᑲᑎᒪᔾᔪᑎᒃᓴᑦ 16: ᑲᑎᒪᔾᔪᑎᔅᓴᐃᑦ ᑎᑎᕋᖅᑎ (ᑐᓵᔨᑎᒍᑦ): ᐊᔾᔨᓕᐅᖅᑐᖃᓚᖓᒻᒪᑦ ᒪᓕᒐᓕᐅᖅᑎᓕᒫᓂᒃ ᐱᔭᕇᖅ ᐊᓂᑐᐊᕈᑦᑕ ᒪᓕᒐᓕᐅᕐᕕᒻᒥ. ᑲᑎᒪᔾᔪᑏᑦ, ᒫᔅᓯ 5, 2026: 1. ᑐᒃᓯᐊᕐᓂᖅ 2. ᒥᓂᔅᑕᐃᑦ ᐅᖃᐅᓯᖏᑦ 3. ᒪᓕᒐᓕᐅᖅᑏᑦ ᐅᖃᐅᓯᖏᑦ 4. ᑭᐅᔾᔪᑎᕕᓂᕐᓄᑦ ᐃᓚᒋᐊᕈᑏᑦ 5. ᐃᓕᓴᖅᓯᓂᖅ ᐳᓛᖅᑐᓂᒃ 6. ᐅᖃᐅᓯᒃᑯᑦ ᐊᐱᖅᑯᑏᑦ

ᕿᑎᖅᑰᑦ, ᓄᕕᐱᕆ 20, 2025 ᓄᓇᕗᒻᒥ ᒪᓕᒐᓕᐅᕐᕕᒧᑦ ᑲᑎᒪᔾᔪᑏᑦ 28 7. ᑎᑎᖅᑲᒃᑯᑦ ᐊᐱᖅᑯᑏᑦ 8. ᑎᑎᖅᑲᒃᑯᑦ ᐊᐱᖅᑯᑎᓄᑦ ᑭᐅᔾᔪᑏᑦ 9. ᐱᒋᐊᕐᖓᐅᑎᓄᑦ ᐅᖃᐅᓰᑦ 10. ᐊᑎᓕᐅᖅᓯᒪᔪᑎᒍᑦ ᑐᒃᓯᕋᐅᑏᑦ 11. ᐊᑎᓕᐅᖅᓯᒪᔪᓄᑦ ᑭᐅᔾᔪᑏᑦ 12. ᐅᓂᒃᑳᑦ 13. ᑲᑎᒪᔨᕋᓛᑦ ᑲᑎᒪᔨᐅᓚᐅᑲᑦᑐᓪᓗ ᕿᒥᕐᕈᓂᖏᑦ ᐱᖁᔭᒃᓴᓂᒃ ᐊᓯᖏᓐᓂᓪᓗ 14. ᖃᐅᔨᒃᑲᐃᔾᔪᑎ ᐱᖁᔨᕗᖔᕈᑎᒃᓴᓂᒃ 15. ᖃᐅᔨᒃᑲᐃᔾᔪᑎ ᐱᖁᔭᒃᓴᑦ ᐅᖃᓕᒫᖅᑕᐅᓂᒃᓴᖏᓐᓂᒃ 16. ᓯᕗᓪᓕᖅᐹᒥ ᐅᖃᓕᒫᖅᑕᐅᓂᒃᓴᖏᑦ ᐱᖁᔭᒃᓴᑦ, 17. ᐱᖁᔨᕗᖔᕈᑏᑦ ᑐᒡᓕᐊᓂᑦ ᐅᖃᓕᒫᖅᑕᐅᓂᖏᑦ, 18. ᑐᒡᓕᐊᓂ ᐅᖃᓕᒫᖅᑕᐅᓂᖏᑦ ᐱᖁᔭᒃᓴᑦ, 19. ᑲᑎᒪᓂᖅ ᐱᖁᔭᒃᓴᓄᑦ ᐊᓯᖏᓐᓄᓪᓗ, ᐱᖁᔭᒃᓴᒃ 20. ᑲᑎᒪᓚᐅᖅᑎᓪᓗᒋᑦ ᐅᓂᒃᑳᑦ, 21. ᐱᖓᔪᐊᓐᓂ ᐅᖃᓕᒫᖅᑕᐅᓂᖏᑦ ᐱᖁᔭᒃᓴᑦ, 22. ᑲᑎᒪᔾᔪᑎᒃᓴᐃᑦ. ᖁᔭᓐᓇᒦᒃ, ᐅᖃᖅᑏ. >>ᐸᑦᑕᒃᑐᖅᑐᑦ ᐅᖃᖅᑎ: ᖁᔭᓐᓇᕐᒦᒃ. ᑖᒃᑯᐊ ᐃᖅᑲᐃᑎᒃᑲᓐᓂᕈᒪᒋᕙᒃᑲ ᒪᓕᒐᓕᐅᖅᑎᓕᒫᑦ ᓄᓇᕗᒻᒥᐅᓪᓗ, ᑖᒃᑯᐊ ᒥᓂᔅᑕᐃᑦ ᐊᖏᖅᑎᑕᐅᓂᐊᕐᒪᑕ ᑖᓐᓇᓗ ᓯᕗᓕᖅᑎᑖᕆᓵᖅᑕᕗᑦ ᑕᕝᕙᓂ ᒪᓕᒐᓕᐅᕐᕕᐅᑉ ᐃᓗᐊᓂ 4:30-ᐸᑦ ᓯᕿᙳᔭᖅ. ᑲᑎᒪᑦᓯᐊᖅᑐᐊᓘᕗᒍᑦ ᓯᕗᓪᓕᖅᐹᖅᓯᐅᑎᓐᓂ. ᑕᐃᒪᓗ ᐱᔭᕇᖅᐳᒍᑦ ᐅᓪᓗᒥ. >>ᐸᑦᑕᒃᑐᖅᑐᑦ ᐅᖃᖅᑎ: ᐃᖅᓱᖅᑏ, ᖃᐃᓚᐅᕐᒥᒋᑦ. >>ᓄᖅᑲᖅᑐᑦ 15:11